Kerch uf Pälzisch vom 26.8. 2012, Steh dabber uff Prot. Kerch

Kerch uf Pälzisch vom 26.8. 2012, Steh dabber uff Prot. Kerch

Kerch uf Pälzisch vom 26.8. 2012,
Steh dabber uff
Prot. Kerch Essinge am Kerwesunndach
Predicht vum Parre Dr. Friedrich Schmidt-Roscher, Haßloch
Die Geschicht vu de Aposchdel 12, 1-17
1. In seller Zeit hat de Keenich Herodes sei Hänn uff e paar Leit vun de Kerch geleeht, um ne
Beeses ansedun.
2. De Jakobus, de Bruder vum Johannes, hat er mit dem Schwert umbringe geloss.
3. Wierer gesiehn hat, dass des de jiedische Leit gefall hat, do hat er aa de Petrus gefanng
nemme geloss. Des war in de Daa vun den ungeseierte Brode.
4. Nochdem er ne feschgesetzt hat, hat er ne ins Gefängnis werfe losse. Un er hat vier Gruppe
vun immer vier Soldate de Befehl gebb, uff ne uffzubasse. Noom Passahfeschd wollt er ne
dem Volk vorfiehre.
5. De Petrus is im Gefängnis bewach wor, un vun den Gemeen hann se instännich fer ne zu Gott
gebeed.
6. In de Naacht bevor er vom Herodes vorgefiehrt wern hätt solle, do hat de Petrus zwische zwee
Soldate an e Kette angebunn geschloof und vor de Deer vum Gefängnis hann noch zwee
Poschde gestann.
7. Uff emol hat do de Engel vum Herrn gestann un des Licht is in die Zell gefall. Er hat de Petrus
in die Seid gestumpt, ne wach gemacht un gesaat: „Steh dabber uff!“ Die Kette sinn ihm vun
de Hänn abgefall.
8. Dann hat de Engel zu ihm gesaat: „Mach dich ferdich un schlupp in die Sandale!“ Seller hat
des so gemacht. Dann saat er zu ihm: „Schmeiss der de Mandel iwwer un laaf hinner mer her!“
9. Dann is er raus geloff und immer hinner ihm her. Er hat awwer net gewisst, dass des werklich
war, was dorch de Engel bassiert is, er hat gedenkt, er hat e Vision.
10. Nochdem se die erschde Wachposchde un de zweede passiert gehaat hann, sinn se an e
Eisedoor komm, wo in die Stadt gefiehrt hat. Sell is vun alleen uffgang. Wie se drauß warn,
sinn se e Stroß weit geloff. Uff emol war de Engel veschwunn.
11. Do is de Petrus erscht zu sich komm un hat gesaat: „Jetzt wees ich werklich, dass de Herr e
Engel geschickt hat, um mich aus de Klaue vum Herodes rauszureiße un vun dem, was die
Jude sich vesproch hann.
12. Wie er do driwwer simmeliert gehaat hat, ist er zum Haus vun den Maria geloff, der Mudder
vum Johannes, zu dem se als Markus gesaat hann, wo viel zusammegehockt hann, um se
beede.
13. Wie rer an die Deer vum Hofdoor geklobbt gehaat hat, is die Dienerin geloff komm, wo Rhode
gehees hat, und wollt uff mache.
14. Un wie sie die Stimm vum Petrus geheert hat, hat se vor lauter Freed die Deern net
uffgemach. Sell is ins Haus gerennt un hat Bescheid gebb, de Petrus steht vor de Deer.
15. Die annre hann zu ihr gesaat: „Du närrisches Hinkel!“ Sie hat awwer druff bestann, dass es so
is, wie se vezählt ha. Do hann die annre gemennt: „Es ist sei Engel.“
16. De Petrus awwer hat als weider an die Deer geklobbt. Wie se ihm uffgemach hann un ne
gesiehn hann, do warn se ganz newer de Kapp.
17. De Petrus hat mit de Hand gewunk, damit se uffheern zu babbeln. Dann hat er ne vezählt, wie
de Herr ihn aussem Gefängnis herausgeholt hat un saat: „Gewwen des im Jakobus un de
annere Brieder weiter.“ Un er is raus geloff und is wo annerscht hingang.
18.
Gott, sei jetzt bei uns mit deiner Kraft, damit mer mit unserem Mund, unsre Ohre un
unserm Herz, dei Wort recht weitersaan un a recht versteen. Amen.
Liebe Schwestre un Brieder,
des is mol e luschdichie Geschicht, wo de Lukas do vun den erschde Christeleid verzehle dut –
odder?. Do brauch mer zum Lache net in de Keller se gehn. Odder sich beim laute Lache die
Hand vor de Mund halle.
De Glawe is e ernschdie Sach. Awwer in de Kerch is es Lache net vebott. Stellen eich emol de
Petrus vor, wie der sellmols gelacht hat und gesaat hat. „Ich hann jo gedenkt, dass ich dräme dät.
Erscht wie der Engel veschwunn war, hann ich in mei Arm gepetzt und gemerkt, dass des werilich
bassiert ist.“
Odder die Rhode, die Dienerin. Die hat lang später noch vezehlt. „Stellen eich emol vor. Wie ich
die Stimm vum Petrus am Door geheert hab, do bin ich wie e närrischisches Hinkel dabber zu den
annre geloff un hann de Owwer-Aposchdel draus vor de Deer enfach stehen geloss.“
Es ist gut, wann mir Chrischteleit lache kenne – am beschte iwwer uns selwer. Es Boddepersonal
vun unserm Herrgott des is jo a e Sach fer sich. Die stellen sich manchmol ganz scheen dabbich
an. Do werd a de Herrgott im Himmel manchmol lache misse. Un wann mir freelich sinn un a mol
iwwer uns selwer lachen kenne, dann is des e Zeiche vum Vertraue zu unserm Herrgott, der uns e
freelich Herz schenke dut. De liewe Gott hat Humor u mer Christeleit sollen a iwwer die Welt lache
und net alles so ernscht nehmme.
Awwer es gibt noch e anner Seit, vun dere Geschicht. Do bleibt emm es Lache im Hals stecke. Do
vezehlt de Lukas wie die erschde Chrischteleit vum Herodes un seine Soldate vefolcht wor sinn.
Do losst der de Petrus in de Knascht werfe un de arm Jakobus e Kopp kerzer mache. Die
Weibsleit un die Mannsleit vun de erscht Gemeen in Jerusalem, die hann ganz scheen was
aushalle misse. Die hanns net so gut und bequem wie mir gehaat. Do hann manche Kopp und
Krache riskiert fer de Glawe an Jesus Christus. Die hann Mumm hann misse un kee Schiss, ums
Maul uff se mache un vum Jesus zu vezehele.
Es ist jo net immer so gut ausgang wie beim Petrus. De Jakobus is vum Herodes umgebrung wor.
Un de Petrus und de Paulus später in Rom aa. Des warn werkliche Märtyer, wie ma saat.
Bis uff de heitiche Daa wern uff dere ganze Welt Christeleit vefolcht und hanns schwer. Ja im
letzschde Jahrhunnerd sinn so viele Christe vun de Nazis un vun de Kommunischde umgebrung
wor, do war die Christevefolchung vum Herodes e Kinnergeburtedaa.
In viele Länner wo die Moslems es Saan hann, is es kee Spass, e Chrischt zu sinn. Do werd
denne es Läwe sauer un schwer gemacht. Un manchmal gebbts a so e paar Dollbohrer, wo mit
Bombe uff Kerche schmeiße und Christeleit umbringe wie in Nigeria. No Saudiarabie derf mer kee
Bibel mitbringe. Stellen eich des emol vor!
Des sollen mir net vegesse. Es is wichtig, wann mir fer die Leit beede un a uns bei de Regierunge
defor insetze, dass die in Freiheit in Glawe lewen derfe. Velleicht kennt die Merkel un die
Bundesrechierung net nur Panzer un annere Waffe in die reiche Golfstaate vekaafe, sonder a mol
es Maul uffmache un fer Relgionsfreiheit fer Christeleit intrete.
Die erschde Christeleit hanns also net leicht. Sie wern vefolcht. Sie hann Angscht um ihr Lewe un
traun sich nimmie uff die Stroß. Velleicht iwwerlehn sich jetzt e paar a, ob des mit dem Glawe
werklich so richtich is.
Awwer de Lukas vezehlt, dass die meeschde beisamme blieb sinn. Sie hann sich weiter getroff
und hann zusamme gebeet und war fernanner do.
Es kennt schun sinn, dass des en Grund war, warum die Gemeen zugenumm hat. Die Kerch hat
zusammegehall. Sie hann sich getroff un mitnanner gebeed. Sie hann druff vetraut, dass der
Herrgott ne helfe dut und se net im Stich losst.
Ich denk, an dene erschde Christe kennte mer uns fascht zweedausend Johr speeter alsemol e
Stickel abschneide. Bei uns kann doch jeder sei Glawe lewe. Bei uns werd kenner ins Gefängnis
geschmiss, wann er an Jesus Christus glawe dut. Mer muss kee Angscht hann sei Arbeitsplatz zu
verliere, wo mer Sundaas in die Kerch geht. Mer muss nur e bissl frieher uffstehn. Mer muss kee
Verfolchung ertrann, hegstens manchmal e bissl Spott vun denne wo met de Kerch nix anfange
kenne.
Un doch falls viel Leit so schwer, ihren Glawe se lewe. Was issen do bei uns los? Vun de erschte
Christe kennte mer lerne, dass mer zum Glawe annere Mannsleit und Weibsleit un a Kinner
braucht, wo zusame komme um mitnanner zu beede un a es Wort vun unserem Herrgott zu
heere.
Dann wermer feststelle und heeren, dass unner uns Engel sinn. Veleicht is es net immer so
deitlich wie domols beim Petrus. Wo der Engel de Petrus an de Soldate vorbei, befreie du tun
einserne Deere kee Roll meh spiele. Awwer ich bin mer sicher, dass so Wunner a mir erlewen
kenne.
So e Wunner, wo mer pletzlich uff en Engel trefft, der em helft zu lewe. Engel sinn in de Biwel die
Boode vun unserem Herrgott. Sie bassen uff, dass was schlimmes bassiert. Sie helfen emm
wedder uff oder fiehrn enaus in die Freiheet. Manchmol denke mer dann, dass mer dräme und
manchmol kann uns e ganz normaler Mensch zu me Engel wern.
Mir wird manchmol mei Fraa zume Engel. Dann, wann ich ebbes nimmie finne und wie e
närrisches Hinkel dorchs Haus renn und jedem die Schuld gebb, dann bleibt es ganz ruhig und
frooht: „Hascht Du schun dort geguckt.“ Un bassen uff! Ich saas net geere. Awwer oft hat se recht
– des Engelsche.
Un manchmol wern a ganz wildfremde Leit zume Engel. Wie in dere Stroß, wo ener vun zwe
Halbstarke angegriff wor is. All hann se sich außem Staab gemacht, um nur kenner uff de Kopp
zu krien. Awwer en Mann der si dezwische gang un hat geholf. Velleicht hat er dem Engel sei
Lewe zu vedanke.
Im Lewe kenne mer wie de Petrus uff Engel treffe. Denken dodriwwer nooh. Un vegessen net, fer
annre Leit zum Engel se weern.
Wann mir glawe un mit unserem Herrgott un anere Christeleit lewen, dann wern mir aa so
Geschichte erlewen und devun heere. Velleicht sogar uff dere Kerb. Un dann treffe mer uff en
Engel und der saat. „Komm steh dabber uff!“ Un der helft em wedder uff die Fieß.
Amen.