Maranao Bible - RCBI

Transcription

MAKSOD
MAKSOD 1
So Totolan ko Kiyaadena ko Doniya
Sii sa pagampaganay na inaden o Tohan so langit ago so doniya.
2 So doniya na da a mambobontal iyan ago da a madadalem on. Lomalangkap so
maliboteng ko liyawaw o kalodan; samaoto na so Roh o Tohan na dii mamagenebeneb ko
liyawaw o ig.
3 Pitero o Tohan a “Maaden so maliwanag,” na miyaaden den so maliwanag.
4 Miyailay o Tohan a mapiya so maliwanag na taros a piyakasibaya iyan so maliwanag
ago so maliboteng.
5 Bitowan iyan so maliwanag sa ‘kadaondaw,’ na so maliboteng na bitowan iyan sa
‘kagagawii.’ Giyoto a miyagagawii ago miyapita a so paganay a gawii.
6 Pitero o Tohan a “Maaden so kawang a mipagelet ko manga ig ago mapakasesenggaya
iyan so manga ig.”
7 Na pimbaalan o Tohan so kawang a miyapakasenggaya iyan so ig sa kababaan o
kawang ago so ig sii sa kaporoan iyan; na miyanggolaola oto.
8 Na bitowan iyan so kawang sa ‘langit.’ Giyoto a miyagagawii ago miyapita a so
ikadowa gawii.
9 Pitero o Tohan a “Matimo sa satiman a darpa so manga ig ko atag o langit kaan
makagemaw so mamara a lopa,” na sakamaoto a miyanggolaola den.
10 Bitowan iyan so mamara a lopa sa ‘kalopaan’ na so miyatimo a manga ig na bitowan
iyan sa ‘ragat.’ Na miyailay o Tohan a mapiya.
11 Mandiyadi na pitero o Tohan a “Kapamangetoan so kalopaan sa manga paotanotan ago
so langon a pitibarangan a pamomolan a pepemagod ago pepemangonga.” Na sakamaoto
a miyanggolaola den
12 Ka miyakaaden so kalopaan sa paotanotan ago so langon a pitibarangan a pamomolan.
Na miyailay o Tohan a mapiya.
13 Giyoto a miyagagawii ago miyapita a so ikatelo gawii.
14 Pitero o Tohan a “Maaden so manga solo sii ko langit a mapakasenggaya iran so
kadaondaw ago so kagagawii. Mabaloy siran a manga nanao a kitendo ko manga mosim
ago so manga gawii ago so manga ragon,
15 Na mamanindaw siran ko langit a pemakaliwanag ko doniya.” Na sakamaoto a
miyanggolaola den,
16 Ka pimbaalan o Tohan so dowa timan a mangaala a solo a so alongan a makapepaar
ko kadaondaw ago so olan a makapepaar ko kagagawii. Inembaalan iyan mambo so
manga bitoon.
17 Tiyago iyan so manga solo ko langit kaan iran mapakaliwanag so doniya
18 Ago kandatoan iran so kadaondaw ago so kagagawii, ago mapakasibaya iran pen so
maliwanag ago so maliboteng. Na miyailay o Tohan a mapiya.
19 Giyoto a miyagagawii ago miyapita a so ikapat gawii.
20 Pitero o Tohan a “Mangapepeno so manga ig sa mbarambarang den a manga
panenedaan, na makapelayolayog mambo so manga papanok ko kawang.”
21 Na inaden o Tohan so mangaala a seda ko ragat, so langon a pitibarangan a manga
baraniyawa sii ko ig, ago so oman i pisosonan a papanok. Na miyailay o Tohan a mapiya.
22 Riyakmatan iyan siran langon a tig iyan a “Mbabad ago ndakedakel so manga
panenedaan kaan mamangipeno ko ragat, na ndakedakel mambo so manga papanok sii ko
doniya.”
23 Giyoto a miyagagawii ago miyapita a so ikalima gawii.
24 Pitero o Tohan a “Makaaden so lopa sa langon a pitibarangan a manga meranaranap,
maana a so manga pangangayamen, manga paoledoled ago manga binatang.” Na
sakamaoto a miyanggolaola den,
25 Ka inembaalan o Tohan so langon angkai a pitibarangan a meranaranap. Na miyailay
niyan a mapiya.
26 Oriyan iyan na pitero o Tohan a “Mbaal tano sa manosiya a misayan ko ginawa tano
ago mipelagid tano. Na kandatoan iran so manga seda ko ragat, so manga papanok ko
kawang, ago so langon o manga pangangayamen, manga iila a binatang ago manga
paoledoled.”
27 Kagiya ka maoto na inaden o Tohan so manosiya a inisayan iyan siran ko ginawa
niyan.
Minisayan siran ko ginawa o Tohan ko kiyaadena niyan kiran.
Inaden iyan siran a mama ago babay.
28 Na riyakmatan iyan siran, na pitero iyan kiran a “Mbabawata kano ago ndakedakel
kaan iyo mapeno ago kambayabayai so doniya. Ndatoi niyo so manga seda ko ragat, so
manga papanok ko kawang, ago so langon a meranaranap ko kalopaan.”
29 Na pitero iyan pen a “Inibegay aken rekano so langon a pitibarangan a pereperan ago
manga onga a kayo a pangenengken iyo.
30 Ogaid na so langon a binatang, manga papanok ago manga paoledoled, maana a so
oman i baraniyawa na aya pangenengken iran na so manga paotanotan ago so dii
meraraon a pamomolan.” Na miyanggolaola oto.
31 Inilay o Tohan so langon taman a inembaalan iyan na sayana a mapiya. Giyoto a
miyagagawii ago miyapita a so ikanem gawii.
MAKSOD 2
Miyapasad den so kiyaadena ko langit ago so doniya a rakes o langon a madadalem on.
2 Kagiya maoma so ikapito gawii na miyapasad den o Tohan so galebek a pinggolaola
niyan; na domike sekaniyan sii ko ikapito gawii ko langon a galebek iyan.
3 Piyakambarakat iyan so ikapito gawii ago inisenggay niyan a soti, ka domike sekaniyan
on sabap sa miyapasad iyan den so langon a galebek iyan a kapangaden.
4 Giyanan i totolan ko kiyaadena ko langit ago so doniya.
Si Adam ago si Sittihawa
Isako pagembaalan o Allah so doniya ago so langit
5 Na den a ba pamomolan sii sa doniya aya pen o ba paotanotan a ba romiti ko lopa ka
kagiya da pen pakiorani o Allah, ago da den a manosiya a ba on makapembasok;
6 Ogaid na aden a manga ig a pepekapoon ko didalem a lopa a pepekabasa ko langon o
liyawaw o kalopaan.
7 Samaoto na kominowa so Allah sa bayanek sii ko lopa na linimbag iyan a mama.
Inisengaw niyan on sa ngirong so napas a pepangoyag, na miyabaloy so mama a
baraniyawa.
8 Miyamola so Allah sa sapadan sii sa Iden sa tampar sa sebangan na roo niyan tiyago so
mama a linimbag iyan.
9 Piyamakato on o Allah so oman i pisosonan o kayo a mapiya i paras ago mapiya a ken
so onga niyan. Sii ko look o sapadan na ron matatago so kayo a pembegay sa
kapeketokawi ko mapiya ago so marata.
10 Aden a lawasaig a petoga sii sa Iden a pepekabasa ko sapadan. Sii ko onaan o sapadan
na miyambaabaad on so lawsaig sa pat.
11 Aya ngaran o paganay a lawasaig na Pison a pegondas ko melilibeta ko kalopaan a
Habila a aden a bolawan on.
12(Lombos so bolawan a matatago sangkoto a darpa, ago aden mambo a manga ambar
ago manga montiya roo.)
13 Aya ngaran o ikadowa a lawasaig na Giyon. Pegondas ai ko melilibeta ko kalopaan a
Kos.
14 Aya ngaran o ikatelo a lawasaig na giya Tigris a pegondas sa sebangan a Asiriya. Na
aya ikapat a lawasaig na giya Yopratis.
15 Kinowa o Allah so mama na tiyago iyan ko sapadan a Iden a kibir ago pekaipaten on.
16 Na bigan iyan so mama sa sogoan a tig iyan a “Makapembayabaya ka koman ko onga
o apiya antonaa kayo a matatago ko sapadan
17 Liyo ron so onga o kayo a pembegay sa kaketokawi ko mapiya ago so marata. Di ka
den ken ko onga angkoto a kayo, ka o makakan ka on na mataan a petay ka sangkoto a
gawii,”
18 Na pitero o Allah a ”Kena a ba mapiya i ba mabobotong so mama. Ipagembaal aken
sekaniyan sa domadait on a salinggogopa.”
19 Sa da pen ai kanggolaola na miyalimbag o Allah poon ko bote so langon a manga
binatang ago manga papanok. Na piyangowit iyan siran ko mama ka pagilain iyan o
antonaa i ipemeto niyan kiran, na apiya antonaa i inibeto o mama ko oman i bibiyag a
kaaden na giyoto den i ngaran iyan.
20 Kagiya ka maoto na piyamametowan o mama sa ngaran so langon o manga
pangangayamen, manga papanok ago manga binatang.
Ogaid na da pen a ba salinggogopa a domadait ki Adam.
21 Kagiya ka maoto na piyakipangenepan o Allah so mama sa torog. Sii ko katotoroga
on na kinowa niyan so satiman ko gosok o mama ago piyakandemet iyan bo so sapo a
kinowaan iyan ko gosok.
22 Na biyaloy o Allah a babay so gosok a miyakowa niyan ko kilid o mama; na inowit
iyan so babay ko mama.
23 Na pitero o mama a
"Na, katii den i datar aken, a tolan a poon ko tolan aken
ago sapo a poon ko sapo aken.
Mbetowan sekaniyan sa ‘babay,’
sabap sa miyakowa poon ko mama.”
24 Giyanan I kesabapan sa kangganati o mama ko ama iyan ago so ina iyan ka petepi
siran ago so karoma niyan, na pembaloy siran a isaisa.
25 Si Adam ago so karoma niyan na palaya siran matatalandiyang, na kena a ba siran
pekeya.
MAKSOD 3
So Da Kaparatiyaya o Manosiya
So nipay na aya mala i akal a di so apiya antonaa a binatang a inaden o Allah. Na iniise o
nipay ko babay a “Ba matamataan a pitero rekano o Tohan a ‘Di kano den ken ko onga o
apiya antonaa a kayo sii ko sapadan’?”
2 Na tig o babay ko nipay a “Pekakan kami ko onga o manga kayo sii ko sapadan
3 Liyo ron so onga o kayo a matatago ko look o sapadan. Ka pitero o Tohan a ‘Di kano
ken ko onga angkoto a kayo ago di niyo pen ai sekoa, ka o nggolaolaa niyo na petay
kano.' "
4 “Matamataan a kena a ba niyo petain!” a tig o nipay ko babay.
5 “Ka aya sabap a kiyateroa on o Tohan na katawan iyan a sii ko gawii a kapakakan iyo
ron na kebekar so manga mata niyo na kebaloy kano a lagid o Tohan, ka ketokawan iyo
so mbidaan o mapiya ago so marata.”
6 Na kagiya mailay o babay a so onga angkoto a kayo na mapiya a ken, ago mapiya i
paras a kapekeilaya niyan on, ago ikesigi ini a ikebaloy niyan a maongangen na
kominowa sekaniyan on na kiyan iyan. Na bigan iyan on pen so karoma niyan a
mipageepeda iyan na komiyan on mambo.
7 Sarta den a miyanga bebekar so manga mata iran na kiyatokawan iran a
matatalandiyang siran. Kagiya ka maoto na piyakandaidair iran mamanai so manga raon
a higos na inisapeng iran ko lawas iran.
8 Si ko kaperimon iyan na miyaneg o mama ago so karoma niyan so dalepek o Allah a
pelalakaw sii ko sapadan. Na mitepok siran sii ko manga kayo ko sapadan ka piyagna
iran rekaniyan a ginawa iran.
9 Ogaid na tiyalowan o Allah so mama a tig iyan a “Anda ka sesaya?”
10 Inisembag o mama a “Miyaneg aken seka sii ko sapadan, na miyalek ako ago mitepok
ako ka matatalandiyang ako.”
11 “Antawaa i mitero reka on sa matatalandiyang ka?’ a iniise on o Allah. “Ba ka
miyakakan ko onga o kayo a inisapar aken reka a di ka on ken?”
12 Tig o mama a “So babay a inibegay ngka raken a ped aken, na sekaniyan i migay raken
on ko onga o kayo, na kiyan aken.”
13 Na pitero o Allah ko babay a “Antonaa bes angkai a pinggolaola ngka?”
Tig o babay a “So nipay na piyagakalan ako niyan, na giyoto i kiyapakakan aken on.”
So Kiyapangokom o Allah
14 Mandiyadi na pitero o Allah ko nipay a
“Sabap sa pinggolaola ngka oto na
kemorkaan ka a di so langon a pangangayamen ago so langon a maila a binatang!
Kidola ngka so tiyan ka,
na kekan ka so bayanek
taman ko kaooyagoyag ka.
15 Pakaperidoain ko seka ago so babay,
ago so mambo so mbawataan ka
ago so mbawataan iyan.
Sesaan iyan so olo ngka
na tokaan ka so palo niyan.”
16 Na pitero iyan mambo ko babay a
“Tanto aken a pekaregenen so kaoogat ka,
na mbaliliten ka sa masakit ko kapembawata a ka.
Apiya oto na kebabayaan ka pen so karoma ngka,
na pendatoan ka niyan den.”
17 Na aya pitero iyan ki Adam na “Sabap sa piyakineg ka so karoma ngka ko kiyakana
ngka ko onga o kayo a inisapar aken reka a ‘Di ka on ken,' na
“Kesintaan so lopa sabap reka;
na aya bo a kakeragona ngka on ko ken ka
na makapenggolalan ko maregen a galebek taman ko kaooyagoyag ka.
18 Pemangeto on so mangararata a otan ago manga soroken,
na pekakan ka sa baden dii mamangeto a manga pamomolan.
19 Aya bo a kapekakan ka sa pereperan
na sabap ko kapengangatingi reka nggalebek
taman den ko kapakakasoy ngka ko bote,
ka giyanan i poonan ka;
pimbaalan ka poon ko bayanek,
na pembaloy ka bo a bayanek.”
20 Aya inibeto o Adam ko karoma niyan na Sittihawa ka kagiya sekaniyan i pembaloy a
ina o langon o manosiya.
21 Na inimbaal o Allah sa manga nditaren a kobal a ayam so Adam ago so karoma niyan,
na pinditaran iyan siran.
Piyakaawa si Adam ago si Sittihawa ko Sapadan
22 Oriyan na pitero o Allah a “Imanto na miyabaloy so mama a lagid tano ko kiyatokawi
niyan ko mbidaan o mapiya ago so marata. Na di on mapeparo o ba sekaniyan makakowa
ko onga o kayo a pembegay sa kaoyagoyag ago makakan sekaniyan on taros a
makapeginetaw sa taman sa pakataman.”
23 Kagiya ka maoto na piyakaawa sekaniyan o Allah ko Sapadan a Iden ka
pakapenggalebeken iyan ko lopa a ron miyakowa.
24 Kagiya mabogaw niyan roo so mama na tiyagoan iyan so sebangan a Sapadan a Iden
sa manga malaikat ago pekedeg a pedang a dii nggigilinggiling ko mbalabala a petemeng
ko lalan a ipesong ko kayo a pembegay sa kaoyagoyag.
MAKSOD 4
Si Kain ago si Abil
Rimbang i Adam so karoma niyan a Sittihawa, na miyaogat sekaniyan na inimbawata
iyan si Kain. Na pitero i Sittihawa a “Nggolalan ko tabang o Allah na miyakaaden ako sa
wata a mama.”
2 Oriyan iyan na mimbawata sekaniyan sa salakaw a wata a mama a si Abil.
Si Abil na mimbaloy a pananagikor sa bilibili, na si Kain na taribasok.
3 Miyakaisa a gawii na somiyapaat si Kain ko Allah ko miyaragon iyan.
4 Si peman si Abil na siyombali iyan so paganay a nati o isa ko bilibili niyan na so den so
aden a kalemboan on i inisapaat iyan ko Allah. Miyasoat so Allah ki Abil
ago so inisapaat iyan,
5 Ogaid na da niyan tarimaa si Kain ago so inisapaat iyan. Kagiya ka maoto na
miyakarimeng so paras i Kain ka tanto a kiyararangitan.
6 Mandiyadi na pitero o Allah ki Kain a “Ino ka pekerarangiti? Ino pekarimeng so paras
ka?
7 O patot so di ngka dii nggolaolaan na ba ka di ketarima? Ogaid na o di patot so di ngka
dii nggolaolaan na magaayan so dosa sii ko pintoan ka, ka masisinganin iyan a kandatoan
ka niyan, ogaid na disomala a mipaar ka nan.”
8 Mandiyadi na pitero i Kain ko pagari niyan a Abil a “Somong ta ko dii mbabasokan.”
Na sii ko kandodoo iran na piyamabaan i Kain so pagari niyan na biyono iyan.
9 Na iniise o Allah ki Kain a “Anda so pagari ngka a si Abil?”
“Di ko katawan,” a inisembag iyan. “Ba saken i pepegipat ko pagari aken?”
10 Tig o Allah a “Antonaa bes i pinggolaola ngka.” So rogo o pagari ngka na penggoraok
raken a pepekapoon ko lopa.
11 Kasintaan ka imanto, na di ka den makapenggalebek ko lopa a mingganga ko
kiyatarimaa niyan ko rogo o pagari ngka ko kiyabonoa ngka on.
12 O temepeng ka mbasok na da den a ba reka ipegeper o lopa. Pembaloy ka a da a
kebalingan iyan a dii melaolaog ko doniya.”
13 Pitero i Kain ko Allah a “So indaneg raken na mala a di so kekena ko!
14 Pembogaon ako ngka imanto ko lopa, na kebelag ako ko kamamasaan ka. Pembaloy
ako a da a kebalingan aken a dii melaolaog ko doniya, na apiya antawaa i pekatoon raken
na mbonoon ako niyan.”
15 Ogaid na pitero on o Allah a “Kena, ka o aden a makabono reka, Kain, na makapito ka
misaop.” Na giyoto a tiyagoan o Allah si Kain sa tiyap kaan di kebono o apiya antawaa i
pekatoon on.
16 Na miyawa den si Kain ko kamamasaan o Allah na miyaling ko inged a Nod sa
sebangan a Iden.
So Kiyababadan ki Kain
17 Romimbang si Kain ko karoma niyan na miyaogat, na inimbawata iyan si Inok. Sa
masa oto na pembangon si Kain sa bandar a inged a inisangay niyan ko wata iyan a mama
a si Inok.
18 Mimbawata si Inok sa wata a mama a si Irad; si Irad na aya ama I Mehodsail; si
Mehodsail na aya ama i Metosail, na si Metosail na aya ama i Lamek.
19 Miyangaroma si Lamek sa dowa kataw a babay a aya manga ngaran iran na si Adah
ago si Silah.
20 Inimbawata i Adah si Yabal; apoapoan sekaniyan o manga taw a kibabaling ko manga
barombarong ago pepemangoyag sa pangangayamen.
21 Aya ngaran o pagari niyan na si Yobal a apoapoan mambo o langon a
paboboniboniyan sa kotiyapi ago insi.
22 Si mambo si Silah na mimbawata sa mama a si Tobal-Kain a mimbaloy a panenesel sa
langon a pitibarangan a kasangkapan a galang ago potaw. So babay i Tobal-Kain na si
Naamah.
23 Pitero i Lamek ko manga karoma niyan a
“Hey Adah ago Silah, pamakinega ko niyo;
sekano a manga karoma i Lamek, na pakinega niyo so manga katero aken.
Miyakabono ako sa mangoda a mama sabap sa bintol ako niyan
ago kiyapalian ako niyan.
24 O makapito misaop si Kain,
na makapito polo ago pito misaop si Lamek.”
Si Sito ago si Inos
25 Romimbang peroman si Adam ko karoma niyan, na mimbawata sa wata a mama na
bitowan iyan sa Sito a tig iyan a “Bigan ako o Tohan sa salakaw a wata a mama a
minisambi ki Abil a miyabono i Kain.”
26 Si mambo si Sito na aden a wata iyan a mama, na iningaranan iyan sa Inos.
Sangkoto a manga gawii na mipoon mananalo so manga taw ko Ingaran o Allah.
MAKSOD 5
Ipoon ki Adam taman ki Nok
Giyai i salsila ko kiyababadan ki Adam:
Isako maaden o Tohan so manosiya na pimbaalan iyan siran a mipelagid o Tohan.
2 Inaden iyan siran a mama ago babay, na sii ko kiyaadena niyan kiran na riyakmatan iyan
siran ago bitowan iyan sa ‘Manosiya.’
3 Kagiya makapagidad si Adam sa magatos ago telo polo ragon na mimbawata sekaniyan
sa mama a lagid iyan, na bitowan iyan sa Sito.
4 Oriyan o kinimbawataan ki Sito na miyakapaginetaw pen si Adam sa miyakawalo gatos
ragon, na mimbabawata pen sa ped a manga wata a mama ago babay.
5 Miniraot so idad i Adam sa siyaw gatos ago telo polo ragon, na miyatay sekaniyan.
6 Kagiya makapagidad si Sito sa magatos ago lima ragon na mimbawata sa mama a si
Inos.
7 Oriyan iyan na miyakapaginetaw pen si Sito sa miyakawalo gatos ago pito ragon, na
mimbabawata pen sa ped a manga wata a mama ago manga babay.
8 Miniraot so idad i Sito sa siyaw gatos ago sapolo ago dowa ragon, na miyatay
sekaniyan.
9 Kagiya makapagidad si Inos sa siyaw polo ragon na mimbawata sa mama a si Kinan.
10 Oriyan iyan na miyakapaginetaw pen si Inos sa miyakawalo gatos ago sapolo ago lima
ragon, na mimbabawata pen sa ped a manga wata a mama ago manga babay.
11 Miniraot so idad i Inos sa siyaw gatos ago lima ragon, na miyatay sekaniyan.
12 Kagiya makapagidad si Kinan sa pito polo ragon na mimbawata sa mama a si
Mahalalil.
13 Oriyan iyan na miyakapaginetaw pen si Kinan sa miyakawalo gatos ago pat polo
14 Miniraot so idad i Kinan sa siyaw gatos ago sapolo ragon, na miyatay sekaniyan .
15 Kagiya makapagidad si Mahalalil sa nem polo ago lima ragon na mimbawata sa mama
a si Yared.
16 Oriyan iyan na miyakapaginetaw pen si Mahalalil sa miyakawalo gatos ago telo polo
17 Miniraot so idad I Mahalalil sa walo gatos ago siyaw polo ago lima ragon, na miyatay
sekaniyan.
18 Kagiya makapagidad si Yared sa magatos ago nem polo ago dowa ragon na
mimbawata sa mama a si Inok.
19 Oriyan iyan na miyakapaginetaw pen si Yared sa miyakawalo gatos ragon, na
20 Miniraot so idad i Yared sa siyaw gatos ago nem polo ago dowa ragon, na miyatay
sekaniyan.
21 Kagiya makapagidad si Inok sa nem polo ago lima ragon na mimbawata sa mama a si
Mitosilah.
22 Oriyan iyan na ipageepeda i Inok so Tohan sa miyakatelo gatos ragon, na
mimbabawata pen si Inok sa ped a manga wata a mama ago manga babay.
23 Miniraot so idad iyan sa telo gatos ago nem polo ago lima ragon.
24 Mipageepeda i Inok so Tohan, na baden miyada ka kinowa o Tohan.
25 Kagiya makapagidad si Mitosilah sa magatos ago walo polo ago pito ragon na
mimbawata sa mama a si Lamek.
26 Oriyan iyan na miyakapaginetaw pen si Mitosilah sa miyakapito gatos ago walo polo
ago dowa ragon, na mimbabawata pen sa ped a manga wata a mama ago manga babay.
27 Miniraot so idad i Mitosilah sa siyaw gatos ago nem polo ago siyaw ragon, na miyatay
sekaniyan.
28 Kagiya makapagidad si Lamek sa magatos ago walo polo ago dowa ragon na
mimbawata sa wata a mama.
29 Iningaranan iyan sa Nok a tig iyan a “Giyangkai a wata na mapekapiya niyan so manga
ginawa tano ko di tano dii kanggolaolaa ko langon a maregen a galebek tano a minisabap
ko kinisintaan o Allah ko lopa.”
30 Oriyan o kinimbawataan ki Nok na miyakapaginetaw pen si Lamek sa miyakalima
gatos ago siyaw polo ago lima ragon, na mimbabawata pen sa ped a manga wata a mama
ago manga babay.
31 Miniraot so idad i Lamek sa pito gatos ago pito polo ago pito ragon, na miyatay
sekaniyan.
32 Kagiya makapagidad si Nok sa lima gatos ragon, na mimbabawata sekaniyan sa telo
kataw a wata a mama a si Sim, si Ham ago si Yapet.
MAKSOD 6
So Kadostaan o Manosiya
Isako poon den ndakel so manga taw ko doniya ago di siran dii mbabawata sa manga
babay,
2 Na aden a manga mbawataan o Tohan a miyailay iran a manga tataid so manga babay a
mbawataan o manosiya na piyamangaroma iran so kiyababayaan iran on.
3 Sangkoto a masa na pitero o Allah a “Kena a ba taman sa pakataman a kakakaden o
niyawa ko ko lawas o manga taw, ka matag siran manosiya. Aya bo a taman a
kapepeginetaw iran na magatos ago dowa polo ragon.”
4 Sangkoto a manga gawii na aden a mangaala a taw sii sa doniya a kiyababadan siran ko
manga mbawataan o Tohan ago so manga babay a mbawataan o manosiya. Siran i
mangaala i kabatowa ago kababantogan a manga mama ko miyangaoona a gawii.
5 Miyailay o Allah a mala i kadostaan so manga taw sa doniya, ka so dii mapamikir o
oman i isa kiran na lalayon marata.
6 Na misendit sekaniyan ko kiyambaali niyan ko manosiya sii sa doniya na miyarata a
ginawa niyan.
7 Kagiya ka maoto na pitero o Allah a “Peyopasen aken ko doniya so manosiya a
miyaaden aken, na kena bo a ba so manga taw ka so pen so manga ayam, manga
paoledoled ago so manga papanok, ka miyakasendit ako ko kiyaadena ko kiran.”
8 Ogaid na inikalimo o Allah si Nok.
Nabi Nok
9 Giyai I totolan ki Nok. Maontol a mama si Nok na sekaniyan bo I taw a da a ba on
kidaway sii ko masa niyan, na ipageepeda iyan pen so Tohan.
10 Aden a telo kataw a manga wata i Nok a manga mama a si Sim, si Ham ago si Yapet.
11 Mikerata so doniya ko kapekeilaya on o Tohan ago mapepeno a kapanganiyaya.
12 Miyailay o Tohan a mala a kiyakerata o doniya ka miyamakarata i olaola so langon a
taw ron.
13 Na pitero o Tohan ki Nok a “Miyapamikir aken a pageposen aken so langon o
manosiya ka lomiyangkap ko doniya so kapepenganiyaya iran; na mataan den a
mbinasaan ko siran ago so doniya.
14 Kagiya ka maoto na mbaalen ka a ginawa ngka sa mala a kapal a kayo a kalipapa.
Perowarowangi ngka ago lapisi ngka sa lita so soled iyan ago so liyo niyan.
15 Giyai i kapembaali ngka on: aya kalendo iyan na magatos ago lima polo ka mitros, aya
kabelang iyan na dowa polo ago lima ka mitros ago aya kaporo iyan na sapolo ago lima
ka mitros.
16 Atepi ngka so kapal a aya pangeleban iyan na tenga sa mitros a poon ko bibir iyan
taman ko atep. Mbaali ngka sa pintoan so kilid o kapal, na pakatelowa ngka ka andana.
17 Pekitalingomaan aken sa mala a bagiyaw so doniya a ikebinasa o langon a baraniyawa
a inaden ko atag o langit. Pematay so langon taman sii sa doniya.
18 Ogaid na magembaal ako sa kapasadan mipantag reka; soled kano ko kapal, seka ago
so karoma ngka taman ko manga wata a ka a mama ago so manga karoma iran.
19 Pamakasoleda ngka pen ko kapal so nggagisa ka tiwalaya ko oman i pisosonan o
manga meranaranap kaan iyo mapangoyag a rakes o manga ginawa niyo.
20 Song reka so nggagaisa ka tiwalaya ko oman i pisosonan o papanok, oman i pisosonan
o binatang ago oman i pisosonan o paoledoled a pemakipangoyag reka.
21 Rorani ngka so kapal ko langon a pitibarangan a pangenengken a kekan iyo na
taliyonga ngka on ka aya niyo kaoyagan ago so manga ayam.”
22 Na so den so langon taman a inisogo o Tohan ki Nok i pinggolaola niyan.
MAKSOD 7
So Mala a Bagiyaw
Na pitero o Allah ki Nok a “Soled ka den ko kapal, seka ago so langon o pamiliya ngka
ka seka bo i miyailay aken a maontol sangkai a masa.
2 Pakaonota ngka so pito ka tiwalaya ko oman i halal a ayam, ago isa ka tiwalaya ko
oman i karam a ayam,
3 Ago pito mambo ka tiwalaya ko oman i pisosonan o papanok kaan siran langon
mapangoyag ago mababad peroman ko dalem o doniya.
4 Ka makapito pen gawii na pekioranan aken den so doniya ko soled o pat polo
kadaondaw ago kagagawii, ka peyopasen aken ko liyawaw o lopa so oman i baraniyawa a
kiyambaalan aken.”
5 Na ininggolalan i Nok so langon a inisogo on o Allah.
6 Nem gatos ragon a idad i Nok isako makatalingoma so mala a bagiyaw ko doniya.
7 Si Nok ago so karoma niyan a rakes o manga wata iyan.ago so manga karoma iran na
somiyoled siran ko kapal kaan on mamakalindong sabap ko bagiyaw.
8 So titiwalaya ko halal ago karam a manga binatang, so manga papanok ago so langon a
paoledoled ko lopa
9 A manga mama ago manga babay na somiyoled siran ko kapal a ped i Nok a aya den
inisogo o Tohan ki Nok.
10 Kagiya maipos so pito gawii na miyakatalingoma den ko doniya so mala a bagiyaw.
11 Sii ko kiyanem gatos ragon a idad I Nok ko ikasapolo ago pito gawii ko ikadowa a
olanolan na sii den sangkoto a gawii na mimbebeto so langon a manga bowalan ko
didalem a lopa, na piyangalelekaan pen so manga gimowa o ig roo sa langit.
12 Na pendeseng so oran sii ko doniya ko soled o miyakapat polo kadaondaw ago
kagagawii.
13 Sii sangkoto a gawii na miyakasoled den si Nok ago so karoma niyan ko kapal a rakes
o manga wata iyan a si Sim, Ham ago si Yapet ago so telo kataw a manga karoma iran.
14 Sakamaoto mambo na so oman i pisosonan o binatang, pangangayamen ago
paoledoled, ago so langon a pitibarangan a manga papanok
15 A so titiwalaya ko oman i baraniyawa na somiyoled siran ko kapal a ped i Nok
16 Ka giyoto den i inisogo o Tohan ki Nok. Na likeban o Allah so kapal kagiya
mamakasoled siran on den.
17 Miyakapat polo gawii a dii kambagiyawi ko doniya, na sii ko kapepegorog o ig na
iniletaw niyan so kapal ko kaporoan o lopa.
18 Tanto a mala a kiyaorog ago kiyalangkap o ig sii ko doniya, na pekeanodanod mambo
so kapal ko liyawaw o ig.
19 Na pegiseg pen a kapepekadalem o ig taman sa miyanga sasangkap so langon a manga
poporo a palaw ko pirowarowangan o doniya.
20 Na pepekadalem den so ig taman sa manga pat repa a kiyasangkapa ko manga palaw.
21 Miyamatay so langon a bibiyag a inaden sii sa doniya; so manga papanok, manga
pangangayamen, manga binatang, manga paoledoled ago so langon a manosiya.
22 Miyamatay so langon o manga baraniyawa ko kalopaan.
23 Giyanan i kiyapayopasa o Tohan ko langon taman a bibiyag a matatago ko lopa; so
manga manosiya, manga binatang, manga paoledoled ago so manga papanok na palaya
miyapapas ko doniya. Aya bo a miyalamba na si Nok ago so siran oto a miyaped iyan ko
kapal.
24 Na da den tirak so ig ko doniya ko soled o miyakamagatos ago lima polo gawii.
MAKSOD 8
So Kiyaipos o Bagiyaw
Ogaid na tatagoon o Tohan sa ginawa niyan si Nok ago so langon a manga binatang ago
pangangayamen a miyaped iyan ko kapal. Na piyakasamber iyan so ndo ko doniya na
mipoon den tomirak so ig.
2 Miyanga oolen so manga bowalan ko didalem a lopa, na gominek mambo moran ka
piyangalelekeban so manga gimowa o ig roo sa langit.
3 Petirak so ig sa maito-maito, na so kiyapopos o magatos ago lima polo gawii na minirat
den so ig.
4 Sii ko ikasapolo ago pito gawii ko ikapito olan na tomiked so kapal ko isa a palaw sii sa
kapalawan sa Ararat.
5 Petirak pen so ig taman ko ikasapolo olan, na sii ko paganay a gawii ko ikasapolo olan
na miyamakagemaw so poro o manga palaw.
6 Kagiya makapat polo gawii na likaan i Nok so dirowasa a inembaalan iyan ko kapal
7 Na miyoka sekaniyan sa kakowak. Na da ini makakasoy ka baden milayolayog ko
mbalabala taman ko kiyati o langon a ig ko lopa.
8 Mandiyadi na miyoka si Nok sa marapatik kaan iyan katokawi o tominirak den so ig.
9 Ogaid na da den a ba ketoon o marapatik a ketanaan iyan ka lomalangkap pen so ig ko
langon o kalopaan, na mimbalingan ki Nok sii ko kapal. Na kiyawa i Nok na inisoled
iyan.
10 Nomiyayaw sekaniyan sa miyakapito gawii na piyakalayog iyan peroman so marapatik
a poon ko kapal.
11 Kagiya makakasoy ron ko kaperimon iyan na aden a matotoka iyan a mailaw a raon a
kayo a olibi, na kiyatokawan i Nok a tominirak den so ig ko doniya.
12 Na nomiyayaw peroman sa miyakapito gawii na piyakalayog iyan bo so marapatik,
ogaid na da rekaniyan den kasoy.
13 Sii ko kiyanem gatos ago saragon a idad i Nok sii ko paganay a gawii ko paganay a
olanolan na miyati so ig ko doniya. Kinowa i Nok so midadapeng ko kapal na miyailay
niyan a pekemara so lopa.
14 Na sii ko ikadowa polo ago pito gawii ko ikadowa olanolan na miyamara den piyapiya
so kalopaan.
15 Mandiyadi na pitero o Tohan ki Nok a
16 “Peliliyo kano ko kapal, seka ago so karoma ngka taman ko manga wata a ka ago so
manga karoma iran.
17 Pamakaonota ngka pen lomiyo so langon a meranaranap a ped ka a so manga papanok,
so manga ayam ago so langon a paoledoled kaan siran mamakambabawata ago manga
bababad ago manga bebembar ko doniya.”
18 Kagiya ka maoto na lominiyo den si Nok a rakes o karoma niyan ago so manga wata
iyan ago so manga karoma iran.
19 So langon a manga ayam, manga paoledoled ago manga papanok a so oman i
pekeoyagoyag sii ko kalopaan na mililiyo ko kapal a mitondotondog so oman i pisosonan
iran.
Mikorban si Nok
20 Mandiyadi na mimbaal si Nok sa aparan ko Allah, na kominowa sekaniyan sa satiman
ko oman i pisosonan o halal a ayam ago halal a papanok na piyangorban iyan ai ko Allah
a petotongen.
21 Miyabaw o Allah so mamot na inikasoat iyan, na pitero iyan ko ginawa niyan a “Di
aken den ipesinta so lopa sabap ko manosiya apiya pen marata so masisinganin o poso
iran ipoon ko kawawatai kiran; ago di aken den mbinasaan so langon a manga baraniyawa
a datar o miyanggolaola ko den.
22 “Taman ko kaaaden pen o doniya
na so kapeseod ago so dii kaperagon,
so matenggaw ago so mayaw,
so pangolaon ago so pangoran,
so kadaondaw ago so kagagawii
na di den tereg.”
MAKSOD 9
So Kapasadan o Allah Mipantag ki Nok
Riyakmatan o Tohan si Nok ago so manga wata iyan a mama ka pitero iyan kiran a
“Mbabawata ago ndakedakel kano kaan mamangipeno ko doniya so kebabadan rekano.
2 So langon a manga binatang sa kalopaan, manga papanok sa kawang, manga paoledoled
ko lopa ago manga seda sa ragat na pengaalek rekano ago pemalagoy; mapapalad siran
den rekano ko kipepaaren iyo kiran.
3 Imanto na kekan iyo siran langon ka ipembegay aken siran rekano a pangenengken iyo a
lagid o kinibegan aken on rekano ko leletean.
4 “Ogaid na di kano den ken sa sapo a aden pen a rogo on, ka so rogo na aya niyan
kaoyagoyag.
5 Disomala a misaop so kapamonoa ko taw. Seopan aken so oman i binatang a
makabono sa manosiya, ago so pen mambo so oman i taw a makabono sa isen iyan a
manosiya.
6 “Apiya antawaa i pekabono sa manosiya,
na kebono mambo o manosiya;
ka sii ko kiyambaali o Tohan ko manosiya
na inisayan iyan sa ginawa niyan.
7 Sekano peman na mbabawata ago ndakedakel kano kaan mabembar ko doniya so
kebabadan rekano.”
8 Na pitero pen o Tohan ki Nok ago so manga wata iyan a
9 “Pagembaalan ko imanto so kapasadan aken mipantag rekano ago so manga moriyataw
niyo
10 Ago so langon a manga baraniyawa a miyaped iyo; so manga papanok, manga
pangangayamen ago manga binatang a so langon a merananap a miyaped iyo a mililiyo ko
kapal.
11 Na giyai i kapasadan aken; itopa ko rekano a di den kapeperomanan o ba mapolang a
bagiyaw so langon a oyagoyag a inaden, ago di den maaden peroman so bagiyaw a
ikebinasa o doniya.”
12 Tig pen o Tohan a “Giyai i nanao sangkai a da a ikepos iyan a kapasadan a
pagembaalan aken mipantag rekano ago so langon a baraniyawa:
13 Tegoon aken so boloto aken sii ko manga gabon, na kebaloy ai a nanao ko kapasadan
aken mipantag ko doniya.
14 Igira a pegowitan aken sa manga gabon so doniya ago pepekagemaw so boloto sii ko
manga gabon
15 Na peketademan aken so initopa ko rekano ago so langon a pisosonan a baraniyawa a
di den kapeperomanan o ba mabaloy so ig a bagiyaw a ikebinasa o langon a oyagoyag a
inaden.
16 Igira a pepekagemaw so boloto sii ko manga gabon na pekeilay aken ago peketademan
aken so da a ikepos iyan a kapasadan o Tohan mipantag ko langon a baraniyawa ko
doniya.”
17 Pitero o Tohan ki Nok a “Giyanan den i nanao ko kapasadan a inembaalan aken
mipantag ko langon a oyagoyag a inaden ko doniya.”
So Manga Wata i Nok a manga Mama
18 So manga wata i Nok a manga mama a mililiyo ko kapal na si Sim, si Ham ago si
Yapet. (Si Ham na aya ama i Kanaan.)
19 Giyangkai a telo kataw a manga wata i Nok na aya manga apoapoan o langon a taw sa
doniya.
20 Sa masa oto na mipoon den mamomolaan si Nok, na miyamamola sa manga obas.
21 Kagiya makainom sekaniyan ko arak a ig a obas na miyabereg, na miniga ko
barombarong iyan a matatalandiyang.
22 Si Ham a aya ama i Kanaan na miyailay niyan so ama iyan a matatalandiyang na taros
a piyanotol iyan ko dowa kataw a pagari niyan sa liyo.
23 Ogaid na kominowa si Sim ago si Yapet sa kimon na inisablay iran ko dowa a waga
iran, na miyangendod siran ko ama iran na inisapeng iran on so kimon ko katatalandiyang
iyan. Na sabap sa makatatalikod siran on na da iran den mailay so katatalandiyang o ama
iran.
24 Kagiya makanaw si Nok ko kabebereg iyan ago kiyatokawan iyan o antonaa i inikidia
on o ari a wata iyan
25 Na pitero iyan a
“Pesintaan si Kanaan!
Pembaloy sekaniyan a lebi a mababa a oripen
o manga pagari niyan.”
26 Pitero iyan pen a
“So podi na rek o Allah a Tohan i Sim!
Mabaloy si Kanaan a oripen i Sim.
27 Pakalaan o Tohan so pangingedan i Yapet;
makakaden si Yapet ko manga barombarong i Sim,
na mabaloy si Kanaan a oripen iyan.”
28 Kagiya maipos so bagiyaw na miyakapaginetaw pen si Nok sa miyakatelo gatos ago
lima polo ragon.
29 Miniraot so idad iyan sa siyaw gatos ago lima polo ragon, na miyatay sekaniyan.
MAKSOD 10
So manga Mbawataan o manga Wata i Nok
Giyai i salsila o manga moriyataw o manga wata i Nok a manga mama a si Sim, si Ham
ago si Yapet. Mimbabawata siran mambo sa manga mama ko kiyaipos o bagiyaw.
So manga Mbawataan i Yapet
2 So manga wata i Yapet a manga mama na
Si Gomer, Magog, Maday, Yaban, Tobal, Misik ago si Tiras.
3 So manga wata i Gomer a manga mama na
si Askenas, Ripat ago si Togarma.
4 So manga wata i Yaban a manga mama na
si Ilisah, Tarsis, Kitim ago si Rodanim.
5(So manga moriyataw iran na miyangabebembar ko kilid a manga ragat.)
Giyanan den so manga mbawataan i Yapet a so kiyababadan kiran na kibabaling ko
mbarambarang den a manga inged iran ago manga nasiyon a so oman i isa ka bangsa na
aden a rek iyan a basa.
So manga Mbawataan i Ham
6 So manga wata i Ham a manga mama na
si Kos, Misir, Pot ago si Kanaan.
7 So manga wata i Kos a manga mama na
si Sibas, Habilah, Sabtah, Raamah ago si Sabtikas,
So manga wata i Raamah a manga mama na
Si Sibas ago si Didan.
8 Si Kos na aya ama i Nimrod a mimbaloy a mala i gees ko doniya.
9 Mapasang sekaniyan i kapanganop ko kapekeilaya on o Allah. Giyanan i dii kateroa o
manga taw sa “Datar o Nimrod a mapasang i kapanganop ko kapekeilaya on o Allah!”
10 Aya maaped ko paganay a ndatoan iyan na giya manga siti a Babilon, Irik, Akad ago
Kalni a so kalangolangan ai na sii sa inged a Babiloniya.
11 Poon sangkoto a inged na somiyong sekaniyan sa Asiriya a ron iyan piyamangon so
manga siti a Niniba, Rihobot Ir, Kalah
12 Ago giya Risin a sii matatago ko pageletan a Niniba ago so kababantogan a siti a
Kalah.
13 Si Misir na aya apoapoan o manga taw sa Lod, Anam, Lihab, Napto,
14 Patros, Kaslo (a miyakapoon on so manga Pilistiyo) ago Kapetor.
15 Si Kanaan na aya ama i Sidon a paganay a wata iyan, ago apoapoan sekaniyan mambo
o manga Hitiyo,
16 Manga Hibosiyo, manga Amoriyo, manga Girgasiyo,
17 Manga Hibiyo, manga Arkiyo, manga Siniyo,
18 Manga Arbadiyo, manga Simariyo ago manga Hamatiyo. Miyamangiparak angkoto a
manga bangsa a kiyababadan ki Kanaan,
19 Na aya kaolad o pangiingedan iran na poon sa Sidon taman sa Gerar a marani sa Gasa
sii sa tampar sa pagabagatan, na taman peman sa Sodom, Gomorah, Admah ago giya
Siboim a marani sa Lasa sii sa tampar sa sebangan.
20 Giyanan den so manga mbawataan i Ham a so kiyababadan kiran na kibabaling ko
mbarambarang den a manga inged ago nasiyon iran a so oman i isa ka bangsa na aden a
rek iyan a basa.
So manga Mbawataan i Sim
21 Si Sim a kaka a pagari i Yapet na mimbabawata mambo sa manga mama. Si Sim na
aya apoapoan o langon o manga taw sa Ibir.
22 So manga wata i Sim a manga mama na
si Ilam, Asor, Arpaksad, Lod ago si Aram.
23 So manga wata i Aram a manga mama na
si Os, Hol, Gitir ago si Misik,
24 Si Arapaksad na aya ama i Silah, na si Silah na ama i Ibir.
25 Mimbawata si Ibir sa dowa kataw a mama.
So isa kiran na iningaranan sa Pilig, ka sii ko masa niyan na miyabaad so manga taw sa
doniya. Aya ngaran o pagari niyan na si Yoktan.
26 Si Yoktan na aya ama i Almodad, Silip, Hasarmabet, Hirah,
27 Hadoram, Osal, Diklah,
28 Obal, Abimail, Sibas,
29 Opir, Habilah ago si Yobab. Langon siran manga wata i Yoktan a manga mama.
30 Aya kaolad o pagiingedan iran na poon sa Misa taman sa Sipar ko kapalawan a darpa
sii sa tampar sa sebangan.
31 Giyanan den so manga mbawataan i Sim a so kiyababadan kiran na kibabaling ko
mbarambarang den a manga inged ago nasiyon iran a so oman i bangsa kiran na aden a
rek iyan a basa.
32 Langon angkoto a manga taw na manga mbawataan o manga wata a mama i Nok a
manga mama. So oman i salsila iran na mipepasod ko manga bangsa a kiyababadan
kiran. Miyakapoon kiran so langon a manga nasiyon a miyabembar ko doniya ko
kiyaipos o bagiyaw.
MAKSOD 11
So Maporo a Lantawa
Sa pagampaganay na so langon a taw sa doniya na sasatiman i basa ago ndatadatar so di
iran dii katero.
2 Sii ko kapepegiseg iran sa tampar sa sebangan na miyakaoma siran sa kapantaran a lopa
sii sa Babiloniya na miyaginged siran roo.
3 Mimbibitiyarai siran a tig o isa ko ped iyan a “Mamagogopa tano ka mamanowang tano
sa manga bata a pekategasen tano ko apoy.” Kagiya ka maoto na miyosar siran sa manga
bata ko di iran dii kambalay, ago lapot a miyakandekedeketa on.
4 Mandiyadi na pitero iran a “Imanto na bangonan tano a ginawa tano sa bandar a inged a
aden a lantawa on a pekarampay so poro iyan ko langit, ka pakibantog tano so ngaran
tano kaan tano di kiparak ko pirowarowangan o doniya.
5 Ogaid na miyanog so Allah ka pagilain iyan so bandar a inged ago so lantawa a
pembangonen o manga manosiya.
6 Na pitero o Allah a “Maiisaisa angkanan a manga taw ago sasatiman pen i basa. Na o
giyanan i kiyapoonan iran nggolaola na imanto na da a ba iran di mapenggolaola ko apiya
antonaa a mapemikir iran.
7 Na, manog tano roo ka goketen tano so basa iran kaan siran di makapesisinabota.”
8 Sii sangkai a okit na iniparak siran o Allah ko dalem o doniya, na ginekan iran mangon
so bandar a inged.
9 Giyanan i sabap a kiyabetowi ron sa “Babil,” ka roo giyoket o Allah so basa o langon a
manosiya, ago poon roo na iniparak iyan siran ko pirowarowangan o doniya.
Ipoon ki Sim taman ki Abram
10 Giyai i salsila o kiyababadan ki Sim:
Kagiya makadowa ragon a kiyaipos o bagiyaw na miyakapagidad si Sim sa magatos
ragon, na mimbawata sekaniyan sa mama a si Arpaksad.
11 Oriyan iyan na miyakapaginetaw pen si Sim sa miyakalima gatos ragon, na
12 Kagiya makapagidad si Arpaksad sa telo polo ago lima ragon na mimbawata sa mama
a si Silah.
13 Oriyan iyan na miyakapaginetaw pen si Arpaksad sa miyakapat gatos ago telo ragon,
na mimbabawata pen sa ped a manga wata a mama ago manga babay.
14 Kagiya makapagidad si Silah sa telo polo ragon na mimbawata sa mama a si Ibir.
15 Oriyan iyan na miyakapaginetaw pen si Silah sa miyakapat gatos ago telo ragon, na
mimbabawata pen sa ped a manga mama ago manga babay.
16 Kagiya makapagidad si Ibir sa telo polo ago pat ragon na mimbawata sa mama a si
Pilig.
17 Oriyan iyan na miyakapaginetaw pen si Ibir sa miyakapat gatos ago telo polo ragon, na
18 Kagiya makapagidad si Pilig sa telo polo ragon na mimbawata sa mama a si Riyo.
19 Oriyan iyan na miyakapaginetaw pen si Pilig sa miyakadowa gatos ago siyaw ragon,
na mimbabawata pen sa ped a manga wata a mama ago manga babay.
20 Kagiya makapagidad si Riyo sa telo polo ago dowa ragon na mimbawata sa mama a si
Sirog.
21 Oriyan iyan na miyakapaginetaw pen si Riyo sa miyakadowa gatos ago pito ragon, na
mimbabawaa pen sa ped a manga mama ago babay.
22 Kagiya makapagidad si Sirog sa telo polo ragon na mimbawata sa mama a si Nahor.
23 Oriyan iyan na miyakapaginetaw pen si Sirog sa miyakadowa gatos ragon, na
24 Kagiya makapagidad si Nahor sa dowa polo ago siyaw ragon na mimbawata sa mama
a si Tirah.
25 Oriyan iyan na miyakapaginetaw pen si Nahor sa miyakamagatos ago sapolo ago
siyaw ragon, na mimbabawata pen sa ped a manga wata a mama ago manga babay.
26 Kagiya makapagidad si Tirah sa pito polo ragon na mimbabawata sa manga mama a si
Abram, si Nahor ago si Haran.
27 Giyai so totolan ki Tirah: Si Tirah na aya ama i Abram, Nahor ago si Haran. Si Haran
na mimbawata sa mama a si Lot.
28 Isako oyagoyag pen si Tirah a ama i Haran na miyatay si Haran ko siti a Or sa
Babiloniya a ron inimbawata.
29 Miyangaroma si Abram ago si Nahor. Aya ngaran o karoma i Abram na si Saray, ago
so karoma i Nahor na si Milka a wata i Haran a aya mambo ama i Iskah.
30 Si Saray na da a wata iyan ka di pembawata.
31 Piyamakaonot i Tirah so wata iyan a si Abram, so apo iyan a si Lot a aya wata i Haran
ago so miyakamong on a babay a si Saray a karoma i Abram na palaya siran gomiyanat sa
siti a Or sa Babiloniya ka song sa inged a Kanaan. Ogaid na kagiya makaoma siran sa siti
a Haran na komiyaden siran roo.
32 Kagiya makapagidad si Tirah sa dowa gatos ago lima ragon na miyatay sekaniyan roo
sa Haran.
MAKSOD 12
Siyogo o Allah si Abram
Sa masa na pitero o Allah ki Abram a “Awai ngka so inged ka, so manga tonganay ngka
ago so walay o ama a ka na song ka ko inged a pekiilay aken reka.
2 “Mbaloin ko so manga mbawataan ka a mala a nasiyon,
ago perakmatan aken seka pen.
Mbaloin ko so ngaran ka a kababantogan,
ago perarakmat ka mambo ko manga ped.
3 Perakmatan aken so siran oto a perakmat reka,
ago ipesinta aken so apiya antawaa i pesinta reka;
na kerakmatan so langon a taw ko doniya a makapenggolalan reka.”
4 Sa masa oto na pito polo ago lima ragon a idad i Abram; na gomiyanat sekaniyan sa
Haran ka giyoto i pitero on o Allah, na miyonot on mambo si Lot.
5 Piyakaonot i Abram so karoma niyan a si Saray ago so pakiwataan iyan a si Lot na
initelon iyan pen so langon a tamok ago manga talasogoay a miyakowa iran sa Haran, na
miyantap siran sa inged a Kanaan.
Kagiya makaoma siran roo
6 Na tomiyaros lomalakaw si Abram sii sangkoto a inged taman den ko katatagoan ko
mala a kayo sa Morah sii sa Sikim. Sa masa oto na mababaling pen so manga Ikanaanen
sangkoto a inged
7 Ogaid na mipeyag so Allah ki Abram na pitero iyan on a “Imbegay aken angkai a inged
ko manga mbawataan ka.” Na mimbaal roo si Abram sa aparan ko Allah a miyakapeyag
on.
8 Oriyan iyan na miyawa sekaniyan roo ka miyantap ko manga bobongan sa sebangan a
Bitil, na mikampo ko masesebangan a Bitil ago masesedepan a Ay. Mimbaal roo pen sa
aparan na tiyalowan iyan on so Ingaran o Allah.
9 Oriyan oto na tomiyaros lomalakaw si Abram a pegantap sa pagabagatan a Kanaan.
Si Abram sii sa Misir
10 Sangkoto a masa na peteonen so inged a Kanaan, na sabap ko karegen o taon na
tomiyaros lomalakaw si Abram sa pagabagatan taman sa Misir ka mbeling roo sa di bo
matey.
11 Kagiya makarani sa Misir na pitero iyan ko karoma niyan a Saray a “Katawan aken a
mataid ka a babay.
12 Na amay ka mailay ka o manga Imisiren na mapemikir iran a seka i karoma ko, na
mbonoon ako iran ago pakapegoyagen ka iran.
13 Kapedipedi ka bo na teroa ngka a babay aken seka. Sabap roo na di ako petay, ka ba
ako baden kapepiyapiyai sabap reka.”
14 Na giyoto den i miyanggolaola, ka sii ko kiyapakaoma i Abram sa Misir na miyailay o
manga Imisiren a tanto a mataid a babay si Saray.
15 Miyailay sekaniyan mambo o ped ko manga sanasanaan o solotan sa Misir na piyodi
iran on so kataid iyan. Kagiya ka maoto na miyawit si Saray ko torogan o solotan.
16 Pipiyapiyaan iyan si Abram sabap ki Saray na bigan iyan sa manga bilibili, manga
sapi, manga kimar, manga onta ago manga oripen a manga mama ago manga babay.
17 Ogaid na tiniyoba o Allah sa mala a paniyakit so solotan ago so langon a taw ko
torogan iyan sabap ko kiyakowaa niyan ki Saray a karoma i Abram.
18 Kagiya ka maoto na piyakisogoan o solotan si Abram na pitero iyan on a “Antonaa bes
angkai a pinggolaola ngka raken? Ino ngka raken da teroa a karoma ngka sekaniyan?
19 Ino ngka peteroa a babay ngka sekaniyan a aya ko ron kiyakowaa a mapengaroma ko?
Na, katii so karoma ngka. Kowaa ngka den ago awa kano den!”
20 Na somiyogo so solotan ko manga pagtaw niyan, na piyakaliyo iran si Abram ko inged
a rakes o karoma niyan ago so langon taman a rek iyan.
MAKSOD 13
Miyakambelag si Abram ago si Lot
Kagiya makaawa sa Misir na lomiyalakaw si Abram sa tampar sa pagotaraan a pegantap
sekaniyan ko pagabagatan a Kanaan a ped iyan si karoma niyan ago so langon taman
iyan; na miyonot on mambo si Lot.
2 Tanto a kawasa si Abram ka madakel a pangangayamen iyan a rakes o madakel a pirak
ago bolawan.
3 Na giyanatan iyan a pagabagatan a Kanaan na minisegiseg pen lomalakaw a pegantap sa
Bitil. Miyakaoma sekaniyan ko darpa a pageletan a Bitil ago giya Ay a ron gowani
miyakakampo
4 A ron iyan mambo pimbaalan so paganay a aparan. Na roo tiyalowan i Abram so
Ingaran o Allah.
5 Si Lot a moonot ki Abram na aden mambo a manga bilibili niyan, manga kambing ago
manga sapi a rakes o pamiliya niyan ago manga talasogoay.
6 Kagiya ka maoto na sii ko katitimo iran langon na di petoon so lopa a kapenateban o
manga ayam iran ka tanto den a miyakadakel, na di siran keoyag ko satiman a darpa.
7 Na miyakapepawala so manga pananagikor i Abram ago so manga pananagikor i Lot.
(Sa masa oto na so manga Ikanaanen ago so manga Pirisiyo na kibabaling mambo
sangkoto a inged.)
8 Mandiyadi na pitero i Abram ki Lot a “Kapedipedi ka bo na o ba ta makapewala aya
pen o ba so manga pananagikor aken ago so rek ka, ka tonganaya ta.
9 Makapemili ka ko apiya antonaa mapiya i kebayaan ka ko langon angkai a kalopaan.
Aya mapiya na mbelag ta. O magantap ka sa diwang na sii ako sa kawanan, na o
magantap ka sa kawanan na sii ako sa diwang.”
10 Na milangkalangkaw si Lot na miyailay niyan a so langon a kapantaran sa Yordan na
pemangembowatan a ig so mbalabala on ka datar o Sapadan o Allah ago datar pen o
inged a Misir sii sa tampar sa Sowar. (Sangkai a masa na da pen binasaa o Allah so siti a
Sodom ago giya Gomorah.)
11 Kagiya ka maoto na miyatomo i Lot so langon a kapantaran a Yordan na miniseg
sekaniyan den sa tampar sa sebangan. Giyanan i okit a kiyapakambelag angkoto a dowa
kataw.
12 Mitelimbagak si Abram sa inged a Kanaan, na miyaginged si Lot sii ko manga siti ko
kapantaran ka biyangon iyan so kampo niyan a marani sa Sodom.
13 Na so manga mama sa Sodom na palaya den manga rarata, ago mala a di iran dii
kapakandosa ko Allah.
14 Na pitero o Allah ki Abram kagiya mabelag on den si Lot a “Pelangkalangkaw ka sii
ko darpa a katitindegan ka ago ilaya ngka a pagotaraan ago so pagabagatan, ago giya pen
a sebangan ago so sedepan.
15 Ka so langon a kalopaan a keilay ngka na imbegay aken reka ago so manga moriyataw
ngka sa katangana niyo ron sa taman sa pakataman.
16 Pakapendakelen ko so kebabadan reka a datar o bayanek ko lopa taman sa opama ka
aden a makabilang ko bayanek ko lopa na giyanan bo i kakebilanga ko kebabadan reka!
17 Ika roo den na lalakawi ngka so kaolad angkanan a lopa, ka imbegay aken reka.”
18 Mandiyadi na initepas i Abram so kampo niyan ka roo miyaling ko marani ko
mangaala a kayo sa Mamri sii sa Hibron. Na roo sekaniyan peman mimbaal sa aparan ko
Allah.
MAKSOD 14
Piyanabangan i Abram si Lot
Sangkoto a masa na aden a pat kataw a manga dato; si Amrapil a dato sa Babiloniya, si
Ariyok a dato sa Ilasar, si Kidorlaomer a dato sa Ilam ago si Tidal a dato sa Gowim
2 A miyakitidawa siran ko salakaw pen a lima kataw a manga dato a si Biras a dato sa
Sodom, si Birsiyas a dato sa Gomorah, si Sinab a dato sa Admah, si Simiber a dato sa
Sibowim ago so dato sa Bila (giyanan so inged a Sowar).
3 Miyaisaisa angkai a lima kataw a manga dato na piyakatimo iran so manga sondaro iran
sii ko balintad sa Sidim (giyanan so Maatay a Ragat).
4 Sii ko soled o miyakasapolo ago dowa ragon na mipapaar siran i Kidorlaomer, ogaid na
sii ko ikasapolo ago telo ragon na siyopak iran sekaniyan.
5 Sii ko ikasapolo ago pat ragon na si Kidorlaomer ago so miyamakapagabanga on a
manga dato a rakes o manga sondaro iran na pinggogobat iran ago piyamanaban iran so
manga Ripayo sii sa Astirot Karnaim, so manga Sosiya sii sa Ham, so manga Imiyo sii sa
kapantaran sa Kiriyataim
6 Ago so manga Horiyo sii ko kapalawan sa Idomiya, na piyanaloba iran siran taman sa
Ilparan a marani ko disirto.
7 Oriyan iyan na pipetoan iran a Inmispat (giyanan den na Kadis) ago miyamangipaar iran
so dalem a inged o manga Amalik ago so pen so manga Amoriyo a kibabaling sa Hasason
Tamar.
8 So peman so manga dato sa Sodom, Gomorah, Admah, Sibowim ago Bila (so inged a
Sowar) na tiyanor iran so manga sondaro iran sii ko balintad sa Sidim na miyakitidawa
siran
9 Ki Kidorlaomer a dato sa Ilam, si Tidal a dato sa Gowim, si Amrapil a dato sa
Babiloniya ago si Ariyok a dato sa Ilasar; lima kataw a manga dato a miyakitidawa ko pat
kataw a manga dato.
10 So balintad sa Sidim na mapepeno a manga galebo a lapoten, na kagiya palagoyan o
manga dato sa Sodom ago Gomorah so manga ridoay iran na miyanga oolog siran baden
ko manga galebo, ogaid na so telo kataw a ped a manga dato na miyamagapas ko manga
palaw.
11 Pitetaban o pat kataw a manga dato so langon a manga tamok sa Sodom ago Gomorah
a rakes o langon a kaoyagan iran, na miyawa siran roo den.
12 Biniyag iran pen si Lot a pakiwataan i Abram ago so langon a rek iyan ka kagiya
mababaling sa Sodom.
13 So sakataw a miyakapalagoy na somiyong ki Abram a Hibriyo na piyanotol iyan on so
miyanggolaola. Sa masa oto na mababaling si Abram ko marani ko mangaala a kayo a
rek i Mamri a so Amoriyo a aya pagari i Iskol ago si Anir. Palaya siran manga abanga i
Abram.
14 Kagiya maneg i Abram a miyabiyag so tonganay niyan na linimod iyan so telo gatos
ago sapolo ago walo a miyasinanad a manga mama a inimbabawata ko kampo niyan na
siyaloba iran so pat kataw a dato taman den sa siti a Dan.
15 Pimbaabaad iyan so manga pagtaw niyan, na giyobat iran so manga dato sii ko
kagagawii. Tiyaban iran siran ago piyanaloba iran taman den sa Hobah sii sa pagotaraan
a Damaskos.
16 Miyakowa peroman i Abram so langon a tamok, na inibaling iyan pen si Lot a
pakiwataan iyan a rakes o manga rek iyan, ago so pen so manga babay ago so manga ped
a taw a miyanga bibiyag.
Riyakmatan i Milkisidik si Abram
17 Kagiya makakasoy si Abram ko oriyan o kiyatabana niyan ki Kidorlaomer ago so
manga dato a abanga iyan na inalaw sekaniyan o dato sa Sodom sii ko balintad sa Sabih a
bebetowan mambo sa Balintad o manga Dato.
18 Na si Milkisidik a dato sa Salim ago imam o Lebi a Maporo a Tohan na miyawid roo
sa paan ago arak ki Abram,
19 Na riyakmatan iyan sekaniyan a tig iyan a
“Rarakmatan si Abram o Tohan a Lebi a Maporo
a Miyaden ko langit ago so doniya!
20 So podi na rek o Tohan a Lebi a Maporo
a aya reka miyalad ko manga ridoay ngka!”
Na inibegay ron i Abram so ikasapolo bagi ko langon taman a miyataban iyan.
21 Na pitero o dato sa Sodom ki Abram a “Began ka raken so manga taw na rek ka den so
manga tamok.”
22 Ogaid na pitero on i Abram a “Minisepa aken den ko Allah a Lebi a Maporo a Tohan a
Miyaden ko langit ago so doniya
23 A di aken den kowaan so apiya antonaa a rek ka a apiya so sapotol a tanor o di na ba
so iket a tinilas, ka o ba ngka matero i ‘Saken i miyaloy ki Abram a tatamoken.’
24 Da den a kowaan ko a rowar ko miyakan o manga pagtaw aken ago so bagian o manga
abanga aken a miyonot raken a si Anir, Iskol ago si Mamri. Pakikowaan ka kiran so
bagian iran.”
MAKSOD 15
So Kapasadan o Tohan mipantag ki Abram
Kagiya maipos oto na miyakiilay so Allah ki Abram ago miyakimbitiyarai ron a tig iyan a
“Di ka pekelek, Abram,
Saken i kelong ka,
na mbegan ko seka sa mala a balas.”
2 Pitero i Abram a “Ya Allah a Kadnan ko, antonaa i kipantag o imbegay ngka raken
kagiya da a wata aken na aya bo a makapekewali ko tamok aken na si Iliyasar a taw sa
Damaskos?
3 Kagiya da ako ngka den begi sa wata na so isa ko talasogoay aken na aya makapekewali
ko tamok aken.”
4 Na giyoto a pitero on a Allah a “Giyangkanan a mama na kena a ba so makapekewali ko
tamok ka, ka so rek ka a wata a mama a pekapoon ko lawas ka na aya on makapekewali.”
5 Na inowit sekaniyan o Allah sa liyo na pitero iyan on a “Ilaya ngka a langit ago bilanga
ngka so manga bitoon o kegaga ngka milang.” Na tig iyan pen a “Giyanan den i kadakel
o kebabadan reka.”
6 Na miyaratiyaya si Abram ko Allah na inibilang o Allah so paratiyaya niyan a aya niyan
kaontol.
7 Pitero iyan on pen a “Saken so Allah a aya reka miyakaawa sa Or roo sa Babiloniya
kaan aken reka mibegay angkai a inged sa katangana ngka on.”
8 Ogaid na pitero i Abram a “Ya Allah a Kadnan ko, andamanaya i kaketokawi aken ko
kaketangana ko ron?”
9 Tig o Allah a “Witi ako ngka sa isa a sapi, isa a babay a kambing ago isa a mama a
bilibili a nggagatelo ragon a idad iyan, na rakesi ngka sa isa a marapatik ago isa a
pagapak.”
10 Na inowit on langon ai i Abram, na piyamotol iyan siran na go inipametad iyan so
manga sapo sa dowa koyog, ka piyakapepantaga iyan so oman i sepotola on; ogaid na da
niyan pangopaka so manga papanok.
11 Piyanayab o manga banog so sapo ogaid na biyogaw siran i Abram.
12 Kagiya pesedep den so alongan na piyangenepan a torog si Abram na miyaoma
sekaniyan a piyakalekelek a tanto a maliboteng.
13 Na pitero on o Tohan a “Pekitokawan ko reka a matamataan a makapeginetaw so
manga moriyataw ngka a manga mananangga sii ko inged a kena a ba iran rek. Roo siran
mapengongoripen ago pemakaregenan ko soled o makapat gatos ragon.
14 Ogaid na siksaan aken so nasiyon a makapengongoripen kiran, na maipos oto na
pekaliyo siran on a makapetelon sa mala a kakawasaan.
15 Seka peman na kitapi ka ko manga apo o ka a lomilintad ka. Kilebeng ka amay ka
teman den piyapiya so omor ka.
16 Na di sii pen makapembalingan so manga moriyataw ngka taman ko ikapat kaapid
iran, ka so kadostaan o manga Amoriyo na da pen matarotop ko kindanegen ko ron
kiran.”
17 Kagiya somedep so alongan ago lomiyangkap den so maliboteng na minitekaw a
kiyapakagemaw o pegebel a koden ago pekedeg a barabad, na miyokit siran ko pageletan
o dowa koyog a manga sapo.
18 Giyoto den i kiyambaali o Allah sa kapasadan mipantag ki Abram a tig iyan a
“Imbegay aken ko manga mbawataan ka angkai a lopa a poon ko lawasaig sa Misir taman
den ko mala a lawasaig a giya Yopratis
19 A maaped on so pagiingedan o manga Kiniyo, manga Kinisiyo, manga Kadmoniyo,
manga Hitiyo, manga Pirisiyo, manga Ripayo, manga Amoriyo, manga Kanaaniyo, manga
Girgasiyo ago manga Hibosiyo.”
MAKSOD 16
Si Hagar ago si Ismail
So karoma i Abram a si Saray na da den makambawata sa wata ki Abram. Ogaid na aden
a talasogoay niyan a babay a Imisiren a aya ngaran iyan na si Hagar,
2 Na pitero i Saray ki Abram a “Da peroa o Allah a kapakambawata aken. Na pengnin ko
reka a rembanga ngka so talasogoay aken a babay. Baanda ron penggolalan so kakebegi
raken sa wata.”
Na miniyog si Abram ko pitero i Saray.
3 Kagiya ka maoto na inibegay i Saray si Hagar a Imisiren a talasogoay niyan ki Abram a
pembaloy a karoma niyan. (Miyanggolaola ini kagiya makasapolo den ragon a
kababaling i Abram sa Kanaan.)
4 Na rimbang i Abram si Hagar na miyaogat.
Kagiya katokawan i Hagar a maogat sekaniyan na inepoonan iyan mamagitowito so bai
niyan.
5 Na pitero i Saray ki Abram a “Madaneg ka sabap sangkai a kaperasaya raken. Piyalad
aken reka so talasogoay aken a kerembang ka, ogaid na ipoon ko kiyatokawi niyan sa
maogat sekaniyan na ba ko niyan den pepemagitowitoa. Makokom ta o Alah o antawaa
rekta i maontol, seka o di na saken!”
6 Ogaid na pitero i Abram a “Ilaya ngka man, ka kambabayabayaan ka so talasogoay
ngka! Nggolaolaa ngka on so apiya antonaa i ikesoat ka.” Na ipoon roo na
pepakaregenan i Saray si Hagar a aya niyan minipalagoy ki Saray.
7 Ogaid na so malaikat o Allah na miyaoma niyan si Hagar ko marani ko bowalan sii ko
disirto. Giyoto den so bowalan ko kilid o lalan a ipesong sa Sor.
8 Na pitero iyan a “Hey Hagar a talasogoay i Saray, anda ka poon ago anda ka song?”
“Pepelagoyan aken so bai aken a Saray,” a inisembag iyan.
9 Na pitero on o malaikat o Allah a “Kasoy ka ko bai ngka ago pakimbayabaya ka on.”
10 Tig iyan pen a “Pakapendakelen ko so manga mbawataan ka taman sa di siran
kebilang.”
11 Na pitero pen o malaikat o Allah a
“Maogat ka imanto na pembawata ka sa mama.
Aya ngka on imbeto na Ismail,
ka tiyago o Allah sa ginawa niyan so kapekerasay ngka.
12 Pembaloy sekaniyan a datar o maila a kimar;
sorangen iyan so oman i isa a taw
na sorangen sekaniyan mambo o langon a taw,
na mbeling sekaniyan a misisibay
ko langon o manga tonganay niyan.”
13 Na bitowan i Hagar so Allah a miyakimbitiyarai ron sa Ingaran a “Seka so Tohan a
pepekailay,” ka pitero i Hagar a “Miyailay aken den sii bes so Tohan a pepekailay raken!”
14 Giyanan i sabap a bitowan angkoto a paridi sa ‘Paridi o Oyagoyag a Pepekailay raken;’
na sii den matatago ko pageletan o Kadis ago Birid.
15 Na mimbawata si Hagar sa wata a mama ki Abram na iningaranan i Abram sa Ismail.
16 Miyakawalo polo ago nem ragon a idad i Abram ko kinimbawataan i Hagar ki Ismail.
MAKSOD 17
So Kapasadan mipantag ko Katori
Kagiya makasiyaw polo ago siyaw ragon a idad i Abram na mipeyag on so Allah a tig
iyan a “Saken so Tohan a Lebi a Mabager. Pangongonotani ako ngka ago di ka
pekidaway.
2 Itoman aken so kapasadan aken mipantag reka, ka tanto aken seka a pakapembabaden.”
3 Somiyodiyod si Abram, na pitero on o Tohan a
4 “So saken on na giyai so kapasadan aken mipantag reka: pembaloy ka a apoapoan o
madakel a nasiyon.
5 Di ka den kebetowan sa Abram, ka aya ngaran ka na Ibrahim sabap sa minitoro aken
seka a kebaloy a apoapoan o madakel a nasiyon.
6 Tanto aken a pakapendakelen so manga mbawataan ka, na mbaloin ko siran a manga
nasiyon; na aden mambo a manga dato a pekapoon reka.
7 Itoman aken angkai a initopa ko sii reka ago sii ko manga moriyataw ngka taman den
ko kapemagapidapidi kiran, ka da a ikepos iyan ai a kapasadan sa saken i Tohan ka ago
Tohan mambo o manga moriyataw ngka.
8 So dalem a inged a Kanaan a matag ka on mananangga imanto na imbegay aken reka
ago so manga moriyataw ngka sa katangana iran on sa taman sa pakataman; na saken so
Tohan iran.”
9 Na pitero pen o Tohan ki Ibrahim a “So seka on na disomala a mipenggolalan ka
mambo so kapasadan aken, seka ago so manga moriyataw ngka taman den ko
kapemagapidapidi kiran.
10 Na giyai i kapasadan aken mipantag rekano ago so manga moriyataw ngka a
mipenggolalan iyo: oman i isa
a mama sii rekano na matori.
11 Giyangkanan a kapanoria rekano na aya tanda o kapasadan aken mipantag rekano.
12 Taman den ko kapemagapidapidi rekano na matori so oman i mama sii rekano amay
ka makawalo gawii a idad iyan a ped on pen so siran oto a kena a ba niyo mbawataan ka
inimbawata baden ko kampo niyo o di na miyapamasa niyo ko di niyo royod a taw.
13 Apiya anda ko talasogoay a inimbawata ko walay niyo o di na miyapamasa o pirak iyo
na disomala a matori. Giyangkai a kapasadan aken a mitatanda ko manga lawas iyo na da
a ikepos iyan a kapasadan.
14 Apiya antawaa a mama i da matori na kebelag ko isa ka maginged a Israil, ka
miyasogok iyan so kapasadan aken.”
15 Na pitero pen o Tohan ki Ibrahim a “So sii ron peman si Saray a karoma ngka na di
ngka den pembetowi sa Saray, ka Sarah den i ngaran iyan.
16 Perakmatan aken sekaniyan ago matamataan a mbegan aken seka sa wata a mama a
nggolalan rekaniyan. Perakmatan aken si Sarah na pembaloy mambo a ina o manga
nasiyon. Na aden a manga dato o manga bangsa a pekapoon sekaniyan.”
17 Na somiyodiyod si Ibrahim, ogaid na mikela sekaniyan a pitero iyan sa ginawa niyan a
“Makapembawata bes so mama a miyakamagatos ragon a idad iyan? Keogat si Sarah a
miyakasiyaw polo ragon a idad iyan?”
18 Na pitero i Ibrahim ko Tohan a “Mataan a kabaya aken a si Ismail i makapeginetaw a
rarakmatan ka!”
19 Tig o Tohan a “Oway, ogaid na pembawata reka so karoma ngka a si Sarah sa wata a
mama na aya ngka on imbeto na Iskak. Ipetoman aken rekaniyan ago so manga
moriyataw niyan so kapasadan aken sa taman sa pakataman, ka da a ikepos iyan ai a
kapasadan.
20 So sii ron mambo si Ismail na miyaneg aken so piyangni ngka mipantag on, ka
perakmatan ko ago mbegan ko sa madakel a wata ago tanto aken sekaniyan a
pakapembabaden. Pembaloy sekaniyan a ama o sapolo ago dowa kataw a olowan, na
mbaloin ko so kebabadan on a mala a nasiyon.
21 Ogaid na aya tomanan ko ko kapasadan aken na so wata a ka a si Iskak a ipembawata i
Sarah sangkai a masa ko pekatalondog a ragon.”
22 Na kagiya makapasad makimbitiyarai so Tohan ki Ibrahim na miyawa rekaniyan.
23 Sii den sangkoto a gawii na ininggolalan i Ibrahim so miyatero on o Tohan ka
piyamanori iyan si Ismail a wata iyan ago so langon a ped a manga mama ko kampo niyan
a rakes o manga talasogoay a inimbabawata ko kampo niyan o di na miyapamasa niyan.
24 Siyaw polo ago siyaw ragon a idad i Ibrahim ko kiyatoria on,
25 Na so wata iyan a Ismail na sapolo ago telo ragon a idad iyan.
26 Si Ibrahim ago si Ismail na palaya siran miyanga totori sangkoto a gawii
27 A rakes o langon a talasogoay a inimbabawata ko kampo i Ibrahim o di na
miyapamasa ko di niyan royod a taw.
MAKSOD 18
So Telo kataw a Bisita
Mipeyag so Allah ki Ibrahim ko marani ko mangaala a kayo sii sa Mamri. Somasandang
si Ibrahim ko gimowa o barombarong iyan ko keoto a alongan
2 Na biyangon iyan a olo niyan na miyailay niyan so telo kataw a mama a tomitindeg ko
malo on mawatan. Kagiya mailay niyan siran na pinggagaanan iyan malaw.
Somiyodiyod si Ibrahim
3 Na pitero iyan a “Hey Kadnan ko, o kelimoon ako ngka na di ako ngka pelepasa a
oripen ka.
4 Sirong kano sangkai a kayo ka pakiwitan ko sekano sa ig a kionab iyo ko manga ai
niyo.
5 Na komowa ko sa makan iyo kaan makapiya a ginawa niyo na go kano bo taros, ka sii
kano den miyakaaot ko oripen iyo.”
Tig iran a “Oway, nggolaolaa ngka den so pitero o ka.”
6 Na minggagaan somoled si Ibrahim ko barombarong na pitero iyan ki Sarah a
“Nggagaan ka; kowa ka sa telo ka asad ko mainek a arina na pelililowa ngka na go ngka
mbaali a paan.”
7 Miyalalagoy si Ibrahim ko kodal na miyamamili on sa mapiya ago kaolit a nati a sapi,
na inibegay niyan ko talasogoay niyan a aya on minggagaan tiyagar.
8 Miyawid si Ibrahim sa mimbatik ago da mbatik a gatas ago so miyatiyagar a sapo o sapi
na inipagana niyan kiran. Sii ko kapeken iran na tomitindeg sekaniyan sii ko obay iran ko
atag a kayo.
9 Na iniise iran on a “Anda si Sarah a karoma ngka?”
“Ndodoo ko barombarong,” a tig iyan.
10 Na pitero o isa kiran a “Matamataan a kesoy ako reka sa datar ai a masa ko talondog a
ragon na pembawata si Sarah a karoma ngka sa wata a mama.”
Na pepamakinegen siran i Sarah ko ginowa o barombarong a katatalikodan o mama.
11 Miyalokes si Ibrahim ago si Sarah ka minitolod den so idad iran, na tiyapekan si
Sarah.
12 Na inikela i Sarah sii sa ginawa niyan a tig iyan a “Imanto a miyaronot ako den ago
miyalokes so karoma ko, na ba ako pen kegedii sa kabebaya?”
13 Na pitero o Allah ki Ibrahim a “Ino pekela si Sarah a pitero iyan a ‘Ba mataan a
pembawata ako a miyalokes ako den?’
14 Ba aden a di kegaga o Allah? Kesoy ako reka sii ko matetendo a masa ko talondog a
ragon na pembawata si Sarah sa mama.”
15 Na kagiya miyalek si Sarah na mipelaw a tig iyan a “Da ako kela.”
Ogaid na pitero iyan a “Kena, ka mikela ka.”
Inipamangni i Ibrahim a Siti a Sodom
16 Gomiyanat so manga mama na somiyong siran ko darpa a ron iran ketolongi a siti a
Sodom, na inidolog siran i Ibrahim.
17 Na pitero o Allah ko ginawa niyan a “Ba aken pegmaa ki Ibrahim so magaan aken
penggolaolaan?
18 Mataan a pembaloy so kebabadan on a kababantogan ago mala i gees a nasiyon, na
kerakmatan so langon a nasiyon ko doniya a makapenggolalan rekaniyan.
19 Ka miyapili aken sekaniyan a mapamando iyan so manga wata iyan ago so kebabadan
kiran sa kapengongonotani ran ko Allah ago so kanggolaolaa iran ko ontol ago so matito
kaan aken mitoman ki Ibrahim so initopa ko ron.”
20 Kagiya ka maoto na pitero o Allah ki Ibrahim a “Tanto a matanog a kapekenega ko ko
kapepekarata o manga taw sa Sodom ago giya Gomorah, ago sayana a mapened a di iran
dii kapakandosa.
21 Penogan aken siran imanto kaan aken mapariksa o ba iran miyanggolaola langon so
marata a miyaneg aken; na o di benar, na ketokawan aken.”
22 Mandiyadi na miyawa roo so dowa kataw ko manga mama na miyantap siran sa
Sodom, ogaid na makatitindeg roo den si Ibrahim ko hadapan o Allah.
23 Miyobay rekaniyan si Ibrahim a tig iyan a “Ba mataan a iperakes ka so manga oontol
ko kapolanga ngka ko manga rarata?
24 Opama ka aden a lima polo kataw a maontol ko siti na ba ngka mbinasaa so dalem a
inged? Ba ngka di pelepasa sabap ko lima polo a manga oontol a kebabaling on?
25 Mawatan sa ginawa ngka o ba ngka perakesen so manga oontol ko kambonoa ngka ko
manga rarata a pakapendataren ka so ikidia ngka ko maontol ago so marata. Mostakil o
ba ngka nan nggolaolaa! Ba di ontol so penggolaolaan o pengokom ko dalem a doniya?”
26 Inisembag o Allah a “O makatoon ako sa lima polo kataw a maontol sii sa Sodom na
pelepasen aken so dalem a siti sabap kiran.”
27 Mitero peroman si Ibrahim a tig iyan a “Pepekaraw ako reka pen makimbitiyarai,
Kadnan, apiya pen matag ako baden bayanek ago ombi.
28 Opama ka aden bo a pat polo ago lima kataw a maontol, ka kena a ba lima polo, na ba
ngka mbinasaa so dalem a siti sabap sa kiyakorangan sa lima kataw?”
Tig iyan a “O katoonan aken sa pat polo ago lima kataw a maontol na di aken
mbinasaan so siti.”
29 Na miyakimbitiyarai ron peroman si Ibrahim a tig iyan a “Opama ka aya bo a matoon
roo na pat polo kataw a maontol?”
Tig iyan a “O aden a pat polo kataw a maontol na di aken anan mbinasaan.”
30 Na pitero i Ibrahim a “Kapedipedi ka bo na o ba ka kararangiti, Kadnan, ka pakateroa
ko ngka bo. Opama ka aya bo a matoon roo na telo polo kataw a maontol?”
Na tig iyan a “Di aken anan penggolaolaan o makatoon ako roo sa telo polo."
31 Pitero i Ibrahim a “Pepekaraw ako reka pen makimbitiyarai, Kadnan, ogaid na opama
ka aya bo a matoon roo na dowa polo kataw a maontol?”
Tig iyan a “O makatoon ako sa dowa polo kataw na di aken mbinasaan.”
32 Na pitero i Ibrahim a “Kapedipedi ka bo na o ba ka kararangiti Kadnan, ka pakateroa
ko ngka sa makaisa pen. Opama ka aya bo a matoon roo na sasapolo a manga oontol?”
Tig iyan a “O aden a sapolo kataw na di aken mbinasaan.”
33 Kagiya makapasad makimbitiyarai so Allah ki Ibrahim na miyawa roo, na miyaling
mambo si Ibrahim.
MAKSOD 19
So Kadostaan a Sodom
Perimon kagiya makaoma so dowa kataw a malaikat sa Sodom. Sa masa oto na moontod
si Lot sii ko ipesoled ko siti, na kagiya mailay niyan siran na tominindeg na inalaw niyan
siran. Somiyodiyod sekaniyan
2 A tig iyan a “Manga Kadnan ko, kapedipedi kano bo na bolos kano ko walay o oripen
iyo. Makapengonab kano roo ko manga ai niyo ago makatorog kano roo pen, na
pekataros kano ko songowan iyo amay ka kepita.”
“Di,” a pitero iran, “ka sii kami keden sa plasa imanto a kagagawii.”
3 Ogaid na kagiya tanto niyan siran a tigel na miyonot siran on ko walay niyan.
Pitiyagaran iyan siran sa makan iran ago mimbaal sekaniyan sa paan a da a tapay ron, na
komiyan siran on.
4 Sa da iran pen kapakatorog na so langon a manga mama ko dalem a siti a Sodom a
ndatar so mangoda ago so lokes na linikopan iran so walay.
5 Liyalis iran si Lot a tig iran a “Anda so manga mama a miyakaoma reka imanto a
kegagawii? Liyon ka siran rekami kaan ami mipemotaliya.”
6 Liniyowan siran i Lot na initalanged iyan on so pintoan ko talikodan iyan.
7 Pitero iyan a “Pengangampedian ako rekano, manga gari; di niyo penggolaolaa angkai a
marata!
8 Ilaya niyo man ka aden a dowa kataw a wata aken a babay a da den marembang a
mama. Kapedipedi kano bo ka aya ko rekano den pakaliyon, na mapenggolaola niyo
kiran den so kabaya iyo. Ogaid na di niyo penggolaolai sa apiya antonaa angkai a manga
mama, ka miyolos siran ko walay aken na disomala a kelinding aken siran.”
9 Ogaid na tig iran a “Di kami ngka pegalangi!” Tig iran pen a “Miyakaoma sii si aki ini
a matag mananangga, ogaid na imanto na baden pesayan sa pangongokom! Awa ka san,
ka seka baden i pakataamen ami sa masakit!” Na ipeseromag iran si Lot ka pendasegen
iran so pintoan sa kanggebaa iran on.
10 Ogaid na so dowa kataw a mama sii ko soled o walay na kiyawa iran si Lot na giyamit
iran sa soled na initalanged iran on so pintoan.
11 Na siniksa iran a kabobota so manga mama ko liyo o walay a ndatar so mangoda ago
so lokes a diyokawan siran mangapap ko pintoan.
Miyawa si Lot sa Sodom
12 Pitero o dowa kataw a mama ki Lot a “Ba aden pen a ped ka sii sangkai a siti a manga
wata a ka a mama o di na babay o di na miyamakamong reka a manga mama o di na ped
pen a manga tonganay ngka? Liyon ka siran
13 Ka mbinasaan ami den angkai a inged. Sabap sa tanto den a matanog a kapekenega o
Allah ko kapepekarata o manga taw sii na siyogo kami niyan sa kambinasa mi ron.”
14 Mandiyadi na siyongowan i Lot so pekamong on a manga mama a matataalik ko
manga wata iyan a babay na pitero iyan a “Nggagaan kano lomiyo sangkai a siti ka
mbinasaan den o Allah!” Ogaid na aya kagegedaa iran on na ba sekaniyan baden dii
sendag.
15 Kagiya sobo na tigel o manga malaikat si Lot a tig iran a “Nggagaan ka! Pakaonota
ngka so karoma ngka ago so dowa kataw a manga wata a ka a sisii na liyo kano so siti
kaan kano di pematay ko kasiksaa on.”
16 Na dii sesendosendod si Lot, ogaid na kagiya inikapedi o Allah na piyangapetan o
manga mama so lima niyan ago so lima o karoma niyan ago so dowa kataw a wata iyan a
manga babay na piyangowit iran siran ko liyo o siti.
17 So den so kiniliyon iran kiran na pitero o isa on a “Palagowi niyo a ginawa niyo! Di
kano ndingil ko talikodan iyo ago di kano tereg ko apiya anda ko kapantaran! Palagoy
kano roo ko manga palaw kaan kano di pematay!”
18 Ogaid na pitero on i Lot a “Di, Kadnan ko, kapedipedi ka bo!
19 Inikapedi ako ngka den a oripen ka ago tanto ako ngka a inikalimo ko kiyasabeta ngka
ko niyawa ko. Ogaid na di ako makapegapas ko manga palaw ka baanda ko peraota
angkai a morala na petay ako.
20 Ilaya ngka man ka kaoto so maito a inged a marani a kepalagoyan aken. Kapedipedi
ka bo na ron ako ngka on pakapagapasa, ka tanto a maito – ba di benar? Na aya
kakesabet o niyawa ko!”
21 “Miniyog ako,” a pitero iyan. “Amponen aken pen angkanan a piyangni ngka: di aken
mbinasaan so maito a inged a pitero o ka.
22 Ogaid na pagapas ka roo nggagaan ka da den a ba ko mapenggolaola taman ko
kapakaoma ngka on.” (Giyanan i sabap a bitowan angkoto a maito a inged sa Sowar.)
Miyabinasa a Sodom ago Giya Gomorah
23 Somibang den so alongan ko kiyapakaoma i Lot sa Sowar.
24 Sangkoto den a oras na piyakioranan o Allah sa pekedeg a sandawa a Sodom ago giya
Gomorah a sii makapopoon ko Allah sa langit.
25 Piyaminasa niyan angkoto a manga siti ago so langon o kapantaran taman ko langon a
kibabaling sangkoto a manga inged ago so pepamangeto ko lopa.
26 Ogaid na so karoma i Lot na dominingil ko talikodan iyan ka pimbantayan iyan ai, na
miyabaloy sekaniyan a mapopolaos a timos.
27 Teked a kapipita ko miyakatalondog a gawii na mimbowat si Ibrahim na komiyasoy ko
darpa a miyaadap iyan on so Allah.
28 Tiyolongan iyan a Sodom ago giya Gomorah ago so langon o kapantaran na miyailay
niyan so peselepot a bel a pepekapoon ko lopa a datar o kapetegebel o mala a rapog.
29 Ogaid na sii ko kiyabinasaa o Tohan ko manga siti ko kapantaran na tatagoon iyan sa
ginawa si Ibrahim, ka piyakapalagoy niyan si Lot ko mala a kasiksaan a minibinasa ko
manga siti a ron sekaniyan babaling.
Si Lot ago so manga Wata iyan a Babay
30 Kagiya pekelek si Lot o ba kakaden sa Sowar na miyawa siran roo ago so dowa kataw
a wata iyan a babay na tomiyakedeg siran ko kapalawan, na roo siran komiyaden ko
liyang.
31 Miyakaisa a gawii na pitero o kaka a wata iyan ko ari niyan a “Pekelokes den so ama
ta ago da a ba mama sangkai a darpa a makapengaroma rekta kaan ta makambabawata.
32 Aya mapiya na pakainomen ta sa pakabereg so ama ta na romembang ta on kaan ta
mababad a sii makapenggolalan ki ama.”
33 Na piyakainom iran sa pakabereg so ama iran sangkoto a kagagawii. Somiyoled on so
kaka a wata iyan na romimbang on, na di katawan i Lot i kiyarembanga on o di na so
kiyambowat o wata iyan.
34 Sii ko miyakatalondog a gawii na pitero o kaka ko ari niyan a “Kagai ko gagawii na
miyakarembang ako ki ama. Na pakainomen ta sekaniyan peroman sa pakabereg imanto
a gagawii. Na soledi ngka ago rembang ka on kaan ta mababad so mbawataan tano a ron
makapenggolalan.”
35 Kagiya ka maoto na piyakainom iran peman sa pakabereg so ama iran sangkoto a
kagagawii. Somiyoled on so ari a wata iyan ago romimbang on, na da peman a imeleng i
Lot ko kiyarembanga on o di na so kiyambowat o wata iyan.
36 Sangkai a okit na so dowa kataw a wata i Lot a manga babay na palaya siran miyanga
oogat o ama iran.
37 So kaka a wata iyan na mimbawata sa mama na iningaranan iyan sa Mowab.
Sekaniyan i apoapoan o manga Mowabiyo a kapapantagan den imanto.
38 Na mimbawata mambo so ari niyan sa mama na bitowan iyan sa Bin Ami. Sekaniyan
i apoapoan o manga Amoniyo a kapapantagan den imanto.
MAKSOD 20
Si Ibrahim ago si Abimilik
Miyawa si Ibrahim sa Mamri na miniseg sa tampar sa pagabagatan a inged a Kanaan, na
sii sekaniyan miyaling ko pageletan a Kadis ago giya Sor. Oriyan iyan na sii ko
kakakaden iyan pasin sa Gerar
2 Na dii teroon i Ibrahim a si Sarah a karoma niyan na aya niyan babay. Sabap roo na si
Abimilik a dato sa Gerar na piyakirapit iyan si Sarah ka kinowa niyan.
3 Ogaid na kagiya magagawii na mipeyag so Tohan ki Abimilik a miyakanggolalan ko
taginepen na pitero iyan on a “Petay ka, ka so babay a kinowa ngka na aden a karoma
niyan.”
4 Ogaid na da den makebot i Abimilik si Sarah, na pitero iyan a “Hey Kadnan, ba kami
ngka mbinasaa ago so manga pagtaw aken apiya o da a sala aken?
5 Ba raken da matero i Ibrahim a ‘Babay aken sekaniyan?’ Na pitero mambo i Sarah a
‘Laki aken sekaniyan?’ Maliwanag so poso aken ko kiyanggolaolaa ko sii na da ako
makasela.”
6 Na pitero on o Tohan a nggolalan ko taginepen a “Oway, katawan aken a
miyanggolaola ngka nan a maliwanag so poso o ka. Kagiya ka maoto na piyakalidas aken
seka ko kapakapendosa ngka raken ko da ko reka on kapakisekoon.
7 Na kasowin ka imanto so karoma angkoto a mama ka nabi sekaniyan; na
ipengangarapan ka niyan sa di ngka kapatay. Ogaid na o di ngka kasowin na ketangked
ka a petay ka a rakes o langon o pagtaw ngka.”
8 Teked a kapipita ko miyakatalondog a gawii na piyakilimod i Abimilik so langon a
sanasanaan iyan, na kagiya mapanotol iyan kiran langon angkai a miyanggolaola na tanto
siran a miyanga aalek.
9 Oriyan iyan na piyakisogoan iyan si Ibrahim na pitero iyan on a “Antonaa angkai a
pinggolaola ngka rekami? Antonaa i minisala aken reka sa kiyawiti ngka raken ago so
ndatoan aken sangkai a mala a kasalaan? Kena a ba patot angkai a inikidia ngka raken.
10 Ino ngka ini penggolaolaa?”
11 Tig i Ibrahim a “Miyapikir aken a matamataan a da den a taw sii sangkai a inged a
maalek ko Tohan, na mbonoon ako iran kaan iran makowa so karoma ko.
12 Liyo ron pen na benar a babay aken sekaniyan, ka wata sekaniyan o ama aken ogaid na
kena a ba wata o ina aken, na miyapangaroma ko baden.
13 Na kagiya pakiawaan raken o Tohan so walay o ama aken na pitero aken ki Sarah a
‘Apiya anda ta pesong na giyai i kikelimoon ka raken: teroa ngka a laki ako ngka.’ "
14 Kagiya makapasad tero si Ibrahim na miyakipangowa si Abimilik sa manga bilibili,
manga sapi ago manga talasogoay a mama ago babay na inipamegay niyan siran ki
Ibrahim, na inikasoy niyan on pen si Sarah a karoma niyan.
15 Na pitero i Abimilik a “Pakipemilian ko reka so dalem a inged aken. Pekabaling ka ko
apiya anda ka on kebaya maling.”
16 Pitero iyan mambo ki Sarah a “Mbegan aken so laki ngka sa sanggibo a pelata a pirak.
Giyai i inipanginsalaan aken reka ko kamamasai ron o langon a ped ka, na ketokawan o
langon a taw a miyakabenar ka.”
17 Mandiyadi na miyangangarapan si Ibrahim ko Tohan; na piyamakapiya o Tohan si
Abimilik ago so karoma niyan taman ko manga sandil iyan kaan siran makambabawata
peroman,
18 Ka da peroa o Allah a kakeogat o oman i babay ko torogan i Abimilik sabap ki Sarah a
karoma i Ibrahim.
MAKSOD 21
So Kinimbawataan ki Iskak
Riyakmatan o Allah si Sarah a aya kinitoman o initopa niyan on.
2 Miyaogat si Sarah na mimbawata sa wata a mama ki Ibrahim sii ko kiyalokes iyan. So
kinimbawataan iyan on na sii den ko matetendo a masa a miyatero o Tohan ki Ibrahim.
3 Bitowan i Ibrahim sa Iskak so wata iyan a inimbawata rekaniyan i Sarah.
4 Na kagiya makawalo gawii a idad i Iskak na tiyori i Ibrahim ka giyoto i inisogo on o
Tohan.
5 Miyakamagatos ragon a idad i Ibrahim isako imbawata si Iskak.
6 Pitero i Sarah a “Piyakakela ako o Tohan, na so oman i isa a pekaneg makapantag sii na
makapekela mambo a datar aken.”
7 Tig iyan pen a “Antawaa i makapetero gowani ki Ibrahim a makapekeritan si Sarah sa
wata! Apiya oto na mimbawata ako rekaniyan sa wata a mama ko kiyalokes iyan.”
Piyakaawa si Hagar ago si Ismail
8 Miyakala si Iskak, na sii ko gawii a kiyapakageneka on somoso na mikendori sa mala si
Ibrahim.
9 Ogaid na miyailay i Sarah a dii mamagongatongat so wata a mama a inimbawata i
Hagar a Imisiren ki Ibrahim.
10 Na pitero i Sarah ki Ibrahim a “Bogawa ngka angkanan a talasogoay a babay ago so
wata iyan! So wata angkanan a talasogoay na di den kesaadan ko mapekewali o wata
aken a Iskak.”
11 Giyangkai a masosowa na tanto a inikerata a ginawa i Ibrahim sabap ko wata iyan a
Ismail.
12 Ogaid na pitero o Tohan ki Ibrahim a “Di ngka pakapekerataa ginawa ngka sabap ko
wata ago so talasogoay ngka a babay. Pakinega ngka so apiya antonaa i peteroon reka i
Sarah, ka so kebabadan ki Iskak i kibilang a manga mbawataan ka.
13 So peman so wata o talasogoay a babay na mbalowin ko mambo so kebabadan on a
nasiyon, ka wata a ka sekaniyan mambo.”
14 Teked a kapipita ko miyakatalondog a gawii na kominowa si Ibrahim sa manga
pangenengken ago kobal a mapepeno a ig na inibegay niyan ki Hagar ka piyakibawa
niyan on; na piyakalalakaw niyan siran ago so wata. Gomiyanat siran den na
miyagenebeneb siran ko disirto sa Birsiba.
15 Kagiya malengan den so ig ko kobal na piyakaiga i Hagar so wata ko atag o maito a
kayo.
16 Inawat iyan sekaniyan sa kawatan a peraoten a pana na miyontod, ka pitero iyan sa
ginawa niyan a “Di aken keraw milay so kapetay o wata.” Na sii ko kaoontod iyan roo na
mipoon den gomoraok sa matanog.
17 Miyaneg o Tohan so wata a penggoraok, na so malaikat o Tohan a sisii sa kasorgaan
na tiyalowan iyan si Hagar a tig iyan a “Antonaa i ikararata a ginawa ngka Hagar? Di ka
pekelek, ka miyaneg o Tohan so kapenggoraok o wata a makaiiga roo.
18 Song ka rekaniyan, na bangona ngka ago pakapiyaa ngka a ginawa niyan, ka mbalowin
ko so kebabadan on a mala a nasiyon,”
19 Na piyakailay o Tohan so mata i Hagar na miyakailay sa paridi. Somiyong sekaniyan
on na pino iyan a ig so kobal, na piyakainom iyan on so wata.
20 Sii ko kapepekala o wata na lalayon on so Tohan. Sii sekaniyan pepaginetaw ko
disirto na mimbaloy a pamamana.
21 Sii ko kababaling iyan ko Disirto sa Paran na piyakapangaroma sekaniyan o ina iyan sa
Imisiren a babay.
So Kapasadan i Ibrahim ago si Abimilik
22 Sangkoto a masa na si Abimilik ago si Pikol a komandir o manga sondaro niyan na
inimbitiyarai ran si Ibrahim a tig iran a “Lalayon reka so Tohan ko langon a di ngka dii
nggolaolaan.
23 Kagiya ka maoto na sepaan ka raken imanto sii ko Ingaran o Tohan a di kami ngka den
ndoratan sa pasad ago so manga wata aken taman ko manga moriyataw aken. Kagiya
inikalimo aken seka den na topaan ka raken a ikelimo ako ngka mambo ago so pen so
inged a ron ka mababaling a mananangga.”
24 Na pitero i Ibrahim a “Ipesepa aken anan.”
25 Ogaid na pipenonan i Ibrahim si Abimilik makapantag ko paridi a inagaw o manga
talasogoay i Abimilik.
26 Na pitero i Abimilik a “Di aken katawan o antawaa i minggolaola san. Da ngka raken
anan matero na imanto bo i kiyanega ko ron.”
27 Mandiyadi na kominowa si Ibrahim sa manga bilibili ago manga sapi na inibegay
niyan ki Abimilik; na mipesadonawai siran a dowa kataw.
28 Oriyan iyan an kominowa si Ibrahim sa pito timan a nati a babay a bilibili ko talon
iyan na inisibay niyan siran.
29 Na iniise i Abimilik ki Ibrahim a "Antonaa i maana angkanan a pito timan a bilibili a
inisibay ngka?”
30 Na tig iyan a “Tarimaa ngka raken angkai a pito timan a bilibili a aya inipemataan sa
saken i komiyalot sangkai a paridi.”
31 Kagiya ka maoto na bitowan angkoto a darpa sa Birsiba sabap sa miyakasepai roo
angkoto a dowa kataw a mama.
32 Kagiya makapesadanowai siran roo sa Birsiba na komiyasoy si Abimilik ago si Pikol a
komandir o manga sondaro niyan ko inged o manga Pilistiyo.
33 Na miyamola si Ibrahim sa kayo a tamarisk roo sa Birsiba na tiyalowan iyan roo
mambo so Ingaran o Allah a so da a kaposan iyan a Tohan.
34 Na miyatey a gawii a kakakaden i Ibrahim ko inged o manga Pilistiyo.
MAKSOD 22
Tipengan si Ibrahim
Da a matey a kiyaipos oto na tipengan o Tohan si Ibrahim. Pitero iyan on a “Ibrahim!”
"Katii ako bo,” a tig i Ibrahim.
2 Pitero o Tohan a “Pakaonota ngka so wata a ka a mama, a so botong a wata a ka a si
Iskak a pekebabayaan ka, na song ka ko inged a Moriyah. Na sapaaten ka sekaniyan roo a
totongen a ipesoasoat raken sii ko isa ko manga palaw a itoro aken reka.”
3 Teked a kapipita ko miyakatalondog a gawii na miyamotol si Ibrahim sa ipagitagon ko
totongen a isepaat iyan, na siniyaan iyan so kimar iyan. Piyakaonot iyan so dowa kataw
ko talasogoay niyan ago si Iskak a wata iyan na miyantap siran den ko darpa a pitero on o
Tohan.
4 Sii ko ikatelo gawii na miyangilailay si Ibrahim na miyalangkaw niyan so darpa a malo
on pen mawatan.
5 Mandiyadi na pitero iyan ko manga talasogoay niyan a “Telimbagak kano sii ago so
kimar, ka sekami ago so wata aken na teros roo ka simba kami, na kesoy kami rekano
bo.”
6 Piyakiposai i Ibrahim ki Iskak so ipagitagon ko totongen a isepaat, na sekaniyan i
miyawid ko manga waga ago so gonong. Sii ko kapelalakaw iran a dowa kataw
7 Na pitero i Iskak ki Ibrahim a "Ama ko!”
“Ino ka, wata ko?” a tig i Ibrahim.
“Kaaawidan ta so manga waga ago so itagon,” a tig i Iskak, “ogaid na anda sesaya so
nati a bilibili a aya totongen a isepaat?”
8 Somimbag si Ibrahim a “So den so Tohan i mbegay sa nati a bilibili a totongen a
isepaat, wata ko.” Na domiyayon siran den lomalakaw.
9 Kagiya makaoma siran ko darpa a miyatero rekaniyan o Tohan na mimbaal roo si
Ibrahim sa aparan na tiyanor iyan on so manga itagon. Piyatong iyan so wata iyan a Iskak
na piyakaiga iyan ko aparan sii ko liyawaw o manga itagon.
10 Oriyan iyan na binindas i Ibrahim so gonong ka sombaliin iyan den so wata iyan.
11 Ogaid na so malaikat o Allah a sisii sa kasorgaan na tiyalowan iyan a tig iyan a
"Ibrahim, Ibrahim!”
“Katii ako bo,” a inisembag iyan.
12 “Di ngka mbetaden a lima ngka ko wata,” a tig iyan. “Di ngka penggolaolai sa apiya
antonaa, ka imanto na katawan aken a maaleken ka ko Tohan sabap sa da ngka raken
panganogoni so wata a ka a mama, a so botong a wata a ka.”
13 Na miyangilailay si Ibrahim na miyakailay roo sa mama a bilibili a misasadang so
panga niyan ko paket. Somiyong on sekaniyan na kinowa niyan so bilibili, na inisapaat
iyan a aya niyan tiyotong a inisoasoat a inisambi iyan ko wata iyan.
14 Bitowan i Ibrahim angkoto a darpa sa “Petiyagar so Allah.” Na apiya taman imanto na
aya dii matero na “Sii ko palaw o Allah na ketiyagar.”
15 Oriyan na tomiyalo peroman ki Ibrahim so malaikat a sisii sa kasorgaan
16 A tig iyan a “Pesepaan ko a ginawa ko, a pitero o Allah, sa sabap sa pinggolaola ngka
nan a so da ngka raken kapanganogoni ko wata a ka, a so botong a wata a ka,
17 Na matamataan a tanto aken seka a perakmatan ago tanto aken a pakapendakelen so
kebabadan reka a datar o manga bitoon sa langit ago datar sa kadakel o peted sa kilid a
ragat. Na penga tatangan o kebabadan reka so manga siti o manga ridoay iran.
18 Na nggolalan ko mbawataan ka na kerakmatan so langon a nasiyon sa doniya sabap sa
piyakineg ka so pitero aken reka.”
19 Na komiyasoy si Ibrahim ko manga talasogoay niyan na palaya siran somiyong sa
Birsiba, na komiyaden roo si Ibrahim sa Birsiba.
So manga Wata i Nahor a manga Mama
20 Da oto matey na miyatero ki Ibrahim a mimbabawata mambo si Milka sa manga wata
ko pagari i Ibrahim a si Nahor:
21 Si Ods aya kaka, si Bos a pagari niyan, si Kimowil (a aya ama i Aram),
22 Si Kisid, si Hadso, si Pildas, si Hidlap ago si Bitowil.
23 Na si Bitowil i ama i Ribikah. Giyangkanan a walo kataw a manga wata a mama na
inimbabawata i Milka ago si Nahor a pagari i Ibrahim.
24 So sandil i Nahor a aya ngaran iyan na si Riyomah na mimbabawata on mambo sa
manga wata a mama a si Tibah, si Gaham, si Tahas ago si Maakah.
MAKSOD 23
So Kiyapatay i Sarah
Miyakapaginetaw si Sarah sa miyakamagatos ago dowa polo ago pito ragon,
2 Na miyatay sekaniyan sii sa Kiriyat Arab (giyanan den na Hibron) sii sa inged a
Kanaan. Na inimboko i Ibrahim si Sarah na pesegad sekaniyan on.
3 Na giyanatan i Ibrahim so lalantangan ko karoma niyan na somiyong ko manga
mbawataan i Hit ka makipembitiyarai kiran. Pitero iyan a
4 “Kena a ba ako sii taw ka matag ako rekano baden mananangga. Na pesai ako niyo ko
lopa iyo a kelebengan aken ko karoma ko.”
5 Pitero on o manga Hitiyo a
6 “Pamakinega kami ngka, kadnan ami. Mala ka rekami i gees a dato. Lebengan ka den
so karoma ngka ko lebi a mapiya ko manga pekoboran ami. Da a ba rekami sengka sa
kibegan iyan reka ko rek iyan a pekoboran kaan ka on milebeng so karoma ngka.” 7
Mandiyadi na tominindeg si Ibrahim ago somiyodiyod ko manga Hitiyo a magiinged roo,
8 Na pitero iyan kiran a “O miyog kano a pakilebeng iyo raken sii so karoma ko na
kapedipedi kano bo na akoli niyo raken si Ipron a wata i Sohar
9 Sa pesaan iyan raken so liyang sa Makpila a matatangan iyan a sii matatago ko
temanaan o lopa iyan. Pangniya niyo ron a pesaan iyan raken sa kadiyangkaan so arga
iyan ko kamamasai niyo ron ka aya ko pelebengan.”
10 Kapapantagan oto a kaoontod roo i Ipron a ped iyan so manga Hitiyo a miyalimod ko
ipesoled ko siti niyan. Na simbag iyan si Ibrahim a pekeneg o manga Hitiyo a tig iyan a
11 “Di, kadnan ko. Pamakinega ko ngka; imbegay aken reka angkoto a lopa a rakes o
liyang a matatago on. Imbegay aken reka ko kamamasai ron o manga taw aken.
Lebengen ka on den so karoma ngka”
12 Na miperoman somodod si Ibrahim ko manga magiinged roo
13 Na pitero iyan ki Ipron ko kapekenega iran on a “Kapedipedi ka bo na pakinega ko
ngka; imbayad aken ko lopa so arga iyan. Tarimaa ngka raken ini kaan aken on milebeng
so karoma ko.”
14 Na tig i Ipron a
15 “Pamakinega ko ngka, kadnan ko; aya arga o lopa na lima ka kilo a pirak, ogaid na
antonaa i gona anan ko di ta dii kangginawai? Lebengen ka on den so karoma ngka.”
16 Miyayon si Ibrahim ko pitero i Ipron na tinimbang iyan rekaniyan so kadakel o pirak a
miyatero iyan a miyaneg mambo o manga Hitiyo; giyanan na lima ka kilo a pirak a
piyakaokit ko timbangan a pegosaren o manga padagang.
17 Kagiya ka maoto na so lopa i Ipron sii sa Makpila a marani sa Mamri a ndatar so lopa
ago so liyang a matatago on a rakes o langon a manga kayo sii ko soled o manga
temanaan o lopa
18 Na miyatangan i Ibrahim sii ko kamamasai ron o langon a Hitiyo a miyalimod ko
ipesoled ko siti.
19 Oriyan oto na inilebeng den i Ibrahim so karoma niyan a Sarah sii ko liyang a
matatago ko kalopaan sa Makpila a marani sa Mamri (giyanan den na Hibron) sii sa inged
a Kanaan.
20 Sii sangkai a okit na so kalopaan ago so liyang on na minisorat o manga Hitiyo a
miyatangan den i Ibrahim a aya niyan pelebengan.
MAKSOD 24
Si Iskak ago si Ribikah
Tanto a miyalokes si Ibrahim ago minitolod den a idad iyan, na pirarakmatan sekaniyan
den o Allah ko langon taman a pinggolaola niyan.
2 Na pitero i Ibrahim ko olowan o manga talasogoay niyan sii ko kampo niyan a aya
komikibir ko langon a rek iyan a “Lilipen ka a lima ngka ko didalem o bobon aken
3 Ka pakapesepaan ko seka sii ko Ingaran o Allah a Tohan o kasorgaan ago so doniya sa
di ngka den ikowa so wata aken a mama sa karoma sii ko manga Ikanaanen a sii ako kiran
makakakaden imanto.
4 Ka song ka baden ko inged aken ago sii ko manga tonganay aken na ron ka kiran
kowaan sa mapangaroma o wata aken a Iskak.”
5 Ogaid na iniise o talasogoay a “Antonaa i sowaan aken o di raken materang monot so
babay ko kakesoy aken sangkai a inged? Ba ko pagowita so wata a ka ko inged a poonan
ka?”
6 “Pananaggilai ngka o ba ngka mawit so wata aken roo!” a tig i Ibrahim.
7 “So Allah a Tohan o kasorgaan a miyakaawa raken ko walay o ama aken ago so inged a
pimbawataan raken ago miyakimbitiyarai raken pen sa inisepa iyan raken a imbegay
niyan angkai a inged ko manga moriyataw aken na sogoon iyan so malaikat iyan a
mangongonaan reka kaan ka mikowa so wata aken sa mapengaroma niyan a roo
pekapoon.
8 Opama ka di reka materang monot so babay ko kakesoy ngka sii na kepokas ka sangkai
a sapa. Ogaid na di ngka den pagowita so wata aken roo.”
9 Mandiyadi na inililip o talasogoay a lima niyan ko didalem a bobon o kadnan iyan a
Ibrahim na inisepa iyan on a penggolaolaan iyan so inisogo on i Ibrahim.
10 Oriyan iyan na kominowa so talasogoay sa sapolo ko manga onta o kadnan iyan na
lomiyalakaw den a maawid sa mbarambarang den a manga pipiya a pamemegayan a
piyakiawidan on o kadnan iyan. Na somiyong den ko siti a babalingan i Nahor sii sa
pagotaraan a Misopotamiya.
11 Kagiya makaoma roo na piyakaleko niyan so manga onta ko marani ko bowalan a
matatago ko liyo a siti. Perimon den oto ka oras a kapemanageb o manga babay.
12 Na miyangangarapan sekaniyan a tig iyan a “Ya Allah a Tohan o Kadnan aken a
Ibrahim, tarotopa ngka so keangin aken imanto ago kalimoon ka so kadnan aken a
Ibrahim.
13 Sii ako den makatitindeg sangkai a obay o bowalan, na pemakaoma den so manga raga
a kibabaling ko siti ka pemanageb.
14 Na peteroon ko ko isa kiran a ‘Kapedipedi ka bo na babaan ka so omoy ngka kaan ako
ron makainom.’ Na o teroa niyan raken a ‘Inom ka on den ka ipanageb aken pen so
manga onta ngka,’ na pengnin ko a sekaniyan den i miyaaraw ngka a mapangaroma o
oripen ka a si Iskak. O giyanan i manggolaola na ketokawan aken a inikalimo o ka so
kadnan aken.”
15 Sa da niyan pen kapakapasad mangangarapan na miyakaoma si Ribikah a poposain
iyan so omoy niyan. Wata sekaniyan i Bitowil a wata a mama i Milka a aya karoma i
Nahor a pagari i Ibrahim.
16 Tanto den a mataid so babay ago raga pen ka da den makeroma. Tomiyondagay
sekaniyan ko bowalan na inisageb iyan on so omoy niyan na taros a tomiyakedeg.
17 Na minggagaan so talasogoay sa kabalaka niyan on, na tig iyan a ‘Kapedipedi ka bo na
pakainoma ko ngka ko ig sii ko omoy ngka.”
18 “Inom ka on den, kadnan ko,” a tig o babay, na sarta a inibaba iyan so omoy ko waga
niyan na piyakainom iyan on sekaniyan.
19 Kagiya mapakainom iyan den na pitero o babay a “Ipanageb aken mambo so manga
onta ngka taman sa di siran makapasad mamanginom.”
20 Na magaan so magaan na inodod iyan langon so ig ko omoy niyan ko
pepemanginoman o manga ayam na mipeto sekaniyan nggagaan ko bowalan. Na
inipanageb iyan langon so manga onta niyan.
21 Da den a taroon o mama ko di niyan dii kasimaa ko raga ka pegilain iyan o ba
piyakabolos o Allah sa mapiya so kiyalalakaw niyan ago so di.
22 Kagiya makapasad mamanginom so manga onta na kominowa so mama sa kaningkir a
bolawan a aya kapened iyan na manga lima ka gramo, ago dowa timan a rinti a bolawan a
manga magatos ka gramo a kapened iyan.
23 Na iniise rekaniyan o mama a “Antawaa i kiwata reka? Kapedipedi ka bo na teroa
ngka raken o ba aden a keigaan ami ko walay o ama a ka imanto a gagawii?”
24 “Wata ako i Bitowil a so wata a mama i Milka ago si Nahor,“ a tig iyan.
25 “Na madakel a ragami ago kekan o manga onta sa walay ami, ago aden pen a keigaan
iyo roo.”
26 So kiyanega on o mama na somiyodiyod ago sominimba ko Allah
27 A tig iyan a “So podi na rek o Allah a Tohan o kadnan aken a Ibrahim ka da niyan
barobaa so kasasarigan a limo iyan ko kadnan aken. Matamataan a pinggonanao ako o
Allah ko kiyalalakaw aken sa kiyatoona ko ko walay o manga tonganay o kadnan aken.”
28 Na minggagaan maling so raga na piyanotolan iyan si ina iyan ago so manga ped iyan
sa walay makapantag ko miyanggolaola.
29 Si Ribikah na aden a laki niyan a aya ngaran iyan na si Laban, na minggagaan somong
si Laban ko mama sii ko bowalan.
30 Ka so den so kiyailaya niyan ko kaningkir ago so peririntiin o babay niyan ago
miyaneg iyan pen si Ribikah a piyanotol iyan so pitero on o mama na giyoto a
siyongowan iyan so mama. Miyaoma niyan a tomitindeg ko obay o manga onta a marani
ko bowalan
31 Na pitero iyan on a “Taros ka a rarakmatan o Allah! Ino ka sii baden titindeg?
Miyatiyagar aken den so walay ago so kedarpaan o manga onta ngka.”
32 Mandiyadi na tomiyaros sekaniyan ko walay. Na piyangowaan i Laban sa roran so
manga onta na bigan iyan siran sa ragami ago kekan iran. Inowitan iyan pen so mama
ago so manga ped iyan sa ig a mipamangonab iran sa ai.
33 Ogaid na kagiya kapangenatan so mama sa pangenengken na pitero iyan a “Di ako den
ken taman sa di aken mapayag so peteroon ko.”
“Teroa ngka rekami,” a tig i Laban.
34 Na tig iyan a “Talasogoay ako i Ibrahim.
35 Tanto a mala a kiyarakmati o Allah ko kadnan aken na mikewasa sekaniyan.
Piyamegan iyan sa manga bilibili, manga sapi, pirak ago bolawan, manga talasogoay a
mama ago babay, ago manga onta ago manga kimar.
36 Si Sarah a karoma niyan na mimbawata sa mama ko kadnan aken sii ko kiyalokes
iyan, na inibegay ron o kadnan aken so langon taman iyan.
37 Na piyakasepa ako o kadnan aken sa kipenggolalanen aken ko inisogo iyan a tig iyan a
‘Di ngka den ikowa so wata aken sa karoma sii ko Ikanaanen a manga babay sangkai a
inged a ron ako mababaling.
38 Ka song ka baden ko manga mbawataan o ama aken a manga tonganay aken na ron ka
sekaniyan kowaan sa mapangaroma niyan.’
39 “Na iniise aken ko kadnan aken a ‘Antonaa i sowaan aken o di raken monot so babay
ko kapembalingan aken?’
40 “Inisembag iyan raken a ‘So Allah a lalayon aken pepangongonotanan na pekaonoten
iyan reka so malaikat iyan, na pekabolosen iyan sa mapiya so kapelalakaw ngka kaan ka
mikowa so wata aken sa mapangaroma niyan sii ko manga tonganay aken a so mbawataan
o ama aken.
41 Aya bo a kakepokas ka ko inisepa a ka raken na amay ka makasong ka ko manga
tonganay aken na sengkaan iran a kapakaonota ngka ko babay, na giyoto den i kakepokas
ka ko sapa.’
42 “Na sii sangkai a kiyapakaoma ko imanto a gawii ko bowalan na inipangangarapan
aken a ‘Ya Allah a Tohan o kadnan aken a Ibrahim, kapedipedi ka bo na pakabolosa ngka
sa mapiya so kapelalakaw aken.
43 Sii ako den makatitindeg sangkai a obay o bowalan. Amay ka makaoma so isa a raga
a segeb na peteroon ko ron a ‘Kapedipedi ka bo na pakainoma ko ngka ko ig sii ko omoy
ngka.’
44 Na o teroa niyan raken a ‘Inom ka on den ka ipanageb aken pen so manga onta ngka,‘
na pengnin ko a sekaniyan den so babay a miyaaraw o Allah a mapangaroma o wata o
kadnan aken.’
45 “Sa da aken pen kapakapasad mangangarapan a sii bo ko poso aken, na miyakaoma si
Ribikah a poposain iyan so omoy niyan. Tomiyondagay sekaniyan ko bowalan na
somiyageb, na pitero aken on a ‘Kapedipedi ka bo na pakainoma ko ngka.”
46 “Na sarta a inibaba iyan so omoy ko waga niyan na pitero iyan a ‘Inom ka den ka
ipanageb aken pen so manga onta ngka.’ Na mininom ako ron, na piyakainom iyan pen so
manga onta ko.
47 “Oriyan iyan na iniise aken on a ‘Antawaa i kiwata reka?’ Na tig iyan a ‘Wata ako i
Bitowil a wata a mama i Nahor ago si Milka.’ So kiyanega ko sii na tiyago aken so
kaningkir ko ngirong iyan ago inisolot aken so manga rinti ko lima niyan,
48 Na somiyodiyod ako ago sominimba ko Allah. Piyodi aken so Allah a Tohan o
Kadnan aken a Ibrahim, ka pinggonanao ako niyan ko kiyalalakaw aken sa kakowaa ko
ko apo a babay o pagari o kadnan aken kaan aya mapangaroma o wata iyan a mama.
49 Na imanto o kalimoon iyo so kadnan aken ago mataan den a kipenggolalanen iyo ron
ko kabaya iyan na teroa niyo raken; na o kena, na teroa niyo kaan aken mapamikir o
antonaa i penggolaolaan ko.”
50 Na somimbag si Laban ago si Bitowil a tig iran a “Giyai na poon ko Allah; kagiya ka
maoto na da a ba ami reka mapetero.
51 Katii si Ribikah; pakaonota ngka den ko kambaling ka. Pakipangaromaan ka den ko
wata o kadnan ka a aya kaketoman o miyatero o Allah.”
52 So den so kiyanega o talasogoay i Ibrahim ko pitero iran na somiyodiyod sekaniyan ko
Allah.
53 Oriyan iyan na inipeliliyo niyan so dii pagarta a pirak ago bolawan ago manga nditaren
na inibegay niyan ki Ribikah. Piyamegan iyan mambo sa mala i arga a manga
pamemegayan so laki niyan ago so ina iyan.
54 Oriyan iyan na komiyan sekaniyan ago minimom a rakes o manga mama a ped iyan,
na roo siran den miyakatorog ko kagagawii.
Kagiya makambowat siran ko kiyapita iyan na pitero iyan a “Pakabalinga ko niyo ko
kadnan aken.”
55 Ogaid na pitero o laki i Ribikah ago si ina iyan a “Pakakadena ngka rekami pasin so
raga sa mamakasapolo gawii; oriyan iyan na pekaganat kano den.”
56 Na pitero kiran o mama a “Di ako niyo pesendoda. Tiyarotopan o Allah so kaangin
aken ko kiyalalakaw aken; na pakabalinga ko niyo imanto ko kadnan aken.”
57 Tig iran a ‘Talowan ami pasin si Ribikah ka pagisean ami o antonaa i kabaya iyan.”
58 Na tiyalowan iran ago inisean iran a “Ba ka pagonot sangkai a mama?”
“Magonot ako,” a tig iyan.
59 Kagiya ka maoto na piyakalalakaw iran si Ribikah ago so pepagipat on a babay ka
piyakaonot iran ko talasogoay i Ibrahim ago so ped iyan a manga mama.
60 Na inipangangarapan iran si Ribikah a tig iran a
“Mababad ka, babay ami, sa pipira nggibo.
Manga tatangan o kebabadan reka
so manga siti o manga ridoay iran!”
61 Miyakapaninimo den si Ribikah ago so manga raga niyan, na mikokoda siran ko
manga onta ka magonot siran den ko talasogoay i Ibrahim. Na palaya siran den
gomilyanat.
62 Si peman si Iskak na miyakakasoy den a poon ko Bir Lahay Roy ka sii sekaniyan
mababaling sa pagabagatan a Kanaan.
63 Miyakaisa a perimon na lominiyo sekaniyan ko pangomaan ka pemimikiran. So
kiyapangilailay niyan na miyalangkaw niyan so manga onta a pepekarani.
64 Lomiyangkaw mambo si Ribikah na miyailay niyan si Iskak. Tomipad sekaniyan ko
onta niyan
65 Na inisean iyan so talasogaoy a “Antawaa angkoto a mama ko pangomaan a
pepekaoma a pagalaon tano niyan?”
“Sekaniyan so kadnan aken,” a tig o talasogoay. Na kinowa i Ribikah so salimoot iyan
na inisapeng iyan ko paras iyan.
66 Kagiya makatoona siran na piyanotol o talasogoay ki Iskak so langon a miyanggolaola
niyan.
67 Oriyan iyan na inisoled i Iskak si Ribikah ko barombarong a babalingan gowani i
Sarah a ina iyan, na piyangaroma niyan si Ribikah. Pekebabayaan iyan si Ribikah na
miyakapiya a ginawa i Iskak oriyan o kiyapatay o ina iyan.
MAKSOD 25
So ped a manga Mbawataan o Ibrahim
Miyangaroma si Ibrahim sa salakaw a babay a aya ngaran iyan na si Kitorah.
2 Inimbabawata iyan rekaniyan si Simran, Yoksan, Midan, Midiyan, Isbak ago si
Siyowah.
3 Si Yoksan na aya ama i Sibas ago si Didan. Na so manga mbawataan i Didan na so
manga Asoriyo, manga Litosiyo ago so manga Liyomiyo.
4 Aya manga wata a mama i Midiyan na si Ipah, Ipir, Hanok, Abidas ago si Ildaah.
Langon ai na mbawataan i Kitorah.
5 Inibegak i Ibrahim ki Iskak so langon taman iyan,
6 Ogaid na sii ko da niyan pen kapatay na piyamegan i Ibrahim sa manga pamemegayan
so manga wata iyan a mama ko sandil iyan ago inawat iyan siran ko wata iyan a Iskak sii
ko inged sa tampar sa sebangan.
So Kiyapatay i Ibrahim ago so Kinilebengen on
7 Miniraot so idad i Ibrahim sa magatos ago pito polo ago lima ragon.
8 Na miyatay sekaniyan a minitolod piyapiya so idad iyan ago miyasoat ko
kiyapakapaginetaw niyan, na minitapi sekaniyan ko manga apo iyan.
9 Inilebeng o manga wata iyan a si Iskak ago si Ismail ko liyang sa Makpila a marani sa
Mamri sii ko lopa i Ipron a wata i Sowar a Hitiyo.
10 Giyanan so lopa a miyapamasa i Ibrahim ko manga Hitiyo. Roo minilebeng si Ibrahim
a minirembang ko karoma niyan a Sarah.
11 Oriyan o kiyapatay i Ibrahim na riyakmatan o Tohan so wata iyan a Iskak a sii
mababaling ko marani ko paridi a Bir Lahay Roy.
So manga Moriyataw i Ismail
12 Giyai i totolan ko wata o Ibrahim a si Ismail a inimbawata o talasogoay i Sarah a si
Hagar a Imisiren.
13 Giyai so manga wata a mama i Ismail a inisorat so manga ngaran iran ipoon sa kaka
taman sa ari: si Nibayot a paganay a inimbawata, si Kidar, Adbil, Mibsam,
14 Mismas, Domah, Masas,
15 Hadad, Timas, Hitor, Napis ago si Kidimah.
16 Giyanan so manga wata a mama i Ismail. Manga apoapoan siran o sapolo ago dowa
ka mbatabataa a so manga ngaran iran na aya inipameto ko tetanggisa a inged ago kampo
iran.
17 Miniraot so idad i Ismail sa magatos ago telo polo ago pito ragon; na miyatay
sekaniyan ago minitapi ko manga apo iyan.
18 Na aya kaolad o pagiingedan o manga mbawataan iyan na poon sa Habila taman sa Sor
sa sebangan a Misir igira a pepekaantap ka sa Asiriya. Miyaginged siran a maaawat ko
ped a mbawataan o Ibrahim.
Si Yakob ago si Isaw
19 Giyai i totolan ko wata o Ibrahim a si Iskak:
Si Ibrahim na aya ama i Iskak,
20 Na miyakapat polo ragon a idad i Iskak ko kiyapangaromaa niyan ki Ribikah a wata i
Bitowil a taw sa Aram sii sa Misopotamiya ago babay i Laban.
21 Inipangangarapan i Iskak ko Allah si karoma niyan sabap sa di pembawata. Na
inampon o Allah so piyangni niyan na miyaogat si Ribikah.
22 Miyadowa so wata sii ko tiyan iyan na di siran dii melobed. Pitero iyan a “Ino raken ai
mapenggolaola?” Na miyangadap sekaniyan ko Allah ka pagisean iyan.
23 Pitero on o Allah a
“Dowa ka nasiyon a matatago san ko roranan ka sa wata,
na pembawata ka sa dowa ka bangsa a makapembelag.
So isa a bangsa na pembaloy a mabegar a di so isa on,
na so kaka na mapenonogo o ari.”
24 Kagiya den a maoma so gawii a kapembawata iyan na mimbawata sekaniyan sa
miyadowa a wata a manga mama.
25 Aya paganay a miyakaliyo na mariga, na so langon o kobal iyan na datar o bombolen a
nditaren; na bitowan iran sekaniyan sa Isaw.
26 Oriyan iyan na lominiyo so pagari niyan a kakapetan iyan so palo i Isaw. Kagiya ka
maoto na iningaranan sekaniyan sa Yakob. Miyakanem polo ragon a idad i Iskak ko
kinimbawataan kiran i Ribikah.
Pipesa i Isaw so Kawadib iyan ko Kakakakai ron
27 Miyamakala so manga wata a mama, na mimbaloy si Isaw a mapasang i kapanganop a
mababaya magenebeneb sa liyo, ogaid na maimen a mama si Yakob a lalayon gomegenek
ko marani ko barombarong.
28 Si Iskak a mababaya koman sa sapo a maila a ayam na pekebabayaan iyan si Isaw; na
si peman si Ribikah na pakatatayaan iyan si Yakop.
29 Miyakaisa a gawii a petinda si Yakob sa sawaw a kodalis na miyakaoma si Isaw a sii
miyakapoon ko di niyan dii pagenebeneban, na tanto den a pekeor.
30 Na pitero i Isaw ki Yakob a “Nggagaan ka, begi ako ngka sangkanan a mariga a
sawaw ka tanto ako den a pekeor!” (Giyanan i sabap a kiyabetowi rekaniyan sa ‘Idom’ a
aya maana niyan na mariga.)
31 Na pitero i Yakob a “Pesaa ngka raken daan so kawadib ka ko kakakakai reka.”
32 Tig i Isaw a “Oway, ka petay ako den a ongos! Antonaa i kipantag raken angkanan a
kawadib?”
33 Ogaid na tig i Yakob a “Sepa ka pasin.” Na misepa si Isaw na giyoto i kiyapesaa
niyan ki Yakob ko kawadib iyan ko kakakakai ron.
34 Oriyan iyan na bigan i Yakob si Isaw ko paan ago sawaw a kodalis; na komiyan
sekaniyan ago mininom on na taros a gomiyanat ago miyawa roo. Na da on den
panganogoni i Isaw so kawadib iyan ko kakakakai ron.
MAKSOD 26
Si Iskak ago si Abimilik
Sii sa masa ini na tiyaon peman so dalem a inged a datar o kiyataona on isako masa o
Ibrahim. Na somiyong si Iskak ki Abimilik a dato o manga Pilistiyo sii sa Gerar,
2 Ka miyakapeyag den so Allah ki Iskak ago miyatero iyan on a “Di ka song sa Misir;
baling ka ko inged a peteroon ko reka.
3 Kaden ka sangkai a inged ka kelalayon ako reka ago perakmatan ko seka, na imbegay
aken reka ago so manga mbawataan ka so langon angkai a manga inged. Itoman aken so
initopa ko ko ama a ka a si Ibrahim
4 Ka pakapendakelen ko so kebabadan reka a datar o manga bitoon sa langit, ago
imbegay aken kiran langon angkai manga inged. Na kerakmatan so langon a nasiyon ko
doniya a nggolalan ko mbawataan ka
5 Sabap sa piyangongonotanan ako o Ibrahim ago tiyoman iyan langon so manga sogoan,
manga kitab ago manga kokoman aken.”
6 Kagiya ka maoto na komiyaden si Iskak sa Gerar.
7 Kagiya isean den o manga mama sangkoto a inged makapantag ki karoma niyan na
pitero iyan a “Babay aken sekaniyan,” ka pekelek sekaniyan o ba niyan teroa a “Karoma
ko sekaniyan.” Aya mapipikir iyan na “Baanda ko mbonoa o manga mama sangkai a
inged kaan iran makowa si Ribikah sabap ko kataid iyan.”
8 Kagiya den a matey a kakakaden roo i Iskak na miyakaisa a gawii na tomiyolong si
Abimilik a dato o manga Pilistiyo ko dirowasa iyan na miyailay niyan si Iskak a di niyan
dii teyaan si Ribikah a karoma niyan.
9 Na piyakisogoan i Abimilik si Iskak na pitero iyan on a “Matamataan a karoma ngka
sekaniyan! Ngkaino ngka peteroa a babay ngka sekaniyan?”
Inisembag i iskak a “Ka aya katao ko ron na ba ako baden mabono o teroa ko a karoma
ko sekaniyan.”
10 Tig i Abimilik a “Antonaa bes angkai a pinggolaola ngka rekami? Masiken a aden a
isa ko manga mama i romimbang ko karoma ngka na kiyatagoan kami ngka sa
kadostaan.”
11 Na liyalangan i Abimilik so langon o manga pagtaw niyan a tig iyan a “Apiya antawaa
i makarimpas sangkai a mama o di na so karoma niyan na mbonoon sekaniyan den.”
12 Sa masa oto na mimbasok si Iskak sangkoto a inged, na sii bo sangkoto a ragon na aya
miyaragon iyan na magatos takep ko inisaod iyan sabap ko kararakmati ron o Allah.
13 Mimbaloy sekaniyan a tatamoken, na pekeomanan so tamok iyan taman sa tanto
sekaniyan a mikewasa.
14 Madakel a talon iyan a bilibili ago sapi ago manga talasogoay niyan a aya on inisiig o
manga Pilistiyo.
15 Kagiya ka maoto na so langon a paridi a piyamangalot o manga talasogoay o ama iyan
a Ibrahim isako masa niyan pen na piyanambonan o manga Pilistiyo ka piyameno iran a
bote.
16 Na pietro i Abimilik ki Iskak a “Awa ka rekami, ka mimbaloy ka a tanto a mala i gees
a di sekami.”
17 Kagiya ka maoto na miyawa roo si Iskak na mikampo sii ko Balintad sa Gerar, na
malo miyatey a kakakaden iyan roo.
18 Piyangalot iyan peroman so manga paridi a miyapangalot isako masa o ama iyan a
Ibrahim ago piyanambonan mambo o manga Pilistiyo oriyan o kiyapatay o Ibrahim. Na
piyametowan iyan ai sa manga ngaran a datar o inipameto ron o ama iyan.
19 So manga talasogoay i Iskak na komiyalot sa isa pen a paridi sii ko balintad na
miyakatoon siran on sa mapiya a ig.
20 Ogaid na so manga pananagikor sa pangangayamen sii sa Gerar na miyakipewala siran
ko manga pananagikor i Iskak a tig iran a “Rek ami angkanan a ig!” Kagiya ka maoto na
bitowan i Iskak angkoto a paridi sa ‘Kapewala’ ka miyakimbono siran rekaniyan.
21 Na komiyalot so manga talasogoay i Iskak sa salakaw a paridi na kiyapepawalaan iran
peman. Kagiya ka maoto na bitowan iyan ai sa ‘Rido’.
22 Na miniseg si Iskak na komiyalot peroman sa paridi, na da iran kapepawalai. Bitowan
iyan ai sa ‘Kaolad’ a tig iyan a “Imanto den na bigan tano o Allah sa maolad a kekadenan
tano, na magosor bo so kapakambebetad tano sangkai a inged.”
23 Miyawa roo si Iskak na somiyong sa Birsiba.
24 Sangkoto a kagagawii na mipeyag rekaniyan so Allah a tig iyan a
“Saken so Tohan o ama a ka a Ibrahim.
Di ka pekelek ka lalayon ako reka.
Perakmatan aken seka ago pakapendakelen ko so kebabadan reka
sabap ko initopa ko ko oripen aken a Ibrahim.”
25 Na mimbaal roo si Iskak sa aparan na tiyalowan iyan so Ingaran o Allah. Mikampo
sekaniyan roo, na komiyalot roo pen sa paridi so manga talasogoay niyan.
So Kapasadan i Iskak ago si Abimilik
26 Na somiyong rekaniyan si Abimilik a poon sa Gerar a ped iyan si Ahodsat a so
mosawira iyan ago si Pikol a komandir o manga sondaro niyan.
27 Pitero kiran i Iskak a “Ino kano raken song a saken so ipekegowad iyo ago piyakaawa
iyo pen?”
28 Tig iran a “Miyailay ami den a lalayon reka so Allah; na aya pipikiren ami na patot a
pepasadanowai tano. Kabaya ami a ipesepa ka rekami
29 A di kami ngka pemarataan, ka da ami seka karimpasi; lalayon ami seka baden
pipiyapiyaan na piyakaawa ami seka sa da a rayorayo a ginawa ngka. Na rarakmatan ka o
Allah imanto.”
30 Na pikendorian siran i Iskak na mikekan siran ago miyamanginom.
31 Teked a kapipita ko miyakatalondog a gawii na mipepasadanowai siran sarta a
misesapai. Mandiyadi na piyakaganat siran o Iskak na inaawaan iran sekaniyan a
mapipiya a ginawa iran.
32 Sangkoto a gawii na miyakaoma so manga talasogoay i Iskak na pitero iran on so
makapantag ko miyakalot iran a paridi. Tig iran a “Miyakatoon kami sa ig!”
33 Kagiya ka maoto na bitowan iyan angkai a paridi sa ‘Siba’ (aya maana niyan na
‘Sapa’), na taman imanto na aya ngaran angkoto a siti na Birsiba.
34 Si peman si Isaw na kagiya makapagidad sa pat polo ragon na piyangaroma niyan si
Yodita a wata i Biri a Hitiyo ago si pen si Basemat a wata i Ilon a Hitiyo.
35 Na inikerata siran baden a ginawa i Iskak ago si Ribikah.
MAKSOD 27
Riyakmatan i Iskak si Yakob
Kagiya den a malokes si Iskak a di den pekanono na tiyalowan iyan so kaka a wata iyan a
si Isaw a tig iyan a “Hey, wata ko!”
Somimbag si Isaw a “Katii ako bo.”
2 Tig i Iskak a “Miyalokes ako den imanto na di nda ketey a kapetay aken.
3 Na kowaa ngka so pana a ka na song ka ko kalasan na go ako ngka on panganopen sa
maila a ayam.
4 Tiyagaren ako ngka on ko mapiya i taam a pangenengken a pekebabayaan ko na go
ngka raken wita. Na amay ka makan aken den na perakmatan aken seka sa di aken pen
kapetay.”
5 Na so dii kimbitiyarain i Iskak ki Isaw na pepemakinegen i Ribikah. Na so den so
kiyasong i Isaw sa kalasan ka penganop sa ayam a imbaling iyan
6 Na pitero i Ribikah ko wata iyan a Yakob a “Miyaontaling aken so pitero o ama a ka ko
pagari ngka a Isaw a tig iyan a
7’Witi ako ngka sa maila a ayam ago tiyagaren ako ngka on ko mapiya i taam a
pangenengken; na amay ka makan aken den na perakmatan aken seka ko kapengadap
aken ko Allah sa di aken pen kapetay.’
8 Na pakinega ko ngka piyapiya, wata ko, ago nggolaolaa ngka so peteroon ko reka.
9 Song ka ko manga pangangayamen na pamilii ngka sa dowa timan a kaolit a kangodaan
a kambing na go ngka raken wita kaan aken mitinda a mapiya i taam a pangenengken a
pekebabayaan o ama a ka.
10 Mapasad oto na kewit ka rekaniyan kaan iyan makan ago perakmatan ka niyan sa di
niyan pen kapetay.”
11 Na pitero i Yakob ki ina iyan a “Oway, ogaid na bombolen a mama si Isaw na saken
na matilak ako i kobal.
12 Baanda ko pagapera i ama na ketokawan iyan a peselibaan aken sekaniyan. Amay ka
magiyoto na di ako kerakmatan ka ba aken baden pakipesintai a ginawa ko.”
13 Tig i ina iyan a “Sii raken mitana so kisinta reka, wata ko; nggolaolaa ngka baden so
pitero aken. Ika roo den na kowaa ngka raken so manga kambing.”
14 Mandiyadi na somiyong sekaniyan roo na kinowa niyan so manga kambing taros a
inowit iyan ko ina iyan. Initinda o ina iyan a mapiya i taam a pangenengken a
pekebabayaan i ama iyan.
15 Oriyan iyan na kinowa i Ribikah so lebi a mapiya a manga nditaren i Isaw a tatagoon
iyan sa walay na piyakinditar iyan ki Yakob.
16 Kinowa niyan mambo so kobal o manga kambing na inisapeng iyan ko manga lima i
Yakob ago sa tengo iyan.
17 Na piyalad iyan ki Yakob so mapiya i taam a pangenengken ago so inembaalan iyan a
paan.
18 Somiyong sekaniyan den ko ama iyan na pitero iyan on a “Hey ama ko.”
“Ino ka, wata ko,” a tig iyan. “Antawaa ka?”
19 Tig i Yakob a “Saken si Isaw a kaka a wata a ka. Ininggolalan aken den so pitero o ka
raken. Kapedipedi ka bo na mbowat ka na go ka kan ko sapo o ayam a miyaanop aken
kaan ako ngka karakmati.”
20 Inisean i Iskak so wata iyan a “Ino magaan a kiyapakatoon ka on, wata ko?”
“Tiyabangan ako o Allah a Tohan ka," a inisembag iyan.
21 Na pitero i Iskak ki Yakob a “Obay ka sii, ka pagaperen ko seka, wata ko, kaan aken
katokawi o ba seka si Isaw ago so di.”
22 Miyobay si Yakob ki Iskak na inaper o ama iyan a tig iyan a “So lagam ka na lagid o
lagam i Yakob, ogaid na so manga lima ngka na lagid o manga lima i Isaw.”
23 Na da niyan makilala si Yakob ka bombolen so manga lima niyan a lagid o lima o
pagari niyan a Isaw. Kagiya ka maoto na perakmatan iyan sekaniyan,
24 Ogaid na iniise iyan on daan a “Benar a seka so wata aken a Isaw?"
“Saken,” a tig iyan.
25 Tig i Iskak a “Witi ako ngka ko sapo o ayam a miyaanop ka, wata ko, ka koman ako
ron a daan na go aken seka bo rakmati.”
Na inowit on i Yakob na komiyan on so ama iyan, ago inowitan iyan pen sa arak na
minimom on.
26 Oriyan iyan na pitero on i Iskak a “Obay ka sii, wata ko, na go ako ngka areki.”
27 Na miyobay sekaniyan on na inarekan iyan. Kagiya mabaw i Iskak so baw o bangkala
iyan na riyakmatan iyan sekaniyan a tig iyan a
“So ikasosoat a baw o wata aken na datar o baw o kalopaan a rarakmatan o Allah.
28 Kabegan ka o Tohan sa namog a pepekapoon sa langit
ago mabaloy niyan so lopa a ka a oodaren,
ago kabegan ka niyan pen sa madakel a pereperan ago bago a arak.
29 Makipenonogo reka so manga bangsa.
ago makasodiyod reka so manga nasiyon.
Ndatoi ngka so manga tonganay ngka;
na makasodiyod reka so manga mbawataan o ina a ka.
Kapesintaan so siran oto a pesinta reka,
ago karakmatan so siran oto a perakmat reka.”
Piyangni i Isaw so Karakmati ron i Iskak
30 Miyapasad i Iskak romakmat si Yakob, na so den so kiyaipos i Yakob ko hadapan o
ama iyan na miyakaoma so pagari niyan a Isaw a miyakapoon ko pepanganopan iyan.
31 Mitiyagar sekaniyan mambo sa mapiya i taam a pangenengken na inowit iyan ai ko
ama iyan. Pitero iyan ki ama iyan a “Hey ama ko, mbowat ka na kan ka ko sapo o ayam a
miyaanop aken kaan ako ngka karamati.”
32 “Antawaa ka?” a iniise on i Iskak.
“Saken so kaka a wata a ka a si Isaw,” tig iyan.
33 So kiyanega on i Iskak na tanto a piyananabad a tig iyan a “Antawaa bes angkoto a
miyakaanop sa ayam ago inowit iyan raken? Aya ko ron den kiyapasada koman kagiya
makaoma ka. Riyakmatan aken sekaniyan, na matamataan a sekaniyan den i
kerakmatan!”
34 Kagiya maneg ai i Isaw na miyakagoraok sa tanto a matanog ka sayana a miyarata a
ginawa niyan a tig iyan ko ama iyan a “Saken mambo, ama ko, rakmati ako ngka
mambo!”
35 Ogaid na pitero iyan a “Somiyong sii so pagari ngka na siyaliba ako niyan.
Miyatarima iyan den so iperakmat aken reka.”
36 Tig i Isaw a “Patot den a ngaran iyan na si Yakob! Ka miyakadowa ako niyan den
kaalampasi; kinowa niyan so kawadib aken ko kakakakai raken, ago imanto peman na
kinowa niyan so iperakmat raken!” Na tig iyan pen a “Ba da a miyalamba a ka a kirakmat
ka raken?”
37 Inisembag on i Iskak a “Biyaloy aken sekaniyan a dato o ka, na so langon a tonganay
niyan na inibegay aken on a manga talasogoay niyan. Inioyag aken rekaniyan den so
pereperan ago bago a arak. Kagiya ka maoto, wata ko, na da den a ba ko reka
mapenggolaola!”
38 Miyangangampedian pen si Isaw ki ama iyan a tig iyan a “Ba sasatiman bo a
iperakmat ka, ama? Hey ama ko, rakmati ako ngka mambo!” Na mipoon den gomoraok
si Isaw sa matanog.
39 Mandiyadi na pitero on i Iskak a
“So kebalingan ka na maawat ko oodaren a lopa
ago mawatan ko namog a pepekapoon sa langit.
40 Aya mipegoyag ka na so pedang ka,
na mapenonogo ka o pagari ngka.
Ogaid na amay ka somorang ka
na kepokas ka ko lig ka so kokoong iyan.”
Miyakapalagoy si Yakob
41 Ipoon roo den na ipekegowad i Isaw si Yakob sabap ko kiyarakmati ron o ama iyan.
Na pitero iyan sa ginawa niyan a “Magaan den so kapetay i ama; na sii ko kapendiyagai
ron na mbonoon aken si Yakob.”
42 Kagiya matero ki Ribikah so mapipikir i Isaw na piyakisongowan iyan si Yakob na
pitero iyan on a “Aya mibobolong o pagari ngka a Isaw ko rata a ginawa niyan na giya
kapipikira niyan sa kabonoa niyan reka.
43 Kagiya ka maoto, wata ko, na nggolaolaa ngka so peteroon ko. Pagapas ka nggagaan
ko laki aken a si Laban roo sa Haran.
44 Tareg ka on sa mamakapira gawii taman ko kapekalenggaw o rarangit o pagari ngka,
45 Na amay ka mada den so rarangit iyan reka ago kalipatan iyan so pinggolaola ngka on,
na pakisogoan aken seka roo sa kapakabalinga ko reka sii. Di aken kabaya o ba
makaperengan kano raken mada a dowa kataw a wata aken!”
46 Na taros a somiyong si Ribikah ki Iskak na pitero iyan on a “Kiyasemowan ako ko
Hitiyo a manga babay a miyapangaroma i Isaw! O pangaromaa i Yakob so isa ko datar
iran a manga Hitiyo sangkai a inged na da a bali raken o kapepaginetaw aken pen.”
MAKSOD 28
Mandiyadi na piyakisogoan i Iskak si Yakob na siyalam iyan ago tiyapaosan iyan a tig
iyan a “Di ka den pengaroma sa Ikanaanen a babay.
2 Song ka baden somambot sa Misopotamiya sii ko walay o ama o ina a ka a si Bitowil,
na pangaromaa ngka roo so isa ko wata i Laban a laki o ina a ka.
3 Karakmatan ka o Tohan a Lebi a Mabager, ago mababad ka niyan na go mapakandakel
ka niyan taman sa mabaloy so mbawataan ka a madakel a nasiyon.
4 Karakmatan ka niyan ago so kebabadan reka a datar o kiyarakmati niyan ko Ibrahim
kaan ka matangan angkai a inged a matag ka on baden mananangga imanto; a so inged a
inibegay o Tohan ko Ibrahim.”
5 Na piyakaganat den i Iskak si Yakob ko kasong iyan sa Misopotamiya sii ki Laban a
wata i Bitowil a taw sa Aram ago laki mambo i Ribikah a ina i Yakob ago si Isaw.
6 Kiyatokawan i Isaw a riyakmatan i Iskak si Yakob ago piyakasong iyan den sa
Misopotamiya ka roo niyan pakapangaromaa. Kiyatokawan iyan pen a kagiya
karakmatan sekaniyan i Iskak na tiyapaosan iyan sa “Di ka den pengaroma sa Ikanaanen a
babay.”
7 Miyailay i Isaw a piyaratiyaya i Yakob so ama iyan ago so ina iyan ka somiyong
sekaniyan den sa Misopotamiya.
8 Mandiyadi na kiyasabotan i Isaw a kena a ba itetembo o ama iyan so manga babay a
Ikanaanen.
9 Kagiya ka maoto na somiyong sekaniyan ki Ismail a wata i Ibrahim na piyangaroma
niyan si Mahalat a wata i Ismail ago babay i Nibayot ka inioman iyan ko manga karoma
niyan.
So Taginepen i Yakob sa Bitil
10 Na gomiyanat si Yakob sa Birsiba a miyantap sa Haran.
11 Kagiya somedep den so alongan na miyakaoma sekaniyan ko isa a darpa na domike
roo ko kagagawii. Kominowa sa ator na inolonan iyan na taros a miyakatorog.
12 Mitetaginep sekaniyan na miyakailay sa towak a pakatitindegen ko doniya a miraraot
so poro iyan sa kasorgaan, na so manga malaikat o Tohan na manog manik siran on.
13 Sangkoto a poro iyan na tomitindeg on so Allah na pitero iyan a “Saken so Allah a
Tohan o apo o ka a si Ibrahim ago so Tohan i Iskak. Imbegay aken reka ago so
kebabadan reka so lopa a kaiigaan ka.
14 Pekadakedakel so manga mbawataan ka a datar o bayanek sa doniya, na pemangiparak
siran ko sedepan taman sa sebangan, ago ipoon sa pagotaraan na taman den sa
pagabagatan. Na kerakmatan so langon a bangsa sa doniya a nggolalan reka ago so
manga mbawataan ka.
15 Lalayon ako reka na apiya anda ka song na pegipaten ko seka, na pekakasowin ko seka
pen sangkai a inged. Di aken seka mbelagen taman sa di aken mitoman so minitopa ko
reka.”
16 Miyakanaw si Yakob na pitero iyan a “Matamataan a sisii bes so Allah sangkai a darpa
na di aken katawan!”
17 Na miyalek sekaniyan a tig iyan a “Tanto a piyakalekelek angkai a darpa! Giyai den i
walay o Tohan; giyai den so gimowa o kasorgaan!”
18 Teked a kapipita na mimbowat si Yakob na kinowa niyan so ator a kiyaolonan iyan na
go piyakatindeg iyan sa tanda a tademan, na inododan iyan pen sa lana a olibi.
19 Bitowan iyan angkoto a darpa sa Bitil apiya pen aya ipembeto ron gowani sangkoto a
siti na Lods.
20 Oriyan iyan na misepa si Yakob ko Allah a tig iyan a “O malalayon ka raken ago
pegipaten ako ngka sangkai a kapelalakaw aken, ago mbegan ako ngka pen sa
pangenengken ago nditaren,
21 Na o makakasoy ako ko walay o ama aken a da a rayorayo a ginawa ko na mataan den
a kebaloy ka a Tohan aken.
22 Giyangkai a ator a piyakatindeg aken sii a tanda a tademan na pembaloy a darpa a
pesimbaan reka, na so langon a imbegay ngka raken na isenggay aken sa rek ka so
ikasapolo on bagi,”
MAKSOD 29
Miyakaoma si Yakob ko Walay i Laban
Tomiyaros den lomalakaw si Yakob na miyakaoma sekaniyan ko inged o manga taw sa
sebangan.
2 Miyailay niyan roo a paridi sii ko pananateba ago telo lompok a bilibili a kikaleleko a
marani ko paridi. Giyanan i kapepenageban sa ig ko kapepekainoma ko manga talon,
ogaid na aden a mala a ator a idadapeng ko ngari o paridi.
3 Oman roo matimo langon so manga talon na peliliden o manga pananagikor sa bilibili
so ator na go iran bo mapekainom so manga bilibili, na ipekesoy iran bo so ator ko ngari
o paridi.
4 Na inisean i Yakob so manga pananagikor a “Hey manga pagariya, anda kano
miyakapoon?”
“Poon kami sa Haran,” a tig iran.
5 Tig iyan kiran a “Katawan iyo si Laban a so apo i Nahor?”
“Oway, katawan ami,” a inisembag iran.
6 “Mapipiya a ginawa niyan?” a tig i Yakob.
“Oway,” a tig iran, “na kaoto so wata iyan a babay a si Rakila a pekaoma den a ped
iyan so manga bilibili o ama iyan.”
7 Na pitero i Yakob a “Maporo pen a alongan; kena a ba giya den i oras ko kapetimoa ko
manga talon. Ino niyo pemakainoma so manga bilibili na go niyo siran kasowin ko
pepenateban iran?”
8 “Di ami anan mapenggolaola," a tig iran “taman sa di matimo langon so manga talon
ago malilid ami mambo so ator a matatago ko ngari o paridi, na go ami bo
mapemakainom so manga bilibili.”
9 Sii ko di niyan kiran pen dii kimbitiyarain na miyakaoma si Rakila a pepekaonoten iyan
so manga bilibili o ama iyan ka sekaniyan i pananagikor on.
10 Kagiya mailay i Yakob si Rakila a wata i Laban a so laki o ina iyan ago so pen so
manga bilibili i Laban na miyobay sekaniyan ko paridi na linilid iyan so ator na go
piyamakainom iyan so manga bilibili o bapa iyan.
11 Oriyan iyan na inarekan iyan si Rakila, na miyakasegad sekaniyan sa kiyababaya iyan.
12 Pitero iyan ki Rakila a tonganay sekaniyan o ama iyan ka wata sekaniyan i Ribikah.
Na sarta a minggagaan somong si Rakila ko ama iyan na piyanotol iyan on ai.
13 So den so kiyanega i Laban ko totol makapantag ki Yakob a wata o babay niyan na
minggagaan sekaniyan on somong. Giyakes iyan ago inarekan iyan na taros a inowit iyan
sa walay. Kagiya mapanotol rekaniyan i Yakob so langon angkai a miyanggolaola
14 Na pitero on i Laban a “Matamataan a isa bo so rogo ta.”
Piyangaroma i Yakob si Liyah ago si Rakila
Kagiya makasaolan a kiyapakakaden i Yakob ki Laban
15 Na pitero on i Laban a “Kena a ba patot o ba ka raken dii nggalebek sa da a bayad iyan
a sii bo sabap ko katotonganayi aken reka. Teroa ngka raken o antonaa i pekisokay ngka
raken.”
16 Sa masa oto na dowa kataw a wata a babay i Laban. Aya ngaran o kaka on na si Liyah
ago aya ngaran o ari ron na si Rakila.
17 Si Liyah na maronok i mata ogaid na si Rakila na mapiya i arog a lawas ago mataid.
18 Pekebabayaan i Yakob si Rakila na pitero iyan a “Penggalebekan ko seka sa pito ragon
asar a pakipangaromaan ka raken so ari a wata a ka a si Rakila.”
19 Tig i Laban a “Tomo a sii aken reka pakipangaroma a di so ped a mama. Sii ka raken
den kaden.”
20 Mandiyadi na minggalebek si Yakob ko miyakapito ragon kaan iyan mapangaroma si
Rakila, na lagid o ba da bo makapira gawii rekaniyan sabap ko kapekebabayai niyan ki
Rakila.
21 Kagiya maipos oto na pitero i Yakob ki Laban a “Miyapopos den so pito ragon a pasad
ta! Pakipangaromaan ka raken den so wata a ka.”
22 Na mikendori si Laban na piyamakisogoan iyan so langon a taw sangkoto a darpa.
23 Ogaid na kagiya magagawii den na aya kinowa i Laban a inowit iyan ki Yakob na si
Liyah, kena a ba si Rakila, na rimbang i Yakob si Liyah. (24 Inibegay i Laban so
talasogoay niyan a babay a si Silpah ko wata iyan a Liyah a mabaloy a talasogoay niyan.)
25 So kiyapita iyan na miyailay i Yakob a sekaniyan bes si Liyah! Na somiyong si Yakob
ki Laban na pitero iyan on a “Antonaa bes angkai a inikidia ngka raken? Ba kena a ba si
Rakila i ininggalebek aken reka? Ino ako ngka kapegakali?”
26 Tig i Laban a “Kena a ba ami adat a ba maona pakipengaromaan so ari a di so kaka.
27 Nayawa ngka baden so kakepasad o isa ka padian a dii kakendori ko kiyakewing.
Mapopos oto na pakipangaroma ko reka pen so ari a wata aken a aya ngka on kibayad na
pito ragon pen a ipenggalebek ka raken.”
28 Miniyog si Yakob, na kagiya mapopos so pito gawii a kiyakendorii ki Liyah na
piyakipangaroma on i Laban si Rakila.
29 Inibegay i Laban so talasogoay niyan a babay a si Bilhah ko wata iyan a Rakila a
mabaloy a talasogoay niyan.
30 Na rimbang mambo i Yakob si Rakila, na mala a kapekebabayai niyan ki Rakila a di si
Liyah. Na pito ragon pen a ininggalebek iyan ki Laban.
So manga Wata i Yakob
31 Kagiya mailay o Allah a pekebabayaan i Yakob si Rakila a di si Liyah na biyaloy
niyan si Liyah a makapembawata, ogaid na balek si Rakila.
32 Na miyaogat si Liyah na mimbawata sa mama. Bitowan iyan sa Robin ka tig iyan a
“Miyailay den o Allah so dii kakerata a ginawa ko. Matamataan a kebabayaan ako
imanto o karoma ko.”
33 Miyaogat sekaniyan peroman na mimbawata sa mama. Na pitero iyan a “Kagiya
miyaneg o Allah a kena a ba ko pekebabayai o karoma ko na inibegay niyan raken mambo
angkai a wata.” Kagiya ka maoto na bitowan iyan sa Simiyon.
34 Na miyaogat sekaniyan peman na mimbawata sa mama, na pitero iyan a “Imanto na
makapetordowa kami piyapiya ago so karoma ko ka kagiya mimbabawata ako ron sa telo
kataw a wata a mama.” Kagiya ka maoto na bitowan iyan so wata sa Libi.
35 Na miyaogat sekaniyan peroman na mimbawata sa mama. Na pitero iyan a “Imanto
den na podin aken so Allah.” Kagiya ka maoto na bitowan iyan so wata sa Yodah. Na
gominek sekaniyan mbawata.
MAKSOD 30
Kagiya den a mailay i Rakila a da sekaniyan den mbawata ki Yakob na inidengki niyan ai
ko pagari niyan. Na pitero iyan ki Yakob a “Begi ako ngka sa manga wata, ka o di, na
petay ako!”
2 Tanto a kiyararangitan i Yakob si Rakila na pitero iyan on a “Ba saken so Tohan a da
niyan peroa a kapakambawata a ka?”
3 Tig i Rakila a “Katii si Bilhah a talasogoay aken. Rembanga ngka kaan sekaniyan
makambawata sa kibilang a wata aken kaan aken mabangon so pamiliya ko a nggolalan
rekaniyan.”
4 Na inibegay niyan ki Yakob si Bilhah a mabaloy a karoma niyan. Rimbang sekaniyan i
Yakob
5 Na miyaogat si Bilhah na go mimbawata ki Yakob sa wata a mama.
6 Na pitero i Rakila a “Piyakakebenar ako o Tohan. Inampon iyan so pangni aken ka
bigan ako niyan sa wata a mama.” Sabap sii na bitowan iyan sa Dan.
7 Miyaogat peroman si Bilhah na mimbawata ki Yakob sa ikadowa a wata a mama.
8 Na pitero i Rakila a “Tanto ako a miyakipagagawa ko pagari aken na miyakataban ako.”
Na bitowan iyan so wata sa Naptali.
9 Kagiya mageda i Liyah a gominek sekaniyan mbawata na kinowa niyan so talasogoay
niyan a si Silpah na inibegay niyan ki Yakob a mabaloy mambo a karoma niyan.
10 Na mimbawata si Silpah ki Yakob sa wata a mama.
11 Pitero i Liyah a “Sayana ako a mala i okor!” Na bitowan iyan so wata sa Gad.
12 Na mimbawata peroman si Silpah ki Yakob sa ikadowa a wata a mama
13 Samaoto na pitero i Liyah a “Tanto ako a miyababaya! Imanto na mbetowan ako den
o manga babay sa pekebabaya.” Kagiya ka maoto na iningaranan iyan so wata sa Yasir.
14 Miyakaisa a gawii sii ko dii kaperaragon sa trigo na somiyong si Robin ko pangomaan
na miyakatoon sekaniyan roo sa mangengeto a manderik, na inibaling iyan ki ina iyan a
Liyah. Na pitero i Rakila ki Liyah a “Kapedipedi ka bo na begi ako ngka ko manga
manderik a miyatoon o wata a ka.”
15 Ogaid na pitero i Liyah a “Ba ka pen da temani ko kiyakowaa ngka raken ko karoma
ko? Ba ngka pen kowaa so manga manderik o wata aken?”
Tig i Rakila a “O begi ako ngka ko manderik o wata a ka na pakarembangen aken reka
si Yakob imanto a gagawii.”
16 Na kagiya merimon a makaoma si Yakob a poon ko di niyan dii mbasokan na inalaw
sekaniyan i Liyah. “Rembang ka raken imanto a gagawii,” a tig iyan, “ka kiyaapinan
aken seka a manga manderik a miyatoon o wata aken.” Na romimbang sekaniyan on
sangkoto a kagagawii.
17 Inampon o Tohan so pangni i Liyah na miyaogat sekaniyan, na mimbawata ki Yakob
sa ikalima a wata a mama.
18 Na pitero i Liyah a “Biyalasan ako o Tohan sabap ko kinibegan aken ko talasogoay
aken a babay a mapengaroma o karoma ko.” Na bitowan iyan so wata sa Isakar.
19 Miyaogat peroman si Liyah na mimbawata ki Yakob sa ikanem a wata a mama.
20 Na tig i Liyah a “Bigan ako o Tohan sa mapiya a pamemegayan. Imanto na ketatap
raken so karoma ko sabap sa mimbawata ako ron sa nem kataw a wata a mama.” Na
bitowan iyan so wata sa Sibolon.
21 Oriyan iyan na mimbawata sekaniyan sa wata a babay na bitowan iyan sa Dinah.
22 Sa masa oto na tiyago o Tohan sa ginawa si Rakila; inampon iyan so pangni niyan ka
biyaloy niyan a makapembawata.
23 Miyaogat sekaniyan na mimbawata sa mama na pitero iyan a “Piyokas raken o Tohan
so kiyapakakeya aken.”
24 Bitowan iyan so wata sa Yosop ago tig iyan a “Pengnin ko a began ako o Allah sa isa
pen a wata a mama.”
Miyakadakel so manga Pangangayamen i Yakob
25 Oriyan o kinimbawataan i Rakila ki Yosop na pitero i Yakob ki Laban a “Pakaawaa ko
ngka sii kaan ako makakasoy ko poonan aken a inged.
26 Pakaonota ngka raken so manga karoma ko ago so manga wata aken a mininggalebek
aken reka na go ako ngka den pakalalakawa. Katawan ka den i kapiya a
kiypakanggalebek aken reka.”
27 Ogaid na pitero on i Laban a “O kelimoon ako ngka na di ka pagawa; kiyatokawan
aken ko di aken dii kaperimar a riyakmatan ako o Allah ka sabap reka.
28 Teroa ngka o antonaa i kisokay aken reka ka imbayad aken.”
29 Tig i Yakob a “Katawan ka den i kiyapakanggalebek aken reka ago so kapepekapiya o
manga pangangayamen ka sii ko kapepanagikora ko ron.
30 So maito a rek ka ko da ko pen kapakaoma na tanto a miyakadakel, na apiya anda ako
matatago na rarakmatan ka o Allah sabap raken. Ogaid na anda bes mambo i
kapenggalebeki ko ko rek aken a pamiliya?”
31 “Antonaa i kibegay aken reka? “ a iniise i Laban.
“Di ako ngka mbegi sa bapiya antonaa,” a tig i Yakob. “Ogaid na o penggolaolaa ngka
angkai a isa a pengnin ko reka na itaros aken so kapetegikora ko ago kapegoyaga ko
manga talon ka.
32 Imanto a gawii na pakilalakawi ngka raken so langon o pangangayamen ka, ka
ipanibay aken kiran so oman i isa a palang o di na bortikan a bilibili, oman i nati a bilibili
a maitem, ago oman i kambing a palang o di na bortikan; na giyanan den i sokay aken.
33 Na apiya anda i kapesosiya ngka ko inisokay ngka raken ko pemakatalingoma a gawii
na malebod a kakeilaya ngka o benar a maontol ako. Ka oman i matatangan aken a
kambing a kena a ba palang o di na bortikan, ago oman i bilibili a kena a ba maitem na
ketangked ka a miyapanekew.”
34 “Miyayon ako," a tig i Laban. “So den so pitero o ka i inggolalan ta.”
35 Ogaid na sangkoto bo a gawii na piyangowa i Laban so manga mandangan a manga
totorisan o di na palang ago so langon a babay a kambing a manga palang o di na bortikan
maana a so oman i isa a aden a mapoti on, ago so pen so oman i maitem a bilibili na
piyakitagikor iyan siran ko manga wata iyan a mama.
36 Na taros a bilag iran si Yakob sa telo gawii a ipelalakaw ron. Na ipeteros den i Yakob
so kapetegikora niyan ko miyalamba ko manga talon i Laban.
37 Mandiyadi na miyamotol si Yakob sa manga iilaw a sapak a kayo a poplar, almondo
ago plano na piyanorisan iyan ai sa mapoti ko kiyapangopisi niyan on.
38 Na inipaneked iyan angkai a manga sapak ko danga o pepemanginoman o manga talon
sabap sa di siran dii mbobowada igira a pepekaoma siran roo a pemanginom.
39 Na so kiyapamowadan a manga kambing ko danga o manga sapak na mimbabawata sa
manga nati a totorisan, palang ago bortikan.
40 Bebelagen i Yakob so mangoda a manga bilibili ko talon, ogaid na piyamakasangor
iyan so lamba ko talon ko manga totorisan ago manga iitem a pangangayamen ko talon i
Laban.
41 Igira a dii mamowad so kaolit a manga pangangayamen na ipepaneked i Yakob so
manga sapak sii ko pepemanginoman iran kaan iran pekeilay ko di iran dii kapamowad.
42 Ogaid na di niyan tegoon so manga sapak ko danga o manga lolobay a
pangangayamen. Sii sangaki a okit na pekebaloy so manga lolobay a pangangayamen a
rek i Laban, na so manga kaolit na rek i Yakob.
43 Sabap roo na tanto a mikewasa si Yakob na miyakakowa sa madakel a manga talon,
manga talasogoay a babay ago mama, manga onta ago manga kimar.
MAKSOD 31
Piyalagoyan i Yakob si Laban
Miyaneg i Yakob a dii teroon o manga wata i Laban a manga mama a “Miyaagaw den
langon i Yakob so rek o ama tano. Miyakowa niyan langon angkai a kakawasaan a poon
ko rek o ama tano.”
2 Na miyainengka mambo i Yakob a miyaalin so di ron dii kingginawain i Laban ka kena
a ba datar gowani.
3 Samaoto na pitero o Allah ki Yakob a “Kasoy ka ko inged o manga apoapoan ka ago sii
ko manga tonganay ngka, na kelalayon ako reka.”
4 Kagiya ka maoto na piyakisogoan i Yakob si Rakila ago si Liyah a somong siran on ko
pepenateban o manga talon iyan.
5 Na pitero iyan kiran a “Miyainengka aken a miyaaalin den so di raken dii kingginawain
i ama iyo ka kena a ba datar gowani. Ogaid na miyalalayon raken so Tohan o ama aken.
6 Katawan iyo a miyakanggalebek ako ki ama iyo sa taman sa kegaga ko. Apiya pen oto
na piyanalimbotan ako niyan, ka miyakasapolo iyan mabaroba so sokay aken. Ogaid na
da peroa o Tohan o ba ako niyan kapemaratai.
8 O pitero iyan a ‘So manga ayam a palang na aya ngka sokay,’ na pembabawata so
langon o manga talon sa manga palang a nati. Na o pitero iyan a ‘So manga ayam a
totorisan na aya ngka sokay,’ na pembabawata siran sa manga torisan a nati.
9 Kagiya ka maoto na kinowaan o Tohan sa manga pangangayamen si ama iyo na
inibegay niyan raken.
10 “Isako masa a dii kapamowad o manga pangangayamen na miyakatetaginep ako, na
miyailay aken a aya dii mamamowad ko manga talon na so manga mandangan a totorisan,
manga palang ago manga bortikan.
11 Sii sangkoto a taginepen aken na pitero raken o Malaikat o Tohan a ‘Yakob,’ na tig
aken a ‘Katii ako bo.’
12 Pitero iyan a ‘Ilaya ngka, ka aya bo a dii mamamowad na so bo so manga mandangan
a totorisan, manga palang ago manga bortikan. Di aken anan dii pakinggolaola, ka
miyailay aken so langon a ipekidia reka i Laban.
13 Saken so Tohan a miyakapeyag reka sii sa Bitil a ron ka inododan sa lana a olibi so
ator a piyakatindeg ka a tanda a tademan, ago misepa ka raken pen. Na paninimo ka den
imanto na go ka sii den awa sangkai a inged na kasoy ka ko inged a pimbawataan reka.' "
14 Somimbag si Rakila ago si Liyah ki Yakob a tig iran a "Da den a ba ami pen
mapembagian o di na mapekewali ko tamok o ama ami!
15 Ba kami niyan baden ipegiring sa salakaw a taw. Kena bo a ba giya kiyapesaa niyan
rekami, ka miyalengan iyan pen so minibetang rekami.
16 So langon a kakawasaan a kinowa o Tohan ki ama na patot a rek ami ago so manga
wata ami. Kagiya ka maoto na nggolaolaa ngka so apiya antonaa i miyatero reka o
Tohan."
17 Mandiyadi na miyaninimo si Yakob na go piyamakakoda iyan so manga wata iyan ago
so manga karoma niyan ko manga onta.
18 Initelon iyan so langon a pangangayamen iyan ago langon a miyapantiyari niyan sii sa
Misopotamiya ka kesoy sekaniyan den ko ama iyan a Iskak sa inged a Kanaan.
19 Sa da iran pen kapakaganat na miyakasong den si Laban ko talon iyan a manga bilibili
ka pengopawan iyan. Sii ko kandodoo niyan na piyanekew i Rakila so manga barahala o
ama iyan a matatago sa walay.
20 Liyo ron pen na inakal i Yakob si Laban ka piyagma iyan on so kapagawa iyan.
21 Kinowa niyan baden so langon taman iyan na miyalagoy sekaniyan nggagaan.
Rominipag sekaniyan ko lawasaig a Yopratis na miyantap ko kapalawan sa inged a
Giliyad.
Siyaloba i Laban si Yakob
22 Kagiya makatelo gawii na miyatero ki Laban a miyalagoy si Yakob.
23 Na sarta a piyakaonot i Laban so manga pagtaw niyan na siyaloba iyan si Yakob ko
miyakapito gawii; na sii niyan den riyaot ko kapalawan sa Giliyad.
24 Sangkoto a kagagawii na miyakaoma so Tohan ki Laban a nggolalan ko taginepen na
pitero iyan on a "Pananggilai ngka o ba aden a matero o ka ki Yakob a marata o di na
mapiya."
25 Si Yakob na kekampo sii ko kapalawan sa Giliyad kagiya raoten sekaniyan i Laban, na
mikampo roo mambo si Laban ago so manga pagtaw niyan.
26 Na pitero i Laban ki Yakob a "Antonaa bes angkai a inikidia ngka raken? Piyagakalan
ako ngka na pitonda a ka so manga wata aken a babay a datar o ba ngka miyabiyag ko
kiyatidawa!
27 Ino ako ngka pegakali ko kiyapalagoy ngka a di aken katawan? Ino ngka raken da
teroa a magawa ka kaan aken sekano mapakaganat a sasartaan a kapipiya a ginawa ago
kapagidaida a pegayonan o manga garingking ago manga kotiyapi?
28 Apiya so kapengareki aken ko manga apo aken ago so manga wata aken a babay ko
kangganat iran na da ngka raken peroa. Miyalalong ka!
29 Aden a kapaar aken sa kapakasakiti aken reka, ogaid na kagiya ko gagawii na
miyakimbitiyarai raken so Tohan o ama a ka a tig iyan a 'Pananggilai ngka o ba aden a
matero o ka ki Yakob a marata o di na mapiya.'
30 Katawan aken a aya kiyapakaawa a ka na sabap sa pekedali ka komasoy ko walay o
ama a ka; ogaid na ino ngka penekewa so manga barahala ko?"
31 Simbag i Yakob si Laban a tig iyan a "Miyalek ako o ba ngka raken tegela komowa so
manga wata a ka.
32 Na apiya antawaa i katoonan ka ko manga barahala ngka na kebono. Sii ko
kamamasaan o manga pagtaw ta na nggilobaa ngka o ba aden a rek ka a matatago ko
manga ipamemetad aken; o aden na kowaa ngka." Sa masa oto na di katawan i Yakob a
miyapanekew bes i Rakila so manga barahala o ama iyan.
33 Kagiya ka maoto na piyanoledan i Laban so barombarong i Yakob, so barombarong i
Liyah ago so barombarong o dowa kataw a talasogoay a babay, ogaid na da niyan matoon
so manga barahala niyan. Oriyan iyan na siyoledan iyan so barombarong i Rakila.
34 Samaoto na miyakowa den i Rakila so manga barahala na miyapanago iyan nggagaan
ko kabila ko siya o onta, na moontod sekaniyan on. Na piyanisik i Laban so langon
taman ko soled o barombarong ogaid na da niyan siran on matoon.
35 Na pitero i Rakila ko ama iyan a "O ba ka kararangiti, kadnan ko, ko di aken
kapekatindeg ko hadapan ka, ka sisii raken so basa." Na apiya piyanabenaran i Laban
mbanog so manga barahala na da niyan den matoon.
36 Mandiyadi na kiyararangitan si Yakob na piyasong iyan si Laban. "Antonaa i sala
aken?" a iniise iyan ki Laban. "Antonaa i miyandosa ko a inisaloba a ka raken?
37 Imanto a miyapanisik ka den so langon a ipamemetad aken na antonaa i miyatoon ka
on a rek ka a miyakowa ko walay ngka? Sii ngka betaden ko hadapan o manga pagtaw
ngka ago so manga pagtaw aken, ka siran i pakakokomen ta on o antawaa i makabebenar
rekta a dowa.
38 “Miyakadowa polo ragon a kiyapakakaden aken reka. So manga bilibili ago kambing
ka a manga babay na da den manggolaola o ba da mbabawata aya pen o ba aden a
miniseda aken ko manga mama a bilibili ko talon ka.
39 Igira a aden a miyapatay a maila a binatang ko pangangayamen ka na da ko reka den
wita ka saken i pesembi on. Piyamakibayadan ka raken pen so apiya antonaa i piyanekew
ron ko kagagawii o di na kadaondaw.
40 Igira a kadaondaw na kepatay ako a mayaw, ago tenggaw igira a kagagawii, na
maregen pen a kapetoroga raken.
41 Giyanan den i maoolaola ko ko soled o miyakadowa polo ragon a kakakaden aken
reka. Miyakasapolo ago pat ragon a ininggalebek aken reka sa kiyapangaromaa ko ko
dowa kataw a wata a ka, na miyakanem ragon pen a kiyapantiyariya ko ko manga
pangangayamen; na miyakasapolo ka pen mabaroba so sokay aken.
42 O da ako katabangi o Tohan o ama aken a so Tohan o Ibrahim ago so ipekelek o Iskak
na miyapakaawa ko ngka den sa da den a ba ko mipetelon. Ogaid na miyailay o Tohan so
kiyarasay ago so kiyanggalebek aken. Sabap roo na siyaparan ka niyan kagiya ko
gagawii."
So Kapasadan i Yakob ago si Laban
43 Simbag i Laban si Yakob a tig iyan a "Giyangkai a manga babay na manga wata aken,
so manga wata iran na manga apo aken, ago giyangkai a manga talon na manga talon
aken. Langon a pekeilay ngka na rek aken. Ogaid na da den a ba ko mapenggolaola
imanto mipantag sangkai a manga wata aken o di na so manga wata iran.
44 Kagiya ka maoto na pesadanowai ta, ago mbaal ta pen sa tademan ta on."
45 Mandiyadi na kominowa si Yakob sa ator na piyakatindeg iyan a tanda a tademan.
46 Na pitero iyan ko manga pagtaw niyan a "Panimo kano sa manga ator." Na
miyamangowa siran sa manga ator na initabotod iran. Kagiya mapasad oto na roo siran
mikekan ko obay o tabotod.
47 Bitowan i Laban angkai a tabotod sa 'Higar Sahadota,' ago bitowan mambo i Yakob sa
'Galid.'
48 Tig i Laban a "Giyangkai a tabotod na miyabaloy a tademan ta imanto a gawii."
Giyanan i sabap a kiyabetowi ron sa 'Galid.'
49 Bitowan mambo sa 'Mispa' ka pitero pen i Laban a "Kabantayan ta o Allah sii ko
kapakapembelag ta.
50 O perasaya ngka so manga wata aken a babay o di na o pangaroma ka sa ped a manga
babay a liyo ko manga wata aken na apiya pen da a ba rekta makamamasa na tatanodi
ngka a so Tohan i makababantay rekta a dowa kataw."
51 Pitero pen i Laban ki Yakob a "Kataya so minitabotod a manga ator, ago kataya pen so
ator a tanda a tademan a piyakatindeg aken ko pageletan ta.
52 Giyangkai a tabotod ago so ator na palaya tanda a tademan sa di aken den lepasen
angkai a tabotod sa ba ko seka pemaratai, ago di ngka den mambo lepasen angkai a
tabotod ago ator sa ba ako ngka pemaratai.
53 So Tohan o Ibrahim ago so Tohan o Nahor na aya rekta makakokom."
Mandiyadi na sii ko Ingaran o Tohan a aya ipekelek o ama iyan a Iskak na inisepa i
Yakob a tomanen iyan angkai a pasad.
54 Na mikorban si Yakob sii sangkoto a palaw na biyoyo iyan so manga pagtaw niyan ko
kiyakandori iyan. Kagiya makapasad siran koman na roo siran den miyamakatorog ko
palaw sangkoto a kagagawii.
55 Teked a kapipita ko miyakatalondog a gawii na piyangarekan i Laban so manga apo
iyan ago so manga wata iyan a babay taros a inipangangarapan iyan siran. Oriyan iyan na
gomiyanat sekaniyan ka kesoy den ko inged iyan.
MAKSOD 32
Mitiyagar si Yakob ko Kipetoonaan iyan ki Isaw
Sii ko kapeteros i Yakob lomalakaw na biyalak sekaniyan o manga malaikat o Tohan.
2 Kagiya mailay siran i Yakob na pitero iyan a "Giyai na kampo o Tohan!" Na bitowan
iyan angkoto a darpa sa 'Mahanaim.'
3 Na somiyogo si Yakob sa manga mama ka pekaonaan iyan siran ko pagari niyan a Isaw
sii sa kalopaan a Sair a giyanan na inged a Idomiya.
4 Siyogo iyan siran a tig iyan a "Giyai i peteroon iyo ko kadnan aken a Isaw: 'So oripen ka
a si Yakob na tig iyan a "Miyakakaden ako ki Laban, na inisendod aken a kambeling aken
taman den imanto.
5 Aden a manga sapi aken, manga kimar, manga bilibili, manga kambing, ago manga
talasogoay aken a manga mama ago manga babay. Inipakawit aken reka, kadnan ko,
angkai a katero, ka o ba ako ngka kalimoon." ' "
6 Kagiya makakasoy ki Yakob so manga siyogo na pitero iran a "Miyakasong kami den
ko pagari ngka a Isaw, na pesong sekaniyan sii imanto ka pagalaon ka niyan a moonot on
so pat gatos a manga pagtaw niyan."
7 So kiyanega sii i Yakob na tanto sekaniyan a miyalek ago masososa a pamikiran iyan.
Biyagi iyan so manga taw a moonot on sa dowa lompok, ago so pen so manga bilibili,
manga kambing, manga sapi ago manga onta niyan.
8 Aya paninti a akal iyan na "O maoma a gobat i Isaw so salompok on na makapalagoy so
salompok a kelamba."
9 Na taros a miyangangarapan si Yakob a tig iyan a "Ya Allah a Tohan o apo aken a
Ibrahim ago Tohan o ama aken a Iskak, na pitero o ka raken a 'Kasoy ka ko inged ka ago
so manga tonganay ngka ka pepiyapiyaan ko seka.'
10 Kena a ba ako makapapatot sangkai a langon a kipekelimoon ka raken a oripen ka ago
so kapetomani ngka raken sa pasad. Isako romipag ako ko lawasaig a Yordan na aya bo a
awid aken na so teken aken. Ogaid na imanto na miyadowa lompok ako.
11 Pengnin ko a sabeten ako ngka ko pagari aken a Isaw, ka pekelek ako o ba aya
mitalingoma niyan raken sii na gobaten kami niyan ago so manga babay ago manga wata.
12 Ogaid na miyatero o ka a 'Matamataan a pepiyapiyaan ko seka ago pakapendakelen ko
so manga mbawataan ka sa datar o peted sa kilid a ragat a di den kebilang.' "
13 Na tomiyareg si Yakob sangkoto a darpa ko kagagawii oto.
Kagiya mapita na piyagaraw niyan ko manga pangangayamen iyan so imbegay niyan a
pamemegayan ko pagari niyan a Isaw
14 A so dowa gatos a kambing a manga babay ago dowa polo a mandangan, dowa gatos a
bilibili a manga babay ago dowa polo a bilibili a manga mama,
15 Telo polo a onta a manga babay a rakes o manga nati iran, pat polo a sapi a manga
babay ago sapolo a sapi a manga mama, ago dowa polo a kimar a manga babay ago
sapolo a kimar a manga mama.
16 Oman i isa a salompok ko pangangayamen na piyakikibir iyan ko sakataw ko
talasogoay niyan. Na pitero iyan ko manga talasogoay a "Ona kano raken na go niyo
pamakapagawataa so oman i piselompokan a manga pangangayamen."
17 Ininsaratan iyan so maoona a talasogoay a tig iyan a "Amay ka alaon ka o pagari aken
a Isaw na go ka niyan isei sa 'Antawaa i dato o ka? Anda ka song? Anta i
kipangangayamen sangkai a ipendendendeg ka?'
18 Na aya isembag ka on na 'Rek ai i Yakob a oripen ka. Piyakiwit iyan ai a
pamemegayan ko kadnan iyan a Isaw, na matotondog kami niyan.' "
19 Na ininsaratan iyan mambo so ikadowa a talasogoay ago so ikatelo ago so langon a
ped iran a pendendeg ko manga talon a tig iyan a "Datar anan mambo a peteroon iyo ki
Isaw amay ka mabalak iyo.
20 Na o ba niyo kalipati a kateroa niyo ron sa 'Si Yakob a oripen ka na matotondog kami
niyan.' " Ka pitero i Yakob sa ginawa niyan a "Ipengangapin aken rekaniyan angkai a
manga pamemegayan a pekaonaan ko. Oriyan iyan na amay ka makapagilaya kami na
baanda ko niyan tarimaa."
21 Na piyakaona i Yakob so manga pamemegayan, ogaid na mitelimbagak sekaniyan ko
kampo ka roo pekatorog ko kagagawii.
Miyakipelobed si Yakob ko Tohan
22 Ogaid na sangkoto den a kagagawii na mimbowat si Yakob na piyamakaonot iyan so
dowa kataw a karoma niyan, so dowa kataw a talasogoay niyan a manga babay ago so
sapolo ago isa a wata iyan a manga mama ka meripag siran ko lawasaig a Yabok.
23 Kagiya mapakaripag iyan siran on na piyamakaripag iyan mambo so langon a rek iyan,
24 Ogaid na mitelimbagak roo si Yakob a da den a ba niyan ped.
Samaoto na aden a mama a miyakipelobed rekaniyan taman ko sobo.
25 Kagiya mailay o mama a di niyan kepeges si Yakob na siyampak iyan so witan i
Yakob na miyalepo ini ko di niyan on dii kipelobeden.
26 Na pitero o mama a "Bokai ako ngka, ka kepita den."
Ogaid na tig i Yakob a "Di aken seka mbokaan taman sa di ako ngka karakmatan."
27 “Anta i ngaran ka?" a iniise o mama.
"Yakob," a tig iyan.
28 Na tig o mama a "Kena den a ba aya ngaran ka imanto na Yakob ka Israil sabap sa
miyanagontaman ka ko Tohan ago so manosiya na miyakadaag ka."
29 Pitero i Yakob a "Kapedipedi ka bo na teroa ngka raken i ngaran ka."
Ogaid na tig iyan a "Ino ngka raken pegiseen so ngaran aken?" Na riyakmatan iyan si
Yakob roo.
30 Na pitero i Yakob a "Miyailay aken so Tohan sa miyakapagadapa kami; apiya pen oto
na piyakapagoyag ako pen." Kagiya ka maoto na bitowan iyan angkoto a darpa sa
'Piniyal.'
31 Pesebang so alongan ko kiyaganat i Yakob sa Piniyal, na malelepo sekaniyan sa witan.
32 Kagiya ka maoto na apiya taman imanto na so manga mbawataan o Israil na di siran
ken ko sapo ko witan ka kagiya giyanan i sapo i Yakob a miyasampak.
MAKSOD 33
Minitoona i Yakob si Isaw
Lomiyangkaw si Yakob na miyailay niyan si Isaw a pepekaantap kiran a oonotan o pat
gatos a pagtaw niyan. Kagiya ka maoto na piyakasenggaya iyan so manga wata iyan ki
Liyah, Rakila ago sii ko dowa kataw a talasogoay a manga babay.
2 Piyakaona niyan so manga talasogoay a rakes o manga wata iran. Piyakatalondog iyan
kiran si Liyah ago so manga wata iyan; na piyakaori niyan si Rakila ago si Yosop.
3 Na maoona kiran si Yakob a miyakapito sekaniyan makasodiyod ko kapepekarani niyan
ko pagari niyan.
4 Ogaid na piyalalagoy i Isaw si Yakob na giyakes iyan ago inarekan iyan, na misegada
siran.
5 Miyangilailay si Isaw na miyailay niyan so manga babay ago so manga wata. "Antawaa
angkai a manga ped ka?" a iniise iyan on.
Tig i Yakob a "Siran i manga wata a inilimo raken o Tohan."
6 Mandiyadi na miyobay so manga talasogoay ago so manga wata iran, na somiyodiyod
siran.
7 Tomiyalondog mobay si Liyah ago so manga wata iyan, na miyamanodiyod. Na aya
miyaori mobay na si Yosop ago si Rakila, na somiyodiyod siran mambo.
8 Iniise i Isaw a "Antonaa i maana angkoto a piselompokan a manga pangangayamen a
miyabalak aken?"
"Pamemegayan oto reka kaan ako ngka kalimoon, kadnan ko," a tig iyan.
9 Ogaid na tig i Isaw a "Mitataralo so rek aken, pagari ko. Tagoa ngka baden a rek ka."
10 “Di," a tig i Yakob. "O kelimoon ako ngka na tarimaa ngka raken angkai a
pamemegayan; ka datar o miyailay aken so paras o Tohan ko kiyailaya ko ko paras ka
imanto den a miyapiya a ginawa ngka raken.
11 Kapedipedi ka bo na tarimaa ngka so pamemegayan a miyawit reka, ka inikalimo ako
o Tohan ago inibegay niyan raken so langon a kapenggonaan aken." Na kagiya tigel i
Yakob si Isaw na tiyarima iyan oto.
12 Oriyan iyan na pitero i Isaw a "Itano, ka idolog aken sekano."
13 Ogaid na pitero on i Yakob a "Katawan ka, kadnan ko, a da a bager o manga wata, ago
di aken mipendarainon a kapegipata ko ko manga bilibili, kambing ago sapi a pesosowan
pen. O ndendegen siran nggagaan ko salongan na pematay so langon a manga
pangangayamen.
14 Kapedipedi ka bo, kadnan ko, na ona ka raken a oripen ka. Malombat a katondoga ko
reka, ka saden sa kagaan o manga pangangayamen a maoonaan aken ago so pen so manga
wata na aya ko reka mambo kapepekaoma sa Idomiya."
15 Na tig i Isaw a "So bo so ped ko manga pagtaw aken i pakibegaken ka raken sii
rekano."
"Naino," a tig i Yakob, "ka asar a ipekelimo ako ngka."
16 Mandiyadi na mipeto si Isaw sangkoto a gawii ka kesoy sa Idomiya.
17 Ogaid na somiyong si Yakob sa Sokot a ron miyangembaal sa kebalingan iyan ago
manga rayar a kesirongan o manga pangangayamen iyan. Giyanan i sabap a bitowan sa
'Sokot' angkoto a darpa.
18 Kagiya makakasoy den si Yakob sa inged a Kanaan a poon sa Misopotamiya na
miyakaoma sekaniyan sa da a rayorayo a ginawa niyan sa siti a Sikim na mikampo
sekaniyan ko marani ko siti.
19 Na so lopa a piyakatindegan iyan ko barombarong iyan na piyamasa niyan a magatos a
pelata sii ko manga wata i Hamor a manga mama a aya ama i Sikim.
20 Roo sekaniyan mimbaal sa aparan a bitowan iyan sa 'Il,' a so Tohan o Israil.
MAKSOD 34
Si Dinah ago so manga Taw sa Sikim
Si Dinah a so wata a babay i Yakob ago si Liyah na mindadalakaw ka mbantayan iyan so
Ikanaanen a manga babay.
2 Kagiya mailay sekaniyan i Sikim a wata i Hamor a Hibiyo, a aya dato sangkoto a darpa,
na kinowa niyan ago liyobed iyan.
3 Ogaid na tanto a miyabarayat si Sikim ki Dinah, na kiyababayaan iyan na go
piyangangapinan iyan.
4 Na pitero i Sikim ko ama iyan a Hamor a "Kowaa ngka raken angkai a raga a
mapangaroma ko."
5 Kiyatokawan i Yakob a kiyabatalan i Sikim so wata iyan a Dinah, ogaid na
kapapantagan oto a ndodoo so manga wata iyan a mama ko manga talon iyan sii ko
pepenateban. Kagiya ka maoto na da den a ba pinggolaola i Yakob taman ko
kiyapakaoma iran.
6 Somiyong si Hamor a ama i Sikim ki Yakob ka makipembitiyarai ron.
7 Samaoto na miyakaoma on mambo so manga wata i Yakob a poon siran ko
pepenateban, ka so den so kiyanega iran ko miyanggolaola na miyaling siran. Miyarata a
ginawa iran ago tanto siran a kiyararangitan sabap sa miyapakaito i Sikim so manga
mbawataan o Israil ko kiyarembanga niyan ko wata i Yakob, a so di wadib a
penggolaolaan.
8 Ogaid na pitero kiran i Hamor a "Miyapamola den so wata a ka a babay sa poso o wata
aken a Sikim. Kapedipedi kano bo na pakipangaromaan iyo rekaniyan.
9 Pakimbabalaiya kano rekami. Began iyo rekami so manga raga rekano, na kowaa niyo
mambo so manga raga rekami.
10 Makapeginged kano rekami ka peladen ami rekano so inged ami; makabaling kano sii
na makapendagang ago makapenamok."
11 Na pitero mambo i Sikim ko ama i Dinah ago so manga laki niyan a "Kalimoon kami
niyo ka imbegay aken rekano so apiya antonaa i peteroon iyo.
12 Pakalaa niyo den so pengnin iyo a imbetang aken ago isonggod, ka mbayadan aken so
apiya antonaa i peteroon iyo asar a pakipangaromaan iyo raken so raga."
13 Na miyamagakal so manga wata i Yakob ko kiyasembaga iran ki Sikim ago so ama
iyan a Hamor sabap ko kiyabatali i Sikim ko babay iran a si Dinah.
14 Aya inisembag iran kiran na "Di ami anan mapenggolaola: di ami mapakipengaroma
so babay ami ko mama a da matori, ka ipekaito ami anan.
15 Aya bo a kapagayoni ami reka na o kasayani kami niyo a manga totori mambo so
langon a manga mama rekano.
16 Oriyan oto na imbegay ami rekano so manga raga rekami na kekowa mi mambo so
manga raga rekano. Peginged kami rekano ago kebaloy tano a isa a bangsa.
17 Ogaid na o di kano pagayon o ba kano manga totori na kowaan ami so babay ami ka
magawa kami sii."
18 Giyangkai a antangan iran na inikasoat i Hamor ago so wata iyan a Sikim.
19 Na da den sendoden angkai a mangoda a mama so kapenggolaolaa niyan sii sabap ko
kapekebabayai niyan ko wata i Yakob a babay. Giya mama ini i lebi a pagaadatan ko
pamiliya o ama iyan.
20 Mandiyadi na somiyong si Hamor ago si Sikim ko dii timotimoan ko gimowa o siti ran
ka ipembitiyarai ran so ped iran a magiinged roo.
21 Pitero iran a "Makipengginawai rektano angkai a manga taw. Pakabalingen ago
pakandagangan tano siran sii ko inged tano, ka maolad a kekadenan iran on.
Mapengaroma tano so manga raga iran, na mapengaroma iran mambo so manga raga
tano.
22 Ogaid na aya bo a kapagayon angkai a manga taw sa kambaling iran rektano a
maisaisa tano ago siran na o manga totori so langon a manga mama rektano a datar iran.
23 Ba kena a kebaloy a rektano so langon a pangangayamen iran a rakes o manga tamok
iran? Kagiya ka maoto na mayon tano kiran, na mbaling siran rektano."
24 Na so langon a magiinged ko siti na piyamakineg iran si Hamor ago si Sikim a wata
iyan; na miyakitori so oman i mama kiran.
25 Kagiya makatelo gawii a kikasasakitan siran pen na so dowa kataw ko wata i Yakob a
si Simiyon ago si Libi, a so manga laki i Dinah, na kinowa iran so manga pedang iran na
somiyoled siran ko siti a kena a ba mangangandam so manga taw ron. Piyamono iran so
langon a manga mama on,
26 Na biyono iran pen si Hamor ago so wata iyan a Sikim. Kinowa iran si Dinah poon ko
walay i Sikim na inawaan iran so siti.
27 Oriyan iyan na miyakaoma so ped a manga wata i Yakob ko manga miyatay, na
pitebanan iran so siti sabap ko kiyabatali ron ko babay iran.
28 Piyangowa iran so manga bilibili, kambing, sapi ago manga kimar iran a rakes o
langon a ped a ipamemetad sii ko siti ago sii ko manga pangomaan.
29 Pitebanan iran so langon a kakawasaan iran ago piyamiyag iran so langon a manga
babay ago manga wata, na piyangowa iran pen so langon taman a matatago ko manga
walay.
30 Mandiyadi na pitero i Yakob ki Simiyon ago si Libi a "Pisemok ako niyo ka biyaloy
ako niyo a mado ko manga Kanaaniyo ago Pirisiyo a kibabaling sangkai a inged. Kena a
ba madakel a manga pagtaw aken, na o pakatepia iran so bager iran na go ako iran gobata
na kebinasa ako taman ko langon o pamiliya ko."
31 Ogaid na aya inisembag iran on na "Ba wadib so kinisayanen iyan ko babay ami sa
sondal?"
MAKSOD 35
Komiyasoy si Yakob sa Bitil
Sa masa oto na pitero o Tohan ki Yakob a "Song ka sa Bitil na ron ka kaden; mbaal ka on
sa aparan ko Tohan a miyakapeyag reka isako pepelagoyan ka so pagari ngka a Isaw."
2 Kagiya ka maoto na pitero i Yakob ko pamiliya niyan ago so langon a pepemangonot on
a "Pelelebaden iyo so manga barahala o kena a ba tano royod a taw a tatagoon iyo. Sotia
niyo a manga ginawa niyo ago sambi kano sa nditaren.
3 Na itano, ka somong tano sa Bitil. Pembaal ako roo sa aparan ko Tohan a aya raken
tomiyabang ko masa a kareregeni raken ago miyalalayon raken pen ko apiya anda ako
miyakasong."
4 Mandiyadi na inipamegay iran ki Yakob so langon a manga barahala o kena a ba iran
royod a kaaawidan iran ago so pen so manga aritis iran. Na inipelelebeng i Yakob ko
atag o kayo a ok a marani sa Sikim.
5 Na kagiya gomanat si Yakob ago so manga wata iyan na kiyatagoan sa tanto a mala a
kalek so manga taw ko manga siti a melilibeta kiran, na da a ba kiran on miyakaraw
somaloba.
6 Na miyakaoma si Yakob ago so langon a taw a ped iyan sii sa Los (giyanan so Bitil) sa
inged a Kanaan.
7 Mimbaal sekaniyan roo sa aparan. Bitowan iyan ai sa 'Il Bitil' sabap sa roo piyayag o
Tohan a ginawa niyan ki Yakob isako pepelagoyan iyan so pagari niyan.
8 Sa masa oto na miyatay si Diborah a so miyalokes a babay a pepegipat gowani ki
Ribikah, na sii inilebeng ko atag o kayo a ok sa pagabagatan a Bitil. Kagiya ka maoto na
bitowan oto sa 'Ok a Kasegad.'
9 Na miyakapeyag peroman so Tohan ki Yakob ko kiyapakapoon iyan sa Misopotamiya,
na riyakmatan iyan sekaniyan.
10 Pitero on o Tohan a "Aya ngaran ka na Yakob, ogaid na di ka den mbetowan sa
Yakob ka aya kebaloy a ngaran ka na 'Israil.' Kagiya ka maoto na iningaranan sekaniyan
o Tohan sa Israil.
11 Pitero on pen o Tohan a
"Saken so Tohan a Lebi a Mabager.
Kebabad ka ago pendakel;
Madakel a nasiyon a sii reka pekapoon,
ago aden pen a manga dato a mipembawata o kebabadan reka.
12 So inged a inibegay aken ko Ibrahim ago so Iskak
na imbegay aken reka,
na imbegay aken ai mambo ko manga mbawataan ka a pekatalondog reka."
13 Na giyoto a inawaan o Tohan si Yakob.
14 Na piyakatindegan i Yakob sa ator a tanda a tademan angkoto a darpa a ron sekaniyan
inimbitiyarai o Tohan. Inododan iyan sa arak ago lana a olibi a inisoasoat ko Tohan.
15 Na aya inibeto i Yakob sangkai a darpa na Bitil.
So Kiyapatay i Rakila ago si Iskak
16 Oriyan iyan na inawaan i Yakob ago so pamiliya niyan a Bitil. Na sii ko malo iran den
kiyapakarani sa Iprat na biyalilit si Rakila, na tanto a kiyaregenan.
17 Sii ko lebi a maregen a kapembalilita on na pitero on o panday a "Di ka pekelek,
Rakila, ka mimbawata ka sa isa pen a wata a mama."
18 Ogaid na petay si Rakila, na sii ko kaketonggos den o napas na bitowan iyan so wata
iyan sa Binoni. Ogaid na aya inibeto ron o ama iyan na Baniyamin.
19 Miyatay si Rakila na sii inilebeng ko obay o lalan a ipesong sa Iprat (giyanan den na
Bitlihim).
20 Bitadan i Yakob sa ator so kobor iyan a aya niyan tanda a tademan. Giyangkoto a ator
na pekitendo ko kobor i Rakila taman den imanto.
21 Tomiyaros lomalakaw si Israil na piyakatindeg iyan so barombarong iyan sii sa onaan
o Migdol Idir.
22 Sii ko kapakababaling pen i Israil sangkoto a inged na romimbang si Robin ki Bilhah a
sandil o ama iyan, na kiyatokawan ai i Israil.
Aden a sapolo ago dowa kataw a manga wata i Yakob a manga mama:
23 So manga wata i Liyah na si Robin a so kaka a wata i Yakob, ago siki Simiyon, Libi,
Yodah, Isakar ago si Sibolon.
24 So manga wata i Rakila na si Yosop ago si Baniyamin.
25 So manga wata i Bilhah a talasogoay i Rakila na si Dan ago si Naptali.
26 So manga wata i Silpah a talasogoay i Liyah na si Gad ago si Asir.
Giyanan i manga wata i Yakob a manga mama a inimbabawata rekaniyan sii sa
Misopotamiya.
27 Na miyakaoma si Yakob ko ama iyan a si Iskak sii sa Mamri a marani sa Kiriyat Arba
(giyanan den na Hibron) a ron miyakabaling so Ibrahim ago so Iskak.
28 Miniraot so idad i Iskak sa magatos ago walo polo ragon,
29 Na miyatay sekaniyan ago minitapi ko manga apoapoan iyan a minitolod den a idad
iyan ago miyasoat sekaniyan ko kiyalokes iyan. Na inilebeng o manga wata iyan a si Isaw
ago si Yakob.
MAKSOD 36
So Kiyababadan ki Isaw
Giyai i totolan ki Isaw a bebetowan mambo sa Idom.
2 Miyangaroma si Isaw ko manga babay a Ikanaanen, a si Adah a wata i Ilon a Hitiyo, ago
si Oholibamah a wata i Anah ago apo o Sibiyon a Hibiyo,
3 Ago si Basimat a wata i Ismail ago babay i Nibayot.
4 Inimbawata i Adah ki Isaw si Ilipas; si Basimat na inimbawata iyan si Rowil,
5 Na si Oholibamah na inimbabawata iyan si Hiyos, si Halam ago si Korah. Giyanan i
manga wata i Isaw a manga mama a inimbabawata rekaniyan sii sa inged a Kanaan.
6 Sa masa oto na piyamakaonot i Isaw so manga karoma niyan, so manga wata iyan, so
langon a manga pagtaw niyan ago manga pangangayamen iyan, na initelon iyan pen so
langon a miyapantiyari niyan sa Kanaan ka tomipas sekaniyan ko salakaw a inged a
maaawat ko pagari niyan a Yakob.
7 Aya sabap iyan na so lopa a kakadenan iran ago si Yakob na di pekaampel a ipekeoyag
o madakel a pangangayamen iran, na di kepakay o ba siran den matitimo.
8 Kagiya ka maoto na miyaling si Isaw sii sa kapalawan sa inged a Idomiya.
9 Giyai so manga mbawataan i Isaw a so apopoan o manga Idomiyan ko kapalawan sa
Sair.
10-13 Giyai i manga ngaran o manga wata i Isaw a manga mama:
So Karoma niyan a Adah na inimbawata iyan si Ilipas.
So manga wata Ilipas a manga mama na siki Timan, Omar, Sipo, Gatam ago si Kinas.
Aden mambo a sandil i Ilipas, a si Timna, na inimbawata iyan rekaniyan si Amalik.
Manga apo siran i Adah a karoma i Isaw.
So karoma i Isaw a si Basimat na inimbawata iyan si Rowil.
So manga wata i Rowil a manga mama na si Nahat, Sirah, Siyamah ago si Midsah.
Manga apo siran i Basimat a karoma i Isaw.
14 So manga wata a mama a inimbawata ki Isaw i Oholibamah a wata i Anah ago apo i
Sibiyon na siki Hiyos, Halam ago si Korah.
15 Giyai i manga ngaran o manga mbatabataa a kiyababadan ki Isaw:
Si Ilipas a kaka a wata i Isaw na aya apoapoan angkai a manga mbatabataa sii sa inged a
Idomiya:
Timan, Omar, Sipo, Kinas,
16 Korah, Gatam ago Amalik. Siran i kiyababadan ki
Adah.
17 Si Rowil a wata i Isaw na aya apoapoan angkai a manga mbatabataa sii sa Idomiya:
Nahat, Sirah, Siyamah ago Midsah. Siran i kiyababadan ko karoma i Isaw a si Basimat.
18 Giyai so manga mbatabataa a kiyababadan ko karoma i Isaw a si Oholibamah a wata i
Anah:
Hiyos, Halam ago Korah.
19 Giyanan den i manga ngaran o manga mbatabataa a kiyababadan ki Isaw a bebetowan
mambo sa Idom.
So manga Mbawataan i Sair
20 Giyai so manga wata a manga mama i Sair a Horiyo. Siran i tenger a manga taw sa
inged a Idomiya:
siki Lotan, Siyobal, Sibiyon, Anah,
21 Disiyon, Idsir ago si Disiyan. Giyangkanan a manga wata i Sair sii sa Idomiya na aya
manga apoapoan o manga mbatabataa a manga Horiyo.
22 So manga wata i Lotan a manga mama na:
si Hori ago si Homam. So babay i Lotan na si Timna.
23 So manga wata i Siyobal a manga mama na:
siki Alban, Manahat, Ibal, Sipo ago si Onam.
24 So manga wata i Sibiyon a manga mama na:
si Ayas ago si Anah. Giyanan so Anah a miyakatoon sa mayaw a bowalan sii ko
kapepenagikora niyan ko manga kimar o ama iyan a si Sibiyon sii sa mitataog a kaden.
25 So manga wata i Anah na:
si Disiyon a wata iyan a mama, ago si Oholibamah a wata iyan a babay.
26 So manga wata i Disiyon a manga mama na:
siki Himdan, Isban, Iteran ago si Kiran.
27 So manga wata i Idsir a manga mama na:
siki Bilhan, Saaban ago si Akan.
28 So manga wata i Disiyan a manga mama na:
si Os ago si Aran.
29 Giyai so manga apoapoan o manga mbatabataa a manga Horiyo sii sa inged a Idomiya:
siki Lotan, Siyobal, Sibiyon, Anah,
30 Disiyon, Idsir ago si Disiyan.
So manga Dato sa Idomiya
31 Giyai so manga dato a miyamakandato sa Idomiya isako da pen a miyakandato ko
manga Israil:
32 Si Bilas a wata i Biyor na miyakandato sa Idomiya, na aya ngaran o siti niyan na
Dinhabah.
33 Kagiya matay si Bilas na aya miyakasambi on a dato na si Hobab a wata i Sirah a poon
sa Bosrah.
34 Kagiya matay si Hobab na aya miyakasambi on peman na si Hosiyam a poon ko inged
o manga taw sa Timan.
35 Kagiya matay si Hosiyam na aya miyakasambi on mambo a mindato na si Hadad a
wata i Bidad a aya miyakataban ki Midiyan sii sa inged a Mowab. Aya ngaran o siti
niyan na Abit.
36 Kagiya matay si Hadad na kiyasambian sekaniyan i Samlah a poon sa Masrikah.
37 Kagiya matay si Samlah na aya miyakasambi on a dato na si Siyaol a poon sa Rihobot
ko obay o lawasaig a Yopratis.
38 Kagiya matay si Siyaol na aya miyakasambi on peman a dato na si Baal Hanan a wata i
Akbor.
39 Kagiya matay si Baal Hanan a wata i Akbor na aya somiyambi on a dato na si Hadad.
Aya ngaran o siti niyan na Paw, ago aya ngaran o karoma niyan na si
Mihitabil a wata i Matrid ago apo i Misahab.
40 Giyai i manga mbatabataa a kiyababadan ki Isaw a so manga ngaran iran na aya
inipamameto ko manga darpa a kibabalingan iran: Timnas, Albah, Hitit,
41 Oholibamah, Ilah, Pinon,
42 Kinas, Timan, Mibsar,
43 Magdiyal ago Iram. Giyanan den i manga ngaran o manga mbatabataa a kiyababadan
ki Idom (sekaniyan si Isaw a apoapoan o manga Idomiyan) a kibabaling ko manga darpa
iran sii ko inged a matatangan iran.
MAKSOD 37
So manga Taginepen i Yosop
Si peman si Yakob na mababaling sekaniyan sii sa Kanaan a aya inged a kiyabalingan o
ama iyan.
2 Giyai i totolan ki Yakob ago so pamiliya niyan:
Si Yosop na mimamangoda den a mama ka miyakasapolo ago pito ragon a idad iyan.
Petegikoren iyan so manga pangangayamen a ped iyan na so manga pagari niyan a manga
wata i Bilhah ago si Silpah a manga karoma o ama iyan. Na aden a minipenon i Yosop a
marata ko ama iyan makapantag ko manga pagari niyan.
3 Si Israil na tanto niyan a pekebabayaan si Yosop a di so apiya antawaa ko ped a manga
wata iyan sabap sa inimbawata sekaniyan ko kiyalokes iyan; na inimbaal iyan sa mapiya i
paras a pitibarangan i warna a kimon.
4 Kagiya mailay o manga pagari niyan a pekebabayaan o ama iran si Yosop a di so apiya
antawaa kiran na inikagowad iran si Yosop na kena pen o ba marinaw a di iran on dii
kimbitiyarain.
5 Miyakaisa a gawii na miteginep si Yosop, na kagiya panotolen iyan ai ko manga pagari
niyan na baden minisayo a kipekegowaden iran on.
6 Pitero iyan kiran a "Pamakinega niyo angkai a pitetaginep aken:
7 Pembekes tano sa pinggagarab a ilaw sii ko dii mbabasokan. Minitekaw baden a
mimbangon ago tominindeg so miyabekes aken, na linibet ai o manga bekes iyo na
miyamanodiyod siran on."
8 Pitero on o manga pagari niyan a "Kesolotan ka bes ago kapendatoan kami ngka?" Na
kiyalonsanan baden a kipekegowaden iran on sabap ko taginepen iyan ago so pitero iyan
kiran.
9 Oriyan iyan na miteginep peman si Yosop na piyanotol iyan ai peman ko manga pagari
niyan. "Pamakinega niyo," a tig iyan. "Aden peman a taginepen aken, na pitetaginep
aken a so alongan, so olan ago so sapolo ago isa a manga
bitoon na palaya raken pepemanodiyod."
10 Piyanotol iyan mambo ko ama iyan, na pimbongetan sekaniyan o ama iyan a tig iyan a
"Antonaa angkanan a miyatetaginep ka? Makapengadap reka bes si ina a ka ago saken
taman ko manga pagari ngka ago pemanodiyod reka pen?"
11 Na palaya on den rominiit so manga pagari niyan, ogaid na baden tatanodi o ama iyan
angkoto a taginepen.
Pipesa si Yosop o manga Pagari niyan
12 Lomiyalakaw so manga pagari i Yosop ka pakapenateben iran so manga
pangangayamen o ama iran ko marani sa Sikim.
13 Miyakaisa a gawii na pitero i Israil ki Yosop a "Katawan ka den a dii pakapanateben o
manga kaka ngka so manga talon sii sa Sikim. Na, paninimo ka, ka sogoon ko seka
kiran."
"Oway," a tig iyan.
14 Na pitero on o ama iyan a "Song ka roo na go ngka ilaya o mapiya so kapakambebetad
o manga pagari ngka ago so manga pangangayamen, na go ka baling kaan ka raken
matero." Na piyakaganat o ama iyan si Yosop sii sa Balintad a Hibron.
Kagiya makaoma si Yosop sa Sikim na
15 Pepegenebeneb sekaniyan sii ko pepenateban na miyailay o isa a mama. Na inisean o
mama a "Antonaa i di ngka dii nggilobaan?"
16 Tig iyan a "Di aken dii nggilobaan so manga pagari aken. Ba ngka raken di mapetero
o anda iran dii pakapanateba so manga pangangayamen iran?"
17 “Miyakaawa siran sii den," a inisembag on o mama. "Miyaneg aken kiran a tig iran a
'Somong tano sa Dotan.' "
Mandiyadi na siyono i Yosop so manga pagari niyan na miyaoma niyan siran sii sa
Dotan.
18 Ogaid na mawatan sekaniyan pen na miyalangkaw iran den. Na sa da niyan kiran pen
kapakaoma na miyapamikir iran a kambonoa iran on.
19 “Pekaoma sii bes angkoto a mapasang i katetaginep!" a tig man ai o oman i isa ko ped
iyan.
20 “Na, ba tano baden bonoa, na ologen tano so lawas iyan sii ko isa sangkai a manga
paridi; ka aya teroon tano na kiyan sekaniyan o maila a binatang. Oriyan oto na mailay
tano o antonaa i keondasan o manga taginepen iyan!"
21 Miyaneg ai i Robin na pisebenaran iyan a kapakalidasa niyan ki Yosop ko kambonoa
iran on. "Di tano bonoon," a tig iyan.
22 Di niyo pekatogaa so rogo iyan. Ologa niyo sekaniyan baden sangkai a paridi sii
sangkai a mitataog a kaden, ogaid na di niyo pekasakiti." Pitero oto i Robin kaan iyan
mapakalidas si Yosop ko penggolaolaan iran on ago mibaling iyan ko ama iyan.
23 Kagiya makaoma si Yosop ko manga pagari niyan na likas iran on so pitibarangan i
warna a kimon iyan a masosolot iyan
24 Na taros a giyander iran na inolog iran ko paridi a kaatiyan.
25 Na kagiya kioontod siran a di siran dii kekan na miyalangkaw iran so sesagorompong
a manga padagang a manga mbawataan o Ismail a makapopoon sa Giliyad a pepekaantap
siran sa Misir. So manga onta iran na kikarororanan sa manga palapa, ikekamotan ago
doka a pegowiten iran sa Misir.
26 Na pitero i Yodah ko manga pagari niyan a "Antonaa i kelaba tano o bonoa tano so ari
tano ago pagmaan tano so kiyapatay niyan?
27 Tomo a ba tano sekaniyan baden pesaa sangkoto a manga Ismail. Di tano pakasakitan
ka mataan a pagari tano sekaniyan ago isaisa a rogo tano." Na miyayon on so manga
pagari niyan.
28 Mandiyadi na kagiya somagad kiran so manga padagang a taw sa Midiyan na inigakap
o magariyari si Yosop ko paridi na pipesa iran sa dowa polo a pelata a pirak ko manga
Ismail; na inowit iran sekaniyan sa Misir.
29 Kagiya komasoy si Robin ko paridi ago miyailay niyan a da roo den si Yosop na kinisi
iyan so nditaren iyan ka tanto a mikerata a ginawa niyan.
30 Tomiyapi sekaniyan peman ko manga pagari niyan na tig iyan a "Da roo so wata!
Antonaa i sowaan ko?"
31 Mandiyadi na kinowa iran so kimon i Yosop na taros a siyombali siran sa kambing.
Inisomek iran so kimon ko rogo o kambing
32 Na inowit iran ko ama iran. Na pitero iran on a "Miyatoon ami ai. Ilaya ngka piyapiya
o ba giyai so kimon o wata a ka."
33 Miyakilala niyan na pitero iyan a "Giyai so kimon o wata aken. Miyapatay sekaniyan
a maila a binatang. Matamataan a miyasekisi si Yosop!"
34 Na kinisi i Yakob so nditaren iyan na minditar sa sako; na inimboko iyan so wata iyan
sa miyatey a alongan.
35 Miyamakaoma on so langon a manga wata iyan a mama ago babay ka teyoan iran
sekaniyan ogaid na da kiran pakitayo. Pitero iyan a "Ipemboko aken so wata aken taman
ko kitapi aken rekaniyan sii ko darpa o miyamatay." Na ipesegad iyan den si Yosop.
36 Si peman si Yosop na pipesa o manga taw sa Midiyan ki Potipar roo sa Misir a isa
sekaniyan ko sanasanaan o solotan sa Misir. Sekaniyan i kapitan o manga gordiya ko
torogan o solotan.
MAKSOD 38
Si Yodah ago si Tamar
Sangkoto a manga gawii na giyanatan i Yodah so manga pagari niyan na komiyaden ko
mama a aya ngaran iyan na si Hirah sii sa siti a Adolam.
2 Roo minitoona i Yodah so wata a babay o Ikanaanen a mama a aya ngaran iyan na
Sowas, na piyangaroma niyan angkoto a babay.
3 Miyaogat sekaniyan na mimbawata sa mama, na bitowan iyan sa Ir.
4 Miyaogat peman na mimbawata sa mama, na bitowan iyan sa Onan.
5 Mimbawata sekaniyan peroman sa isa pen a wata a mama na bitowan iyan sa Silah. So
kinimbawataan iyan on na sii siran kapapantagi sa Kidsib.
6 Piyakapangaroma i Yodah so kaka a wata iyan a si Ir, na aya ngaran o babay a
miyapangaroma niyan na si Tamar.
7 Ogaid na marata i olaola si Ir ago da on masoat so Allah. Sabap roo na biyono
sekaniyan o Allah.
8 Mandiyadi na pitero i Yodah ki Onan a "Pangaromaa ngka so bitowanen a karoma o
pagari ngka na nggolalanen ka on so ipapaliyogat reka ko kaiipagi ngka on a giya
kipembawataan iyo ko mibilang a manga wata o pagari ngka."
9 Ogaid na katawan i Onan a so manga wata a ipembawata iyan na kena a ba niyan rek.
Sabap roo na oman iyan rembangen so karoma o pagari niyan na pegododen iyan so biga
iyan ko lopa kaan di pembabawata sa kibilang a kiyababadan ko pagari niyan.
10 Na da kasoaten o Allah so pinggolaola niyan, na sabap sii na biyono iyan sekaniyan
mambo.
11 Oriyan iyan na pitero i Yodah ko miyakamong on a babay a si Tamar a "Roo ka kaden
a lagid o bitowanen ko walay o ama a ka taman sa di pen kapakala o wata aken a mama a
si Silah." Pitero iyan ai ka pekelek sekaniyan o ba pen matay si Silah a datar o manga
kaka niyan. Mandiyadi na somiyong si Tamar ko walay o ama iyan na ron miyaling.
12 Kagiya den a matey na miyatay so karoma i Yodah a so wata i Sowas. Kagiya
mapopos so kiyanggawiini ko karoma niyan na somiyong si Yodah sa Timnah a roo
pepangopawan so manga bilibili niyan, na miyonot on so ginawai niyan a si Hirah a taw
sa Adolam.
13 Na miyatero ki Tamar a "So panogangan ka na pesong sa Timnah ka pekipangopawan
iyan so manga bilibili niyan."
14 So den so kiyanega niyan sii na siyambian iyan so nditaren a balo a sosoloten iyan na
miselimomot sekaniyan kaan di kekilala, na miyontod ko ipesoled ko maito a inged a
Inaim sii ko lalan a ipesong sa Timnah. Ka katawan iyan a apiya pen miyakala den si
Silah na da sekaniyan on pakipangaromaan.
15 Kagiya mailay sekaniyan i Yodah na aya katao niyan on na ba sondal, ka sasapengan
iyan a paras iyan.
16 Da niyan makilala a sekaniyan so miyakamong on a babay; na sinilayan iyan ko kilid a
lalan na pitero iyan on a "Na, pakirembang ka raken."
"Antonaa i imbegay ngka raken sa kapekirembang aken reka?" a iniise iyan on.
17 “Pakiwitan ko seka sa nati a kambing poon ko talon aken," a tig iyan.
"Ba ako ngka kebegi sa sanda a tegoon aken taman ko kapekiwiten ka on?" a iniise
iyan on.
18 Tig iyan a "Antonaa i imbegay aken reka a sanda?"
"So tanda a ka a rakes o rantay niyan ago giyangkanan a teken ka," a inisembag iyan.
Na inipamegay niyan on ago romimbang sekaniyan on, na miyaogat iyan so babay.
19 Miyaling si Tamar na piyokas iyan so salimomot iyan na siyolot iyan peroman so
nditaren iyan a nditaren a balo.
20 Da oto matey na piyakiwit i Yodah ko ginawai niyan a si Hirah so nati a kambing kaan
iyan maaon ko babay so inisanda iyan on, ogaid na da sekaniyan matoon i Hirah.
21 Inisean iyan so manga mama roo sa Inaim a "Anda so sondal a sisii gowani ko kilid
angkai a lalan?" Tig iran a "Da den a ba sii miyakasong a sondal?"
22 Komiyasoy sekaniyan ki Yodah na pitero iyan on a "Da ko sekaniyan matoon, na
kabasa pen o manga mama sangkoto a inged na da den a ba roo miyakasong a sondal."
23 Tig i Yodah a "Na go den o matatago iyan angkoto a manga nganin, ka matag ta baden
mikela o manga taw roo. Asar a miyatoman aken so pasad ami, ka piyakiwit aken on
angkai a kambing ogaid na da ngka sekaniyan matoon."
24 Kagiya den a mamakatelo olan na miyatero ki Yodah a "Misondal so miyakamong
reka a babay; na minisabap sii a kiyaogat iyan imanto."
Tig i Yodah a "Liyon iyo sekaniyan na go niyo pakitotongen!"
25 Na sii ko kipeliyon iran on na piyakiwit iyan ko panogangan iyan so inisanda iyan on,
na piyakitero iyan on pen a "Miyaogat ako o mama a kirek sangkai a tanda ago so rantay
niyan, ago giyangkai a teken. Na, kilalaa ngka o antawaa i kirek on."
26 Miyakilala i Yodah a rek iyan oto na pitero iyan a "Maontol sekaniyan a di saken, ka
miyakasela ako ko da ko rekaniyan kapakipangaromaan ko wata aken a Silah." Na da on
den rembang peroman si Yodah.
27 Kagiya maoma den so kapembawata i Tamar na kiyatokawan a dowa so ipembawata
iyan.
28 Sii ko kapembalilita on na lominiyo so lima o isa on. Kiyapetan o panday na
tiyambedan iyan sa mariga a tanor, na pitero iyan a "Giyai i paganay a miyakaliyo."
29 Ogaid na giyamit baden o wata a lima niyan na so pagari niyan i miyaona a
inimbawata. Na pitero o panday a "Giyai bes i kiyapakategel ka lomiyo!" Giyanan i
sabap a kiyabetowi ron sa Piris.
30 Oriyan
iyan na inimbawata so pagari niyan a katatambedan sa mariga a tanor so lima niyan. Na
bitowan sekaniyan sa Sirah.
MAKSOD 39
Si Yosop ago so Karoma i Potipar
Si peman si Yosop na miyawit sa Misir. Si Potipar a Imisiren a isa ko sanasanaan o
solotan sa Misir ago kapitan o manga gordiya na piyamasa niyan si Yosop ko manga
Ismail a miyamakawit rekaniyan roo.
2 Lalayon so Allah ki Yosop na miyabaloy sekaniyan a mapiya i bobolos. Mababaling
sekaniyan ko walay o kadnan iyan a Imisiren.
3 Kagiya mailay o kadnan iyan a lalayon on so Allah ago pepakaondasen o Allah sa
mapiya so langon a di niyan dii nggolaolaan
4 Na miyasoat sekaniyan ki Yosop, na biyaloy niyan a aya on pepanalagad. Sekaniyan
pen i piyakakibir i Potipar ko walay niyan ago inisarig iyan on so langon taman a rek iyan.
5 Sabap ki Yosop na ipoon roo den na rarakmatan o Allah so pamiliya o Imisiren a rakes
o langon taman a rek iyan a matatago ko walay niyan ago sii pen ko di niyan dii
nggalebekan.
6 Na sii ko kisasarigen i Potipar ki Yosop ko langon a rek iyan na di niyan den iaawid a
akal so apiya antonaa liyo ron so peken iyan a pangenengken.
Mapiya i arog a lawas si Yosop ago mataid a mama.
7 Da matey na miyabarayat rekaniyan so karoma o kadnan iyan, na pitero iyan on a
"Rembang ka raken."
8 Ogaid na siyangka sekaniyan i Yosop a tig iyan on a "Ilaya ngka man, ka so kadnan
aken na di niyan den iaawid a akal so apiya antonaa sii ko walay niyan kagiya sisii ako.
Piyakakibir ako niyan ko langon taman iyan.
9 Tingki kami sa gees sangkai a walay. Da den a ba raken inisapar o kadnan aken a
makaliyoliyo reka sabap sa karoma ka niyan. Di kepakay o ba ko nggolaolaa angkai a
tanto a kamarataan a ikedosa ko ko Tohan."
10 Na apiya gawii gawii a kapendolona niyan ki Yosop na pesengka den si Yosop o ba on
rembang o di na apiya so kipagepedaan iyan on.
11 Miyakaisa a gawii na somiyoled si Yosop ko walay ka penggolaolaan iyan so galebek
iyan on, na da den a ba kiyatabowi a talasogoay ko soled o walay.
12 Na sinikem o babay so kimon i Yosop a tig iyan a "Rembang ka raken!" Ogaid na
inibegak iyan baden so kimon iyan ko lima o babay ko kiyapalalagoy niyan sa liyo.
13 Kagiya mailay niyan a inibegak i Yosop sa lima niyan so kimon iyan ago miyalalagoy
sa liyo
14 Na piyananalowan iyan so manga talasogoay na pitero iyan kiran a "Ilaya niyo, ka
miyawit sii angkai a Hibriyo kaan tano niyan mapakaito! Somiyoled sekaniyan ko
rowang aken ka perembangen ako niyan, ogaid na kominisek ako sa matanog.
15 Kagiya maneg iyan a kominisek ako na miyalalagoy sekaniyan sa liyo na minibegak
iyan raken angkai a kimon iyan."
16 Na tatagoon iyan den ko obay niyan so kimon i Yosop taman ko kiyapakaoma i
Potipar.
17 Kagiya makaoma na siyoson iyan on angkai a totol a tig iyan a "Giyangkoto a oripen a
Hibriyo a inowit ka sii na somiyoled ko rowang aken ka pekaitoon ako niyan.
18 Ogaid na so den so kiyakisek aken sa matanog na miyalalagoy sekaniyan sa liyo na
minibegak iyan angkai a kimon iyan ko obay aken."
19 Kagiya maneg o kadnan i Yosop so totol on o karoma niyan ko kiyateroa niyan on sa
"Giyai den i inikidia raken o oripen ka," na tanto sekaniyan a kiyararangitan.
20 Na piyakidakep iyan si Yosop na taros a kiyalaboso niyan sii ko pengalabosowan o
solotan.
Ogaid na sii sangkoto a kakakalaboso i Yosop
21 Na lalayon rekaniyan pen so Allah. Inogopan iyan si Yosop ka piyakikalimo iyan ko
sanasanaan ko kalaboso.
22 Piyakikibir o sanasanaan ki Yosop so langon a makakalaboso, na sekaniyan pen i
pepemaapaar ko langon a dii nggolaolaan roo.
23 Di den pesegipaan o sanasanaan so apiya antonaa a kikibiren i Yosop, ka lalayon on so
Allah ago pepakaondasen iyan sa mapiya so langon a di niyan dii nggolaolaan.
MAKSOD 40
So Pangengenat sa Arak ago so Pangengembaal sa Paan
Da peman matey na so pangengenat sa arak o solotan sa Misir ago so maporo o manga
pangengembaal iyan sa paan na miyakasela siran ko solotan.
2 Kiyararangitan o solotan angkai a dowa kataw a manga sanasanaan iyan,
3 Na giyoto a piyakikalaboso niyan siran ko walay o kapitan o manga gordiya a ron
mambo kakalabosowa si Yosop.
4 Na so kapitan na initoro iyan si Yosop a makapenalagad kiran; na malo miyatey a
kakakalaboso iran roo.
5 Miyakaisa a gawii na so pangengenat sa arak o solotan sa Misir ago so pangengembaal
sa paan a miyanga kakalaboso na palaya siran mitetaginep. Na oman i taginepen iran na
aden a maana niyan.
6 Kagiya mapita a miyakaoma kiran si Yosop na miyailay niyan a mararata a ginawa iran.
7 Mandiyadi na inisean iyan angkoto a manga sanasanaan o solotan a tig iyan a "Ino
makaririmeng a manga paras iyo imanto?"
8 “So oman i isa rekami na aden a taginepen iyan," a tig iran, "ogaid na da a ba on rekami
pekabaton sa maana."
Na pitero kiran i Yosop a "Ba kena a rek o Tohan so dii kapemaanai ko manga
taginepen? Panotola niyo raken so manga taginepen iyo."
9 Na so pangengenat sa arak na piyanotol iyan ki Yosop so taginepen iyan. "Sii ko
taginepen aken," a tig iyan, "na aden a miyailay aken ko mapapanempang aken a isa ka
waged a obas
10 A telo timan i sapak. Na so den so kiyapamagombos iyan na miyamagobarobar ago
miyamangonga, na taros a piyanga lolotoan den so manga obas.
11 Samaoto na katatayongan aken so tagayan o solotan; na romiyopo ako ko manga obas
na go piyanemek aken so ig iyan ko tagayan o solotan, na taros a inidawag aken on."
12 “Giyai i maana niyan," a tig i Yosop. "So telo a sapak na telo gawii.
13 Makatelo gawii imanto na pekaliyon ka o solotan ko kalaboso ka pekakasowin ka
niyan ko galebek ka. Na indawag ka ko solotan so tagayan iyan a datar o asal a
kapegenati ngka on sa arak.
14 Ogaid na amay ka mapiya a bobolos ka na tatademi ako ngka. Kapedipedi ka bo na
kalimoon ako ngka na aloya ako ngka ko solotan kaan ako mapakaliyo sangkai a
kalaboso.
15 Ka matag ako miyabiyag sii sa inged o manga Hibriyo, na apiya sii sa Misir na da den
a ba ko pinggolaola a patot a kikalaboso raken."
16 Kagiya maneg o maporo o pangengembaal sa paan a mapiya so inipemaana i Yosop
sangkoto a taginepen na pitero iyan ki Yosop a "Aden mambo a pitetaginep aken: Aden a
maooto aken a telo ka baskit a paan.
17 So maliliyawaw ron a baskit na mapepeno a pitibarangan a paan a pagenetan ko
solotan, ogaid na pepamanokaan ai o manga papanok."
18 “Giyai i maana niyan," a tig i Yosop.
"So telo timan a baskit na telo gawii.
19 Makatelo gawii imanto na pekaliyon ka o solotan ka pekipotolan ka niyan sa olo.
Pekibitin iyan so lawas ka ko kayo na pemanokaan o manga papanok so sapo o ka."
20 Sii ko ikatelo gawii na miyaoma mambo so gawii a kinimbawataan ko solotan, na
pikelilangan iyan so langon a sanasanaan iyan. Piyakaliyo niyan so pangengenat sa arak
ago so maporo o pangengembaal sa paan na piyakapangadap iyan siran ko manga
sanasanaan iyan.
21 Piyakakasoy niyan so pangengenat sa arak ko asal a galebek iyan a kapegenati niyan sa
arak ko solotan.
22 Ogaid na piyakibitin iyan so pangengembaal sa paan a giyoto den i kiyatoman o
inipemaana i Yosop ko manga taginepen iran.
23 Ogaid na so pangengenat sa arak na da niyan den katanodi si Yosop ka kiyalipatan
iyan baden.
MAKSOD 41
So manga Taginepen o Solotan sa Misir
Kagiya maipos so dowa ragon na mitetaginep so solotan: Tomitindeg sekaniyan ko obay
o lawasaig a Nail.
2 Minisarta a aden a penggakap ko lawasaig a pito timan a kaolit a manga sapi a manga
pipiya i kanggolawasan, na piyanateb iran so manga otan ko kilid o lawasaig.
3 Aden a miyakatalondog kiran a minggagakap ko ig a salakaw pen a pito timan a manga
sapi a perarakowagen ago manga rarata i paras, na miyamangobay siran ko ped a manga
sapi ko kilid o lawasaig.
4 Na so perarakowagen a manga sapi na piyangangan iran so pito timan a kaolit a manga
sapi. Samaoto na miyakanaw so solotan.
5 Miyakatorog sekaniyan bo na mitetaginep peroman. Aden a sapoon a kamais a
miyonga sa pito timan a poso a manga lilimegas ago manga pipiya a oniin.
6 Na aden peman a mireretok sangkoto a sapoon a kamais a salakaw pen a pito timan a
poso a manga roroni a miyanga lalanes o ndo a pepekapoon ko disirto.
7 Na so manga roroni a poso na pilalamed iran so pito timan a malimegas a poso a manga
pipiya a oniin. Oriyan iyan na miyakanaw so solotan na kiyatanodan iyan a matag baden
oto taginepen.
8 Kagiya mapita na miniawid oto a akal iyan. Kagiya ka maoto na piyakisogoan iyan so
langon a paririmar ago manga dadalem i istihad a taw sii sa Misir. Piyanotol kiran o
solotan so manga taginepen iyan, ogaid na da a ba kiran on pekabaton sa maana.
9 Oriyan iyan na pitero o pangengenat sa arak ko solotan a "Imanto a gawii na
kiyatademan aken so sala aken.
10 Isako kararangitan kami ngka, solotan, ago so maporo o pangengembaal sa paan na
piyakikalaboso kami ngka sii ko walay o kapitan o manga gordiya.
11 Miyakaisa a gawii na mitetaginep so oman i isa rekami, na oman i taginepen ami na
aden a maana niyan.
12 Samaoto na aden a ped ami roo a mangoda a Hibriyo a talasogoay o kapitan o gordiya.
Piyanotol ami ron so manga taginepen ami na go pimaanaan iyan rekami. Piyamatonan
iyan sa maana so oman i taginepen ami.
13 Na so inipemaana niyan on rekami na aya den miyanggolaola: piyakakasoy ako ngka
ko galebek aken ago piyakibitin ka so ped aken."
14 So den so kiyanega roo o solotan na piyakisogoan iyan si Yosop, na piyakaliyo iran
sekaniyan nggagaan ko kalaboso. Kagiya makapamarbas ago makasambi sa nditaren na
miyangadap sekaniyan ko solotan.
15 Pitero o solotan ki Yosop a "Aden a miyateginep aken na da a ba on makapemaana.
Ogaid na miyatero raken so makapantag reka a o panotoli ka kon sa taginepen na
kapemaanaan ka."
16 “Di aken anan kegaga," a tig i Yosop ko solotan, "ogaid na so Tohan i mbegay reka ko
kabaya a ka a kapemaanai ko taginepen ka."
17 Na pitero o solotan ki Yosop a "Pitetaginep aken a tomitindeg ako ko kilid o lawasaig
a Nail.
18 Minisarta a aden a penggakap ko lawasaig a pito timan a kaolit a manga sapi a manga
pipiya i kanggolawasan. Na piyanateb iran so manga otan ko kilid o lawasaig.
19 Na aden a miyakatalondog kiran a minggagakap a salakaw pen a pito timan a sapi a
pekeraraparapay, perarakowagen ago manga rarata i paras a di so apiya antonaa a manga
sapi a miyanga iilay aken sii sa dalem a Misir.
20 Na so perarakowagen ago manga rarata i paras a sapi na piyangangan iran so pito
timan a kaolit a manga sapi a miyaona gomakap.
21 Ogaid na sii ko oriyan o kiyapangangana iran on na di kiran kesarino o ba iran
miyapangangan, ka da den maalin so karata iran i paras. Sa masa oto na miyakanaw ako.
22 “Ogaid na mitetaginep ako peroman, na miyakailay ako sa sapoon a kamais a miyonga
sa pito timan a poso a manga lilimegas ago manga pipiya a oniin.
23 Na aden peman a mireretok sangkoto a sapoon a kamais a salakaw pen a pito timan a
poso a manga roroni ago miyamangipes a miyanga lalanes o ndo a pepekapoon ko disirto.
24 Na so manga roroni a poso na pilalamed iran so pito timan a malimegas a poso.
Piyanotol aken ai ko manga paririmar, ogaid na da a ba kiran raken on makapemaana."
25 Mandiyadi na pitero i Yosop ko solotan a "So dowa a taginepen ka na ndatar sa
maana. Piyayag reka o Tohan so magaan iyan den nggolaolaan.
26 So pito timan a manga pipiya a sapi na giyoto na pito ragon; ago so pito timan a
manga pipiya a poso a kamais na pito ragon mambo. So dowa a taginepen na isaisa bo sa
maana.
27 So pito timan peman a perakowagen a marata i paras a manga sapi a miyakatalondog
kiran gomakap ago so pen so pito timan a poso a kamais a manga roroni a miyanga
lalanes o ndo a pepekapoon ko disirto na giyoto na pito ragon a taon.
28 “Benar den so miyatero aken reka: piyayag reka o Tohan so magaan iyan den
nggolaolaan.
29 Aden a pekatalingoma a pito ragon a kapagodara ko dalem a Misir.
30 Ogaid na pekatalondog on so pito ragon a taon, na so langon a manga ragon a oodaren
na kelipatan, ka so dalem a inged na kelaslas a taon.
31 Di den ketademan so kiyaodara ko inged sabap ko taon a pekatalondog on ka tanto a
maregen.
32 Na aya sabap a kiyasoson o taginepen ka na kagiya miyatakdir den o Tohan angkai a
kesowasowa, na itelingoma niyan den sa magaan.
33 “Aya mapiya imanto, solotan, na pamamili ka sa somasabot ago mapiya i pamikiran a
mama a aya ngka mapakapetendingan ko inged a Misir.
34 Na toro ka mambo sa manga taw a pekakibir ko inged a pemanekat siran ko ikalimo
bagi ko keragon sii sa Misir ko soled o pito ragon a kapagodara on.
35 Sogoon ka kiran so kapanimoa iran ko langon a pereperan sangkai a pekatalingoma a
manga pipiya a ragon, na begi ngka siran sa kapaar sa kapanaliyonga iran on sii ko manga
siti ago so kapagipata iran on.
36 Giyangkoto a pangenengken na ipetelagad ko inged kaan di kekowa a ongos sii ko
soled o pito ragon a taon a pekatalingoma."
37 Na miyapikir o solotan ago so langon a sanasanaan iyan a mapiya angkai a antangan.
38 Mandiyadi na pitero kiran o solotan a "Makatoon tano mangaday sa apiya antawaa a
datar angkai a mama a sasartaan o Roh o Tohan?"
39 Giyoto a pitero o solotan ki Yosop a "Sabap sa piyakitokawan reka ini langon o Tohan
na da den a ba salakaw a datar ka a somasabot ago mapiya i pamikiran.
40 Seka i makapetendingan ko ndatoan aken, na makipembayabaya reka so langon o
manga pagtaw aken. Aya bo a kaoona ko reka sa kapaar sangkai a inged na so di ron dii
kandatoi."
Piyakitandingan ki Yosop so Inged a Misir
41 Pitero pen o solotan ki Yosop a "Pakipetendingan aken reka imanto a dalem a inged a
Misir."
42 Na giyoto a piyokas o solotan ko kemer iyan so sising iyan a ipesiliyo ko kadato na
piyakisising iyan ki Yosop, na go siyolotan iyan si Yosop sa sida a kimon ago piyakaselay
niyan pen sa salay a bolawan.
43 Piyakapagda iyan pen ko karo o mala i kadato a maoonaan iyan so manga mama a
ipelalalis iran a "Pakaokita niyo!" Giyanan den i kiyapakitendingana on o solotan ki
Yosop ko dalem a Misir.
44 Na pitero peman o solotan ki Yosop a "Saken so solotan, ogaid na sii sangkai a dalem
a Misir na da den a sakataw bo a ba niyan kibayaw a lima niyan o di na giya ai niyan
taman sa di ka niyan kaodasi."
45 Na bitowan o solotan si Yosop sa ngaran a Sapinat Paniyas; na piyakipangaroma niyan
on si Asinat a wata i Potipiras a aya imam sa siti a Hiliyopolis. Na lomiyangkap so
bantogan i Yosop ko inged a Misir.
46 Miyakatelo polo ragon a idad i Yosop ko kiyabaloy niyan a sanasanaan o solotan sa
Misir. Na giyanatan i Yosop so torogan o solotan na piyagenebeneb iyan a dalem a Misir.
47 Sii ko soled o pito ragon a kaoodara ko lopa na tanto a mala a miyaragon on.
48 Sii sangkoto a manga ragon na piyanimo i Yosop so langon a pereperan a miyanga
raragon on, na piyanaliyong iyan ai sii ko manga siti. Sii ko oman i siti na ron iyan
pepenaliyonga so pekeragon ko dii mbabasokan a melilibeta on.
49 Tanto a madakel a pereperan a miyataliyong i Yosop ka datar o peted sa ragat, na
ginekan iyan somorat so kadakel iyan ka di den kegaga magasad.
50 Sa da pen kapakaoma o manga ragon a taon na aden a dowa kataw a wata i Yosop a
manga mama a inimbawata i Asinat a wata i Potipiras a imam sa Hiliyopolis.
51 Bitowan i Yosop so kaka a wata iyan sa Manasih, ka tig iyan a "Piyakilipatan raken o
Tohan so langon a karomasayan aken ago so langon o pamiliya o ama aken."
52 So ikadowa a wata iyan na bitowan iyan sa Ipraim, ka tig iyan a "Bigan ako o Tohan sa
manga wata sii ko inged a kiyaregenan ako ron.
53 Miyapopos so pito ragon a kaoodara sa Misir
54 Na mipoon den so pito ragon a taon a aya den kinitoman o miyatero i Yosop. Tiyaon
den so langon a ped a inged, ogaid na so dalem a Misir na aden pen a pangenengken on.
55 Kagiya makagedam sa ongos so langon a taw sa Misir na gomiyoraok siran ko solotan
sa pangenengken. Na pitero o solotan ko langon a Imisiren a "Song kano ki Yosop na
nggolaolaa niyo so mapetero iyan rekano."
56 Kagiya tanto a makaregen so taon ago lomiyangkap pen ko dalem a Misir na
piyakipelelekaan i Yosop so manga taliyong na pipepasa niyan so pangenengken ko
manga Imisiren.
57 Na miyamakaoma sa Misir so manga taw a poon ko langon a ped a inged ka
pemamasa siran sa pereperan ki Yosop, ka tetanto so taon ko mbalabala sa doniya.
MAKSOD 42
Somiyong sa Misir so manga Pagari i Yosop
Mandiyadi na kagiya katokawan i Yakob a aden a pereperan sa Misir na pitero iyan ko
manga wata iyan a mama a "Ino kano baden dii tetentenga?
2 Miyaneg aken a aden kon a pereperan roo sa Misir. Na, song kano roo na go kano ron
pamasa sa makan tano kaan tano di pematay."
3 Kagiya ka maoto na gomiyanat so sapolo kataw a manga kaka i Yosop ka song sa Misir
ka pemasa siran on sa pereperan.
4 Ogaid na da kiran pakaonota i Yakob si Baniyamin ka ipekewan iyan o ba aden a
makakaid ko wata iyan.
5 Na maaped so manga wata i Israil ko ped a manga taw a pemanong mambo sa Misir a
pemamasa sa pereperan, ka tiyaon mambo a inged a Kanaan.
6 Samaoto na si Yosop na aya den gobirnador sii sa Misir, na sekaniyan i dii pesa sa
pereperan ko langon o manga taw ko inged. Na kagiya makaoma roo so manga pagari
niyan na miyamanodiyod siran ko hadapan iyan.
7 So den so kiyailaya i Yosop ko manga kaka niyan na miyakilala niyan siran, ogaid na
omamanti na di niyan siran katawan, ka piyamasong iyan siran baden. "Anda kano
poon?" a iniise iyan kiran.
"Miyakapoon kami sa inged a Kanaan," a tig iran, "ka pemasa kami sa pangenengken."
8 Apiya pen pekekilala i Yosop so manga kaka niyan na da iran sekaniyan makilala.
9 Na giyoto a kiyatademan iyan so miyanga tetaginep iyan makapantag kiran, na piterro
iyan kiran a "Manga manonoriman kano! Aya inisong iyo sii na pagilain iyo o anda i di
malilinding ko inged ami."
10 Pitero iran on a "Kena, kadnan ami. Ka aya inisong ami sii a manga oripen ka na
pemasa kami sa pangenengken.
11 Sekami langon na isaisa bo a ama ami. Kena a ba kami manga manonoriman, kadnan,
ka maontol kami a manga mama."
12 “Pamerak!" a tig iyan kiran. "Somiyong kano sii ka pagilain iyo o anda i di
malilinding ko inged ami."
13 Na pitero iran a "Sekami a manga oripen ka na manga wata kami o sakataw a mama a
mababaling sa Kanaan, na sapolo ago dowa kami a magariyari. So isa ko pagari ami na
miyada, na so ariyari na sisii ko ama ami imanto."
14 Pitero kiran i Yosop a "Benar den so pitero aken rekano a manga manonoriman kano!
15 Na giyai i katepengi rekano: Pesepa ako sii ko ingaran o solotan a di kano sii pekaawa
taman sa di sii makasong so ariyari rekano!
16 Sogoa niyo so isa rekano a marapit iyan so pagari niyo. So ped rekano na
pengalaboson kaan katepengi so di niyo dii teroon o ba benar ago so di. O di benar na
pemataan ako sii ko ingaran o solotan sa manga manonoriman kano!"
17 Na piyangalaboso niyan siran langon sa miyakatelo gawii.
18 Sii ko ikatelo gawii na pitero kiran i Yosop a "Kagiya maaleken ako ko Tohan na
makapegoyag kano o nggolaolaa niyo ai:
19 O mataan a manga oontol kano na begaken iyo so isa ko pagari niyo sii sa kalaboso, na
so ped rekano na balingen iyo den so pereperan sii ko tataonen a manga pamiliya niyo.
20 Ogaid na disomala a mawit iyo raken sii sa ariyari rekano kaan maamad o benar so di
niyo dii teroon ago di aken sekano mapakibono."
Na inayonan iran a penggolaolaan iran ai.
21 Na pitero iran ko oman i isa kiran a "Matamataan a ipendaneg rektano so pagari tano,
ka miyailay tano so kiyakerata a ginawa niyan isako pengangampedian rektano, ogaid na
da tano pakinega. Giyanan i kinitalingoma rektano angkai a maregen."
22 Na pitero kiran i Robin a "Ba ko rekano da matero a di niyo pemaratai sekaniyan?
Ogaid na da ako niyo pakinega! Na itena rektano den imanto so kiyapatay niyan."
23 Siyabot i Yosop so di iran dii teroon, ogaid na di iran ai katawan, ka aden a di kiran dii
makasinabota.
24 Na tiyalikodan siran i Yosop na taros a miyakasegad. Ogaid na somiyangor bo ago
miyakimbitiyarai kiran peman, na inisibay niyan kiran si Simiyon na piyatong iyan ko
hadapan iran.
Komiyasoy so manga Pagari i Yosop sa Kanaan
25 Mandiyadi na somiyogo si Yosop sa pamenoon a pereperan so manga sako iran ago
tegoon so pirak o oman i isa kiran ko sako iyan, ago mbegan siran pen sa mapeloto iran
ko kapelalakaw iran. Kagiya manggolaola kiran oto
26 Na pirororan iran so manga pereperan iran sii ko manga kimar iran na gomiyanat siran
den.
27 Sii ko darpa a dikean iran ko kagagawii na bikar o isa kiran so sako iyan ka kowa on
sa pekikan iyan ko kimar. Sarta a miyailay niyan so pirak iyan a matatago ko ngari o
sako,
28 Na pitero iyan ko manga pagari niyan a "Inikasoy raken so pirak aken! Katii, sii ko
sako aken!"
Na tanto a minikiyab so manga poso iran na miyamagisei siran a pepenanabaden a tig
iran a "Antonaa bes angkai a inikidia rektano o Tohan?"
29 Kagiya makaoma siran ki Yakob a ama iran sii sa Kanaan na piyanotol iran on so
langon a kiyasagadan iran. Pitero iran a
30 “So mama a aya tetandingan ko inged na pirangitan kami niyan, na sinditan kami
niyan pen sa pepanoriman kami kon ko inged.
31 Ogaid na aya pitero ami ron na 'Maontol kami a manga mama; kena a ba kami manga
manonoriman.
32 Sapolo kami ago dowa a magariyari a sasatiman i ama. So isa rekami na miyada, ago
so ariyari rekami na sisii imanto ko ama ami sa Kanaan.'
33 “Na giyoto a pitero rekami o mama a 'Giyai i kakeamada ko o benar a manga oontol
kano: Begaken iyo raken so isa a pagari niyo, na balingen iyo so pereperan ko tataonen a
manga pamiliya niyo.
34 Ogaid na wita niyo raken sii so ariyari rekano kaan aken matangked a kena a ba kano
manga manonoriman ka benar a manga oontol kano. Amay ka magiyanan na ikesoy aken
rekano so pagari niyo na makapengongoyagan kano sii sangkai a inged.' ”
35 Na sii ko kapengowai ran sa tago ko manga sako iran na miyatoon o oman i isa kiran
so oyot iyan a katatagoan sa pirak iyan! Kagiya mailay iran ago so ama iran so pirak na
palaya siran miyanga alek.
36 Na pitero kiran o ama iran a "Kinowaan ako niyo sa manga wata! Miyada den si
Yosop na miyada pen si Simiyon, na imanto na kebayaan iyo pen komowa si Baniyamin.
Saken i mararasay ko langon taman ai!"
37 Na pitero i Robin ko ama iyan a "O di aken reka mikasoy si Baniyamin na pekibono
aken reka so dowa kataw a wata aken a mama. Sarigen ka sekaniyan raken, ka ikesoy
aken reka."
38 Ogaid na tig i Yakob a "Di rekano roo pekaonot so wata aken, ka miyatay so pagari
niyan na sekaniyan bo i miyalamba. O aden a makakaid on ko kapelalakaw niyo roo na
tibaba a pekiwit ako niyo ko darpa o miyamatay a mararata a ginawa ko, ka miyalokes
ako den man."
MAKSOD 43
So Ikadowa a Kiyalalakaw sa Misir
Tetanto pen so taon sii sa Kanaan,
2 Na kagiya malengan iran koman so pereperan a miyawit iran a poon sa Misir na pitero
kiran o ama iran a "Kasoy kano na go kano bo pamasa sa maito a makan tano."
3 Ogaid na pitero on i Yodah a "Inipemataan rekami o mama a di kami rekaniyan den
makapengadap o di ami ped so ari ami.
4 O pakaonota ngka rekami so ari ami na song kami roo na go ipemasa mi seka sa
pangenengken.
5 Ogaid na o di ngka pekaonota na di kami roo den song, ka pitero o mama a di kami ron
den makapengadap o di ami ped so ari ami."
6 Na iniise i Israil a "Ino ako niyo pemaratai ko kiyateroa niyo ko mama sa aden pen a ari
rekano?"
7 Tig iran a "Piyangingisean kami piyapiya o mama makapantag sa ginawa mi ago so
pamiliya tano. 'Ba oyagoyag pen so ama iyo?' a iniise iyan rekami. 'Ba aden pen a ped a
pagari niyo?' Na simbag ami baden so manga pakaise iyan. Ba ami katawi o ba aya
peteroa niyan rekami na 'Wita niyo sii so pagari niyo'?"
8 Na pitero i Yodah ko ama iyan a Israil a "Pakaonota ngka raken so ari ami, ka somong
kami roo somambot kaan tano di pematay a ongos ago so manga wata ami.
9 Isenda aken rekaniyan a ginawa ko na sii ngka raken sekaniyan kiise. O di aken
sekaniyan sii mikasoy a mapakapangadap aken reka na kioba a ka raken ai sa taman sa
kapetay aken.
10 Opama ka da tano misendod so kasong ami roo na miyakadowa kami roo den ai
makasorombaling."
11 Na pitero kiran o ama iran a Israil a "O di anan mipesomala na nggolaolaa niyo ai:
Panagoi niyo so manga sako iyo ko lebi a manga pipiya a baden dii pamangeto ko lopa na
wita niyo a pamemegayan sangkoto a mama, a so maito a doka, maito a gola a batiyokan,
manga palapa, manga ikekamotan ago manga onga a kayo a pistasiyo ago almondo.
12 Takepa niyo so kadakel o pirak a pagawidan iyo kaan iyo mikasoy so pirak a
miyapanago ko ngari o manga sako iyo, ka baanda oto ribat.
13 Pakaonota niyo pen so ari niyo na kasoy kano somambot sangkoto a mama.
14 Pengnin ko a ikelimo kano o Tohan a Lebi a Mabager amay ka makapengadap kano ko
mama kaan iyan rekano mapakaonot so ped a pagari niyo ago si Baniyamin ko
kapembaling iyo. So saken on na o bagian aken a kakedai raken sa manga wata na
kedaan ako bo sa manga wata."
15 Mandiyadi na inawidan o magariyari so pamemegayan ago so dowa takep a pirak na
gomiyanat siran, na somiyong siran sa Misir a ped iran si Baniyamin. Kagiya
mamakaoma roo na miyangadap siran den ki Yosop.
16 Na kagiya mailay i Yosop si Baniyamin a ped iran na pitero iyan ko komikibir ko
walay niyan a "Wita ngka angkai a manga mama sa walay. Sombali ka sa pangangayamen
na tiyagara ngka, ka ipegatoang aken siran amay ka maoto a alongan."
17 Ininggolalan o mama so pitero on i Yosop ka inowit iyan so magariyari ko walay i
Yosop.
18 Sii ko kapegowita kiran ko walay niyan na miyanga aalek siran ka aya mapipikir iran
na "Aya kapagowita rektano roo na so pirak a inipangasoy rektano ko manga sako tano
isako miyaona. Ka senditan tano niyan ago ndakepen kaan tano niyan mapangongoripen
ago maagaw niyan pen so manga kimar tano."
19 Kagiya ka maoto na miyobay siran ko komikibir i Yosop na miyakimbitiyarai siran on
sii ko pintoan o walay.
20 “Hey kadnan," a tig iran, "Isako mona a mamasa kami sii sa perperan
21 Na kagiya makaoma kami ko pendekean ami ko kagagawii na piyamekar ami so
manga sako ami na giyoto a miyatoon on o oman i isa rekami so pirak iyan a da kakorangi
sii ko ngari o sako iyan. Kagiya ka maoto na inawidan ami reka sii peman
22 A rakes o inioman ami ron a pirak a ipemasa mi sa pangenengken. Di ami katawan o
antawaa i miyanago ko pirak ami sii ko manga sako."
23 Tig iyan a "Di niyo aawiden a akal; di kano pekelek. So Tohan iyo, a so Tohan o ama
iyo, na aya rekano migay sa pirak sii ko manga sako iyo. Miyatarima aken den so manga
pirak iyo." Na giyoto a iniliyo niyan kiran si Simiyon.
24 Na piyakabolos o komikibir so magariyari ko walay i Yosop na bigan iyan siran sa ig a
ipagonab ko manga ai ran, ago piyakakan iyan pen so manga kimar iran.
25 Pitiyagar iran so manga pamemegayan a imbegay iran ki Yosop ko kapekaoma niyan
ko kaoto a alongan, ka miyaneg iran a makipegatoang kiran.
26 Kagiya maling si Yosop na piyalad iran on so manga pamemegayan a inisoled iran ko
walay na taros a miyamanodiyod siran ko hadapan iyan.
27 Iniise iyan kiran o mapipiya a ginawa iran ago tig iyan pen a "Mapipiya a ginawa o
miyalokes den a ama iyo a miyatero iyo raken? Ba sekaniyan pen oyagoyag?"
28 Tig iran a "Oyagoyag pen so ama ami a oripen ka ago mapipiya a ginawa niyan." Na
miyamanodiyod siran a aya iran on inipagadat.
29 Inilay i Yosop so pagari niyan a Baniyamin a so wata o tito a ina iyan, na iniise iyan a
"Ba giyai so miyatero iyo a ariyari rekano?" Na go tig iyan on pen a "Ikalimo ka o Tohan,
wata ko!"
30 Giyoto a lominiyo nggagaan si Yosop ka tanto sekaniyan a kiyagagawan ko pagari
niyan ago kesegadan iyan; na somiyoled ko rowang iyan na ron somigad.
31 Kagiya makapanagop sekaniyan na lominiyo kiran a pegrenen iyan a ginawa niyan, na
pitero iyan ko manga talasogoay a "Nata niyo so manga pangenengken."
32 Na inenatan iran si Yosop a sekaniyan bo ko isa a lamisaan, na so peman so manga
pagari niyan na sii ko ped a lamisaan. So pen so manga Imisiren a pemangangan roo a
ped iyan na salakaw mambo a lamisaan a kiyanan iran sabap sa di siran makipegatoang
ko manga Hibriyo ka giyoto na pakasisingay ko manga Imisiren.
33 So manga pagari i Yosop na piyamakaontod ko kasasangoran iyan a
pakatetalondogaan siran ipoon ko kaka na taman ko ari. So kiyainengkaa iran sii na ba
siran den miyakatentenga ka tanto siran a miyamemesa.
34 Sii siran inenatan ko pangenengken a maanat ko lamisaan i Yosop, na so inenat ki
Baniyamin na miyakalima takep ko inenat ko apiya antawaa kiran. Na miyamangangan
ago miyamangondaya siran mamanginom a ped iyan.
MAKSOD 44
So Pirak a Tagayan ko Sako
Ininsaratan i Yosop so komikibir iyan a tig iyan a "Pamenoa ngka a pangenengken so
manga sako iran taman sa makena iran mawid, ago tagoa ngka so pirak o oman i isa a
mama ko ngari o sako iyan.
2 Na tagoa ngka pen so tagayan aken a pirak sii ko ngari o sako o ariyari kiran a rakes o
pirak a inibayad iyan ko perperan." Na ininggolalan iyan so pitero on i Yosop.
3 Kagiya pekaliwanag na miyapakalalakaw so manga mama a ped iran so manga kimar
iran.
4 Kagiya da siran pen tanto makawatan ko siti na pitero i Yosop ko komikibir iyan a
"Salobaa ngka nggagaan angkoto a manga mama, na amay ka raoten ka siran na teroa
ngka kiran a 'Ino niyo mbadali sa marata so mapiya?
5 Ba kena a giyai so tagayan a peginoman o kadnan aken ago di niyan dii perimar?
Marata angkai a pinggolaola niyo!'"
6 Na kagiya raoten siran o komikibir na giyoto den i pitero iyan kiran.
7 Ogaid na simbag iran a tig iran a "Ino pembasaa o kadnan ami angkanan a manga
katero? Mawatan sa ginawa mi a manga oripen ka o ba ami anan nggolaolaa!
8 Apiya so pirak a miyatoon ami ko ngari o manga sako ami na inowit ami sii peman a
poon sa Kanaan ka inikasoy ami reka. Ino ami kapemanekewi sa pirak o di na bolawan
so walay o kadnan ka?
9 Apiya antawaa i katoonan ka on na kebono; na mapengongoripen ka mambo so ped
rekami."
10 “Oway, miyayon ako ko pitero iyo," a tig iyan, "ogaid na so bo so katoonan on i
pembaloy a oripen aken, ka di aken selaan so ped rekano."
11 Mandiyadi na magaan so magaan a kinibabaan o oman i isa kiran ko sako iyan ko lopa
na bikar iyan.
12 Na taros a piyanisik o komikibir so manga sako a poon ko sako o kaka na taman ko
ari, na sii miyatoon so tagayan ko sako i Baniyamin.
13 So kiyagiyoto niyan na piyamangisi iran so manga nditaren iran sa kiyakerata a ginawa
iran. Na piroronan iran so manga kimar iran na komiyasoy siran ko siti.
14 Katatabowan pen si Yosop sa walay kagiya makaoma on si Yodah ago so manga
pagari niyan, na gomipe siran ko hadapan iyan.
15 Pitero kiran i Yosop a "Antonaa bes angkai a pinggolaolaa niyo? Ba niyo di katawi a
so datar aken a mama na peketokawan aken ko kaperimar so di niyo dii nggolaolaan?"
16 “Antonaa i mapetero ami reka, kadnan ko?" a tig i Yodah. "Antonaa i kisembag ami?
Andamanaya i kapakapemataan ami sa da a sala ami? Siyawaan o Tohan so kadostaan
ami na palaya kami ngka den manga oripen imanto, kadnan ko; giya den a ginawa mi ago
so kiyatoonan ko tagayan."
17 Ogaid na tig i Yosop a "Mawatan sa ginawa ko o ba ko anan nggolaolaa! Aya bo a
pembaloy a oripen aken na so bo so kiyatoonan ko tagayan. So ped rekano na baling
kano ko ama iyo sa da a rayorayo a ginawa niyan."
Inipangangampedian i Yodah si Baniyamin
18 Giyoto den a miyobay si Yodah ki Yosop na pitero iyan on a "Kapedipedi ka bo,
kadnan ko, na peroa ngka raken a kapakapangangampedian aken reka. Di ako ngka
kerarangiti a oripen ka, ka tingki kano ago so solotan.
19 Iniise ka rekami, kadnan ko, o ba aden a ama ami o di na isa pen a pagari ami.
20 Na inisembag ami reka a aden a miyalokes a ama ami ago aden pen a ari ami a
inimbawata o ama ami ko kiyalokes iyan. Miyatay den so pagari o ari ami na sekaniyan
bo i miyalamba ko manga wata o ina iyan; na pakatatayaan sekaniyan o ama iyan.
21 “Na pitero o ka rekami a 'Wita niyo raken sii kaan aken mailay.'
22 Pitero ami reka, kadnan ko, a 'Di keawaan o ari ami so ama iyan, ka o awai niyan na
petay so ama iyan.'
23 Ogaid na pitero o ka rekami a 'Taman sa di niyo sii mapakaonot so ari niyo na di kano
raken den makapengadap.'
24 Na kagiya komasoy kami ko ama ami na piyanotol ami ron so pitero o ka.
25 “Kagiya malo matey na pitero o ama ami a 'Kasoy kano na go kano bo pamasa sa
maito a makan tano.'
26 Ogaid na pitero ami ron a 'Di kami pekakasoy. Aya bo a kasong ami roo na o
mapakaonot ami so ari ami, ka di kami makapengadap sangkoto a mama o di ami ped so
ari ami.'
27 “Na so ama ami a oripen ka na pitero iyan rekami a 'Katawan iyo a dowa kataw a wata
a mama a inimbawata raken o karoma ko a si Rakila.
28 So isa on na inawaan ako niyan den, na taman roo na da ko sekaniyan den mailay.
Pitero aken sa ginawa ko a matamataan a miyasekisi sekaniyan o maila a binatang.
29 Na o kowaa niyo raken pen angkai a pagari niyan na go sekaniyan kakaidi na tibaba a
pekiwit ako niyo ko darpa o miyamatay a mararata a ginawa ko, ka miyalokes ako den
man.'
30-31 “Kagiya ka maoto," a tig pen i Yodah, "na amay ka komasoy ako ko ama aken ago
mailay niyan a di ami ped so ari ami na taros den a ipetay niyan ai, ka miiiket so niyawa
niyan ko niyawa angkoto a wata iyan. Na sekami a manga oripen ka na pembabaan ami a
pekiwit ami so miyalokes a ama ami ko darpa o miyamatay a mararata a ginawa niyan.
32 Inisanda aken a ginawa ko ko ari ami sii ko ama aken ko kiyateroa ko ron sa 'O di aken
reka mikasoy na kioba a ka raken ai sa taman sa kapetay aken.'
33 “Kagiya ka maoto, kadnan ko, na kapedipedi ka bo na saken i pakatelimbegaka ngka
sii a mabaloy a oripen ka a misambi ko ari ami, na pakakasoya ngka sekaniyan a ped o
manga pagari niyan.
34 Andamanaya i kapakabaling aken ko ama aken o di aken ped so ari ami? Di aken
keraw milay angkai a morala a pekatana ko ama aken!"
MAKSOD 45
Miyakitokaw si Yosop
Di den keren i Yosop a ginawa niyan sii ko kamamasaan o manga talasogoay niyan, na
inipananalo niyan a "Awai ako niyo langon! Kagiya maipos siran a da den a sakataw
kiran bo a ped i Yosop na miyakikilala sekaniyan ko manga pagari niyan.
2 Miyakagoraok sekaniyan sa matanog taman sa miyaneg o manga Imisiren, na
miyapanotol ai sii ko torogan o solotan.
3 Pitero i Yosop ko manga pagari niyan a "Saken si Yosop! Oyagoyag bes si ama?" So
kiyanega sii o manga pagari niyan na di iran kesembag sa tanto kiran a kiyaleki ko
kapakaaadap iran on.
4 Na pitero kiran i Yosop a "Obay kano raken." Kagiya makaobay siran on na tig iyan a
"Saken so pagari niyo a Yosop a pipesa niyo a mawit sa Misir.
5 Na, di niyo perataa o di na pengobai a ginawa niyo sabap ko kiyapesaa niyo raken a
mawit sii, ka piyakaona ako rekano sii o Tohan kaan mapakapagoyag so manga taw.
6 Miyakadowa ragon den a kiyataona ko doniya, na aden pen a lima ragon a da den a lopa
a ba mapendado o di na keragonan.
7 Piyakaona ako rekano sii o Tohan kaan aken sekano mapakapagoyag sangkai a
piyakamemesa a okit kaan mapakatangked a kakebabad iyo ko doniya.
8 “Kagiya ka maoto na kena a ba sekano i miyakiwit raken sii, ka so Tohan. Biyaloy ako
niyan a mosawira o solotan ago maporo ko langon a manga pagtaw niyan, na saken pen i
tetandingan ko dalem a inged a Misir.
9 Na, kasoy kano nggagaan ki ama na teroa niyo ron a giyai i pitero o wata iyan a si
Yosop: 'Miyabaloy ako o Tohan a maporo ko dalem a Misir. O ba ngka sendoden a
kasong ka raken sii.
10 Makapeginged ka ko kalopaan a Gosen kaan ka raken makarani; seka ago so manga
wata a ka, manga apo o ka, ago manga bilibili, kambing ago sapi i ka, ago so langon a rek
ka.
11 Pagperen ko sekano roo kaan kano di kemeremeri ago so pamiliya ngka ago an di
kekorangi so langon taman ka, ka makalima pen ragon so taon.' "
12 Tig pen i Yosop a "Imanto na giya den a manga ginawa niyo ago so pagari aken a
Baniyamin i pepekailay sa saken den a si Yosop i di rekano dii makimbitiyarai.
13 Panotola niyo ki ama so makapantag ko kala aken i gees sii sa Misir ago so langon a
miyailay niyo. Na o ba niyo raken sii di mawit nggagaan."
14 Mandiyadi na giyakes iyan so pagari niyan a Baniyamin na taros a miyakagoraok.
Miyakagoraok mambo si Baniyamin ko kanggagakesa iran.
15 Na pinggagakes iyan pen a penggoraok ago piyangarekan iyan so oman i pagari niyan.
Oriyan oto na miyakimbitiyarai siran on.
16 Kagiya misampay sa torogan o solotan so totol makapantag ko kiyapakaoma o manga
pagari i Yosop na inikasoat ai o solotan ago so manga sanasanaan iyan.
17 Na pitero o solotan ki Yosop a "Teroa ngka ini ko manga pagari ngka: Rorani niyo so
manga kimar iyo na kasoy kano sa inged a Kanaan,
18 Na pakaonota niyo so ama iyo ago so manga pamiliya niyo na go kano raken kasoy.
Imbegay aken rekano so lebi a mapiya ko lopa sii sa Misir, na kitaralo so pereperan a
ikeoyag iyo ron.
19 “Teroa ngka kiran pen a 'Kowa kano ko manga karo sa Misir a kapegdaan o manga
wata iyo ago so manga karoma niyo, na pakaonota niyo so ama iyo ago kasoy kano sii.
20 Di niyo aawiden a akal so manga tamok iyo a kibegak iyo, ka so lebi a mapiya ko
dalem a Misir na kebaloy a rek iyo.' "
21 Na ininggolalan den ai o manga wata i Israil. Bigan siran i Yosop sa manga karo a aya
den inisogo o solotan, na bigan iyan siran pen sa mapeloto iran ko kapelalakaw iran.
22 Bigan iyan so oman i isa kiran sa sokoba a nditaren, ogaid na si Baniyamin na bigan
iyan sa telo gatos a pelata a pirak ago lima ka sokoba a nditaren.
23 Na giyai i piyakiwit iyan ko ama iyan: sapolo a kimar a rororanan sa lebi a manga
pipiya a nganin sa Misir, ago sapolo a babay a kimar a rororanan sa pereperan ago manga
paan ago ped a pangenengken a mapeloto o ama iyan ko kasong iyan sa Misir.
24 Na giyoto a piyakalalakaw niyan den so manga pagari niyan, na sii ko kapengganat
iran na pitero iyan kiran a "O ba kano pepewala sa lalan!"
25 Miyawa siran sa Misir na go miyamakaoma ko ama iran a si Yakob sii sa inged a
Kanaan.
26 Pitero iran on a "Oyagoyag pen si Yosop! Sekaniyan i tetandingan ko dalem a inged a
Misir." Sarta den a kiyaletan a napas i Yakob ka di kiran makapengimbenar.
27 Ogaid na kagiya panotolen iran on so langon a pitero kiran i Yosop ago miyailay niyan
pen so manga karo a piyakiwit i Yosop a kapagdaan iyan sa Misir na miyakapiya a
kapengginawa niyan.
28 Na pitero iyan a "Miyapakaparatiyaya ako den! Oyagoyag pen si Yosop a wata aken!
Song ako ron den ka pagilain ko sekaniyan sa di aken pen kapetay."
MAKSOD 46
Somiyong si Yakob sa Misir
Gomiyanat si Israil a kaaawidan iyan so langon taman iyan, na kagiya makaoma
sekaniyan sa Birsiba na mikorban roo ko Tohan o ama iyan a Iskak.
2 Na miyakimbitiyarai so Tohan ki Israil ko kiyapeyag iyan on ko kagagawii a pitero iyan
a "Yakob! Yakob!"
"Katii ako bo," a tig iyan.
3 “Saken so Tohan a so Tohan o ama a ka," a tig iyan. "Di ka pekelek ko kasong ka sa
Misir, ka mbalowin ko a mala a nasiyon so kebabadan reka roo.
4 Magonot ako reka somong sa Misir, na matamataan a ikesoy aken so manga mbawataan
ka sangkai a inged. Na si den si Yosop i pideng sa mata ngka amay ka petay ka."
5 Na gomiyanat si Yakob sa Birsiba. So manga wata iyan a manga mama na piyamakada
iran si Yakob, so manga wata iran ago so manga karoma iran ko manga karo a
piyamakiwit kiran o solotan a kapagdaan iran.
6 Initelon iran so pangangayamen iran ago so miyapantiyari ran sii sa Kanaan na
somiyong siran den sa Misir. Piyamakaonot i Yakob so langon a mbawataan iyan
7 A so manga wata iyan a manga mama ago manga babay ago so manga apo iyan a manga
mama ago manga babay.
8 Giyai i manga ngaran o manga mbawataan o Israil (giyanan den si Yakob) a somiyong
sa Misir:
Si Robin a kaka a wata i Yakob.
9 So manga wata i Robin a manga mama na
siki Hanok, Palo, Hisron ago si Karmi.
10 So manga wata i Simiyon a manga mama na
siki Himowil, Hamin, Ohad, Hakin, Sohar ago si Siyaol a inimbawata o Ikanaanen a
babay.
11 So manga wata i Libi a manga mama na
siki Girson, Kohat ago si Mirari.
12 So manga wata i Yodah a manga mama na
siki Ir, Onan, Silah, Piris ago si Sirah (ogaid na miyatay den si Ir ago si Onan sii sa
Kanaan).
So manga wata a mama i Piris na
si Hisron ago si Hamol.
13 So manga wata i Isakar a manga mama na
siki Tolas, Powah, Hasiyob ago si Simron.
14 So manga wata i Sibilon a manga mama na
siki Sirid, Ilon ago si Halil.
15 Giyanan den i manga wata a mama a inimbawata i Liyah ki Yakob sii sa
Misopotamiya. Telo polo ago telo kataw langon so manga mbawataan i Yakob a
miyakapoon ki Liyah a liyo ron ki Dinah a wata iyan a babay.
16 So manga wata i Gad a manga mama na
siki Sipon, Hagi, Siyoni, Isbon, Iri, Arodi ago si Areli.
17 So manga wata i Asir a manga mama na
siki Imnah, Isbah, Isbi ago si Biriyas. So babay iran na si Sirah.
So manga wata a mama i Biriyas na
si Hibir ago si Malkiyal.
18 Giyanan den i sapolo ago nem kataw a mbawataan i Yakob a miyakapoon ki Silpah a
so talasogoay a babay a inibegay i Laban ko wata iyan a Liyah.
19 So manga wata a mama o karoma i Yakob a si Rakila na
si Yosop ago si Baniyamin.
20 Sii sa Misir na aden a dowa kataw a wata i Yosop a manga mama a si Manasih ago si
Ipraim a inimbawata rekaniyan i Asinat a wata i Potipiras a aya imam sa Hiliyopolis.
21 So manga wata a mama i Baniyamin na
siki Bilas, Bikir, Asbil, Giras, Naaman, Ihi, Ros, Mopim, Hopim ago si Ared.
22 Giyanan den i sapolo ago pat kataw a mbawataan i Yakob a miyakapoon ki Rakila.
23 So wata i Dan a mama na
si Hosim.
24 So manga wata i Naptali a manga mama na
siki Hadsil, Goni, Hisir ago si Silim.
25 Giyanan den i pito kataw a mbawataan i Yakob a miyakapoon ki Bilhah a so
talasogoay a babay a inibegay i Laban ko wata iyan a Rakila.
26 Aya kadakel o manga mbawataan i Yakob a miyonot on ko kiyasong iyan sa Misir a di
on ped so miyakamong on a manga babay na nempolo ago nem kataw langon.
27 Na ped on si Yosop ago so dowa kataw a inimbawata iyan sii sa Misir na aya kadakel
o pamiliya i Yakob a ndodoo sa Misir na pito polo kataw.
Si Yakob ago so Pamiliya niyan sii sa Misir
28 Piyakaona i Yakob si Yodah sii ki Yosop ka pekialaw rekaniyan sii ko masasakop a
Gosen. Na kagiya makaoma siran den sa Gosen
29 Na piyakitiyagar i Yosop so karo niyan na somiyong sekaniyan roo ka pagalaon iyan
so ama iyan a Israil. So den so kiyapakatoona iran na giyakes i Yosop so ama iyan na
miyatey a kiyapakasegad iyan.
30 Na pitero i Israil ki Yosop a "Apiya matay ako den imanto na asar a miyailay aken
seka ago katawan aken a oyagoyag ka pen!"
31 Oriyan iyan na pitero i Yosop ko manga pagari niyan ago so ped ko pamiliya o ama
iyan a "Pengadap ako ko solotan ka pekitokawan ko ron a miyakaoma raken so manga
pagari aken ago so pamiliya o ama aken a sii makapopoon sa inged a Kanaan.
32 Peteroon ko ron a manga pananagikor kano sa bilibili ago pepangayam sa
pangangayamen, na piyangowit iyo sii so manga bilibili, manga kambing ago manga sapi
iyo ago so langon taman a rek iyo.
33 Na amay ka pakisogoan kano o solotan ago ipagise iyan rekano o antonaa i galebek iyo
34 Na aya niyo ron sembagen na 'Sekami a manga oripen ka na pepangayam kami ipoon
ko kangodai rekami taman den imanto a datar o galebek o manga apo ami.' Sabap san na
pekabalingen kano niyan sii sa masasakop a Gosen." Aya sabap a kiyateroa sii i Yosop
na so oman i pananagikor sa bilibili na pakasisingay ko manga Imisiren.
MAKSOD 47
Na miyangadap si Yosop ko solotan na pitero iyan on a "Miyakaoma so ama aken ago so
manga pagari aken a makapopoon sa Kanaan a mitetalon iran so manga bilibili, manga
kambing ago manga sapi iran ago so langon taman a rek iran, na palaya siran ndodoo sa
Gosen imanto."
2 Samaoto na pakaoonoten i Yosop so lima kataw ko manga pagari niyan, na piyakikilala
niyan siran ko solotan.
3 Inisean o solotan so magariyari a "Antonaa i galebek iyo?"
"Sekami a manga oripen ka na manga pananagikor sa bilibili," a inisembag iran on, "a
datar o galebek o manga apo ami.
4 Somiyong kami sii ka tereg kami pasin sangkai a inged, ka da a ba kapenateban o
manga talon ami roo sa Kanaan sabap ko karegen o taon. Kagiya ka maoto na kapedipedi
ka bo na pakipagingedi ngka rekami a masasakop a Gosen."
5 Na pitero o solotan ki Yosop a "Imanto den a miyakaoma reka so ama a ka ago so
manga pagari ngka
6 Na papaladen reka man a kalopaan a Misir. Pakipagingedi ngka kiran so lebi a mapiya a
lopa ko inged a giya masasakop a Gosen. Na o katawi ngka i aden a kapasang iyan kiran
na aya ngka pakakibira ko manga pangangayamen aken."
7 Na giyoto a inisoled i Yosop so ama iyan na go iniadap iyan ko solotan, na siyalam i
Yakob so solotan.
8 Iniise o solotan ki Yakob a "Pira i idad ka?"
9 Tig i Yakob a "Miyakamagatos ago telo polo ragon a miyapero raken a
kiyapakapaginetaw aken ko doniya; na maito ago maregen angkoto a manga ragon ago da
pen makaraot ko miyapero a kiyapakapaginetaw o manga apo aken."
10 Na giyoto a riyakmatan i Yakob so solotan na go miyawa den ko hadapan iyan.
11 Mandiyadi na piyakapaginged i Yosop so ama iyan ago so manga pagari niyan sii sa
Misir. Bigan iyan siran sa lopa sii ko lebi a mapiya a darpa ko inged a marani ko siti a
Ramisis a aya den inisogo o solotan.
12 Na pepemegan pen i Yosop sa manga pangenengken so ama iyan ago so manga pagari
niyan taman ko langon o pamiliya o ama iyan ka di niyan siran dii tokiden a mipepasod
ko kadakel o manga wata iran.
Si Yosop ago so Taon
13 Kagiya tanto den a miyakaregen so taon na da den a ba lamba a pangenengken ko
dalem a inged; ndatar a Misir ago Kanaan a piraraot a ongos so manga taw ron sabap ko
taon.
14 Na sii ko kapepamasaa iran ko pereperan ki Yosop na inipamamayad iran on so langon
o pirak a ndodoo sa Misir ago sii sa Kanaan. Na piyangowit ai i Yosop ko torogan o
solotan.
15 Kagiya malengan so pirak sa Misir ago giya Kanaan na somiyong ki Yosop so langon
a Imisiren na pitero iran on a "Begi kami ngka sa pangenengken! Di kami ngka baden
peteodi ko kapematay ami. Da a miyalamba ko pirak ami."
16 “Kagiya miyalengan den so pirak iyo," a tig i Yosop, "na wita niyo raken so manga
pangangayamen iyo, ka sambian aken siran sa pangenengken."
17 Sabap roo na piyangowit iran on so manga pangangayamen iran na piyanambian iyan a
pangenengken so manga koda, manga bilibili, manga kambing, manga sapi ago manga
kimar iran. Tarotop a miyakasaragon a kapegoyaga niyan kiran a pangenengken a
ipepenambi iyan ko langon a pangangayamen iran.
18 Kagiya mapopos angkoto a ragon na somiyong siran peman ki Yosop na tig iran a "Di
ami reka mapegma, kadnan, a miyalengan den so pirak ami, ago miyakowa ngka pen so
manga pangangayamen ami. Da a ba rekami miyalamba a kibayad ami reka a rowar ko
manga lawas ami ago so manga lopa ami.
19 Di kami ngka baden peteodi ko kapematay ami a rakes o lopa ami! Pamasaa kami
ngka a pangenengken ago so lopa ami. Makioripen kami ko solotan, na mabaloy so lopa
ami a rek iyan. Begi kami ngka sa oniin a mapamola mi kaan kami di pematay ago di
pekarimeng so lopa ami."
20 Kagiya ka maoto na piyamasa i Yosop so langon a kalopaan sa Misir a mabaloy a rek
o solotan. Pipesa o oman i Imisiren so lopa iyan ka tanto siran a kiyaregenan sabap ko
taon. Sabap roo na miyabaloy so langon a kalopaan a rek o solotan
21 Na miyaoripen iyan pen so manga taw ko mbalabala sa inged a Misir.
22 Aya bo a da niyan mapamasa a lopa na so rek o manga imam. Kena a ba disomala a
kapesaa iran ko lopa iran, ka di siran dii ndiyakatan o solotan sa pangenengken a aya iran
ipekeoyag.
23 Na pitero i Yosop ko manga taw a "Ilaya niyo man, ka miyapamasa ko sekano den ago
so lopa iyo a rek o solotan. Katii so oniin a mapamola niyo ko lopa.
24 Ogaid na amay ka meragon kano na paliyogat a imbegay niyo so ikalimo on bagi ko
solotan, na so kelamba on a pat bagi na rek iyo a ipegoniin iyo ko lopa ago kekan iyo ago
so manga pamiliya niyo."
25 “Matamataan den a piyangoyag kami ngka!" a tig iran. "Inikalimo kami ngka, kadnan,
na makioripen kami mambo ko solotan."
26 Na mimbaal si Yosop sa taritib mipantag ko lopa sa Misir a da den maalin taman den
imanto. Aya tig iyan na so ikalima bagi ko pekeragon na rek o solotan. Aya bo a
makaliyoliyo ron a lopa a da mabaloy a rek o solotan na so lopa o manga imam.
So Kaposan a Piyangni i Yakob
27 Sa masa oto na mababaling so manga mbawataan o Israil sii ko masasakop a Gosen sa
inged a Misir. Miyakatamok siran roo ago miyanga bababad, na tanto siran a mindakel.
28 Miyakasapolo ago pito ragon a kiyapakapaginetaw i Yakob sa Misir. Miyakapagidad
sekaniyan sa magatos ago pat polo ago pito ragon.
29 Kagiya makarani den so kapetay niyan na piyakitawag iyan so wata iyan a Yosop na
pitero iyan on a "Lilipen ka a lima ngka ko didalem a bobon aken na go ngka topaan a
ikalimo ako ngka. Sepaan ka raken a di ako ngka ipelebeng sii sa Misir.
30 Kabaya aken a mirembang ako ko manga apo aken; liyon ako ngka sa Misir na sii ako
ngka lebengen ko libengan kiran."
"Ipenggolalan aken so pitero o ka," a tig i Yosop.
31 “Sepa ka raken," a tig i Yakob. Na misepa on si Yosop. Oriyan iyan na sominimba si
Israil sii ko kaolonan o igaan iyan.
MAKSOD 48
Si Manasih ago si Ipraim
Da matey na miyatero ki Yosop a "Pekesakit so ama a ka." Sabap san na piyakaonot iyan
so dowa kataw a wata iyan a manga mama a si Manasih ago si Ipraim na somiyong siran
ki Yakob.
2 Kagiya matero ki Yakob a miyakaoma on so wata iyan a Yosop na miyamagebager
sekaniyan na mimbowat sii ko igaan iyan.
3 Na pitero i Yakob ki Yosop a "So Tohan a Lebi a Mabager na mipeyag raken sii sa Los
sa inged a Kanaan ago riyakmatan ako niyan roo.
4 Pitero iyan raken a 'Mbabaden ko seka ago pakapendakelen ko so mbawataan ka taman
sa manga babaloy siran a madakel a bangsa. Na imbegay aken reka angkai a inged ko
manga moriyataw ngka a ketangan iran sa taman sa pakataman.'
5 “Imanto na so dowa a wata a ka a manga mama a inimbawata reka sii sa Misir sa da
aken pen kapakaoma reka sii na kibilang a manga wata aken. Si Ipraim ago si Manasih
na kibilang a rek aken a datar o tito aken a manga wata a si Robin ago si Simiyon.
6 Ogaid na o aden pen a ped a manga wata a ka na rek ka den oto. Kibilang siran baden a
ped ko dowa ka mbatabataa a Ipraim ago Manasih amay ka pekawali siran.
7 So saken on na isako kapelalakaw aken a sii ako makapopoon sa Misopotamiya na
miyatay so ina a ka a si Rakila ko obay aken sa inged a Kanaan isako malo kami marani
sa Iprat. Na sii aken inilebeng ko kilid a lalan a ipesong sa Iprat" (bebetowan ai imanto sa
Bitlihim).
8 Na kagiya mailay i Israil so manga wata i Yosop na tig iyan a "Antawaa siran?"
9 “Giyai so manga wata aken a mama a inibegay raken sii o Tohan," a tig i Yosop ko ama
iyan.
Tig i Israil a "Pakaobaya ngka siran raken kaan aken karakmati."
10 Miyakalobay den so manga mata i Israil sabap ko kiyalokes iyan den, na di tanto
pekanono. Mandiyadi na piyakaobay ron i Yosop so manga wata iyan na pinggagakes
ago piyangangarekan siran o ama iyan.
11 Pitero i Israil ki Yosop a "Aya katao ko ron na di aken seka den mailay, ogaid na apiya
so manga wata a ka na piyakiilay raken pen o Tohan!"
12 Mandiyadi na kinowa siran i Yosop ko bobon o ama iyan na somiyodiyod sekaniyan
ko ama iyan.
13 Na taros a piyakatindeg siran i Yosop ko obay o ama iyan; si Ipraim na sii matatampar
ko diwang a lima i Israil, na si peman si Manasih na sii matatampar ko kawanan a lima i
Israil, na piyakadaseg iyan siran on.
14 Ogaid na pitibaba i Israil a kiyapakambalawagaa niyan ko manga barokan iyan na
inidapenet iyan so kawanan a lima niyan ko olo i Ipraim apiya sekaniyan pen i ari, na giya
diwang a lima niyan na sii niyan inidapenet ko olo i Manasih apiya o sekaniyan i kaka.
15 Na taros a riyakmatan iyan si Yosop a tig iyan a
"So Tohan a piyangongonotanan o manga apo aken a Ibrahim ago Iskak;
a so Tohan a tomatagikor raken ko kapepaginetaw aken taman den imanto;
16 A so Malaikat a siyabet ako niyan ko langon a pekabinasa raken, na karakmatan iyan
angkai a manga wata!
Mabaloy siran a kibantog ko ngaran aken ago so ngaran o manga apo aken a Ibrahim ago
Iskak,
ago tanto a makandakedakel so kebabadan kiran sii ko doniya!"
17 Kagiya mailay i Yosop a idadapenet o ama iyan a kawanan a lima niyan ko olo i
Ipraim na da niyan kasoaten; na kiyapetan iyan a kawanan a lima o ama iyan ka kowaan
iyan ko olo i Ipraim na go sii niyan ipagogalin ko olo i Manasih.
18 Pitero iyan ko ama iyan a "Kena a ba giyanan, ama ko. Giyai i kaka; ron ka dapeneten
a kawanan a lima ngka ko olo niyan."
19 Ogaid na somiyangka so ama iyan a tig iyan a "Katawan aken, wata aken, katawan
aken. Pembaloy mambo si Manasih a mala a bangsa, ogaid na pembaloy so ari niyan a
mala a di sekaniyan, na pendakedakel a tanto so kebabadan on a lagid o manga nasiyon."
20 Na riyakmatan siran i Yakob sangkoto a gawii a tig iyan a "Imbeto o manga Israil so
manga ngaran iyo ko kaperarakmat iran sa datar ai: 'Mabaloy kano o Tohan a datar o
Ipraim ago so Manasih.' " Sii sangkai a okit na piyakaona niyan si Ipraim ki Manasih.
21 Oriyan iyan na pitero i Israil ki Yosop a "Magaan ako matay, ogaid na kelalayon reka
so Tohan ago ikesoy ka niyan pen ko inged o manga apoapoan ka.
22 Na pelawanen aken sa sabagi ko lopa on so imbegay aken reka a di so imbegay aken
ko manga pagari ngka, a giya Sikim a so sabagi ko inged a miyaagaw aken a pedang ago
pana ko manga Amoriyo."
MAKSOD 49
Pirarakmatan i Yakob so manga Wata iyan
Samaoto na piyakitawag i Yakob so manga wata iyan a mama na pitero iyan kiran a
"Lilibeta ko niyo ka peteroon ko rekano o antonaa i keolaola niyo ko pekatalingoma a
manga gawii.
2 “Timo kano na pamakineg kano a manga wata i Yakob;
pamakinega niyo so ama iyo a Israil.
3 “Robin, a kaka a wata aken;
seka i kakayaan aken ago aya paganay a inionga o bager aken;
lebi ka a ipoporo ago lebi a mala i gees.
4 Ogaid na sabap sa lagid ka o bagiyaw a di ka keren na di ka den keona,
ka somiyong ka ko igaan o ama a ka na piseboan ka oto;
rimbang ka so sandil aken!5
"Si Simiyon ago si Libi na aya magari;
pinggomaan iran so manga pedang iran ko kapanganiyaya.
6 Di ako den sembong ko di iran dii kapagopakat;
ago di ako den pengeped ko di iran dii katimo,
ka kagiya miyamono siran sa manga taw ko kiyararangiti kiran,
ago pilelepo iran so manga sapi sa kabaya iran a ginawa.
7 Kanarakaan so gani iran ka piyakalekelek,
ago so rarangit iran, ka da a kapedi iyan!
Iperak aken siran ko inged o manga Israil,
ka pakapemagawataan aken siran sii ko manga mbawataan o Yakob.
8 “Seka, Yodah, na podin ka o manga pagari ngka;
kakapetan ka sa lig so manga ridoay ngka;
na sodiyod reka so manga wata o ama a ka.
9 Mangoda ka a arimaw, hey Yodah;
inawaan ka so miyapatay ngka, na komiyasoy ka bo, wata aken, ko pelekowan ka.
Lagid o arimaw na miniga sekaniyan a gomegepe,
na da a ba on pekaraw romingasa.
10 So sangkad o kasosolotani na di den kowaan ki Yodah,
o di na so tongkas o kadadatoi sii ko pageletan o ai niyan
taman sa kapakaoma o kirek on;
na sekaniyan i pengongonotanan o manga taw.
11 Ipagiket iyan so kimar iyan ko waged a obas,
ago so nati o kimar iyan sii ko lebi a mapiya a waged.
Pipian iyan so nditaren iyan ko arak,
ago so manga kimon iyan sii ko rogo a obas.
12 Maitem so mata niyan a di so arak,
na mapoti so ngipen iyan a di so gatas.
13 “Pekabaling si Sibolon ko kilid a ragat,
na pembaloy a pendansalan o manga kapal;
pekaolad so kapegingedan iyan taman sa Sidon.
14 “Si Isakar na mabager a kimar
a pegiga ko pageletan o isisiya on a potal.
15 Amay ka mailay niyan so kapiya o dedekean iyan
ago so kadaya o lopa iyan na melengkong, ka isenggolay ron so awid,
ka kagiya tegelen nggalebek a datar o oripen.
16 “Pengokomen i Dan so ped iyan a manga taw
a isa siran ko mbatabataa o manga Israil.
17 Pembaloy si Dan a nipay ko kilid a lalan;
a so mala i bisa a nipay ko lalan,
ka petokaan iyan so palo o koda
na aya ikelayang o kokoda on.
18 “Ya Allah, penayaon ko so kapenabet ka.
19 “Si Gad na nggobaten o sagorompong a manga pangangayan,
ogaid na magato sekaniyan na selobaan iyan siran.
20 “So lopa i Asir na kepakayan,
na makapetiyagar sekaniyan sa pangenengken a mapapatot ko solotan.
21 “Si Naptali na babay a saladeng a bobotawanan,
a dii mbabawata sa manga pipiya i paras a nati.
22 “Si Yosop na maila a koda sii ko obay o bowalan;
aya den maila a koda sii ko silid a bobongan.
23 Masarangit a kiyaanopa on o manga pepemana;
piyana iran sekaniyan na riyasay iran.
24 Ogaid na mabetad so pana niyan
a makababager so manga barokan iyan
a nggolalan ko kabatowa o Mala i Gees a Tohan i Yakob,
a nggolalan ko Pananagikor sa Bilibili, a so Ator a pelinding ko Israil,
25 A nggolalan pen ko Tohan o ama a ka a pepanabang reka.
Sekaniyan so Lebi a Mabager a aya iperakmat iyan reka
na so manga rakmat a poon sa langit,
ago manga rakmat a poon sa didalem a lopa,
ago so iperarakmat a manga wata ago manga pangangayamen.
26 So iniperarakmat reka o ama a ka na mala
a di so kapiyaan o da a kaposan iyan a manga palaw,
ago kemboway a di so andang a manga bobongan.
Makatana ini langon ko olo i Yosop,
sii ko poro o olo niyan a sekaniyan i miyaaraw ko manga pagari niyan.
27 “Si Baniyamin na maila a aso a pepengekeb;
peken iyan sa kapipita so miyapatay niyan,
na sii ko kaperimon iyan na di niyan dii mbagibagiin so miyaagaw niyan."
28 Giyanan den so sapolo ago dowa ka mbatabataa o Israil, ago giyanan i pitero kiran o
ama iran isako perarakmatan iyan siran; na pipetot iyan ko oman i isa kiran so
iniperarakmat iyan on.
So Kiyapatay i Yakob
29 Oriyan iyan na ininsaratan iyan siran a tig iyan a "Magaan ako den mitapi ko manga
apo aken; sii ako niyo lebengen ko manga apo aken sii ko liyang a matatago ko lopa i
Ipron a Hitiyo.
30 Giyanan so liyang roo sa Makpila a marani sa Mamri sa inged a Kanaan. Miyapamasa
oto i Ibrahim a pelebengan a poon ki Ipron a rakes o lopa on.
31 Roo minilebeng si Ibrahim ago so karoma niyan a si Sarah; roo minilebeng si Iskak
ago so karoma niyan a si Ribikah, na roo aken pen inilebeng si Liyah.
32 So lopa ago so liyang a matatago on na sii miyapamasa ko manga Hitiyo."
33 Kagiya mapasad minsarat i Yakob so manga wata iyan na miniga peroman ko igaan na
giyoto a miyatay sekaniyan ago minitapi den ko manga apo iyan.
MAKSOD 50
Na giyakes i Yosop so ama iyan a penggoraok ago di niyan pen dii pangangarekan.
2 Oriyan iyan na piyandoan i Yosop so manga pamomolong a talasogoay niyan a
balsamaren iran so ama iyan. Na biyalsamar iran si Israil
3 A aya ininggalebek iran on na miyakapat polo gawii ka giyanan i kapembalsamara ko
miyatay. Na miyakapito polo gawii a kiyandiyagai ron o manga Imisiren.
4 Kagiya mapopos so kiyandiyagai ron na pitero i Yosop ko manga sanasanaan o solotan
a "O kelimoon ako niyo na teroa niyo ko solotan angkai a pakipetero aken rekano:
5'Kagiya magaan den matay so ama aken na piyakasepa ako niyan sa ipelebeng aken
sekaniyan ko kobor a miyatiyagar iyan den sa inged a Kanaan. Kagiya ka maoto na
kapedipedi ka bo na pakasonga ko ngka roo kaan aken on milebeng so ama aken.
Mapasad oto na kesoy ako bo.' "
6 Na pitero o solotan a "Ika roo den na go ngka lebengen so ama a ka, ka giyanan i
piyakisepa iyan reka."
7 Mandiyadi na gomiyanat si Yosop sa kipelebengen iyan ko ama iyan. Na
miyamangonot on so langon a sanasanaan o solotan ago so manga mosawira iyan ago so
langon a mangaala i bangensa sa inged a Misir
8 A rakes o pamiliya i Yosop, ago so manga pagari niyan ago so manga ped ko pamiliya o
ama iyan. Aya bo a inibegak iran sa Gosen na so bo so manga wata iran ago so manga
talon iran a manga bilibili, kambing ago sapi.
9 Aden pen a domiyaramba on a manga komokoda ago mageeda sa manga karo; tanto oto
a madakel a taw a miyamangonot on.
10 Kagiya makaoma siran ko darpa a pegegikan sa trigo sii sa Atad a marani sa lawasaig
a Yordan na sayana siran a miyamakamboko, na mindidiyagaw siran sa matanog. Na
miyakapito gawii a kiyapakindiyagai i Yosop ko ama iyan roo.
11 Kagiya mailay o manga Ikanaanen a magiinged roo so di iran dii kandiyaga sii ko
pegegikan sa Atad na pitero iyan a "Tanto a mala angkanan a dii kandiyaga o manga
Imisiren!" Giyanan i kiyabetowi sangkoto a darpa a marani sa Yordan sa 'Abil Misraim.'
12 Na ininggolalan o manga wata i Yakob so initenan iyan kiran,
13 Ka inowit iran sekaniyan sa inged a Kanaan na inilebeng iran ko liyang sii sa Makpila
a marani sa Mamri. Miyapamasa oto o Ibrahim a pelebengan a sii poon ki Ipron a Hitiyo
a rakes on pen so lopa on.
14 Kagiya mapasad iyan lomebeng so ama iyan na komiyasoy sa Misir si Yosop ago so
manga pagari niyan ago so pen so langon a domiyaramba on lomebeng ko ama iyan.
Piyakasarig i Yosop so manga Pagari niyan
15 Oriyan o kiyapatay o ama iran na pitero o manga pagari i Yosop a "O ino o aden pen a
ratem rektano i Yosop na go tano niyan saopi ko langon a marata a miyanggolaola tano
ron?"
16 Kagiya ka maoto na piyakitero iran ki Yosop a "Sa da pen kapatay o ama a ka na
ininsaratan kami niyan
17 Sa peteroon ami reka a 'Kapedipedi ka bo na rilaan ka ko manga pagari ngka so
miyasela iran ago miyandosa, ka marata a inikidia iran reka.' Na, kapedipedi ka bo na
rilai ngka imanto so sala ami a manga oripen o Tohan o ama a ka." Na kagiya
mitalingoma ki Yosop angkai a katero na miyakasegad sekaniyan.
18 Na somiyong on so manga pagari niyan na gomipe siran ko hadapan iyan a tig iran a
"Sisii kami a manga oripen ka!"
19 Ogaid na pitero kiran i Yosop a "Di kano pekelek. Ba saken so Tohan?
20 Miyapamikir iyo a kapemaratai niyo raken, ogaid na pikodarat o Tohan a mapiya so
keondasan iyan a aya kiyaoyaga ko madakel a taw a pepeginetaw imanto a gawii sabap ko
miyanggolaola.
21 Kagiya ka maoto na di kano pekelek. Pageperen ko sekano ago so manga wata iyo."
Na piyakasarig iyan siran ko di niyan kiran on dii kateroa ko inikapiya a ginawa iran.
So Kiyapatay i Yosop
22 Na mababaling den si Yosop sa Misir ago so langon o pamiliya o ama iyan.
Miyakapagidad sekaniyan sa magatos ago sapolo ragon
23 Taman ko kiyailaya niyan ko manga wata ago so manga apo i Ipraim. So pen so
manga wata i Makir a wata a mama i Manasih na miyanga aaben i Yosop ko
kinimbabawataan kiran.
24 Sa masa oto na pitero i Yosop ko manga Israil a "Magaan ako den matay, ogaid na
matamataan a tegikoren kano o Tohan, ka pekaliyon kano niyan sangkai a inged ago
pagowiten kano niyan ko inged a minisepa iyan a imbegay niyan ko Ibrahim, Iskak ago si
Yakob."
25 Na piyakasepa i Yosop so manga Israil a tig iyan a "Sepaan iyo raken a amay ka
pagowiten kano o Tohan sangkoto a inged na itelon iyo so bangkay aken."
26 Na miyatay si Yosop a miyakamagatos ago sapolo ragon a idad iyan. Biyalsamar iran
so bangkay niyan na tiyago iran ko kaban roo sa Misir.
IKSODOS
IKSODOS 1
Pirarasay so manga Mbawataan o Israil
Giyai i manga ngaran o manga wata i Yakob a manga mama a ped iyan a somiyong sa
Misir, na so oman i isa kiran na miyonot on so pamiliya niyan:
2 Siki Robin, Simiyon, Libi, Yodah,
3 Isakar, Sibolon, Baniyamin,
4 Dan, Naptali, Gad ago si Asir.
5 Pito polo langon angkoto a manga mbawataan i Yakob. Samaoto na ndodoo den si
Yosop sa Misir.
6 Kagiya den a matey na miyatay si Yosop ago so langon o manga pagari niyan taman ko
langon a rese iran;
7 Ogaid na miyanga bababad so manga Israil, na tanto siran a mindakel ago miyakabager
taman sa miyabembar siran ko dalem a inged.
8 Sangkoto a manga gawii na miyakandato so bago a solotan sa Misir a da a katawi niyan
ko makapantag ki Yosop.
9 Na pitero iyan ko manga pagtaw niyan a "Ilaya niyo ka miyabaloy angkai a manga Israil
a tanto a madakel ago mabager
sii rektano.
10 Disomala a mamikir tano sa okit a karena tano ko kapepekadakel iran, ka o aden a
makipetidawa rektano na baanda iran pagampili so manga ridaoy tano kaan tano iran
mitidawa ago makaawa siran sangkai a inged."
11 Kagiya ka maoto na piyakisangan siran o manga Imisiren ko manga pamemeges a
merasay kiran ko maregen a galebek; na piyakibangon iran ko manga Israil so manga siti
a Pitom ago giya Ramesis a aya peteliyongan sa kakawasaan o solotan.
12 Ogaid na saden sa kala a kaperasaya kiran o manga Imisiren na kala mambo a
kapepekadakel ago kapekebembar iran taman sa miyapangandam siran o manga Imisiren.
13 Kagiya ka maoto na piyangongoripen iran so manga Israil sa da a ba on kapedi.
14 Piyakapait iran so kapepaginetaw o manga Israil ko tanto a maregen a galebek a
kapamangembaal sa manga bata a ipembalay iran, ago so langon a pitibarangan a galebek
ko dii mbabasokan. Na sii ko langon a masopiit a piyakinggalebek kiran o manga
Imisiren na da iran siran den kapediin.
15 Na miyakimbitiyarai so solotan sa Misir ko dowa kataw a babay a manga panday o
manga Hibriyo a aya manga ngaran iran na si Siprah ago si Powah.
16 Tig iyan kiran a "Igira a petebangan iyo so manga Hibriyo a babay ko kapembawata
iran na o mailay niyo a mama a ipembawata iyan na bonoa niyo; na o babay na oyaga
niyo."
17 Ogaid na maaleken ko Tohan so manga panday na da iran nggolalanen so pitero kiran
o solotan sa Misir, ka piyakapaginetaw iran baden so manga wata a mama.
18 Mandiyadi na piyakisogoan o solotan so manga panday na iniise iyan kiran a tig iyan a
"Ino niyo ai penggolaolaa? Ino niyo da pamonoa so manga wata a mama?"
19 Somimbag siran a "So manga Hibriyo a babay na kena a ba datar o manga Imisiren a
babay, ka manga papasang siran i kambawata, ka da ami siran pen maoma na di siran den
dii makambawata."
20-21 Na sabap sa maaleken ko Tohan so manga panday na biyalasan iyan siran sa
mapiya, ka bigan iyan siran sa manga moriyataw. Na mindakel pen so manga Israil ago
tanto siran a miyakabager.
22 Kagiya ka maoto na bigan o solotan sa sogoan so langon o manga pagtaw niyan a tig
iyan kiran a "Kowaa niyo so oman i wata a mama a gopen inimbawata o manga Hibriyo
na pangitogen iyo ko lawasaig a Nail; ogaid na pakapaginetawa niyo baden so manga
babay ron."
IKSODOS 2
Kinimbawataan ki Mosa
Sangkoto a manga gawii na so sakataw a mama ko mbatabataa a Libi na miyangaroma sa
babay a ped pen mambo ko moriyataw i Libi;
2 Na miyaogat sekaniyan na mimbawata sa mama. Kagiya mailay niyan a mataid a wata
na initapok iyan ko miyakatelo olan. So
3 Ogaid na kagiya di niyan den mapegna na kominowa sekaniyan sa reban a balagen na
siyalapot iyan a lita kaan di peletosi a ig. Kagiya mapasad oto na piyakaiga iyan on so
maito a wata na tiyago iyan sii ko manga otan ko kilid o lawasaig.
4 So peman so babay angkai a wata na tomitindeg ko malo on maawat, ka pagilain iyan o
antonaa i keolaola niyan.
5 Samaoto na so wata a babay o solotan sa Misir na tomiyondagay ko lawasaig ka
pepaigo on, na so peman so manga raga niyan na dii ndadalakaw ko kilid o lawasaig.
Sarta a miyainengka iyan so reban sii ko manga otan na piyakikowa niyan ko talasogoay
niyan a babay.
6 Kagiya kalekaan iyan na miyailay niyan so maito a wata a sarta a gomiyoraok. Na
inikapedi iyan a tig iyan a "Isa ini ko manga wata a Hibriyo!"
7 Mandiyadi na miyakarani ron so babay o maito a wata na inisean iyan so wata o solotan
a tig iyan a "Ba ko seka kowaan sa Hibriyo a babay a maritan iyan reka so wata?"
8 “Oway, ika roo den," a inisembag o wata o solotan. Na lomiyalakaw so raga na
piyakaonot iyan so ina o maito a wata.
9 Pitero on o wata o solotan a "Kowaa ngka angkai a maito a wata na go ngka raken
ritana, ka tendanan ko seka." Mandiyadi na kinowa niyan so wata na pepekasoson iyan.
10 Kagiya den a makala so wata na inowit o ina iyan ko wata o solotan na miyabaloy a
wata iyan. Na bitowan iyan sa Mosa ka aya pitero iyan na "Kinowa ko sekaniyan ko ig."
Miyagapas si Mosa sa Midiyan
11 Miyakaisa a gawii kagiya kesad den a mangoda si Mosa na mindadalakaw sekaniyan
ka imbentel iyan so manga royod iyan a Hibriyo. Na pimbantayan iyan siran a dii
pakanggalebeken sa manga reregen a galebek. Miyailay niyan so sakataw a Imisiren a
peperanegen iyan so isa a Hibriyo a royod i Mosa.
12 Mandiyadi na miyaningidingil si Mosa, na kagiya mailay niyan a da a ba on pepekailay
na biyono iyan so Imisiren na initapok iyan so lawas iyan ko peted.
13 Sii ko miyakatalondog a gawii na mindadalakaw peman na miyailay niyan so dowa
kataw a Hibriyo a dii mbono. Inisean iyan so sakataw ron a miyamaba a tig iyan a "Ino
ngka dii peranega so royod ka a Hibriyo?"
14 Na tig o mama a "Antawaa i tomiyoro reka a olowan ami ago pepangokom rekami?
Ba ngka mapipikir a kambonoa ngka raken a lagid o kiyabonoa ngka ko Imisiren?" So
kiyanega sii i Mosa na miyalek, na minigedi sa pamikiran iyan a "Kiyatokawan bes so
pinggolaola ko!"
15 Kagiya maneg o solotan so makapantag sii na piyanamaran iyan a kapakibonoon iyan
ki Mosa. Ogaid na piyalagoyan i Mosa so solotan na miyagapas sa inged a Midiyan ka
mbeling roo pasin; na miyontod sekaniyan roo ko obay a paridi.
16 Samaoto na aden a imam sa Midiyan a pito kataw i wata a manga babay, na
miyakaoma siran ko paridi ka segeb siran on ago penoon iran a ig so pepemanginoman o
manga bilibili o ama iran.
17 Na miyakaoma mambo so ped a manga pananagikor sa bilibili na biyogaw iran so
manga raga, ogaid na tominikeras si Mosa na piyanabangan iyan siran, na piyamakainom
iyan pen so
manga bilibili iran.
18 Kagiya makabaling so manga raga ko ama iran a si Hitro na inisean iyan siran a tig
iyan a "Ino pekagaan a kiyapakabaling iyo imanto?"
19 Tig iran a "Aden a Imisiren a miyanindeg rekami ko kapemaratai rekami o ped a
manga pananagikor. Liyo ron pen na inipanageb kami niyan na go piyamakainom iyan so
pangangayamen ami."
20 “Anda sekaniyan?" a tig iyan ko manga wata iyan a babay. "Ino niyo mbegaken?
Songowi niyo na go niyo boyoa koman."
21 Na miyapamikir i Mosa a komaden ki Hitro, na piyakipangaroma niyan ki Mosa so
wata iyan a si Siporah.
22 Mimbawata si Siporah sa wata a mama na bitowan i Mosa sa Girsom, ka pitero iyan a
"Rait ako sangkai a inged."
23 Kagiya matey den na miyatay so solotan sa Misir, ogaid na so manga Israil na di iran
pen dii miperego so kapepengongoripena kiran. Miyakagoraok siran sa tabang na
minisampay ko Tohan so kiyapakagoraok iran.
24 Miyaneg o Tohan so di iran dii kaperego na kiyatanodan iyan so kapasadan iyan
mipantag ko Ibrahim, Iskak ago Yakob.
25 Miyailay o Tohan so manga Israil na tiyago iyan siran sa ginawa niyan.
IKSODOS 3
So Mosa ago so Pekedeg a Maito a Kayo
Miyakaisa a gawii a petegikoren i Mosa so manga pangangayamen i Hitro a panogangan
iyan a mama a imam sa Midiyan na inagak iyan so talon taman sa sabala o disirto.
Miyakaoma sekaniyan sa Sinay a so palaw o Tohan.
2 Na mipeyag rekaniyan roo so Malaikat o Allah sii ko pekedeg a apoy a madadalem ko
maito a kayo. Miyailay i Mosa a apiya pen pekedeg so kayo na kena a ba ini peketotong.
3 Na minigedi sa pamikiran iyan a "Mobay ako ron kaan aken mapagamasamas angkai a
sabelek a pangingilain o ino di ketotong so kayo."
4 Kagiya mailay o Allah a pepekarani ron si Mosa sa kapagilaya niyan on piyapiya na
tiyalowan o Tohan a poon ko look o kayo a tig iyan a "Mosa! Mosa!"
Tig i Mosa a "Katii ako bo."
5 “Di ka sii ndaseg," a tig o Tohan. "Pokasa ngka on so tinilas ka, ka so katitindegan ka
na soti a lopa."
6 Tig iyan pen a "Saken so Tohan o manga apo o ka, a so Tohan o Ibrahim, Iskak ago
Yakob." So kiyanega on i Mosa na inidalong iyan a paras iyan ka ipekelek iyan milay so
Tohan.
7 Na pitero on o Allah a "Miyailay aken den so kaperasaya ko manga taw aken roo sa
Misir. Miyaneg aken so kapenggoraok iran sabap ko kapepengongoripena kiran o
pepemeges kiran. Katawan aken so kararata a ginawa iran.
8 Kagiya ka maoto na miyanog ako ka sebeten ko siran ko lima o manga Imisiren;
pekaliyon ko siran sangkoto a inged, ka pagowiten ko ko mapiya ago maolad a lopa a
pekepakayan ago oodaren, a so pagiingedan o manga Kanaaniyo, manga Hitiyo, manga
Amoriyo, manga Pirisiyo, manga Hibiyo ago manga Hibosiyo.
9 Matamataan a minisampay raken so kapenggoraok o manga Israil, na miyailay aken pen
so kapesonsinga kiran o manga Imisiren.
10 Na, lalakaw ka imanto, ka sogoon ko seka ko Piraon kaan ka mapakaliyo sa Misir so
manga pagtaw aken a manga mbawataan o Israil."
11 Ogaid na pitero i Mosa ko Tohan a "Antawaa ko a patot a song ko Piraon ago pekaliyo
ko langon o manga Israil roo sa Misir?"
12 Tig o Tohan a "Keped ako reka, na aya kinanao reka a saken i somiyogo reka na amay
ka mapakaliyo ngka so manga taw roo sa Misir na simbaan ako niyo sii sangkai a palaw."
13 Na pitero i Mosa ko Tohan a "Amay ka somong ako ko manga Israil sa kapeteroa ko
kiran a 'So Tohan o manga apo iyo i somiyogo raken sii rekano,' na aya ipagise iran raken
na 'Antawaa i Ingaran iyan?' Na antonaa i isembag aken kiran?"
14 Pitero o Tohan ki Mosa a "Saken na Saken den. Na giyai i peteroon ka kiran:
'Sekaniyan a bebetowan sa "Saken den" na aya raken somiyogo sii rekano.' "
15 Tig pen o Tohan ki Mosa a "Teroa ngka ko manga Israil a 'So Allah a Tohan o manga
apo iyo, a so Tohan o Ibrahim, Iskak ago Yakob i somiyogo raken sii rekano.' Giyanan i
Ingaran aken sa taman sa pakataman a ipepenanadem raken taman ko
kapepemagapidapidi ko manga taw.
16 “Na, lalakaw ka den na go ngka limoda so manga pelokelokesen o manga Israil, na
teroa ngka kiran a so Allah a Tohan o manga apo iran, a Tohan o Ibrahim, Iskak ago
Yakob na mipeyag reka. Teroa niyo kiran a matamataan a miyatago aken siran sa ginawa
ago miyailay aken so ipekidia kiran sii sa Misir.
17 Na miyapamikir aken a pekaawaan ko siran ko kaperasaya kiran sii sa Misir, ka
pagowiten ko siran ko pekepakayan ago oodaren a lopa a pagiingedan o manga
Kanaaniyo, manga Hitiyo, manga Amoriyo, manga Pirisiyo, manga Hibiyo ago manga
Hibosiyo.
18 “Pekinegen o manga taw aken so peteroon ka kiran. Na song kano ago so manga
pelokelokesen o manga Israil ko solotan sa Misir na go niyo ron teroa a 'So Allah a Tohan
o manga Hibriyo na miyakindarpai rekami. Na pengnin ami reka a pakalalakaon kami
ngka sa makatelo gawii ko disirto kaan kami makakorban ko Allah a Tohan ami.'
19 Ogaid na katawan aken a di kano pekalalakaon o solotan taman sa di sekaniyan tanto a
mategel.
20 Kagiya ka maoto na ipenggolalan aken so kabarakat aken, ka siksaan ko so manga
Imisiren ko langon a piyakalekelek a itena aken kiran. Maipos oto na pekalalakaon kano
niyan den.
21 “Mbelowin ko so manga Imisiren a ipengalimo kano iran kaan amay ka mawa kano na
aden a mipetelon iyo.
22 So oman i babay rekano na pangniya niyan ko manga Imisiren a manga siringan iyan o
di na so babay a mababaling ko walay niyan a kapamegi ran rekano sa manga ipamemetad
a pirak ago bolawan, ago manga nditaren a pakipenditar iyo ko manga wata iyo a manga
mama ago babay. Sangkai a okit na kekowa niyo so manga tamok o manga Imisiren."
IKSODOS 4
So manga Poriba a Inibegay ki Mosa
Somimbag si Mosa a "Opama ka di ako iran paratiyayaa o di na pakinegen? Ka o ba iran
baden teroa a 'Da reka peyag so Allah!' "
2 Na pitero rekaniyan o Allah a "Antonaa angkanan a kakapetan ka?"
"Teken," a inisembag iyan.
3 Tig o Allah a "Itogen ka ko lopa."
Iniitog i Mosa ko lopa na miyabaloy oto a nipay, na piyalagoyan i Mosa.
4 Mandiyadi na pitero on o Allah a "Porota ngka na sii ngka kapeti sa ikog." Na piyorot
iyan, na sarta a miniasal sa teken sii sa lima niyan.
5 “Nggolaolaa ngka ini," a tig o Allah, "kaan maparatiyaya o manga Israil a miyakapeyag
reka den so Allah a Tohan o manga apo iran, a so Tohan o Ibrahim, Iskak ago Yakob."
6 Na pitero on pen o Allah a "Lilipen ka a lima ngka ko bangkala a ka." Mandiyadi na
inililip i Mosa a lima niyan ko bangkala iyan, na kagiya iliyo niyan na kiyakokosan a
bowa a mapoti a datar o giyaw.
7 “Na lilipen ka peroman ko bangkala a ka," a tig o Allah. Miyanggolaola ini i Mosa, na
so kiniliyon iyan on na miniasal bo, ka lagid o lawas iyan.
8 Tig o Allah a "O di ka iran paratiyayaa o di na di iran masagipa so paganay a
pakamemesa a poriba na baanda iran paratiyayaa so ikadowa.
9 Ogaid na o di iran paratiyayaa angkai a dowa a poriba o di na di iran pakinegen so
peteroon ka na kowa ka ko ig sa Lawasaig a Nail na ododa ngka ko mamara a lopa, na so
ig a kinowa ngka ko lawasaig na kebaloy a rogo sii ko lopa."
10 Ogaid na tig i Mosa ko Allah a "Hey Kadnan, kena a ba ako mapasang i katero apiya
gowani taman sangkai a kinimbitiyarain ka raken a oripen ka, ka malombat ako i katero
ago di tanto pekakorop."
11 Pitero on o Allah a "Antawaa i mimbaal sa ngari o manosiya? Antawaa i pekabaloy
ron a bengel o di na pengaw, ago pepekailay o di na bota? Ba di saken a so Allah?
12 Na, lalakaw ka den ka tebangan ko seka sa kapakatero o ka na ipaginsarat aken reka
pen o antonaa i mapetero o ka."
13 Ogaid na tig i Mosa a "Hey kadnan, kapedipedi ka bo na salakaw baden a sogoa ngka a
penggolaola sii."
14 Na tanto a kiyararangitan o Allah si Mosa, na tig iyan a "Antonaa bes so pagari ngka a
si Aron a so Libitiyo? Katawan aken a makapetero sekaniyan piyapiya. Liyo ron pen na
pepekaoma den sii imanto ka mbelaken ka
niyan, na amay ka mailay ka niyan na kebabaya sekaniyan.
15 Makipembitiyarai ka on ago mapetero o ka on o antonaa i peteroon iyan. Palaya aken
sekano den tebangan sa kapakatero iyo, na ipaginsarat aken rekano pen o antonaa i
mapenggolaola niyo.
16 Ipetero ka niyan ko manga taw ka kebaloy sekaniyan a aya ngka ngari, na kebaloy ka
sii rekaniyan a lagid o tohan ko di ngka on dii kapakateroa.
17 Na, awidi ngka angkanan a teken a mipenggolaola ngka ko pakamemesa a manga
nanao."
Komiyasoy si Mosa sa Misir
18 Mandiyadi na komiyasoy si Mosa ko panogangan iyan a Hitro na pitero iyan on a
"Kapedipedi ka bo na pakakasoya ko ngka ko manga tonganay aken a ndodoo sa Misir
kaan aken maamad o ba aden pen a oyagoyag kiran."
Tig i Hitro a "Lalakaw ka den sa da a rayorayo a ginawa."
19 Samaoto a kasisii pen i Mosa sa Midiyan na miyatero on o Allah a "Kasoy ka sa Misir
ka so langon a manga mama a kebaya reka mono na palaya den miyamatay."
20 Kagiya ka maoto na kinowa i Mosa so karoma niyan ago so manga wata iyan a manga
mama na piyamakakoda iyan siran sa kimar; na gomiyanat siran ka kesoy siran sa Misir.
Na aawidan pen i Mosa so teken a piyakambarakat o Tohan.
21 Na pitero o Allah ki Mosa a "Amay ka makaoma ka roo sa Misir na o ba ngka di
manggolaola ko hadapan o Piraon so langon a pakamemesa a inibegay aken reka a kapaar
sa kinggolalanen ka on. Ogaid na pakapetegasen ko so olo niyan, na di niyan
pekalalakaon so manga taw.
22 Amay ka magiyoto na teroa ngka ko Piraon a 'Giyai i pitero o Allah: So Israil na kaka
a wata aken a mama,
23 Na miyatero aken reka a pakalalakawa ngka so wata aken kaan ako niyan masimba.
Ogaid na minda ka o ba ngka pakalalakawa. Kagiya ka maoto na mbonoon ko so kaka a
wata a ka a mama.' " Ogaid na da ngka on peroa
24 Sii ko pendekean a darpa ko lalan a ipesong sa Misir na biyalak o Allah si Mosa ka ba
niyan den kowai sa niyawa.
25 Ogaid na kominowa si Siporah sa magarang a ator na inabis iyan so kobal ko poro o
sangoran o wata iyan na iniseko iyan oto ko ai i Mosa a tig iyan a "Matamataan a seka na
rogo a miyakapangaroma raken!"
26(So kiyateroa niyan sii na inipangilat iyan ai ko kiyatori.) Kagiya ka maoto na da
tarosen o Allah so kakowai niyan sa niyawa ki Mosa.
27 Si peman si Aron na miyatero on o Allah a "Lalakaw ka na balaka ngka si Mosa sii ko
disirto." Na lomiyalakaw sekaniyan na biyalak iyan si Mosa sii ko palaw o Tohan, na
inarekan iyan sekaniyan.
28 Giyoto a piyanotol i Mosa ki Aron so langon taman a iniinsarat on o Allah ko
kapekakasoya niyan on sa Misir ago so makapantag mambo ko langon a pakamemesa a
poriba a inisogo iyan on.
29 Na somiyong si Mosa ago si Aron sa Misir na linimod iran so langon o manga
pelokelokesen o manga Israil.
30 Piyanotol kiran i Aron so langon taman a iniinsarat o Allah ki Mosa. Mandiyadi na
pinggolaola den mambo i Mosa so pakamemesa a manga poriba sii ko kamamasaan o
manga taw
31 Na miyaratiyaya siran. Kagiya maneg iran a miyatago siran o Allah sa ginawa ago
miyailay niyan pen so kararasay iran na somiyodiyod siran ago miyamanimba.
IKSODOS 5
Kapangembaal sa manga Bata a da a ba Ipembegay a Ragami
Oriyan oto na somiyong si Mosa ago si Aron ko Piraon na pitero iran on a "Giyai i pitero
o Allah a Tohan o Israil: Pakalalakawa ngka so manga pagtaw aken kaan ako iran
maselasela sii ko disirto."
2 Ogaid na pitero o Piraon a "Antawaa so Allah a disomala a pakinegen ko so katero iyan
sa kapakalalakawa ko ko Israil? Di aken katawan i Allah ago di aken pen pekalalakaon
so Israil."
3 Tig i Mosa ago si Aron a "So Tohan o manga Hibriyo na miyakindarpai rekami. Na
pengnin ami reka a pakalalakaon kami ngka ko disirto sa makatelo gawii kaan kami
makakorban ko Allah a Tohan ami, ka o di ami ini nggolaolaa na siksaan kami niyan a
paniyakit o di na katidawa."
4 Ogaid na pitero kiran o solotan sa Misir a "Hey Mosa ago Aron, ino niyo pekipalagowi
ko manga taw so galebek iran? Kasoy kano ko manga galebek iyo!"
5 Tig iyan pen a "Ilaya niyo man, ka miyakadakedakel kano imanto sangkai a inged, na
pekageneken iyo siran bes nggagalebek!"
6 Na sii den sangkoto a gawii na inisogo o Piraon ko manga Imisiren a pepemeges ko
manga oripen ago so kikakapatas kiran a manga Israil a tig iyan a
7 “Di niyo den pemamegi so manga taw sa manga ragami a keosar iran ko di iran dii
kapangembaal sa manga bata. Siran den i makapemagenebeneb manimo sa ragami a
keosar iran.
8 Ogaid na papaliyogaten iyo kiran den so kadakel o manga bata a pekepasad iran
gowani; di niyo kiran pekikorangi. Manga tapolan siran na giyanan i kipenggoraoken iran
sa 'Pakalalakawa kami ngka kaan kami makakorban ko Tohan ami.'
9 Pakaregeni niyo baden so galebek angkoto a manga mama kaan siran di pekadeke
nggalebek ago di iran den mapesagipa so manga kabokegan."
10 Mandiyadi na so manga Imisiren a pamemeges ago so manga kapatas a manga Israil na
somiyong siran ko manga taw a manga Israil na pitero iran kiran a "Giyai i pitero o
Piraon: 'Di aken sekano den mbegan sa ragami.
11 Sekano den i makapemagenebeneb mangowa sa pekeosar iyo a ragami sa apiya anda
niyo ketoon, ogaid na di den kelebatan so kadakel o manga bata a ipapaliyogat rekano.' "
12 Kagiya ka maoto na miniparak so manga Israil ko dalem a inged a Misir sa kapenimo
iran sa manga paotanotan a kisambi iran ko ragami.
13 Na lolopiten siran o manga pepemeges kiran a tig iran a "Tarotopi niyo so manga
galebek a ipapaliyogat rekano oman gawii a datar isako aden pen a manga ragami niyo."
14 Liyo ron pen na so manga Imisiren a pamemeges na piyamadasan iran so manga Israil
a piyamakakekapatas iran ko galebek, na iniise iran kiran a "Ino niyo da katarotopi kagai
ago imanto so ipapaliyogat rekano a manga bata a datar gowani?"
15 Sabap roo na somiyong ko Piraon so manga kapatas a manga Israil na mipenon siran
on a tig iran a "Ino ngka rekami ini dii nggolaolaa?
16 Da den a ba rekami ipembegay a ragami, ogaid na di rekami pen dii teroon a 'Mbaal
kano sa manga bata!' Kiyapamadasan kami, ogaid na so manga pagtaw ngka i kisala sii."
17 “Manga tapolan kano," a tig o Piraon; "tanto kano a mangaala i bokel! Giyanan i di
niyo dii kateroa sa 'Pakalalakawa kami ngka kaan kami makakorban ko Allah.'
18 Imanto na tarosen iyo baden so galebek iyo! Da den a imbegay rekano a ragami; ogaid
na disomala a katarotop iyo so kadakel o manga bata a ipapanton rekano."
19 Na miyatangked sa ginawa angkoto a manga kapatas a manga Israel a miyakaregen so
masosowa iran kagiya matero kiran a "Di niyo den kekorangan so kadakel o manga bata a
di niyo dii mbaalan a ipapaliyogat rekano sa oman gawii."
20 Kagiya mawa siran ko Piraon na miyaoma iran si Mosa ago si Aron a nanayaon iran
siran,
21 Na pitero iran ki Mosa ago si Aron a "Pengnin ami a mailay o Allah so pinggolaola
niyo na madaneg kano niyan pen! Ka biyaloy kami niyo a mado ko Piraon ago sii ko
manga sanasanaan iyan, na datar bo o ba niyo siran bigan sa pedang a mipemono iran
rekami."
Initopa o Allah so Kapakaboka ko Kaooripeni
22 Giyoto a miyadap peroman si Mosa ko Allah na pitero iyan on a "Ya Allah, ino ngka
pakipemaratai angkai a manga taw? Ino ako ngka sii pen sogoa?
23 Ipoon den ko kiyapakapangadap aken ko Piraon sa kinimbitiyarain ko ron sabap reka
na ba niyan baden dii pemaratai angkai a manga taw, na da ngka siran bo kapanabangi."
IKSODOS 6
Mandiyadi na pitero o Allah ki Mosa a "Keilay ngka imanto o antonaa i ikidia ko ko
Piraon, ka sabap ko mabager a lima ko a ipetena aken on na pekalalakaon iyan so manga
pagtaw aken; sabap ko mabager a lima ko na mbogaon iyan siran pen ko inged iyan."
2 Pitero pen o Tohan ki Mosa a "Saken so Allah.
3 Lebi ako a Mabager a Tohan isako peyag ako ko Ibrahim, Iskak ago so Yakob, ogaid na
da aken kiran den pakitokawi a ginawa ko a nggolalan ko Ingaran aken a Allah.
4 Pimbaalan aken pen so kapasadan aken mipantag kiran sa kibegan aken kiran ko inged
a Kanaan a manga mananangga siran on gowani.
5 Liyo ron pen na miyaneg aken den so dii kapakaperego o manga Israil a
pepengongoripenen o manga Imisiren, na kiyatanodan aken so kapasadan aken.
6 “Kagiya ka maoto na teroa ngka ko manga Israil a 'Saken so Allah, na pokasan ko
sekano sa kokoong o manga Imisiren. Mbokaan ko sekano ko di iran rekano dii
kapangongoripena. Sebeten ko sekano a nggolalan ko kala aken i kabatowa ago so
mangaala a isiksa kiran.
7 Terimaan ko sekano a manga pagtaw aken na pembaloy ako mambo a Tohan iyo. Sa
masa oto na ketokawan iyo a saken so Allah a Tohan iyo a miyokas rekano ko kokoong o
manga Imisiren.
8 Na pagowiten ko sekano ko inged a inisepa aken a imbegay aken ko Ibrahim, Iskak ago
Yakob, ka pekitangan aken rekano. Saken so Allah.'"
9 Piyanotol ai i Mosa ko manga Israil, ogaid na da iran sekaniyan pamakinega ka
kiyadaan siran den sa inam sabap ko karegen o kapepengongoripena kiran.
10 Mandiyadi na pitero o Allah ki Mosa a
11 “Song ka ko Piraon a solotan sa Misir na go ngka on teroa a pakaliyowa niyan so
manga Israil ko inged iyan."
12 Ogaid na tig i Mosa ko Allah a "Apiya so manga Israil na da ako iran pamakinega.
Na andamanaya i kapekinega raken o Piraon a kena a ba ako mapiya i katero?"
13 Ogaid na pitero o Allah ki Mosa ago si Aron a "Teroa niyo ko manga Israil ago so
Piraon a inisogo aken rekano a kiliyon iyo ko manga Israil sa Misir."
So Salsila ki Mosa ago si Aron
14 Giyai so manga kiyapoonan o manga mbawataan o Israil:
So manga wata i Robin a manga mama a aya kaka a wata o Israil na siki Hanok, Palo,
Hisron ago si Karmi. Siran i pilokelokesan o mbatabataa a Robin.
15 So manga wata i Simiyon a manga mama na siki Himowil, Yamin, Ohad, Yakin,
Sohar ago si Siyaol a wata o Ikanaanen a babay. Siran i pilokelokesan o mbatabataa a
Simiyon.
16 Giyai so manga ngaran o manga wata i Libi a manga mama ago so manga moriyataw
iran. So manga wata iyan na siki Girson, Kohat ago si Merari. Miyakapaginetaw si Libi
sa magatos ago telo polo ago pito ragon.
17 So manga wata i Girson a manga mama na si Libni ago si Simay, na madakel a manga
mbawataan iran.
18 So manga wata i Kohat a manga mama na siki Amram, Iskar, Hibron ago si Odsiyal.
Miyakapaginetaw si Kohat sa magatos ago telo polo ago telo ragon.
19 So manga wata i Merari a manga mama na si Mali ago si Mosi.
Siran den i pilokelokesan o mbatabataa a Libi.
20 Si Amram na miyapangaroma niyan so babay o ama iyan a si Yokebid, na mimbawata
siran na si Aron ago si Mosa. Miyakapaginetaw si Amram sa magatos ago telo polo ago
pito ragon.
21 So manga wata i Iskar a manga mama na siki Korah, Nipig ago si Sikri.
22 So manga wata i Odsiyal a manga mama na siki Misiyail, Ilsapan ago si Sitri.
23 Si Aron na miyapangaroma niyan si Ilisiba a wata i Aminadab ago babay mambo i
Nason; na mimbabawata siran na siki Nadab, Abiho, Iliyasar ago si Itamar.
24 So manga wata i Korah a manga mama na siki Asir, Ilkanah ago si Abiyasap. Siran i
pilokelokesan o mbawataan i Korah.
25 Si Iliyasar a wata i Aron a mama na miyapangaroma niyan so isa ko wata i Potiyal, na
mimbawata siran na si Pinihas.
Giyoto den i kiyapoonan o mbatabataa a Libi a rakes o kiyababadan kiran.
26 Giyangkoto a Aron ago Mosa i minimbitiyarai o Allah a tig iyan a "Liyon iyo so
manga mbatabataa a Israil sa Misir."
27 Siran den so miyakimbitiyarai ko Piraon a solotan sa Misir makapantag ko kipeliyon
iran ko manga Israil sa Misir. Giyoto den si Mosa ago si Aron.
Ipetero i Aron si Mosa
28 Isako makimbitiyarai so Allah ki Mosa sii sa Misir
29 Na pitero iyan on a "Saken so Allah; teroa ngka ko Piraon so langon taman a peteroon
ko reka."
30 Ogaid na tig i Mosa ko Allah a "Katawan ka a kena a ba ako mapiya i katero.
Andamanaya i kapekinega raken o Piraon?
IKSODOS 7
Na pitero o Allah ki Mosa a "Ilaya ngka man, ka mbalowin ko seka a datar o Tohan ko
Piraon, na si Aron a pagari ngka na aya ngka pakapeteroon ko lalag ka.
2 Peteroon ka ki Aron so langon taman a isogo aken reka; na mapetero iyan pen ko Piraon
a pakaliyowa niyan so manga Israil ko inged iyan.
3 Ogaid na pakapetegasen ko so olo o Piraon, na apiya pen madakel a nanao ago
pakamemesa a penggolaolaan aken sa Misir
4 Na di kano niyan den pekinegen. Oriyan oto na tenaan ko sa lima a inged a Misir sa
mangaala a kasiksaan,lk ka giyoto den i kapekaliyowa ko ko manga taw aken a so manga
mbatabataa a Israil.
5 Na ketokawan o manga Imisiren a saken so Allah amay ka pakatanaan ko kiran a lima
ko sii sa Misir sa kapekaliyowa ko ko manga Israil ko inged iran."
So Teken i Mosa na Miyabaloy a Nipay
6 Na so den so inisogo o Allah ki Mosa ago si Aron i pinggolaola iran.
7 Isako makimbitiyarai siran ko Piraon na miyakawalo polo ragon a idad i Mosa, ago
miyakawalo polo ago telo ragon a idad i Aron.
8 Na pitero o Allah ki Mosa ago si Aron a
9 “Amay ka teroon rekano o Piraon a 'Pakailaya ko niyo sa pakamemesa a ketotoowan
ako ron,' na teroa ngka ki Aron a 'Kowaa ngka so teken ka na go ngka itogen ko hadapan
o Piraon,' ka kebaloy anan a nipay."
10 Mandiyadi na somiyong si Mosa ago si Aron ko Piraon na so den so inisogo kiran o
Allah i pinggolaola iran. Iniitog i Aron so teken iyan ko hadapan o Piraon ago so manga
sanasanaan iyan na miyabaloy ai a nipay.
11 So kiyailaya on o Piraon na piyakisogoan iyan so manga baraakal ago manga
pembabarakat, na giyangkoto a manga Imisiren a salamangkiro na siyowa iran oto
mambo ko okit a di iran dii kaselamangka.
12 Iniitog o oman i isa kiran so teken iyan na miyabaloy a nipay. Ogaid na so teken i
Aron na pilalamed iyan so manga teken iran.
13 Apiya oto na baden miyakategas so olo o Piraon na da niyan siran pakinega a giyoto
den i kiyatoman o miyatero o Allah.
So Kasiksaan a Rogo
14 Oriyan iyan na pitero o Allah ki Mosa a "Tanto a mategas i poso so Piraon ka
pesengkaan iyan a kapakaliyowa niyan ko manga taw.
15 Amay ka kapipita na lalakaw kano na go niyo balaka so Piraon ko kapesong iyan sa ig.
Aawidi ngka so teken a miyabaloy a nipay na nayawa ngka sekaniyan ko kilid a lawasaig
a Nail.
16 Na teroa ngka on a 'So Allah a Tohan o manga Hibriyo na siyogo ako niyan sa
kapeteroa ko reka on a pakalalakawa ngka so manga pagtaw niyan kaan iran sekaniyan
masimba sii ko disirto. Ogaid na taman imanto na da ngka den pakinega.'
17 Na teroa ngka pen ko Piraon a 'Aya tig o Allah na ketokawan ka a sekaniyan so Allah
sabap sangkai a mapenggolaola: ilaya niyo ka imbadas aken so kakapetan ko a teken sii
ko ig sa Nail na kebaloy a rogo.
18 Pematay so manga seda sii sa Nail ago pekado so lawasaig, na di den pekainom so
manga Imisiren ko ig on.' "
19 Na pitero pen o Allah ki Mosa a "Teroa ngka ki Aron a 'Kowaa ngka so teken ka na go
ngka antapen ko manga ig sii sa Misir, a so manga lawasaig, manga pakaig, manga
tangela ago so kitataliyongen a ig kaan ai manga babaloy a rogo. Na pekalangkap so rogo
sa dalem a inged a Misir apiya sii ko manga laya ago manga omoy.' "
20 Na so den so inisogo o Allah i pinggolaola i Mosa ago si Aron. Inibayaw i Aron so
teken iyan na inibadas iyan sa Nail sii ko kamamasai ron o Piraon ago so manga
sanasanaan iyan, na miyabaloy a rogo so langon a ig sa Nail.
21 Miyamatay so manga seda ko lawasaig na miyakado pen so ig on taman sa di on den
pekainom so manga Imisiren. Na lomiyangkap so rogo sii sa Misir.
22 Ogaid na siyowa ini mambo o manga Imisiren a salamangkiro ko okit a di iran dii
kaselamangka. Na baden miyakategas so olo o Piraon na da niyan pakinega si Mosa ago
si Aron a giyoto den so miyatero o Allah.
23 Ba sekaniyan den miyaling ko torogan iyan, na apiya angkai a miyanggolaola na da
niyan tagoa sa ginawa.
24 Na miyamangalot so langon a Imisiren ko manga kilid o lawasaig kaan siran
makakowa sa paginomen iran a ig, ka di siran den pekainom ko ig sa Nail.
So Kasiksaan a manga Babak
25 Miyakapito gawii ko kiyasiksaa o Allah ko lawasaig
1 Napitero iyan ki Mosa a
IKSODOS 8
"Song ka ko Piraon na go ngka on teroa a 'Giyai i pitero o Allah: Pakalalakawa ngka so
manga pagtaw aken kaan ako iran masimba.
2 O di ka iyog a pakalalakaon ka siran na pekisiksa aken sa manga babak so dalem a
inged ka. Giya Nail na kepeno a babak. Penggagakap siran ago pemanoled ko torogan ka
ago so rowang ka ago sii ko igaan ka, ago so pen so manga walay o manga sanasanaan ka
ago sii ko manga pagtaw ngka, ago taman ko manga tolang ago manga towanga iyo sa
pangenengken.
4 Pemanepak siran reka ago sii ko manga pagtaw ngka taman ko langon a sanasanaan
ka.'"
5 Oriyan oto na pitero o Allah ki Mosa a "Teroa ngka ki Aron a 'Antapen ka so teken ka
ko manga lawasaig, manga pakaig ago manga tangel na pakagakapa ngka so manga babak
sii ko kalopaan a Misir.' "
6 Mandiyadi na biter i Aron a lima niyan na piyakaantap iyan ko manga ig sa Misir. Sarta
a minggagakap on so manga babak na kiyasapengan iran so kalopaan.
7 Ogaid na so manga salamangkiro na siyowa iran oto mambo ko okit a di iran dii
kaselamangka, ka piyakagakap iran mambo so manga babak ko kalopaan a Misir.
8 Na piyakisogoan o Piraon si Mosa ago si Aron na pitero iyan kiran a "Pangniya niyo ko
Allah a kowaan iyan raken angkai a manga babak ago sii ko manga pagtaw aken ka
pakalalakaon ko mambo so manga pagtaw niyo kaan siran makakorban ko Allah."
9 Tig i Mosa ko Piraon a "Seka den i tendo ko oras a kipemangnin aken reka ago so
manga sanasanaan taman ko manga pagtaw ngka kaan kano kadai sa manga babak ago so
manga walay niyo sa da den a ba on kelamba a liyo ron sa Nail."
10 “Mapita," a tig o Piraon.
"So den so pitero o ka," a tig i Mosa, "kaan ka katokawi a da den a ba rimbang o Allah
a Tohan ami.
11 So manga babak na magawa siran reka ago sii ko manga walay niyo taman ko manga
sanasanaan ago manga pagtaw ngka, na aya bo a kelamba kiran na so bo so sisii sa Nail."
12 Kagiya maipos si Mosa ago si Aron ko Piraon na miyangangarapan si Mosa ko Allah
makapantag ko manga babak a inowit iyan ko Piraon.
13 Na inampon o Allah so pangni i Mosa. So manga babak sii ko manga walay ago so
manga lamalama ago so langon a kalopaan na palaya miyamatay.
14 Inipanambak siran o manga Imisiren na inipakado ini a dalem a inged.
15 Ogaid na kagiya mailay o Piraon a miyapinda so kareregeni kiran na ba niyan den
piyakategas so olo niyan na da niyan pakinega si Mosa ago si Aron a giyoto den so
miyatero o Allah.
So Kasiksaan a manga Rengit
16 Mandiyadi na pitero o Allah ki Mosa a "Teroa ngka ki Aron a bayaon iyan so teken
iyan na go niyan badasen ko lopa kaan so bayanek ko dalem a inged a Misir na kebaloy a
manga rengit."
17 Na pinggolaola iran den ai, ka inibayaw i Aron a lima niyan a kakapetan iyan so teken
iyan na go inibadas iyan ko lopa, na miyanga babaloy a manga rengit so langon o bayanek
sa dalem a Misir; na miyakatalingoma so manga rengit ko manga taw ago sii ko manga
pangangayamen.
18 Ogaid na kagiya tepengan maden o manga salamangkiro so manga rengit ko okit a di
iran dii kaselamangka na da iran ai masowa. Na sisii den so manga rengit ko manga taw
ago so manga pangangayamen.
19 Na pitero o manga salamangkiro ko Piraon a "Galebek ai o Tohan!" Ogaid na baden
miyakategas so olo o Piraon na da niyan den pakinega si Mosa ago si Aron a giyoto den
so miyatero o Allah.
So Kasiksaan a manga Tendek
20 Oriyan iyan na pitero o Allah ki Mosa a "Kabalaga ka mbowat na go ngka balaka so
Piraon ko kapesong iyan sa ig. Teroa ngka on a 'Giyai i pitero o Allah: Pakalalakawa
ngka so manga pagtaw aken kaan ako iran masimba.
21 Ka o di ngka siran pekalalakawa na pakipenggoronggorongan ko seka ko manga
tendek taman ko manga sanasanaan ago so manga pagtaw ngka ago sii pen ko manga
walay niyo. Pemangipeno so manga tendek ko manga walay o manga Imisiren ago apiya
so lopa a katatagoan kiran.
22 “ 'Ogaid na sii ko gawii a kapenggolaolaa on na pelepasen ko ron so kalopaan a Gosen
a ron kibabaling so manga pagtaw aken; da den a tendek a ba roo pekasong kaan ka
katokawi a saken, a so Allah, na dii nggalebek sangkoto a darpa.
23 Pakapembidaan ko so manga pagtaw aken ago so manga pagtaw ngka.
Mapenggolaola angkai a pakamemesa a nanao mapita.' "
24 Na ininggolalan den ai o Allah. Minibombor so tanto a makapal a tendek ko torogan o
Piraon ago sii ko manga walay o manga sanasanaan iyan. Na mikerata so dalem a inged a
Misir sabap ko manga tendek.
25 Piyakisogoan o Piraon si Mosa ago si Aron na pitero iyan kiran a "Ikano roo den na sii
kano den korban ko Tohan iyo sangkai a inged."
26 “Kena a ba anan patot," a tig i Mosa, "ka so manga pangangayamen a di ami dii
korbanen ko Allah na pakasisingay ko manga Imisiren a kapesombalia on. Na o mailay
iran angkai a pakasisingay kiran na ngkaino, ba kami ran di maperorobak a manga ator?
27 Disomala a telo gawii a ipelalakaw ami ko disirto sa kapekorban ami ko Allah a Tohan
ami ka aya niyan rekami inisogo."
28 Tig o Piraon a "Pakalalakaon ko sekano kaan kano makakorban ko Allah a Tohan iyo
sii ko disirto asar a di kano makawatan. Imanto den na pangangarapanen ako ngka.
29 Tig i Mosa a "So den so kapakaganat aken reka na pengangarapan ako ko Allah, na
mapita i kapagawai reka o manga tendek ago sii pen ko manga sanasanaan ago so manga
pagtaw ngka. Ogaid na tangkeda ngka a di ka peman mamagakal ko di ngka
kapekalalakawa ko manga taw sa kapekorban iran ko Allah."
30 Na gomiyanat si Mosa ko Piraon na taros a miyangangarapan ko Allah.
31 Inampon o Allah so pangni i Mosa ka piyakaawa iyan so manga tendek ko Piraon ago
sii pen ko manga sanasanaan ago so manga pagtaw niyan. Da den a satiman bo a tendek a
ba on miyalamba.
32 Ogaid na sii peman sangkai a masa na piyakategas o Piraon so olo niyan na da niyan
den pakalalakawa so manga taw.
IKSODOS 9
So Kiyasiksaa ko Pangangayamen
Oriyan iyan na pitero o Allah ki Mosa a "Song ka ko Piraon na go ngka on teroa a 'Giyai i
pitero o Allah a Tohan o manga Hibriyo: Pakalalakawa ngka so manga pagtaw aken kaan
ako iran masimba.
2 Ka o di reka maparo o ba ngka siran mapakalalakaw ka ba ngka baden peterosen so
kapegerena ngka kiran
3 Na tenaan aken sa pakalekelek a paniyakit so manga talon iyo a manga koda, manga
kimar, manga onta, manga sapi, manga bilibili ago so manga kambing iyo.
4 Ogaid na pakapembidaan aken so manga pangangayamen o manga Israil ago so rek o
manga Imisiren kaan da den a petay ko pangangayamen o manga Israil.' "
5 Na tindo o Allah so oras a tig iyan a "Mapita i kapenggolaolaa ko sii ko inged."
6 Na sii ko miyakatalondog a gawii na pinggolaola den o Allah. Miyamatay so langon a
pangangayamen o manga Imisiren, ogaid na da den a satiman bo a ba miyatay ko rek o
manga Israil.
7 Piyakipariksa ini o Piraon na kiyatokawan iyan a da a satiman bo a ba miyatay ko
manga pangangayamen o manga Israil. Apiya pen oto na miyakategas baden so olo niyan
na da niyan den pakalalakawa so manga taw.
So Kasiksaan a manga Lebag
8 Mandiyadi na pitero o Allah ki Mosa ago si Aron a "Gamak kano sa ombi sii ko
pirapogan na samboraken ai i Mosa sa poro ko kamamasaan o Piraon.
9 Kebaloy ai a bayanek a kibember ko dalem a inged a Misir, na kesabapan ai sa manga
lebag a pembabaloy a panido ko manga taw ago manga pangangayamen ko dalem o
inged."
10 Na gomiyamak siran sa ombi ko pirapogan na miyangadap siran ko Piraon.
Inisamborak i Mosa sa poro na kiyasabapan ai sa manga lebag o manga taw ago so manga
pangangayamen, na miyanga babaloy ai a manga panido iran.
11 So manga salamangkiro na di siran makapengadap ko Piraon sabap sa pilelebagan
siran mambo taman den ko langon a Imisiren.
12 Ogaid na minitoman so miyatero o Allah ki Mosa ka da den pakinega o Piraon si Mosa
ago si Aron, ka piyakategas baden o Allah so olo niyan.
So Kasiksaan a Giyaw
13 Oriyan iyan na pitero o Allah ki Mosa a "Kabalaga ka mbowat mapita na go ka
pangadap ko Piraon. Teroa ngka on a 'Giyai i pitero o Allah a Tohan o manga Hibriyo:
Pakalalakawa ngka so manga pagtaw aken kaan ako iran masimba.
14 Ka o di ngka ini sowaa sangkai a masa na itena aken reka so panimbel a kasiksaan ago
sii ko manga sanasanaan ka ago taman ko manga pagtaw ngka kaan ka katokawi a da den
a rimbang aken ko pirowarowangan o doniya.
15 O miyapakategorar aken reka den a lima ko ko kiyatanai ko reka a paniyakit ago sii ko
manga pagtaw ngka na miyaiped kano den langon ko doniya.
16 Ogaid na pakapepegoyagen ko seka pen kaan aken reka mapakiilay so gees aken ago
an mapakalangkap so Ingaran aken ko dalem a doniya.
17 Na kagiya ipepengimporoan ka pen a ginawa ngka ko manga pagtaw aken ko di ngka
kiran kapekalalakawa
18 Na mapita sa datar ai a oras na pekioranan aken a Misir sa manga ala a giyaw a da on
den ai kaokiti ipoon ko gawii a kiyapagingedi ron.
19 Kagiya ka maoto na pakipangowiten ka nggagaan so manga pangangayamen ka ko
kesirongan kiran a rakes o langon taman a rek ka sii ko kalopaan, ka penga oolog so
giyaw ko oman i taw ago pangangayamen a da makabaling ka ndodoo pen ko liyo o
walay, na taros a ipematay iran.' "
20 So ped ko manga sanasanaan o Piraon a inikalek iran so katero o Allah na
pinggagaanan iran a kapamakasirong o manga oripen ago manga pangangayamen iran.
21 Ogaid na siran oto a da iran tagoa sa ginawa so katero o Allah na inindarainon iran
baden ko pangomaan so da mamakalindong a manga oripen ago manga pangangayamen
iran.
22 Na pitero o Allah ki Mosa a "Antapen ka a lima ngka sa langit kaan makaoran so
giyaw ko dalem a Misir sii ko manga taw, so manga pangangayamen ago so langon taman
a dii mamangeto ko manga pangomaan on."
23 Na kagiya mibayaw i Mosa so teken iyan sa langit na piyakandadalendeg o Allah ago
piyakaoran iyan sa giyaw, na miyamangitras so kilakilat ko lopa. Piyakioranan o Allah so
inged a Misir
24 Sa manga ala a giyaw, na mikilakilat ko mabalabala on. Giyoto i lebi a piyakalekelek
a barat a miyanggolaola sa Misir ipoon ko kiyabaloy niyan a nasiyon.
25 Sii sa dalem a Misir na so langon taman on a da mamakasirong na miyanga sosogat a
giyaw a ndatar so manga taw ago manga pangangayamen. Miyanga ooteng iyan so
langon taman a dii mamangeto ko manga pangomaan ago miyanga sasapak iyan pen so
langon a manga kayo.
26 Aya bo a darpa a da kaorani sa giyaw na so bo so kalopaan a Gosen a katatagoan ko
manga Israil.
27 Na piyakisogoan o Piraon si Mosa ago si Aron na pitero iyan kiran a "Sangkai a masa
na miyadosa ko. So Allah i maontol, na saken ago so manga pagtaw aken i mariribat.
28 Pangangarapan ka ko Allah ka kiyatangkaan den angkai a kilakilat ago giyaw!
Pekalalakaon ko sekano; di kano sii den pekakaden."
29 Tig i Mosa a "Anda den i kapakaliyo aken ko siti na tepenay ako ko kapengangarapan
aken ko Allah; na nggenek so dalendeg ago so kapegoran iyan sa giyaw kaan ka katokawi
a so doniya na rek o Allah.
30 Ogaid na katawan aken a seka ago so manga sanasanaan ka na di kano pen maaleken
ko Allah a so Tohan.
31(Miyanga bibinasa so manga pamomolan a gapas ago bantad, ka sa masa oto na
miyamakatoa den so bantad ago pepamagobarobar den so manga gapas.
32 Ogaid na da mabinasa so trigo ka pekeori a kapekatoa niyan.)
33 Na inawaan i Mosa so Piraon na lominiyo ko siti. Tomiyapenay sekaniyan ko
kapepengangarapan iyan ko Allah, na sarta a gominek ndadalendeg ago so kapegoran iyan
sa giyaw ko inged.
34 Ogaid na kagiya mailay o Piraon a gominek so oran, so giyaw ago so dalendeg na
mindosa sekaniyan peroman ka piyakategas iyan ago so manga sanasanaan iyan so manga
olo iran.
35 Na giyoto den so miyatero o Allah a nggolalan ki Mosa, ka miyakategas so olo o
Piraon na da niyan den pakalalakawa so manga Israil.
IKSODOS 10
So Kasiksaan a manga Tarapan
Oriyan iyan na pitero o Allah ki Mosa a "Song ka ko Piraon ka piyakategas aken so olo
iran ago so manga sanasanaan iyan kaan aken minggolalan sii kiran angkai a manga
pakamemesa a nanao aken
2 Ago an ka mapanotol ko manga wata ago manga apo o ka o andamanaya i
kiyapakaregeni ko ko manga Imisiren ago so kininggolalanen ko kiran ko manga nanao
aken; na ketokawan iyo langon a saken so Allah."
3 Mandiyadi na somiyong si Mosa ago si Aron ko Piraon na pitero iran on a "Giyai i
pitero o Allah a Tohan o manga Hibriyo: Ay katey a kapesengkaa ngka ko
kipangalimbabaanen ka sa ginawa ngka ko hadapan aken? Pakalalakawa ngka so manga
pagtaw aken kaan ako iran masimba.
4 Ka o di ka iyog sa ba ngka siran mapakalalakaw na pagowitan aken sa manga tarapan so
inged ka mapita.
5 Kisapeng siran ko lopa taman sa di den mailay. Pelenganen iran mamangangan so
langon taman a da mabinasa o giyaw a rakes on pen so oman i kayo a pegto ko manga
pangomaan iyo.
6 Pemangipeno siran ko manga walay ngka taman ko langon a walay o manga sanasanaan
ka ago so langon a Imisiren; lebi ini a madakel a manga tarapan a di so miyailay o manga
lokes iyo aya pen o ba so manga apo iyo kembo siran den maaden sa doniya na taman den
imanto." Na tomiyalikod si Mosa na giyanatan iyan so Piraon.
7 Na so manga sanasanaan o Piraon na pitero iran on a "Ay katey a kalilitagi rektano
angkai a mama? Pakalalakawa ngka so manga taw kaan iran masimba so Allah a Tohan
iran. Ba ngka da mainengka a kiyabinasaan den a inged a Misir?"
8 Kagiya ka maoto na piyakakasoy si Mosa ago si Aron ko Piraon na pitero iyan kiran a
"Lalakaw kano; simbaa niyo den so Allah a Tohan iyo. Ogaid na antawaa bes i
melalakaw?"
9 Tig i Mosa a "Palaya kami melalakaw a rakes o manga kangodaan taman ko manga
lokes. Pemakaonoten ami so manga wata ami a mama ago babay ago so manga bilibili,
kambing ago sapi ami, ka peselaselaan ami so Allah."
10 Na tig o Piraon a "Ipesepa aken ko Allah a di aken den peparon a kapakaonot rekano o
manga babay ago manga wata! Marayag a marata kano i pamikiran.
11 Di anan kepakay! So bo so manga mama rekano i pekalalakaw; na simbaa niyo so
Allah ka giyanan i kabaya iyo." Na biyogaw si Mosa ago si Aron ko hadapan o Piraon.
12 Mandiyadi na pitero o Allah ki Mosa a "Antapen ka a lima ngka sa Misir kaan
mibombor so makapal a tarapan ko lopa a penganganen iran so langon taman a
pepemangeto on a so langon a da mabinasa o giyaw."
13 Na iniantap i Mosa so teken iyan sa Misir na piyakasamber o Allah so ndo a
pepekapoon sa sebangan, na somiyamber ko inged sangkoto a kadaondaw ago
miyababasa gawii. So den so kiyapita iyan na miyawit roo o ndo so manga tarapan.
14 Lomiyangkap siran ko dalem a Misir na miyamanana ko mbalabala ko inged a tanto
siran a makapal. Da den a ba ini datar sa kadakel a tarapan a ba kiyaokiti sii sa Misir aya
pen o ba kaperomani.
15 Kiyasapengan iran langon so lopa taman sa miyakaitem, na piyangangan iran so
langon a da mabinasa o giyaw a so langon taman a pepemangeto on a rakes o langon o
manga onga a kayo. Da den a ba miyalamba a raon o apiya antonaa kayo o di na
pamomolan sii ko dalem a inged a Misir.
16 Na piyakisogoan nggagaan o Piraon si Mosa ago si Aron na pitero iyan kiran a
"Miyadosa ko ko Allah a Tohan iyo ago sii rekano.
17 Kapedipedi kano bo na rilaan iyo raken angkai a dosa ko sa makaisa bo, na go niyo
pangangarapana ko Allah a Tohan iyo a kowaan iyan raken angkai a pemakapatay a
kasiksaan."
18 Na giyanatan i Mosa so Piraon na miyangangarapan ko Allah.
19 Na siyambian o Allah so ndo sa tanto a mabager a ndo a pepekapoon sa sedepan. Na
inigorong iyan so manga tarapan ago inibayog iyan ko Mariga a Ragat. Da den a ba
satiman bo a tarapan a ba minibegak ko apiya anda sa Misir.
20 Ogaid na piyakategas o Allah so olo o Piraon na da niyan den pakalalakawa so manga
Israil.
So Kasiksaan a Maliboteng
21 Oriyan iyan na pitero o Allah ki Mosa a "Antapen ka a lima ngka sa langit kaan
makalangkap so maliboteng sa inged a Misir, a so kaliboteng a datar o ba pekegedam."
22 Na iniantap i Mosa a lima niyan sa langit na liyangkapan a makapal a maliboteng so
dalem a Misir ko soled o miyakatelo gawii.
23 Da makapamagilaya so manga Imisiren, na da a ba isa kiran bo a ba pekaliyo ko walay
niyan ko miyakatelo gawii. Ogaid na so manga Israil na kaliliwanagan so langon a manga
babalingan iran.
24 Na giyoto a piyakisogoan o Piraon si Mosa na pitero iyan on a "Lalakaw kano ago
simbaa niyo so Allah; apiya so manga babay rekano ago manga wata iyo na pemakaonot
rekano pen. Ogaid na begaken iyo baden so manga bilibili, kambing ago sapi iyo."
25 Tig i Mosa a "Disomala a pakitelonen ka rekami so manga pangangayamen a
ipekorban ago totongen ami a isepaat ko Allah a Tohan ami.
26 Kagiya ka maoto na pekaonoten ami mambo so manga pangangayamen ami; da den a
ba isa kiran bo a ba on mbegaken. Disomala a pemilian ami siran sa pagosaren ami ko
kasimbaa ko Allah a Tohan ami, na taman sa di ami roo pen kapekaoma na di ami
katawan i kisapaat ami ron."
27 Ogaid na piyakategas o Allah so olo o Piraon na da sekaniyan iyog sa ba niyan siran
mapakalalakaw.
28 Na taros a pitero o Piraon ki Mosa a "Awai ako ngka! Pananggilai ngka o ba ta
makapagilaya peroman! Sii ko gawii a kailaya ngka ko paras aken na petay ka den!"
29 “Mataan den," a tig i Mosa. "Di ako reka den pengadap peroman."
IKSODOS 11
So Kasiksaa ko Kaka a Wata a Mama
Miyatero den gowani o Allah ki Mosa a "Satiman pen a kasiksaan a itena aken ko Piraon
ago giya Misir. Maipos oto na pekaawaan kano niyan on den. Na amay ka pekaawaan
kano niyan na matamataan den a tanto kano niyan a mbogaon.
2 Na, teroa ngka ko manga Israil a palaya siran pamangni sa manga ipamemetad a pirak
ago bolawan ko manga siringan iran."
3(Miyabaloy den o Allah so manga Imisiren a ipengalimo iran so manga Israil. Liyo ron
pen na so manga sanasanaan o Piraon ago so langon a taw sa Misir na kikilalaan iran a
mala i gees si Mosa.)
4 Na giyoto a pitero pen i Mosa ko Piraon a "Giyai i pitero o Allah: Sii ko kakelooki sa
gawii na pegenebeneben ko a Misir.
5 Na petay so oman i kaka a wata a mama sa Misir ipoon ko kaka a wata o Radiya Piraon
na taman den ko kaka a wata o oripen a babay a pabobowayo, ago so pen so oman i
paganay a inimbawata o pangangayamen.
6 Tanto a pekatanog so kagoraok na taman sa pemangigorong ko mbalabala ko inged a
Misir, na pikembokembo na da oto manggolaola aya pen o ba kaperomani.
7 Ogaid na sii ko manga Israil a ndatar so taw ago so pangangayamen na apiya so
kanggebo ron o aso na di. Giyanan i kaketokawi niyo sa dii pakambidaan o Allah a Misir
ago giya Israil.
8 Na so langon angkai a manga sanasanaan ka na pemanong raken ka sodiyodan ako iran
a tig iran a 'Awa kano den, seka ago so langon o manga pagtaw ngka!' Oriyan oto na
magawa ako den." Na giyoto a si Mosa a tanto a pekerarangitan na giyanatan iyan so
Piraon.
9 Miyatero den mambo o Allah ki Mosa a "Ipeteros o Piraon so di niyan reka kapekinega
kaan mapakadakel so manga pakamemesa a galebek aken sii sa Misir."
10 Na mininggolalan den langon i Mosa ago si Aron angkai a manga pakamemesa ko
hadapan o Piraon, ogaid na piyakategas baden o Allah so olo o Piraon, na da niyan den
pakaliyowa so manga Israil ko inged iyan.
IKSODOS 12
So Paska
Pitero o Allah ki Mosa ago si Aron sii sa Misir a
2 “Giyangkai a olanolan na bilangen iyo a aya niyo paganay a olanolan ko ragon.
3 Pakalangkapa niyo ko langon o isa ka maginged a Israil a sii ko ikasapolo gawii sangkai
a olanolan na ikowa o oman i mama sa kangodaan a bilibili so pamiliya niyan a nggagaisa
ko oman i isa ka mbangonan sa walay.
4 O di malengan koman o isa ka mbangonan sa walay so satiman a bilibili na saden sa
marani kiran a siringan na kebaadan iran on a aya kapembaabaada on na makaaayon ko
kadakel o taw ago so kekan o oman i isa kiran.
5 So piliin iyo a pangangayamen na mama a miyakasaragon a idad iyan a da den a daway
niyan; na aya kapemilian iyo na so manga bilibili o di na manga kambing.
6 Tagikora niyo oto taman ko ikasapolo ago pat gawii ko olanolan, na amay ka perimon
sangkoto a gawii na so langon o isa ka maginged a Israil na penombaliin iran angkoto a
manga pangangayamen.
7 Oriyan iyan na kowa siran ko rogo na panagoi ran on so mbala a kilid ago so poro o
pintoan o manga walay a kenan iran ko manga bilibili.
8 Sii den sangkoto a kagagawii na ken iran so sapo a iniyaw ko apoy a rakes o mapait a
manga lite ago paan a da a tapay ron.
9 Di niyo kena so sapo a ba da maloto o di na pisewawan, ka pagiyawa niyo ko apoy a
merakerakes on so olo, so manga ai ago so soled a tiyan iyan.
10 Di kano pelamba ko sapo taman ko kapipita. O aden a kesama on ko kepita na totonga
niyo ai.
11 Giyai i okit a kakena niyo ron: Nggagaani niyo koman a ndiditar kano sa ipelalakaw a
titinilas kano pen ago kakapetan iyo so manga teken iyo. Giyai na Paska a ipeselasela ko
Allah.
12 “Sii den sangkoto a kagagawii na pegenebeneben ko a Misir ka pemonoon aken so
oman i kaka a wata a mama a ndatar so manosiya ago so pangangayamen. Ndanegen ko
so langon a manga katohanan sa Misir; saken so Allah.
13 So rogo sii ko manga pintoan na aya tanda ko manga walay a katatagoan rekano; na
amay ka mailay aken so rogo na pelepasen ko sekano. Di kano den ketanaan a morala a
ikebinasa niyo amay ka siksaan ko so inged a Misir.
14 “Giyangkai a gawii na selaselaa niyo taman ko kapepemagapidapidi rekano a aya niyo
kapepistai ko Allah, ka giyanan i pekitadem iyo ko pinggolaola ko rekano na taman sa
pakataman ai a sogoan.
15 Sii ko soled o pito gawii na aya bo a kekan iyo ron a paan na so da a tapay ron. Sii ko
paganay a gawii na kowai niyo sa tapay so manga walay niyo, ka apiya antawaa rekano i
makakan sa aden a tapay ron ipoon ko paganay a gawii taman ko ikapito gawii na kebelag
ko isa ka maginged a Israil.
16 Sii ko paganay a gawii na talabok kano sa soti a kalilimod, na peromani niyo ai ko
ikapito gawii. Di kano penggolaola sa apiya antonaa galebek sangkoto a manga gawii
liyo ron so kapetiyagara niyo ko ken o oman i isa rekano.
17 “Selaseaa niyo angkai a Pista ko Kakan sa Paan a da a Tapay ron ka kagiya sii sangkai
a gawii na kalangolangon iyo a mbatabataa na piyamakaliyo aken sa Misir. Selaselaa
niyo angkai a gawii taman ko kapepemagapidapidi rekano, ka taman sa pakataman ai a
sogoan.
18 Sii ko paganay a olanolan na kan kano sa paan a da a tapay ron ipoon ko perimon ko
ikasapolo ago pat gawii taman ko kaperimon iyan ko ikadowa polo ago isa gawii.
19 Sii ko soled o pito gawii na da den a ketoon a tapay ko manga walay niyo, ka apiya
antawaa i koman sa aden a tapay ron na kebelag ko isa ka maginged a Israil apiya o rait
sekaniyan o di na tenger a taw a Israil.
20 Di kano ken sa apiya antonaa a aden a tapay ron. Sii ko langon o manga walay niyo na
aya bo a kekan iyo ron a paan na so da a tapay ron."
21 Mandiyadi na piyakilimod i Mosa so langon a pelokelokesen ko manga Israil na pitero
iyan kiran a "Ikano roo den na pamamili kano sa kangodaan a manga bilibili a mitiyagar
ko manga pamiliya niyo, na sombalia niyo ai a inggabi niyo ko Paska.
22 Na kowa so oman i isa rekano sa sapak a kayo a hisop na go niyan sombon ko rogo a
tatangelen ko ladiya, na sisingen iyan ai ko poro ago sii ko mbala a kilid o pintoan iyan.
Da den a isa rekano bo a ba meliyo ko walay niyan taman sa mapita.
23 Aya sabap iyan na pegenebeneb so Allah ko inged sa kapemonoa niyan ko manga
Imisiren, na amay ka mailay niyan so rogo sii ko poro ago so mbala a kilid o pintoan na
pelepasen iyan oto, ka di niyan on den pekasoleden so Malakalmaot ko manga walay niyo
sa ba kano niyan mabono.
24 “Ketoman iyo taman ko manga moriyataw niyo angkai a manga insarat rekano, ka
taman sa pakataman ai a sogoan.
25 Amay ka makasoled kano den ko inged a initopa o Allah a imbegay niyan rekano na
mipenggolalan iyo angkai a sowaan.
26 Na amay ka iise rekano o manga wata iyo a 'Antonaa i maana rekano angkai a
sowaan?'
27 Na peteroon iyo kiran a 'Giyai so kapekorban ami ko Paska a pantag bo ko Allah, ka
lipas iyan so manga walay o manga Israil sii sa Misir isako pamonoon iyan so manga
Imisiren, na inilidas iyan on so manga pamiliya mi.' "
So kiyanega sii o manga Israil na somiyodiyod siran ago miyamanimba.
28 Na gomiyanat siran den na so den so inisogo o Allah ki Mosa ago si Aron na aya iran
pinggolaola.
So Kiyapamonoa ko manga Kaka a Wata
29 Sii ko look a gawii na piyamono o Allah so langon a kaka a wata a mama sii sa Misir
ipoon ko kaka a wata o Radiya Piraon na taman ko kaka a wata o taw a totongkopen ko
kalaboso ago so pen so kaka a wata o langon a pangangayamen.
30 Na miyamakanaw so Piraon ago so langon a sanasanaan iyan taman ko langon a
manga Imisiren sangkoto a kagagawii; na tanto a matanog a kiyagoraok sii sa Misir ka da
den a isa bo ko manga walay iran a ba da a miyatay ron.
31 Sii den sangkoto a gagawii na piyakisogoan o Piraon si Mosa ago si Aron na pitero
iyan kiran a "Ganat kano den! Belaga niyo so manga pagtaw aken, sekano ago so manga
Israil! Lalakaw kano ago simbaa niyo so Allah ka aya niyo piyangni.
32 Telonen iyo so manga bilibili, kambing ago sapi iyo ka aya niyo miyatero, na ganat
kano den. Na pangangarapanen ako niyo mambo."
33 Na tigel o manga Imisiren so manga taw ka pakapenggagaanen iran siran mawa ko
inged a tig iran a "O di kano mawa na palaya kami pematay."
34 Kagiya ka maoto na piyanago o manga Israil so miyabonaw iran a arina a da den
kasaogi sa tapay sii ko manga towanga iran, na piyamotos iran ai ko manga nditaren iran
na go piyamosai ran.
35 Miyanggolaola o manga Israil so miyatero kiran den i Mosa ka miyamangni siran daan
ko manga Imisiren sa manga ipamemetad a pirak ago bolawan, ago manga nditaren.
36 Na kagiya biyaloy o Allah so manga Imisiren a ipengalimo iran so manga Israil na
inipamegay iran kiran so apiya antonaa a piyangni iran. Sangkai a okit na miyakowa iran
so manga tamok o manga Imisiren.
Gomiyanat so manga Israil sa Inged a Misir
37 Na gomiyanat so manga Israil sa Ramisis na miyakaoma siran sa Sokot. Manga nem
gatos nggibo siran a manga mama a pelalag a da on mibilang so manga babay ago manga
wata.
38 Madakel a miyamangonot kiran a di iran royod a manga taw ago so makapal a
pangangayamen a bilibili, kambing ago manga sapi.
39 Miyamangembaal siran sa da a tapay ron a paan ko miyabonaw a arina a kiyaawidan
iran ko kiyapakaawa iran sa Misir. Da ini kasaogi sa tapay ka kagiya baden minitekaw a
kiyabogawa kiran sa Misir na da siran lakay tiyagar sa mapeloto iran.
40 Aya kiyapakabaling o manga Israil sa Misir na miyakapat gatos ago telo polo ragon.
41 Sii den sangkoto a gawii a kiyapopos o pat gatos ago telo polo ragon na gomiyanat sa
Misir so langon a mbatabataa a manga pagtaw o Allah.
42 Na sabap sa totodayan siran o Allah sangkoto a kagagawii ko kiyapakaliyowa niyan
kiran sa Misir na petoday mambo so langon o manga Israil sangkai a kagagawii a
ipeselasela iran ko Allah taman ko kapepemagapidapidi kiran.
So manga Kokoman ko Paska
43 Pitero o Allah ki Mosa ago si Aron a "Giyai i manga kokoman mipantag ko Paska:
"Da a rait ko inged a ba pekakan ko inggabi ko Paska.
44 Apiya antawaa ko manga oripen i miyapamasa niyo na pekakan on asar a miyatori iyo
daan,
45 Ogaid na so mananangga o di na so pesokayan iyo a gomagalebek na di on pekakan.
46 “Disomala a ken ai langon sii ko walay a pitiyagaran on; da a ba niyo kiliyo ko sapo o
pangangayamen ko walay. Da den mambo a ba niyo potola ko tolan iyan.
47 So langon o isa ka maginged a Israil na mapeselasela iran so Paska,
48 Ogaid na so da matori a mama na di on den pekakan. O aden a rait ko inged a
mababaling rekano a kebaya selasela ko Paska o Allah na disomala a matori daan so
langon a manga mama ko pamiliya niyan. Oriyan oto na kepakay a mamangeped ko
kaselaselaa on a datar bo o ba timpo a mbawataan o Israil.
49 Isa bo a kitab a mipenggolalan ko timpo a mbawataan o Israil ago so rait ko inged a
mababaling rekano."
50 Na tiyoman o langon o manga Israil so inisogo o Allah ki Mosa ago si Aron.
51 Sii den sangkoto a gawii na piyakaliyo o Allah sa Misir so langon a mbinabataa a
manga Israil.
IKSODOS 13
So Kinisenggain ko manga Kaka a Wata
Pitero o Allah ki Mosa a
2 “Senggain iyo a rek aken so oman i kaka a wata a mama. So oman i paganay a
ipembawata sii ko manga Israil a ndatar so manosiya ago so pangangayamen na kibilang a
rek aken."
3 Na pitero i Mosa ko manga taw a "Pepenanademi niyo angkai a gawii a kiyapakaawa
iyo sa Misir a ron kano miyapangongoripen, ka piyakaliyo kano ron o Allah a nggolalan
ko kala iyan i kapaar. Di kano ron ken sa apiya antonaa a sasaogan sa tapay.
4 Imanto a gawii a olanolan a Abib na aya niyo kagaganat sa Misir.
5 Inisepa o Allah ko manga apo iyo a imbegay niyan rekano so pagiingedan o manga
Kanaaniyo, manga Hitiyo, manga Amoriyo, manga Hibiyo ago manga Hibosiyo. Na
amay ka pakasoleden kano o Allah sangkoto a pekepakayan ago oodaren a inged na
nggolalanen iyo angkai a kaselaselaa ko paganay a olanolan ko oman ragon:
6 Sii ko soled o pito gawii na kan kano sa paan a da a tapay ron, na go sii ko ikapito gawii
na selaselaa niyo ron so Allah.
7 Sii sangkoto a pito gawii na aya bo a kekan iyo a paan na so da a tapay ron; o ba kano
katooni sa apiya antonaa a aden a tapay ron aya pen o ba aden a matoon a tapay ko bapiya
anda ko pagiingedan iyo.
8 Sii ko paganay a gawii ko kaselasela na teroa niyo ko manga wata iyo a mama a "Di
aken ai dii nggolaolaan sabap ko pinggolaola raken o Allah ko kiyapakaawa aken sa
Misir.'
9 Giyangkai a kaselasela na ipenanadem iyo a datar o tanda a miiiket ko manga lima niyo
o di na mibababad ko beneng iyo; pekitadem iyo pen ai ko kapetontola niyo lalayon ko
Kitab o Allah; ka piyakaliyo kano o Allah sa Misir a nggolalan ko kala iyan i kabarakat.
10 Kagiya ka maoto na petomana niyo angkai a sogoan ko matetendo on a masa oman
ragon.
11 “Amay ka mawit kano o Allah ko inged o manga Ikanaanen ago mibegay niyan rekano
pen ai a aya kaketoman o inisepa iyan rekano ago so manga apo iyo
12 Na palada niyo ko Allah so oman i paganay a ipembawata roo a mama. Oman i
paganay a ipembawata a mama o pangangayamen na rek o Allah.
13 Ogaid na oman i paganay a ipembawata o kimar na sanggara niyo a nati a bilibili a aya
niyo pekorbanen. Ogaid na o di niyo oto senggara na lepoa niyo so lig iyan. Sanggara
niyo so oman i paganay a ipembawata iyo a mama.
14 “Sii ko pemakatalingoma a manga gawii amay ka iise reka o wata a ka a mama a tig
iyan a 'Antonaa i maana ini?' na teroa ngka on a 'Miyakanggolalan ko mala a kabarakat o
Allah na miyapakaliyo kami niyan sa Misir a ron kami miyapangongoripen.
15 Na isako pakategasen o Piraon a olo niyan ko di niyan rekami kapekalalakawa na
piyamono o Allah so oman i kaka a wata a mama sii sa Misir a ndatar so manosiya ago so
pangangayamen. Giyanan i sabap a di ami dii korbanen ko Allah so oman i paganay a dii
imbawata a mama o pangangayamen na go pesenggaren ami pen so oman i kaka a wata
ami a mama.
16 Na giyangkai a kaselasela na datar o ba tanda sii ko lima mi ago sii ko beneng ami a
ipenanadem ami ko kiyapakaliyowa rektano o Allah sa Misir a nggolalan ko mala a
kabarakat iyan.' "
So Mapopolaos a Gabon ago Apoy
17 Kagiya mapakaawa o Piraon so manga taw na da siran agaka o Tohan sii ko lalan a
ipegokit ko pagiingedan o manga Pilistiyo apiya pen giyoto i mapantek. Ka tig o Tohan a
"O mailay iran a aden a makipetidawa kiran na o ba iran baden alina a pamikiran iran na
ba siran baden komasoy sa Misir."
18 Sabap roo na piyakaalilit siran o Tohan, ka sii niyan siran piyakaokit ko lalan sii ko
disirto a ipegantap ko Mariga a Ragat.
Kagiya gomanat so manga Israil sa Misir na maaator siran piyapiya ko kapelalakaw
iran.
19 Na initelon i Mosa so bangkay o Yosop, ka miyapakasepa o Yosop so manga Israil
isako kateroa niyan on a "Sepaan iyo raken a amay ka pagowiten kano o Tohan sangkoto
a inged na itelon iyo so bangkay aken."
20 Na giyanatan o manga Israil a Sokot na mikampo siran sa Itam ko kilid o disirto.
21 Igira a kadaondaw na maoonaan iran so Allah a sisii ko mapopolaos a gabon a ipetoro
iyan kiran so lalan a pagokitan iran; na igira a gagawii na maoonaan iran sekaniyan sii ko
mapopolaos a apoy a tomatayaw kiran kaan siran pepekalalakaw sa apiya anda ko gagawii
daondaw.
22 Apiya anda ko mapopolaos a gabon igira a kadaondaw ago so mapopolaos a apoy igira
a gagawii na da den mada ko maoonaan o manga taw.
IKSODOS 14
So Kiyaripag ko Ragat
Na pitero o Allah ki Mosa a
2 “Teroa ngka ko manga Israil a peto siran na go siran kempo ko marani sa Pi Hahirot sii
ko pageletan a Migdol ago so ragat. Roo siran kempo ko marani ko ragat sii ko pantag a
Baal Sipon.
3 Na kigedi ko pamikiran o Piraon a 'Sii den peketaataap so manga Israil ko inged, ka
miaalang kiran on so disirto.'
4 Na pekategasen ko so olo o Piraon na selobaan kano niyan. Ogaid na kebantogan ako a
nggolalan ko penggolaolaan ko ko Piraon ago so langon o manga sondaro niyan; na
ketokawan o manga Imisiren a saken so Allah." Na pinggolaola den o manga Israil so
miyatero kiran.
5 Kagiya matero ko solotan sa Misir a miyakapalagoy so manga taw na miyaalin so
pamikiran o Piraon ago so manga sanasanaan iyan mipantag kiran, na pitero iran a
"Antonaa angkai a miyanggolaola tano? Ba tano baden kiyabokai so manga Israil ko
kapengongoripena tano kiran!"
6 Mandiyadi na piyakitiyagar o Piraon so karo niyan na piyakaonot iyan langon so
sondaro niyan.
7 Piyakaonot iyan pen so langon a manga karo sa Misir a maaped on so nem gatos a lebi a
manga pipiya on a so oman i isa on na pageedaan o maporo a sondaro.
8 Na kagiya piyakategas o Allah so olo o Piraon a solotan sa Misir na siyaloba iyan so
manga Israil a gomaganat siran a makasasarig.
9 So langon o Imisiren a manga sondaro o Piraon a rakes o langon a koda ago manga karo
niyan taman ko kipageeda on na siyaloba iran so manga Israil na riyaot iran siran sii ko
kapekempo iran ko kilid a ragat a marani sa Pi Hahirot a mipapantag sa Baal Sipon.
10 Sii ko kapepekarani kiran o Piraon na miyalangkaw o manga Israil so manga Imisiren
a pepekaantap kiran. Tanto siran a miyangaalek na gomiyoraok siran den ko Allah.
11 Pitero iran ki Mosa a "Ino kami ngka pen sii pagowita sangkai a disirto a ron kami
pematay? Ba da den a kelebengan roo sa Misir? Antonaa angkai a inikidia ngka rekami
sangkai a kiniliyon ka rekami sa Misir?
12 Ba ami reka da matero roo sa Misir a taregi kami ngka ago pakipangongoripenen kami
ngka den ko manga Imisiren? Tomo so kapengongoripena rekami o manga Imisiren a di
so kapematay ami sii sangkai a disirto!"
13 Simbag siran i Mosa a tig iyan a "Di kano pekelek! Mbayorantang kano baden ka
kemasaan iyo o antonaa i penggolaolaan o Allah sa kasebeta niyan rekano imanto. So
manga Imisiren a kamamasaan iyo imanto na di niyo den keilay peroman.
14 So den so Allah i pengato rekano; ba kano den rerenek."
15 Mandiyadi na pitero o Allah ki Mosa a "Ino ka raken penggoraok? Teroa ngka ko
manga Israil a taros siran den.
16 Na seka peman na bayaon ka so teken ka na go ngka antapen ko ragat. Kesisi so ig
kaan makaokit so manga Israil ko ragat ko mamara a lopa.
17 Na sabap sa pekategasen ko so poso o manga Imisiren na petelokonan iran roo so
manga Israil. Na kebantogan ako a nggolalan ko penggolaolaan ko ko Piraon ago so
langon o sondaro niyan taman den ko manga karo niyan ago so kipageeda on.
18 Na ketokawan o manga Imisiren a saken so Allah amay ka kabantogan ako a nggolalan
ko Piraon ago so manga karo niyan ago so kipageeda on."
19 Samaoto na so Malaikat o Tohan a sisii ko maoonaan o isa ka maginged a Israil na
tomipas ko oriyan iran. Na sakamaoto mambo a miyogalin so mapopolaos a gabon a
poon ko onaan iran ka sii tominindeg ko oriyan iran
20 Sii ko pageletan o manga Imisiren ago so manga Israil. Sii sangkoto a kagagawii na
maliboteng so gabon ko sabala na maliwanag ko sabala on. Kagiya ka maoto na da den
makandasega so manga Imisiren ago so manga Israil ko miyababasa gawii.
21 Na biter i Mosa a lima niyan sa tampar sa ragat na sii ko miyababasa gawii na
pepakapagendoden o Allah so ragat a nggolalan ko mabager a ndo a pepekapoon sa
sebangan, na biyaloy niyan a mamara a lopa. Miyasisi so ig
22 Na taros a rominipag so manga Israil ko ragat sii ko mamara a lopa a mikekeleb on so
ig ko kawanan diwang iran.
23 Pitelokonan siran o manga Imisiren ko ragat a so den so langon a manga koda o Piraon
taman den ko manga karo niyan ago so kipageeda on.
24 Kagiya sobo na so Allah a sii ko mapopolaos a apoy ago gabon na tiyolongan iyan
angkoto a madakel a sondaro a manga Imisiren na giyorigaw niyan siran.
25 Piyakagenek iyan tominger so manga tirikan o manga karo iran kaan maregen a
kapepekaiseg iran. Na pitero o manga Imisiren a "Palagoyan tano so manga Israil ka
ipepengato siran den o Allah sii rektano!"
26 Giyoto a pitero o Allah ki Mosa a "Bayaon ka a lima ngka sa tampar sa ragat kaan
makakasoy so ig sii ko manga Imisiren a rakes o manga karo iran ago so kipageeda on."
27 Na inibayaw i Mosa a lima niyan sa tampar sa ragat, na kagiya somebang so alongan
na miniasal so ragat. Piyanga dadasengan o ig so manga Imisiren ko kapepelagowi ran
on, na piyanalimpato siran o Allah sii ko ragat.
28 Miniasal so ig ago miyamangikolob ko manga karo ago so kipageeda on taman den ko
langon a manga sondaro a Imisiren a mitelokon ko manga Israil sii ko ragat; da den a ba
isa kiran bo a ba miyalamba.
29 Ogaid na so manga Israil na miyakaokit siran ko ragat a lomiyalakaw ko mamara a
lopa a mikekeleb so ig ko mbala a kilid iran.
30 Sangkoto a gawii na siyabet o Allah so manga Israil a poon ko lima o manga Imisiren;
na miyailay o manga Israil so manga bangkay o manga Imisiren a miyamangidese ko kilid
o ragat.
31 Na kagiya kabantayan o manga Israil so mala a kabarakat o Allah a minitaban iyan ko
manga Imisiren na inikalek iran so Allah na siyarigan iran sekaniyan pen taman ki Mosa a
oripen iyan.
IKSODOS 15
So Inidikir i Mosa
Oriyan iyan na inidikir i Mosa ago so manga Israil angkai a indikir ko Allah:
"Ndikiran aken so Allah,
ka sekaniyan i lebi a maporo.
So manga koda ago so kikokoda on
na inipangitog iyan ko ragat.
2 Ipegidaida aken so Allah a bager aken;
sekaniyan i miyakasabet raken.
Podin aken sekaniyan a Tohan ko,
a Tohan mambo o ama aken; na mbentogen aken sekaniyan.
3 So Allah na mapasang i kapakitidawa;
So Allah i ngaran iyan.
4 So manga karo o Piraon ago so manga sondaro niyan
na inipangitog iyan ko ragat.
So lebi a mapasang ko manga poporo a sondaro niyan
na miyangaaled ko Mariga a Ragat.
5 Piyanga tatambonan siran ko madalem a ig;
minitindep siran ko kadaleman on a datar o ator.
6 “Ya Allah, so kawanan a lima ngka
na piyakamemesa so bager iyan.
So kawanan a lima ngka, ya Allah,
na riyopet iyan so manga ridoay.
7 Sabap ko kala a ka i bantogan
na liyangkoloban ka so siran oto a somiyorang reka.
Piyakamborngat ka so pesokeyaw a rarangit ka
na tiyotong iyan siran a datar o gango a ragami.
8 Singawan ka so ragat na miyaporon so ig.
So mareges a ig na miyakatindeg a datar o keleb;
tomigas so madalem a ig ko look o ragat.
9 “Pitero o ridoay a
'Petelokonan ago peraoten ko siran .
Pembagibagiin ko so mapeteban aken.
Penggolaolaan aken kiran so langon o kabaya aken.
Mbindasen ko so pedang aken
na go mbinasaan aken siran.'
10 Ogaid na giya bo a kiyaiyop ka
na minikolob kiran so ragat.
Miyamangigaled siran a datar o timbega
sii ko piyakalekelek a ig.
11 “Ya Allah, antawaa ko manga katohanan i datar ka?
Antawaa i rimbang ka
a kapagaadatan ago masosoti,
a piyakamemesa i bantogan,
ago dii nggolaola sa manga kabarakat?
12 Biter ka a kawanan a lima ngka
na liyamed o lopa so manga ridoay ngka.
13 “Sabap ko limo o ka na pepegagaken ka so manga taw a miyapanabet ka.
Nggolalan ko bager ka na pagowiten ka siran ko soti a kaden ka.
14 Keneg ai o manga nasiyon na sarta den a penanabaden siran;
Tanto a pekarata a ginawa o manga taw sa Pilistiya.
15 Pengaalek so manga dato sa Idom;
tanto a penanabaden so manga olowan sa Mowab;
pengaadaan sa inam so langon a taw sa Kanaan
16 ka peraoten siran a kalek ago katalaw.
Ya Allah, sabap ko kala a ka i kabarakat
na merenek siran baden a datar o manga ator
taman sa kapakaokit o manga taw ngka,
taman den ko kapakasagad o manga taw a miyaaon ka.
17 Isoled ka siran ko inged ago pekakadenen ka pen
sii ko palaw a kawali ngka,
giyoto den so darpa, ya Allah, a inembaalan ka a kaden ka,
a so walay ngka a seka den i miyangon on.
18 Pendato so Allah sa taman sa pakataman."
So Inipagidaida i Mariyam
19 So manga Israil na miyokit siran ko ragat a lomiyalakaw ko mamara a lopa, ogaid na
isako mokit ko ragat so manga koda o Piraon ago so manga karo niyan a rakes o
kipageeda on na piyakaasal kiran o Allah so ig na miyamangikolob kiran ai.
20 Na giyoto a si Mariyam a babay i Aron na kominowa sa garingking na tiyondog
sekaniyan o langon o manga babay a kikakapet mambo sa garingking ago dii sesayaw.
21 Na miyamagidaida si Mariyam a tig iyan a:
"Pagidaidaan tano so Allah,
ka sekaniyan i lebi a maporo.
So manga koda ago so kikokoda on
na inipangitog iyan ko ragat."
So Ig sa Marah ago sa Ilim
22 Oriyan oto na pinakodaan i Mosa so manga Israil na gomiyanat siran ko Mariga a
Ragat na sii siran lomiyalag ko Disirto sa Sor. Miyakatelo gawii a inilalakaw iran ko
disirto na da den a ba iran miyaoma a ig.
23 Miyakatalingoma siran ko darpa a bebetowan sa Marah ogaid na di siran pekainom ko
ig on ka mapait. (Giyanan i sabap a kiyabetowi sangkoto a darpa sa Marah.)
24 Kagiya ka maoto na piyanarotaroan o manga taw si Mosa a tig iran a "Antonaa i
keinom tano?"
25 Mandiyadi na gomiyoraok si Mosa ko Allah, na piyakailay sekaniyan o Allah sa
piyonit. Iniitog iyan ai ko ig na miyabaloy so ig a mapiya i taam.
Roo siran bigan o Allah sa manga kokoman ago manga sogoan, na roo niyan siran pen
tipengan.
26 Tig iyan a "O pakinega niyo piyapiya so dii teroon o Allah a Tohan iyo ago
maginontolan kano ron, na o tagoa niyo pen sa ginawa so manga sogoan iyan ago
peratiyayaan iyo so langon a manga kokoman iyan na da den a ba ko rekano itena ko
manga paniyakit a initana aken ko manga Imisiren, ka saken so Allah a pepemolong
rekano."
27 Oriyan oto na miyakatalingoma siran sa Ilim a aden a sapolo ago dowa a bowalan on
ago pito polo waro a kayo a korma, na roo siran den mikempo ko marani ko ig.
IKSODOS 16
So Roti ago so manga Pogowa
Gomiyanat sa Ilim so langon o isa ka maginged a Israil. Na sii ko ikasapolo ago lima
gawii ko ikadowa olan a kiyapakaawa iran sa Misir na miyakaoma siran sa Disirto sa Sin
sii ko pageletan a Ilim ago Sinay.
2 Sii sangkoto a disirto na so langon o isa ka maginged na piyanarotaroan iran si Mosa
ago si Aron
3 A tig iran kiran a "Tomo a ba kami baden piyangowai o Allah sa niyawa roo sa Misir!
Pepemakaontod kami roo a pepemakakan sa sapo ago ped a pangenengken taman sa
manga oosog kami. Ogaid na ba kami niyo baden inowit sangkai a disirto ka pemonoon
kami niyo langon a ongos!"
4 Na pitero o Allah ki Mosa a "Pekioranan aken sekano sa roti a poon sa langit. Oman
gawii na pepemakaliyo so manga taw kaan iran peketimo so tetangkai baden kiran
sangkoto a gawii. Sii sangkai a okit na tepengan ko siran o ba iran paratiyayaa so manga
insarat aken.
5 Sii ko ikanem gawii na tiyagar siran manimo sa dowa takep ko asal a peketimo iran ko
oman gawii."
6 Mandiyadi na pitero i Mosa ago si Aron ko langon a manga Israil a "Amay ka perimon
na ketokawan iyo a so den so Allah i miyakaliyo rekano sa Misir;
7 Na amay ka mapita na keilay niyo so bantogan o Allah, ka miyaneg iyan so di niyo
rekaniyan dii kapanarotaroi. Antawaa kami bes a patot a di niyo dii panarotaroan?"
8 Tig pen i Mosa a "Ketokawan iyo a so Allah i miyakaliyo rekano amay ka mbegan kano
niyan sa sapo a makan iyo ko kaperimon iyan ago roti a ikeosog iyo sii ko kapipita, ka
miyaneg o Allah so di niyo ron dii kapanarotaroi. Antawaa kami bes? Kena a ba sekami
i di niyo dii panarotaroan ka so den so Allah."
9 Na pitero i Mosa ki Aron a "Teroa ngka ko langon o isa ka maginged a Israil a
pangadap siran ko Allah ka miyaneg iyan so di iran dii kapanarotaro."
10 Na sii ko dii kimbitiyarain i Aron ko langon o manga Israil na lomiyangkaw siran ko
disirto na sarta a mipeyag on so bantogan o Allah a ndodoo ko gabon.
11 Na pitero o Allah ki Mosa a
12 “Miyaneg aken so dii kapanarotaro o manga Israil. Teroa ngka kiran a amay ka
perimon na pekakan siran sa sapo, na sii ko kapita iyan na keosog siran sa roti. Amay ka
manggolaola nan na ketokawan iran a saken so Allah a Tohan iran."
13 Sangkoto a kaperimon iyan na makapal a manga pogowa a miyamakatalingoma ko
kampo na minisapeng siran on; na kagiya mapita na madakel a namog a lomiyangkap ko
kampo.
14 Kagiya mati so namog na aden a miyamangibagak a manga roroni ago manga ninipis a
nganin sii ko liyawaw o disirto a mipelagid o giyaw.
15 Kagiya mailay ai o manga Israil na inipamagisei ran a "Antona oto?" Ka di iran
katawan o antonaa oto.
Pitero kiran i Mosa a "Giyanan so roti a inibegay rekano o Allah a kekan iyo.
16 Na giyai i inisogo rekano o Allah: so oman i isa rekano na pangowa on sa tetangkai
rekaniyan. Kikowa niyo ron sa nggagaisa ka gantang so oman i isa a taw ko pamiliya
niyo."
17 Na pinggolaola o manga Israil so miyatero kiran; so ped kiran na miyangowa on sa
madakel, na so peman so ped na maito.
18 Na kagiya pangasaden iran ko gantang na so miyangowa on sa madakel na da on
kasobrai; na so miyangowa on sa maito na da on kakorangi. So oman i isa kiran na
miyakakowa on sa mitangkai rekaniyan.
19 Na pitero kiran i Mosa a "O ba den a pakapitai ron o apiya antawaa rekano."
20 Apiya pen oto na so ped kiran na da iran pakinega si Mosa ka milalamba siran on sa
piyakapitaan iran, ogaid na piyamangoled ago miyaosang den. Sabap sii na
kiyararangitan siran i Mosa.
21 Oman mapita na pepengowa so oman i isa sa tetangkai rekaniyan, na igira a peranti so
alongan na peketeno so pepemangibagak on ko disirto.
22 Sii ko ikanem gawii na miyamangowa siran on sa dowa takep a kadakel iyan maana a
dowa ka gantang ko oman i isa kiran, na so manga pelokelokesen o isa ka maginged na
pipenon iran ai ki Mosa.
23 Pitero iyan kiran a "Miyatero den o Allah a mapita na Gawii a Indeke, a so soti a gawii
a pantag bo ko Allah. Kagiya ka maoto na pangiloto kano ron imanto sa saden sa kabaya
iyo a pagilotoon iyo ron, na tinda kano sa saden sa kabaya iyo a itinda iyo ron. Na so
langon o kesama on na tagoa niyo taman mapita."
24 Na piyakapitaan iran ai a aya kiran den inisogo i Mosa, na da ini manga oosang aya
pen o ba piyamangoledi.
25 Na pitero kiran i Mosa a "Kana niyo anan imanto, ka imanto na Gawii a Idedeke a
pantag bo ko Allah. Ka da den a ba niyo ron ketoon ko lopa imanto.
26 Nem gawii a kapakapengowa niyo ron, ogaid na sii ko ikapito gawii, a so Gawii a
Idedeke, na da a ba on ketoon."
27 Apiya oto na aden pen a manga taw a lominiyo ko ikapito gawii ka pengowa on, ogaid
na da den a ba iran on miyatoon.
28 Mandiyadi na pitero o Allah ki Mosa a "Ay katey pen a kapesengkaa niyo ko
kaparatiyayaa niyo ko manga sogoan ago insarat aken rekano?
29 Tanodi niyo a saken a so Allah i migay rekano ko Gawii a Idedeke. Giyanan i sabap a
igira a ikanem gawii na pembegan aken sekano sa pangenengken a di rekano dii toon ko
dowa gawii. So oman i isa rekano na tareg ko kakadenan iyan ko ikapito gawii; da den a
ba rekano pekaliyo."
30 Mandiyadi na domike so manga taw ko ikapito gawii.
31 Bitowan o manga Israil angkai a roti sa 'manna'. Datar ai o maroni a liso a mapoti a
aya taam iyan na datar o biskowit a sasaogan sa gola teneb.
32 Na pitero i Mosa a "Giyai i inisogo o Allah: 'Tago kano sa isa ka gantang ko manna a
pantag bo ko manga moriyataw niyo kaan iran mailay so roti a inipamegay aken rekano a
makan iyo sii ko disirto isako pakaawaan aken sekano sa Misir.'"
33 Na tig i Mosa ki Aron a "Kowa ka sa omoy na go ngka tagoi sa isa ka gantang a
manna; na betaden ka ini ko hadapan o Allah kaan matago a pantag bo ko manga
moriyataw tano."
34 Tiyoman i Aron so inisogo o Allah ki Mosa ka inibetad iyan so manna ko danga o
Kaban sa Kapasadan kaan matago a paninggalan.
35 Na so den so manna i pekekan o manga Israil ko soled o miyakapat polo ragon taman
ko kiyapakaoma iran ko darpa a aden a taw ron; peken iran den so manna taman sa
minisampay siran ko temanaan o inged a Kanaan.
36(Aya kalilid a pegosaren a asad sa masa oto na bebetowan sa 'Ipah' a aya kala iyan na
sapolo ka gantang.)
IKSODOS 17
So Ig a Miyakapoon ko Lakongan
Gomiyanat so isa ka maginged a Israil sii ko Disirto sa Sin na igira a pesogoon siran o
Allah na poon ko isa a darpa na petepas siran ko ped a darpa. Mikampo siran sa Ripidim
ogaid na da a ig a ba roo keinom o manga taw.
2 Kagiya ka maoto na pimbongetan iran si Mosa a tig iran a "Begi kami ngka sa ig a
mainom ami!"
Tig i Mosa a "Ino ako niyo dii mbongeti? Ino niyo petepengi so Allah?"
3 Ogaid na tanto den a pekewaw so manga taw, na piyanarotaroan iran si Mosa a tig iran
a "Ino kami ngka kowaa sa Misir na inowit kami ngka sii a pemonoon kami ngka bo a
kawaw ago so manga wata ami taman ko manga pangangayamen?"
4 Na gomiyoraok si Mosa ko Allah a tig iyan a "Antonaa i mikidia ko sangkai a manga
taw? Magaan ako iran den ai robaken a ator."
5 Na aya inisembag o Allah ki Mosa na "Pakaonota ngka so ped ko manga pelokelokesen
ko manga Israil na ona kano ko manga taw. Aawidi ngka so teken a inibadas ka sa
lawasaig a Nail.
6 Pekatindeg ako ko kasasangoran iyo ko obay o lakongan roo sa Palaw a Sinay. Badasi
ngka so lakongan ka pekapoon on so ig a keinom o manga taw." Na pinggolaola den ai i
Mosa ko kamamasai ron o manga pelokelokesen o manga Israil.
7 Na bitowan iyan angkoto a darpa sa 'Masah' ago 'Miribah' ka kagiya miyamanarotaro
roo so manga Israil ago tipengan iran so Allah a tig iran a "Ba sisii rektano so Allah ago
so da?"
Tiyaban so manga Amalik
8 Miyakaoma so manga Amalik ka nggobaten iran so manga Israil roo sa Ripidim.
9 Na pitero i Mosa ki Yosowa a "Pagaraw ka ko manga mama rektano na liyo kano na go
kano pakitidawa ko manga Amalik. Mapita na tindeg ako ko poro o bobongan a
kakapetan ko so teken a piyakambarakat o Tohan."
10 Pinggolaola i Yosowa so miyatero on i Mosa ka lominiyo siran ago miyamakitidawa
ko manga Amalik; samaoto na tomiyakedeg si Mosa, si Aron ago si Hor ko poro o
bobongan.
11 Taman ko kibabayaon i Mosa ko manga lima niyan na pepekataban so manga Israil,
ogaid na igira a pekibaba iyan a lima niyan na aya pepekataban na so manga Amalik.
12 Kagiya dokawan den a manga barokan i Mosa na kominowa si Aron ago si Hor sa ator
na piyakiontodan iran ki Mosa. Na pimbalaan iran sekaniyan a ibabayaw iran so manga
lima i Mosa kaan di kibaba taman ko kasedep o alongan.
13 Sabap roo na miyataban i Yosowa a pedang so manga sondaro a Amalik.
14 Oriyan iyan na pitero o Allah ki Mosa a "Soraten ka ko ribro so totol makapantag sii
kaan peketademi na go ngka batiyaa ki Yosowa; ka kagiya ponasen ko ko liyawaw o
doniya so apiya antonaa a pekitadem ko manga Amalik."
15 Na mimbaal si Mosa sa aparan na bitowan iyan ai sa "So Allah i Pandi aken."
16 Na pitero iyan a "Ka so manga lima na sii minibayaw ko korsi o Allah! Na
makipetidawa so Allah ko manga Amalik taman ko kapepemagapidapidi kiran."
IKSODOS 18
Inibentel i Hitro si Mosa
So panogangan i Mosa a mama a si Hitro a imam sa Midiyan na miyaneg iyan so
makapantag ko langon taman a inikidia o Tohan ki Mosa ago so manga Israil ago so
kiyapakaliyowa kiran o Allah sa Misir.
2 Kagiya ka maoto na somiyong si Hitro ki Mosa a pakaoonoten iyan so karoma i Mosa a
si Siporah a piyakabaling iyan on gowani,
3 Ago so dowa kataw a wata iyan a mama a si Girsom ago si Iliyasar. Iningaranan i
Mosa so isa on sa Girsom ka kagiya miyatero iyan a "Rait ako ko inged."
4 Miyatero iyan pen a "So Tohan o ama aken na aya raken tomiyabang na siyabet ako
niyan ko kambonoa raken o solotan sa Misir." Kagiya ka maoto na bitowan iyan so isa on
sa Iliyasar.
5 Na si Hitro a ped iyan so manga wata ago so karoma i Mosa na miyakaoma siran ko
disirto a ron kakampo si Mosa ko marani ko palaw o Tohan.
6 Andang den a minisogo roo i Hitro ki Mosa a tig iyan a "Saken a si Hitro a panogangan
ka na pekatalingoma reka a ped aken so karoma ngka ago so dowa kataw a manga wata
iyan."
7 Kagiya ka maoto na lominiyo si Mosa ka pagalaon iyan so panogangan iyan; na
somiyodiyod sekaniyan on ago inarekan iyan. Kagiya makaselama siran na somiyoled
siran ko barombarong.
8 Piyanotol i Mosa ki Hitro so langon taman a pinggolaola o Allah ko Piraon ago so
manga Imisiren ko kiyapanabangi niyan ko manga Israil ago so langon a piyanga ookitan
iran a maregen ko kiyalalakaw iran ago so kiyasabeta kiran on o Allah.
9 Miyababaya si Hitro ko kiyanega niyan ko langon taman a manga pipiya a pinggolaola o
Allah ko manga Israil ko kiyapokasa niyan kiran ko kapaar o manga Imisiren.
10 Tig iyan a "So podi na rek o Allah a miyokas rekano ko lima o Piraon ago so manga
Imisiren ago miyoka ko manga taw ko kapepengongoripena kiran sa Misir!
11 Imanto na kiyatokawan aken a lebi a mala i gees so Allah a di so langon a katohanan,
ka pinggolaola niyan oto ko manga Imisiren isako pakadapanasen iran so manga Israil!"
12 Na giyoto a kominowa si Hitro sa pangangayamen a pekorbanen ago isepaat iyan a
totongen, ago ped pen a manga isepaat iyan ko Tohan; na miyangeped on si Aron ago so
langon a pelokelokesen o Israil sa kakena iran ko kandori ko kamamasaan o Tohan.
So Kiyatoro sa manga Pangongokom
13 Sii ko miyakatalondog a gawii na moontod si Mosa a pepengokomen iyan so manga
taw, na pepemanong siran on ipoon ko kapipita na taman den ko kiyaperimon iyan.
14 Kagiya mailay i Hitro so langon a dii nggolaolaan i Mosa mipantag ko manga taw na
inisean iyan a tig iyan a "Antonaa angkai a ikikidia ngka ko manga taw? Ino seka bo i
oontod a pepengokom sangkai langon a manga taw a lomilibet reka ipoon ko kapipita
taman ko kaperimon iyan?"
15 Somimbag si Mosa a tig iyan a "Pepemanong siran raken kaan iran katokawi o antonaa
i kabaya o Tohan.
16 Igira a aden a di pegayonan o dowa kataw na pesong siran raken na pekokomen aken
siran ago pepekitokawan aken kiran so manga sogoan ago manga kitab o Tohan."
17 Na pitero on i Hitro a "Giyangkai a di ngka dii nggolaolaan na kena a ba mapiya.
18 Ba ka den peroogi ago giyangkai a manga taw a pepemanong reka. Tanto reka a
maregen so galebek. Di ngka ini kegaga o ba seka bo.
19 Na, pamakinega ko ngka ka aden a ipemosawir aken reka; na pengnin ko a misarta
reka so Tohan. Patot a seka den i akila ko manga taw a dii penon ko Tohan ko manga
simoket iran.
20 Na patot pen a kipepengendaon ka kiran ko manga sogoan ago so manga kitab, ago so
kapepekitokawi ngka kiran ko okit a kapepeginetaw iran ago so paliyogat a
penggolaolaan iran.
21 Ogaid na aya mapiya na so langon angkai a manga taw na pagarawi ngka sa mapasang
a manga mama a maaleken ko Tohan ago pepenga sasarigan a ipekegowad iran so
kakowa sa tendan, na pakapagolowana ngka siran ko pisenggibowan, pimbagatosan,
pilimapolowan ago pisepolowan ko manga taw.
22 Na siran den i lalayon ka pepekakokoma ko manga taw. Kewit iran reka so oman i
maregen a rido, ogaid na so langon a makep on na siran den i pepekakokom on.
Pekaogop siran reka na pekalebod so galebek ka.
23 O nggolaolaa ngka ini sii ko kapesogoa reka o Tohan na kekena ngka so galebek, na
pemakabaling langon angkai a manga taw a kikasosoat."
24 Piyakineg i Mosa so panogangan iyan ka ininggolalan iyan so langon taman a
inimosawir iyan on.
25 Piyagarawan iyan sa mapasang a manga mama so kalangolangon o manga Israil na
piyakapagolowan iyan siran ko pisenggibowan, pimbagatosan, pilimapolowan ago
pisepolowan ko manga taw.
26 Miyabaloy siran a pemangokom lalayon ko manga taw. So maregen ko manga rido na
aya iran pegowiten ki Mosa, ogaid na so oman i makep on na siran den i pekokom on.
27 Oriyan iyan na piyakaganat den i Mosa so panogangan iyan na miyaling si Hitro ko
inged iyan.
IKSODOS 19
Sii sa Palaw a Sinay
1-2 Inawaan o manga Israil a Ripidim na miyakaoma siran ko Disirto sa Sinay sii den ko
gawii a kiyatarotop a telo olan ko kiyapakaawa iran sa Misir. Na roo siran mikampo ko
disirto ko danga o Palaw a Sinay.
3 Tomiyakedeg si Mosa ko palaw ka pengadap ko Tohan. Na tiyalowan sekaniyan o
Allah sii sangkoto a palaw a tig iyan a "Giyai i peteroon ka ko manga Israil a manga
mbawataan o Yakob:
4'Kiyamasaan iyo so inikidia ko ko manga Imisiren ago andamanaya pen i kiyaawidi aken
rekano sii raken a datar o kapegawidi o agila ko wata iyan sii ko manga papak iyan.
5 Na, o pangongonotani ako niyo sa ikelas ko ginawa niyo ago tomanen iyo so kapasadan
aken na kebaloy kano a manga pagtaw aken. Rek aken so dalem o doniya ogaid na
kearaw kano ko langon o manosiya
6 A kisenggay a rek aken a nasiyon a palaya manga imam a isa ka ndatoan.' Giyanan den
i peteroon ka ko manga Israil."
7 Na komiyasoy si Mosa na linimod iyan so manga pelokelokesen o manga taw na
piyayag iyan kiran so langon a inisogo on o Allah a peteroon iyan.
8 Na parengarengan a kiyasembag langon o manga taw a tig iran a "Kalangolangon o
pitero o Allah na penggolaolaan ami!" Na inisampay i Mosa ko Allah so inisembag iran
on.
9 Pitero o Allah ki Mosa a "Pekatalingoma ako reka a nggolalan ko makapal a gabon
kaan maneg o manga taw so di aken reka dii kimbitiyarain ago an ka iran kasarigi ipoon
imanto."
Na giyoto a pitero i Mosa ko Allah so miyatero o manga taw.
10 Na tig o Allah ki Mosa a "Song ka ko manga taw na go ngka kiran pakisotin a ginawa
iran imanto ago mapita. Kepamamipian iran so manga nditaren iran
11 Kaan siran makatiyagar ko ikatelo gawii, ka sii sangkoto a gawii na penog so Allah ko
Palaw a Sinay a pekeilay den o langon o manga taw.
12 Pametadi ngka sa temanaan so melilibeta ko palaw a da den a ba on pekalepas ko
manga taw, na teroa ngka kiran a 'Pananggilai niyo o ba kano makatakedeg ko palaw aya
pen o ba kano makadapo ko itado niyan; ka apiya antawaa i someko ko palaw na kebono.
13 Disomala a perobakan sekaniyan a ator o di na mbonoon a pana sa da den a ba
rekaniyan pekaseko. Ndatar so manosiya ago so pangangayamen a di den mapeparo o ba
sekaniyan pen oyaga. Ogaid na pekadaseg siran ko palaw amay ka moni sa malayat so
bogiyong."
14 Mandiyadi na tomiyondagay si Mosa ko palaw na piyamakisoti niyan ko manga taw a
ginawa iran, na piyamamipian iran so manga nditaren iran.
15 Pitero iyan kiran a "Titiyagara niyo a ginawa niyo ko ikatelo gawii; o ba niyo
rembanga so manga karoma niyo."
16 Sii ko kapipita ko ikatelo gawii na mindadalendeg ago mikilakilat a misasarta on so
kiyapakagemaw o makapal a gabon ko poro o palaw ago so kiyaoni pen o bogiyong sa
tanto a matanog; na piyananabad sa kalek so langon a taw ko kampo.
17 Piyangowit siran i Mosa ko liyo o kampo kaan iran maadap so Tohan, na
miyamanindeg siran ko kababaan o palaw.
18 Kiyakoloban sa bel so palaw ka kagiya miyanog on so Allah sii ko apoy. Peselpot on
so bel a datar o mala a rapog, na so den so palaw i lininog sa tanto a mabager,
19 Na pepekatanog a kapegoni o bogiyong. Na giyoto a mitero si Mosa, na simbag
sekaniyan o Tohan a nggolalan ko dalendeg.
20 Tomiyana so Allah ko poro o Palaw a Sinay, na tiyalowan iyan si Mosa ko poro o
palaw. Tomiyakedeg on si Mosa
21 Na pitero on o Allah a "Tondagay ka na go ngka pakaiktiyara so manga taw ka o ba
iran malepas so temanaan o katatagoan raken sa kapembantay iran; ka o nggolaolaa iran
oto na madakel a pematay kiran.
22 Apiya so manga imam a lalayon pepekarani ko Allah na kesoti ran pen a ginawa iran,
ka o di, na ndenegen ko siran."
23 Na pitero i Mosa ko Allah a "Di den mapekatakedeg so manga taw sangkai a Palaw a
Sinay ka seka den i miyakaiktiyar rekami ko kiyateroa ngka sa 'Pametadi ngka sa
temanaan so melilibeta ko palaw na go ngka senggain a soti.'"
24 Na tig o Allah a "Tondagay ka na go kano sii kasoy ago si Aron. Ogaid na so manga
imam ago so manga taw na o ba iran lepasa so temanaan sa katekedeg iran raken ka
ndenegen ko siran."
25 Mandiyadi na tomiyondagay si Mosa ko manga taw na pitero iyan kiran so pitero on o
Allah.
IKSODOS 20
So Sapolo a manga Sogoan
Na pitero o Tohan so langon angkai a manga katero:
2 “Saken so Allah a Tohan iyo a aya rekano miyakaliyo sa Misir a ron kano
miyapangongoripen.
3 “Da den a Tohan a ba ngka simbaa a rowar raken.
4 “Di ngka pagembaalen a ginawa ngka sa barahala a kisayan ko apiya antonaa a kaaden a
matatago ko langit sii sa poro, o di na sii ko doniya sii sa baba, o di na sii ko ig ko
didalem a lopa.
5 Di ngka sodiyodi so apiya antonaa a barahala aya pen o ba ngka simbaa; ka saken a so
Allah a Tohan ka na tanaod a Tohan a ipetena aken ko manga wata so dosa o manga ama
iran taman ko ikatelo ago ikapat ka apid o siran oto a pekegowad raken,
6 Ogaid na ipekelimo aken so pipira nggibo ko siran oto a pekebabaya raken ago petoman
ko manga sogoan aken.
7 “Di ngka pagosara so Ingaran o Allah a Tohan ka ko ribat a manga okit, ka selaan den o
Allah so apiya antawaa i pagosaren iyan so Ingaran iyan ko ribat.
8 Tatademi ngka so Gawii a Idedeke ko kisesenggain ka on a soti.
9 Nem bo gawii a mipenggolaola ngka ko langon a galebek ka,
10 Ogaid na so ikapito gawii na Gawii a Idedeke a pantag bo ko Allah a Tohan ka. Sii
sangkoto a gawii na da den a ba ngka penggolaolaa ko apiya antonaa galebek ka, apiya
seka o di na so wata a ka a mama o di na babay, so oripen ka a mama o di na babay, o di
na so manga pangangayamen ka, aya pen o ba so mananangga a mababaling ko inged ka.
11 Ka miyakanem gawii a kiyambaali o Allah ko langit, so doniya ago so ragat taman den
ko langon taman a madadalem on, ogaid na domike sekaniyan ko ikapito gawii. Kagiya
ka maoto na riyakmatan o Allah so Gawii a Idedeke na inisenggay niyan a soti.
12 “Pagadati ngka so ama a ka ago so ina a ka kaan ka mamboway ko inged a imbegay
reka o Allah a Tohan ka.
13 “Di ka pemono.
14 “Di ka pesebo.
15 “Di ka pemanekew.
16 “Di ngka peseksiin so di benar mipantag ko siringan ka.
17 Di ngka kesigin so walay o siringan ka; di ngka kesigin so karoma o siringan ka, o di
na so oripen iyan a mama o di na babay, o di na so sapi iyan, so kimar iyan o di na so
apiya antonaa a rek o siringan ka."
So Kalek o manga Taw
18 Kagiya maneg o manga taw so dalendeg ago so oni o bogiyong ago miyailay iran pen
so kilakilat ago so kapegbel o palaw na piyananabad siran sa kalek, na kipakatitindeg
siran baden a maawat on.
19 Na pitero iran ki Mosa a "Seka den i pakimbitiyarai rekami ka pakinegen ami seka,
ogaid na di ngka rekami pakapeteroa so Tohan ka ipematay ami baden."
20 Tig i Mosa a "Di kano pekelek; ka miyakatalingoma sii so Tohan sa katepengi niyan
rekano ago an malalayon so kipekeleken iyo ron kaan kano di makapendosa."
21 Na mitelimbagak so manga taw a maawat sii ko kapepekarani i Mosa ko domadetem a
gabon a ndodon so Tohan.
So manga Barahala ago so manga Aparan
22 Na giyoto a pitero o Allah ki Mosa a "Teroa ngka ini ko manga Israil: 'So den so
manga ginawa niyo i miyakaseksi ko kinimbitiyarain aken rekano a poon sa kasorgaan:
23 Di niyo pagembaalen a ginawa niyo sa manga barahala a pirak o di na bolawan a
mbalowin iyo a katohanan a ipagoman iyo raken.
24 “ 'Na mbaalen ako niyo sa aparan a lopa a ron iyo dii makorban so manga bilibili,
kambing ago sapi iyo a ipesepaat iyo raken a petotongen ago ipesepaat iyo pantag bo ko
kanggiginawai
. Na so oman i darpa a isenggay aken a ron ako niyo pesimbaa na pekatalingoma ako
rekano na perakmatan ko sekano.
25 O pagembaalen ako niyo sa aparan a manga ator na di niyo pagembaali a ba kisasapili
so manga ator, ka kedaan sa kasosoti o osari niyo sa kasangkapan.
26 Aya pen o ba niyo mbaali sa towak so aparan aken ka o ba kano madiyampa amay ka
manik kano ron.' "
IKSODOS 21
So manga Oripen a Hibriyo
"Giyai i manga kokoman a imbegay ngka kiran:
2 “O pamasa ka sa oripen a mama a Hibriyo na nem bo ragon a kapenalagadi niyan reka,
ka sii ko ikapito ragon na kebokaan sekaniyan a di mapekabayad.
3 O sasakataw sekaniyan a miyakowa ngka na sekaniyan bo i kebokaan, ogaid na o aden a
karoma niyan ko kiyakowaa ngka on na kebokaan sekaniyan mambo a ped o karoma
niyan.
4 O so kadnan iyan i miyakabegay ron sa karoma
na go siran mbabawata sa manga mama ago babay na so karoma niyan ago so manga wata
iyan na kibilang a rek o kadnan iyan, na so bo so mama i kebokaan.
5 “Ogaid na o teroa o oripen a 'Pekebabayaan ko so kadnan aken ago so karoma ko ago so
manga wata aken,' ago di niyan pen kabaya o ba kabokai
6 Na kewit sekaniyan o kadnan iyan ko walay a pesimbaan. Sii niyan mapekatindeg ko
obay o pinto o di na sii ko kilid o pintoan na ron iyan kepesowi so tangila niyan; na
kebaloy sekaniyan a oripen den sa taman sa kaooyagoyag iyan.
7 “O pesaa o mama so wata iyan a babay a mapengongoripen na kena a ba datar o oripen
a mama a pembokaan.
8 O mapesa so babay ko mama a mapengaroma niyan ogaid na da niyan temboon so
babay na mapekiaon iyan ko ama iyan. Di mapeparo ko kadnan iyan o ba niyan pesaa so
babay ko manga mananangga ka kagiya da niyan katomani sa pasad.
9 Na o pemasaa o mama so babay a imbegay niyan ko wata iyan a mama na kisayan iyan
sa datar o ba niyan wata a babay.
10 O pangaroma so mama sa ikadowa a babay na di niyan kelebatan so pangenengken
ago so nditaren a ipembegay niyan ko miyaona a babay a rakes on so kakakaromai niyan
on.
11 O di tomana o mama angkai a telo a atastanggongan iyan on na kebokaan so babay a di
den mapekabayad sa pirak."
Manga Kokoman ko Kabatali ko Ped
12 “Apiya antawaa i makasogat sa taw a inipatay niyan na disomala a mbonoon.
13 Inonta bo o da niyan ai tibabaa ka baden kahanda o Tohan a kiyanggolaola ini na
makapegapas sekaniyan ko darpa a isenggay aken rekano, na kelinding roo.
14 Ogaid na amay ka kararangitan o taw so ped iyan na go niyan tibabaa mono na kebono
sekaniyan den apiya pen miyakapagapas ko aparan aken.
15 “Disomala a mbonoon so apiya antawaa i meraneg sa ama iyan o di na so ina iyan.
16 “Disomala a mbonoon so apiya antawaa i manegel miyag sa ped a taw na go niyan ai
pesaa o di na matatangan iyan pen amay ka matoon.
17 “Disomala a mbonoon so apiya antawaa i pesinta sa ama iyan o di na so ina iyan.
18 “O aden a mbobono a manga mama na go sogata o isa on so ped iyan a ator o di na
sontok a kena a ba niyan petain ka ba sekaniyan den miyapanisekit sa igaan
19 Na di kedaneg so somiyogat on o makambowat ago makalalakaw a teteken so ped
iyan. Ogaid na kebayadan iyan baden so miyailang a oras o ped iyan ago mipenggolalan
iyan pen a kapemolongi ron piyapiya.
20 “O pamentola o taw so oripen iyan a mama o di na babay na go niyan ai patain na
kedaneg sekaniyan.
21 Ogaid na o makambowat so oripen iyan ko salongan o di na sii ko ikadowa gawii na di
sekaniyan kedaneg ka kagiya rek iyan angkoto a oripen.
22 “O aden a mbobono a manga mama na o makasogat siran sa maogat a babay na go
bagowasi a da tanto sekaniyan kasakiti na disomala a kesala so miyakasogat on sa apiya
antonaa i isela on o karoma o babay asar a peron o manga pepangokom.
23 Ogaid na o kasakiti so babay na aya kidaneg iyo ron na niyawa a pantag o niyawa,
24 Mata a pantag o mata, ngipen a pantag o ngipen, lima a pantag o lima, ai a pantag o ai,
25 Lowis a pantag o lowis, pali a pantag o pali ago baneg a pantag o baneg.
26 “O masogat o taw so sabala a mata o oripen iyan a mama o di na babay na go
mabinasa na kebokaan iyan angkoto a oripen ka aya niyan kibayad ko mata o oripen.
27 Na o masogat iyan so ngipen o oripen iyan na go kasepoi na sakamaoto mambo a
kebokaan iyan ka aya niyan kibayad ko ngipen o oripen.
So Atastanggongan o Kirek
28 “Amay ka aden a mama o di na babay a masidong o mama a sapi na go niyan patain na
disomala a kerobak a ator so sapi taman sa matay, na di ken so sapo iyan. Ogaid na di ini
kidaneg ko kirek ko sapi.
29 Inonta bo o aya den olaola gowani o sapi na so kapanidong sa taw ago miyapakaiktiyar
den so kirek on na go da niyan on ai kodalen na o aden a mama o di na babay a mapatay o
sapi na kerobak a ator so sapi na kebono mambo so kirek on.
30 Ogaid na o mapeparo a kesala baden na keaon iyan a niyawa niyan ko kambayadi
niyan ko minisala on.
31 O makasidong so sapi sa wata a mama o di na babay na mipenggolalan mambo angkai
a kokoman ko kirek ko sapi.
32 Na o makasidong so sapi sa oripen a mama o di na babay na pekabayad so kirek on sa
telo polo a pelata a pirak ko kadnan o oripen, na kerobak a ator so sapi.
33 “O kowai o taw sa dapeng so galebo o di na komiyalot sekaniyan sa galebo sa da niyan
bo dapengi na o aden a maolog on a sapi o di na kimar
34 Na kapembayadan o kirek ko galebo so pangangayamanen. Kibegay niyan so pirak ko
kirek ko ayam na kekowa niyan mambo so ayam a miyatay.
35 “O kapalii o sapi so sapi o isa a taw na go niyan patain na mapepesa iran so oyagoyag
on na mapembagi iran so arga iyan; na mapembagi iran pen so sapi a miyatay.
36 Ogaid na o katawi den a pepanidong angkoto a sapi na da on kodalen o kirek na
disomala a kapembayadan iyan so miyatay a sapi na go kekowa niyan mambo."
IKSODOS 22
Kalinding sa Tamok
"O pamanekew so taw sa sapi o di na bilibili na go niyan ai sombalia o di na pesaa na
kapembayadan iyan sa lima takep so sapi ago pat takep so bilibili.
2-4 Disomala a kapembayadan iyan so miyapanekew niyan. Ogaid na o da a kibayad
iyan on na mapepasa sekaniyan a kibayad ini ko miyapanekew niyan. O matoon sa
tangan iyan so pangangayamen a piyanekew niyan a oyagoyag pen a apiya anda ko sapi,
kimar o di na bilibili na kapembayadan iyan sa takep.
"O katokawi so tekew ko kapesoled iyan ko walay sii ko kagagawii na o masogat na go
niyan patain na so miyakapatay ron na di kesala sa bono. Ogaid na o manggolaola ini a
somibang den so alongan na kesala sekaniyan sa bono.
5 “O pakapanateba o taw so manga pangangayamen iyan sii ko pangomaan iyan o di na
pamomolaan iyan a manga obas na go siran madadag na go panateb siran ko pamomolan
o ped a taw na kapembayadan iyan so kebinasa a pamomolan a poon ko lebi a mapiya a
maperagon o di na kerebas ko rek iyan a lopa.
6 “O mamisol so taw na go dola so apoy ko manga paket taman sa miyakatotong ko
pereperan a da pen maragon o di na miyapaginemong na disomala a kapembayadan o
miyamisol so miyabinasa.
7 “O tomadin so taw sa pirak o di na tamok ko siringan iyan na go ini panekewa ko walay
o siringan iyan na o madakep so tekew na makapembayad sa takep.
8 Ogaid na o di sekaniyan ketoon na kewit so kirek ko walay ko hadapan o pepengokom
kaan mapariksa o ba niyan kinowa so rek o siringan iyan.
9 So langon a rido mipantag ko banta a apiya anda ko sapi, kimar, bilibili, nditaren o di na
ped a tamok a miyada na so dowa kataw a di ron dii magagaw na kewit siran ko
pepengokom, na apiya antawaa kiran i kebenaran o pepengokom na makapembayad sa
takep ko ped iyan.
10 “Amay ka aden a itadin o taw ko siringan iyan a kimar, sapi, bilibili o di na apiya
antonaa a pangangayamen na go ini matay, o di na kapalian, o di na aden a miyogaw ron
sa da den a ba on miyakaseksi
11 Na mipesepa o siringan o taw ko hadapan o Allah a da niyan kowaa so ayam iyan. Na
ketarima o kirek on so kinisepaan sii, na di kebayadan o siringan iyan.
12 Ogaid na o piyanekew so ayam ko siringan iyan na kapembayadan iyan ai ko kirek on.
13 O inikeyaga o maila a binatang so ayam na kewit iyan ko kirek on so miyalamba on a
aya on kikarina; ka di niyan kapembayadan so ayam a minikeyaga o maila a binatang.
14 “O somembay so taw sa pangangayamen ko siringan iyan na go kapalii o di na matay
sa da kamasai o kirek on na disomala a kapembayadan iyan on.
15 Ogaid na o ndodon so kirek on ko kiyanggolaola niyan na di ini kapembayadan o
miyanembay. Na o inapinan so ayam na so apin iyan na aya den minibadal ko miyailang.
Manga Kokoman ko Adat
16 O maagak o mama so raga a da a katataalikan on na go niyan rembanga na disomala a
kapembayadan iyan so kibetang on na taros a mapengaroma niyan.
17 Ogaid na o di ron den pakipengaromaan o ama o raga so wata iyan na
makapenginsalaan pen so mama ko kararagai ko babay a datar o kibetang on.
18 “Di niyo pakapegoyaga so babay a pangangatao.
19 “Apiya antawaa i keroma sa binatang na disomala a mbonoon.
20 “Saden sa taw a somapaat ko salakaw a tohan a makaliyoliyo raken a so Allah na
disomala a selaan sa kapatay.
21 “Di niyo pemaratai so rait ko inged ago di niyo pepakaregeni ka manga rait kano
mambo gowani sa inged a Misir.
22 “Di kano pengarasi sa balo o di na ilo.
23 Ka o pangarasii niyo na go sekaniyan raken goraok na mataan den a pagamponen ko
so kapenggoraok iyan.
24 Ka tanto ako a kerarangitan na pemonoon ko sekano ko katidawa, na kebalo so manga
karoma niyo ago keilo sa ama so manga wata iyo.
25 “O pagotangi niyo so apiya antawaa ko manga pagtaw aken a kikakokorangan na di
niyo sowaa so dii tobo; di niyo sekaniyan sekati sa iseg.
26 O tarimaa niyo a sanda so gerab o siringan iyo na kasowin iyo ron sa di pen kasedep o
alongan
27 Ka aya niyan bo ipesepeng ko lawas iyan. Antonaa pen i petenggoben iyan ko
kapekatorog iyan? Amay ka gomoraok sekaniyan raken na pagamponen aken, ka
makalimoon ako.
28 “Di niyo pesintaan so olowan iyo aya pen o ba niyo pagitowitoa so Tohan.
29 “Di niyo pesendoden so kipesepaaten iyo raken ko pereperan, arak ago lana a olibi
niyo.
"Senggain iyo a rek aken so paganay a ipembawata iyo a mama.
30 Sakamaoto mambo a ikidia niyo ko manga sapi ago manga bilibili niyo. Pito bo gawii
a kapekatareg o paganay a mama a nati ko ina iyan, ogaid na sii ko ikawalo gawii na
senggain iyo a rek aken.
31 “Kebaloy kano a manga soti a pagtaw aken. Kagiya ka maoto na di kano ken ko sapo
o pangangayamen a miyapatay o maila a binatang; itogen iyo baden ko manga aso."
IKSODOS 23
Manga Kokoman ko Kaontol ago Kalimo
"Di niyo pekalangkapa so di benar a totol. Di niyo pagogopi so marata a taw ko
kapeseksii niyo ko ribat.
2 “Di niyo pesiyonoti so madakel a taw ko di iran dii kanggolaola sa marata. Na amay ka
peseksi kano ko kakokom na di niyo mbibida so kokoman ko kapagampili niyo ko
kadakelan.
3 Di niyo peramigi so miskin a taw amay ka kokomen.
4 “O mabalak ka so pekedadadadag a sapi o di na kimar o ridoay ngka na wita ngka
rekaniyan.
5 O mailay ngka so kimar o taw a pekegowad reka a miyaoteng sabap ko roran iyan na di
ngka sekaniyan baden pagawai; ogopi ngka makatindeg ko kimar.
6 “O ba niyo di kaontoli sa kokoman so manga miskin amay ka kokomen so rido iran.
7 Pananggilai niyo so kapanendisendit sa di benar, na di niyo mbonoa so taw a maontol o
di na da a miyasogok iyan, ka di aken den pekabenaren so taw a miyakasela.
8 “Di kano terima sa tendan, ka so tendan na pepekabota ko taw a pepekailay ago
pepekabinasa pen ko kabenar o manga oontol.
9 “Di niyo pengarasii so rait ko inged; miyagedam iyo den so kararaiti sabap ko kiyarait
iyo gowani sa Misir.
Kokoman ko Ikapito Ragon ago so Ikapito Gawii
10 “Sii ko soled o nem ragon na makapepemamolaan kano ko lopa iyo ago
makapeperagon kano ron sa pereperan.
11 Ogaid na sii ko ikapito ragon na pakadekea niyo so lopa; di niyo pengowai sa
mangengeto kaan ai kapangowai sa makan o manga miskin rekano, na kekan mambo o
manga iila a binatang so kelamba iran on. Datar ai mambo a ikidia niyo ko
piyamamolaan iyo sa obas ago manga asinda niyo a olibi.
12 “Nem gawii a ipenggalebek iyo, ogaid na sii ko ikapito gawii na di kano penggalebek
kaan makadeke so sapi iyo ago kimar, na kerenggayan mambo so manga oripen iyo ago
manga rait a kigagalebek rekano.
13 “Iktiyari niyo o ba niyo di manggolaola so langon taman a miyatero aken rekano. Di
kano pepemangangay ko ped a manga katohanan; apiya so kapegaloya niyo ko manga
ngaran iran na di."
So Telo a Pista ko Saragon
14 “Makatelo ko saragon na kapepistaan ako niyo.
15 “Selaselaa niyo so Pista ko Kakan sa Paan a da a Tapay ron. Sii ko soled o pito gawii
na kan kano sa paan a da a tapay ron ka aya ko rekano inisogo. Nggolaolaa niyo ai sii ko
matetendo a manga gawii ko olanolan a Abib, ka giyoto so olanolan a kiyapakaliyo niyo
sa Misir.
"Da a ba rekano raken makapengadap a ba da a ipesoasoat iyan raken.
16 “Selaselaa niyo so Pista ko Kaperagon sii ko kipesepaaten iyo ko paganay a inionga o
pereperan a piyamola niyo ko lopa iyo.
"Na selaselaa niyo so Pista ko Kapanimo sii ko kakepopos o ragon amay ka mapanimo
iyo so manga pereperan ko lopa iyo.
17 “Oman saragon sangkai a telo a manga pista na so langon a manga mama rekano na
makapengadap ko Allah a Lebi a Mamaapaar.
18 “Di niyo sepaaten so rogo o pikorban iyo a pangangayamen a ba niyo ron perakesen so
paan a aden a tapay ron. Na di niyo pen pekapitai so sibo o pikorban iyo raken sangkai a
manga pista.
19 “Awidi niyo ko Walay o Allah a Tohan iyo so lebi a mapiya a pereperan ko paganay a
keragon iyo.
"Di niyo petindaan so nati a kambing o di na bilibili sii ko gatas o ina iyan.
So Malaikat o Tohan a Pengonaan ko manga Taw
20 “Ilaya niyo man ka pakapengonaanen ko rekano so isa a malaikat a magipat rekano ko
kapelalakaw niyo ago magowit rekano ko darpa a miyatiyagar aken den.
21 Pakinega niyo sekaniyan ago sowaa niyo so peteroon iyan rekano ka saken i somiyogo
on; di niyo sopaka ka di niyan iperila so kasopaka niyo ron.
22 O pakinega niyo piyapiya so di niyan dii teroon ago inggolalan iyo so langon a ipesogo
aken na peridoon ko so manga ridoay niyo ago sorangen aken so siran oto a pemanorang
rekano.
23 Pengonaan rekano so malaikat aken ka pagowiten kano niyan ko pagiingedan o manga
Amoriyo, Hitiyo, Pirisiyo, Kanaaniyo, Hibiyo ago manga Hibosiyo; na polangen ko siran.
24 Di niyo sodiyodi so manga katohanan iran aya pen o ba niyo simbaa; na di niyo pen
sowaa so manga olaola iran. Nggegebaa niyo so manga barahala iran ago peroropeta niyo
so babarakaten kon a manga ator iran.
25 Simbaa ko niyo a so Allah a Tohan iyo ka perakmatan aken so pangenengken ago so ig
iyo. Pengowaan aken sekano sa manga paniyakit
26 Na da a babay a ba mbagowasi aya pen o ba mabalek sii ko inged iyo; na pekalendoon
aken pen so omor iyo.
27 “Tegoan aken sa kalek ago nggorigaon aken so langon o manga taw a ketalingomaan
iyo. Pakapetelaon ko so langon a ridoay niyo na pelagoyan kano iran.
28 Pekaonaan aken rekano so manga taboowan ko pegantapan iyo ka mbogaon iran so
manga Hibiyo, manga Kanaaniyo ago manga Hitiyo.
29 Di aken siran mbogaon ko saragon kaan di kedai sa taw so kalopaan ago di rekano
tanto a pekadakel so manga iila a binatang.
30 Pesegintonen ko siran mogaw rekano taman sa makadakel kano ago matangan iyo so
inged.
31 “Tegoon aken so temanaan o kapegingedan iyo a poon ko Mariga a Ragat na taman ko
ragat o manga Pilistiyo, ago poon ko disirto na taman ko lawasaig a Yopratis. Peladen
ko rekano so manga taw a mababaling ko inged na mapemogaw niyo siran sii ko
kapegantap iyo kiran.
32 Di kano kiran pakipepesadanowa aya pen o ba sii ko manga katohanan iran.
33 Di niyo siran pekabalinga ko kapegingedan iyo ka o nggolaolaa niyo ai na
pakapendosaan kano iran raken; so kasimbaa niyo ko manga katohanan iran na
matamataan a kilitag rekano.
IKSODOS 24
Tiyangked so Kapasadan
Pitero o Allah ki Mosa a "Takedeg kano raken, seka ago si Aron, si Nadab, si Abiho ago
pito polo ko pelokelokesen o manga Israil. Simba kano amay ka mawatan kano raken
pen;
2 Seka bo i pekarani raken ka di kepakay o ba siran raken pekarani aya pen o ba reka
makaonot tomakedeg so ped a manga taw."
3 Mandiyadi na somiyong si Mosa ko manga taw na piyanotol iyan kiran so langon a
manga katero o Allah ago so manga sogoan iyan; na mirengarengan siran somembag a tig
iran a "Langon taman a miyatero o Allah na ipenggolalan ami!"
4 Na inisorat langon i Mosa so manga katero o Allah.
Sii ko teked a kapipita ko miyakatalondog a gawii na mimbaal sekaniyan sa aparan sii
ko itado o palaw, na roo niyan piyamakatindeg so sapolo ago dowa a manga ator a aya
tanda ko sapolo ago dowa ka mbatabataa a manga Israil.
5 Oriyan iyan na somiyogo sekaniyan sa manga ngongoda a manga Israil na somiyapaat
siran ko Allah sa manga korban a petotongen, na mikorban siran on pen sa manga sapi
pantag bo ko kanggiginawai.
.
6 Siyalod i Mosa so rogo na sii niyan tiyago so sabagi on ko manga ladiya, na so peman
so sabagi on na inipamirik iyan ko aparan.
7 Oriyan iyan na kinowa niyan so Ribro a Kapasadan a kasosoratan ko manga sogoan na
biyatiya iyan a pekeneg o manga taw. Na somimbag siran a tig iran a "Ipenggolalan ami
so langon taman a miyatero o Allah; na pemaratiyaya kami den!"
8 Na kinowa i Mosa so rogo sii ko manga ladiya na inipamiripirik iyan ko manga taw a
tig iyan a "Giyai so rogo a ron mipepasod so kapasadan a inembaalan o Allah mipantag
rekano ko kiyabegi niyan rekano sangkai a langon a sogoan."
9 Tomiyakedeg si Mosa, si Aron, si Nadab, si Abiho ago so pito polo a pelokelokesen o
manga Israil.
10 Na miyailay iran so Tohan o Israil a so dadapoan iyan na lagid o ba kalalapisi sa
montiya a sapiro a matimenag a datar o langit.
11 Apiya oto na da pakatanai sa lima o Tohan angkai a manga olowan o manga Israil;
miyailay iran so Tohan na mikekan siran ago miyamanginom.
Si Mosa sii ko Palaw a Sinay
12 Na pitero o Allah ki Mosa a "Takedeg ka raken ko palaw na go ka sii tareg, ka
imbegay aken reka so dowa timan a mapapapan a ator a kikasosoratan ko manga kitab
ago sogoan a inisorat aken on a ipemangendao ko manga pagtaw aken."
13 Mandiyadi na gomiyanat si Mosa a ped iyan si Yosowa a salinggogopa iyan, na
tomiyakedeg den si Mosa ko palaw o Tohan.
14 Miyatero iyan daan ko manga pelokelokesen a "Nayawa kami niyo sii taman ko
kapakakasoy ami rekano. Ped iyo si Aron ago si Hor, na apiya antawaa i aden a
pekikokom iyan na song kiran."
15 Kagiya tomakedeg si Mosa ko palaw na minikokos on so gabon,
16 Na so sigay o Allah na tomiyana ko Palaw a Sinay. Miyakanem gawii a kakokokosi o
gabon ko palaw, na sii ko ikapito gawii na so Allah a sii ko gabon na tiyalowan iyan si
Mosa.
17 Sii peman ko manga Israil na aya kapekeilaya iran ko sigay o Allah na lagid o pekarab
a apoy ko poro o palaw.
18 Somiyoled si Mosa ko gabon ko kapetekedeg iyan ko palaw, na tomiyareg sekaniyan
roo ko soled o pat polo ka kadadaondaw ago kagagawii.
IKSODOS 25
So manga Pamemegayan ko Barombarong
2 “Teroa ngka ko manga Israil a pangowiti ako iran sa manga pamemegayan. Tarimaa
ngka so pamemegayan o oman i mama a masisinganin o poso iyan a kimbegan iyan on
raken.
3 Na giyai i manga pamemegayan a terimaan ka kiran: bolawan, pirak ago tombaga;
4 Biro, kasomba ago mariga a tanor; landap a sotra; bombol a kambing;
5 Kobal a bilibili a iniloto sa mariga; kobal a mangaala a seda; kayo a akasiya;
6 Lana a olibi a petegoon ko solo; manga palapa a isembor ko lana diyabat ago sii ko
petotongen a doka;
7 Ago manga montiya a oniksa ago ped a manga montiya a indeket ko saliko o maporo a
imam ago sii ko raben a ipesepeng ko rareb iyan.
8 “Pakambaala ngka siran sa Barombarong a pesimbaan raken kaan ako kiran
makakaden.
9 So ladiyawan o Barombarong ago so langon a pagigimo ron a pekiilay aken reka na aya
ngka den sowaan ko kapagembaali ngka on."
So Kaban sa Kapasadan
10 “Makapembaal siran sa Kaban a kayo a akasiya a pat polo ago lima ka porgada a katas
iyan, dowa polo ago pito ka porgada a kaolad iyan ago dowa polo ago pito ka porgada a
kaporo iyan.
11 Lapisi ngka sa lombos a bolawan so soled iyan ago so liyo niyan, na bibiri ngka sa
bolawan so melilibeta on.
12 Mbaali ngka sa pat timan a rambit a towangen a bolawan na pamatria ngka sii ko
kababaan o pat a rogo o kaban, a ndodowa timan a rambit ko oman i kilid iyan.
13 Mbaal ka sa dowa timan a tibal a kayo a akasiya na pelalapisi ngka sa bolawan.
14 Sanggaren ka so manga tibal ko manga rambit sii ko mbala a kilid o kaban kaan on
pekitibal.
15 Kelalayon on den so manga tibal ko manga rambit o kaban na di ron den kowaan.
16 Na soleden ka ko kaban so dowa timan a mapapapan a ator a imbegay aken reka a
kikasosoratan ko manga sogoan.
17 “Mbaali ngka sa lekeb iyan a lombos a bolawan a ron pepepasa so dosa, a aya katas
iyan na pat polo ago lima ka porgada, ago dowa polo ago pito ka porgada a kaolad iyan.
18 Na mbaal ka on sa dowa timan a piyagetawtaw a lagid sa paras o manga malaikat a
seselen a bolawan
19 A mapagoonay ko lekeb a sesatiman a malaikat ko oman i poro iyan.
20 Mbaali ngka siran a sesangora a totolongan iran so lekeb ago mabebekar so manga
papak iran a makasasayap on.
21 Na soleden ka ko kaban so dowa timan a mapapapan a ator a imbegay aken reka na go
ngka on tagoa so lekeb.
22 Na sii ko liyawaw o lekeb na ron ako reka makipetelabok ko pageletan o dowa timan a
malaikat a matatago ko kaban, na makipembitiyarai ako reka on makapantag ko langon a
sogoan a imbegay aken reka mipantag ko manga Israil.
So Lamisaan ko Paan a Ipesepaat ko Allah
23 Mbaal ka sa lamisaan a kayo a akasiya a telo polo ago nem ka porgada a katas iyan,
sapolo ago walo ka porgada a kaolad iyan ago dowa polo ago pito ka porgada a kaporo
iyan.
24 Lapisi ngka sa lombos a bolawan na go ngka bibiri sa bolawan so melilibeta on.
25 Mbaali ngka sa pamalagen ko melilibeta on a telo ka porgada a kaolad iyan, na go
ngka pen bibiri sa bolawan so melilibeta ko pamalagen.
26 Mbaali ngka sa pat timan a rambit a bolawan na pamatria ngka ini ko oman i rogo
niyan a kikatatagoan ko ai niyan.
27 Obain ka so manga rambit ko pamalagen, ka ron ipesenggar so manga tibal igira a
pegawidan so lamisaan.
28 Mbaali ngka so manga tibal a kayo a akasiya na pelalapisi ngka sa bolawan.
29 Mbaali ngka pen sa manga lapad, manga tagayan, manga omoy ago manga ladiya a
pegosaren ko kipesepaaten ko arak. Langon den ai pagembaalan a lombos a bolawan.
30 Na lalayona ngka babatogen so paan a ipesepaat ko Allah sangkai a lamisaan sii ko
hadapan aken."
So Petegoan sa Solo
31 “Mbaal ka sa petegoan sa solo a lombos a bolawan a seselen so itado niyan ago so
lawas iyan; na ron mapagoonay so manga tagayan iyan a isasayan sa obarobar a rakes o
manga boko ago manga ombos iyan.
32 Ketagoan so lawas iyan sa nem timan a sapak a tetelo ko oman i sabala on.
33 Oman i isa ko nem timan a sapak na ketagoan sa tetelo a tagayan a isasayan sa
obarobar a almondo a rakes o boko ago so ombos iyan.
34 So mambo so lawas o petegoan sa solo na ketagoan sa pat a tagayan a isasayan sa
35 Ketago so isa a boko ko kababaan o oman i dowa timan a sapak a makambabala ko
lawas iyan.
36 So manga boko ago so manga sapak na maoonay ko lawas iyan ago so itado niyan; na
langon den ai pagembaalan a seselen a lombos a bolawan.
37 Mapasad oto na mbaali ngka so pito a solo iyan na go ngka on panagoa kaan iran
kalindawi so darpa a kasasangoran iyan.
38 Mbaali ngka so manga ipelipit ko sombowan iyan, ago so manga talam iyan a palaya
den lombos a bolawan.
39 Telo polo ago pat ka kilo a lombos a bolawan a pagosaren ko kapagembaali sangkai a
petegoan sa solo taman den ko langon a kasangkapan on.
40 Na iktiyari ngka o ba ngka ini di kambaali a datar o ladiyawan a piyakiilay aken reka
sii ko palaw.
IKSODOS 26
So Barombarong a Dii Telabokan ko Allah
Mbaali ngka so Barombarong a sapolo timan i manga oolad a dinis a pembaalan a biro,
kasomba ago mariga a tanor, ago landap a sotra a ipemorda on so lagid o paras o manga
malaikat a galebek o mapasang i kapamorda.
2 So manga maolad a dinis na palaya ndatadatar sa kapangaala a sesapolo ago pat ka
mitros a katas iyan ago ndodowa ka mitros a kaolad iyan.
3 Pakandaidaira ngka mamanai so oman i lima timan on.
4 Oman i sesabala a kilid o dowa a ndilima a dinis na panangilai ngka sa biro a tanor.
5 Ndilima polo a mipenangila ngka on ko oman i sabala a kilid a makapepantapantag on
den so manga tangila iran.
6 Oriyan iyan na mbaal ka sa lima polo a sambita a bolawan a mapakapendair iran so
dowa a ndilima a dinis kaan masasatiman.
7 Mapasad oto na mbaal ka sa sapolo ago isa a manga oolad a dinis a bombol a kambing a
aya kilapis ko Barombarong.
8 Giyangkai a sapolo ago isa a dinis na ndatadatar sa kapangaala a sesapolo ago lima ka
9 Pakandaidaira ngka mamanai so lima timan on, na pakandaidaira ngka mambo so nem
on timan. So ikanem timan ko nem a piyakandaidair na lepia ngka sii ko onaan o
Barombarong.
10 Ndilima polo a mipenangila ngka on ko oman i sesabala a kilid o piyakandaidair a
manga dinis.
11 Oriyan iyan na mbaal ka sa lima polo a sambita a tombaga na go ngka panagoa ko
manga tangila a mapakapendair iran angkai a dowa timan a piyakandaidair a manga dinis
a bombol a kambing kaan masasatiman angkai a lapis.
12 Na so saopak ko salad on a dinis a ikaolad iyan ko Barombarong na teyotonen sii sa
talikodan iyan.
13 Na so pen so tenga sa mitros a ikatas iyan ko Barombarong sii ko mbala a kilid iyan na
teyotonen a isepeng on.
14 Na mbaal ka peman sa dowa timan pen a ipelapis ko Barombarong a kisapeng on a so
isa on na kobal a bilibili a iniloto sa mariga, ago so ikadowa a peliyawaon on na manga
kobal a mangaala a seda.
15 “Mbaal ka sa manga oolad a papan a kayo a akasiya a pemakatindegen a seblayan ko
Barombarong.
16 Oman i isa on na lima ka mitros a kaporo iyan ago dowa polo ago pito ka porgada a
kabelang iyan
17 A aden a dowa timan a ai niyan a makapendorog. Ndatadatar den a kapagembaali ko
langon a manga papan o Barombarong.
18 “Mbaali ngka sa dowa polo timan a papan so kilid o Barombarong sa tampar sa
pagabagatan,
19 Na mbaali ngka ini sa pat polo timan a onayan a pirak, a ndodowa i onayan so oman i
papan, a sesatiman ko oman i ai o papan.
20 So peman so sabala a kilid o Barombarong sa tampar sa pagotaraan na mbaali ngka sa
dowa polo timan a papan
21 Ago pat polo timan a onayan iyan a pirak, a ndodowa i onayan so oman i isa on a
papan.
22 So peman so likod o Barombarong sa tampar sa sedepan na mbaali ngka sa nem timan
a papan
23 Ago dowa timan pen a papan a penagoon ko manga rogo niyan sii sa likod.
24 Sii sangkai a dowa a rogo o Barombarong na pakapelapisen so dowa timan on a papan
a poon sa baba na taman den sa poro a pakapetekesaan. Giyanan den i kapagembaali ko
manga papan a penagoon sangkai a dowa a rogo.
25 Sabap roo na kewalo timan langon a manga papan ago sapolo ago nem timan a onayan
iyan a nggagadowa timan ko oman i papan.
26 Oriyan iyan na mbaal ka sa manga kayo a akasiya a pemalawagen ko manga papan;
lima timan a kebalawag a makapekekampeta ko manga papan sii ko isa a kilid o
Barombarong,
27 Ago lima timan mambo a makapekekampeta ko manga papan ko sabala a kilid iyan,
ago lima pen timan a makapekekampeta ko manga papan sii sa tampar sa sedepan roo ko
likod iyan.
28 So pelooken a kebalawag ko oman i ndilima on na pakapenarosen a poon ko isa a rogo
o Barombarong na taman ko isa pen a rogo niyan sii ko look o manga papan.
29 Pelalapisi ngka sa bolawan so manga papan na tagoi ngka ini sa manga bolawan a
rambit a ron pemangisanggar so manga pamalawagen; na pelalapisi ngka mambo so
manga pamalawagen sa bolawan.
30 “Na pakatindega ngka so Barombarong a mipepasod ko ladiyawan a piyakiilay aken
reka sii ko palaw.
31 “Mbaal ka sa kortina a biro, kasomba ago mariga a tanor ago landap a sotra a
ipemorda on so lagid o paras o manga malaikat a galebek o mapasang i kapamorda.
32 Tayotona ngka ini ko pat timan a polaos a kayo a akasiya a pelalapisan sa bolawan a
aden a manga sadanga iyan a bolawan ago pemakatindegen ko pat timan a onayan a pirak.
33 Sadangen ka so kortina ko manga sadanga kaan matayoton. Na betaden ka so Kaban
sa Kapasadan a katatagoan ko dowa timan a mapapapan a ator sii ko likod o kortina.
Kilet so kortina ko Soti a Darpa ago so Lebi a Soti a Darpa.
34 Oriyan iyan na batogen ka ko Kaban sa Kapasadan so lekeb iyan a ron pepepasa so
dosa sii ko Lebi a Soti a Darpa.
35 Na sii ko liyo o kortina na betaden ka on so lamisaan sii sa tampar sa pagotaraan o
Barombarong, na betaden ka on mambo so petegoan sa solo sii sa tampar sa pagabagatan
ko sakeb o lamisaan.
36 So peman so gimowa o Barombarong na mbaali ngka sa rending a biro, kasomba ago
mariga a tanor ago landap a sotra a mbordaan.
37 Mbaali ngka angkai a rending sa manga bolawan a sadanga ago lima timan a polaos a
kayo a akasiya a pelalapisan sa bolawan. Na towang ka sa lima timan a tombaga a
onayan a pemakatindegan on."
IKSODOS 27
So Aparan a Petotongan sa Ipesepaat
"Mbaal ka sa aparan a kayo a akasiya. Patpasagi ini a dowa ago tenga ka mitros a katas
iyan ago kabelang iyan, na isa ago tenga ka mitros a kaporo iyan.
2 Mbaali ngka sa pangapanga so oman i isa ko rogo niyan a mapagoonay ko aparan na go
ngka ini langon lapisi sa tombaga.
3 Mbaali ngka mambo sa manga kararaw a petegoan sa ombi, manga sakerad, manga
ladiya, manga ipesedang sa sapo ago manga petegoan sa waga. Langon angkai a
kasangkapan na tombaga a pengembaalan.
4 Mbaali ngka mambo sa tapaan a tombaga, na patrii ngka sa rambit a tombaga so oman i
rogo niyan a kitibal on.
5 Tagoa ngka so tapaan ko kababaan o taar o aparan a aya kaporo iyan na petilookan so
kaporo o aparan.
6 Na mbaali ngka so aparan sa manga tibal a kayo a akasiya na go ngka pelalapisi sa
tombaga.
7 Isenggar ini ko manga rambit kaan dii kambalai so manga tibal ko aparan igira a
pegawidan.
8 Mbaali ngka a sesemba so aparan a manga papan a iseyan ko ladiyawan a piyakiilay
aken reka sii ko palaw."
So Lamalama o Barombarong
9 “Mbaali ngka sa lamalama so Barombarong. So kilid iyan sa tampar sa pagabagatan na
kealad a manga rending a landap a sotra a lima polo ka mitros a katas iyan
10 Ago dowa polo timan a polaos a pemakatindegen ko dowa polo timan a onayan iyan a
palaya tombaga, a so manga polaos na ketagoan sa manga sadana ago ipekempet on so
manga raros a palaya den pirak.
11 So pen so kilid iyan sa tampar sa pagotaraan na datar iyan mambo a kapagembaali ron.
12 “So kilid iyan sa tampar sa sedepan na kealad a manga rending a dowa polo ago lima
ka mitros a katas iyan ago sapolo timan a manga polaos a rakes o sapolo timan a onayan
iyan.
13 So mambo so kilid o lamalama sa tampar sa sebangan a ron tegoa so gimowa iyan na
dowa polo ago lima ka mitros a katas iyan.
14-15 So dowa timan a rending on a makambabala ko gimowa na pito ago tenga ka
mitros a katas o oman i isa on a aden a telo timan a polaos iyan ago telo a onayan iyan.
16 “So gimowa o lamalama na ketagoan sa rending a sapolo ka mitros a katas iyan a
pembaalan a biro, kasomba ago mariga a tanor ago landap a sotra a mbordaan a aden a pat
timan a polaos iyan a rakes o manga onayan iyan.
17 So langon o manga polaos ko melilibeta ko lamalama na pakapekekampetaan o manga
raros a aden a manga sadanga on na palaya den pirak, ago aden pen a manga onayan iyan
a tombaga.
18 So lamalama na lima polo ka mitros a katas iyan ago dowa polo ago lima ka mitros a
kaolad iyan a kealad o dowa ago tenga ka mitros a kaporo iyan a manga rending a
pagembaalan a landap a sotra, na so manga onayan iyan na palaya den tombaga.
19 So langon a ped a manga igagama a pagosaren ko kapesimba sii ko Barombarong a
rakes o manga lapek iyan ago so ipelapek ko lamalama na palaya den tombaga a
pengembaalan."
So Ipelana ko Solo
20 “Sogoa ngka so manga Israil sa kawiti ran reka sa lombos a lana a olibi a ipelana ko
solo kaan lalayon mapepekasindaw.
21 Ka so solo a ndodoo ko Barombarong sii ko liyo o kortina ko onaan o Kaban sa
Kapasadan na lalayon on pepakasindaon i Aron ago so manga wata iyan sii ko hadapan o
Allah ipoon ko kaperimon na taman ko kapita iyan. Giyai na da a ikepos iyan a sogoan
ko manga Israil taman ko kapepemagapidapidi kiran.
IKSODOS 28
So Penditaren o manga Imam
"Tawaga ngka si Aron a pagari ngka ago so manga wata iyan a manga mama a si Nadab,
Abiho, Iliyasar ago si Itamar. Senggain ka siran ko manga Israil a makapanalagad raken a
manga imam.
2 Mbaalen ka si Aron a pagari ngka sa soti a nditaren kaan sekaniyan kapagadati ago
mipangkat.
3 Teroa ngka ko langon a mapasang a mama a piyamegan aken sa moodiset a mbaal siran
sa manditar i Aron para ko kasotiya rekaniyan kaan ako niyan kapanalagadi sii ko
kaiimami ron.
4 Giyai i manga nditaren a pagembaalan iran: so raben a ipesepeng ko rareb, so saliko, so
kimon, so bangkala a bobordaan, so sorban ago so sambitan. Pagembaalan iran angkai a
soti a penditaren i Aron ago so manga wata iya kaan ako iran kapanalagadi sii ko
kaiimami kiran.
5 Aya pagosaren iran na bolawan, ago biro, kasomba ago mariga a tanor, ago landap a
sotra."
So Saliko
6 “Pagembaalan iran so saliko a biro, kasomba ago mariga a tanor, bolawan ago landap a
sotra a galebek o mapasang i kapangaol.
7 Tegoan iran ai sa dowa timan a rambit o waga a pemanain ko mbala a kilid iyan kaan ai
dii mapakakempet.
8 Na so pelangkitan a sambitan a pegonain ko saliko na ndatar mambo a kapembaali ron a
biro, kasomba ago mariga a tanor, bolawan ago landap a sotra.
9 “Oriyan iyan na kowa ka sa dowa timan a montiya a oniksa na go ngka on tanora
tomombok so manga ngaran o sapolo ago dowa kataw a manga wata o Israil a manga
mama
10 A ipepesod ko kiyapakatondotondog o kinimbawataan kiran, a ndenem a manga
ngaran ko oman i satiman a montiya.
11 So panday sa manga montiya na itombok iyan on so manga ngaran o manga wata o
Israil. Mapasad oto na sokodi ngka angkai a manga montiya ko manga pamalagen a
bolawan,
12 Na go ngka paneketen sii ko dowa a rambit o waga o saliko a aya den ipenanadem ko
sapolo ago dowa ka mbatabataa a Israil. Sabap roo na dii kapagawidawidan i Aron so
manga ngaran iran sii ko waga niyan kaan siran lalayon peketademi o Allah.
13 Mbaal ka mambo sa dowa timan a ndeketan a bolawan
14 Ago dowa timan a rantay a lombos a bolawan a tiyalitali, na paneketen ka ini sangkai a
manga ndeketan on a bolawan."
So Raben a Ipesepeng ko Rareb
15 “Mbaal ka sa raben a ipesepeng ko rareb o Maporo a Imam a manditar iyan ko
kapepengokom iyan. Mbaali ngka a biro, kasomba ago mariga a tanor, bolawan ago
landap a sotra a datar o saliko a kapembaali ron o mapasang i kapangaol.
16 Pekapatpasagiin ai ago pelepiin a siyaw ka porgada a katas iyan ago kaolad iyan.
17 Na deketi ngka sa pat koyog a manga montiya. So paganay a koyogan iyan na tegoan
sa montiya a robi, topas ago komarapar.
18 So ikadowa koyog na tegoan sa torkowis, paramata ago diyamanti;
19 So ikatelo koyog na hasinto, agata ago amatista,
20 Na so ikapat koyog na birilo, oniksa ago haspiro. Sokodi ngka angkai a manga
montiya ko manga pamalagen a bolawan.
21 Oman i isa sangkai a sapolo ago dowa timan a montiya na itombok on so ngaran o isa
ko manga wata o Israil a aya den tanda ko isa ko sapolo ago dowa ka mbatabataa.
22 “Mbaal ka mambo sa manga rantay a lombos a bolawan a tiyalitali a tegoon ko raben.
23 Mbaal ka sa dowa timan a kaningkir a bolawan na go ngka pangampeten ko dowa a
rogo o raben sii sa tampar sa poro.
24 Iketen ka so dowa timan a rantay a bolawan ko manga kaningkir sii ko manga rogo o
raben.
25 Na so sabala ko poro o manga rantay na paneketen ka ko dowa timan a ndeketan on a
bolawan, na go ngka ini panagoa ko manga rambit o waga o saliko sii ko panempang
iyan.
26 Mapasad oto na mbaal ka pen sa dowa timan a kaningkir a bolawan na go ngka
pangampeten ko dowa a rogo a kababaan o raben sii ko didalem iyan a matatampar ko
saliko.
27 Na mbaal ka peroman sa dowa timan a kaningkir a bolawan na pangampeten ka ko
kababaan o dowa timan a rambit o waga o saliko ko panempang iyan, a marani ko
tebiraan ago sii ko kaporoan o lalangkitan a sambitan o saliko.
28 Pakapegiketaan a biro a tali so manga kaningkir ko raben ago so manga kaningkir ko
saliko kaan mikampet so raben ko sambitan ago di kepokas ko saliko.
29 “Igira a pesoled si Aron ko Lebi a Soti a Darpa na pekeawidan iyan sii ko rareb iyan so
manga ngaran o manga mbatabataa a Israil a itotombok sangkai a raben kaan siran lalayon
peketademi o Allah.
30 Na tagoa ngka mambo sii ko raben so Orim ago so Tomim a maosar ko
kapepengokom kaan ai kaaawidi i Aron ko rareb iyan igira a pepangadap ko Allah. Na
oman on makapangadap si Aron na disomala a manditar iyan angkai a raben sii ko rareb
iyan kaan iyan mapengokom so manga Israil."
So Ped a Nditaren o manga Imam
31 “Mbaali ngka so kimon a ipelapis on so saliko a palaya biro a warna niyan.
32 Tegoan ai sa lig ko look iyan a mbibiran sa inaol a kowiliyo kaan di kekisi so sisid
iyan.
33-34 Sii ko melilibeta ko sagayadan o kimon na tayotoni ngka sa manga garigay a
iroropa sa onga a granada a pagembaalan a biro, kasomba ago mariga a tanor a
kitatayotonan pen sa manga tongkaling a bolawan so oman i pageletan iyan.
35 Pekesolot i Aron angkai a kimon igira a pegimam. Na igira a pesoled sekaniyan ko
Soti a Darpa a pepangadap ko Allah ago igira a peliyo na pekeneg so oni o manga
tongkaling kaan sekaniyan di petay.
36 Mbaal ka sa tanda a lombos a bolawan na go ngka on tomboken angkai a manga
katero a aya niyan den siliyo: ISESENGGAY KO ALLAH.
37 Iketen ka ini ko panempang o sorban a biro a tali a inggakot on.
38 Ketago ini ko beneng i Aron kaan iyan mapakada so ribat a mararambit ko dii
kisedkaan o manga Israil ko manga ipesenggay iran a rek o Allah a apiya antonaa i
ipesedka iran. Sii den ai lalayon petegoa ko beneng iyan kaan matarima o Allah angkai a
manga sadka.
39 “Aola ngka so bangkala i Aron a landap a sotra, na mbaal ka sa sorban a landap a sotra
ago so sambitan a pelangkitan.
40 Pangembaalen ka mambo so manga wata i Aron sa manga bangkala, sambitan ago
manga totob kaan siran kapagadati ago seselaan.
41 Pakinditaren ka ini ko pagari ngka a si Aron ago so manga wata iyan. Oriyan iyan na
salawati ngka siran sa lana ago pangidini ngka siran. Senggain ka siran a makapanalagad
raken a manga imam.
42 “Mbaalen ka siran sa manga sinempek a sotra a aya iran ipesepeng ko lawas iran poon
sa kasadan na taman sa bobon.
43 Pekesolot ai i Aron ago so manga wata iyan igira a pesoled siran ko Barombarong a dii
Telabokan o di na igira a pegobay siran ko aparan sa kapegimam iran sii ko Soti a Darpa
kaan siran di pekediyampa ago kebono.
"Giyai na taman sa pakataman a kokoman ki Aron ago so manga moriyataw niyan."
IKSODOS 29
So Kapengidini ko manga Imam
"Giyai i ikidia ngka ki Aron ago so manga wata iyan a manga mama amay ka sotin ka
siran kaan ako iran kapanalagadi sii ko kaiimami kiran. Kowa ka sa kangodaan a mama a
sapi ago dowa timan a mama a bilibili a da a daway niyan.
2 Na mbaal ka sa manga paan, manga apang a sasaogan sa lana ago manga biskowit a
iibongen a lana, na langon den ai pagembaalan a arina a da a tapay ron.
3 Tagoa ngka ini ko reban na aya ngka den ai sapaaten raken a kirakes ko sapi ago so
dowa timan a bilibili.
4 “Oriyan iyan na wita ngka si Aron ago so manga wata iyan ko gimowa o Barombarong
a dii Telabokan na go ngka siran pakapeigoa.
5 Kowaa ngka so manga nditaren na pakisoloten ka ki Aron so bangkala, so kimon a
ipelapis on so saliko ago so raben, na pakisembitanen ka on so lalangkitan a sambitan o
saliko.
6 Na tagoa ngka so sorban ko olo niyan na iketen ka on so tanda a totombokan sa
ISESENGGAY KO ALLAH.
7 Kowaa ngka so lana na ododi ngka on a olo niyan a aya ngka on den kaselawati.
8 Pakaonota ngka pen so manga wata iyan na go ngka kiran pakinditaren so manga
bangkala,
9 Na pamakasembitana ngka ago pamakatotoba ngka pen siran. So kaiimami na kedalem
kiran ago so manga moriyataw iran sabap ko da a ikepos iyan a kokoman. Giyanan den i
okit a kapagidini ngka ki Aron ago so manga wata iyan.
10 “Wita ngka so mama a sapi ko gimowa o Barombarong na kedapenetan i Aron ago so
manga wata iyan so olo niyan.
11 Na sombalia ngka so sapi ko hadapan o Allah sii ko gimowa o Barombarong.
12 Kowa ka ko rogo iyan na sombon ka on a tindoro o ka na go ngka on sisingi so manga
pangapanga o aparan. So kelamba on na ododa ngka ko itado o aparan.
13 Kowaa ngka so manga sibo a mikokokos ko soled a tiyan, so lebi a mapiya ko atay, so
dowa timan a pato a rakes o manga sibo iyan na go ngka ini langon totonga ko aparan a
aya raken isepaat.
14 Ogaid na so sapo o sapi, so kobal iyan ago so matatago ko tinai niyan na totonga ngka
sii ko liyo o kampo. Giyanan den i kaperilai ko dosa o manga imam.
15 “Oriyan iyan na kowaa ngka so isa ko mama a bilibili, na kedapenetan i Aron ago so
manga wata iyan so olo niyan.
16 Sombalia ngka ini na go ngka kowaa so rogo iyan na pamiriken ka ko manga kilid o
aparan.
17 Pamekanga ngka so lawas o bilibili na onabi ngka so soled a tiyan ago so manga ai
niyan, na rakesen ka on so olo niyan ago so manga anggaota o lawas iyan.
18 Na totonga ngka langon so bilibili sii ko aparan. Giyanan den i petotongen a ipesepaat
a mamot ko Allah.
19 “Oriyan iyan na kowaa ngka so lamba a bilibili, na kedapenetan i Aron ago so manga
wata iyan so olo niyan.
20 Sombalia ngka ini na kowa ka ko rogo iyan na sisingi ngka on so kababaan o kawanan
a tangila i Aron ago so pen so kawanan a tangila o manga wata iyan, ago sii ko kawanan a
ama a lima iran ago so kawanan a ama a ai ran. Oriyan iyan na pamiriken ka so kelamba
a rogo ko manga kilid o aparan.
21 Na kowa ka pen ko rogo a sisii ko aparan ago so ped ko lana diyabat na go ngka
pamiriken ki Aron ago sii ko manga nditaren iyan, ago sii pen ko manga wata iyan ago so
manga nditaren iran. Amay ka magiyoto na miyasoti sekaniyan ago so manga wata iyan a
rakes o manga nditaren iran.
22 “Pangabisa ngka ko bilibili so manga sibo iyan, na kowaa ngka so kasiboan a ikog
iyan, so manga sibo a mikokokos ko soled a tiyan, so lebi a mapiya ko atay, so dowa
timan a pato a rakes o manga sibo iyan ago so kawanan a bobon iyan. (Giyai so bilibili a
pagosaren ko kipagidinen ko kaiimami).
23 Na so peman so reban a katatagoan ko manga paan a da a tapay ron a inisapaat raken
na kowa ka on sa satiman a paan, satiman a apang a sesemboran sa lana, ago satiman a
biskowit.
24 Pametaden ka langon angkai a pangenengken ko manga lima i Aron ago so manga
wata iyan kaan iran mapalad ko Allah ko kibayaon iran on ko hadapan iyan.
25 Oriyan iyan na kowaa ngka ini ko lima iran na totonga ngka sii ko aparan a aya den
ipesepaat ko Allah a ikasosoat iyan so mamot iyan.
26 Mapasad oto na kowaa ngka so kagepe angkai a bilibili na palada ngka ko Allah ko
kibayaon ka on ko hadapan iyan; na giyai den i bagian ka ko lawas iyan.
27 “Igira a aden a imam a pagidinan ko kaiimami na so kagepe ago so bobon o bilibili a
pagosaren ko kapagidini ron na kisenggay a rek aken, ka mapembagian ai o manga imam.
28 Giyai na lalayon bagian o manga imam igira a dii korban so manga taw sa Israil pantag
bo ko kanggiginawai, ka aya iran den pamemegayan ko Allah.
29 “Amay ka matay si Aron na ipetenan so soti a manga nditaren iyan ko manga wata
iyan ka aya iran mapenditar ko kaselawati ago kapagidini kiran ko kaiimami.
30 So wata i Aron a pekasambi on ko kaiimami na di niyan ai dii nditaren ko soled o pito
gawii igira a pesoled sekaniyan ko Barombarong a dii Telabokan sa kapegimam iyan sii
ko Soti a Darpa.
31 “Kowaa ngka so bilibili a pagosaren ko kipagidinen ko kaiimami na tindaan ka so
sapo iyan ko soti a darpa.
32 Sii ko gimowa o Barombarong a dii Telabokan na ron kekan i Aron ago so manga
wata iyan so bilibili ago so paan a matatago ko reban.
33 Siran i pekakan sangkai a manga nganin a inosar ko kiyapapasa ko dosa ko kiyaidini
kiran ko kaiimami ago so kiyasotiya kiran; ogaid na da den a salakaw a ba on pekakan, ka
kagiya giyanan na soti.
34 O aden a kepitaan ko sapo o bilibili o di na paan, na totonga ngka. Di den ai kekan, ka
soti.
35 “Nggolalanen ka so langon taman a inisogo aken reka mipantag ki Aron ago so manga
wata iyan. Pito gawii a kapengidini ngka kiran ko kaiimami.
36 Oman gawii na korban ka sa mama a sapi sabap ko dosa kaan mapapas. Giyanan i
kakesotiya ko aparan. Oriyan iyan na salawati ngka sa lana so aparan kaan misenggay a
rek aken.
37 Sowaa ngka ini sa oman gawii ko soled o pito gawii. Mapasad oto na kesoti piyapiya
so aparan, na apiya antonaa i makaseko on na kesoti."
So Kakorban Oman Gawii
38 Giyai i lalayon a pekisapaat ka ko aparan oman gawii: dowa timan a kangodaan a
bilibili a miyakasesaragon a idad iyan.
39 So satiman on na mapekorban ka ko kapipita, na so isa on na sii ko kaperimon iyan.
40 Aya iperakes ka a isepaat ko keona a bilibili na isa ka kilo a arina a bobonaon a isa ka
litro a lombos a lana a olibi ago isa ka litro a arak a pagododen a aya den sapaat a
panginginomen.
41 Korbana ngka so ikadowa a bilibili sii ko kaperimon iyan na perakesan ka sa datar sa
kala o pangenengken ago panginginomen a ipesepaat igira a kapipita. Giyanan na
petotongen a ipesepaat a mamot ko Allah.
42 Taman ko kapepemagapidapidi rekano na giyangkai a petotongen a ipesepaat na
lalayon ipenggolalan ko hadapan o Allah sii ko gimowa o Barombarong a dii Telabokan.
Ron aken seka ipetelabok ago ipembitiyarai.
43 Roo aken pen mambo ipetelabok so manga Israil, na kesoti angkoto a darpa a
nggolalan ko bantogan aken.
44 “Sotin aken so Barombarong a dii Telobokan ago so aparan; na isenggay aken si Aron
ago so manga wata iyan a makapanalagad raken a manga imam.
45 Keden ako ko manga Israil na kebaloy ako pen a Tohan iran.
46 Ketokawan iran a saken so Allah a Tohan iran a aya kiran miyakaliyo ko inged a Misir
kaan ako kiran makakaden. Saken so Allah a Tohan iran."
IKSODOS 30
So Aparan a Petotongan sa Doka
Mbaal ka sa aparan a kayo a akasiya a petotongan sa doka.
2 Pakapatpasagia ngka ini a tenga sa mitros a katas iyan ago kabelang iyan, ago isa ka
mitros a kaporo iyan a pagonain on so manga pangapanga niyan sii ko manga rogo niyan.
3 Lapisi ngka sa lombos a bolawan so poro iyan, so manga kilid iyan ago so manga
pangapanga niyan, na bibiri ngka pen sa bolawan so melilibeta on.
4 Mbaali ngka sa dowa timan a rambit a bolawan a pematriin ko kababaan o bibir iyan a
nggagaisa ko oman i sabala on a ron ipesenggar so manga tibal igira a pegawidan.
5 Na mbaali ngka so manga tibal a kayo a akasiya na go ngka pelalapisi sa bolawan.
6 Betaden ka angkai a aparan sii ko onaan o kortina a idadalong ko Kaban sa Kapasadan
ago so lekeb iyan a ron pepepasa so dosa ago ron ako reka pen dii makitelabok.
7 “Oman mapita na pepekatotong si Aron sa doka sangkai a aparan igira a pekibiren iyan
so manga solo.
8 Na igira a perimon a petenteman iyan so manga solo na peketotongan iyan peroman sa
doka. Giyangkai a kapetotong sa doka ko hadapan o Allah na lalayon a di ron dii
kinggolalanen taman ko kapepemagapidapdi rekano.
9 Di ngka sepaati angkai a aparan sa di sak a doka o di na apiya antonaa a petotongen a
ipesepaat, o di na so ipesepaat a pangenengken aya pen o ba ngka ododi sa sapaat a
panginginomen.
10 Makaisa ko saragon na kesoti i Aron so aparan ko kapetegoi niyan sa rogo ko manga
pangapanga niyan a sii kowaa ko rogo o ayam a inikorban sabap ko dosa kaan mapapas.
Mipenggolalan ai oman saragon taman ko kapepemagapidapidi rekano. Giyangkai a
aparan na lebi a soti a isesenggay a rek o Allah."
Kasedka sa Pirak ko Barombarong
11 Na pitero pen o Allah ki Mosa a
12 “Amay ka isorat ka so manga Israil ka mbilangen ka siran na pekabegay so oman i isa
kiran ko Allah sa sadka a iperending iyan sa niyawa niyan. Aya sabap iyan na an siran di
peketanai a paniyakit sii ko kapembilanga ngka kiran.
13 Oman i isa a keped ko minibilang a manga taw na pekabegay sa nem ka gramo a pirak
a timbangen ko timbangan a pegosaren ko Barombarong. Giyai na ipesedka iran ko
Allah.
14 So langon o kibilang maana a so oman i isa a miyakadowa polo ragon a idad iyan o di
na kalalawanan pen na kibegay niyan angkai a sadka ko Allah.
15 So kawasa na di pekabegain sa ba kelawani so nem ka gramo a pirak, na so mambo so
miskin na di pekabegain sa ba ini kakorangi amay ka ipesedka iran ai ko Allah a
kirending ko manga niyawa iran.
16 Tarimaa ngka angkai a pirak ko manga Israil na osara ngka ko kapekibira ko
Barombarong a dii Telabokan. Giyangkai a sadka na ipetedem o Allah ko manga Israil
kaan mirending ko manga niyawa niyo."
So Palanggana a dii Pangonaban
18 “Mbaal ka sa mala a palanggana a tombaga a pepengonaban a rakes o tombaga a
pembatogan on. Betaden ka ini ko pageletan o Barombarong ago so aparan, na go ngka
tagoi sa ig.
19 Si Aron ago so manga wata iyan na kapengonaban iran on a lima iran ago so manga ai
ran.
20 Igira a pesoled siran ko Barombarong na makapengonab siran daan ko ig kaan siran di
pematay. Na igira a pegobay siran ko aparan ka pesepaat siran on sa petotongen a soasoat
ko Allah
21 Na disomala a kapengonaban iran a lima iran ago so manga ai ran kaan siran di
pematay. Giyai na taman sa pakataman a sogoan a mipenggolalan i Aron ago so manga
moriyataw niyan taman ko kapepemagapidapidi kiran."
So Lana Diyabat
22 Pitero pen o Allah ki Mosa a
23 “Pangowa ka sa lebi a manga pipiya a palapa; nem ka kilo a ig o timek a mira, telo ka
kilo a mamot a kemi, telo ka kilo a mamot a tebo,
24 Nem ka kilo a kasiya, a langon ai timbangen ko timbangan a pegosaren ko
Barombarong, ago pat ka litro a lana a olibi.
25 Mbaali ngka ini a soti a lana diyabat a pakapesembosemboren a datar o dii kambaali
ko ikekamotan. Kebaloy ai a soti a lana diyabat.
26 Na osara ngka ini sa kapenalawati ngka ko Barombarong a dii Telabokan, so Kaban sa
Kapasadan,
27 So lamisaan a rakes o langon a ipamemetad on, so petegoan sa solo ago so manga
igagama iyan, so aparan a petotongan sa doka,
28 So aparan a petotongan sa ipesepaat a rakes o langon a kasangkapan on, ago so pen so
palanggana a dii pangonaban a rakes o pembatogan on.
29 Langon ka ini senggain a rek o Allah kaan ai mabaloy a lebi a soti; na apiya antonaa i
pekaseko on na kesoti.
30 “Panalawati ngka sa lana si Aron ago so manga wata iyan na senggain ka siran a
makapanalagad raken a manga imam.
31 Teroa ngka ko manga Israil a 'Giyai i lana diyabat a ipapantag raken taman ko
kapepemagapidapidi rekano.
32 Di niyo ron pagododi so di on kapapatotan a manga taw aya pen o ba kano mbaal sa
lana a datar ai sa kapakapesembosembora on. Giyai na soti, na disomala a ibilang iyo
mambo a soti.
33 Apiya antawaa rekano i magembaal sa datar iyan o di na apiya antawaa i pelana on ko
kena a ba imam na kebelag ko isa ka maginged a Israil.' "
So Doka
34 Oriyan iyan na pitero o Allah ki Mosa a "Kowa ka sa manga mamot a manga palapa a
so istakti, onika, galbanom ago lombos a doka, na langon den ai pakapendatadataren sa
kadakel.
35 Mbaali ngka ini a mamot a doka a pakapesembosemboren a datar o dii kambaali ko
ikekamotan. Ketimosan ai kaan di kebinasa ago an masoti.
36 Teponga ngka so ped on na awidi ngka ko Barombarong na go ngka betaden ko danga
o Kaban sa Kapasadan a ron ako reka dii makitelabok. Tarimaa niyo ai a lebi a soti.
37 Di niyo pagembaalen a ginawa niyo sa apiya antonaa a doka a datar ai sa
kapakapesembosembora on. Bilangen iyo a soti a isesengay ko Allah.
38 Apiya antawaa rekano i magembaal sa datar iyan ka ba niyan den pagosara a
ikekamotan na kebelag ko isa ka maginged a Israil."
IKSODOS 31
Si Bisalil ago si Oholiyab
Na pitero pen o Allah ki Mosa a
2 “Ilaya ngka, ka pinili aken si Bisalil a wata i Ori a wata peman i Hor a ped ko
mbatabataa a Yodah,
3 Na sinep aken sekaniyan ko Roh o Tohan a rakes o moodiset, kapasang ago katao ko
langon a pitibarangan a papandayan,
4 Maana a so kapeteonga ago so kapegartai ko bolawan, pirak ago tombaga,
5 So kapenapili ago kasokodi ko manga montiya, so kapangokiri ko kayo ago so
kanggalebeka ko langon a pitibarangan a pepedayan.
6 Liyo ron pen na initoro aken a ogopa iyan si Oholiyab a wata i Ahisamak a ped ko
mbatabataa a Dan. Piyamegan aken mambo sa moodiset so langon a manga panday kaan
iran kambaali so langon taman a iniinsarat aken rekano a pagembaalan
7 A maana so Barombarong a dii Telabokan, so Kaban sa Kapasadan a rakes o lekeb iyan,
ago so langon a pagigimo o Barombarong,
8 So lamisaan a rakes o manga ipamemetad on, so lombos a bolawan a petegoan sa solo
ago so manga igagama iyan, so aparan a petotongan sa doka,
9 So aparan a petotongan sa ipesepaat a rakes o langon a kasangkapan iyan, so
palanggana a dii pangonaban ago so pembatogan on,
10 So pagaolen a manga nditaren, a so soti a nditaren i Aron a so imam ago so manga
nditaren o manga wata iyan a pekesolot iran igira a pepegimam siran,
11 So lana diyabat ago so pen so doka a petotongen ko Soti a Darpa. Pagembaalan iran ai
langon a aya kaketoman o inisogo aken reka."
So Gawii a Idedeke
12 Oriyan iyan na pitero o Allah ki Mosa a
13 “Teroa ngka ko manga Israil a: Selaselaa niyo so manga Gawii aken a Idedeke.
Giyanan na nanao raken ago sii rekano taman ko kapepemagapidapidi rekano kaan iyo
katokawi a saken so Allah a sominggay rekano a rek aken.
14 “Selaselaa niyo so Gawii a Idedeke ka soti anan rekano. Apiya antawaa i somogok ko
kokoman iyan na kebono; apiya antawaa i nggalebek sangkoto a gawii na kebelag ko isa
ka maginged a Israil.
15 Nem gawii a mipenggalebek iyo, ogaid na so ikapito gawii na Gawii a Idedeke a
pantag bo ko Allah. Apiya antawaa i nggalebek sangkoto a gawii na kebono.
16 Mapeselasela o manga Israil so Gawii a Idedeke ko kapetomana iran ko kokoman iyan
taman ko kapepemagapidapidi kiran, ka da a kaposan iyan ai a kapasadan.
17 Giyanan na taman sa pakataman a nanao raken ago sii ko manga Israil, ka miyakanem
gawii a kiyaadena o Allah ko langit ago so doniya na sii ko ikapito gawii na gominek
nggalebek ka domike."
18 Kagiya mapasad mimbitiyarai o Allah si Mosa sii ko Palaw a Sinay na inibegay niyan
on so dowa timan a mapapapan a ator a kikasosoratan ko manga sogoan a inisorat on o
tindoro o Tohan.
IKSODOS 32
So Bolawan a Nati a Sapi
Kagiya mailay o manga taw a miyatey den a da kapakatondagay i Mosa ko palaw na
mitimotimo siran ki Aron na pitero iran on a "Di tano katawan o antonaa i miyasowasowa
angkoto a mama a si Mosa a miwit rektano sii poon sa Misir. Kagiya ka maoto na
mbaalen kami ngka sa tohan a makapengonaan rektano."
2 Na pitero kiran i Aron a "Pokasa niyo so manga aritis a bolawan a kisosoloten o manga
karoma niyo ago so manga wata iyo a manga mama ago babay na pangowita niyo raken."
3 Mandiyadi na piyamokas o langon o manga taw so manga aritis iran na piyangowit iran
ki Aron.
4 Kinowa niyan angkai a inipamegay iran on na tiyowang iyan na go pipandayan iyan a
panasang sa kiyambaali niyan on a barahala a inisayan sa nati a sapi. Na pitero o manga
taw a "Hey manga Israil, giyai i tohan tano a miwit rektano sii poon sa Misir!"
5 So kiyanega sii i Aron na mimbaal sekaniyan sa aparan ko hadapan o bolawan a sapi na
go inipananalo niyan a tig iyan a "Mapita na kendorian tano so Allah."
6 Na teked a kapipita ko talondog a gawii na miyangowit siran roo sa manga
pangangayamen a pikorban iran ago inisapaat iran a petotongen, ago aden pen a ped a
inisapaat iran pantag bo ko kanggiginawai.
. Oriyan iyan na miyamangontod so manga taw na mikekan siran ago miyamanginom na
taros a miyamanindeg ago mikeriyala sebenar.
7 Mandiyadi na pitero o Allah ki Mosa a "Tondagay ka nggagaan, ka so manga pagtaw
ngka a inowit ka sii poon sa Misir na piseboan iran a ginawa iran.
8 Da bo matey na tomiyalikod siran ko lalan a inisogo aken kiran ka inimbaal iran a
ginawa iran sa barahala a tiyowang a bolawan a inisayan sa nati a sapi. Na siyododan ago
pikorbanan iran a tig iran a 'Hey manga Israil! Giyai i tohan tano a aya rektano sii miwit
poon sa Misir'
9 “Pekeilay aken angkanan a manga taw," a tig o Allah ki Mosa, "na mataan a tanto siran
a mategas i olo.
10 Na, pakambayaa ko ngka, ka pakapemborngaten ko kiran so rarangit aken na go
mbinasaan ko siran. Na mbelowin ko seka ago so kebabadan reka a mala a nasiyon."
11 Ogaid na miyangangampedian si Mosa ko Allah a Tohan iyan a tig iyan a "Ya Allah,
ino ngka pakapemborngata so rarangit ka ko manga taw ngka a miyapakaliyo ngka sa
inged a Misir a nggolalan ko kala ka i gees ago so kabarakat ka?
12 O ba baden matero o manga Imisiren a 'Marata bes a antap o Allah ko kiyapakaliyowa
niyan ko manga taw niyan, ka sii niyan siran pemonoa ko manga kapalawan na peyopasen
iyan siran pen ko doniya'. Kapedipedi ka bo na pakalenggawa ngka so tanto reka a
kapekerarangiti; salina ngka so mapipikir ka a kasiksaa ngka ko manga taw ngka.
13 Tademi ngka so manga oripen ka a so Ibrahim, Iskak ago Israil ago so inisepa a ka
kiran sii ko Ingaran ka a tig ka a 'Pakapendakelen ko so kebabadan rekano a datar sa
kadakel o manga bitoon sa langit, na imbegay aken ko manga moriyataw ngka so dalem
angkai a inged a initopa ko a mapekewali ran sa taman sa pakataman.'"
14 Na giyoto a misendit so Allah na da niyan pakatanaa ko manga taw niyan so kasiksaan
a miyatero iyan a itelingoma niyan kiran.
15 Na gomiyanat si Mosa na tomiyondagay ko palaw a kaaawidan iyan so dowa timan a
mapapapan a ator a kikasosoratan sa manga sogoan so oman i seklida on.
16 So den so Tohan i mimbaal sangkoto a dowa timan a mapapapan a ator, na sekaniyan
den i tomiyombok on ko manga sogoan.
17 Na kagiya maneg i Yosowa so manga taw a dii mamangogiyab, na pitero iyan a "Aden
a pekeneg aken a oni a katidawa roo ko kampo."
18 Tig i Mosa a "Kena oto a ba kapameseg o miyamakataban aya pen o ba kagoraok o
piyamanaban, ka oni o dii mamagidaida a pekeneg aken."
19 Kagiya makarani si Mosa ko kampo na miyailay niyan so sapi a bolawan ago so
manga taw a dii seseyaw, na tanto sekaniyan a kiyararangitan. Inipapes iyan so dowa
timan a mapapapan a ator a kaaawidan iyan na piroropet iyan ai sii ko itado o palaw.
20 Na kinowa niyan so sapi a inembaalan iran na tiyonaw niyan ko apoy. Tiyapotapong
iyan ago inibombor iyan ko ig na piyamakiinom iyan ko manga Israil.
21 Na pitero i Mosa ki Aron a "Antonaa i inikidia reka angkai a manga taw sa
kiyapakandosaa ngka kiran sa mala?"
22 “Di ka kerarangiti, kadnan ko," a tig i Aron. "Katawan ka den angkai a manga taw a
mamot kiran so kanggolaola sa marata.
23 Ka pitero iran raken a 'Di tano katawan o antonaa i miyasowasowa angkoto a mama a
si Mosa a miwit rektano sii poon sa Misir. Kagiya ka maoto na mbaalen kami ngka sa
tohan a makapengonaan rektano.'
24 Mandiyadi na pitero aken kiran a 'Apiya antawaa rekano i aden a imbolawanan iyan na
pokasa niyan on.' Na inipamegay iran raken so manga bolawan iran, na iniitog aken ko
apoy na baden ini miyabaloy angkai a nati a sapi!"
25 Na miyailay i Mosa a da mipaar i Aron so mitataralo a dii kakeriyala o manga taw na
go kekowa siran a pagereg ko manga ridoay iran.
26 Kagiya ka maoto na tominindeg si Mosa ko gimowa o kampo na inipananalo niyan a
"Apiya antawaa rekano i tempil ko Allah na song raken!" Na mitimotimo on so langon o
mbatabataa a Libi.
27 Na pitero iyan kiran a "Giyai i pitero o Allah a Tohan o manga Israil: Oman i isa
rekano na takipen iyan so pedang iyan, na pagenebeneba niyo so mbalabala ko kampo na
pamonoa niyo so manga pagari niyo, manga layok iyo ago manga siringan iyo."
28 Na ininggolalan o mbatabataa a Libi so iniinsarat kiran i Mosa, na sii den sangkoto a
gawii na manga telo nggibo a manga mama a miyamatay.
29 Oriyan iyan na pitero kiran i Mosa a "Imanto a gawii na inisenggay niyo a ginawa niyo
ko Allah sabap sa da niyo panganogoni so manga wata iyo a manga mama ago so manga
pagari niyo; sabap sii na riyakmatan kano o Allah."
30 Sii ko miyakatalondog a gawii na pitero i Mosa ko manga taw a "Mala a miyandosa
niyo. Ogaid na tekedeg ako imanto ko Allah sii ko palaw; ka baanda ko ron kapakirilai
so dosa niyo."
31 Na komiyasoy si Mosa ko Allah na tig iyan a "Ya Allah, mataan a tanto a mala a
miyandosa angkai a manga taw! Inimbaal iran a ginawa iran sa katohanan a bolawan.
32 Kapedipedi ka bo na rilai ngka so dosa iran, ka o di, na ponasa ngka baden so ngaran
aken ko ribro a minisorat ka."
33 Tig o Allah ki Mosa a "Sekaniyan oto a miyakandosa raken i ponasen ko ko ribro
aken.
34 Na lalakaw ka den imanto na agaka ngka so manga taw ko darpa a miyatero aken reka,
na pengonaan rekano so malaikat aken. Ogaid na pekatalingoma so gawii a itena aken
sangkai a manga taw so dosa iran."
35 Mandiyadi na tiyanaan o Allah sa paniyakit so manga taw sabap ko inikidia iran ko
sapi a bolawan a inembaalan i Aron.
IKSODOS 33
Siyogo o Allah so manga Israil sa Kaganat iran sa Sinay
Oriyan iyan na pitero o Allah ki Mosa a "Ganati ngka angkai a darpa, seka ago so manga
taw a inowit ka sii poon sa Misir, na song kano ko inged a inisepa aken ko Ibrahim, Iskak
ago Yakob a tig aken a 'Imbegay aken ai ko manga kebabadan rekano.'
2 Sogo ako sa malaikat a pengonaan rekano, na mbogaon ko roo so manga Kanaaniyo,
Amoriyo, Hitiyo, Pirisiyo, Hibiyo ago manga Hibosiyo.
3 Song kano sangkoto a inged a pekepakayan ago oodaren a lopa on; ogaid na di ako
rekano magonot, ka mategas kano i olo a manga taw na o ba ko sekano mabinasa sii ko
kapelalakaw niyo."
4 Kagiya maneg o manga taw angkai a inikerata a ginawa iran a katero na mimboboko
siran, na da den a ba kiran somiyolot sa imbolawanan.
5 Ka miyatero o Allah ki Mosa a "Teroa ngka ko manga Israil a 'Mategas kano i olo a
manga taw. O monot ako rekano apiya sakotika bo na o ba ko sekano mabinasa. Imanto
na pokasa niyo so manga imbolawanan iyo ka pemikiren aken o antonaa i ikidia ko
rekano.' "
6 Kagiya ka maoto na sii ko oriyan o kiyaawa o manga Israil ko Palaw a Sinay na kena a
ba siran somosolot sa imbolawanan.
So Barombarong a dii Telabokan
7 Aya adat i Mosa na pembangon sa Barombarong ko liyo o kampo a malo on mawatan,
na bitowan iyan ai sa 'Barombarong a dii telabokan.' Apiya antawaa i kebaya
makimosawir ko Allah na pekasong sekaniyan sangkoto a Barombarong ko liyo o kampo.
8 Igira a pegantap si Mosa ko Barombarong na dii meliliyo so langon o manga taw ka
pemanindeg siran ko gimowa o manga Barombarong iran, na di iran dii simaan si Mosa
taman ko kapakasoled iyan ko Barombarong.
9 Oman on somoled si Mosa na manog so mapopolaos a gabon ka petereg ko gimowa o
Barombarong sii ko dii kimbitiyarain o Allah ki Mosa.
10 Na anda den i kakeilaya o manga taw ko mapopolaos a gabon a sii matatago ko
gimowa o Barombarong na palaya siran pemanodiyod a so oman i isa kiran na sii ko
gimowa o Barombarong iyan.
11 Na dii mbitiyarai o Allah si Mosa a magaadapa siran a datar o dii kimbitiyarain o
mama ko layok iyan. Igira a pekesoy si Mosa ko kampo na so mangoda a salinggogopa
iyan a si Yosowa a wata i Non na di magawa ko Barombarong.
Si Mosa ago so Bantogan o Allah
12 Pitero i Mosa ko Allah a "Mataan a miyatero o ka raken a 'Agaka ngka angkai a manga
taw sangkoto a darpa,' ogaid na da ngka raken pakitokawi o antawaa i pekaonoten ka
raken. Miyatero o ka raken a 'Katawan aken seka piyapiya ago miyasoat ako reka.'
13 Na o mataan a miyasoat ka raken na pangendaon ka raken so manga okit ka kaan aken
seka katokawi ago an aken seka pen kapanonoatani. Na tatademi ngka a giyangkai a
nasiyon na manga pagtaw ngka."
14 Tig o Allah a "Saken den i magonot rekano, na pekadekeen ko sekano."
15 Na tig on i Mosa a "O di kami ngka pagonoti na di kami ngka pekaganata sangkai a
darpa.
16 Ka andamanaya i kaketokawi ron o ped a taw sa miyasoat ka raken ago so manga
pagtaw ngka o di kami ngka onoti? Antonaa pen i kakibida ami ago so manga pagtaw
ngka ko langon o ped a taw sa doniya?"
17 Na tig o Allah ki Mosa a "Pagamponen ko so pangni ngka sabap sa katawan aken seka
piyapiya ago miyasoat ako reka."
18 Tig i Mosa a "Kapedipedi ka bo na pakiilain ka raken so bantogan ka."
19 Na pitero o Allah a "Pakasagaden ko so langon a tihaya aken sii ko kamamasaan ka, na
mbeton aken so Ingaran aken a Allah sii ko hadapan ka. Ikepedi aken so kebayaan aken
komapedi, na ipengalinggagaw aken so kebayaan aken mangalinggagaw.
20 Ogaid," a tig iyan, "na di ngka keilay so paras aken ka da den a ba raken pekailay a ba
pen maoyag."
21 Na pitero pen o Allah a "Ilaya ngka, ka aden a darpa a marani raken a sii ka pekatindeg
ko lakongan.
22 Na amay ka somagad so bantogan aken na tegoon aken seka ko kaoopakan ko
lakongan, na isepeng aken reka a lima ko taman sa kapakasagad aken.
23 Maipos oto na pokasen ko reka so lima ko na keilay ngka a likod aken; ogaid na di den
keilay a paras aken."
IKSODOS 34
So Bago a Mapapapan a manga Ator
Pitero o Allah ki Mosa a "Panapil ka sa dowa timan a mapapapan a ator a datar o
miyaona, ka isorat aken on so manga katero a minisorat ko miyaona a manga ator a
piroropet ka.
2 Tiyagar ka ko kapipita na takedeg ka ko Palaw a Sinay, na pangadap ka raken roo ko
poro iyan.
3 Da den a ba reka pekaonot; da den a taw a ba keilay ko apiya anda sii ko palaw aya pen
o ba aden a manga bilibili o di na manga sapi a ba makapenateb ko itado o palaw."
4 Mandiyadi na miyamanapil si Mosa sa dowa timan a ator a datar o miyaona. Sii ko
teked a kapipita na tomiyakedeg sekaniyan ko Palaw a Sinay a aya den inisogo o Allah,
na inawidan iyan roo so dowa timan a ator.
5 Na giyoto a miyanog so Allah sii ko gabon na tominindeg roo a ped iyan, na bito niyan
on so Ingaran iyan a Allah.
6 Somiyagad so Allah ko hadapan i Mosa a ipepenanalo niyan on a "Saken so Allah, so
Allah a so Tohan a masalinggagaw ago makapediin, kena a ba malebod kararangiti ago
tanto a mala i limo ago kasasarigan.
7 Lalayon aken ipekelimo so pisenggibowan a manga taw, ago perilaan aken so
kamarataan, so kapakasogok ago so kapakandosa. Ogaid na di aken den pelepasen
domaneg so miyamakandosa, ka ipetena aken so dosa o manga ama ko manga wata ago
manga apo iran taman ko ikatelo ago ikapat ka apid iran."
8 Somiyodiyod somambot si Mosa ka sominimba
9 A tig iyan a "Ya Allah, o miyasoat ka raken na pengnin ko a monot ka rekami. Apiya
pen o mategas i olo angkai a manga taw na rilai ngka so kamarataan ago kadostaan ami,
na tarimaa kami ngka a kawali ngka."
So Kiyambagowi ko Kapasadan
10 Na pitero o Allah a "Magembaal ako imanto sa kapasadan mipantag ko manga Israil.
Sii ko kamamasaan iran na penggolaola ako sa manga pakamemesa a da den manggolaola
ko apiya anda a nasiyon ko dalem o doniya. Na so langon a taw a kibabalingan iyo na
keilay iran so mapenggalebek o Allah, ka piyakalekelek so penggolaolaan aken sabap
rekano.
11 Tomana niyo so ipesogo aken rekano imanto. Mbogaon ko so manga Amoriyo,
Kanaaniyo, Hitiyo, Pirisiyo, Hibiyo ago manga Hibosiyo sii ko kapegantap iyo kiran.
12 Pananggilai niyo o ba kano pakipesadanowa ko manga taw a kibabaling ko inged a
songowan iyo, ka o ba ini rekano militag.
13 Ka nggegebaa niyo baden so manga aparan iran, paminasaa niyo so babarakaten kon a
manga ator iran na pamataa niyo pen so manga polaos a toos ko katohanan iran a Asirah.
14 Da den a salakaw a tohan a ba niyo simbaa, ka so Allah na aya Ingaran iyan na Tanaod
na tanaod sekaniyan a Tohan.
15 Iketiyari niyo o ba kano pakipesadanowa ko manga taw a kibabaling sangkoto a inged,
ka igira a pesimba siran ko manga katohanan iran ago di siran on dii korban na mboyoon
kano iran na pekakan kano ko di iran on dii korbanen.
16 Na o pakipangaroma niyo ko manga wata iyo a manga mama so manga babay kiran na
igira a pesimba angkoto a manga babay ko manga katohanan iran na pagagaken iran so
manga wata iyo a manga mama sa katalikodi ran raken ka simba siran mambo sangkoto a
manga katohanan.
17 “Di niyo pagembaalen a ginawa niyo sa tiyowang a manga barahala.
18 Selaselaa niyo so Pista ko Kakan sa Paan a da a Tapay ron. Sii ko soled o pito gawii
na kan kano sa paan a da a tapay ron ka aya ko rekano inisogo. Nggolalanen iyo ai ko
miyatendo aken a manga gawii sii ko olanolan a Abib, ka aya niyo kiyapakaawa sa Misir.
19 Oman i paganay a ipembawata iyo a mama ago oman i paganay a ipembawata o
manga pangangayamen iyo a ndatar so sapi, bilibili o di na kambing na kibilang a rek
aken.
20 Sanggara niyo a nati a bilibili so paganay a inimbawata o kimar, ogaid na o di niyo
senggara na lepoa niyo a lig iyan. Sanggara niyo so langon o paganay a inimbawata iyo a
mama.
"Da den a ba raken makapengadap a ba da a ipeselasela iyan.
21 “Nem gawii a mipenggalebek iyo, ogaid na sii ko ikapito gawii na deke kano; apiya
pen sii ko mosim a idadado ago iraragon na pekadeke kano ron den.
22 “Selaselaa niyo so Pista ko Kaperagon oman iyo pagepoonan meragon so paganay a
inionga o trigo niyo, ago so pen so Pista ko Kapanimo sii ko kakepopos o ragon.
23 Makatelo ko saragon na so langon a manga mama rekano na makapengadap ko Allah a
Lebi a Mamaapaar, a so Tohan o Israil.
24 Na amay ka miyabogaw aken den so manga nasiyon ko inged a songowan iyo ago
miyapakaolad aken so kapegingedan iyo na da den a ba keterangan magaw ko lopa iyo
igira a pepamanong kano mangadap ko Allah a Tohan iyo sa makatelo ko saragon.
25 “Di niyo sepaaten so rogo o pikorban iyo a pangangayamen a ba niyo ron perakesen so
paan a aden a tapay ron, na da den a ba niyo pekapitai ko pikorban iyo ko kiyaselaselaa
niyo ko Paska.
26 “Oman saragon na awidi niyo ko Walay o Allah a Tohan iyo so lebi a mapiya a
pereperan ko paganay a keragon iyo.
"Di niyo tindaan so nati a kambing o di na bilibili ko gatas o ina iyan."
27 Na pitero pen o Allah ki Mosa a "Soraten ka angkai a manga katero, ka mipepasod
sangkai a manga katero so kapasadan a inembaalan aken mipantag reka ago so manga
Israil."
28 Na ndodoo den si Mosa a ped o Allah ko soled o pat polo ka kadadaondaw ago
kagagawii a da den makakan o di na makainom. Na inisorat iyan ko manga mapapapan a
ator so manga katero o kapasadan a so Sapolo a Sogoan.
So Pesigay a Paras i Mosa
29 Sii ko kapetondagay i Mosa ko Palaw a Sinay a aawidan iyan so dowa timan a
mapapapan a ator a kasosoratan ko kapasadan na pesigay so paras iyan sabap ko
kinimbitiyarain iyan ko Allah, ogaid na di niyan ai katawan.
30 Kagiya mailay i Aron ago so langon a manga Israil si Mosa a pesigay so paras iyan na
miyangaalek siran o ba siran on obay.
31 Ogaid na tiyalowan siran i Mosa, na giyoto a pipetoan sekaniyan i Aron ago so langon
a manga olowan ko isa ka maginged, na miyakimbitiyarai kiran si Mosa.
32 Oriyan oto na miyamangobay ron so langon o manga Israil, na inisampay niyan kiran
so langon a sogoan a inibegay ron o Allah sii sa Palaw a Sinay.
33 Kagiya makapasad si Mosa makimbitiyarai kiran na siyapengan iyan a paras iyan.
34 Ogaid na igira a pesoled si Mosa ko Barombarong ko hadapan o Allah ka
makipembitiyarai ron na pesewaan iyan a paras iyan taman sa kapakaliyo niyan. Na igira
a pepekaliyo sekaniyan na di niyan dii teroon ko manga Israil o antonaa i inisogo on a
peteroon iyan kiran,
35 Na pekeilay iran a pesigay so paras iyan; na giyoto a pesepengan iyan peman a paras
iyan taman ko pekatalondog a kasoled iyan roo a makipembitiyarai ko Allah.
IKSODOS 35
Manga Kokoman ko Gawii a Idedeke
Linimod i Mosa so langon o isa ka maginged a Israil na pitero iyan kiran a "Giyai i manga
inisogo o Allah a ipenggolalan iyo:
2 Nem gawii a mipenggalebek iyo, ogaid na so ikapito gawii na soti rekano a gawii, ka
Gawii a Idedeke a pantag bo ko Allah. Apiya antawaa i nggalebek on na kebono.
3 Apiya so kabiyag sa apoy sii ko manga walay niyo ko Gawii a Idedeke na di niyo ai
penggalebeka.
Manga Pamemegayan ko Kapagembaali ko Barombarong
4 Pitero i Mosa ko langon a manga Israil a "Giyai i inisogo o Allah:
5 Kowa kano ko manga tamok iyo sa pamemegayan ko Allah. Oman i isa a keterang so
poso iyan na pekaawid sekaniyan ko Allah sa pamemegayan a bolawan, pirak, o di na
tombaga;
6 Biro, kasomba ago mariga a tanor ago landap a sotra; bombol a kambing;
7 Kobal a bilibili a iniloto sa mariga ago kobal o mangaala a seda; kayo a akasiya;
8 Lana a tegoon ko solo; manga palapa a isembor ko lana diyabat ago sii ko petotongen a
doka;
9 Ago manga montiya a oniksa ago ped a manga montiya a ipeneket ko saliko o maporo a
imam ago sii ko raben iyan.
Manga Pagigimo ko Barombarong
10 “Langon kano a mapasang i kanggalebek na song kano raken na go niyo pangembaali
so langon taman a inisogo o Allah
11 Maana a so Barombarong a rakes o ipelapis ago so ipesepeng on; so manga sadanga,
manga papan, manga pamalawagen, manga polaos ago so manga onayan iyan;
12 So Kaban sa Kapasadan a rakes o manga tibal iyan, so lekeb iyan ago so kortina a
indalong on;
13 So lamisaan a rakes o manga tibal iyan ago so langon a ipamemetad on ago so paan on
a ipesepaat ko Allah;
14 So petegoan sa solo a rakes o manga igagama iyan, so manga solo ago so ipelana on;
15 So aparan a petotongan sa doka a rakes o manga tibal iyan, so lana diyabat ago so doka
a petotongen; so iperending ko gimowa o Barombarong;
16 So aparan a petotongan sa ipesepaat a rakes o tombaga a tapaan a tegoon on, so manga
tibal iyan ago so langon a kasangkapan on; so palanggana a pepangonaban a rakes o
pembatogan on;
17 So manga rending ko lamalama a rakes o manga polaos ago manga onayan iyan ago so
iperending ko gimowa o lamalama;
18 So manga lapek ago manga tali a pagosaren ko Barombarong ago sii ko lamalama;
19 Ago so pen so pagaolen a manga nditaren a pesoloten i Aron a imam ago so manga
wata iyan a manga mama igira a pegimam siran ko Soti a Darpa."
Piyangawidan o manga Taw so manga Pamemegayan iran
20 Mandiyadi na so langon o isa ka maginged a Israil na giyanatan iran si Mosa,
21 Na so oman i isa kiran a miyaterang so poso iyan ago masisinganin iyan na komiyasoy
a aawidan iyan so pamemegayan iyan ko Allah a keosar ko kapagembaali ko
Barombarong a dii Telabokan ago so langon a pagigimo ron a ipesimba, ago so pen so
soti a manga nditaren.
22 So langon a miyanga teterang a ndatar so manga mama ago manga babay na
miyamakaoma siran a kiaawid ko langon a pitibarangan a imbolawananan maana a so
manga batawi, manga aritis, manga sising ago manga rinti, na inisesadka iran ko Allah
angkai a manga bolawan.
23 So oman i aden a biro, kasomba o di na mariga a tanor iyan o di na landap a sotra,
bombol a kambing, kobal a bilibili a iniloto sa mariga o di na kobal o mangaala a seda na
inowit iyan roo.
24 Siran oto a pemakabegay sa pirak o di na tombaga na piyangawidan iran ai na inisedka
iran ko Allah, na oman i aden a kayo niyan a akasiya a keosar ko apiya anda ko galebek
na inowit iyan roo mambo.
25 So langon a manga babay a mapasang i kambaal sa tanor a biro, kasomba ago mariga,
o di na landap a sotra na inembaalan iran ai na piyangowit iran roo.
26 So pen so manga babay a kikateterangan ago mapasang i kapanali na piyanali ran so
bombol a kambing.
27 So manga olowan na miyamangawid siran sa manga montiya a oniksa ago ped a
manga montiya a ipeneket ko saliko ago so raben.
28 Miyamangawid siran pen sa manga palapa, ago lana a tegoon ko solo ago isembor ko
lana diyabat ago sii ko doka a petotongen.
29 So langon a manga mama ago manga babay a Israil a miyanga teterang na
miyamangawid siran sa ipemegay iran ko Allah a ikelas ko poso iran a pagosaren ko
kapenggolaolaa ko langon a galebek a inisogo o Allah ki Mosa.
Si Bisalil ago si Oholiyab
30 Oriyan iyan na pitero i Mosa ko manga Israil a "Ilaya niyo ka pinili o Allah si Bisalil a
wata i Ori a wata peman i Hor a ped ko mbatabataa a Yodah,
31 Na sinep iyan sekaniyan ko Roh o Tohan a rakes o kapasang, moodiset ago katao ko
langon a pitibarangan a papandayan
32 Maana a so kapeteonga ago kapegartai ko bolawan, pirak ago tombaga;
33 So kapenapili ago kasokodi ko manga montiya; so kapangokiri ko kayo ago so
kanggalebeka ko langon a pitibarangan a pemagartaan a papandayan.
34 Na inibegay rekaniyan pen o Allah ago sii ki Oholiyab a wata i Ahisamak a ped ko
mbatabataa a Dan so moodiset sa kapamangendaowa iran ko manga ped.
35 Sinep iyan siran a kapasang sa kanggolaolaa ko langon a pitibarangan a galebek a
kapangokir, kateong, kapamorda sa biro, kasomba ago mariga a tanor ago landap a sotra,
ago kapangaol. Mapenggalebek iran so oman i pisosonan o galebek na mapasang siran
pen i kapagantangan.
IKSODOS 36
1 “Kagiya ka maoto na si Bisalil, si Oholiyab ago so oman i mapasang a mama a bigan o
Allah sa moodiset ago katao sa kasowaa ko langon a galebek ko Barombarong na
kapengembaalan iran so langon taman a aya kaketoman o inisogo o Allah."
Madakel a Pamemegayan a Inisedka o manga Taw
2 Piyakisogoan i Mosa si Bisalil ago si Oholiyab ago so langon a ped a mapasang a mama
a piyamegan o Allah sa moodiset ago so miyanga teterang nggalebek ka pakipepoonan
iyan kiran den so galebek.
3 Na kinowa iran mambo ki Mosa so langon a pamemegayan a piyangawidan o manga
Israil a pagosaren ko kapagembaali ko sot a Barombarong. Ogaid na oman mapita na
pepengawidan roo pen o manga taw so manga pamemegayan iran.
4 Sabap roo na so langon a manga panday a dii nggagalebek ko Barombarong na initareg
iran pasin so galebek iran
5 Na pitero iran ki Mosa a "Minitaralo so pepengowiten o manga taw a ipenggalebek ko
inisogo o Allah."
6 Mandiyadi na piyakalangkap i Mosa ko dalem o kampo angkai a pandoan a tig iyan a
"Da den a mama o di na babay a ba pagawid sa apiya antonaa pen a ipesedka niyan a
pagosaren ko Barombarong." Sabap roo na gominek roo mangowit so manga taw sa
manga pamemegayan
7 Ka so miyapangowit iran roo den na kiyalawanan pen so keosar ko langon a galebek.
So Kiyapangembaali ko Barombarong
8 So lebi a mapasang a manga mama ko dii nggagalebek na inembaalan iran so
Barombarong a sapolo timan i mangaoolad a dinis a pimbaalan a biro, kasomba ago
mariga a tanor ago landap a sotra a inipamorda on so lagid o paras o manga malaikat a
galebek o mapasang i kapamorda.
9 So maolad a manga dinis na palaya ndatadatar sa kapangaala a sesapolo ago pat ka
10 Piyakandaidair iran mamanai so oman i lima timan on.
11 Oriyan iyan na piyanangilaan iran sa biro a tanor so oman i sesabala a kilid o dowa a
ndilima a dinis.
12 Ndilima polo a minipanangila iran on ko oman i sabala a kilid a miyakapentapantag on
so manga tangila iran.
13 Na mimbaal siran sa lima polo a sambita a bolawan na inosar iran ai ko
kiyapakandaira ko dowa a ndilima a dinis a aya on den kiyasatimana.
14 Kagiya mapasad oto na mimbaal siran sa sapolo ago isa a manga oolad a dinis a
bombol a kambing a aya kilapis ko Barombarong.
15 Giyangkai a sapolo ago isa timan a dinis na ndatadatar sa kapangaala a sesapolo ago
lima ka mitros a katas iyan ago ndodowa ka mitros a kaolad iyan.
16 Piyakandaidair iran mamanai so lima timan on, na piyakandaidair iran mambo so nem
on timan.
17 Ndilima polo a minipanangila iran on ko oman i sesabala a kilid o piyakandaidair a
manga dinis
18 Na mimbaal siran sa lima polo a sambita a tombaga a minindair o dowa a
piyakandaidair a dinis kaan masasatiman.
19 Mimbaal siran sa dowa timan pen a ipelapis ko Barombarong a kisapeng on a so isa on
na kobal a bilibili a iniloto sa mariga, ago so ikadowa a peliyawaon on na manga kobal o
mangaala a seda.
20 Oriyan iyan na mimbaal siran sa manga oolad a papan a kayo a akasiya a
pemakatindegen a seblayan ko Barombarong.
21 Oman i isa on na lima ka mitros a kaporo iyan ago dowa polo ago pito ka porgada a
kabelang iyan
22 Na aden a dowa timan a ai niyan a makandodorog. Ndatadatar a kiyambaali ran ko
langon a manga papan o Barombarong.
23 Inembaalan iran sa dowa polo timan a papan so kilid o Barombarong a matatampar sa
pagabagatan,
24 Na mimbaal siran sa pat polo timan a onayan a pirak a ndodowa i onayan so oman i
papan ka sesatiman a onayan ko oman i ai o papan.
25 So peman so sabala o Barombarong a matatampar sa pagotaraan na inembaalan iran sa
dowa polo timan a papan
6 Ago pat polo timan a onayan a pirak a ndodowa i onayan so oman i isa on a papan.
27 So peman so likod o Barombarong a matatampar sa sedepan na inembaalan iran sa
nem timan a papan
28 Ago dowa timan pen a papan a penagoon ko manga rogo niyan sii sa likod.
29 Sii sangkai a dowa a rogo o Barombarong na piyakapelapis so dowa timan on a papan
a poon sa baba na taman den sa poro a piyakatekesa. Melagid a kiyambaali ko manga
papan a piyanago sangkai a dowa a rogo.
30 Kagiya ka maoto na miyawalo timan langon a manga papan a rakes o sapolo ago nem
timan a onayan iyan a pirak a nggagadowa timan ko oman i papan.
31 Mimbaal siran pen sa kayo a akasiya a pemalawagen a lima timan a kebalawag a
makapekekampeta ko manga papan sii ko isa a kilid o Barombarong,
32 Ago lima timan mambo a makapekekampeta ko manga papan sii ko sabala a kilid
iyan, ago lima pen timan a makapekekampeta ko manga papan a matatampar sa sedepan
roo ko likod iyan.
33 So pelooken a kebalawag ko oman i ndilima on na inembaalan iran a pakapenarosen a
poon ko isa a rogo o Barombarong taman ko isa pen a rogo niyan sii ko look o manga
papan.
34 Pilalapisan iran sa bolawan so manga papan na tiyagoan iran sa manga rambit a
bolawan a ron pemangisanggar so manga pamalawagen. Na pilalapisan iran mambo sa
bolawan so manga pamalawagen.
35 Inembaalan iran so kortina a biro, kasomba ago mariga a tanor ago landap a sotra a
inipamorda on so lagid o paras o manga malaikat a galebek o mapasang i kapamorda.
36 Mimbaal siran sa pat timan a polaos a kayo a akasiya a teyotonan ko rending na
pilalapisan iran ai sa bolawan na tiyagoan iran mambo sa manga sadanga a bolawan. Na
tiyowang iran so pat timan a onayan iyan a pirak.
37 So peman so gimowa o Barmbarong na inembaalan iran sa rending a biro, kasomba
ago mariga a tanor ago landap a sotra a kiyabordaan.
38 Na inembaalan iran ai sa lima timan a polaos a rakes o manga sadanga iyan.
Pilalapisan iran sa bolawan so manga poro iyan ago so manga raros a makapekekampeta
on; ogaid na so lima timan a manga onayan iyan na inembaalan a tombaga.
IKSODOS 37
So Kiyambaali ko Kaban sa Kapasadan
Pimbaalan i Bisalil so Kaban sa Kapasadan a kayo a akasiya a pat polo ago lima ka
porgada a katas iyan ago dowa polo ago pito ka porgada a kaolad iyan ago dowa polo ago
pito ka porgada a kaporo iyan.
2 Na liyapisan iyan sii sa liyo ago sa soled sa lombos a bolawan, na binibiran iyan sa
bolawan so melilibeta on.
3 Mimbaal sekaniyan sa pat timan a rambit a tiyowang a bolawan na piyamateri iyan sii
ko kababaan o pat a rogo o kaban, a ndodowa timan a rambit ko oman i sabala on.
4 Mimbaal sekaniyan pen sa manga tibal a kayo a akasiya na pilalapisan iyan sa bolawan,
5 Na inisanggar iyan so manga tibal ko manga rambit sii ko mbala a kilid o kaban kaan on
pekitibal.
6 So lekeb o Kaban a ron pepepasa so dosa na pimbaalan iyan a lombos a bolawan a pat
polo ago lima ka porgada a katas iyan ago dowa polo ago pito ka porgada a kaolad iyan.
7 Na mimbaal sekaniyan sa dowa timan a piyagtawtaw a lagid sa paras o manga malaikat
a sisel a bolawan
8 A oonain ko lekeb a sesatiman a malaikat ko oman i poro iyan.
9 Sesangora so manga malaikat a totolongan iran so lekeb, ago mabebekar so manga
papak iran a makasasayap on.
So Kiyambaali ko Lamisaan
10 Pimbaalan iyan so lamisaan a kayo a akasiya a telo polo ago nem ka porgada a katas
iyan, sapolo ago walo ka porgada a kaolad iyan ago dowa polo ago pito ka porgada a
kaporo iyan.
11 Liyapisan iyan ai sa lombos a bolawan na go binibiran iyan sa bolawan so melilibeta
on.
12 Na mimbaal sekaniyan on sa pamalagen ko melilibeta on a telo ka porgada a kaolad
iyan, na binibiran iyan pen sa bolawan so melilibeta ko pamalagen.
13 Tomiyowang sekaniyan sa pat timan a rambit a bolawan na piyamateri iyan ko oman i
rogo o lamisaan sii ko kikatatagoan ko ai niyan.
14 Iniobay niyan so manga rambit ko pamalagen ka ron ipesenggar so manga tibal igira a
pegawidan.
15 So manga tibal iyan na inembaalan a kayo a akasiya a liyapisan sa bolawan.
16 Na inembaalan iyan so manga igagama o lamisaan a palaya den lombos a bolawan; so
manga lapad, manga tagayan ago so manga omoy niyan taman ko manga ladiya a
pegosaren ko kipesepaaten ko arak.
So Kiyambaali ko Petegoan sa Solo
17 Pimbaalan iyan so petegoan sa solo a lombos a bolawan a sisel so itado niyan ago so
lawas iyan. Oonain on so manga tagayan iyan a isasayan sa manga obarobar a rakes o
manga boko ago so manga ombos iyan.
18 Nem timan a sapak o lawas iyan a tetelo ko oman i sabala on.
19 Oman i isa ko nem timan a sapak na tiyagoan sa tetelo a tagayan a isasayan sa
20 Sii mambo ko lawas o petegoan sa solo na aden a pat timan a tagayan iyan a isasayan
sa obarobar a almondo a rakes o boko ago so ombos iyan.
21 Aden a satiman a boko ko kababaan o oman i dowa timan a sapak a makambabala ko
lawas o petegoan sa solo.
22 So manga boko ago so manga sapak na oonain ko lawas iyan ago sii ko itado niyan, na
langon den ai inembaalan a sisel a lombos a bolawan.
23 Inembaalan iyan so pito a solo iyan ago so manga ipelipit ko sombowan iyan ago so
pen so manga talam iyan a palaya den lombos a bolawan.
24 Telo polo ago pat ka kilo a bolawan a miyaosar iyan ko kiyambaali niyan ko petegoan
sa solo taman den ko langon a kasangkapan on.
So Kiyambaali ko Aparan a Petotongan sa Doka
25 Pimbaalan iyan so aparan a kayo a akasiya a petotongan sa doka. Piyakapatpasagi iyan
a tenga sa mitros a katas iyan ago so kabelang iyan ago isa ka mitros a kaporo iyan a
kikaoonain on so manga pangapanga niyan ko manga rogo niyan.
26 Liyapisan iyan sa lombos a bolawan so poro iyan, so manga kilid iyan ago so manga
pangapanga niyan, na binibiran iyan sa bolawan so melilibeta on.
27 Mimbaal sekaniyan sa dowa timan a rambit a bolawan na piyamateri iyan ko kababaan
o bibir a nggagaisa ko oman i sabala on a ron pekisanggar so manga tibal igira a
pegawidan.
28 Inembaalan iyan so manga tibal a kayo a akasiya na pilalapisan iyan sa bolawan.
So Kiyambaali ko Lana Diyabat ago so Doka
29 Inembaalan iyan mambo so soti a lana diyabat ago so lombos a doka a
piyakasembosembor a manga mamot a palapa a datar o dii kambaali ko ikekamotan.
IKSODOS 38
So Kiyambaali ko Aparan a Petotongan sa Ipesepaat
Pimbaalan iyan a kayo a akasiya so aparan a petotongan sa ipesepaat. Patpasagi ini a
dowa ago tenga ka mitros a katas iyan ago kabelang iyan, ago isa ago tenga ka mitros a
kaporo iyan.
2 Pimbaalan iyan sa pangapanga so oman i isa ko pat a rogo niyan a oonain ko aparan na
go liyapisan iyan pen ai langon sa tombaga.
3 Pimbaalan iyan a tombaga so langon a kasangkapan ko aparan; so manga kararaw,
manga sakerad, manga ladiya, manga ipesedang sa sapo ago so manga petegoan sa waga.
4 Inembaalan iyan pen sa tapaan a tombaga so aparan na tiyago iyan ai ko kababaan o taar
o aparan a aya kaporo iyan na kiyapatilookan so kaporo o aparan.
5 Tomiyowang sekaniyan sa pat timan a rambit a tombaga na piyamateri iyan ko oman i
rogo o tapaan a ron pekisanggar so manga tibal.
6 Inembaalan iyan so manga tibal a kayo a akasiya na pilalapisan iyan sa tombaga
7 Na inisanggar iyan ai ko manga rambit sii ko mbala a kilid o aparan. Inembaalan a
sesemba so aparan a manga papan.
So Kiyambaali ko Palanggana a Pepangonaban
8 Pimbaalan iyan so palanggana a pepangonaban a rakes o pembatogan on a palaya den
tombaga. Aya inosar iyan ko kiyambaali ron na so tombaga a manga pagalongan o
manga babay a pepanalagad sii ko gimowa o Barombarong a dii Telabokan.
So Lamalama o Barombarong
9 Oriyan iyan na pimbaalan iyan so lamalama o Barombarong. So kilid iyan a
matatampar sa pagabagatan na aaladen a manga rending a landap a sotra a lima polo ka
mitros a katas iyan
10 A rakes o dowa polo timan a polaos a pakatitindegen ko dowa polo timan mambo a
onayan iyan a palaya den tombaga; na so manga polaos na aden a manga sadanga iyan
ago ikakampet on a manga raros a palaya den pirak.
11 So pen so kilid o lamalama sa pagotaraan na datar iyan mambo a kiyambaali ron.
12 So kilid iyan a matatampar sa sedepan na aaladen a manga rending a dowa polo ago
lima ka mitros a katas iyan a rakes o sapolo timan a polaos ago sapolo timan a onayan
iyan a so manga polaos na aden a manga sadanga on ago manga raros a palaya den pirak.
13 So kilid iyan a matatampar sa sebangan a ron matatago so gimowa iyan na dowa polo
mambo ago lima ka mitros a katas iyan.
14-15 So dowa timan a rending on a makambabala ko gimowa na pito ago tenga ka
mitros a katas o oman i isa on a aden a telo timan a polaos iyan a rakes o telo timan
mambo a onayan iyan.
16 So langon a manga rending a iaalad ko lamalama na palaya den landap a sotra.
17 So manga onayan a pakatitindegan ko manga polaos na palaya den tombaga, na so
manga sadanga ago so manga raros o manga polaos na palaya den pirak, na so pen so
ilalapis ko poro o manga polaos na pirak. So langon a polaos ko lamalama na
piyakakekampeta o manga raros a pirak.
18 So rending ko gimowa o lamalama na biro, kasomba ago mariga a tanor ago landap a
sotra a piyamordaan. Sapolo ka mitros a katas iyan ago dowa ago tenga ka mitros a
kaporo iyan a datar bo o kaporo o manga rending a iaalad ko lamalama.
19 Aden a pat timan a polaos iyan a rakes mambo o pat timan a onayan iyan a palaya den
tombaga. So manga sadanga o manga polaos, so ilalapis ko manga poro iyan taman ko
manga raros iyan na palaya den pirak.
20 So langon a manga lapek o Barombarong ago so alad o lamalama na palaya den
tombaga.
So Langon Taman a Inosar ko Kiyambaali ko Barombarong
21 Giyai i listaan ko langon taman a miyaosar ko kiyambaali ko Barombarong a ron
matatago ko Kaban sa Kapasadan. Inisorat ai o manga Libitiyo ko kinisogoon kiran on i
Mosa a pikepatasan siran mambo i Itamar a wata i Aron a imam.
22(Si Bisalil a wata i Ori a wata peman i Hor a ped ko mbatabataa a Yodah na
inembaalan iyan so langon taman a inisogo o Allah ki Mosa.
23 Aya salinggogopa iyan on na si Oholiyab a wata i Ahisamak a ped ko mbatabataa a
Dan. Mapasang sekaniyan i kapenday, kapanaong ago kapamorda sa biro, kasomba ago
mariga a tanor ago landap a sotra.)
24 So bolawan a inisedka ko Allah a miyaosar ko kiyambaali ko Barombarong na tarotop
a sanggibo ka kilo a piyakaokit ko timbangan sii ko Barombarong.
25 So pirak a miyakowa ko isa ka maginged isako isorat so kadakel iran na telo nggibo
ago pat gatos ago dowa polo ka kilo a piyakaokit ko timbangan ko Barombarong.
26 Giyanan den so ndenem ka gramo a poon ko oman i isa a mama a minibilang a dowa
polo ragon a idad iyan ago kalalawanan pen. Aya kadakel o manga mama na nem gatos
ago telo nggibo ago lima gatos ago lima polo kataw.
27 So telo ron nggibo ago pat gatos ka kilo a pirak na inosar ko kiyambaali ko magatos
timan a tiyowang a manga onayan o manga polaos o Barombarong taman ko manga
onayan o kortina, a so oman i onayan na tetelo polo ago pat ka kilo.
28 So miyalamba on a dowa polo ka kilo na piyangembaalan on i Bisalil so inipelalapis
ko manga poro o manga polaos ago so manga sadanga iyan taman ko manga raros iyan.
29 So pen so tombaga a inisedka o manga taw ko Allah na dowa nggibo ago pat gatos ka
kilo.
30 Inosar iyan ai ko kiyambaali ko manga onayan ko gimowa o Barombarong, so
tombaga a aparan a rakes o tombaga a tapaan on taman ko langon a kasangkapan on,
31 So manga onayan o manga polaos ko lamalama a melilibeta ko Barombarong a rakes
on so onayan o gimowa iyan, ago so pen so manga lapek o Barombarong ago sii ko
melilibeta on.
IKSODOS 39
So Kiyambaali ko manga Nditaren o manga Imam
Piyangaol iran a biro, kasomba ago mariga a tanor so manga nditaren a pesoloten o
manga imam igira a pegimam siran ko Soti a Darpa. Inembaalan iran mambo so soti a
nditaren i Aron a aya den inisogo o Allah ki Mosa.
So Saliko
2 Pimbaalan iran so saliko a biro, kasomba ago mariga a tanor, bolawan ago landap a
sotra.
3 Siyasa iran so bolawan taman sa miyakanipis na go piyanabas iran ai a maroni a kawat a
ipengaol ko biro, kasomba ago mariga a tanor ago so landap a sotra a so galebek o
mapasang i kapangaol.
4 Inembaalan iran so saliko a dowa timan i rambit ko waga niyan sii ko mbala a kilid iyan
kaan ai dii mapakakempet.
5 So liyangkitan a sambitan a oonain on na datar iyan mambo a kiyambaali ron a biro,
kasomba ago mariga a tanor ago landap a sotra a giyoto den i inisogo o Allah ki Mosa.
6 Piyanapilan iran so manga montiya a oniksa na go pisokodan iran ko manga pamalagen
a bolawan. Inipanombok iran on so manga ngaran o manga wata o Israil a manga mama,
7 Na inipaneket iran ko dowa a rambit o waga o saliko ka aya ipenanadem ko sapolo ago
dowa ka mbatabataa a Israil. So den so inisogo o Allah ki Mosa i pinggolaola iran.
So Raben a Ipesepeng ko Rareb
8 Pimbaalan iran so raben a galebek o mapasang i kapangaol. Datar o saliko a kiyambaali
ron a biro, kasomba ago mariga a tanor, bolawan ago landap a sotra.
9 Piyakapatpasagi iran ai a lipi a siyaw ka porgada a katas iyan ago kabelang iyan.
10 Diketan iran ai sa pat koyog a manga montiya. So paganay a koyogan iyan na montiya
a robi, topas ago komarapar.
11 So ikadowa koyog na torkowis, paramata ago diyamanti;
12 So ikatelo koyog na hasinto, agata ago amatista,
13 Na so ikapat koyog na birilo, oniksa ago haspiro. Pisokodan ai langon ko manga
pamalagen a bolawan.
14 Oman i isa sangkai a sapolo ago dowa timan a montiya na initombok on so ngaran o
isa ko manga wata o Israil a aya den tanda ko isa ko sapolo ago dowa ka mbatabataa.
15 Mimbaal siran sa manga rantay a lombos a bolawan a tiyalitali a tegoon ko raben.
16 Na mimbaal siran mambo sa dowa timan a bolawan a ndeketan ago dowa timan a
bolawan a kaningkir, na inikampet iran so manga kaningkir ko dowa a rogo o raben sii sa
tampar sa poro.
17 Oriyan iyan na iniiket iran so dowa timan a rantay a bolawan ko manga kaningkir sii
ko manga rogo o raben,
18 Na so sabala ko poro o manga rantay na inipanaket iran ko dowa timan a ndeketan on
a bolawan na go piyanago iran ai ko manga rambit o waga o saliko sii ko panempang
iyan.
19 Mimbaal siran peman sa dowa timan a kaningkir a bolawan na inikampet iran ko dowa
a rogo a kababaan o raben sii ko didalem iyan a matatampar ko saliko.
20 Oriyan iyan na mimbaal siran peman sa dowa pen timan a kaningkir a bolawan na
inikampet iran ai ko kababaan o dowa timan a rambit o waga o saliko ko panempang iyan
a marani ko tebiraan ago sii ko kaporoan o lalangkitan a sambitan o saliko.
21 Na piyakapagiketa iran a biro a tali so manga kaningkir ko raben ago so manga
kaningkir ko saliko na giyoto a minikampet so raben ko sambitan kaan di kepokas ko
saliko a aya iran den pinggolaola so inisogo o Allah ki Mosa.
So Ped a Nditaren o manga Imam
22 Inaol iran so kimon a ipepegimam a ipelapis on so saliko a palaya biro a warna niyan.
23 Aden a lig o kimon ko look iyan a bibibiran sa inaol a kowiliyo kaan di kekisi so sisid
iyan.
24-26 So melilibeta ko sagayadan o kimon na tiyayotonan iran sa manga garigay a iroropa
sa onga a granada a pimbaalan a biro, kasomba ago mariga a tanor ago landap a sotra; na
kitatayotonan pen sa manga tongkaling a lombos a bolawan so oman i pageletan o manga
garigay a aya den inisogo o Allah ki Mosa.
27 Piyangaol iran a landap a sotra so manga bangkala i Aron ago so manga wata iyan
28 A rakes o sorban ago so piyagartaan a manga totob, ago so manga sinempek a sotra,
29 Ago so pen so lalangkitan a sambitan a pimbaalan a landap a sotra ago biro, kasomba
ago mariga a tanor a aya den inisogo o Allah ki Mosa.
30 Pimbaalan iran a lombos a bolawan so soti a tanda a tegoon ko sorban, na initombok
iran on angkai a manga katero a aya niyan den siliyo: ISESENGGAY KO ALLAH.
31 Iniiket iran ai ko panempang o sorban a biro a tali a inigakot on a aya den inisogo o
Allah ki Mosa.
Miyapasad so Galebek
32 Sa masa oto na so langon a galebek ko Barombarong a dii Telabokan na palaya den
miyapasad. Ininggolalan o manga Israil so langon taman a inisogo o Allah ki Mosa.
33 Na piyangowit iran ki Mosa so Barombarong ago so ipelapis on taman ko langon a
pagigimo ron maana a so manga sadanga iyan, manga papan, manga pamalawagen,
manga polaos ago so manga onayan iyan;
34 So ipesepeng on a kobal a bilibili a iniloto sa mariga ago so ipesepeng on pen a manga
kobal o mangaala a seda; so kortina a indalong ko Kaban,
35 So Kaban sa Kapasadan a rakes o lekeb iyan ago so manga tibal iyan;
36 So lamisaan a rakes o langon a ipamemetad on, ago so paan on a ipesepaat ko Allah;
37 So lombos a bolawan a petegoan sa solo, so aatoren a manga solo on a rakes o ipelana
on ago so langon a manga igagama iyan;
38 So aparan a bolawan, so lana diyabat, so petotongen a doka, ago so iperending ko
gimowa o Barombarong;
39 So tombaga a aparan a rakes o tombaga a tapaan on, so manga tibal iyan ago so langon
a kasangkapan on; so palanggana a pepangonaban ago so pembatogan on;
40 So manga rending ko lamalama a rakes o manga polaos ago manga onayan iyan ago so
iperending ko gimowa iyan; so manga tali ago so manga lapek ko lamalama; so langon a
pagigimo a pagosaren ko Barombarong a dii Telabokan
41 Ago so pen so piyangaol a manga nditaren a pesoloten o manga imam igira a pegimam
siran ko Soti a Darpa maana a so soti a nditaren i Aron a imam ago so manga wata iyan a
manga mama.
42 So den so langon a manga galebek a inisogo o Allah ki Mosa i mininggolalan o manga
Israil.
43 Na piyariksa i Mosa so langon taman a piyangembaalan iran na miyailay niyan a so
den so inisogo o Allah. Kagiya ka maoto na riyakmatan siran i Mosa.
IKSODOS 40
Piyakatindeg so Barombarong
Oriyan iyan na pitero o Allah ki Mosa a
2 “Sii ko paganay a gawii ko paganay a olanolan na pakatindega ngka so Barombarong a
dii Telabokan.
3 Tagoa ngka on so Kaban sa Kapasadan na go ngka on dalongen so kortina niyan.
4 Soleden ka ko Barombarong so lamisaan na go ngka on tanora so manga ipamemetad
on. Soleden ka on pen so petegoan sa solo na go ngka on tagoa so manga solo iyan.
5 Betaden ka so bolawan a aparan a petotongan sa doka sii ko onaan o Kaban sa
Kapasadan, na tayotona ngka ko gimowa o Barombarong so rending iyan.
6 “Betaden ka so aparan a petotongan sa ipesepaat sii ko onaan o gimowa o Barombarong
7 Na betaden ka pen so palanggana a pepangonaban sii ko pageletan o Barombarong ago
so aparan na go ngka tagoi sa ig.
8 Pakatindega ngka so ipagalad a manga rending ko lamalama o Barombarong na go ngka
tayotona ko gimowa o lamalama so rending iyan.
9 “Mapasad oto na kowaa ngka so lana diyabat na go ngka on panalawati so
Barombarong ago so langon taman a tiyago on; senggain ka ini a rek o Allah ago so
langon a pagigimo ron, na pembaloy ai a soti.
10 Oriyan iyan na panalawati ngka so aparan a petotongan sa ipesepaat ago so langon a
kasangkapan on; senggain ka ini a rek o Allah ka pembaloy a lebi a soti.
11 Salawati ngka pen so palanggana ago so pembatogan on na go ngka senggain a rek o
Allah.
12 “Wita ngka si Aron ago so manga wata iyan ko gimowa o Barombarong a dii
Telabokan na pakapeigoa ngka siran sa ig.
13 Oriyan iyan na soloten ka ki Aron so soti a nditaren na salawati ngka sekaniyan sa lana
diyabat a aya ngka on kasotiya kaan ako niyan kapanalagadi sii ko kaiimami ron.
14 Wita ngka roo mambo so manga wata iyan na soloten ka kiran so manga bangkala
iran.
15 Na panalawati ngka siran mambo a datar o kiyasalawati ngka ko ama iran kaan ako
iran kapanalagadi sii ko kaiimami kiran. Giyangkai a kiyasalawati kiran na aya kiran den
kiniidinen ko kaiimami taman ko kapepemagapidapidi kiran."
16 Na so den so langon taman a inisogo o Allah ki Mosa na aya niyan ininggolalan.
17 Kagiya ka maoto na piyakatindeg so Barombarong ko paganay a gawii ko paganay a
olanolan sii ko ikadowa ragon a kiyapakaawa iran sa Misir.
18 Kagiya mapakatindeg i Mosa so Barombarong na inibetad iyan so manga onayan iyan,
piyakatindorog iyan on so manga papan, piyakakekampeta iyan on so manga
pamalawagen ago piyamakatindeg iyan pen so manga polaos.
19 Oriyan iyan na kiyayat iyan ko Barombarong so lapis iyan, na inilapis iyan on so
sapeng iyan a aya den kiyatoman o inisogo on o Allah.
20 Kinowa niyan so dowa timan a mapapapan a ator na tiyago iyan ko soled o Kaban sa
Kapasadan, na inisanggar iyan so manga tibal ko manga rambit iyan na tiyago iyan on so
lekeb iyan a ron pepepasa so dosa.
21 Oriyan iyan na inisoled iyan so Kaban sa Kapasadan ko Barombarong na tiyayoton
iyan on so kortina a indalong on ka aya on den inisogo o Allah.
22 Tiyago i Mosa so lamisaan sii sa liyo o kortina sii sa tampar sa pagotaraan o
Barombarong,
23 Na inibetad iyan on so paan a ipesepaat ko Allah a aya on den inisogo o Allah.
24 Tiyago iyan so petegoan sa solo sii ko Barombarong a pantag o lamisaan sii sa tampar
sa pagabagatan,
25 Na tinteman iyan so manga solo on ko hadapan o Allah a aya on den inisogo o Allah.
26 Oriyan iyan na tiyago iyan so bolawan a aparan sii ko Barombarong ko onaan o
kortina,
27 Na tomiyotong sekaniyan on sa doka a aya on den inisogo o Allah.
28 Kagiya mapasad oto na tiyayoton iyan den so rending ko gimowa o Barombarong.
29 Tiyago iyan so aparan a petotongan sa ipesepaat sii ko liyo o gimowa o Barombarong
na inisapaat iyan on so petotongen a ipesepaat ago so ipesepaat a pangenengken a aya on
den inisogo o Allah.
30 Inibetad iyan so palanggana a pepangonaban ko pageletan o Barombarong ago so
aparan, na tiyagoan iyan ai sa ig a ipemangonab.
31 Si Mosa ago si Aron ago so manga wata iyan na pepamangonaban iran on so manga
lima ago manga ai ran
32 Igira a pesoled siran ko Barombarong o di na pegobay siran ko aparan ka aya den
inisogo o Allah ki Mosa.
33 Oriyan iyan na piyakatindeg i Mosa so ipagalad ko lamalama o Barombarong ago so
aparan na go tiyayoton iyan pen so rending ko gimowa o lamalama. Giyoto den i
kiyapasada i Mosa ko langon o galebek on.
So Bantogan o Allah
34 Oriyan iyan na minikolob so gabon ko Barombarong a dii Telabokan, na minipeno on
so bantogan o Allah.
35 Na di pekasoled si Mosa ko Barombarong sabap sa tomatana on so gabon ago
mipepeno on so bantogan o Allah.
36 Sii ko langon a kapelalakaw o manga Israil na igira a pekiporo so gabon ko
Barombarong na pengganat siran,
37 Ogaid na taman sa di ron miporo so gabon na di siran mambo melalakaw taman ko
gawii a kiporo iyan.
38 Ka sii ko langon o masa a kapelalakaw iran na so langon o isa ka maginged a Israil na
pekeilay iran so gabon o Allah ko liyawaw o Barombarong igira a daondaw, ago apoy ko
liyawaw niyan igira a gagawii.
LIBITIKOS
LIBITIKOS 1
So manga Korban a Ipesepaat a Petotongen
Tiyalowan o Allah si Mosa sii ko Barombarong a dii Telabokan na miyakimbitiyarai ron
a tig iyan a
2 “Teroa ngka ko manga Israil a: Igira aden a isa rekano a pekorban ko Allah na aya kewit
iyan on a pekorbanen na isa ko manga pangangayamen iyan a sapi, bilibili o di na
kambing.
"3 O aya ipekorban iyan a isepaat a totongen na isa ko manga sapi iyan na aya kewit iyan
na so mama on a da a daway niyan. Kewit iyan ai ko gimowa o Barombarong a dii
Telabokan kaan matarima o Allah.
4 Kidapenet iyan a lima niyan ko olo o sapi a pekorbanen a isepaat a totongen na ketarima
ini a aya on kisambi kaan mapapas so dosa niyan.
5 Kesombali iyan so sapi sii ko hadapan o Allah, na so manga imam a manga wata i Aron
na kekowa iran so rogo iyan na mipemiripirik iran ko langon o manga kilid o aparan a
ndodoo ko danga o Barombarong.
6 Oriyan iyan na kelodasan iyan sa kobal so sapi na pemekangen iyan pen.
7 Ketagoan o manga imam sa apoy so aparan ago pagitagonan iran
8 Na taros a ipemetad iran sii ko pekedeg a itagon so miyapamekang a lawas o sapi a
rakes o olo ago so manga sibo iyan.
9 Na keonaban iyan so soled a tiyan o ayam ago so manga bobon iyan, na iperakes ai o
imam tomotong sii ko aparan. Giyai i dii kakorban sa ipesepaat a petotongen a mamot ko
Allah.
10 “O aya ipekorban iyan a isepaat a totongen na isa ko manga bilibili niyan o di na
kambing na aya kewit iyan na so mama on a da a daway niyan.
11 Kesombali iyan so ayam ko tampar sa pagotaraan o aparan sii ko hadapan o Allah, na
mipemiripirik o manga imam so rogo iyan sii ko langon o manga kilid o aparan.
12 Mapemekang iyan so ayam na taros a ipemetad ai o imam sii ko pekedeg a itagon ko
aparan a rakes o olo ago so sibo iyan.
13 Na keonaban iyan so soled a tiyan o ayam ago so manga bobon iyan, na iperakes ai o
imam tomotong sii ko aparan. Giyai i dii kakorban sa ipesepaat a petotongen a mamot ko
Allah.
14 “O aya ipekorban iyan a isepaat a totongen sii ko Allah na papanok na aya kewit iyan
na marapatik o di na pagapak.
15 Kewit ai o imam ko aparan na mbibiden iyan so lig o papanok sa kambadota niyan ko
olo niyan na totongen iyan ai ko aparan, na mapekatoga iyan so rogo iyan ko kilid o
aparan.
16 Kekowa niyan so tinokaan o papanok ago so matatago on na kilebad iyan sii ko
masesedepan o aparan a ndodon so ombi.
17 Na kekapetan iyan so manga papak o papanok na pagopaken iyan so lawas iyan a kena
a ba niyan pakapembelaga, na taros a totongen iyan ko pekedeg a itagon ko aparan. Giyai
i dii kakorban sa ipesepaat a petotongen a mamot ko Allah.
LIBITIKOS 2
So Kapesapaat sa Pangenengken
"Igira a aden a pesepaat sa pangenengken ko Allah na aya kewit iyan na mapiya a arina.
Keododan iyan ai sa lana a olibi ago perakesan iyan sa doka
2 Na kewit iyan ko manga imam a manga wata i Aron. Kowa so imam sa sagamak ko
arina ago so lana a rakes o langon o doka on na totongen iyan ai sii ko aparan a aya den
toos a so kalangolangon iyan na inisapaat ko Allah. Giyai na ipesepaat a pepakaokiten sa
apoy a mamot ko Allah.
3 So kelamba ko pangenengken a inisapaat na rek i Aron ago so manga wata iyan; lebi ini
a soti ko manga ipesepaat ko Allah a pepakaokiten sa apoy.
4 “O aya isepaat ka na paan a initinda ko pogon na aya kewit ka na so da a tapay ron a
manga apang a inembaalan a mapiya a arina a sesemboran sa lana a olibi, o di na manga
biskowit a da a tapay ron a iibongen a lana.
5 O aya isepaat ka na paan a initinda ko aloba na aya kewit ka na so inembaalan a mapiya
a arina a sesemboran sa lana ago da a tapay ron.
6 Pangopaka ngka ini na go ngka ododi sa lana a olibi sa kisepaaten ka on.
7 O itinda sa kara so isepaat ka na mbaali ngka pen a mapiya a arina a sesemboran sa lana
a olibi.
8 Na so pangenengken a isepaat ka ko Allah a inembaalan sangkai a manga palapa na
kepalad ka ko imam na pagowiten iyan sii ko aparan.
9 Na kekowa on o imam so sabagi ko pangenengken a aya den toos a so kalangolangon
iyan na inibegay ko Allah, na totongen iyan ai ko aparan a aya isepaat a pekaokiten sa
apoy a mamot ko Allah.
10 So kelamba ko inisapaat na rek i Aron ago so manga wata iyan. Lebi ini a soti ko
manga ipesepaat ko Allah a pepakaokiten sa apoy.
11 “Da a ba pangenengken a isepaat iyo ko Allah a ba ketagoi sa tapay, ka inisapar so
kapetotonga ko tapay o di na gola teneb a inisaog ko ipesepaat ko Allah a pepakaokiten sa
apoy.
12 Kepakay a mawit iyo ini ko Allah a isepaat iyo ron a iperakes ko paganay a inionga o
pereperan ka, ogaid na di den ai ketotong sii ko aparan a aya mamot ko Allah.
13 Timosi ngka so oman i isepaat ka a pangenengken. Di ngka den pendarainonen so
katagoi ngka on sa timos a aya den toos ko kapasadan o Tohan ka. Tagoi ngka sa timos
so langon o manga ipesepaat ka.
14 “Amay ka sepaat ka ko Allah ko paganay a inionga o pereperan ka na aya kewit ka na
miyabowayo a onga a miyasendag ko apoy.
15 Sembori ngka sa lana a olibi na go ngka tagoi sa doka, ka isepaat ai a pangenengken.
16 Na totongen o imam so sabagi ko onga ago lana a rakes o langon o doka on a aya den
toos a so kalangolangon iyan na inibegay ko Allah. Giyanan na isepaat ko Allah a
pekaokiten sa apoy.
LIBITIKOS 3
So dii Kakorban pantag bo ko kanggiginawai
"O aden a sepaat ko Allah sa isa ko manga ayam iyan a pekorbanen pantag bo ko
kanggiginawai na aya kewit iyan on na mama a sapi o di na babay a da a daway niyan.
2 Kidapenet iyan a lima niyan ko olo o ayam na kesombali iyan sii ko gimowa o
Barombarong a dii Telabokan. Na so rogo iyan na mipemiripirik o manga imam a wata i
Aron sii ko langon o manga kilid o aparan.
3 So ped sangkai a ayam na kisapaat ko Allah a pekaokiten sa apoy maana a so langon o
sibo a mikokokos ko soled a tiyan,
4 So dowa timan a pato a peketangelan sa titi a rakes o mikokokos on a sibo ago so lebi a
mapiya ko atay a mapengabis on a rakes o manga pato.
5 Na palaya ini totongen o manga imam sii ko aparan a iperakes ko ayam a ipesepaat a
petotongen sii ko liyawaw o pekedeg a itagon. Giyai i isepaat a pangenengken a totongen
a mamot ko Allah.
6 “O aya isepaat iyan ko Allah na isa ko manga bilibili niyan o di na kambing a
pekorbanen pantag bo ko kanggiginawai na aya kewit iyan on na so mama o di na babay a
da a daway niyan.
7 O aya ipekorban iyan na bilibili na kewit iyan ko hadapan o Allah,
8 Na kidapenet iyan a lima niyan ko olo o ayam na taros a kesombali iyan sii ko danga o
Barombarong a dii Telabokan. Na mipemiripirik o manga imam so rogo o ayam sii ko
langon o manga kilid o aparan.
9 So ped sangkai a ayam na kisapaat ko Allah a pekaokiten sa apoy maana a so langon a
kasiboan a ikog a sii pagabisa ko marani ko bekokong, so langon o sibo ko soled a tiyan,
10 So dowa timan a pato a rakes o mikokokos on a sibo, ago so lebi a mapiya ko a
mapengabis on a rakes o manga pato.
11 Na palaya ini totongen o imam sii ko aparan a aya den isepaat a pangenengken sii ko
Allah.
12 “O aya ipekorban iyan na kambing na kewit iyan ko hadapan o Allah,
13 Na kidapenet iyan a lima niyan ko olo o ayam na taros a kesombali iyan sii ko danga o
Barombarong. Na mipemiripirik o manga imam so rogo iyan sii ko langon o manga kilid
o aparan.
14 So ped sangkai a ayam na kisapaat ko Allah a pekaokiten sa apoy maana a so langon o
sibo sii ko soled a tiyan,
15 So dowa timan a pato a rakes o mikokokos on a sibo, ago so lebi a mapiya ko atay a
mapengabis on a rakes o manga pato.
16 Na totongen ai langon o imam sii ko aparan a aya den kapekorban sa isepaat a
totongen a mamot ko Allah. So langon o sibo na rek o Allah.
17 “Inisapar rekano so kakan sa sibo ago rogo. Giyai na da a ikepos iyan a sogoan ko
langon o kebabadan rekano apiya anda kano pekabaling.
LIBITIKOS 4
So dii Kakorban sabap ko Dosa
2 “Teroa ngka ko manga Israil a: Amay ka aden a miyakandosa sa da niyan tibabaa ko
kiyasogoka niyan ko apiya antonaa a sogoan o Allah na mipenggolalan iyan so
pemakatalondog a manga insarat:
3 “O aya miyakandosa na so kiyaidinan a imam na miyawitowit iyan so manga taw ko
kasalaan, na pekawit sekaniyan ko Allah sa mangoda a mama a sapi a da a daway niyan
na mapekorban iyan sabap ko dosa niyan.
4 Kepalad iyan so sapi ko Allah sii ko gimowa o Barombarong a dii Telabokan. Na
kidapenet iyan a lima niyan ko olo o sapi na taros a kesombali iyan roo ko hadapan o
Allah.
5 Oriyan iyan na kekowa o kiyaidinan a imam so ped ko rogo o sapi na kisoled iyan ko
Barombarong.
6 Kisombo niyan a kemer iyan ko rogo na mipemesipesik iyan sa makapito ko hadapan o
Allah sii ko onaan o kortina a irerending ko Lebi a Soti a Darpa.
7 Oriyan iyan na kisalapot iyan so rogo sii ko manga pangapanga o aparan a petotongan
sa doka a ndodoo ko hadapan o Allah sii ko Barombarong. So kelamba ko rogo o sapi na
keodod iyan ko itado o aparan a petotongan sa manga korban a sisii ko danga o gimowa o
Barombarong.
8 Na mapengabis iyan so langon o sibo sii ko soled a tiyan o sapi a pekorbanen sabap ko
dosa
9 A rakes o dowa timan a pato ago so mikokokos on a sibo taman ko lebi a mapiya ko
atay.
10 Na ketotong ai o imam ko aparan a petotongan ko manga ipesepaat a datar o ipekidia
ko manga sibo o sapi a dii korbanen pantag bo ko kanggiginawai.
11 Ogaid na so kobal o sapi ago so langon o sapo iyan a rakes on so olo ago so manga
bobon, ago so pen so soled a tiyan ago so tinai niyan
12 Maana a so langon o miyalamba ko sapi na kewit iyan ko liyo o kampo sii ko lompiyo
a darpa a pelebedan sa ombi, na roo niyan ai ketotong ko itagon sii ko mitatabotod a
ombi.
13 “O so langon o isa ka maginged a manga Israil na aya miyakandosa sa da iran tibabaa
ko kiyasogoka niyan ko apiya antonaa a sogoan o Allah na apiya pen di iran ai katawan na
miyataksil siran den.
14 Na anda den i katokawi ran ko dosa a miyasogok iran na pekawit siran ko hadapan o
Barombarong sa mangoda a mama a sapi a aya iran mapekorban sabap ko dosa iran.
15 So manga pelokelokesen ko isa ka maginged na kidapenet iran a manga lima iran ko
olo o sapi sii ko hadapan o Allah na taros a sombaliin iran roo.
16 Oriyan iyan na kewit o Maporo a Imam so ped ko rogo o sapi ko soled o Barombarong
17 Na kisombo niyan a kemer iyan ko rogo na mipemesipesik iyan sa makapito ko
hadapan o Allah sii ko onaan o kortina.
18 Na taros a selapotan iyan sa rogo so manga pangapanga o aparan a petotongan sa doka
a matatago ko hadapan o Allah sii ko Barombarong. So kelamba ko rogo na keodod iyan
ko itado o aparan a petotongan sa manga korban a sisii ko danga o gimowa o
Barombarong.
19 Na mapengabis o imam ko sapi so langon o sibo na go totongen iyan sii ko aparan,
20 Na aya ikidia niyan sangkai a sapi na datar o inikidia niyan ko sapi a pikorban sabap
ko dosa o imam. Sii sangkai a okit na ipenggolalan o imam so kakepapasa ko dosa o
manga taw na kerilaan siran.
21 Na kewit o imam ko liyo o kampo so miyalamba ko sapi na totongen iyan roo a datar o
kapetotonga niyan ko sapi a dii korbanen sabap ko rek iyan a dosa. Giyai den i dii
kakorban igira a pekedosa so isa ka maginged.
22 “O so isa ko manga olowan na aya miyakandosa sa da niyan tibabaa ko kiyasogoka
niyan ko apiya antonaa a sogoan o Allah a Tohan iyan na miyataksil sekaniyan den.
23 Na anda den i katokawi niyan ko dosa a miyasogok iyan na makapekorban sekaniyan
sa mandangan a da a daway niyan.
24 Kidapenet iyan a lima niyan ko olo o mandangan na kesombali iyan ko hadapan o
Allah sii ko penombalian ko manga ayam a dii korbanen a ipesepaat a petotongen. Giyai
na dii kakorban sabap ko dosa.
25 Na kisombo o imam so kemer iyan ko rogo o ayam na kisalapot iyan sii ko manga
pangapanga o aparan a petotongan sa manga korban na keodod iyan so kelamba ko rogo
sii ko itado o aparan.
26 Na ketotong iyan so langon o sibo o ayam sii ko aparan a datar o ipekidia niyan ko
sibo o dii korbanen pantag bo ko kanggiginawai. Sii sangkai a okit na ipenggolalan o
imam so kakepapasa ko dosa o olowan na perilaan sekaniyan.
27 “O so ped ko isa ka maginged na aya miyakandosa sa da niyan tibabaa ko kiyasogoka
niyan ko apiya antonaa a sogoan o Allah na miyataksil sekaniyan den.
28 Na anda den i katokawi niyan ko dosa a miyasogok iyan na makapekorban sekaniyan
sa babay a kambing a da a daway niyan sabap ko dosa niyan.
29 Kidapenet iyan a lima niyan ko olo o kambing a pekorbanen sabap ko dosa na go
kesombali iyan sii ko penombalian ko manga ayam a dii korbanen a ipesepaat a
petotongen.
31 Oriyan iyan na mapengabis iyan on so langon o sibo o kambing a datar o
kapepengabisi sa sibo ko dii korbanen pantag bo ko kanggiginawai, na ketotong ai o
imam ko aparan a mamot ko Allah. Sii sangkai a okit na ipenggolalan o imam so
kakepapasa ko dosa angkoto a taw na perilaan sekaniyan.
32 “Ogaid na o bilibili a mapekorban iyan sabap ko dosa na aya kewit iyan na babay a
bilibili a da a daway niyan.
33 Kidapenet iyan a lima niyan ko olo o bilibili a pekorbanen sabap ko dosa na kesombali
iyan sii ko penombalian ko manga ayam a dii korbanen a ipesepaat a petotongen.
35 Oriyan iyan na mapengabis iyan on so langon o sibo o ayam a datar o kapepengabisi sa
sibo ko manga bilibili a dii korbanen pantag bo ko kanggiginawai, na ketotong ai o imam
ko aparan a rakes o manga ped a ipesepaat a petotongen sii ko Allah. Sii sangkai a okit
na ipenggolalan o imam so kakepapasa ko dosa angkoto a taw na perilaan sekaniyan.
LIBITIKOS 5
So dii Nggolaolaan a Paliyogat on so dii Kakorban sabap ko Dosa
"O aden a taw a makandosa sabap ko di niyan kapeyaga ko miyailay niyan o di na
kiyatokawan iyan amay ka pakapeseksiin ko dii kokoman na kesala sekaniyan.
2 “O di na o aden a miyakaseko sa apiya antonaa a maresik apiya anda ko lawas o
miyatay a binatang, pangangayamen o di na paoledoled na apiya pen o di niyan ai
katawan na miyadalem sekaniyan a hadas ago miyataksil.
3 “O di na o makaseko sekaniyan sa maresik a miyakapoon ko manosiya, a so apiya
antonaa a ikebaloy niyan a kena a ba soti, apiya pen o di niyan ai katawan, na amay ka
katokawan iyan na ketaksil sekaniyan den.
4 “O di na o aden a taw a baden penggagaan sepa sa da niyan pamikira mipantag ko apiya
antonaa a penggolaolaan iyan a mapiya o di na marata, na apiya pen o da niyan ai
mainengka, na ketaksil sekaniyan den amay ka katokawan iyan.
5 “Amay ka aden a taw a miyataksil sabap ko apiya anda sangkai a dii manggolaola na
ketaobat iyan so miyandosa niyan.
6 Na pekawit sekaniyan ko Allah sa satiman a babay a bilibili o di na kambing a aya
niyan den mipenginsalaan ko dosa niyan, na taros a mapekorban ai o imam a aya
kakepapas o dosa niyan.
7 “O di niyan kegaga a kapakakorban iyan sa bilibili o di na kambing na aya kewit iyan
ko Allah na dowa timan a marapatik o di na dowa timan a kangodaan a pagapak a aya
niyan den mipenginsalaan ko dosa niyan. So isa on na mapekorban sabap ko dosa, na so
isa on na mapekorban a isepaat a totongen.
8 Kewit iyan ai ko imam na pekorbanen iyan paganay so isa on sabap ko dosa. Kebibid
iyan so lig o papanok a kena a ba niyan mbadota so olo niyan
9 Na taros a mipemirik iyan so ped ko rogo iyan ko kilid o aparan, na so lamba on na
mapekatoga ko itado o aparan. Giyai na kakorban sabap ko dosa.
10 Na so ikadowa a papanok na pekorbanen o imam a isepaat a totongen a aya kaketoman
o taritib. Giyanan i kipenggolalanen o imam ko kakepapasa ko dosa angkoto a taw na
kerilaan sekaniyan.
11 “Ogaid na o di niyan kegaga a kapakakorban iyan sa dowa a marapatik o di na pagapak
na aya kewit iyan sabap ko dosa niyan na isa ka kilo a lebi a mapiya a arina. Di niyan ai
ketagoan sa lana a olibi o di na doka ka kagiya giyai na isepaat sabap ko dosa.
12 Kewit iyan ai ko imam a aya on nggamak sa toos a so kalangolangon iyan na inibegay
ko Allah, na taros a totongen iyan ai sii ko aparan a iperakes ko ped a ipesepaat a
petotongen ko Allah. Giyai na kasapaat sabap ko dosa.
13 Sii sangkai a okit na ipenggolalan o imam so kakepapasa ko apiya anda sangkai a
manga dosa a miyasogok o taw na kerilaan sekaniyan. So lamba ko arina na rek den o
imam a datar o pangenengken a ipesepaat."
So dii Kakorban sabap ko Kiyataksil
14 Pitero o Allah ki Mosa a
15 “Amay ka aden a taw a miyakandosa sa da niyan tibabaa ko kiyasogoka niyan ko
taritib mipantag ko manga nganin a isesengay a soti ko Allah na kewit iyan ko Allah so
mama a bilibili a aya niyan den ipenginsalaan, a disomala a da a daway niyan ago
kiyaostowan sa arga sii ko pirak a piyakaokit ko timbangan sii ko Barombarong. Giyai na
kakorban sabap ko kiyataksil.
16 Na disomala a kapetepalan o taw so da niyan minggolalan mipantag ko soti a manga
nganin ago kioman iyan on pen so ikalima bagi ko arga iyan, na kibegay niyan ai langon
ko imam. Na pekorbanen o imam so bilibili a aya niyan kipenggolalanen ko kakepapasa
ko sala o taw, na kerilaan sekaniyan.
17 O madosa so taw ko kiyasogoka niyan ko apiya antonaa a sogoan o Allah apiya pen o
di niyan ai katawan na miyataksil sekaniyan den na go kesala.
18 Pekawit sekaniyan ko imam sa kiyadiyangkaan sa arga a mama a bilibili a da a daway
niyan a pekorbanen sabap ko kiyataksil iyan. Sii sangkai a okit na ipenggolalan o imam
so kakepapasa ko ribat a miyanggolaola o taw sa da niyan tibabaa, na kerilaan sekaniyan.
19 Giyai na dii kakorban sabap ko kiyataksil; miyataksil sekaniyan sabap ko
kiyanggolaola niyan sa ribat ko Allah."
LIBITIKOS 6
So Ped a Manga Dosa a Paliyogat on a dii Kakorban sabap ko Kiyataksil
2 “O aden a miyakandosa ago miyakasela ko Allah a nggolalan ko kiyaakala niyan ko
siringan iyan mipantag ko bapiya antonaa a inisana on, o di na initadin on o di na
miyapanekew ron, o di na o miyanalimbot sekaniyan sa ped a taw,
3 O di na o miyakatoon sekaniyan sa tamok a miyada ago inipelaw niyan ai, o di na o
minisepa iyan so di benar, o di na o miyakasogok sekaniyan sa apiya anda ko lagid ai a
manga dosa a dii manggolaola o manga taw
4 Na amay ka miyakandosa so taw sa datar ai ago miyataksil na disomala a kikasoy niyan
so miyapanekew o di na miyagasab iyan, o di na so minisarig on, o di na so miyatoon iyan
a miyada,
5 O di na apiya antonaa a pisepaan iyan sa di benar. Kapetepalan iyan ai langon ago
kioman iyan on pen so ikalima bagi ko arga iyan na kibegay niyan ko kirek on sii ko
gawii a kapekorban iyan sabap ko kiyataksil iyan.
6 Na pekawit sekaniyan ko imam sa kiyadiyangkaan sa arga a mama a bilibili a da a
daway niyan a aya niyan ipenginsalaan a pekorbanen ko hadapan o Allah sabap ko
kiyataksil iyan.
7 Sii sangkai a okit na ipenggolalan o imam so kakepapasa ko dosa o taw ko hadapan o
Allah. Na kerilaan sekaniyan ko bapiya anda sangkai a manga miyanggolaola niyan a
minitaksil on."
So dii Kakorban sa Ipesepaat a Petotongen
9 “Began ka angkai a sogoan ki Aron ago sii ko manga wata iyan: Giyai i manga taritib
mipantag ko manga ayam a dii korbanen a ipesepaat a petotongen: So dii korbanen a
ipesepaat a petotongen na sii den ko aparan ko mababasa gawii taman ko kapita iyan, na
di den perengen so apoy ko aparan.
10 Sii ko kapipita na kesolot o imam so manga nditaren iyan a sotra a rakes o karsinsiliyo
niyan a sotra sa didalem, na kekowa niyan so ombi o pikorban a miyatotong ko apoy sii
ko aparan na kibetad iyan ai ko obay o aparan.
11 Oriyan iyan na kendaan iyan angkai a manga nditaren na kesolot iyan so ped na taros a
keawidan iyan so ombi ko lompiyo a darpa roo ko liyo o kampo.
12 Lalayon den bibiyagan sa apoy so aparan; di den ai perengen. Oman kapita na
pekeomanan o imam sa itagon ago peketanor iyan on so dii korbanen a ipesepaat a
petotongen, na peketotong iyan on pen so sibo o dii korbanen pantag bo ko
kanggiginawai.
13 Tatap den a kabibiyaga ko apoy sii ko aparan; di den ai perengen.
So Kapesapaat sa Pangenengken
14 “Giyai i manga taritib mipantag ko ipesepaat a pangenengken: Kepalad ai o manga
imam a manga wata i Aron sii ko Allah ko hadapan o aparan.
15 Kowa on so imam sa sagamak ko mapiya a arina a sesemboran sa lana a olibi a rakes o
langon o doka a matatago sangkai a pangenengken a isepaat na ketotong iyan ai sii ko
aparan a aya den toos a so kalangolangon iyan na inibegay ko Allah, na mamot ai
rekaniyan.
16 So kelamba on na ken o manga imam, ogaid na kekan ai a da a tapay ron ko lompiyo a
darpa sii ko lamalama o Barombarong.
17 Di ini kitinda a ba sasaogi sa tapay. Inibegay aken ai ko manga imam a aya iran den
bagian ko ipesepaat raken a pepakaokiten sa apoy. Lebi ini a soti a datar o dii korbanen
sabap ko dosa ago sabap ko kiyataksil.
18 Apiya antawaa a mama ko mbawataan i Aron na pekakan on. Lalayon ai misesenggay
a bagian iran ko manga ipesepaat ko Allah a pepakaokiten sa apoy taman ko
kapemagapidapidi kiran. Apiya antawaa i pekaseko on na pembaloy a soti."
So Kapesapaat ko Kipegidinen ko Kaiimami
20 “Giyai i manga sapaat a pekewit o oman i mbawataan i Aron sii ko Allah ko gawii a
kapegidini ron sa kaiimami: isa ka kilo a mapiya a arina (a datar sa kala o matetendo a
ipesepaat a pangenengken) a so sabagi on na sii ko kapipita, na so lamba on na sii peman
ko kaperimon iyan.
21 Kesaogan ai sa lana ago kitinda ko kara, na kisapaat angkai a pangenengken a
miyapangopak sii ko Allah a mamot rekaniyan.
22 So oman i mbawataan i Aron a keidinan sa kaiimami na mipenggolalan iyan angkai a
kapesepaat. Giyai na tatap a bagian o Allah na disomala a totongen ai piyapiya.
23 So oman i isepaat o imam a pangenengken na ketotong sa tarotop; di den ai kekan."
So dii Kakorban sabap ko Dosa
25 “Teroa ngka ki Aron ago so manga wata iyan a: Giyai i manga taritib mipantag ko dii
kakorban sabap ko dosa. So ayam a pekorbanen sabap ko dosa na kesombali ko hadapan
o Allah sii ko darpa a penombalian ko manga ayam a dii korbanen a ipesepaat a
petotongen; lebi ini a soti.
26 So imam a mikorban on na aya on pekakan, na sii ini kekan ko lompiyo a darpa sii ko
lamalama o Barombarong.
27 Apiya antonaa i kiseko ko sapo o ayam na pembaloy a soti, na apiya antonaa a nditaren
i katarsikan ko rogo iyan na kepipian ko lompiyo a darpa.
28 So kiyatindaan ko sapo a koden a bote na disomala a peropeten, ogaid na o sii
minitinda ko koden a tombaga na kekikisan ai ago keonaban sa ig.
29 Apiya antawaa a mama a ped ko mbawataan o imam na pekakan sangkai a pikorban;
lebi ini a soti.
30 Ogaid na di den ken so sapo o apiya antonaa a pikorban sabap ko dosa opama ka so
rogo iyan na minisoled ko Barombarong ko kininggolalanen ko kiyapapasa ko dosa;
disomala a totongen ai sa tarotop."
LIBITIKOS 7
So dii Kakorban sabap ko Kiyataksil
"Giyai i manga taritib mipantag ko dii kakorban sabap ko kiyataksil; lebi ini a soti.
2 So ayam a pekorbanen sabap ko kiyataksil na kesombali ko darpa a penombalian ko
manga dii korbanen a ipesepaat a petotongen, na mipemiripirik so rogo iyan sii ko langon
o manga kilid o aparan.
3 So langon o sibo iyan na palaya den kisapaat maana a so kasiboan a ikog iyan, so sibo
ko soled a tiyan,
4 A rakes o dowa timan a pato niyan ago so mikokokos on a sibo, ago so lebi a mapiya ko
atay a mapengabis on a rakes o manga pato.
5 Ketotong ai o imam sii ko aparan a aya isepaat ko Allah a pekaokiten sa apoy. Giyai i
dii kakorban sabap ko kiyataksil.
6 Apiya antawaa a mama a ped ko mbawataan o imam na pekakan ko sapo iyan, ogaid na
sii ini kekan ko soti a darpa; lebi ini a soti.
7 “Ndatar sa taritib a kipenggolalanen ko kakorban sabap ko dosa ago so kakorban sabap
ko kiyataksil; so sapo o ayam na rek o imam a ininggolalan iyan so kiyapapas o dosa.
8 So imam a sepaat sa korban a totongen para ko apiya antawaa a taw na aya pekakowa
ko kobal o ayam.
9 Oman i inisapaat a pangenengken a initinda ko pogon o di na pitiyagar sii ko kara o di
na aloba na rek den o imam a somiyapaat on.
10 Ogaid na so langon o ped a manga inisapaat a pangenengken a da mailoto apiya anda
ko sesemboran sa lana o di na mamara na mapembagibagi o langon o manga imam a
mbawataan i Aron.
So dii Kakorban pantag bo ko kanggiginawai
11 “Giyai i manga taritib mipantag ko ipesepaat ko Allah a dii korbanen pantag bo ko
kanggiginawai:
12 O aya kapekorban o taw na para ko panalamat na aya kirakes iyan ko ayam a
pekorbanen iyan na manga paan a inembaalan a da a tapay ron apiya anda ko manga
apang a sesemboran sa lana a olibi, o di na manga biskowit a iibongen a lana, o di na
manga mamon a inembaalan a mapiya a arina a bobonaon a lana.
13 Na aya pen a kirakes iyan ko pekorbanen iyan pantag bo ko kanggiginawai para ko
panalamat na so manga mamon a aden a tapay ron.
14 Pekasapaat sekaniyan sa satiman ko oman i pisosonan o paan a aya niyan
pamemegayan ko Allah, na rek ai o imam a miyamiripirik ko rogo o ayam sii ko manga
kilid o aparan.
15 So sapo o ayam a pikorban pantag bo ko kanggiginawai para ko panalamat na kekan
sii ko gawii a kiyakorbana on, na da den a ba on pekapitai.
16 “Ogaid na o aya kapekorban iyan na sabap ko samaya, o di na iklas anan a pekorbanen
na kekan so sapo sii ko gawii a kiyakorbana on, na sii pen ko talondog a gawii na kekan
so kelamba on.
17 Ogaid na apiya antonaa a sapo i kelamba ko ikatelo gawii na disomala a totongen.
18 O aden pen a sapo iyan a makan ko ikatelo gawii na di terimaan o Allah angkai a
pikorban pantag bo ko kanggiginawai, na di on kebalian so somiyapaat on ka karam ai, na
so taw a koman on na kesala.
19 “So sapo a miseko ko apiya antonaa a kena a ba soti na di den kekan; disomala a
totongen. So peman so sapo a kepakay a makan na apiya antawaa i soti na pekakan on.
20 Ogaid na so taw a kena a ba soti na o koman ko sapo a pikorban pantag bo ko
kanggiginawai a minisenggay a rek o Allah na kebelag sekaniyan ko isa ka maginged a
Israil.
21 Na o aden a makaseko ko apiya antonaa a maresik apiya anda ko miyakapoon ko
manosiya, o di na karam a binatang, o di na apiya antonaa a piyakasisingay a maresik na o
kan sekaniyan ko sapo o pikorban pantag bo ko kanggiginawai a minisenggay ko Allah na
kebelag angkoto a taw ko isa ka maginged a Israil."
Inisapar so Kakan sa Sibo ago Rogo
23 “Teroa ngka ko manga Israil a: Di kano den ken ko apiya antonaa a sibo o sapi, bilibili
o di na kambing.
24 So sibo o ayam a miyatoon a maatay den o di na so miyapatay o maila a binatang na
kepakay a osaren ko ped a kapenggonaan on, ogaid na o ba niyo kana.
25 Apiya antawaa i koman ko sibo o ayam a kisapaat ko Allah a pekaokiten sa apoy na
kebelag ko isa ka maginged a Israil.
26 Liyo ron pen na apiya anda kano pekabaling na di kano den ken sa rogo o apiya
antonaa a papanok o di na ayam.
27 O aden a koman sa rogo na kebelag angkoto a taw ko isa ka maginged a Israil."
So Bagian o manga Imam
29 “Teroa ngka ko manga Israil a: Apiya antawaa i sepaat ko Allah sa pekorbanen pantag
bo ko kanggiginawai na keawidan iyan so sabagi on a aya pamemegayan iyan ko Allah
30 A giya den a lima niyan i pekaawid on kaan misapaat a totongen sii ko Allah.
Keawidan iyan so sibo o ayam a rakes o kagepe niyan na peladen iyan ai ko Allah ko
kibayaon iyan on ko hadapan iyan.
31 Totongen o imam so sibo sii ko aparan, ogaid na so kagepe iyan na rek i Aron ago so
manga wata iyan.
32 So kawanan a bobon o ayam na kibegay ko imam a aya niyo sadka.
33 So imam a somiyapaat sa rogo ago so sibo o pikorban pantag bo ko kanggiginawai na
aya pekakowa ko kawanan a bobon a aya niyan bagian.
34 Ka inisenggay aken a rek i Aron a imam ago so manga wata iyan so kagepe a
pekibayaw raken ago so bobon a pepeladen raken a sadka a tatap den a bagian iran ko dii
korbanen o manga Israil pantag bo ko kanggiginawai."
35 Giyanan so sabagi ko ipesepaat ko Allah a petotongen a inisenggay a rek i Aron ago so
manga wata iyan sii ko gawii a kiyaidini kiran a makapagimam siran ko Allah.
36 Sii sangkoto a gawii na inisogo o Allah a ipembegay ini kiran o manga Israil a aya den
tatap a bagian iran taman ko kapemagapidapidi kiran.
37 Giyanan den i manga taritib mipantag ko dii kakorban sa ipesepaat petotongen, so
kapesepaat sa pangenengken, so dii kakorban sabap ko dosa, so dii kakorban sabap ko
kiyataksil, so kapesepaat ko kipegidinen ko kaiimami, ago so dii kakorban pantag bo ko
kanggiginawai.
38 Inibegay ai o Allah ki Mosa sii ko Palaw a Sinay ko mitataog a kaden sii ko gawii a
kiyasogoa niyan ko manga Israil sa kapagowita iran ko manga sapaat iran ko Allah.
LIBITIKOS 8
So Kiyapangidini ko manga Imam
2 “Pakaonota ngka si Aron ago so manga wata iyan ko gimowa o Barombarong a dii
Telabokan na awidi ngka roo pen so manga nditaren ko kaiimami, so lana diyabat, so
mama a sapi a pekorbanen sabap ko dosa, so dowa a mama a bilibili, ago so reban a
tatagoan sa paan a da a tapay ron,
3 Na limoda ngka roo so langon o isa ka maginged a Israil."
4 Pinggolaola i Mosa so inisogo on o Allah, na kagiya matimo so langon o manga taw ko
gimowa o Barombarong
5 Na pitero iyan kiran a "Inisogo o Allah angkai a taritib a ipenggolalan aken imanto."
6 Na piyakaadap i Mosa si Aron ago so manga wata iyan ko manga taw na
piyakapamangonab iyan siran sa ig.
7 Oriyan iyan na piyakinditar i Mosa ki Aron so bangkala ago so kimon na inibabed iyan
on so salambat. Piyakisolot iyan on so saliko ago piyakisembitan iyan on so lalangkitan a
sambitan kaan mitekes rekaniyan piyapiya so saliko.
8 Na piyakisolot iyan on pen so raben na piyanago iyan ko raben so Orim ago so Tomim.
9 Tiyago iyan so totob ko olo i Aron, na sii ko panempang o totob na iniiket iyan on so
tanda a bolawan a aya toos ko kisesenggain ki Aron a soti a so den so inisogo o Allah ki
Mosa.
10 Oriyan iyan na kinowa i Mosa so lana diyabat na inisalawat iyan ko Barombarong ago
so langon a kikatatago on. Sii sangkai a okit na inisengay niyan ai langon a soti ko Allah.
11 Miyakapito niyan kapamesipesiki sa lana so aparan a rakes o langon a kasangkapan on
ago so palanggana a dii pangonaban taman ko pembatogan on kaan iyan ai masoti.
12 Na inododan iyan ko lana diyabat so olo i Aron a aya niyan on kinisenggain a soti ko
Allah.
13 Oriyan iyan na piyamakaadap i Mosa so manga wata i Aron sii ko manga taw na
pinditaran iyan siran sa manga kimon, na piyamakisembitan iyan kiran so manga
salambat ago piyanagoan iyan sa totob so manga olo iran a so den so inisogo on o Allah.
14 Oriyan iyan na kinowa i Mosa so mama a sapi a pekorbanen sabap ko dosa, na si Aron
ago so manga wata iyan na inipanapenet iran a lima iran ko olo o sapi.
15 Na pikorban i Mosa so sapi na inisombo niyan a kemer iyan ko rogo na inisalapot iyan
ko pat a manga pangapanga o aparan kaan masoti. Inodod iyan so lamba ko rogo sii ko
itado o aparan, na nggolalan sii na inisenggay niyan ai a soti ko Allah.
16 Na kinowa i Mosa so langon o sibo sii ko soled a tiyan o sapi, ago so lebi a mapiya ko
atay, ago so mbala a pato a rakes o mikokokos on a sibo na tiyotong iyan ai ko aparan.
17 Ogaid na so lamba ko sapi a rakes o kobal iyan, so sapo iyan ago so manga tinai niyan
na tiyotong iyan roo ko liyo o kampo a so den so inisogo on o Allah.
18 Oriyan iyan na kinowa i Mosa so mama a bilibili a isepaat a totongen, na inidapenet on
i Aron ago so manga wata iyan a manga lima iran ko olo o bilibili,
19 Na pikorban ini i Mosa. Na taros a inipamiripirik iyan so rogo ko langon o manga
kilid o aparan.
20-21 Oriyan iyan na piyamekang iyan so bilibili ago inonaban iyan sa ig so soled a tiyan
ago so manga bobon iyan, na tiyotong iyan so olo niyan, so manga sibo iyan ago so
langon o manga anggaota o lawas iyan sii ko aparan a aya den ipesepaat a petotongen a
mamot ko Allah a so den so inisogo iyan ki Mosa.
22 Oriyan iyan na kinowa i Mosa so ikadowa a mama a bilibili a pegosaren ko
kipagidinen ko kaiimami, na inidapenet i Aron ago so manga wata iyan a manga lima iran
ko olo o bilibili,
23 Na pikorban ai i Mosa. Na kominowa sekaniyan ko rogo o bilibili na inipanising iyan
so rogo ko kababaan o kawanan a tangila i Aron, ago sii ko kawanan a ama a lima niyan
ago sii ko kawanan a ama a ai niyan.
24 Mapasad oto na piyamakaobay niyan so manga wata i Aron na piyanisingan iyan sa
rogo so kababaan o kawanan o manga tangila iran, ago so manga kawanan a ama a lima
iran ago so kawanan a manga ama ai ran. Oriyan iyan na inipamiripirik iyan so lamba ko
rogo ko langon o manga kilid o aparan.
25 Kinowa niyan so manga sibo o bilibili, a so kasiboan a ikog, so langon o sibo ko soled
a tiyan, so lebi a mapiya ko atay, so mbala a pato a rakes o mikokokos on a sibo ago so
kawanan a bobon,
26 Na poon ko reban a tatagoan sa paan a da a tapay ron a isesenggay ko Allah na
kominowa sekaniyan sa satiman a apang, ago so isa on a bobonaon a lana, ago satiman a
biskowit na tiyago iyan ai ko liyawaw o sibo ago so kawanan a bobon o bilibili.
27 Inipametad iyan ai langon sii ko manga lima i Aron ago so manga wata iyan na piyalad
iran ai ko Allah ko kinibayaon iran on ko hadapan iyan.
28 Oriyan iyan na kinowa ini peroman i Mosa ko manga lima iran na tiyotong iyan ai ko
aparan sii ko liyawaw o ipesepaat a petotongen. Giyai na ipesepaat ko Allah para ko
kapagidini ko kaiimami a pepakaokiten sa apoy a mamot ko Allah.
29 Kinowa pen i Mosa so kagepe, a aya niyan den bagian ko bilibili a pegosaren ko
kapegidin, na piyalad iyan ko Allah ko kinibayaon iyan on ko hadapan iyan. Langon den
ai pinggolaola i Mosa a so den so inisogo on Allah.
30 Mandiyadi na kominowa si Mosa ko lana diyabat ago so rogo a matatago ko aparan na
inipamesipesik iyan ki Aron ago sii ko manga nditaren iyan, ago sii ko manga wata iyan
ago so manga nditaren iran. Sii sangkai a okit na miyasoti niyan si Aron ago so manga
wata iyan taman ko manga nditaren iran.
31 Na pitero i Mosa ki Aron ago so manga wata iyan a "Tindaan iyo so sapo sii ko
gimowa o Barombarong a dii Telabokan na ron iyo ai kana a rakes o paan a tatagoon ko
reban a inisapaat ko kiyaidin a so den so inisogo aken rekano a tig aken a 'Si Aron ago so
manga wata iyan i pekakan on,'
32 Ogaid na o aden a kelamba ko sapi ago so paan na ketotong iyo ai.
32 Di kano pagawa ko gimowa o Barombarong ko soled o pito gawii taman sa di
mapopos so manga gawii a kapepegidini rekano, ka pito gawii a kapepegidini rekano.
34 So miyanggolaola imanto a gawii na so den so inisogo o Allah a mipenggolalan kaan
mapapas so manga dosa niyo.
35 Pekakaden kano ko gimowa o Barombarong ko gagawii daondaw ko soled o pito
gawii a di niyo dii inggolalan so ipapaliyogat o Allah kaan kano di pematay, ka giyai i
inisogo raken o Allah."
36 Na tiyoman i Aron ago so manga wata iyan so langon a inisogo o Allah a
miyakanggolalan ki Mosa.
LIBITIKOS 9
Mipoon Magimam si Aron ago so manga Wata iyan
Sii ko ikawalo gawii na tinimo i Mosa si Aron ago so manga wata iyan ago so manga
pelokelokesen sa Israil
2 Na pitero iyan ki Aron a "Kowa ka sa nati a mama a sapi a pekorbanen sabap ko dosa,
ago satiman a mama a bilibili a isepaat a totongen a palaya den da a daway niyan, na
palada ngka ini ko hadapan o Allah.
3 Na teroa ngka ko manga Israil a komowa siran sa mandangan a pekorbanen sabap ko
dosa, ago satiman a sapi ago satiman a bilibili a sesaragon a idad iyan a palaya den da a
daway niyan a isepaat a penotongen.
4 Pakakowaa ngka siran pen sa mama a sapi ago mama a bilibili a mapekorban pantag bo
ko kanggiginawai sii ko hadapan iyan a rakes o pangenengken a isepaat a sasaogan sa
lana a olibi, ka imanto a gawii na pepayag rekano so Allah."
5 Mandiyadi na piyangowit o manga taw so langon taman a inisogo i Mosa sii ko danga o
Barombarong a dii Telabokan, na miyalimod roo so langon o isa ka maginged na
tominindeg siran ko hadapan o Allah.
6 Na pitero kiran i Mosa a "Giyai i inisogo o Allah a penggolaolaan iyo kaan mapayag
rekano so bantogan o Allah."
7 Pitero pen i Mosa ki Aron a "Obay ka ko aparan na panapaaten ka on so pekorbanen
sabap ko dosa ago so totongen a isepaat a aya kakepapasa ko dosa ngka ago so dosa o
manga taw; na panapaaten ka on pen so manga isepaat a ikepapas o manga dosa o manga
taw a so den so inisogo o Allah."
8 Mandiyadi na miyobay si Aron ko aparan na siyombali iyan so sapi a pekorbanen sabap
ko dosa niyan.
9 So manga wata iyan na inowit iran rekaniyan so rogo na inisombo niyan a kemer iyan
ko rogo na inipanalapot iyan ko manga pangapanga o aparan. Na so lamba ko rogo na
inodod iyan ko itado o aparan.
10 So manga sibo o ayam, so mbala a pato niyan ago so lebi a mapiya ko atay niyan na
tiyotong iyan sii ko aparan a so den so inisogo o Allah ki Mosa.
11 Ogaid na so sapo ago so kobal na roo niyan tiyotong ko liyo o kampo.
12 Oriyan iyan na siyombali i Aron so ayam a isepaat a totongen. So rogo na inowit
rekaniyan o manga wata iyan, na inipamiripirik iyan ai ko langon o manga kilid o aparan.
13 Pinggagaisa iran on domawag so manga anggaoto o lawas o ayam a rakes o olo niyan,
na tiyotong iyan ai langon ko aparan.
14 Inonaban iyan so soled a tiyan ago so manga bobon na tiyotong iyan ko liyawaw o
ipesepaat a petotongen ko aparan.
15 Oriyan iyan na inowit i Aron so manga isepaat para ko manga taw. Kinowa niyan so
mandangan a pekorbanen sabap ko manga dosa iran na siyombali iyan ago inisapaat iyan
a datar o inikidia niyan ko paganay a inisapaat iyan para ko ginawa niyan.
16 Kinowa niyan pen so ayam a pekorbanen a isepaat a totongen na inisapaat iyan ai a
nggolalan ko matetendo on a okitokit iyan.
17 Na inisapaat iyan pen so isepaat a pangenengken. Kominowa sekaniyan on sa
sagamak na tiyotong iyan ko aparan a inioman ko petotongen a ipesepaat ko kapipita.
18 Oriyan iyan na siyombali iyan so mama a sapi ago so mama a bilibili a pekorbanen
pantag bo ko kanggiginawai para ko manga taw. So rogo na inowit rekaniyan o manga
wata iyan na inipamiripirik iyan ko langon o manga kilid o aparan.
19 So manga sibo o sapi ago so bilibili, a so kasiboan a ikog ago so mikokokos ko soled a
tiyan a rakes o mbala a pato ago so lebi a mapiya ko atay
20 Na inibatog iran ai ko manga kagepe angkai a manga ayam. Inawidan ai i Aron ko
aparan na tiyotong iyan on so manga sibo
21 Na piyalad iyan ko Allah so manga kagepe ago so kawanan a bobon ko kinibayaon
iyan on ko hadapan iyan a so den so inisogo i Mosa.
22 Oriyan iyan na inibayaw i Aron a manga lima niyan sii ko manga taw na riyakmatan
iyan siran. Na sabap sa miyapasad iyan den somapaat so korban sabap ko dosa, so korban
a inisapaat a petotongen ago so manga korban pantag bo ko kanggiginawai na tomipad
sekaniyan ko aparan
23 Na somiyoled si Mosa ago si Aron ko Barombarong. Kagiya lomiyo siran na
riyakmatan iran so manga taw, na mipeyag so bantogan o Allah ko langon o manga taw.
24 Minitekaw den a aden a apoy a somiyokeyaw a poon ko Allah na lingan iyan tomotong
so petotongen a manga sapaat ago so manga sibo sii ko aparan. Kagiya mailay ini o
manga taw na palaya siran den miyakabeseg sa kababaya, na minggegepe siran ko lopa.
LIBITIKOS 10
So Dosa i Nadab ago si Abiho
So manga wata i Aron a si Nadab ago si Abiho na tiyagoan iran sa waga so manga
petotongan iran sa doka na bitadan iran ai sa doka; nggolalan sii na inisapaat iran ko
Allah so di sak a apoy a minisogok ko sogoan iyan.
2 Sarta den na aden a apoy a somiyokeyaw a poon ko Allah na tiyotong iyan siran, na
miyamatay siran ko hadapan o Allah.
3 Na pitero i Mosa ki Aron a "Giyai i miyatero den o Allah: 'Pekiilay aken so kasosoti
aken sii ko siran oto pegobay raken, na kebantogan ako sii ko kamamasaan o langon o
manga taw.' " Na da den makatero si Aron.
4 Piyakisongowan i Mosa si Misiyail ago si Ilsapan a manga wata i Osiyal a bapa i Aron a
tig iyan kiran a "Song kano sii; awidi niyo angkai a manga tonganay niyo ko liyo o kampo
a mawatan ko hadapan o soti a Barombarong."
5 Na miyakaoma siran na kiyapetan iran so manga nditaren o manga bangkay na inawidan
iran ko liyo o kampo a so den so inisogo i Mosa.
6 Pitero i Mosa ki Aron ago sii ko manga wata iyan a si Iliyasar ago si Itimar a "O ba niyo
ndarainonen so manga bok iyo aya pen o ba niyo kisia so manga nditaren iyo sii ko
kapemboko iyo. O nggolaolaa niyo ai na pematay kano, na kerarangitan o Allah so
langon o maginged. Inonta bo na so langon a ped a manga Israil, a manga tonganay niyo,
na kepakay a ndiyagaan iran so siran oto a biyono o Allah a apoy.
7 Ogaid na di kano peliyo ko Barombarong kaan kano di pematay. ka kagiya kiyaidinan
kano a nggolalan ko lana diyabat o Allah." Na tiyoman iran so inisogo kiran i Mosa.
So manga Sogoan para ko manga Imam
8 Mandiyadi na pitero o Allah ki Aron a
9 “Seka ago so manga wata a ka na di pekainom sa arak o di na ped a panginginomen a
pakabereg igira a pesoled kano ko Barombarong a dii Telabokan. O nggolaolaa niyo ai na
pematay kano. Sogoan ai a da a ikeda iyan a disomala a peketoman o langon a kebabadan
rekano.
10 Disomala a kekilala niyo so mbidaan o misesenggay ago so komakalilid, ago so
mbidaan o kena a ba soti ago so soti.
11 Na mipengendao niyo ko manga Israil so langon o manga kokoman a inibegay kiran o
Allah a nggolalan ki Mosa."
12 Pitero i Mosa ki Aron ago sii ko miyalamba a manga wata iyan a si Iliyasar ago si
Itamar a "Kowaa niyo so sapaat a pangenengken a miyalamba ko inisapaat a petotongen
ko Allah na tiyagara niyo ai a da a tapay ron na kana niyo sii ko kilid o aparan, ka lebi ini
a soti.
13 Disomala a kekan iyo ai sii ko darpa a soti, ka bagian iyo ago so manga wata a ka ko
manga ipesepaat a petotongen ko Allah. Giyai i inisogo raken o Allah.
14 Ogaid na so kagepe a inibayaw ago so bobon a pamemegayan na kepakay a ken iyo
ago so langon a ped ko manga pamiliya niyo sii ko apiya antonaa a darpa a lompiyo. Ka
inibegay ai rekano a bagian iyo ko manga dii korbanen pantag bo ko kanggiginawai a
ipesepaat o manga taw sa Israil.
15 Pekeawidan iran angkai a bobon ago kagepe igira a ipesepaat iran a petotongen so
manga sibo kaan ai langon mapalad ko Allah ko kibayaon on ko hadapan iyan. Giyai i
bagian iyo ago so manga kebabadan rekano sa dayon sa dayon a so den so inisogo o
Allah."
16 Kagiya ipangingise i Mosa so mipantag ko mandangan a pikorban sabap ko dosa na
kiyatokawan iyan a miyatotong bes. Sabap san na kiyararangitan iyan si Iliyasar ago si
Itamar a manga wata i Aron, na iniise iyan kiran a
17 “Ino niyo da kana so pikorban sabap ko dosa sii ko darpa a maaped ko soti a
Barombarong? Lebi ini a soti a ipesepaat, na inibegay ini rekano o Allah sabap ko
kapepakadaa niyo ko kiyataksil o isa ka maginged sii ko di niyo dii kinggolalanen ko
kakepapasa ko manga dosa iran.
18 Sabap sa da mawit so rogo o ayam ko soled o Soti a Darpa na disomala a kekan iyo so
sapo o ayam ko darpa a maaped ko soti a Barombarong a aya ko rekano den inisogo."
19 Somimbag si Aron a tig iyan ki Mosa a "Ilaya ngka man, ka imanto a gawii na
inisapaat iran so pikorban iran sabap ko dosa ago so pikorban a inisapaat a petotongen sii
ko Allah, ogaid na minitomparak raken angkai a morala! O miyakakan ako imanto ko
pikorban sabap ko dosa na ba ini mapiya sii ko kapegilaya on o Allah?"
20 Na kagiya maneg ai i Mosa na miyasoat sekaniyan.
LIBITIKOS 11
So Halal ago so Karam a Pangenengken
Na pitero o Allah ki Mosa ago si Aron a
2 “Teroa niyo ko manga Israil: So langon o manga ayam a kikakaden ko kalopaan na
giyai i kekan iyo ron:
3 Apiya antonaa a ayam a maoopak so kanoko niyan ago pepenepasepa igira a pekan.
4-6 Ogaid na di kano pekakan ko manga ayam a pepenepasepa ogaid na kena a ba
maoopak so kanoko niyan a ibarat o onta, so taksing ago so arnab. Giyai na karam
rekano.
7 Na di kano pekakan ko baboy, ka apiya pen maoopak a manga kanoko niyan na di
pepenepasepa; karam ai rekano.
8 Di kano pekakan ko sapo angkai a manga ayam aya pen o ba niyo sekoa so miyatay a
lawas iran, ka karam ai rekano.
9 “So langon o baraniyawa a matatago ko manga ragat ago sii ko manga lawasaig na
kekan iyo so apiya antonaa a aden a manga payang iyan ago manga nap.
10 Ogaid na so langon o baraniyawa ko manga ragat ago so manga lawasaig a da a
payang iyan ago manga nap apiya anda ko pepelalangoy ago so ped a manga baraniyawa
on na patot a ibilang iyo a piyakasisingay.
11 Sabap san na di kano pekakan ko sapo iran aya pen o ba kano seko ko miyatay a lawas
iran.
12 Apiya antonaa a baraniyawa sii ko manga ig a da a manga payang iyan ago manga nap
na piyakasisingay rekano.
13-19 Giyai i manga papanok a di niyo kekan ka piyakasisingay rekano: so agila, so
garoda, so banog, so darayo, so sikep, so manaol, so bayata, so romaragit, so kakowak, so
bengit, so kang, so laasan, so tabonan, so pilikano, so barawa, so talik, so talaong, so
kabeg ago so paniki.
20 Piyakasisingay rekano so langon o pepapak a manga oled a pelalakakaw ko lopa
21 Liyo ron so makasosompat i manga ai a dii tepak ko lopa. Kepakay a ken iyo ai
22 A so langon a barang o manga tarapan, manga sengog, manga tipa ago manga sisip.
23 Ogaid na so langon o ped a manga paoledoled a pepapak a pelalakaw o di na pendola
na piyakasisingay rekano.
24-28 Apiya antawaa i makaseko sa miyatay a lawas o isa sangkai a pemakatalondog a
manga ayam na kedalem a hadas taman sa perimon: so ayam a aden a manga kanoko
niyan a kena a ba tarotop a kaoopak iyan, ago so di pepenepasepa sii ko kapekan iyan ago
so ayam a ipelalakaw niyan so pat a palad a ai niyan a madakel i kanoko. Apiya antawaa
i makaawid sa isa a miyatay a lawas iran na kepipian iyan so manga nditaren iyan na
kedalem a hadas taman ko perimon.
29-30 Sii ko manga baraniyawa a pepamanola ko lopa na karam rekano so riya, so silep,
so palaas, so teki, so tagetek, so tabalik, so parangan ago so tabegang.
31 So langon angkai a pemanola ko lopa na karam rekano. Apiya antawaa i makaseko on
o di na so miyatay a lawas ai na kedalem a hadas taman ko perimon.
32 Apiya antonaa a kasangkapan a keologan ko miyatay a lawas ai na keresikan ai apiya
anda ko pimbaalan a kayo, o di na dinis, o di na kobal, o di na kakayon. Ketago ini ko ig
na maresik ai taman ko perimon. Oriyan iyan na kelompiyo bo.
33 O maolog so isa kiran sii ko koden a bote na keresikan so langon a matatago on, na
keropet iyo so koden.
34 Apiya antonaa a pangenengken a kekan a ketekan sa ig a poon sangkoto a koden na
keresikan, na apiya antonaa a panginginomen a ndodon na keresikan.
35 Apiya antonaa i keologan ko bangkay o isa sangkai a manga pemanola na keresikan;
so datola o di na pogon na disomala a nggebaan. Kiyaresikan ai na bilangen iyo a kena a
ba soti,
36 Ogaid na so bowalan o di na paridi a pekowaan sa ig na malolompiyo den, ogaid na
apiya antawaa i makaseko ko miyatay a lawas angkai a manga ayam na kedalem a hadas.
37 Masosoti den mambo so apiya antonaa a manga oniin a pemolaan a keologan sangkai
a bangkay.
38 Ogaid na o raramesen a ig so oniin ago kaologan ai sa bangkay na maresik rekano.
39 “O matay so ayam a kepakay a makan iyo na apiya antawaa i makaseko ko bangkay
niyan na kedalem a hadas taman ko perimon.
40 So ken ko sapo iyan o di na so makaawid ko bangkay niyan na kepipian iyan so manga
nditaren iyan na kedalem a hadas taman ko perimon.
41 “Oman i paoledoled a pemanola ko lopa na piyakasisingay; di ini kekan.
42 Mirarakes sii so apiya antonaa a ipendola niyan a tiyan iyan, o di na ipelalakaw niyan
so pat a ai niyan o di na madakel a manga ai; piyakasisingay ini langon.
43 Di niyo peresiki a ginawa niyo a nggolalan sangkai a manga kaaden ka ikebaloy niyo a
kena a ba soti,
44 Ka saken so Allah a Tohan iyo; senggain iyo a ginawa niyo a rek o Allah na sosoti
kano ka kagiya saken na soti. Di niyo peresiki a ginawa niyo a nggolalan ko apiya
antonaa a kaaden a pemanola ko lopa
45 Ka saken so Allah a miyakaliyo rekano sa inged a Misir kaan ako mabaloy a Tohan
iyo. Kagiya ka maoto na disomala a sosoti kano, ka saken na soti.
46 “Giyai i manga kokoman mipantag ko manga ayam, so manga papanok ago so langon
a baraniyawa a dii keokaog ko manga ig ago so langon a kaaden a pemanola ko lopa
47 Kaan iyo makilala so mbidaan o karam ago so halal sii ko manga baraniyawa a kekan
ago so di kekan."
LIBITIKOS 12
So Kasotiya ko gopen Mimbawata
2 “Teroa ngka ko manga Israil a: So babay a miyaogat ago mimbawata sa mama na
madadalem a hadas ko soled o pito gawii ndatar bo o kadadalem iyan a hadas sii ko masa
a kapekekail iyan oman olan.
3 Sii ko ikawalo gawii na ketori so bago a mama.
4 Oriyan iyan na pekanayaw pen so babay sa telo polo ago telo gawii na go bo masoti ko
keperogoi ron. Di sekanian pekaseko sa apiya antonaa a nganin a soti aya pen o ba
makasoled ko soti a darpa taman sa di mapopos so manga gawii a di niyan dii kasoti.
5 “Ogaid na o mbawata sekaniyan sa babay na madadalem a hadas ko soled o sapolo ago
pat gawii a datar o katatago on o basa. Na pekanayaw sekaniyan pen sa nem polo ago
nem gawii taman ko kakesoti niyan ko keperogoi ron.
6 “Amay ka mapopos so manga gawii a di niyan dii kasoti pantag ko bago a mama o di na
bago a raga na pekawit sekaniyan sa nati a bilibili a saragon a idad iyan sii ko imam ko
gimowa o Barombarong a dii Telabokan a pekorbanen a isepaat a totongen, ago satiman a
pagapak o di na marapatik a pekorbanen sabap ko dosa.
7 So imam i pekasapaat on ko Allah a ipenggolalan iyan so kakepapasa ko dosa o babay,
na kesoti sekaniyan den ko kiyakaili ron. Giyai i manga taritib mipantag ko babay a dii
mbawata sa bago a mama o di na bago a raga.
8 O di niyan kegaga so bilibili na pekaawid sekaniyan sa dowa a marapatik o di na dowa
a pagapak. So isa on na pekorbanen a isepaat a totongen, na so isa on na pekorbanen
sabap ko dosa. Sii sangkai a okit na ipenggolalan o imam so kakepapasa ko dosa o
babay, na kesoti sekaniyan."
LIBITIKOS 13
Manga Taritib mipantag ko manga Sakit ko Kobal
Pitero o Allah ki Mosa ago si Aron a
2 “Amay ka so taw na aden a ibol iyan o di na pese o di na panaw a kepakay a kabisaan
na kewit sekaniyan ki Aron a imam o di na isa ko manga wata iyan a manga imam.
3 Keiksamin o imam so ibol ko kobal iyan, na o miyakapoti so baraibon on ago datar o ba
madalem a di so kobal ko melilibeta on na bisa ini a paniyakit ko kobal, na mapetero o
imam a maresik angkoto a taw.
4 “Ogaid na o so ibol na mapoti ogaid na kena a ba madalem a di so kobal ago so
baraibon on na kena a ba miyakapoti na tegoon o imam angkoto a taw sii ko misisibay a
darpa ko makapito gawii.
5 Sii ko ikapito gawii na keilay ini peroman o imam, na o gedageda iyan on na da maalin
so ibol ago da mipalat ko kobal iyan na isibay peroman o imam sa makapito gawii.
6 Sii ko ikapito gawii na pagiksaminen ai peroman o imam, na o komilas so ibol ago da
mipalat ko kobal iyan na mapetero o imam a lompiyo sekaniyan. Matag baden ai ibol.
Na kepipian o taw so nditaren iyan na kelompiyo sekaniyan.
7 Ogaid na o minipalat so ibol ko kobal iyan oriyan o kiyapakiilain iyan on ko imam ago
so kiyateroa on o imam a miyalompiyo sekaniyan den na disomala a mapekiilay niyan
peroman ko imam.
8 Keilay peroman o imam na o minipalat so ibol na mapetero o imam a maresik angkoto a
taw, ka kagiya bisa ini a paniyakit ko kobal.
9 “Apiya antawaa i aden a bisa niyan a paniyakit ko kobal na kewit ko imam.
10 Keiksamin sekaniyan o imam, na o aden a lebag iyan a mapoti sii ko kobal iyan a aden
a romiriga on a sapo, ago o miyakapoti so baraibon on
11 Na miyatey den a paniyakit ko kobal, na mapetero o imam a maresik sekaniyan. Di
den kailangan a katagoa on ko misisibay a darpa kaan maiksamin peroman ka kagiya
marayag den so karesik iyan.
12 O minipalat so paniyakit ago lomiyangkap ko kobal iyan ipoon sa olo na taman sa ai
niyan sii ko kapekeilaya on o imam
13 Na keiksamin sekaniyan o imam. Na o mailay niyan a lomiyangkap so paniyakit ko
langon o lawas iyan na mapetero o imam a lompiyo angkoto a taw ka kagiya langon
miyakapoti so lawas iyan.
14 Ogaid na amay ka aden a romiriga a sapo a keilay ko lawas iyan na kena a ba lompiyo
sekaniyan.
15 So den so kailaya o imam ko romiriga a sapo na mapetero iyan a kena a ba lompiyo
angkoto a taw, ka so romiriga a sapo na maresik; so paniyakit iyan na kabibisaan.
16 Inonta bo na o makapoti so romiriga a sapo na pekasong sekaniyan ko imam.
17 Keiksamin sekaniyan peroman o imam na o miyakapoti den na mapetero o imam a
miyalompiyo sekaniyan den.
18 “Amay ka so taw na aden a pese ko kobal iyan ago miyapiya,
19 Ago so kabebetadan ko pese na pimbowatan a lebag a mapoti o di na malo marigariga
na mapekiilay niyan ko imam.
20 Keiksamin ai o imam na o mailay niyan a madalem a di so kobal ago miyakapoti so
baraibon on na mapetero o imam a maresik angkoto a taw. Bisa ini a paniyakit ko kobal a
lomitaw ko kaatoan o pese.
21 Ogaid na o mailay o imam a da makapoti so baraibon on ago da tantel ko sapo ago
komilas ai na ketago sekaniyan o imam ko misisibay a darpa ko makapito gawii.
22 Na o mipalat ai ko kobal sii sangkoto a manga gawii na mapetero o imam a maresik
angkoto a taw, ka kabibisaan sekaniyan.
23 Ogaid na o da ini maalin ago da mipalat na matag ai poneng o pese, na mapetero o
imam a lompiyo angkoto a taw.
24 “O aden a taw a miyalowis sa lawas ago mariga mapoti o di na mapoti so miyaredak a
kobal on
25 Na keiksamin ai o imam. O miyakapoti so baraibon on ago kena a ba sii bo ko kobal
ka taman ko sapo sii ko kapekeilaya on na bisa ini a paniyakit a gomimaw ko lowis, na
mapetero o imam a maresik angkoto a taw.
26 Ogaid na o mailay o imam a da makapoti so baraibon on ago da tantel so lowis ko
sapo ago komilas den ai na kisibay sekaniyan o imam ko makapito gawii.
27 Sii ko ikapito gawii na keiksamin sekaniyan peroman o imam, na o mailay niyan a
minipalat ko ped a kobal iyan na mapetero o imam a maresik angkoto a taw ka bisa ini a
paniyakit ko kobal.
28 Ogaid na o da ini maalin ago da mipalat ko ped a kobal ka baden komilas na matag ai
poneng o lowis, na mapetero o imam a lompiyo angkoto a taw.
29 “O so mama o di na babay na aden a ibol iyan sa olo o di na sa baka
30 Na keiksamin ai o imam na o mailay niyan a madalem a di so kobal ago so manga bok
iyan ko ibol na miyakabinaning ago miyakanipis na mapetero o imam a maresik angkoto
a taw, na bodok ai a bisa a paniyakit sa olo o di na baka.
31 Ogaid na o mailay o imam a so bodok na sii bo ko kobal, ogaid na da pen makapiya so
langon o manga bok on na ketago sekaniyan o imam ko misisibay a darpa ko makapito
gawii.
32 Sii ko ikapito gawii na keiksamin peroman o imam so bodok, na o da mipalat ago da
makabinaning so bok on ago kena a ba madalem a di so kobal
33 Na kekikisan o taw so olo niyan a liyo ron so manga bok ko bodok na tetapen
sekaniyan o imam ko misisibay a darpa sa makapito pen gawii.
34 Sii ko ikapito gawii na keiksamin peroman o imam so bodok na o da mipalat ko kobal
ago kena a ba madalem a di so kobal na mapetero o imam a lompiyo angkoto a taw.
Kepipian iyan so manga nditaren iyan, na kelompiyo sekaniyan.
35 Ogaid na o minipalat so bodok ko kobal oriyan o kiyateroa on o imam a lompiyo
sekaniyan
36 Na keiksamin sekaniyan peroman o imam, na o mailay niyan a minipalat so bodok ko
kobal na di den kailangan a nggiloba sekaniyan sa binaning a bok, ka marayag den so
karesik iyan.
37 Ogaid na o mailay o imam a da mipalat so bodok ago miyamangeto on den so maitem
a bok na miyapiya den ai na miyalompiyo den angkoto a taw, na mapetero o imam a
lompiyo sekaniyan.
38 “Amay ka so mama o di na so babay na panaon so kobal iyan
39 Na keiksamin sekaniyan o imam. Na o mailay niyan a so panaw ron na malo mapoti
na matag ai pamoti a mito ko kobal, na lompiyo angkoto a taw.
40 “O aden a mama a kiyaropawan na lompiyo sekaniyan.
41 O maopaw sa beneng na lompiyo sekaniyan.
42 Ogaid na o aden a malo romiriga a ibol ko olo niyan a kiyaropawan o di na sii ko
beneng iyan na bisa ini a paniyakit.
43 Keiksamin sekaniyan o imam na o libagan so ibol a malo romiriga a datar sa paras o
bisa a paniyakit ko kobal
44 Na kabibisaan so mama ago maresik sekaniyan. Na mapetero o imam a kena a ba
lompiyo angkoto a taw sabap ko ibol ko olo niyan.
45 “So taw a sesakit na disomala a makapenditar sa miyanareditan ago di niyan ketanor
so bok iyan, ago kesepengan iyan so kababaan o paras iyan ago mipelalis iyan sa matanog
a 'Maresik!' Maresik!'
46 Tatap den a karesik iyan sii ko langon o masa a kasesakit iyan. Pekakaden sekaniyan a
matatawantawan sii ko liyo o kampo.
Manga Taritib mipantag ko Olabong
47 “Amay ka so nditaren na aden a olabong on apiya anda ko nditaren a dilana o di na
sotra,
48 O di na sii ko apiya antonaa a pimbaalan a dilana, o di na sotra, o di na panit
49 Na o so olabong ko dinis o di na panit na miyakagadong o di na rominiga na pekipalat
ai a olabong na disomala a mapekiilay ko imam.
50 Keiksamin ai o imam na kisibay niyan sa darpa so inolabong a nganin ko makapito
gawii.
51 Sii ko ikapito gawii na keiksamin ai peroman o imam, na o minipalat so olabong ko
nditaren, o di na dinis, o di na sii ko panit na pekabinasa ini a olabong; maresik angkoto a
nganin.
52 Na ketotong o imam so nditaren a dilana, o di na sotra, o di na apiya antonaa a dinis, o
di na panit a inolabong sa datar ai, ka pekabinasa ini, na disomala a totongen sa tarotop.
53 “Ogaid na o mailay o imam a da mipalat so olabong ko nditaren o di na sii ko panit
54 Na pekipipian iyan angkoto a nganin san na pekisibay niyan ko makapito pen gawii.
55 Oriyan o kiyapipii ron na keilay peroman o imam, na o da maalin so paras o olabong
apiya pen da ini mipalat na maresik pen ai. Ketotong ai sa tarotop apiya aya bo inolabong
na so sabala on o di na saklid.
56 Ogaid na o mailay o imam a komilas so olabong oriyan o kiyapipii ron na keabat iyan
on so inolabong ko nditaren, o di na dinis, o di na panit.
57 Ogaid na o lometaw peroman so olabong na pepalat pen ai na disomala a totongen
angkoto a nganin.
58 Ogaid apiya pen o miyada on so olabong oriyan o kiyapipii ron na kepipian ai
peroman, na kelompiyo den.
59 “Giyai i taritib mipantag ko inolabong a dilana o di na sotra a nditaren, o di na so apiya
antonaa a pimbaalan a dilana, o di na sotra, o di na panit kaan matero o imam a lompiyo o
di na maresik."
LIBITIKOS 14
So Kasotiya ko Taw a Miyapiya ko Bisa a Paniyakit
2 “Giyai i manga taritib ko taw a miyapiya ko bisa a paniyakit sii ko gawii a kakesoti
niyan. Kewit sekaniyan ko imam
3 Na mapekaonot sekaniyan o imam ko liyo o kampo na ron iyan keiksamin. O miyapiya
den ko bisa a paniyakit iyan
4 Na pekikowa o imam so dowa a oyagoyag a papanok a halal, ago satebi a kayo a sidro,
mariga a tanor ago sapak a hisop.
5 Na pekisombali o imam so isa ko papanok ko liyawaw o koden a bote a aden a ig on a
poon ko bowalan.
6 Oriyan iyan na kekowa niyan so oyagoyag a papanok, ago so satebi a kayo a sidro, so
mariga a tanor ago so sapak a hisop na kisombo niyan ai langon ko rogo o papanok a
siyombali sii ko liyawaw o ig.
7 Na mipamesipesik iyan so rogo sa makapito ko taw a pelompiyon na giyoto a mapetero
o imam a miyalompiyo sekaniyan den. Mandiyadi na kebokaan iyan ko pangomaan so
oyagoyag a papanok.
8 “So taw a pelompiyon na kepipian iyan so nditaren iyan, ago makapegopaw, ago
makapepeigo sa ig kaan masoti. Oriyan iyan na pekasoled sekaniyan ko kampo ogaid na
pekakaden pasin sa makapito gawii ko liyo o barombarong iyan.
9 Sii ko ikapito gawii na kekikis iyan on peroman so langon o bok ko olo niyan taman ko
sompa iyan, so manga kiray niyan ago so ped a manga baraibon iyan. Kepipian iyan so
nditaren iyan ago makapepeigo, na kesoti sekaniyan.
10 “Sii ko ikawalo gawii na pekaawid sekaniyan sa dowa a mama a nati a bilibili ago isa
a babay a bilibili a saragon a idad iyan a langon ai da a daway niyan a rakes o isepaat a
pangenengken a telo ka kilo a lebi a mapiya a arina a sasaogan sa lana ago isa ka katiya a
lana a olibi.
11 Giyai langon a rakes o taw a pelompiyon na mapekapangadap o imam ko Allah sii ko
gimowa o Barombarong a dii Telabokan
12 Na kekowa o imam so isa ko mama a bilibili na kisapaat iyan ai a pekorbanen sabap
ko kiyataksil a kirakes on so isa ka katiya a lana, na kepalad iyan ai ko Allah ko kibayaon
iyan on ko hadapan iyan.
13 Kesombali o imam so bilibili ko soti a darpa a ron pesombalia so dii korbanen sabap
ko dosa ago so dii korbanen a ipesepaat a petotongen. Mapenggolaola niyan ai ka kagiya
so dii korbanen sabap ko kiyataksil, a datar o dii korbanen sabap ko dosa, na rek o imam,
na lebi ini a soti.
14 Na pekakowa so imam ko rogo o pikorban sabap ko kiiyataksil na kisalapot iyan ko
kababaan o kawanan a tangila o taw a pelompiyon, ago so kawanan a ama a lima niyan,
ago sii ko kawanan a ama a ai niyan.
15 Pekakowa pen so imam sa lana ko katiya na keodod iyan ko palad a diwang a lima
niyan
16 Na kisombo niyan so kawanan a tindoro iyan sii ko lana ko palad iyan na
mipemesipesik iyan ai sa makapito ko hadapan o Allah.
17 Oriyan iyan na kisalapot iyan so ped ko lamba a lana ko palad iyan sii ko kababaan o
kawanan a tangila o taw a pelompiyon, ago sii ko kawanan a ama a lima niyan, ago sii ko
kawanan a ama a ai niyan sii ko liyawaw o rogo o pikorban sabap ko kiyataksil.
18 So miyalamba a lana sa lima o imam na ketago iyan ko olo o pelompiyon a taw. Giyai
i kipenggolalanen iyan ko kakepapasa ko dosa o taw sii ko hadapan o Allah.
19 Oriyan iyan na mapekorban o imam so isepaat sabap ko dosa na ipenggolalan iyan pen
so kakepapasa ko dosa o taw a pelompiyon ko karesik iyan. Mapasad oto na kesombali
iyan so isepaat a totongen
20 Na kisapaat iyan sii ko aparan a rakes o isepaat a pangenengken. Sii sangkai a okit na
ipenggolalan o imam so kakepapasa ko dosa para ko taw na kesoti sekaniyan den.
21 “Ogaid na o miskin so taw a pelompiyon a di niyan ai kegaga na pekakowa sekaniyan
sa satiman bo a mama a bilibili a pekorbanen sabap ko kiyataksil a peladen ko Allah ko
kibayaon on sii rekaniyan kaan mapapas so dosa o taw, a rakes o isa ka kilo a lebi a
mapiya a arina a sasaogan sa lana a olibi a isepaat a pangenengken, ago isa ka katiya a
lana a olibi,
22 Ago dowa a marapatik o di na dowa a pagapak a saden sa kegaga niyan. So isa on na
pekorbanen sabap ko dosa ago so isa on na pekorbanen a isepaat a totongen.
23 Sii ko ikawalo gawii na kewit iyan ai langon ko imam para ko kapelompiyowa
rekaniyan sii ko gimowa o Barombarong a dii Telabokan roo ko hadapan o Allah.
24-25 Kesombali o imam so bilibili a pekorbanen sabap ko kiyataksil na peladen iyan ai
ko Allah, a rakes o isa ka katiya a lana, ko kibayaon iyan on ko hadapan iyan. Na
pekakowa sekaniyan ko rogo o bilibili na kisalapot iyan ko kababaan o kawanan a tangila
o taw a pelompiyon, ago so kawanan a ama a lima niyan, ago sii ko kawanan a ama a ai
niyan.
26 Na keodod o imam so ped ko lana sii sa diwang a palad iyan
27 Na kisombo niyan on a kawanan a tindoro iyan ago mipemesipesik iyan sa makapito
sii ko hadapan o Allah.
28 Kisalapot iyan so ped ko lana sa lima niyan sii ko kababaan o kawanan a tangila o taw,
ago sii ko kawanan a ama a lima niyan, ago sii ko kawanan a ama a ai niyan sii ko manga
piyanalapotan iyan ko rogo o pikorban sabap ko kiyataksil.
29 Na so miyalamba ko lana sa palad iyan na ketago iyan ko olo o taw a pelompiyon.
Giyai i kipenggolalanen iyan ko kakepapasa ko dosa o taw sii ko hadapan o Allah.
30 “Oriyan iyan na mapekorban o imam so dowa a marapatik o di na so dowa a pagapak a
saden sa kegaga o taw.
31 So isa on na pekorbanen sabap ko dosa, na so isa on na pekorbanen a isepaat a
totongen a rakes o isepaat a pangenengken. Sii sangkai a okit na ipenggolalan o imam so
kakepapasa ko dosa o taw a pelompiyon sii ko hadapan o Allah.
32 Giyai i manga taritib mipantag ko apiya antawaa a aden a bisa niyan a paniyakit ko
kobal a di pekagaga ko ipapaliyogat a isepaat para ko kakesoti niyan."
Olabong sii ko manga Walay
34 “Amay ka makaoma kano sa inged a Kanaan a imbegay aken rekano a matangan iyo
na o tagoi aken sa pekipalat a olabong so isa a walay sangkoto a inged
35 Na so kirek ko walay na pekasong ko imam na mapetero iyan on a 'Miyakainengka ako
sa datar o ba olabong sii ko walay aken.'
36 Kisogo o imam a kowaan sa tago so walay sa di niyan on pen kapekasoled a pagilain
iyan so olabong, ka o di ini mapenggolaola na so langon a matatago ko walay na
mapetero a maresik. Mapasad oto na pekasoled so imam ko walay
37 Na keiksamin iyan so olabong ko manga keleb. O aden a manga daket on a
magadogadong o di na marigariga a aya kapegilaya on na madalem a di so liyawaw o
keleb
38 Na pekaliyo so imam sangkoto a walay na pelekeban iyan ko makapito gawii.
39 Sii ko ikapito gawii na pekakasoy ron so imam ka pagilain iyan peroman. O minipalat
so olabong ko manga keleb o walay
40 Na kisogo iyan a kowaan on so manga ator a kiyaogalinan sa olabong ago ipelebad ko
kena a ba soti a darpa ko liyo o siti.
41 Na pakipangikisan iyan so intiro a soled o walay ago pekitabotod iyan so miyakikis on
ko kena a ba soti a darpa ko liyo o siti.
42 Oriyan iyan na pekakowa siran sa ped a manga ator a misambi ko manga ator a
miyakowa on, na pekakowa siran pen sa bago a sominto a misalapot ko manga keleb.
43 O gemaw peroman so olabong sii ko walay oriyan o kiyapangowaa on ko manga ator
ago so kiyapangikisi ko manga keleb ago so kiyapanalapoti ron pen sa sominto
44 Na kesongowan ago keiksamin peroman o imam. O mailay niyan a minipalat so
olabong na pekabinasa ini a olabong, na maresik so walay.
45 Disomala a nggebaan -- a so manga ator on, so manga tarakayo, ago so langon a
sominto on na kewit ai ko liyo o siti sii ko kena a ba soti a darpa.
46 Apiya antawaa i makasoled ko walay ko kalelekebi ron na kedalem a hadas taman ko
perimon.
47 Apiya antawaa i makatorog o di na koman sii ko walay na kepipian iyan so manga
nditaren iyan.
48 “Ogaid na o somoled on so imam ago mailay niyan a da makagemaw peroman so
olabong oriyan o kiyapanalapoti ron sa sominto na mapetero iyan a miyalompiyo angkoto
a walay, ka miyada den so olabong.
49 An masoti so walay na pekakowa so imam sa dowa a papanok, satebi a kayo a sidro,
mariga a tanor ago sapak a hisop.
50 Kesombali iyan so isa ko papanok ko liyawaw o koden a bote a aden a ig on a poon ko
bowalan.
51 Oriyan iyan na kekowa niyan so kayo a sidro, so sapak a hisop, so mariga a tanor, ago
so oyagoyag a papanok na kisombo niyan ko rogo o siyombali a papanok ago so ig, na
mipemesipesik iyan ko walay sa makapito.
52 Sii sangkai a okit na kesoti niyan so walay a nggolalan ko rogo o papanok, so ig, so
oyagoyag a papanok, so kayo a sidro, so hisop ago so mariga a tanor.
53 Oriyan iyan na kebokaan iyan so oyagoyag a papanok ko liyo o siti roo ko pangomaan.
Giyanan i kipenggolalanen iyan ko kasotiya ko walay, na kesoti den ai.
54-57 “Giyai i manga taritib mipantag ko langon a kabibisaan a paniyakit ko kobal, a so
ibol, so lebag, so pese, ago so panaw, ago mipantag ko olabong sii ko nditaren o di na sii
ko walay, kaan mapariksa o ba maresik o di na malolompiyo angkai a manga nganin."
LIBITIKOS 15
Manga Taritib mipantag ko Maresik a Petoga a poon ko Lawas
Pitero o Allah ki Mosa ago si Aron a
2 “Teroa ngka ko manga Israil a: Apiya antawaa i mama a aden a petoga a poon ko
sangoran iyan na madadalem a hadas,
3 Apiya mitataros a kapegondas iyan ko lawas iyan o di na miyaparin, na maresik angkoto
a mama.
4 “Apiya antonaa i keigaan o di na keontodan iyan na keresikan mambo,
5-7 Na apiya antawaa i makaseko ko inigaan o mama a pegondas on so maresik, o di na
makaontod ko kiyaontodan iyan, o di na makaseko sangkoto a mama na kepipian iyan so
nditaren iyan ago makapepeigo, ogaid na madadalem den a hadas taman ko perimon.
8 “Amay ka so taw a lompiyo na kadodaan o aden a pegondas on na kepipian iyan so
nditaren iyan ago makapepeigo, ogaid na madadalem den a hadas taman ko perimon.
9 “Apiya antonaa a siya, o di na ampido, o di na ontoda ko karo a kiyaontodan o mama a
aden a pegondas on a maresik na keresikan,
10 Na apiya antawaa i makaseko ko apiya antonaa a kiyaontodan angkoto a mama na
madadalem a hadas taman ko periman, na apiya antawaa i makaawid on na kepipian iyan
so nditaren iyan ago makapepeigo, ogaid na madadalem den a hadas taman ko perimon.
11 “Amay ka aden a taw a maseko o mama a aden a pegondas on a da niyan pen kaonabi
a manga lima niyan sa ig na kepipian o taw so nditaren iyan ago makapepeigo, na
madadalem sekaniyan a hadas taman ko perimon.
12 “Apiya antonaa a koden a bote a maseko o aden a pegondas on na keropet, na so
kasangkapan a kayo na keonaban sa ig.
13 “Amay ka mada ko mama so pegondas on na pekanayaw sekaniyan sa pito gawii, na
kepipian iyan so nditaren iyan ago makapepeigo ko ig a poon ko bowalan, na kelompiyo
sekaniyan.
14 Sii ko ikawalo gawii na pekakowa sekaniyan sa dowa a marapatik o di na dowa a
pagapak na pekasong ko hadapan o Allah ko gimowa o Barombarong a dii Telabokan, na
kibegay niyan ai ko imam.
15 Pekorbanen o imam so isa on a isepaat sabap ko dosa, na so isa on na pekorbanen iyan
a isepaat a totongen. Sii sangkai a okit na ipenggolalan o imam so kakepapasa ko dosa o
mama ko hadapan o Allah pantag ko sakit iyan a petoga.
16 “Amay ka so mama na liniyowan a biga na makapepeigo sekaniyan, ogaid na
madadalem den a hadas taman ko perimon.
17 Apiya antonaa a pimbaalan a dinis o di na panit a ketekan ko biga na keonaban, na
maresik den ai taman ko perimon.
18 Igira a romimbang so mama sa babay ago liniyowan a biga na palaya siran
makapepeigo sa ig, ogaid na madadalem siran den a hadas taman ko perimon.
19 “Igira a miyakaoma ko babay so kail na madadalem sekaniyan a hadas ko soled o pito
gawii. Apiya antawaa i makaseko rekaniyan na madadalem den a hadas taman ko
perimon.
20 Apiya antonaa i keigaan iyan o di na keontodan iyan ko kakakail iyan na maresik.
21-23 Na o aden a makaseko ko kiyaigaan iyan o di na kiyaontodan iyan na kepipian iyan
so nditaren iyan ago makapepeigo, ogaid na madadalem sekaniyan den a hadas taman ko
perimon.
24 O romimbang so mama sa babay ko kapekekail iyan na keresikan sekaniyan o karesik
o babay, na madadalem sekaniyan a hadas ko makapito gawii, na apiya antonaa i keigaan
iyan na maresik mambo.
25 “O aden a babay a perogoan ko mamakapira gawii sii ko masa a liyo ron ko
kapepekaoma on o kail, o di na o mitataros den so kaperogoi ron oriyan o kiyapakaoma
on o kail na madadalem sekaniyan a hadas taman sa aden a pegondas on a rogo, a datar o
manga gawii a kiyapakaoma on o kail.
26 Apiya antonaa a keigaan o di na keontodan iyan sangkai a manga gawii na maresik, a
datar o masa a kapekekail iyan.
27 Apiya antawaa i makaseko sangkai a manga nganin na kepipian iyan so nditaren iyan
ago makapepeigo, ogaid na madadalem den a hadas taman ko perimon.
28 “Amay ka mada rekaniyan so rogo na pekanayaw sekaniyan sa pito gawii na go bo
kelompiyo.
29 Sii ko ikawalo gawii na pekakowa sekaniyan sa dowa a marapatik o di na dowa a
pagapak na kewit iyan ai ko imam roo ko gimowa o Barombarong a dii Telabokan.
30 Pekorbanen o imam so isa on a isepaat sabap ko dosa, na so isa on na pekorbanen iyan
a isepaat a totongen. Sii sangkai a okit na ipenggolalan iyan so kakepapasa ko dosa o
babay ko hadapan o Allah pantag ko kiyarogoi ron.
31 “Sii sangkai a okit na pekisibay niyo so manga Israil ko manga nganin a ikedalem iran
a hadas an siran di pematay ko karesik iran sii ko kaperesiki ran ko soti a kakadenan ko a
sisii kiran."
32 Giyai i manga taritib mipantag ko mama a aden a maresik a petoga ko sangoran iyan, o
di na so mama a madadalem a hadas sabap sa liniyowan a biga,
33 Ago pantag ko babay ko kadadalem iyan a kail, ago so mama o di na babay a aden a
pegondas on, ago mipantag ko mama a romimbang ko babay a madadalem a hadas.
LIBITIKOS 16
So Gawii a Kapepasa ko Dosa
Oriyan o kiyapatay o dowa kataw a manga wata i Aron a miyamatay isako somapaat siran
ko Allah sa di sak a apoy
2 Na pitero o Allah ki Mosa a "Teroa ngka ko pagari ngka a si Aron a sii bo ko matetendo
a manga gawii i kapekasoled iyan ko Lebi a Soti a Darpa sii ko likod o kortina a
irerending ko lekeb o Kaban sa Kapasadan a ron pekepapas so manga dosa an sekaniyan
di petay, ka pepayag ako ko liyawaw o lekeb o Kaban a nggolalan ko gabon.
3 “Giyai i ipapaliyogat ki Aron ko kapekasoled iyan ko Lebi a Soti a Darpa: Pekaawid
sekaniyan sa kangodaan a mama a sapi a pekorbanen sabap ko dosa, ago satiman a mama
a bilibili a pekorbanen a isepaat a totongen.
4 Kesolot iyan so manga nditaren o kaiimami -- so sotra a kimon a rakes o karsinsiliyo a
matatampar ko lawas iyan, so sambitan ko kasadan iyan, ago so totob. Makapepeigo
sekaniyan daan na go niyan bo masolot.
5 Na pekakowa sekaniyan sii ko manga Israil sa dowa timan a mandangan a pekorbanen
sabap ko dosa ago satiman a mama a bilibili a pekorbanen a isepaat a totongen.
6 “Paganay na mapekorban i Aron so mama a sapi a isepaat sabap ko dosa kaan mapapas
so manga dosa niyan ago so manga dosa o pamiliya niyan.
7 Oriyan iyan na kewit iyan so dowa timan a mandangan sii ko gimowa o Barombarong
ka ipagadap iyan roo ko Allah.
8 Na keripa i Aron o anda ko dowa a mandangan i isepaat ko Allah ago so mbogaon on
ko disirto sii ko saitan a si Asasil.
9 Kekowa i Aron so mandangan a miyaripa a isepaat ko Allah na pekorbanen iyan sabap
ko dosa.
10 Ogaid na so mandangan a miyaripa a mbogaon na ipagadap a oyagoyag sii ko Allah
kaan maosar ko kapepasa ko dosa o manga taw a nggolalan ko kapembogawa on ko
disirto sii ki Asasil.
11 “Amay ka masombali i Aron so mama a sapi a pekorbanen sabap ko dosa kaan
mapapas so dosa niyan ago so dosa o pamiliya niyan
12 Na pekakowa sekaniyan sa petotongan sa doka a mapepeno a waga a poon ko aparan a
matatago ko hadapan o Allah a rakes o dowa gamak a pitepong a mamot a doka na
keawidan iyan ai sii ko Lebi a Soti a Darpa.
13 Roo ko hadapan o Allah na ketago iyan on so doka sii ko manga waga kaan so bel iyan
na mikolob ko lekeb o Kaban sa Kapasadan kaan sekaniyan di petay.
14 Na pekakowa sekaniyan ko rogo o sapi na mipemesipesik iyan a kemer ko panempang
o lekeb, na so ped on peman na mipemesipesik iyan sa makapito sii ko hadapan o Kaban
sa Kapasadan.
15 “Oriyan iyan na mapekorban iyan so mandangan a isepaat sabap ko dosa para ko
manga taw na keawidan iyan so rogo o mandangan sii ko Lebi a Soti a Darpa, na
mipemesipesik iyan sii ko lekeb o Kaban sa Kapasadan ago sii ko hadapan iyan a datar o
inikidia niyan ko rogo o sapi.
16 Sii sangkai a okit na ipenggolalan iyan so kapelompiyowa ko Lebi a Soti a Darpa
sabap ko karesik o manga Israil ago so kapegongkir iran sii ko di iran dii kandosa.
Mapenggolaola niyan ai mambo ko Barombarong a dii Telabokan a matatago ko lembak
o kena a ba masosoti a kampo iran.
17 Da den a ped a taw a ba pekasoled ko Barombarong ipoon ko kasoled on i Aron sa
kipenggolalanen iyan ko kapelompiyowi ko Lebi a Soti a Darpa taman ko kapekaliyo
niyan oriyan o kininggolalanen iyan ko kakepapas o dosa para ko ginawa niyan ago so
pamiliya niyan, ago para ko langon o manga Israil.
18 “Mapasad oto na pekasong sekaniyan ko aparan a petotongan sa ipesepaat a matatago
ko hadapan o Allah ka pelompiyon iyan ai. Pekakowa sekaniyan ko rogo o sapi ago so
rogo o mandangan na kisalapot iyan ko manga pangapanga o aparan.
19 Na kisombo niyan a kemer iyan ko rogo na mipemesipesik iyan ko aparan sa
makapito. Nggolalan sii na kelompiyo niyan so aparan ko manga dosa o manga Israil ago
kisenggay niyan a soti.
So Kambing a Kebogaw
20 Amay ka mapasad i Aron so di niyan dii kinggolalanen ko kapelompiyowi ko Lebi a
Soti a Darpa, so Barombarong a dii Telabokan, ago so aparan na kekowa niyan so
oyagoyag a mandangan.
21 Na kidapenet iyan so dowa a lima niyan ko olo o mandangan ago penaroon iyan on so
langon a kamarataan ago kapegongkir o manga Israil sii ko langon o di iran dii kandosa.
Sii sangkai a okit na kibetad iyan ai langon sii ko olo o mandangan, na kebogaw niyan so
mandangan ko disirto a pekikibir ko mama a minitoro a penggolaola sii.
22 So den so mandangan i pekaawid ko langon o kadostaan o manga taw ka pagowiten
iyan ko matatawantawan a darpa, na kebogaw o mama so mandangan roo ko disirto.
23 “Mapasad oto na pekasoled si Aron ko Barombarong ka pagendaan iyan so manga
nditaren iyan a sotra a siyolot iyan sa di niyan pen kasoled ko Lebi a Soti a Darpa, na
kibegak iyan ai roo.
24 Makapepeigo sekaniyan roo ko soti a darpa na go niyan bo masolot so kalilid a
nditaren iyan. Na pekaliyo sekaniyan ago pekorbanen iyan so isepaat a totongen para sa
ginawa niyan, ago so isepaat a totongen para ko manga taw a aya niyan kipenggolalanen
ko kakepapasa ko dosa niyan ago so dosa o manga taw.
25 Ketotong iyan pen ko aparan so langon o sibo o ayam a pikorban sabap ko dosa.
26 “So peman so mama a miyogaw ko mandangan a piyakaawa na kepipian iyan so
nditaren iyan ago makapepeigo na go bo pekasoled ko kampo.
27 So mama a sapi ago so mandangan a piyangorban sabap ko dosa a inisoled so rogo
iran ko Lebi a Soti a Darpa a inilompiyo ron na kewit ko liyo o kampo na roo ketotong so
kobal iran, so sapo ago so tinai iran.
28 So mama a tomiyotong on na kepipian iyan so nditaren iyan ago makapepeigo na go
bo pekasoled ko kampo.
So Kaselaselaa ko Gawii a Kapepasa ko manga Dosa
29 “Giyai na da a kaposan iyan a taritib a ketoman iyo: Sii ko ikasapolo gawii ko ikapito
olan na makapepowasa kano ago di kano den penggalebek a melagid so tenger a taw ago
so rait a mababaling rekano.
30 Sii sangkai a gawii na ipenggolalan so kakepapasa ko langon o manga dosa niyo, na
kelompiyo kano den ko hadapan o Allah.
31 Gawii ai a idedeke para rekano, na makapepowasa kano. Da a ikepos ai a taritib.
32 So maporo a imam a kiyasalawatan ago kiyaidinan ko kaiimami a isembi ko ama iyan
na aya penggolaola ko kakepapas o dosa. Kesolot iyan so soti a manga nditaren a sotra
33 Na ipenggolalan iyan so kapelompiyowa ko Lebi a Soti a Darpa, so Barombarong a dii
telabokan, ago so aparan, na ipenggolalan iyan pen so kakepapasa ko dosa para ko manga
imam ago so langon o manga taw ko isa ka maginged.
34 Giyangkai a dii kinggolalanen ko kakepapas o manga dosa para ko langon o manga
Israil na da a kaposan iyan a taritib a peketoman iyo sa makaisa ko saragon.
Na miyanggolaola ini a so den so inisogo o Allah ki Mosa.
LIBITIKOS 17
Inisapar so Kakan sa Rogo
2 “Teroa ngka ki Aron ago sii ko manga wata iyan, ago so langon o manga Israil a "Giyai
i inisogo o Allah:
3 Apiya antawaa ko manga Israil a korban sa sapi, o di na bilibili, o di na kambing sii ko
soled o di na liyo o kampo
4 Ka da niyan wita ko gimowa o Barombarong a dii Telabokan sa kapekorbana niyan on a
isepaat ko Allah ko hadapan o kakadenan o Allah na giyangkoto a mama na miyasogok
iyan so kokoman mipantag ko kapakatogaa ko rogo, na kebelag sekaniyan ko isa ka
maginged a Israil.
5 Aya antap angkai a sogoan na an pekewit o manga Israil ko Allah so manga ayam a di
iran dii korbanen sii ko manga pangomaan. Disomala a kewit iran ai ko imam sii ko
gimowa o Barombarong kaan makorban a isepaat ko Allah pantag bo ko kanggiginawai.
6 Amay ka magiyanan na mipemesipesik o imam so rogo ko aparan o Allah sii ko
gimowa o Barombarong na go ketotong iyan on so manga sibo iyan a mamot ko Allah.
7 Disomala a genekan iran den so di iran dii kakorbani ko manga kambing a saitan roo ko
pangomaan. Giyai na da a ikepos iyan a sogoan kiran a peketoman o langon a kebabadan
kiran.
8 “Teroa ngka kiran a apiya antawaa ko manga Israil o di na sii ko manga rait a
kibabaling kiran i somapaat sa totongen o di na pekorban
9 A di niyan pagowiten ko gimowa o Barombarong sa kisepaaten iyan on ko Allah na
kebelag sekaniyan ko isa ka maginged a Israil.
10 “Apiya antawaa ko manga Israil o di na sii ko manga rait a kibabaling kiran i koman sa
apiya antonaa a rogo na makiperidoay ako rekaniyan, na mbelagen ko sekaniyan ko isa ka
maginged a Israil,
11 Ka so kaoyagoyag o oman i baraniyawa na sisii ko rogo, na inisenggay aken ai rekano
a keodod iyo ko aparan a aya ipepas ko manga dosa niyo, ka so rogo a ron matatago so
kaoyagoyag na aya pekapapas ko dosa.
12 Giyanan i sabap a kiyateroa ko ron ko manga Israil a apiya antawaa kiran o di sii ko
manga rait a mababaling kiran na di den pekakan sa rogo."
13 “Apiya antawaa ko manga Israil o di na sii ko manga rait a kibabaling kiran a
manganop ago makakowa sa apiya antonaa a halal a binatang o di na papanok na
disomala a mapekatoga iyan a daan so rogo iyan na ketambonan iyan sa lopa.
14 So kaoyagoyag o oman i baraniyawa na sisii ko rogo iyan, na giyanan i sabap a
kiyateroa ko ron ko manga Israil a di siran pekakan sa rogo o apiya antonaa a baraniyawa
ka kagiya so kaoyagoyag o oman i baraniyawa na matatago ko rogo iyan; apiya antawaa i
koman on na kebelag den.
15 “Apiya antawaa tenger a taw o di na rait i koman sa sapo a ayam a baden miyatay o di
na miyapatay o maila a binatang na kepipian iyan so manga nditaren iyan ago
makapepeigo, ogaid na madadalem sekaniyan den a hadas taman ko perimon, na
kelompiyo bo.
16 Ogaid na o di niyan pipii so nditaren iyan ago di pepeigo na indaneg on so kadostaan
iyan."
LIBITIKOS 18
So Inisapar a Kapekeromai
2 “Teroa ngka ko manga Israil a: Saken so Allah a Tohan iyo.
3 Di niyo sowaa so paparangayan o manga taw sa Misir a ron kano miyakabaling, aya pen
o ba niyo sowaa so olaola iran sii ko inged a Kanaan a ron aken sekano pagowita. Di
niyo peginetaon so manga okitokit iran.
4 Tomana niyo so manga kokoman aken ago nggolalanen iyo piyapiya so manga sogoan
aken. Saken so Allah a Tohan iyo.
5 Tomana niyo so manga sogoan ago so manga kokoman aken, ka so taw a petoman on
na sii dii makanggolalan a kapepegongowi niyan ko kaoyagoyag iyan. Saken so Allah.
6 “Da den a sakataw bo a ba niyan mapekeroma so apiya antawaa ko madaseg a manga
tonganay niyan. Saken so Allah.
7 Di ngka pekayai so ama a ka ko kapekeromaa ngka ko ina a ka. Sekaniyan i ina a ka; o
ba ngka keromaa.
8 Di ngka pekeromaa so karoma o ama a ka, ka keyaan on so ama a ka.
9 Di ngka pekeromaa so babay ngka apiya anda ko wata o ama a ka o di na ina a ka apiya
anda sekaniyan inimbawata ko walay ngka o di na sii ko salakaw a darpa.
10 Di ngka pekeromaa so apo iyo a babay, ka keyaan ka on.
11 Di ngka pekeromaa so wata a babay o karoma o ama a ka a inimbawata o ama a ka, ka
babay ngka sekaniyan.
12 Di ngka pekeromaa so babay o ama a ka, ka madaseg sekaniyan i ama a ka.
13 Di ngka pekeromaa so babay o ina a ka, ka madaseg sekaniyan i ina a ka.
14 Di ngka pekayai so pagari i ama a ka ko kapekeromaa ngka ko karoma niyan. Babo o
ka sekaniyan.
15 Di ngka pekeromaa so miyakamong reka a babay, ka karoma sekaniyan o wata a ka a
mama.
16 Di ngka pekeromaa so karoma o pagari ngka, ka keyaan on so pagari ngka.
17 Di ngka pakaperakesa keroma so babay ago so wata iyan a babay, ago di ngka
pekeromaa so apiya anda ko wata a babay o wata iyan a mama, o di na so wata a babay o
wata iyan a babay. Madaseg iyan siran, na kamarataan ai.
18 Di ngka ndowain so pagari a babay o karoma ngka sa ba ngka pekeromaa sii ko
kaooyagoyag pen o karoma ngka.
19 Di ngka pekeromaa so babay sii ko masa a kandodon o basa, ka madadalem sekaniyan
a hadas.
20 Di ngka pekeromaa so karoma o siringan ka, ka kapeseboan ka on a ginawa ngka.
21 Di ngka pelada so apiya anda ko manga wata a ka sa ba pekorbana ko katohanan a si
Molik, ka kebatalan ka so Ingaran o Tohan ka. Saken so Allah.
22 Di ngka pekeromaa so datar ka a mama a ba datar o ipekidia ngka ko babay;
piyakasisingay ini.
23 Di ka pakipemotaliya ko binatang ka ikebaloy ngka ini a maresik. Na da a babay a ba
niyan kepalad a ginawa niyan ko binatang a ba on makikeroma, ka piyakalekelek ai a
bibid.
24 “Di niyo peseboi a ginawa niyo ko apiya anda sangkai a manga okit, ka giyanan i
manga olaola a miyakaresik ko manga nasiyon a mbogaon ko sii ko kapegantap iyo ron.
25 Apiya so lopa na kiyaresikan. Giyanan i sabap a ndenegen ko so manga kibabaling on
sabap ko kamarataan iran, na pagotaan siran o lopa
26 Ogaid na sekano a manga tenger a taw o di na so manga rait a kibabaling rekano na
tomana niyo so manga sogoan ago so manga kokoman aken. Di niyo sowaa so apiya
antonaa sangkai a piyakasisingay a olaola.
27 Ka langon ai dii nggolaolaan o manga kibabaling ko inged a ron aken sekano
pagowita, na kiyaresikan so lopa.
28 Na o peresiki niyo so lopa na pagotaan kano niyan a datar o kapagotaa niyan ko manga
nasiyon a kibabaling roo imanto.
29 Apiya antawaa i nggolaola sa apiya anda sangkai a manga piyakasisingay na kebelag
ko isa ka maginged a Israil.
30 Kagiya ka maoto na tomana niyo piyapiya so manga sogoan aken na di niyo sowaa so
apiya anda sangkai a piyakasisingay a olaola a dii nggolaolaan o manga taw a kibabaling
roo imanto ko inged. Di niyo peseboi a ginawa niyo sangkai a manga nganin. Saken so
Allah a Tohan iyo."
LIBITIKOS 19
Manga Kokoman mipantag ko Kasosoti ago Kaontol
2 “Teroa ngka ko langon o isa ka maginged a Israil a: Sosoti kano, ka saken, a so Allah a
Tohan iyo, na soti.
3 So oman i isa rekano na pagadati niyan so ama iyan ago so ina iyan, na tomana niyo so
manga kokoman ko manga Gawii aken a Idedeke. Saken so Allah a Tohan iyo.
4 Di kano penanangoran ko manga barahala aya pen o ba niyo mbaalen a ginawa niyo sa
tiyowang a manga katohanan. Saken so Allah a Tohan iyo.
5 “Igira a pekorban kano sa ayam pantag bo ko kanggiginawai na tomana niyo so manga
taritib on kaan aken matarima para rekano.
6 Kekan iyo ai sii ko gawii a kiyakorbana niyo ron o di na sii ko talondog a gawii, ogaid
na apiya antonaa a kelamba on ko ikatelo gawii na disomala a totongen.
7 O aden a miyalamba ko pikorban sii ko ikatelo gawii na maresik den ai na di aken
terimaan.
8 Apiya antawaa i koman on na kesala ka kagiya da niyan pagadati so inisenggay a soti ko
Allah, na kebelag sekaniyan ko isa ka maginged a Israil.
9 “Igira a peperagonan ka so lopa a ka na di ngka nggaraba so pereperan ko manga kilid
iyan aya pen o ba ngka osipa so miyalamba on.
10 Di ngka pelengana romopo so asinda ngka a obas aya pen o ba ngka pamorota so
miyanga oolog a obas. Begaken ka on ai para ko manga miskin ago so manga
mananangga. Saken so Allah a Tohan iyo.
11 “Di kano pemanekew, di niyo selibaa so ped aya pen o ba kano pamokeg.
12 Di niyo pesepaan so di benar sii ko Ingaran aken ka kebatalan iyo so Ingaran o Tohan
iyo. Saken so Allah.
13 “Di ngka selimboti so ped ka aya pen o ba ngka aniyayaa. Di ngka sendoden sa ba
ngka pakapitai so kasokayi ngka ko piyakanggalebek ka.
14 Di ngka pesodia so bengel aya pen o ba ngka alangi so lalan o bota, ka kaleken ka
baden so Tohan ka. Saken so Allah.
15 “Di niyo mbibida so kokoman; di ngka peramigi so manga miskin aya pen o ba ngka
ampili so manga kawasa, ka pangokomen ka baden so ontol sii ko ped ka a magiinged.
16 “Di ka pemanipanik ko manga siringan ka sa kapemagantaa ngka ko ped a taw. Di ka
penggolaola sa apiya antonaa a masiken a ron kabinasai so kaooyagoyag o siringan ka.
17 “Di ngka pemolaa ko poso o ka so kagowad ko pagari ngka. Mbongeten ka ko ped ka
so dosa niyan kaan ka di kerambit ko kiyataksil iyan.
18 Di ngka seopi o di na pemolai sa ratem so apiya antawaa ko manga ped ka, ka
kababayai ngka baden so siringan ka a datar o ginawa ngka. Saken so Allah.
19 “Tomana niyo so manga sogoan aken. Di ngka pakipemowadi so manga ayam ka ko
salakaw ron a ayam. Di ngka mambo seodi so lopa a ka sa dowa barang a oniin. Di ka
solot sa nditaren a pimbaalan a dowa barang a dinis.
20 “O rembanga o mama so oripen a babay a matataalik a mapengaroma o ped a mama
ogaid na da pen maaon o di na kabokai so babay ko kaooripeni ron na kedaneg siran,
ogaid na di siran kebono ka kagiya da pen kabokai so babay.
21 Ogaid na pekawit so mama sa mama a bilibili sii ko gimowa o Barombarong a dii
Telabokan a pekorbanen ko Allah sabap ko kiyataksil.
22 Na pekorbanen ai o imam a aya niyan kipenggolalanen ko kakepapasa ko dosa o
mama, na kerilaan sekaniyan o Allah.
23 “Amay ka somoled kano sa inged a Kanaan ago mamola kano ron sa manga onga
sapad a kekan iyo na bilangen iyo so manga onga niyan a kena a ba soti sii ko soled a telo
ragon. Sii sangkoto a masa na inisapar so kakena niyo ron.
24 Sii ko ikapat ragon na kisenggay so langon a onga niyan a rek o Allah a aya rekaniyan
den ipenalamat.
25 Ogaid na sii ko ikalima ragon na kekan iyo den so onga niyan. Sii sangkai a okit na
pekadakel so manga onga a pekeragon iyo ron. Saken so Allah a Tohan iyo.
26 “Di kano ken sa sapo a di pen dii pirogo. Di kano perimar aya pen o ba kano
pangatao.
27 Di niyo potoli so manga bok iyo sa pipikan ago di niyo tempadi so manga sompa iyo
28 Aya pen o ba niyo palii o di na patiki a lawas iyo ko di niyo dii kimbokoon ko
miyatay. Saken so Allah.
29 “Di ngka pekayai so wata a ka a babay ko kapakapesondala ngka on. O nggolaolaa
niyo ai na pelangkap ko inged so kasondal ago kepeno a kamarataan.
30 Tomana niyo so manga kokoman o Gawii aken a Idedeke, na selaa niyo so soti a darpa
aken. Saken so Allah.
31 “Di kano pekimosawir ko manga pamamaloy ago pepamangangay, ka kebatalan kano
kiran. Saken so Allah a Tohan iyo.
32 “Petindeg kano igira a pekadarpa so manga lokes ago pepagadati niyo siran, na
kaleken iyo so Tohan iyo. Saken so Allah.
33 “Di niyo pemaratai so manga rait a mababaling ko inged iyo.
34 Disomala a miiring iyo siran ko tenger a taw; kababayai niyo siran a datar o ginawa
niyo, ka tatademi niyo a manga mananangga kano mambo gowani roo sa inged a Misir.
Saken so Allah a Tohan iyo.
35 “Di kano penalimbot ko kapegosara niyo ko kena a ba ontol a takes, timbangan o di na
libras.
36 Osar kano sa ontol a timbangan, ontol a gantangan ago ontol a asada. Saken so Allah
a miyakaliyo rekano sa Misir.
37 Piyapiyai niyo tomoman so langon o manga sogoan ago so manga kokoman aken, ka
saken so Allah."
LIBITIKOS 20
So manga Daneg ko Mbarambarang a Dosa
2 “Teroa ngka ko manga Israil a: Apiya antawaa ko manga Israil o di na so manga rait a
mababaling sa Israil i mikorban sa wata iyan sii ki Molik na kebono. Paliyogat a
perobakan sekaniyan a ator o manga taw ko inged.
3 Makiperidoay ako sangkoto a mama ago mbelagen ko sekaniyan ko isa ka maginged a
Israil, ka sii ko kiyakorbana niyan ko wata iyan sii ki Molik na piresikan iyan so soti a
kaden aken ago biyatalan iyan so soti a Ingaran aken.
4 Na o pepegilaya baden o manga taw ko inged so kiyakorbana angkai a mama ko wata
iyan sii ko Molik ka da iran sekaniyan bonoa
5 Na saken i makiperidoay ron ago so pamiliya niyan, na mbelagen ko siran ko isa ka
maginged a Israil a rakes o langon a miyamangonot rekaniyan ko kiyasondal iyan ko
kiyasimbaa niyan ki Molik.
6 “O aden a taw a tomiyalikod raken ko kapegisei niyan ago kaparatiyayaa niyan ko
manga pemangangay ago manga pemangintonong na makiperidoay ako rekaniyan ago
mbelagen ko sekaniyan ko isa ka maginged a Israil.
7 Senggain iyo a ginawa niyo a soti ago sosoti kano, ka saken so Allah a Tohan iyo.
8 Paratiyayaa niyo ago tomana niyo so manga sogoan aken ka saken so Allah a pepekasoti
rekano.
9 “Apiya antawaa i isinta iyan so ama iyan o di na ina iyan na kebono; kisendit rekaniyan
so kiyapatay niyan.
10 “O makasina so mama ko karoma o ped a mama na palaya mbonoon so misina a
mama ago so babay.
11 O keromaa o mama so karoma o ama iyan na piyakayaan iyan so ama iyan. Na palaya
mbonoon so mama ago so babay, na sii kiran kisendit so kiyapamatay iran.
12 O keromaa o mama so miyakamong on a babay na mbonoon siran a dowa. So
pinggolaola iran na bibid, na sii kiran kisendit so kiyapamatay iran.
13 O keromaa o mama so ped iyan a mama a datar o ipekidia niyan ko babay na
piyakasisingay so pinggolaola iran. Kebono siran a dowa na sii kiran kisendit so
kiyapamatay iran.
14 O pangaromaa o mama so babay ago so ina o babay na marata ini. Palaya siran a telo
na disomala a totongen ko apoy kaan mapapas rekano so datar anan a kamarataan.
15 O makipemotaliya so mama sa binatang na paliyogat a mbonoon so mama ago so
binatang.
16 O magobay so babay sa binatang ka makipekeroma on na palaya kebono so babay ago
so binatang; sii kiran kisendit so kiyapamatay iran.
17 “O pangaromaa o mama so babay niyan, a babay niyan sii ki ama iyan o di na sii ki ina
iyan na kamarataan ai na kebelag siran a dowa ko manga tonganay iran. Piyakayaan o
mama so babay niyan na kesala sekaniyan.
18 O rembanga o mama so babay sii ko kandodon o basa na kebelag siran a dowa ko
manga tonganay iran ka kagiya siyawaan iran so pekepoonan o rogo iyan.
19 O keromaa o mama so babay i ama iyan o di na so pagari a babay i ina iyan na
piyakayaan iyan so madaseg a tonganay niyan, na palaya siran kesala.
20 O keromaa o mama so karoma o bapa iyan na piyakayaan iyan so bapa iyan. Kesala
siran a dowa, na pematay siran a da a manga wata iran.
21 O keromaa o mama so karoma o pagari niyan na pematay siran a da a manga wata
iran. Kasebo ini a pinggolaola niyan na piyakayaan iyan so pagari niyan.
22 “Tomana niyo piyapiya so langon o manga sogoan ago so manga kokoman aken kaan
di kano maota o inged a ron aken sekano pagowita.
23 Di niyo peginetaon so paparangayan o manga taw a kibabaling roo a mbogaon ko sii
ko kapegantap iyo kiran. Ipekegowad aken siran sabap ko kiyanggolaolaa iran sangkai
langon a kamarataan.
24 Ogaid na initopa ko rekano a ketangan iyo so lopa iran a imbegay aken rekano a
kawali niyo, a pekepakayan ago oodaren a lopa. Saken so Allah a Tohan iyo a sominggay
rekano a mabaloy a rek aken ko ped a manga nasiyon.
25 Kagiya ka maoto na disomala a pakasenggayaa niyo so halal ago so karam a manga
ayam ago manga papanok. Di niyo peresiki a ginawa niyo ko kaken iyo sa apiya antonaa
a ayam, o di na papanok o di na pemanola ko lopa a tindo aken a karam rekano.
26 Sosoti kano sii raken, ka saken, a so Allah, na soti. Inisenggay aken sekano ko ped a
manga nasiyon a aya ko rek.
27 “So mama o di na babay a pemangangay o di na pangangatao na disomala a mbonoon.
Kerobak iyo a ator, na sii kiran kisendit so kiyapamatay iran."
LIBITIKOS 21
So Kasosoti o manga Imam
Na pitero o Allah ki Mosa a "Teroa ngka ko manga imam a so manga wata i Aron a: Di
kebatalan o imam a ginawa niyan ko kasekoa niyan ko apiya antawaa ko manga tonganay
niyan a miyatay
2 Liyo ron so tanto niyan a madaseg a tonganay, a so ina o di na ama iyan, so wata iyan a
mama o di na babay, so pagari niyan a mama,
3 O di na so da mapangaroma a babay niyan a tatagikoren iyan.
4 Na di niyan kebatalan a ginawa niyan a nggolalan ko kasekoa niyan ko bangkay o taw a
minitonganaya iyan ko kiyapakakemonga.
5 “Di keopawan o manga imam a manga olo iran aya pen o ba iran tampadi so manga
sompa iran, ago di iran kapemalian a manga lawas iran ko di iran dii kamboko.
6 Paliyogat a isesenggay siran a soti ko Tohan iran ago di iran kabatalan so Ingaran o
Tohan ka kagiya siran i pepalad ko pangenengken o Tohan iran a ipesepaat a petotongen
ko apoy sii ko Allah. Kagiya ka maoto na paliyogat a masosoti siran.
7 Di siran makapengaroma sa babay a miyakasondal aya pen o ba bitowanen, ka kagiya
isesenggay so imam a soti ko Tohan iyan.
8 Kibilang o manga taw so manga imam a soti ka kagiya siran i pesepaat ko
pangenengken o Tohan iyo. Bilangen iyo siran a soti, ka saken, a so Allah a pesoti
rekano, na soti.
9 O miyakasebo so wata a babay o imam na piyakayaan iyan so ama iyan, na ketotong
sekaniyan ko apoy.
10 “So maporo a imam, a so isa ko magariyari a kiyasalawatan sa lana diyabat ago
kiyaidinan a makasolot ko nditaren a kaiimami, na di niyan mipendarainon so bok iyan
aya pen o ba niyan kisia so nditaren iyan ko kipembokoon iyan ko miyatay.
11-12 Insenggay sekaniyan a soti ko kiyasalawati ron sa lana diyabat o Tohan iyan, na di
niyan kebatalan a ginawa niyan aya pen o ba niyan kaperesiki so soti a darpa o Tohan
iyan a nggolalan ko kaawai niyan on sa kasoled iyan ko darpa a aden a bangkay ron, apiya
pen o ama o di na ina iyan ai. Saken so Allah.
13 “Raga a mapengaroma o maporo a imam,
14 A kena a ba balo, o di na bitowanen a babay aya pen o ba babay a miyakasondal. Aya
bo a mapengaroma niyan na raga a taw sa Israil
15 Kaan masoti so manga kebabadan rekaniyan sii ko manga taw a bangsa niyan. Saken
so Allah a miyaloy rekaniyan a soti."
16 Na pitero peman o Allah ki Mosa a
17 “Teroa ngka ki Aron a: Da den a taw ko kebabadan reka a aden a daway o lawas iyan a
ba pekasapaat ko pangenengken o Tohan iyan.
18 Da a taw a aden a daway niyan a ba raken pekadaseg, a datar o bota o di na lepo, so
mabibinasa a paras o di na lawas iyan,
19 So sadir i lima o di na ai niyan,
20 So bekog i likod o di na karengki, so mabibinasa a mata niyan o di na pegibolen aya
pen o ba kiyapon.
21 Saden sa mbawataan i Aron a imam a aden a daway o lawas iyan na di kepakay a ba
raken pekadaseg sa kisepaaten iyan ko petotongen a ipesepaat ko Allah. Aden a daway
niyan na di sekaniyan pekasapaat ko pangenengken o Tohan iyan.
22 Kepakay a ken sekaniyan ko soti a pangenengken a inisapaat ko Tohan taman den ko
lebi a soti a pangenengken,
23 Ogaid na sabap ko daway niyan na di sekaniyan pekaobay ko kortina aya pen o ba
makadaseg ko aparan kaan di kebatali so soti a manga darpa aken. Ka saken so Allah a
aya kiran pepekasoti."
24 Mandiyadi na inisampay i Mosa angkai a manga katero ki Aron ago so manga wata i
Aron ago sii ko langon a manga Israil.
LIBITIKOS 22
So Kasosoti o manga Sapaat
2 “Teroa ngka ki Aron ago so manga wata iyan a pagadati ran so soti a manga sapaat o
manga Israil a ipesenggay iran raken kaan iran di kebatali so soti a Ingaran aken. Saken
so Allah.
3 Teroa ngka kiran a o aden a isa ko manga kebabadan kiran a kababatalan sii ko
kiyaobay niyan ko manga sapaat o manga Israil a ipesenggay iran a soti ko Allah na
kebelag angkoto a taw ko kamamasaan aken. Saken so Allah.
4 “Apiya antawaa ko kiyababadan ki Aron a aden a sakit iyan sa kobal o di na aden a
petoga ko lawas iyan na di sekaniyan pekakan ko manga soti a ipesepaat taman sa di
malompiyo. Na kebatalan sekaniyan o makaseko sa bangkay, o di na taw a madadalem a
hadas ko kiyaliyo ron o biga,
5 O di na o makaseko sekaniyan pen sa apiya antonaa a maresik a pendola ko lopa, o di
na taw a kiyaresikan ko apiya antonaa i inikaresik iyan.
6 So imam a makaseko sa apiya anda roo na kababatalan den taman ko perimon, na di
sekaniyan pekakan ko apiya antonaa a soti a ipesepaat taman sa di sekaniyan makapeigo
sa ig.
7 Amay ka somedep den so alongan na kelompiyo sekaniyan na maipos oto na pekakan
sekaniyan den ko manga soti a sapaat, ka giyai i pangenengken iyan.
8 Di pekakan so imam sa apiya antonaa a baden miyatay o di na pisekisi o maila a
binatang, ka kebatalan sekaniyan on. Saken so Allah.
9 “Disomala a tomanen o manga imam so manga kokoman aken kaan siran di ketaksil
ago pematay sabap ko kaongkira iran on. Saken so Allah a aya kiran pepekasoti.
10 “Da den a sakataw bo a di maaped ko pamiliya o imam a ba pekakan ko soti a
inisapaat aya pen o ba matag banto o imam o di na so sosokayan i ba on makakan.
11 Ogaid na so manga oripen o imam a miyapamasa niyan a pirak o di na sii inimbawata
ko walay o imam na pekakan ko pangenengken iyan.
12 O so wata a babay o imam na mapangaroma o mama a kena a ba imam na di den
pekakan ko soti a inisapaat.
13 Ogaid na o miyabalo sekaniyan o di na miyabitowanen ago da a wata iyan ago
miyaling peroman ko walay i ama iyan a datar o kararagai ron na pekakan sekaniyan ko
pangenengken i ama iyan, ogaid na di sii pekakan so di maaped ko pamiliya o imam.
14 “Apiya antawaa i miyakakan ko soti a inisapaat a di niyan katawan a soti ini na
kebayadan iyan ko imam so miyakan iyan ago kioman iyan on so ikalima bagi a arga iyan.
15 So manga imam na di iran kiiring so soti a manga ipesepaat o manga Israil ko Allah a
datar o kalilid a pangenengken
16 A nggolalan ko kapekikanen iran on ko taw a di on kepakayan, ka kitaksil ini ago
kidaneg sangkoto a taw. Saken so Allah a pesoti sangkai a manga sapaat."
So Ketarima ago so di Ketarima a manga Sapaat
18 “Teroa ngka ki Aron ago so manga wata iyan ago sii ko langon o manga Israil a: Apiya
antawaa ko manga Israil o di na sii ko manga rait a mababaling sa Israil i malad sa
pamemegayan a isepaat a totongen ko Allah apiya anda ko kitomanen ko samaya o di na
iklas a sapaat
19 Na aya kewit iyo na satiman a mama a sapi, bilibili, o di na kambing a da a daway
niyan kaan ai matarima rekano.
20 Di niyo pagowita so apiya antonaa a aden a daway niyan, ka di ini terimaan rekano.
21 Amay ka aden rekano a magawid sa sapi o di na bilibili a pekorbanen pantag bo ko
kanggiginawai a itoman ko samaya o di na iklas a sapaat na paliyogat a da a daway niyan
o di na paawing kaan ai matarima.
22 Di kano sepaat ko Allah sa ayam a bota, o di na lepo, o di na aden a pali iyan o di na
lebag o di na ibol iyan, aya pen o ba dii ndana. O ba niyo ai panaapaten ko Allah sii ko
aparan a pekaokiten ko apoy.
23 So sapi o di na bilibili a miyakimay o di na miyarotig na kepakay a misepaat iyo a
iklas a pamemegayan, ogaid na di ini ketarima o sapaaten a itoman ko samaya.
24 Sii ko inged iyo na di kano den pekasapaat ko Allah sa ayam a miyagaras so orak iyan,
o di na miyapesa, o di na kiyapalian, aya pen o ba miyakapon.
25 Na di niyo sepaaten a pangenengken o Tohan iyo so apiya antonaa a ayam a miyakowa
niyo a poon ko rait. Di ini ketarima rekano ka ibibiling ai a kiyabatalan ago kiyatagoan sa
daway."
27 “Igira aden a sapi a inimbawata, o di na bililibi, o di na kambing na sii den pasin ko
ina iyan ko soled a pito gawii, ogaid na ipoon ko ikawalo gawii na kepakay a isepaat a
petotongen ko Allah.
28 Di niyo penombalia ko soled o salongan so ina a sapi, bilibili o di na kambing ago so
wata iyan.
29 Igira a pekorban kano sa isepaat ko Allah para ko panalamat na nggolaolaa niyo ai sii
ko okit a katerimaa niyan on rekano.
30 Disomala a kekan bo ini sii den sangkoto a gawii; da den a pekapitaan iyo ron. Saken
so Allah.
31 “Piyapiyai niyo tomoman so manga sogoan aken. Saken so Allah.
32 Di niyo mbatali so soti a Ingaran aken. Disomala a kilalaan o manga Israil a soti ako.
Saken so Allah a aya rekano pepekasoti
33 Ago miyakaliyo rekano sa inged a Misir kaan ako mabaloy a Tohan iyo. Saken so
Allah."
LIBITIKOS 23
So Matetendo a manga Pista
2 “Began ka ko manga Israil angkai a manga insarat mipantag ko miyanga tetendo a pista
o Allah, a so manga ala a gawii a di niyo katelabok sa soti a kalilimod.
So Gawii a Idedeke
3 “Aden a nem gawii a mipenggalebek iyo, ogaid na so ikapito gawii na Gawii a Idedeke,
a so gawii a katelabok iyo sa soti a kalilimod. Da den a ba niyo sii mapenggalebek apiya
anda kano mababaling, ka rek o Allah so Gawii a Idedeke.
So Pista a Paska ago so Kakan sa da a Tapay ron a Paan
4 “Na giyai i manga pista o Allah, a so di niyo dii katelabok sa soti a kalilimod a
mapeselasela iyo sii ko miyanga tetendo on a gawii.
5 “So Pista a Paska o Allah na magpoon ko perimon sii ko ikasapolo ago pat gawii ko
paganay a olanolan.
6 Na so ikasapolo ago lima gawii sangkoto bo a olanolan na aya poonan o Pista ko Kakan
sa Paan a da a Tapay ron. Sii ko soled o pito gawii na disomala a kekan iyo so paan a da
a tapay ron.
7 Sii ko paganay a gawii na talabok kano sa soti a kalilimod na di niyo penggolaolaa so
apiya antonaa a galebek iyo.
8 Oman gawii ko soled o pito gawii na pekasapaat kano ko Allah sa sapaat a petotongen.
Na sii ko ikapito gawii na talabok kano sa soti a kalilimod na di kano penggalebek sa
apiya antonaa."
So Kapelada ko Paganay a Miyaragon
10 “Teroa ngka ko manga Israil a: Amay ka somoled kano ko inged a imbegay aken
rekano ago peragonen iyo ron so pereperan iyo na kewit iyo ko imam so sabekes ko
paganay a miyaragon iyo.
11 Sii ko gawii ko oriyan o Gawii a Idedeke na peladen iyan ai ko Allah ko kibayaon iyan
on ko hadapan iyan kaan ai matarima rekano.
12 Sangkoto den a gawii na makapekorban kano ko Allah sa isepaat on a totongen a
satiman a nati a bilibili a saragon a idad iyan a da a daway niyan
13 A kirakes on so ipapaliyogat on a isepaat a pangenengken a dowa ka kilo a lebi a
mapiya a arina a sasaogan sa lana a olibi a peladen ko Allah a pekaokiten ko apoy, ago so
sapaat a panginginomen a isa ka litro a arak.
14 Di kano den pekakan sa bapiya antonaa sangkai a bago a pereperan apiya anda ko
mailaw, sindag aya pen o ba pimbaalan a paan taman sa di niyo mawit angkai a isepaat ko
Tohan iyo. Giyai na da a ikepos iyan a taritib para rekano taman ko langon a kebabadan
rekano apiya anda kano mababaling.
So Pista ko Kaperagon
15 “Sii ko gawii a kiyawita niyo ko sabekes a pereperan a inibayaw ko Allah, a giyoto so
gawii a tomiyalondog ko Gawii a Idedeke, na poon kano ron milang sa pito ka padian.
16 Sii ko ikalima polo gawii, a so gawii a kaipos o ikapito a Gawii a Idedeke, na
pekapalad kano ron sa bago a isepaat a pangenengken ko Allah.
17 Apiya anda kano mababaling na awid kano sa dowa timan a paan a pimbaalan a dowa
ka kilo a lebi a mapiya a arina a initinda a aden a tapay ron. Giyai na kepalad ko Allah ko
kibayaon on ko hadapan iyan a aya niyo ron ipesepaat ko paganay a miyaragon iyo.
18 Aya kirakes iyo ko paan na pito timan a nati a bilibili a sesaragon a idad iyan, ago
satiman a mama a sapi, ago dowa timan a mama a bilibili a langon da a daway niyan.
Giyangkai a manga ayam na pekorbanen a isepaat a totongen ko Allah a rakes o
ipapaliyogat on a manga sapaat a pangenengken ago panginginomen, na mamot ai a
isepaat ko Allah.
19 Makapekorban kano pen sa satiman a mandangan a isepaat sabap ko dosa, ago dowa
timan a nati a bilibili a sesaragon a idad iyan a isepaat pantag bo ko kanggiginawai.
20 Kekowa o imam angkai a manga nati a bilibili a rakes o paan na peladen iyan ai ko
Allah ko kibayaon iyan on ko hadapan iyan. Kisenggay ini a soti ko Allah, na bagian ai o
manga imam.
21 Sii den sangkoto a gawii na di kano penggalebek ka talabok kano sa soti a kalilimod.
Taritib ai a da ikepos iyan para rekano taman ko langon a kebabadan rekano apiya anda
kano mababaling.
22 “Igira a peperagonan ka so lopa a ka na di ngka nggeraba so pereperan sii ko manga
kilid iyan, aya pen o ba ngka osipa so miyalamba on. Samai ngka on so manga miskin
ago so manga mananangga. Saken so Allah a Tohan iyo.
So Pista ko Kapekaoniya ko manga Bogiyong
24 “Teroa ngka ko manga Israil a: So paganay a gawii ko ikapito a olanolan na gawii a
kandeke iyo. Mapeselasela ini ko kapemakaoniya ko manga bogiyong, na talabok kano
sa soti a kalilimod.
25 Da den a ba niyo ron mapenggalebek, ogaid na makapekorban kano ko Allah sa manga
isepaat a petotongen."
So Gawii a Kapepasa ko manga Dosa
27 “So ikasapolo gawii sangkai a ikapito a olanolan na Gawii a Kapepasa ko manga dosa.
Talabok kano sa soti a kalilimod, na powasa kano ron ago korban kano ko Allah sa
manga ipesepaat a petotongen.
28 Di kano penggalebek sangkai a gawii, ka giyai i gawii a kipenggolalanen ko
kakepapasa ko manga dosa niyo ko hadapan o Allah a Tohan iyo.
29 Apiya antawaa rekano i di pepowasa sangkoto a gawii na kebelag ko isa ka maginged
a Israil.
30 Saden sa nggalebek sa apiya antonaa sangkai a gawii na mbonoon ko.
31 Di kano ron makapenggalebek! Giyai na da a ikepos iyan a taritib para rekano taman
ko langon a kebabadan rekano apiya anda kano mababaling.
32 Gawii ai a tarotop a kandeke iyo, na makapepowasa kano ron ago pekadeke ipoon ko
perimon ko ikasiyaw gawii ko olanolan taman ko kaperimon iyan ko talondog a gawii."
So Pista ko manga Lawig
34 “Teroa ngka ko manga Israil a: Sii ko ikasapolo ago lima gawii sangkai a ikapito a
olanolan na ron ipagpoon so Pista ko manga Lawig a ipeselasela ko Allah ko soled o pito
gawii.
35 Sii ko paganay a gawii na talabok kano sa soti a kalilimod, na di kano penggalebek sa
apiya antonaa.
36 Oman gawii ko soled o pito gawii na korban kano sa isepaat a totongen sii ko Allah.
Sii ko ikawalo gawii na talabok kano sa soti a kalilimod na korban kano pen sa isepaat a
totongen sii ko Allah. Soti ai a kalilimod na di kano penggalebek sa apiya antonaa.
(37 “Giyai i manga pista a tindo o Allah a aya kapeselaselaa niyo ron na so di niyo dii
katelabok sa soti a kalilimod ago so kapesepaat iyo ko Allah sa manga sapaat a
pepakaokiten ko apoy, a so manga korban, manga pangenengken ago manga
panginginomen a paliyogat rekano ko oman gawii.
38 Mapeselasela angkai a manga pista a liyo ko manga Gawii o Allah a Idedeke, na
giyangkai a manga sapaat na liyo ko ipesepaat iyo a manga pamemegayan, ago so manga
pekorbanen a ipesepaat iyo sabap ko samaya, ago so iklas a manga ipesepaat iyo ko
Allah.)
39 “Na, tademi niyo a aya pegang angkai a Pista ko manga Lawig na so ikasapolo ago
lima gawii ko ikapito a olanolan oriyan o kiyaperagona niyo ko langon a pereperan ko
lopa iyo. Selaselaa niyo angkai a pista sii ko Allah ko soled o pito gawii. So paganay a
gawii ago so pen so ikawalo gawii na tarotop a kandeke iyo.
40 Sii ko paganay a gawii na pangowa kano sa lebi a mapiya a onga o manga kayo, ago
manga pakong o palmira, ago manga marimpoong a sapak o manga lolombay a kayo a
pepamangeto ko obay o lawasaig, na keriyala kano ko hadapan o Allah a Tohan iyo ko
soled o pito gawii.
41 Oman ragon sii ko ikapito a olanolan na selaselaa niyo angkai a pista ko Allah ko
soled o pito gawii. Taritib ai a da a ikepos iyan para rekano taman ko langon a kebabadan
rekano.
42 Sii ko soled o pito gawii na so langon o tenger a taw a manga Israil na sii pekabaling
ko manga lawig
43 Kaan katokawi o manga kebabadan rekano a piyamakakaden aken so manga Israil sii
ko manga lawig isako pakaliyon ko siran sa inged a Misir. Saken so Allah a Tohan iyo."
44 Giyanan i kiyapakitokawi i Mosa ko manga Israil ko mipantag ko miyanga tetendo a
pista a ipeselasela iran ko Allah.
LIBITIKOS 24
So Kapekibira ko manga Solo ko Petegoan sa Solo
2 “Sogoon ka ko manga Israil a witan ka iran sa lombos a lana a olibi a ipelana ko manga
solo a ndodoo ko Barombarong kaan lalayon mapepakasindaw.
3 Kibetad i Aron ko petegoan sa solo sii ko onaan o kortina a irerending ko Kaban sa
Kapasadan a matatago ko Lebi a Soti a Darpa ko Barombarong a dii Telabokan, na
lalayon iyan pepakasindaon so manga solo sii ko hadapan o Allah ipoon ko perimon na
taman ko kapita iyan. Giyai na da a ikepos iyan a taritib para rekano taman ko langon a
kebabadan rekano.
4 So manga solo ko lombos a bolawan a petegoan sa solo na disomala a itataros den a
kapekibira on kaan ai mapepakasindaw lalayon sii ko hadapan o Allah.
So Paan a Ibebetad ko Hadapan o Allah
5 “Kowa ka sa lebi a mapiya a arina na pangembaali ngka a sapolo ago dowa a manga
paan a nggagaisa ka kilo a arina a pagosaren ko oman i isa on.
6 Tagoa ngka ini sii ko hadapan o Allah sii ko lamisaan a lalapisan sa lombos a bolawan.
Rantara ngka sa dowa koyog a ndenem oman i sakoyog.
7 Pametadi ngka sa lombos a doka so obay o oman i sakoyog a paan. Pekisapaat ka
angkai a doka a petotongen ko Allah a iseliyo ko paan ago aya den toos a so
kalangolangon iyan na isesenggay ko Allah.
8 Giyangkai a paan na disomala a lalayon ipembetad ko hadapan o Allah ko oman Gawii
a Idedeke a aya den kapetomana o manga Israil ko da a kaposan iyan a kapasadan.
9 Rek den ai i Aron ago so manga wata iyan na sii ran kekan ko darpa a soti, ka kagiya
lebi ini a soti sii ko lalayon iran dii mambagian ko manga pamemegayan a ipesenggay ko
Allah."
Ladiyawan ko Ontol a Daneg
10 Samaoto na aden a mama a aya ina iyan na babay a taw sa Israil ago aya ama iyan na
Imisiren. Na roo ko kampo o manga Israil na minimbono iyan so ped a mama a taw sa
Israil.
11 Sii ko di iran dii kambono na so mama a wata o babay sa Israil na piyagitowito ago
inisinta iyan so Ingaran o Allah. Sabap roo na inowit iran ki Mosa. (Aya ngaran o ina
iyan na si Silomit a wata i Dibri a ped ko mbatabataa a Dan.)
12 Na tiyangan iran sekaniyan taman sa mapayag kiran so kabaya o Allah a ikokom
rekaniyan.
14 “Wita ngka ko liyo o kampo so misinta na pakidapeneti ngka a olo niyan ko langon a
taw a miyamakaneg rekaniyan, na so langon o isa ka maginged na pekarobak on a ator.
15 Na teroa ngka ko manga Israil a 'Apiya antawaa i sinta ko Tohan iyan na kesala,
16 Na apiya antawaa i magitowito ko Ingaran o Allah na disomala a mbonoon. So langon
o isa ka maginged a Israil na pekarobak on a ator. Apiya anda ko rait o di na tenger a taw
a magitowito ko Ingaran o Allah na kebono.'
17 “Apiya antawaa i mono sa taw na mbonoon mambo,
18 Na apiya antawaa i mono sa ayam o ped a taw na kesambian iyan so miyapatay niyan - aya imbayad ko kaoyagoyag na kaoyagoyag.
19 “Apiya antawaa i binasaan iyan so ped a taw na saden sa kiyabinasai niyan ko ped na
mapenggolaola rekaniyan mambo.
20 So lepo na mbayadan a lepo, so mata na mbayadan a mata, na so ngipen na mbayadan
a ngipen. So den so kiyabinasai niyan ko ped na aya on mambo ikidia.
21 Apiya antawaa i mono sa ayam na makapendiyat sa ayam, ogaid na apiya antawaa i
mono sa manosiya na paliyogat a mbonoon mambo.
22 Ndatar sa taritib so rait ago so tenger a taw. Saken so Allah a Tohan iyo."
23 Kagiya mapasad ai tero i Mosa ko manga Israil na inowit iran ko liyo o kampo so taw
a misinta na riyobakan iran sekaniyan a ator a so den so inisogo o Allah ki Mosa.
LIBITIKOS 25
So Ragon a Idedeke
Roo ko Palaw a Sinay na pitero o Allah ki Mosa a
2 “Teroa ngka ko manga Israil a: Amay ka makasoled kano ko inged a imbegay aken
rekano na apiya so lopa na mapekadeke iyo ko saragon ko oman ikapito ragon a
ipepagadat iyo ko Allah.
3 Sii ko soled o nem ragon na kapepamamolaan iyo so manga lopa iyo ago ketayongan
iyo so manga asinda niyo a obas ago makaperoropo kano ko manga onga niyan.
4 Ogaid na sii ko ikapito ragon na mapekadeke sa tarotop so lopa, a giyai na ragon a
isesenggay ko Allah. Di niyo pemolai so manga lopa iyo aya pen o ba niyo tayongi so
manga asinda niyo a obas.
5 Di niyo peragona so ba on den miyamangeto a pereperan aya pen o ba niyo ropoa so
manga obas ko da niyo katayongi a manga waged a obas. Ragon ai a tarotop a kandeke o
lopa.
6 Na sii sangkai a ragon a kadedeke o lopa na so miyaori a miyaragon iyo ron na pekaper
rekano -- seka ago so oripen ka a mama ago babay, ago so sosokayan ka a gomagalebek,
ago so mananangga a tomatapi rekano,
7 Taman den ko manga pangangayamen ka, ago so manga iila a binatang a matatago ko
lopa a ka. Apiya antonaa i kionga o lopa na kekan.
So Ragon a Kapakaasal
8 “Bilang kano sa makapito ragon a idedeke maana a makapito matakep so pito ragon;
giyanan na pat polo ago siyaw ragon langon.
9 Na sii ko ikasapolo gawii ko ikapito olan, a so Gawii a Kapepasa ko Dosa, na
pakaoniya niyo sa matanog so manga bogiyong sii sa dalem a inged.
10 Senggain iyo a soti angkai a ikalima polo ragon na go niyo panawatewagen so
kapemaradikaa ko langon a kibabaling ko dalem a inged. Giyai na Ragon a Kapakaasal
para rekano; so langon a lopa a miyapesa na kikasoy ko asal a kikawali ron, na apiya
antawaa i miyapesa a oripen na pekakasoy ko manga tonganay niyan.
11 Giyangkai a ikalima polo ragon na Ragon a Kapakaasal para rekano; di niyo pemolai
so lopa iyo aya pen o ba niyo peragona so ba on den miyamangeto, na di niyo peropoa so
manga obas ko da niyo katayongi a asinda.
12 Soti rekano angkai a Ragon a Kapakaasal; na aya bo a kekan iyo na so miyaori a
miyaragon ko lopa.
13 “Sii sangkai a Ragon a Kapakaasal na so langon a lopa a miyapesa na kikasoy ko asal
a kikawali ron.
14 O makapesa ka sa lopa ko ped ka a Israil, o di na makapamasa ka on na di pelabiti o
oman i isa so ped iyan.
15 Paliyogat a aya ipegarga ko lopa na mipepasod ko miyalamba a manga ragon a
kepakay a kapeperagonan ai sa pereperan ko di pen kakeoma o Ragon a Kapakaasal, a so
ikalima polo ragon.
16 Amay ka madakel pen a lamba on a manga ragon a da on kaomai na mala mambo so
arga iyan ogaid na amay ka maito bo na maito mambo a kibayad on, ka kagiya aya bo a
mapepesa na so kadakel o maperagon on.
17 Di kano pelalabita, ka kaleken iyo baden so Tohan iyo. Saken so Allah a Tohan iyo.
18 “Piyapiyai niyo tomoman so manga taritib ago so manga kokoman aken na
makapeginetaw kano a malilinding sii ko inged.
19 Samaoto na ipagonga o lopa so madakel a pereperan, na pekakan kano ago penga
oosog sa da a ba rekano pekabinasa ko kapepeginetaw niyo ron.
20 Na opama ka ipagise iyo a 'Antonaa i ken tano sii ko ikapito ragon o di tano pamola,
aya pen o ba tano maperagon so manga pereperan tano?'
21 Sii ko ikanem ragon na perakmatan ko sekano sa mala, na keragonan so lopa sa
pereperan a pekaper rekano ko soled o telo ragon.
22 Sii ko kapemola niyo ko ikawalo ragon na pekakan kano pen ko andang a miyaragon
iyo ko ikanem ragon, na kitaros iyo so kapekena niyo ron taman pen ko ikasiyaw ragon a
iperagon iyo.
So Kikasowin ko manga Tamok
23 “So lopa na di mapepasa a ba rek den o makapamasa on sa dayon sa dayon ka kagiya
saken i kirek ko lopa, na sekano na matag on manga mananangga ago manga ogopa aken.
24 “Sii ko dalem a inged a matatangan iyo na igira a miyapesa so lopa na disomala a
peroa niyo a kakeaona on o asal a kirek on.
25 O aden a taw sa Israil a miyamiskin ago miyapepasa niyan so lopa iyan na so madaseg
a tonganay niyan na keaon iyan so miyapesa o pagari niyan.
26 Na o da den a ba niyan tonganay a pekaaon on ogaid na miyakapiya sekaniyan i
bobolos ago aden a kiyatangkaan a pirak iyan a kiaon iyan ko lopa
27 Na keitong iyan so bali o kapegosara on ipoon ko ragon a kiyapesaa niyan on. Na
kelebat iyan ai ko minibayad rekaniyan o miyakapamasa on na kikasoy niyan on so lamba
on. Oriyan iyan na pekakasoy ko asal a kirek on so lopa iyan.
28 Ogaid na o di niyan kebaog a kapagaona niyan on na matatangan den o miyakapamasa
on taman ko Ragon a Kapakaasal, na sii sangkoto a ragon na kikasoy so lopa ko asal a
kirek on.
29 “O aden a pepasa sa walay a matatago ko siti a malilibet a pangeleban na aden a
kabenar iyan sa kapagaona niyan on ko soled o saragon oriyan o kiyapesaa niyan on. Sii
sangkoto a masa na keaon iyan.
30 Ogaid na o di maaon ko soled o saragon na so walay a matatago ko siti a malilibet a
pangeleban na ketatap a rek den o miyakapamasa on ago so manga moriyataw niyan. Di
ini kikasoy ko Ragon a Kapakaasal.
31 Ogaid na so manga walay a matatago ko pagingedingedan a kena a ba malilibet a
pangeleban na kibilang ai a datar o pangomaan. Keaon ai na paliyogat a kikasoy ko asal a
kirek on ko Ragon a Kapakaasal.
32 Ogaid na so manga Libitiyo na lalayon iran kabenar so kakeaona iran ko manga walay
a matatago ko manga siti a isesenggay kiran.
33 O mipesa so Libitiyo sa walay a matatago ko siti niyan ago da niyan ai aona na kikasoy
ini rekaniyan sii ko Ragon a Kapakaasal ka kagiya so manga walay sii ko manga siti o
manga Libitiyo na aya iran kawali sii ko manga Israil.
34 Ogaid na so manga lopa a pananateba sii ko dair o manga siti ran na di den mapepesa.
Rek iran ai sa dayon sa dayon.
So Kaogopi ko manga Miskin
35 “O aden a tonganay ngka a miyamiskin ago di niyan keper a ginawa niyan na ogopi
ngka sekaniyan na pakatapia ngka a datar o mananangga.
36 Di ngka pentoni sa tobo, ka kaleken ka baden so Allah na pakakadena ngka sekaniyan
sii reka.
37 Di niyo pegotangi sa ba pepakaisega aya pen o ba ngka pesai sa pangenengken a
pelabaan ka.
38 Saken so Allah a Tohan iyo a aya rekano miyakaliyo sa Misir kaan aken rekano
mibegay so inged a Kanaan ago an ako mabaloy a Tohan iyo.
So Kamaradikaa ko manga Oripen
39 O aden a isen ka a Israil a miyamiskin ago miyapesa niyan reka a ginawa niyan na di
ngka pakapenggalebeka a datar o oripen,
40 Ka sayanen ka baden sa sosokayan a gomagalebek o di na matag tomatareg reka.
Makapenggalebek sekaniyan reka taman ko Ragon a Kapakaasal,
41 Na sa masa oto na kemaradika sekaniyan a rakes o manga wata iyan na pekakasoy
siran ko manga tonganay iran ago sii ko kawali o manga apo iran.
42 So manga Israil na manga oripen aken a piyamakaliyo aken sa inged a Misir; sabap san
na di siran den mapepasa a oripen.
43 Di ngka siran pendatoi sa kapangarasi, ka kaleken ka baden so Tohan ka.
44 “So manga oripen iyo na disomala a sii pekapoon ko manga nasiyon ko melilibeta
rekano; sii kano kiran makapemasa sa manga oripen.
45 Makapemasa kano pen sa manga oripen poon ko manga mananangga a kibabaling
rekano o di na poon ko manga pamiliya iran a inimbabawata sii ko inged iyo, na kebaloy
siran a rek iyo.
46 Na kepakay a itenan iyo siran ko manga wata iyo a makewali ran; na
mapengongoripen iyo siran sa taman sa kapatay iran. Ogaid na di niyo pagiringen a datar
ai so isen iyo a manga Israil aya pen o ba niyo pangarasii.
47 “O kewasa so isa a mananangga a mababaling rekano ago mamiskin so ped ka a Israil
ago pesaan iyan a ginawa niyan sangkoto a mananangga o di na sii ko isa a tonganay
niyan
48 Na kepakay a maaon sekaniyan oriyan o kiyapesaa on. Isa ko manga tonganay niyan i
pekaaon on;
49 So bapa iyan o di na tenged iyan o di na apiya antawaa ko madaseg a manga tonganay
niyan i pekaaon on, o di na o kegaga niyan na keaon iyan a ginawa niyan.
50 Sekaniyan ago so miyakapamasa on na kebilang iran so manga ragon ipoon ko
kiyapesaa niyan sa ginawa niyan taman ko Ragon a Kapakaasal, na aya kiaon rekaniyan
na mipepasod ko ipesokay ko sosokayan a gomagalebek sii ko kadakel angkai a manga
ragon.
51-52 O madakel pen a manga ragon a da pen kaomai ko Ragon a Kapakaasal na mala
mambo a bagi ko arga a minipamasa rekaniyan a kibayad iyan a kiaon ko ginawa niyan.
Ogaid na o maito bo a lamba a manga ragon na maito mambo a pirak a kiaon iyan ko
ginawa niyan a makaaayon ko kadakel angkai a manga ragon
53 A datar o ba gomagalebek sekaniyan a dii pakanggalebeken a kaseragona a kapasadan.
Na disomala a inengkaan iyo a so mananangga a aya kirek on na di niyan sekaniyan
kapengarasiyan.
54 O di sekaniyan maaon ko da pen kaomai ko Ragon a Kapakaasal na kemaradika
sekaniyan ago so manga wata iyan sangkoto den a ragon.
55 Ka kagiya so manga Israil na rek aken a manga oripen; manga oripen aken siran a
piyakaliyo aken sa inged a Misir. Saken so Allah a Tohan iyo.
LIBITIKOS 26
So manga Rakmat ko Kapeparatiyaya
"Di kano pengembaal sa manga katohanan o di na manga barahala ago di niyo
pemakatindega so manga polaos o di na piyamangokiran a manga ator a ba niyo pesimbaa
sii ko inged iyo. Saken so Allah a Tohan iyo.
2 Selaselaa niyo so manga Gawii aken a Idedeke ago pagadati niyo so darpa a pesimbaan
raken.
3 “O nggolalanen iyo so manga taritib aken ago piyapiyaan iyo tomoman so manga
sogoan aken
4 Na mbegan ko sekano sa oran ko oman i mosim iyan, na keragonan so lopa sa
pereperan ago pemangonga so manga kayo.
5 So kapeperagon iyo sa pereperan na iperaot ko kaperoropo iyo sa manga obas, na so
kaperoropo iyo sa obas na iperaot ko kaseod iyo sa oniin. Pekakan kano sa taman den sa
kabaya iyo na penga oosog kano ago makapeginetaw kano sa da a ba rekano pekabinasa.
6 “Mbegan ko sekano sa kalilintad sii ko inged iyo kaan kano pepekatorog a da a ba niyo
ikelek. Mbogaon ko so piyakalekelek a manga binatang ko manga lopa iyo, na di den
sagaden a katidawa so inged iyo.
7 Penalobaan iyo so manga ridoay niyo na pemonoon iyo siran a manga pedang.
8 So lima rekano na makapenaloba sa magatos kiran, na so magatos rekano na
makapenaloba sa sapolo nggibo kiran.
9 Ikelimo aken sekano ago pagodaren aken, ago pakapendakelen ko sekano, na itoman
aken so kapasadan aken sii rekano.
10 Di niyo kelengan koman so andang a miyaragon iyo ko miyaipos a ragon, ka kailangan
a kilebeden iyo ko lamba on kaan mamin so bago a pereperan ko tataliyongan iyo ron.
11 Sii aken rekano tegoa so kedenan ko na di aken sekano den telikodan.
12 Mipageepeda aken sekano; kebaloy ako a Tohan iyo, na kebaloy kano a manga pagtaw
aken.
13 Saken so Allah a Tohan iyo a miyakaliyo rekano sa Misir kaan kano mapokas ko
kaooripeni rekano o manga Imisiren. Piyotol aken so potaw a inikokoong rekano kaan
kano pepekalalakaw a makapepangandag.
So Indaneg ko di Kaparatiyaya
14 “Ogaid na o di ako niyo pakinega ago di niyo tomanen so langon angkai a sogoan
15 Ago isili niyo so manga taritib aken ago ongkiren iyo so manga kokoman aken ago
sogoken iyo so kapasadan aken
16 Na giyai i ikidia ko rekano: pagowitan ko sekano sa piyakalekelek a kabinasaan, ago
rayor a paniyakit, ago manga mayaw a ikebinasa o manga mata niyo ago ikeilang o
niyawa niyo. Da a lalaw a kaseodi niyo ko lopa iyo ka so manga ridoay niyo i pekakan ko
maperagon on.
17 Makiperidoay ako rekano na tebanen kano o manga ridoay niyo. So pepanga gogowad
rekano na aya rekano makapendato, na pemalagoy kano apiya pen o da a ba rekano dii
seloba.
18 “Apiya pen mitana aken rekano ini langon na o di ako niyo pen pamakinega na
makapito matakep a karegen o ipendaneg aken rekano sabap ko manga dosa niyo.
19 Mbinasaan ko so mategas a katatakabor iyo ka di aken pekioranan so inged iyo, na
pemakategas so lopa iyo a lagid o tombaga.
20 Da a lalaw a kapepanamar iyo nggalebek, ka di keragonan so lopa iyo sa pereperan aya
pen o ba mamangonga so manga kayo niyo.
21 “O ipeteros iyo baden so kapegongkira niyo raken ago di ako niyo den pemakinegen
na pelonsanan aken sekano domaneg sa makapito matakep a badal o manga dosa niyo.
22 Pekigobat aken sekano ko manga wawaraw a binatang na pemonoon iran so manga
wata iyo ago polangen iran so manga pangangayamen iyo, na pepekaito kano taman sa
keawaan sa taw so manga lalan iyo.
23 “O di rekano pen milalang angkai a manga daneg ka itataros iyo baden so kaperidoa
niyo raken
24 Na itataros aken mambo a kariridoa ko rekano na makapito pen matakep a karegen o
ipendaneg aken rekano sabap ko manga dosa niyo.
25 Pekiwitan ko sekano sa katidawa ka iseop aken so kiyabarobaa niyo ko kapasadan
aken sii rekano. Na o mamalagoy kano ko manga siti niyo na pagowitan ko sekano ron sa
manga paniyakit, na kepalad kano ko kapaar o manga ridoay niyo.
26 Potolen ko so kapepekakowa niyo sa pangenengken; sabap sii na kepakay a so sapolo
a manga babay na kitinda iran so maito a manga paan iran sii ko sasatiman bo a pogon,
Tekesen iran so paan a ipembegay iran rekano, na apiya makakan kano sii langon na di
kano ron keosog.
27 “Amay ka maipos ai langon na o di ako niyo pen pakinega ago peperidoon ako niyo
pen
28 Na pakapemborngaten ko rekano so somosokeyaw a rarangit aken ko kaperidoa ko
rekano na makapito matakep a kapelonsani ko rekano domaneg sabap ko manga dosa
niyo.
29 Kekan iyo so sapo o manga wata iyo a manga mama ago manga babay.
30 Mbinasaan ko so manga darpa iyo a pesimbaan ko manga barahala, ago nggebaan ko
so manga aparan iyo a petotongan sa doka, na ipemaraser aken so manga bangkay niyo ko
liyawaw o miyanga tetempag a manga barahala niyo, na ikengingiri aken sekano.
31 Pelaslasen ko so manga siti niyo ago mbinasaan ko so manga darpa iyo a
pemanimbaan, na di aken den terimaan so mamot a ipesepaat iyo.
32 Sabap ko tarotop a kapelaslasa ko ko inged iyo na apiya so manga ridoay niyo a keden
roo na pememesa ko kakeilaya iran on.
33 Iperak aken sekano ko manga nasiyon na ipenaloba aken rekano so pedang aken.
Keawaan so inged iyo ago penga gegeba so manga siti niyo.
34-35 Na sii ko masa a kaaawai niyo ron sii ko kitataogen rekano ko inged o manga
ridoay niyo na pekadeke so lopa iyo ago ipekapiya niyan so tarotop a kandeke iyan a da
niyo ron mibegay ko oman makapito ragon sii ko kababaling iyo ron pen.
36 So makapantag ko miyamakapagoyag rekano sii ko manga inged o manga ridoay niyo
na tanto aken a sewanen so manga poso iran kaan apiya so pogipit o manga raon a
pesemberen o ndo na ipekelek iran, na pemalagoy siran a datar o ba pepamalagoy ko
katidawa, na penga ooteng siran apiya pen da a ba kiran peseloba.
37 Pemangirepang so oman i isa ko ped iyan sii ko kapemalagoy iran a datar o ba
peselobaan siran a pedang, na di kano den pekaato ko manga ridoay niyo.
38 Pematay kano sii ko ped a manga nasiyon, na penga lalamed kano o lopa o manga
ridoay niyo.
39 Na so kelamba rekano na penga dadadas sii ko inged o manga ridoay niyo sabap ko
manga dosa niyo ago so manga dosa o manga apo iyo.
40 “Ogaid na sii sa moripori na terimaan o manga pagtaw aken so kadostaan iran ago so
kadostaan o manga apo iran sii ko kiyaongkira ago kiyaridoa iran raken
41 A aya kiyasabapan ko kiyaridoa ko kiran ago so kinitaogen ko kiran ko inged o manga
ridoay iran. Sa masa oto na amay ka minidaneg kiran den so manga dosa iran na
ipengalimbabaan iran so di peratiyaya a manga poso iran.
42 Na tedeman ko so kapasadan aken ki Yakob ago si Iskak ago si Ibrahim na ipemataan
aken so initopa ko kiran mipantag ko lopa.
43 Ogaid na disomala a pekaawaan siran pasin ko lopa kaan ai mapakapiya ko
kapakadedeke iyan sii ko kaaawai ran on, na itena kiran so manga dosa iran ko kinisilin
iran ko manga kokoman aken ago so kiyasodiya iran ko manga taritib aken.
44 Apiya pen oto na sii ko kasisii ran pen ko inged o manga ridoay iran na di aken siran
ipendarainon aya pen o ba aken siran talikodi sa kapolanga ko kiran, ka ikepos ai o
kapasadan aken kiran, na saken so Allah a Tohan iran.
45 Ogaid na sabap kiran na tedeman ko so kapasadan aken ago so manga apo iran a
miyapamakaliyo aken sa Misir sii ko kamamasai ron o manga nasiyon kaan saken, a so
Allah, na mabaloy a Tohan iran."
46 Langon ai na manga taritib, manga kokoman ago manga sogoan a inibegay o Allah ko
manga Israil a miyakanggolalan ki Mosa sii ko Palaw a Sinay.
LIBITIKOS 27
Manga Taritib mipantag ko Samaya a Tindos a Pamemegayan ko Allah
2 “Teroa ngka ko manga Israil a: O aden a semaya sa tindos sa kisenggain iyan ko isa a
taw sii ko Allah a nggolalan ko kapalada niyan ko datar iyan sa bali
3-7 Na giyai i pirak a imbadal ko taw a pekaokiten ko timbangan sii ko Barombarong:
so mama a miyakapagidad sa dowa polo ragon taman ko nem polo ragon na lima polo a
pelata a pirak; so babay na telo polo a pelata a pirak;
so mama ipoon ko lima ragon a idad iyan taman sa dowa polo ragon na dowa polo a
pelata a pirak; so babay na sapolo a pelata a pirak;
so mama ipoon ko saolan a idad iyan taman sa lima ragon na lima timan a pelata a
pirak; so babay na telo timan a pelata a pirak;
so mama a miyakapagidad sa nem polo ragon ago lawan pen na sapolo ago lima a
pelata a pirak; so babay na sapolo a pelata a pirak.
8 O aden a misemaya sa taw a di niyan kebaog so miyatendo on a arga na kewit iyan ko
imam so taw a inisemaya iyan na so imam i pekabetad on sa bali niyan a makaaayon ko
kakebaoga on o mama a misemaya.
9 “O aya minisemaya iyan na ayam a kepakay a isapaat ko Allah na kebaloy ai a
isesenggay ko Allah.
10 Di niyan kesambian angkai a ayam apiya anda ko lebi pen a mapiya so isembi iyan on
o di na marata. Ogaid na o sambii niyan ai sa salakaw a ayam na palaya den ai kisenggay
ko Allah.
11 O so ayam a inisemaya iyan na karam a di sak a isepaat ko Allah na kewit iyan ai ko
imam
12 Na pagargaan iyan ai a mipepasod ko kapiya o di na karata o ayam, na saden sa
ipagarga on o imam na giyanan den i arga iyan.
13 Na o kabaya o misemaya ko ayam a imbegay niyan baden so imbadal on a pirak na
kioman iyan on so ikalima bagi ko arga iyan.
14 “O aden a taw a isenggay niyan so walay niyan a rek o Allah na so imam i pekakokom
on o mapiya o di na kena a ba mapiya, na saden sa ipagarga iyan on na giyoto den i arga
iyan.
15 Na o kabaya o taw a imbegay niyan baden so imbadal on a pirak na kioman iyan on so
ikalima bagi ko arga iyan.
16 “O aden a taw a isenggay niyan ko Allah so ped ko lopa a miyakewali niyan na so bali
niyan na kipasod ko kala o kisaod on a oniin na aya arga o dowa gatos ka gantang a
bantad na sapolo a pelata a pirak.
17 O mitabo ko Ragon a Kapakaasal so kisenggain iyan ko Allah sangkoto a lopa na di
den kealin so tarotop a bali niyan.
18 O aya kisenggain iyan on na maipos so Ragon a Kapakaasal na kearga ini o imam a
mipepasod ko kadakel o ragon a miyalamba taman ko talondog a Ragon a Kapakaasal, na
kelebatan so tarotop a arga iyan.
19 Amay ka so taw a sominggay ko lopa na kebayaan iyan maon na kioman iyan on so
ikalima bagi ko arga iyan na ketangan iyan den peroman.
20 Ogaid na o di niyan aona so lopa ago ba niyan den pesaa ko ped a taw na di den ai
keaon.
21 Na amay ka makaoma so talondog a Ragon a Kapakaasal na pembaloy so lopa a soti a
isesenggay ko Allah, na kerek ai o manga imam.
22 “O aden a taw a senggay ko Allah sa lopa a miyapamasa niyan a kena a ba ped ko
miyakewali niyan
23 Na kearga ini o imam a ipepasod ko manga ragon taman ko Ragon a Kapakaasal, na
disomala a kebayadan o mama so arga iyan sii den sangkoto a gawii ka isenggay ini a rek
o Allah. Ogaid na sii ko Ragon a Kapakaasal na ikesoy angkoto a lopa ko asal a kirek on
a ron iyan miyapamasa.
25 “So kapegargaa o imam ko langon ai na mipepasod ko pirak a pepekaokiten ko
timbangan ko Barombarong.
26 “Di kepakay o ba senggain ko Allah so popaw sa lawas o manga ayam ka kagiya so
popaw sa lawas iran na andang den a rek iyan apiya anda ko sapi, bilibili o di na kambing.
27 Ogaid na so popaw sa lawas o karam a ayam na keaon ko matetendo a arga iyan a
kioman on pen so ikalima on bagi. O di ini pagaona na mapepasa o imam ko ipagarga on.
28 “Ogaid na apiya antonaa a rek o taw a taman sa pakataman a kinisenggain iyan on ko
Allah, apiya anda ko taw, ayam, o di na lopa a miyakewali niyan na di ini mapepasa aya
pen o ba maaon; so langon taman a inisenggay ko Allah sa datar ai na rek iyan sa taman
sa pakataman.
29 Saden sa taw a minisenggay ko kambinasaa on na di den keaon; paliyogat a mbonoon
sekaniyan.
30 “Rek o Allah so ikasapolo bagi ko langon taman a pekeragon iyo apiya anda ko
pereperan a poon ko lopa iyo o di na manga onga a poon ko kayo; isesenggay ini ko
Allah.
31 O kebayai maon o mama so ped ko ikasapolo bagi iyan na kioman iyan on so ikalima
bagi ko arga iyan..
32 So isa ko oman i sapolo a ayam a sapi, bilibili o di na kambing na rek o Allah. Igira a
pembilangen so manga ayam na so oman i ikasapolo on na kisenggay ko Allah.
33 So kirek ko manga ayam na di on mapeparo o ba niyan pen pariksaa o mapiya o di na
marata angkai a ayam, aya pen o ba niyan kasambii. O sambii niyan na so siyambian iyan
ago so inisambi iyan on na palaya den ai pembaloy a soti a isesenggay ko Allah ago di
den keaon.
34 Giyai i manga sogoan a inibegay o Allah ki Mosa roo ko Palaw a Sinay para ko manga
Israil.
MANGA BILANGAN
MANGA BILANGAN 1
So Paganay a Kiyabilanga ko manga Israil
Sii ko paganay a gawii ko ikadowa olan ko ikadowa ragon oriyan o kiyapakaawa o manga
Israil sa Misir na sisii so manga Israil ko Disirto sa Sinay. Na miyakimbitiyarai so Allah
ki Mosa sii ko Barombarong a dii Telabokan a tig iyan a
2-3 “Bilanga niyo ago si Aron so langon a taw ko isa ka maginged a Israil a nggolalan ko
oman i mbatabataa ago oman i pamiliya. Pelilistaan iyo so manga ngaran o langon a
mama a miyakapagidad sa dowa polo ragon ago lawan pen a kepakay a makasondaro ko
katidawa.
4 Oman i isa ka mbatabataa na pekapoon on so sesakataw a mama a olowan ko pamilya a
pekaogop rekano.
5-15 Giyai i manga ngaran o manga mama a miyapili sangkai a galebek:
Si Ilisor a wata i Sidiyor a poon ko mbatabataa a Robin,
si Silomiyal a wata i Sorisiyaday a poon ko mbatabataa a Simiyon,
si Nasiyon a wata i Aminadab a poon ko mbatabataa a Yodah,
si Nitanil a wata i Sowar a poon ko mbatabataa a Isakar,
si Iliyab a wata i Hilon a poon ko mbatabataa a Sibolon,
si Ilisiyama a wata i Amihod a poon ko mbatabataa a Ipraim a wata i Yosop,
si Gamaliyal a wata i Pidasor a poon ko mbatabataa a Manasih a wata i Yosop,
si Abidan a wata i Gidiyoni a poon ko mbatabataa a Baniyamin,
si Ahiyasir a wata i Amisiyaday a poon ko mbatabataa a Dan,
si Pagiyal a wata i Okran a poon ko mbatabataa a Asir,
si Iliyasap a wata i Diyowil a poon ko mbatabataa a Gad,
ago si Ahira a wata i Inan a poon ko mbatabataa a Naptali.
16-17 Piyakaonot i Mosa ago si Aron angkai a sapolo ago dowa a manga olowan
18 Na tinimo iran so langon o isa ka maginged sii ko paganay a gawii ko ikadowa olan na
binilang iran so manga taw ko oman i mbawataan ago pamiliya sii ko oman i mbatabataa.
Miyamangilista so manga ngaran o langon a mama a miyadowa polo ragon a idad iyan
ago lawan pen.
19 Binilang siran i Mosa roo ko Disirto sa Sinay a so den so inisogo on o Allah.
20-46 Giyai i kadakel o kepakay a makasondaro a manga mama a miyadowa polo ragon a
idad iyan ago lawan pen a miyamakapoon ko oman i mbawataan ago pamiliya iran:
Pat polo ago nem nggibo ago lima gatos a poon ko mbatabataa a Robin a kaka a wata i
Yakob,
Lima polo ago siyaw nggibo ago telo gatos a poon ko Simiyon,
Pat polo ago lima nggibo ago nem gatos ago lima polo a poon ko Gad,
Pito polo ago pat nggibo ago nem gatos a poon ko Yodah,
Lima polo ago pat nggibo ago pat gatos a poon ko Isakar,
Lima polo ago pito nggibo ago pat gatos a poon ko Sibolon,
Pat polo nggibo ago lima gatos a poon ko Ipraim a wata i Yosop,
Telo polo ago dowa nggibo ago dowa gatos a poon ko Manasih a wata i Yosop,
Telo polo ago lima nggibo ago pat gatos a poon ko Baniyamin,
Nem polo ago dowa nggibo ago pito gatos a poon ko Dan,
Pat polo ago isa nggibo ago lima gatos a poon ko Asir,
Lima polo ago telo nggibo ago pat gatos a poon ko Naptali
Aya kadakel iran langon na nem gatos ago telo nggibo ago lima gatos ago lima polo.
47 Ogaid na so manga taw ko mbatabataa a Libi na da mirakes ko kiyabilanga kiran
48 Ka miyatero den o Allah ki Mosa a
49 “Amay ka mabilang ka so manga taw sa Israil na di ngka on perakesen milang so
mbatabataa a Libi.
50 Ka pakikibiren ka kiran baden so Barombarong a pembetadan ko Kaban sa Kapasadan
ago so langon o manga pagigimo ron ago manga kasangkapan. Siran i pepekaawid ko
Barombarong ago so manga pagigimo ron sii ko kapelalakaw niyo, na siran i pepekaipat
on ago dii makakempo ko melilibeta on.
51 Igira a ipepegogalin so Barombarong na so manga taw ko mbatabataa a Libi i
pepekatimo on, na igira a pembangonen na siran i pepekatindeg on. Apiya antawaa a
salakaw a taw i mobay ron na disomala a mbonoon.
52 So ped ko manga Israil na dii makakempo a dii melompolompok a so oman i
mbatabataa na sii ko rek iran a darpa ko atag o pandi iran.
53 Ogaid na so manga taw ko mbatabataa a Libi na dii kempo ko melilibeta ko
Barombarong a pembetadan ko Kaban sa Kapasadan sa kapepagipata iran on kaan da a
makadaseg on a salakaw a kesabapan ko kitanaan o Allah ko rarangit iyan ko isa ka
maginged a Israil.
54 Na so den so langon a inisogo o Allah ki Mosa i pinggolaola o manga Israil.
MANGA BILANGAN 2
So Kapakambebetad o manga Mbatabataa sii ko Kampo
2 “So manga Israil na makapekempo sii ko melilibeta ko Barombarong a dii Telabokan a
malo siran on makawawatan, so oman i isa kiran na sii ko atag o toos o lompok iyan ago
so pandi o pamiliya niyan.
3-4 Sii sa tampar sa sebangan o Barombarong na ron dii makakempo so lompok o Yodah
a aya matatago on na so manga mbatabataa a Yodah, Isakar ago Sibolon. Aya olowan o
mbatabataa a Yodah na si Nason a wata i Aminadab, na aya kadakel o manga sondaro
niyan na pito polo ago pat nggibo ago nem gatos.
5 So mbatabataa a Isakar na makapekempo a telondog kiran. Aya olowan iran na si
Nitanil a wata i Sowar,
6 Na aya kadakel o manga sondaro niyan na lima polo ago pat nggibo ago pat gatos.
7 So mbatabataa a Sibolon na aya kiran talondog. Aya olowan iran na si Iliyab a wata i
Hilon,
8 Na aya kadakel o manga sondaro niyan na lima polo ago pito nggibo ago pat gatos.
9 So langon o manga sondaro sii ko lompok o Yodah na magatos ago walo polo ago nem
nggibo ago pat gatos. Siran i pekaona gomanat ko kapelalakaw.
10-11 Sii sa pagabagatan na ron dii makakempo so lompok o Robin a aya matatago on na
so manga mbatabataa a Robin, Simiyon ago Gad. Aya olowan o mbatabataa a Robin na
si Ilisor a wata i Sidiyor, na aya kadakel o manga sondaro niyan na pat polo ago nem
nggibo ago lima gatos.
12 So mbatabataa a Simiyon na makapekempo a telondog kiran. Aya olowan iran na si
Silomil a wata i Sorisaday,
13 Na aya kadakel o manga sondaro niyan na lima polo ago siyaw nggibo ago telo gatos.
14 So mbatabataa a Gad na aya kiran talondog. Aya olowan iran na si Iliyasap a wata i
Diyowil,
15 Na aya kadakel o manga sondaro niyan na pat polo ago lima nggibo ago nem gatos ago
lima polo.
16 So langon o manga sondaro sii ko lompok o Robin na magatos ago lima polo ago isa
nggibo ago pat gatos ago lima polo. Siran i ikadowa a pengganat ko kapelalakaw.
17 Aya tomalondog kiran a pengganat na so manga taw ko mbatabataa a Libi a
pepekaawid ko Barombarong a dii Telabokan. Pekalalakaw siran sii ko pageletan o dowa
lompok a maoona kiran ago so dowa on lompok a sii sa oriyan. So langon o manga
mbatabataa na aya kapakatotondotondog iran lomalakaw na ipepasod ko kapakambebetad
iran ko manga lompok iran a so oman i isa a lompok na sii ko atag o pandi iyan.
18-19 Sii sa sedepan na ron dii makakempo so lompok o Ipraim a aya matatago on na so
manga mbatabataa a Ipraim, Manasih ago Baniyamin. Aya olowan o mbatabataa a Ipraim
na si Ilisiyama a wata i Amihod, na aya kadakel o manga sondaro niyan na pat polo
nggibo ago lima gatos.
20 So mbatabataa a Manasih na makapekempo a telondog kiran. Aya olowan iran na si
Gamaliyal a wata i Pidasor,
21 Na aya kadakel o manga sondaro niyan na telo polo ago dowa nggibo ago dowa gatos.
22 So mbatabataa a Baniyamin na aya kiran talondog. Aya olowan iran na si Abidan a
wata i Gidiyoni,
23 Na aya kadakel o manga sondaro niyan na telo polo ago lima nggibo ago pat gatos.
24 So langon o manga sondaro sii ko lompok o Ipraim na magatos ago walo nggibo ago
magatos. Siran i ikatelo a pengganat ko kapelalakaw.
25 Sii sa pagotaraan na ron dii makakekempo so lompok o Dan a aya matatago on na so
manga mbatabataa a Dan, Asir ago Naptali. Aya olowan o mbatabataa a Dan na si
Ahiyasir a wata i Amisiyaday, na aya kadakel o manga sondaro niyan na nem polo ago
dowa nggibo ago pito gatos.
27 So mbatabataa a Asir na makapekempo a telondog kiran. Aya olowan iran na si
Pagiyal a wata i Okran,
28 Na aya kadakel o manga sondaro niyan na pat polo ago isa nggibo ago lima gatos.
29 So mbatabataa a Naptali na aya kiran talondog. Aya olowan iran na si Ahira a wata i
Inan,
30 Na aya kadakel o manga sondaro niyan na lima polo ago telo nggibo ago pat gatos.
31 So langon o manga sondaro sii ko lompok o Dan na magatos ago lima polo ago pito
nggibo ago nem gatos. Siran i pekeori gomanat ko kapelalakaw.
32 Giyanan so manga taw sa Israil a minibilang a mipepasod ko manga pamiliya iran.
Aya kadakel o miyamangilista langon a matatago ko manga lompok iran na nem gatos
ago telo nggibo ago lima gatos ago lima polo.
33 Ogaid na so manga taw ko mbatabataa a Libi na da mirakes ko kiyabilanga ko ped a
manga Israil a so den so inisogo o Allah ki Mosa.
34 Ininggolalan o manga Israil so langon taman a inisogo o Allah ki Mosa. Oman i isa ka
mbatabataa ago pamiliya na dii kempo ago pepelalakaw sii ko atag o oman i pandi iran.
MANGA BILANGAN 3
So manga Wata i Aron
Giyai i totolan ko pamiliya i Aron ago si Mosa sii ko masa a kinimbitiyarain o Allah ki
Mosa sii ko Palaw a Sinay.
2 Aya manga wata i Aron na siki Nadab a so kaka, Abiho, Iliyasar ago si Itamar.
3 Siran i kiyaidinan ago minisenggay a makapegimam.
4 Ogaid na si Nadab ago si Abiho na miyamatay ko hadapan o Allah sii ko Disirto sa
Sinay isako somapaat siran on sa apoy a da maparoli o Allah. Na sabap sa da a ba iran
manga wata na si bo si Iliyasar ago si Itamar i miyakapagimam a ped o ama iran a si
Aron.
So Kinitoroon ko Mbatabataa a Libi a Makapanalagad ki Aron
6 “Pakitawagen ka so mbatabataa a Libi na pakadarpaa ngka siran ko hadapan i Aron a
imam kaan siran mabaloy a manga salinggogopa iyan.
7 Mipenggolalan iran so manga sangan iran para ki Aron ago sii ko langon o isa ka
maginged a Israil ko di iran dii kanggolaolaa ko galebek iran ko Barombarong a dii
Telabokan.
8 Siran pen i pekakibir ko langon a kasangkapan ko Barombarong sii ko di iran on dii
kanggalebek para ko manga Israil.
9 Senggain ka so mbatabataa a Libi a aya makapenalagad ki Aron ago so manga wata
iyan.
10 Toroon ka si Aron ago so manga wata iyan a aya manga imam; na o aden a ped a
tepeng magimam na disomala a mbonoon."
12-13 “Pinili aken so mbatabataa a Libi a poon ko manga Israil a mabaloy a rek aken, ka
kagiya isako pamonoon ko so oman i wata a mama a popaw sa lawas ko manga Imisiren
na inisenggay aken a rek aken so langon o manga mama a popaw sa lawas ko manga
Israil a melagid so taw ago so ayam. Ogaid na imanto na miyakowa ko so mbatabataa a
Libi a inisambi ko manga popaw sa lawas ko manga Israil. Rek aken siran; saken so
Allah."
Binilang so Mbatabataa a Libi
14 Pitero o Allah ki Mosa roo ko Disirto sa Sinay a
15 “Bilanga ngka so manga taw ko oman i pamiliya ko oman i totonganaya sii ko
mbatabataa a Libi. Bilanga ngka so oman i mama a miyakapagidad sa saolan ago lawan
on pen."
16 Giyoto a binilang siran i Mosa a so den so inisogo on o Allah.
17-20 So manga ngaran o manga wata i Libi na si Girson, si Kohat ago si Mirari, a so
oman i isa kiran na aya apoapoan o mbawataan a ibebeto ron so ngaran iyan.
So manga wata i Girson na si Libni ago si Simay.
So manga wata ki Kohat na siki Amram, Isar, Hibron ago si Osiyal.
So manga wata i Mirari na si Mali ago si Mosi.
So oman i isa kiran na aya apoapoan o mbawataan a ibebeto ron so ngaran iyan.
Giyai so manga mbawataan a kiyababadan ko Libi.
21 So kiyababadan ki Girson na so manga mbawataan i Libni ago si Simay.
22 So kadakel o langon a manga mama a miyakasaolan a idad iyan ago lawan pen a
miyabilang na pito nggibo ago lima gatos.
23 Giyangkai a manga mbawataan i Girson na sii makapekempo ko sedepan o
Barombarong
24 A aya olowan iran na si Iliyasap a wata i Lail.
25 Aya sangan iran na so kapekibira ko Barombarong a dii Telabokan a rakes o manga
sapeng iyan, so kortina ko gimowa o Barombarong,
26 So manga rending ko lamalama a ililibet ko Barombarong ago so aparan, so kortina ko
gimowa o lamalama, ago so manga tali a pegosaren sangkai langon a manga nganin.
27 So kiyababadan ki Kohat na so manga mbawataan i Amran, Ishar, Hibron ago si
Osiyal. Aya kadakel o manga mama a miyakasaolan a idad iyan ago lawan pen na walo
nggibo ago nem gatos. Aya sangan iran na so kapekibira ko Soti a Darpa.
29 Giyangkai a manga mbawataan i Kohat na sii makapekempo ko pagabagatan o
Barombarong,
30 Na aya olowan iran na si Ilisapan a wata i Osiyal.
31 Piyakisangan kiran so kapekibira ko Kaban sa Kapasadan, so lamisaan, so petegoan ko
manga solo, so manga aparan, so manga kasangkapan a pegosaren o imam ko Soti a
Darpa, so kortina a iperending ko gimowa o Lebi a Soti a Darpa ago so langon taman a
pegosaren sangkai a manga nganin.
32 Si Iliyasar a imam, a so wata i Aron, na aya pangolo o manga olowan ko mbatabataa a
Libi. Sekaniyan i initoro a maporo ko siran oto a pepekakibir ko Soti a Darpa.
33 So kiyababadan ki Mirari na so manga mbawataan i Mali ago si Mosi.
34 Aya kadakel o manga mama a miyakasaolan a idad iyan ago lawan pen a miyabilang
na nem nggibo ago dowa gatos.
35 Aya olowan o manga mbawataan i Mirari na si Soril a wata i Abihail. Sii siran
makapekempo ko pagotaraan o Barombarong.
36 Aya piyakisangan kiran a galebek na so kapekibira ko manga papan o Barombarong,
so manga pamalawagen, so manga polaos a rakes o manga onayan iran, so manga
pembetadan on, ago so langon a kasangkapan a mararambit ko kapegosara sangkai a
manga nganin
37 Taman den ko manga tokod o mililibet on a lamalama a rakes o manga onayan iran, so
manga pasek ago so manga tali.
38 Si Mosa ago si Aron ago so manga wata iyan na sii makapekempo ko danga o
Barombarong sa tampar sa sebangan. Siran i pekibir ko Soti a Darpa para ko manga
Israil. Apiya antawaa a ped a taw i tomepeng mobay ko Soti a Darpa na disomala a
mbonoon.
39 Aya kadakel langon o manga mama ko mbatabataa a Libi a miyabilang ko kinisogoon
on o Allah a miyamakapagidad sa saolan ago lawan pen na dowa polo ago dowa nggibo.
So Mbatabataa a Libi a Minisaliyo ko manga Mama a Popaw sa Lawas
40 Na pitero o Allah ki Mosa a "Bilanga ngka so langon o manga mama a popaw sa lawas
ko manga Israil a miyakasaolan a idad iyan ago lawan pen na pelilistaan ka so manga
ngaran iran.
41 Rek aken siran, ogaid na senggain ka so manga taw ko mbatabataa a Libi a misaliyo
kiran, ago senggain ka so manga pangangayamen o mbatabataa a Libi a misaliyo ko
langon a popaw sa lawas ko manga pangangayamen o manga Israil. Saken so Allah."
42 Na binilang i Mosa so langon a popaw sa lawas ko manga Israil a so den so inisogo on
o Allah.
43 Aya kadakel iran a manga mama a miyakasaolan a idad iyan ago lawan pen na dowa
polo ago dowa nggibo ago dowa gatos ago pito polo ago telo.
45 “Senggain ka a rek aken so manga taw ko mbatabataa a Libi a misaliyo ko langon a
mama a popaw sa lawas ko manga Israil, ago senggain ka so manga pangangayamen o
mbatabataaa a Libi a misaliyo ko popaw sa lawas ko manga pangangayamen o manga
Israil. Saken so Allah.
46 Ogaid na disomala a keaon ka so dowa gatos ago pito polo ago telo a manga popaw sa
lawas ko manga Israil a milalawan ko kadakel o manga taw ko mbatabataa a Libi.
47 Panekati ngka sa ndilima lad a pirak so oman i isa kiran a piyakaokit ai ko timbangan
a pegosaren ko Barombarong.
48 Na began ka so pirak ki Aron ago sii ko manga wata iyan a aya miniaon ko minilawan
kiran."
49 Mandiyadi na piyanekat i Mosa so pirak
50 A poon sangkai a manga popaw sa lawas ko manga Israil na aya kala iyan na sanggibo
ago telo gatos ago nem polo ago lima lad a pirak a piyakaokit ko timbangan ko
Barombarong
51 Na inibegay niyan ki Aron ago sii ko manga wata iyan a so den so inisogo on o Allah.
MANGA BILANGAN 4
So manga Sangan o Mbawataan i Kohat
2 “Bilanga niyo so sabaad ko mbatabataa a Libi a maaped ko mbawataan i Kohat.
3 Bilanga niyo so langon o manga mama ipoon ko telo polo ragon a idad iyan taman sa
limapolo a kepakay a makanggalebek ko Barombarong a dii Telabokan.
4 “Aya galebek o manga mbawataan i Kohat sii ko Barombarong na so kapekibira ko lebi
a soti a manga betad.
5 Igira a ipagogalin so kampo na pekasoled si Aron ago so manga wata iyan ko
Barombarong na kekowa iran on so kortina ko danga o Kaban sa Kapasadan ago kisapeng
iran ko Kaban.
6 Kelapisan iran ai sa kobal a kambing ago kebongkosan iran pen sa dinis a lombos a
biro. Moripori na ketago iran on so manga tibal iyan.
7 “Oriyan iyan na kekayatan iran sa biro a dinis so lamisaan a pesepaatan sa paan ko
Allah, na penagoon iran on so manga lapad, so manga pinggan, so manga ladiya ago so
manga omoy a petegoan sa arak a ipesepaat, na ndodon den so paan a lalayon on ibebetad.
8 Kesapengan iran ai sa mariga a dinis ago kelapisan iran pen sa kobal a kambing; na
ketago iran on so manga tibal iyan.
9 “Pekakowa siran sa biro a dinis na kisapeng iran ko petegoan sa solo a rakes o manga
solo on, so manga ipelipit ko sombowan iyan, so manga talam, ago so manga omoy a
petegoan sa lana.
10 Na palaya ini a mirarakes ko manga kasangkapan on na kepotos iran sa kobal a
kambing ago kibetad iran ko ipetibal on.
11 “So aparan a bolawan na kebongkosan iran sa biro a dinis ago kelapisan iran sa kobal
a kambing na ketago iran on so manga tibal iyan.
12 Oriyan iyan na kekowa iran so langon a kasangkapan a pegosaren ko kapepanalagad
sii ko Soti a Darpa na kepotos iran ai sa biro a dinis a lalapisan sa bombol a kambing, na
kibetad iran ai ko ipetibal on.
13 “Kekowa iran so ombi ko aparan a tombaga na kesapengan iran sa mariga a dinis.
14 Oriyan iyan na kibetad iran ko liyawaw niyan so langon a kasangkapan a pegosaren ko
kapesepaat ko aparan, so manga petengelan sa waga, so manga tinidor para ko sapo, so
manga sakerad ago so manga ladiya. Kesapengan iran ai langon sa kobal a kambing, na
ketago iran on so manga tibal iyan.
15 “Amay ka mapasad somapeng i Aron ago so manga wata iyan so soti a manga igagama
ago so langon a soti a kasangkapan na amay ka matiyagar den so kampo sa kipagogalinen
on na magobay ron so manga mbawataan i Kohat a aya magawid sangkoto a manga
nganin, ogaid na di iran den keseko so soti a manga nganin ka pematay siran."
"Giyai so manga sangan o manga mbawataan i Kohat mipantag ko Barombarong a dii
Telabokan.
16 “Si Iliyasar a wata i Aron a imam na aya komikibir ko langon o Barombarong ago so
langon taman a ipamemetad on a mirarakes on so soti a manga pagigimo ago manga
kasangkapan on. Kekibir iyan so lana a ipesolo, so mamot a doka, so ipesepaat lalayon a
pereperan and so lana diyabat."
18 “Di niyo pekipolangen so manga mbawataan i Kohat sii ko mbatabataa a Libi.
19 Ka giyai i nggolaolaa niyo kiran kaan siran di pematay igira a pepekaobay siran ko lebi
a soti a manga nganin: pekaonot kiran si Aron ago so manga wata iyan ko kasoledi iran
ko Barombarong, na pekisangan iran ko oman i isa a mama so galebek iyan ago so
pagawidan iyan.
20 Ka o makasoled on so manga mbawataan i Kohat ago mailay iran so soti a manga
nganin sii ko kapesepengi ron i Aron ago so manga wata iyan na pematay siran.
So manga Sangan o Mbawataan i Girson
22 “Bilanga ngka so manga taw ko oman i pamiliya ko oman i totonganaya ko
mbawataan i Girson.
23 Bilanga ngka so langon o manga mama ipoon ko telo polo ragon a idad iyan taman sa
limapolo a kepakay a makanggalebek ko Barombarong a dii Telabokan.
24 Aya sangan iran a manga galebek na so kapegawidi iran sangkai a manga betad:
25 So Barombarong a mirarakes on so manga kortina on, so ipesepeng on, so kobal a
kambing a ipelapis ko sapeng, so kortina o gimowa iyan
26 Ago so pen so manga rending o lamalama a mililibet ko Barombarong ago so aparan,
so rending o gimowa o lamalama, ago so manga tali ago so langon o kasangkapan a
mararambit ko kapegosara sangkai a manga nganin. Giyai i galebek iran.
27 Si Aron ago so manga wata iyan i makapemando ko manga mbawataan i Girson
mipantag ko manga atastanggongan iran apiya anda ko kapegawid ago so ped a galebek.
Disomala a pepakisangan iyo kiran so langon a keawidan iran.
28 Giyai i manga sangan o manga mbawataan i Girson sii ko Barombarong a dii
Telabokan, na si Itamar a wata i Aron na aya tomatanding ko galebek iran."
So manga Sangan o Mbawataan i Mirari
29 Pitero pen o Allah a "Bilanga ngka so manga taw ko oman i pamiliya ko oman i
totonganaya ko mbawataan i Mirari.
30 Bilanga ngka so langon a manga mama ipoon ko telo polo ragon a idad iyan taman sa
limapolo a kepakay a makanggalebek sii ko Barombarong a dii Telabokan.
31 Aya sangan iran a galebek na so kaawidi ko manga papan, so manga pamalawagen, so
manga polaos a rakes o manga onayan iran
32 Taman den ko manga tokod o mililibet on a lamalama a rakes o manga onayan iran, so
manga pasek, so manga tali, ago so langon a kasangkapan a mararambit ko kapegosara
sangkai a manga nganin. Na pakisangen ka ko oman i mama so matetendo a manga
nganin a pagawidan iyan.
33 Giyai i galebek o manga mbawataan i Mirari sii ko kapenggalebek iran ko
Barombarong, na aya tomatanding on na si Itamar a wata i Aron a imam."
So Kiyabilanga ko Mbatabataa a Libi
34-48 Na tiyoman i Mosa ago si Aron ago so ped a manga olowan o manga Israil so
inisogo o Allah. Binilang iran so manga taw ko oman i pamiliiya ko oman i totonganaya
ko oman i mbawataan sii ko mbatabataa a Libi kaan iran mapariksa so kadakel o manga
mama ipoon ko telo polo ragon a idad iyan taman ko lima polo a kepakay a
makanggalebek ko Barombarong a dii Telabokan. Aya kadakel o manga mbawataan i
Kohat na
dowa nggibo ago pito gatos ago lima polo,
dowa nggibo ago nem gatos ago telo polo ko mbawataan i Girson, na
telo nggibo ago dowa gatos ko mbawataan i Mirari.
Aya kadakel iran langon na walo nggibo ago lima gatos ago walo polo.
49 Minilista so oman i isa kiran a so den so inisogo o Allah ki Mosa, na bigan so oman i
isa kiran sa galebek. a ipepasod ko sogoan o Allah a miyakanggolalan ki Mosa.
MANGA BILANGAN 5
So Kiyasotiya ko Kampo
2 Sogoon ka ko manga Israil a "Pakaliyowa niyo ko kampo so oman i pekebowa o di na
aden a petoga a poon ko lawas iyan o di na miyadalem a hadas ka miyakaseko sa miyatay.
3 Pakaliyowa niyo siran on a ndatar so manga mama ago manga babay kaan iran di
kaseboi so manga kampo iran a ron ako komakaden."
4 Na tiyoman ai o manga Israil na piyakaliyo iran siran ko kampo.
So Bayad o Kasalaan
6 “Teroa ngka ko manga Israil a: Igira a miyakandosa so mama o di na babay sii ko Allah
ko kiyanggolaola niyan sa ribat ko ped a taw na miyataksil angkoto a mama o di na
babay.
7 Na ketaobat iyan so miyandosa niyan na kebayadan iyan sa tarotop so inisala on ago
kioman iyan on so ikalima bagi on na sii niyan ai kibegay ko kiyaselaan iyan.
8 Ogaid na o miyatay den angkoto a taw a da a madaseg iyan a tonganay a kebegan ko
imbayad ko kasalaan na rek ai o Allah na sii kibegay ko imam a rakes o mama a bilibili a
pekorbanen kaan mapapas so dosa niyan.
9 So langon a sidka a pagowiten o manga Israil ko imam na rek iyan ai.
10 So ipembegay ko oman i isa a imam na rek iyan den."
So Ipetepeng ko di Toman sa Pasad a Karoma a Babay
12 “Teroa ngka ko manga Israil a: Opama ka aden a mama a da katomani sa pasad o
karoma niyan ka mindosa so babay
13 Ko kiyarembang iyan ko ped a mama. Na opama ka di ini ketokawan o karoma niyan
ka pageemaan rekaniyan ago da matibowa sa kiyanggolaolaa sii o babay.
14 O pepanaod so mama ago miyapangandam iyan a miyakasebo so karoma niyan, o di
na opama ka da makasebo so babay,
15 Na kewit sekaniyan o mama sii ko imam. Pekaawid sekaniyan pen sa isepaat iyan a
isa ka kilo a arina a bantad para ko karoma niyan. Di niyan ai keododan sa lana a olibi
aya pen o ba niyan tagoi sa doka ka kagiya isepaat ai sabap ko kapanaod a aya pekitendo
ko tito a benar mipantag ko dosa.
16 “So imam na pekaonoten iyan so babay na mapekatindeg iyan sii ko hadapan o Allah.
17 Magodod so imam sa soti a ig ko omoy a bote ago tegoan iyan ai sa bayanek a poon ko
salasa o Barombarong.
18 Oriyan o kiyapakatindega niyan ko babay ko hadapan o Allah na pekirobay niyan on
so bok iyan na pekikapetan iyan ko babay so isepaat sabap ko kapanaod a aya pekitendo
ko tito a benar mipantag ko dosa, na so imam na aya komakapet ko mapait a ig a aden a
sinta on.
19 Na pakapesepaan o imam so babay a tig iyan a 'O da a ped a mama a miyakarembang
reka ago da ka makasilay ago da makasebo sii ko kapakatetapi iyo ago so karoma ngka na
pengnin ko a di ka kabinasaan angkai a ig a aden a sinta on.
20 Ogaid na o miyakasilay ka sii ko kapakatetapi iyo ago so karoma ngka ago piseboan ka
a ginawa ngka ko kiyarembang ka ko ped a mama a kena a ba ngka karoma
21 Na pengnin ko ko Allah a pakisintaan ka niyan ko manga tonganay ngka ago itewap ka
iran amay ka mabaloy ka niyan a balek ago miberot a tiyan ka.
22 Na, makasoled angkai a ig ko tiyan ka a ipemberot iyan ago ikebaloy ngka a balek.'
"Na isembag o babay a 'Amin, mapenggolaola ini.'
23 “Kisorat o imam angkai a manga sinta sii ko pesoratan na ponasen iyan ko mapait a ig
so inisorat iyan.
24 Sii ko di niyan pen kapekainoma ko babay ko ig a aden a sinta on a kesabapan ko
mapait a karomasayan o miyakasela sekaniyan
25 Na kekowa o imam so isepaat para ko kapanaod sa lima o babay na kibayaw niyan ai
ko hadapan o Allah na pagowiten iyan ko aparan.
26 Pekakowa sekaniyan sa sagamak ko arina a aya den toos na totongen iyan ko aparan.
Oriyan iyan na pekiinom iyan ko babay so ig.
27 Na o piseboan o babay a ginawa niyan ago da niyan katomani sa pasad so karoma
niyan na soled rekaniyan so ig a aden a sinta on na tanto niyan a ikerasay. Kiberot so
tiyan iyan na kebaloy sekaniyan a balek a kasisintaan o manga tonganay niyan.
28 Ogaid na o da niyan kaseboi a ginawa niyan ago masosoti sekaniyan na da a kesowa
iyan ago makapembabawata pen.
29 Giyai den i kokoman ko kapanaod mipantag ko babay a miyakasilay ago piseboan iyan
a ginawa niyan sii ko kapakatetapi iran ago so karoma niyan
30 O di na igira a miyatago ko mama so kapanaod sabap sa pangangandamen iyan so
karoma niyan. Mapekatindeg o imam so babay ko hadapan o Allah na keokas iyan ko
babay so langon angkai a kokoman.
31 So karoma niyan a mama na kena a ba imbilang a miyakasela, ogaid na o miyakasela
so babay na itena on so indaneg ko dosa niyan.
MANGA BILANGAN 6
Manga Taritib ko manga Nasariyo
2 “Teroa ngka ko manga Israil a: O aden a mama o di na babay a tindos a ipesemaya iyan
a isenggay niyan a ginawa niyan ko Allah sa kakebaloy niyan a Nasariyo
3 Na di sekaniyan pekainom sa arak o di na apiya antonaa a pakabereg a panginginomen
apiya so soka o di na ig a obas, aya pen o ba kan sa obas apiya anda ko gopen riyopo o di
na inagag.
4 Sii ko masa a kananasariyo niyan na di sekaniyan den pekakan sa apiya antonaa a poon
ko obas taman ko liso o di na opis iyan.
5 “Taman sa di mapopos so masa a kasesemaya iyan sa kisesenggay niyan na di den
kepotolan so bok iyan. Mapekatas iyan so bok sa olo niyan ka masosoti sekaniyan,
6 Na di den pekaobay ko miyatay ko masa a kisesenggain iyan sa ginawa niyan ko Allah
7 Apiya pen o aya miyatay na so ama iyan o di na ina iyan o di na pagari niyan o di na
babay niyan. Di niyan kekaraman a ginawa niyan para kiran ka kagiya so bok sa olo
niyan na aya toos ko kisesenggay niyan ko Tohan iyan,
8 Na sii ko langon angkai a masa na masosoti sekaniyan ko Allah.
9 “O aden a mitekaw a matay ko obay niyan a inikakaram oto o bok iyan a misesenggay
na makapegopaw sekaniyan sii ko kapopos o pito gawii kaan sekaniyan malompiyo.
10 Na sii ko ikawalo gawii na pekawit sekaniyan sa dowa a marapatik o di na dowa a
pagapak ko imam sii ko gimowa o Barombarong a dii Telabokan.
11 Pekorbanen o imam so isa on sabap ko dosa, na so isa on na pekorbanen iyan a isepaat
a totongen. Sangkai a okit na kepapas so kiyataksil iyan a minisabap ko kiyapakaobay
niyan ko miyatay. Na sii sangkoto a gawii na kesoti niyan peroman so olo niyan.
12 Kaperomanan iyan so kisenggain iyan sa ginawa niyan ko Allah ko tarotop a masa
niyan ka kagiya di kibilang so manga gawii ko miyaona a kinisenggain iyan on sabap ko
kiyakarami rekaniyan. Na pekawit sekaniyan sa mama a bilibili a saragon a idad iyan a
aya pekorbanen sabap ko kiyataksil.
13 “Giyai so kokoman ko Nasariyo amay ka mapopos so masa a kisesenggain rekaniyan.
Kewit sekaniyan ko gimowa o Barombarong
14 Na kepalad iyan roo so manga sapaat iyan ko Allah: satiman a mama a bilibili a
saragon a idad iyan a da a daway niyan a pekorbanen a isepaat a totongen, satiman a
babay a bilibili a saragon a idad iyan a da a daway niyan a pekorbanen sabap ko dosa, ago
satiman a mama a bilibili a da a daway niyan a pekorbanen pantag bo ko kanggiginawai,
15 Ago so pen so manga isepaat a pangenengken ago panginginomen a paliyogat a
kirakes on. Kepalad iyan pen so isa ka reban a paan a da a tapay ron, manga apang a
inembaalan a mapiya a arina a sesamboran sa lana a olibi ago manga biskowit a iibongen
a lana.
16 “Pagowiten ai langon o imam ko hadapan o Allah, na ipenggolalan iyan so kakorban
sabap ko dosa, ago so kakorban sa isepaat a totongen.
17 Oriyan iyan na isepaat iyan so isa ka reban a paan a da a tapay ron ago so pen so mama
a bilibili a mapekorban pantag bo ko kanggiginawai a rakes on so sapaat a pangenengken
ago panginginomen.
18 “Mapasad oto na sii ko gimowa o Barombarong na makapegopaw so Nasariyo na
kekowa niyan so bok iyan a toos ko kisesenggay niyan na ketago iyan ko apoy sii ko
didalem o pikorban pantag bo ko kanggiginawai.
19 Oriyan o kiyaopawa niyan ko bok iyan na kowaan o imam so waga o bilibili amay ka
maloto, a rakes o isa a apang ago isa a biskowit a da a tapay ron a poon ko reban na
pekikapetan iyan ai ko Nasariyo.
20 Na peladen ai o imam ko Allah ko kibayaon iyan on ko hadapan iyan. Manga soti ai a
rek o imam a rakes o kagepe o bilibili ago so bobon iyan. Maipos oto na kepakay den a
makainom sa arak so Nasariyo.
21 “Giyai i kokoman ko Nasariyo a inisemaya iyan so isepaat iyan ko Allah a
ipapaliyogat ko kipesenggain iyan sa ginawa niyan, a kioman on so apiya antonaa i ped a
kegaga niyan. Disomala a kitoman iyan so inisemaya iyan a ipapaliyogat ko kokoman ko
Nasariyo.
So Rakmat a Ipengangarapan o manga Imam
23 “Teroa ngka ki Aron ago so manga wata iyan a giyai i ipengangarapan iyo ko
kaperakamati niyo ko manga taw sa Israil:
24 “Pengnin ko a rarakmatan kano o Allah
ago iipaten kano niyan.
25 Pengnin ko a kababayaan kano o Allah
ago ikalimo kano niyan.
26 Pengnin ko a masoat rekano so Allah
ago began kano niyan sa kalilintad.
27 “Giyai den i okit a kimbetaden i Aron ago so manga wata iyan ko Ingaran aken sii ko
manga Israil, na perakmatan ko siran.
MANGA BILANGAN 7
So manga Pamemegayan o manga Olowan sii ko Kisenggain a Soti ko Barombarong
Sii ko gawii a miyapakatindeg i Mosa so Barombarong na piyanalawatan iyan ai ago
piyanoti niyan a rakes o langon a igagama on, ago so pen so aparan a rakes o langon a
kasangkapan on.
2 Oriyan iyan na somiyong roo so manga pelokelokesen sa Israil a manga olowan siran ko
oman i mbatabataa a miyakasangan ko kiyambilanga ko manga taw.
3 Miyamangowit siran roo sa manga pamemegayan a piyalad iran ko Allah sii ko danga o
Barombarong: nem timan a karo a aden a atep iyan ago sapolo ago dowa a manga mama a
sapi, a sesatiman a karo a poon ko oman i dowa a olowan ago nggagaisa a sapi a poon ko
oman i isa kiran.
5 “Tarimaa ngka ngkai a manga pamemegayan kaan maosar ko manga galebek ko
Barombarong a dii Telabokan. Mbagibagia ngka ini ko manga Libitiyo a mipepasod ko
galebek a piyakisangan ko oman i isa kiran."
6 Na tiyarima i Mosa so manga karo ago so manga sapi na pimbagibagi iyan ai ko manga
Libitiyo.
7 Dowa a karo ago pat a sapi a inibegay niyan ko mbawataan i Girson para ko galebek
iran,
8 Na pat a karo ago walo a sapi a inibegay niyan ko mbawataan i Mirari para ko galebek
iran. Na si Itamar a wata i Aron na aya tomatanding ko langon a galebek iran.
9 Ogaid na so mbawataan i Kohat na da niyan begi sa karo o di na sapi ka kagiya so soti a
manga nganin i masasangan iran, na paliyogat a posain iran ai.
10 Kagiya kasalawatan so aparan na piyangowit on o manga olowan so manga
pamemegayan iran para ko kisenggain on a soti na piyalad iran ai sii ko hadapan o aparan.
11 Ka miyatero o Allah ki Mosa a "Oman salongan na sakataw a olowan a pekawit sa
pamemegayan iyan para ko kisenggain a soti ko aparan."
12-83 So oman i olowan na ndatadatar so manga pamemegayan a piyangawidan iran na
giyai:
=satiman a mala a pelato a linang a aya timbang iyan na isa ka kilo ago tenga, ago
satiman a ladiya a linang a aya timbang iyan na walo gatos ka gramo a piyakaokit ko
timbangan ko Barombarong a palaya ini kikapepeno a mapiya a arina a sesemboran sa
lana a olibi a aya den isepaat a pangenengken,
=satiman a lapad a bolawan a aya timbang iyan na magatos ago sapolo ka gramo a
mapepeno a doka,
=satiman a mangoda a toro a sapi, satiman a mama a bilibili, ago satiman a nati a mama a
bilibili a saragon a idad iyan a mapekorban a isepaat a totongen,
=satiman a mandangan a mapekorban sabap ko dosa,
=dowa timan a mama a sapi, lima timan a mama a bilibili, lima timan a mandangan, ago
lima timan a nati a mama a bilibili a saragon a idad iran a mapekorban a ipesoasoat ko
Allah.
Miyakatondotondog mangowit so manga olowan sa manga pamemegayan iran sii
sangkai a katatanor iyan:
Sii ko paganay a gawii na so olowan o mbatabataa a Yodah a si Nasiyon a wata i
Aminadab,
sii ko ikadowa gawii na so olowan o mbatabataa a Isakar a si Nitanil a wata i Sowar,
sii ko ikatelo gawii na so olowan o mbatabataa a Sibolon a si Iliyab a wata i Hilon,
sii ko ikapat gawii na so olowan o mbatabataa a Robin a si Ilisor a wata i Sidiyor,
sii ko ikalima gawii na so olowan o mbatabataa a Simiyon a si Silomiyal a wata i
Sorisiyaday,
sii ko ikanem gawii na so olowan o mbatabataa a Gad a si Iliyasap a wata i Diyowil,
sii ko ikapito gawii na so olowan o mbatabataa a Ipraim a si Ilisiyama a wata i Amihod,
sii ko ikawalo gawii na so olowan o mbatabataa a Manasih a si Gamaliyal a wata i
Pidasor,
sii ko ikasiyaw gawii na so olowan o mbatabataa a Baniyamin a si Abidan a wata i
Gidiyoni,
sii ko ikasapolo gawii na so olowan o mbatabataa a Dan a si Ahiyasir a wata i
Amisiyaday,
sii ko ikasapolo ago isa gawii na so olowan o mbatabataa a Asir a si Pagiyal a wata i
Okran,
sii ko ikasapolo ago dowa gawii na so olowan o mbatabataa a Naptali a si Ahira a wata i
Inan,
84-88 Giyai so manga pamemegayan a inowit o manga olowan sa Israil para ko
kinisenggain a soti ko aparan ko kiyasalawati ron:
=sapolo ago dowa a mala a manga pelato a linang, ago sapolo ago dowa a manga ladiya a
linang a aya timbang iran langon na dowa polo ago pito ka kilo ago tenga a piyakaokit ko
timbangan ko Barombarong,
=sapolo ago dowa a lapad a bolawan a aya timbang iran na manga isa ka kilo ago tenga a
palaya ini kikapepeno a doka,
=sapolo ago dowa a mangoda a toro a sapi, sapolo ago dowa a mama a bilibili, ago sapolo
ago dowa a nati a mama a bilibili a sesaragon a idad iyan a mapekorban a isepaat a
totongen a rakes o inipaliyogat a isepaat a manga pangenengken,
=sapolo ago dowa a mandangan a mapekorban sabap ko dosa,
=dowa polo ago pat a mama a sapi, nem polo a mama a bilibili, nem polo a mandangan,
ago nem polo a nati a mama a bilibili a sesaragon a idad iyan a mapekorban pantag bo ko
kanggiginawai.
89 Igira a pesoled si Mosa ko Barombarong ka ron dii makimbitiyarai ko Allah na
pekeneg iyan so sowara o Allah a pepekapoon ko pageletan o dowa a piyagtaotaw a
malaikat a matatago ko liyawaw o Kaban sa Kapasadan. Giyanan i okit a di rekaniyan dii
kapakimbitiyarai o Allah.
MANGA BILANGAN 8
So Kiyatentemi ko manga Solo
2 “Teroa ngka ki Aron a amay ka pekatindegen iyan so pito timan a manga solo na sii
niyan pekalindawa ko danga o petegoan sa solo."
3 Pinggolaola ini i Aron, ka piyakatindeg iyan so manga solo kaan kalindawi so hadapan
o petogoan sa solo a so den so inisogo o Allah ki Mosa.
4 So langon o petegoan sa solo na inembaalan a sisel a bolawan ipoon ko itado niyan
taman ko manga obarobar iyan. Aya kiyambaali ron na datar o ladiyawan a piyakiilay o
Allah ki Mosa.
So Kiyasotiya ago so Kinisenggain ko Mbatabataa a Libi
6 “Sibain ka so manga Libitiyo a poon ko ped a manga Israil na pakasotiya ngka siran
7 Sii sangkai a okit: pamesipesiken ka kiran so ig a ipepas ko manga dosa na
pamakiopawi ngka kiran so langon o lawas iran na pamakipipii ngka kiran pen so manga
nditaren iran. Mapasad oto na miyasoti siran.
8 Na pakakowaa ngka siran sa mangoda a mama a sapi ago so paliyogat a iperakes on a
isepaat a pangenengken a mapiya a arina a sesemboran sa lana a olibi, na pekakowa ka sa
ped a mangoda a mama a sapi a pekorbanen sabap ko dosa.
9 Limoda ngka so langon o isa ka maginged a Israil na pamakatindega ngka so manga
Libitiyo ko danga o Barombarong a dii Telabokan.
10 Amay ka pagowiten ka siran den ko hadapan o Allah na kedapenetan siran o manga
Israil.
11 Na kepalad i Aron ko Allah so manga Libitiyo a aya den tindos a pamemegayan on o
manga Israil kaan siran misenggay sa kinggolalanen iran ko galebek iran ko Allah.
12 “Oriyan iyan na kidapenet o manga Libitiyo a manga lima iran ko olo o dowa a sapi,
na mapekorban ka so isa on sabap ko dosa, ago so ped iyan na mapekorban a isepaat a
totongen a aya ngka kipenggolalanen ko kakepapasa ko manga dosa o manga Libitiyo.
13 Pamakatindega ngka so manga Libitiyo ko hadapan i Aron ago so manga wata iyan na
palada ngka siran ko Allah a aya on den tindos a pamemegayan.
14 Sii sangkai a okit na kisenggay ngka so manga Libitiyo a rek aken a poon ko ped a
manga Israil.
15 Amay ka mapasad ka masoti ago misenggay ngka so manga Libitiyo na kepakay a
makanggalebek siran ko manga sangan iran sii ko Barombarong a dii Telabokan.
16 Minisenggay siran raken a poon ko ped a manga Israil, na miyatarima aken siran a rek
aken a inisambi ko langon o manga mama a popaw sa lawas ko manga israil.
17 Isako pamonoon aken so langon a mama a popaw sa lawas ko manga Imisiren na
inisenggay aken a rek aken so langon a mama a popaw sa lawas ko manga Israil a
melagid so manga taw ago so manga ayam.
18 Ogaid na imanto na miyatarima aken so manga Libitiyo a inisambi ko langon a manga
mama a popaw sa lawas ko manga Israil,
19 Na inibegay aken so manga Libitiyo ki Aron ago so manga wata iyan a aya
pamemegayan a poon ko langon o manga Israil kaan siran makapanalagad sii ko
Barombarong para ko manga Israil ago an iran mapakalidas so manga Israil ko morala a
kitana kiran o makaobay siran ko Soti a Darpa."
20 Na ininggolalan i Mosa ago si Aron ago so langon o isa ka maginged a Israil so langon
a inisogo o Allah ki Mosa mipantag ko manga Libitiyo.
21 Piyamanoti o manga Libitiyo so manga ginawa iran ago piyamamipian iran so manga
nditaren iran. Na piyalad siran i Aron ko Allah a aya den tindos a pamemegayan
rekaniyan, na ininggolalan iyan so okitokit a kakepapas o manga dosa iran kaan siran
masoti.
22 Tiyoman o manga taw so langon a inisogo o Allah mipantag ko manga Libitiyo.
Oriyan iyan na miyakapanalagad so manga Libitiyo sii ko Barombarong a dii Telabokan a
penanakodaan siran i Aron ago so manga wata iyan.
24 “Giyai i taritib ko manga Libitiyo: So manga mama a miyakapagidad sa dowa polo
ago lima ragon ago lawan pen na makapenalagad ko Barombarong,
25 Ogaid na amay ka makapagidad siran sa lima polo na pekagenek siran ko galebek iran
ago di siran on den pakapenggalebeken.
26 Keogopan iran baden so manga pagari ran ko di iran dii kinggolalanen ko manga
sangan iran, ogaid na di siran pekasangan ko apiya antonaa a galebek on. Giyai den i okit
a kisanganen iyo ko manga Libitiyo ko manga galebek iran."
MANGA BILANGAN 9
Manga Kokoman ko Paska
Miyakimbitiyarai so Allah ki Mosa sii ko Disirto sa Sinay sii ko paganay a olanolan ko
ikadowa ragon oriyan o kiyapakaawa o manga Israil sa inged a Misir. Pitero iyan a
"Pakiselaselaan ka ko manga Israil so Paska sii ko matetendo a gawii
3 Sii ko perimon ko ikasapolo ago pat gawii sangkai a olanolan. Selaselaa niyo ai ko
kapetomana niyo ko langon o manga kokoman ago manga taritib iyan."
4 Sabap roo na iniinsarat i Mosa ko manga Israil so kaselaselaa iran ko Paska
5 Na ininggolalan iran ai roo ko Disirto sa Sinay ko kiyaperimon iyan ko ikasapolo ago
pat gawii ko paganay a olanolan. So den so langon a inisogo o Allah ki Mosa i
ininggolalan o manga Israil.
6 Ogaid na aden a manga taw a di siran makapeselasela ko Paska sangkoto a gawii ka
kena a ba siran masosoti sabap ko kiyapakaseko iran sa bangkay. Sabap san na
somiyong siran ki Mosa ago si Aron sangkoto a gawii
7 A tig iran a "Miyadalem kami a hadas ka miyakaseko kami sa miyatay; ogaid na ino
rekami di peperoa a kapakasapaat ami ko Allah ko miyatendo a gawii a datar o ped a
manga Israil?"
8 Na pitero kiran i Mosa a "Nayaw kano, ka iise aken ko Allah o antonaa i isogo iyan
mipantag rekano."
10 “Teroa ngka ko manga Israil a 'Igira aden a isa rekano o di na isa ko kebabadan rekano
a madadalem a hadas sabap sa miyakaseko sa miyatay, o di na o kawawatanan sekaniyan
ko kiyalalakaw niyan na makapeselasela sekaniyan pen ko Paska ko Allah.
11 Mapeselasela iran ai ko talondog a olanolan, sii ko perimon ko ikasapolo ago pat gawii
ko ikadowa a olanolan. Kekan iran so bilibili a rakes o paan a da a tapay ron ago so
mapait a lite.
12 Da den a ba iran on pekapitai aya pen o ba aden a potolen iran ko tolan o ayam.
Mipenggolalan iran so langon o manga kokoman mipantag ko Paska.
13 Ogaid na apiya antawaa i masosoti ago kena a ba kawawatani ko kapelalakaw niyan a
ipendarainon iyan so kapeselaselaa niyan ko Paska na kebelag sekaniyan ko isa ka
maginged a Israil ka kagiya da niyan sapaaten so ipesepaat ko Allah sii ko matetendo a
gawii. Na kidaneg sangkoto a taw so sala iyan.
14 “ 'O aden a rait a mababaling rekano a kebaya selasela ko Paska na mipenggolalan iyan
mambo so manga kokoman on ago so manga taritib iyan. Ndatar sa kokoman so rait ago
so tenger a taw.' "
So Gabon ko Liyawaw o Barombarong
15 Sii ko gawii a kiyapakatindega ko Barombarong a pembetadan ko Kaban sa
Kapasadan na minikolob on so gabon. Na ipoon ko kagagawii taman ko kiyapita iyan na
so gabon ko liyawaw o Barombarong na datar o apoy a kapekeilaya on.
16 Giyanan den i maoolaola niyan; mikokolob on so gabon igira a daondaw, ago apoy a
kapekeilaya on igira a gagawii.
17 Igira a pekibayaw so gabon a poon ko liyawaw o Barombarong na pengganat so manga
Israil, na o anda petereg so gabon na ron siran mambo dii kempo.
18 Sabap ko sogoan o Allah na pelalakaw so manga Israil, na sii peman ko sogoan iyan
na di siran dii kempo. Taman ko katatareg o gabon ko liyawaw o Barombarong na sii
siran den ko kekampowan iran.
19 Igira a dii magtey so gabon ko liyawaw o Barombarong na petomanen o manga Israil
so sogoan o Allah ka di siran den mambo pegalin sa kampo.
20 Igira kowan na di pekapira gawii a katatareg o gabon ko liyawaw o Barombarong, na
giyoto mambo i katey o katatareg iran roo. Na sabap peman ko sogoan o Allah na
pengganat siran.
21 Igira kowan na aya bo a katatareg o gabon na ipoon ko perimon na taman sa kepita, na
igira a pekibayaw ko kapipita na pengganat siran. Apiya anda ko daondaw o di na
gagawii a kapekibayaw o gabon na pengganat siran den.
22 Apiya i katey a katatareg o gabon ko liyawaw o Barombarong maana a dowa gawii o
di na saolan o di na saragon na tomatareg den mambo so manga Israil ko kampo na go di
siran den melalakaw; ogaid na saden sa kapekibayaw niyan na aya iran den ipengganat.
23 Sabap ko sogoan o Allah na di siran dii kempo, na sabap ko sogoan iyan na pelalakaw
siran. Petomanen iran so langon ta
man a ipesogo kiran o Allah a nggolalan ki Mosa.
MANGA BILANGAN 10
So manga Bogiyong a Pirak
Na pitero Allah ki Mosa a
2 “Mbaal ka sa dowa timan a bogiyong a sisel a pirak na osara ngka ini a ipetewag ko
manga taw sii ko kapetimoa kiran ago ipenanao sa kapengganat iran ko kampo.
3 Igira a pepakaonin so dowa a bogiyong na so langon o isa ka maginged na kelimod
siran ko hadapan ka sii ko gimowa o Barombarong a dii Telabokan.
4 Ogaid na o satiman bo i pekaonin on na so bo so manga olowan o manga mbatabataa sa
Israil i kelimod sii reka.
5 Igira a minitekaw a matanog a kiyaoni o bogiyong na so manga mbatabataa a kekampo
sa sedepan na pekaganat lomalakaw.
6 Na sii ko ikadowa a kapekaoniya on na aya pekaganat na so manga mbatabataa a
kekampo sa pagabagatan. Ka so kitekaw a kapepakaoniya on sa matanog na aya nanao ko
kapengganat.
7 Ogaid na so kapelimoda ko isa ka maginged na mapekaoni so manga bogiyong ogaid na
kena a ba ndatar sa nanao.
8 Aya bo a pepakaoni ko manga bogiyong na so manga imam a manga kebabadan ki
Aron. Giyai na da a ikepos iyan a sogoan sii rekano ago so langon a kebabadan rekano.
9 “Igira a di kano dii makitidawa ko manga ridoay niyo a penggobat ko inged iyo na
pakaoniya niyo sa matanog so manga bogiyong a aya den tagotao ko kapagiktiyar. Na
saken, a so Allah a Tohan iyo, na keneg aken ai na penabangan ko sekano ko manga
ridoay niyo.
10 Sii mambo ko masa a kapekebabaya iyo ko kapeselaselaa niyo ko kapeseribolan ago so
ped a miyanga tetendo a kapepista niyo na mapekaoni niyo so manga bogiyong sii ko
kapesepaat iyo sa manga dii korbanen a ipesepaat a petotongen ago so dii korbanen
pantag bo ko kanggiginawai. Giyai na pekitadem iyo ko hadapan o Tohan iyo. Saken so
Allah a Tohan iyo."
Giyanatan o manga Israil so Disirto sa Sinay
11 Sii ko ikadowa polo gawii ko ikadowa a olanolan ko ikadowa ragon oriyan o
kiyapakaawa o manga Israil sa Misir na minibayaw so gabon ko liyawaw o Barombarong
a pembetadan ko Kaban sa Kapasadan.
12 Na giyanatan o manga Israil so Disirto sa Sinay na piyanagadan iran so manga darpa
taman sa tomiyareg so gabon ko mitataog a kaden sa Paran.
13 Giyai i paganay a kiyaganat iran sii ko sogoan o Allah a nggolalan ki Mosa.
14 Aya miyaona gomanat na so manga mbatabataa a dii kempo ko lompok o Yodah sii ko
atag o pandi iran. Aya magoolowan ko mbatabataa a Yodah na si Nason a wata i
Aminadab,
15 Si Nitanil a wata i Sowar na aya magoolowan ko mbatabataa a Isakar,
16 Na si Iliyab a wata i Hilon na aya magoolowan ko mbatabataa a Sibolon.
17 Oriyan iyan na tinimo so Barombarong na gomiyanat so manga mbawataan i Girson
ago so manga mbawataan i Mirari a aya on pepegawid.
18 Aya tomiyalondog kiran lomalakaw na so manga mbatabataa a dii kempo ko lompok o
Robin sii ko atag o pandi iran. Si Ilisor a wata i Sidiyor na aya magoolowan ko
mbatabataa a Robin,
19 Si Silomiyal a wata i Sorisiyaday na aya magoolowan ko mbatabataa a Simiyon,
20 Na si Iliyasap a wata i Diyowil na aya magoolowan ko mbatabataa a Gad.
21 Aya tomiyalondog kiran lomalakaw na so manga mbawataan o Kohat a aawidan iran
so soti a manga nganin. Na mapekatindeg so Barombarong sa di iran pen kapekaoma ko
bago a pekempowan iran.
22 Aya tomiyalondog kiran lomalakaw na so manga mbatabataa a dii kempo ko lompok o
Ipraim sii ko atag o pandi iran. Si Ilisiyama a wata i Amihod na aya magoolowan ko
mbatabataa a Ipraim,
23 Si Gamaliyal a wata i Pidasor na aya magoolowan ko mbatabataa a Manasih,
24 Na si Abidan a wata i Gidiyoni na aya magoolowan ko mbatabataa a Baniyamin.
25 Aya miyaori lomalakaw na so manga mbatabataa a dii kempo ko lompok o Dan sii ko
atag o pandi iran. Siran i dii nggordiya sii sa likod ko langon o manga lompok. Si
Ahiyasir a wata i Amisiyaday na aya magoolowan ko mbatabataa a Dan,
26 Si Pagiyal a wata i Okran na aya magoolowan ko mbatabataa a Asir,
27 Na si Ahira a wata i Inan na aya magoolowan ko mbatabataa a Naptali.
28 Giyai i kaaator o kapelalakaw o manga Israil a melolompolompok siran igira a
pengganat siran.
29 Samaoto na pitero i Mosa ki Hobab a wata i Riyowil a taw sa Midiyan, a panogangan i
Mosa a "Ngganat kami imanto ka song kami ko darpa a miyatero rekami o Allah a
'Imbegay aken rekano.' Na, onot ka rekami ka piyapiyaan ami seka, ka minitopa o Allah
so kapetegompiya o Israil!"
30 Ogaid na pitero on i Hobab a "Di, di ako magonot. Kesoy ako ko inged aken ago so
manga tonganay aken."
31 “Kapedipedi ka bo na di kami ngka ngganati," a tig i Mosa. "Katawan ka o anda kami
makapekempo sii ko mitataog a kaden, na seka i makapenggonanao rekami.
32 O onot ka rekami na pakapembagianen ami seka ko apiya antonaa i imbegay rekami o
Allah a manga kamapiyaan."
Gomiyanat so manga Taw
33 Kagiya gomanat so manga taw ko Palaw o Allah roo sa Sinay na lomiyalakaw siran ko
miyakatelo gawii, na pepangonaan kiran so Kaban sa Kapasadan o Allah a di kiran dii
nggonanao ko darpa a kapekempowan iran.
34 Sii ko kapelalakaw iran oman gawii na lomiliyawaw kiran so gabon o Allah.
35 Na igira a ipengganat so Kaban na ipepelalis i Mosa a
"Mbowat ka, ya Allah!
Mapakambelabelag so manga ridoay ngka!
Kapalagoyan ka iran."
36 Na igira a ipembetad ai na di niyan dii teroon a
"Kasoy ka, ya Allah,
sii ko nggibonggibo a manga mbawataan o Israil!"
MANGA BILANGAN 11
So Apoy a Miyakapoon ko Allah
Samaoto na miyanarotaro so manga taw ko Allah mipantag ko kareregeni kiran. Kagiya
maneg iyan ai na somiyokeyaw so rarangit iyan, na so apoy a poon ko Allah na komiyarab
sii kiran na riyobrob iyan so ped ko manga darpa ko melilibeta ko kampo.
2 Na gomiyoraok so manga taw ki Mosa sa tabang na miyangangarapan sekaniyan ko
Allah, na miyapareng so apoy.
3 Sabap roo na bitowan angkoto a darpa sa Tabirah, maana a 'so darpa a petotongan,' ka
ron komiyarab so apoy o Allah sii kiran.
Miyamili si Mosa sa Pito polo a manga Olowan
4 Samaoto na aden a da a oked iyan a manga salakaw a taw a moonot ko manga Israil a
tanto siran a miyanga dadali sa ped a pangenengken, na so mambo so manga Israil na
mipoon den peman gomoraok a tig iran a "O ba bo aden a karni a makan tano!
5 Peketademan tano so langon a seda a peken tano roo sa Misir a da a bayad iyan, ago so
pen so manga pipino, manga milon, manga bombay, manga tiboyas ago manga tekapen.
6 Ogaid na imanto na miyasemo tano den ka da den a ped a pekekan tano a rowar sangkai
a roti!"
(7 So roti na datar sa paras o manga roroni a liso a mapotipoti i warna.
8-9 Igira a pepanga oolog so namog sii ko kampo ko kagagawii na pegonot on so roti. Na
oman mapita na dii magenebeneb so manga taw sa kapepemorota iran on ko lopa, na
penggalingen iran ai o di na pembowayon iran. Na ipetinda iran ai a pepagapangen iran
ko kara. Aya taam iyan na datar o biskowit a sasaogan sa lana a olibi.)
10 Miyaneg i Mosa a penggoraok so langon o manga pamiliya sii ko oman i gimowa o
manga barombarong iran. Tanto a kiyararangitan so Allah, na inikasosa ini i Mosa.
11 Na iniise iyan ko Allah "Ino ako ngka tanto a pepakaregeni a oripen ka? Antonaa i da
ngka raken kasoaten? Ino ngka raken pakipembalogon angkai langon a manga taw?
12 Ba aken inikaogat ago inimbabawata angkai a manga taw? Ino ngka raken peteroa a
sekopon ko siran a datar o maritan a maawid sa ikaririga taman den ko lopa a initopa
ngka a imbegay ngka ko manga apo iran?
13 Anda ko pekakowa sa karni a mapakikan aken sangkai a manga taw? Lalayon iran
raken ipenggoraok a 'Begi kami ngka sa karni a makan ami!'
14 Di aken kegaga mawid langon angkai a manga taw a saken bo! Tanto aken ai a
mindadamar!
15 O giyai i ipekidia ngka raken na bonoa ko ngka baden imanto. O kelimoon ako ngka
na pakilidasi ngka raken so kakebinasa ko!"
16 Na pitero o Allah ki Mosa a "Witi ngka raken sa pito polo kataw a manga
pelokelokesen sa Israil a katawan ka a manga olowan ago manga sanasanaan ko manga
taw. Pakaonota ngka siran ko Barombarong a dii Telabokan na pakatindega ngka siran
roo a ped ka.
17 Penog ako ago makipembitiyarai ako reka roo, na kowa ako ko Roh a madadalem reka
na ndalemen ko ini kiran mambo. Na keped ka siran a makapembalogo sangkai a manga
taw kaan ka di kambibisai angkai a atastanggongan.
18 “Na teroa ngka ko manga taw a 'Sotiya niyo a ginawa niyo ko kapetiyagar iyo mapita,
ka ken kano sa sapo. Miyaneg kano o Allah ko kiyagoraok iyo sa "O ba bo aden a karni a
makan tano! Adiadi pen so masosowa tano roo sa Misir!" Kagiya ka maoto na mbegan
kano o Allah sa karni, na kekan iyo.
19 Kena bo a ba salongan a kapekakan iyo ron, o di na dowa gawii, o di na lima gawii, o
di na sapolo gawii, o di na dowa polo gawii,
20 Ka sii ko tarotop a saolan taman sa mamangigowa iyo ago masemo kano ron ka kagiya
tiyalikodan iyo so Allah a sisii rekano, ago gomiyoraok kano ko hadapan iyan a tig iyo a
"Ino tano pen pekaawa sa Misir?" ' "
21 Na pitero i Mosa a "Aya kadakel o manga taw a sisii raken na nem gatos nggibo, ogaid
na tig ka a 'Mbegan ko siran sa karni a pekekan iran ko soled o saolan!'
22 Apiya pen o masombali so langon o manga talon a bilibili ago kambing ago manga
sapi na ba siran on keosog? O makowa langon so manga seda ko ragat na ba kiran ai
pagetoon?"
23 Na simbag o Allah si Mosa a "Ba aden a di aken kegaga? Keilay ngka imanto o
kitoman so pitero aken reka, o di na di."
24 Mandiyadi na lominiyo si Mosa na inisampay niyan ko manga taw so miyatero
rekaniyan o Allah. Oriyan iyan na tinimo iyan so pito polo kataw a manga pelokelokesen
iran na piyakatindeg iyan siran ko melilibeta ko Barombarong.
25 Na miyanog so Allah sii ko gabon na miyakimbitiyarai ki Mosa. Kominowa
sekaniyan ko Roh a madadalem ki Mosa na inipamegay niyan ko pito polo kataw a
pelokelokesen. Na kagiya mitemo kiran so Roh na miyangalamat siran, ogaid na da iran
ai kaperomani.
26 Ogaid na aden a dowa ko pito polo a manga pelokelokesen, a si Ildad ago si Midad, a
mitelimbagak ko kampo a da siran song ko Barombarong. Na minitemo kiran mambo so
Roh na miyangalamat siran sii ko kampo.
27 Aden a mangoda a mama a miyalalagoy ki Mosa na pitero iyan on a "Si Ildad ago si
Midad na pepangalamat roo ko kampo."
28 Na si Yosowa a wata i Non a salinggogopa i Mosa ipoon den ko kangodai ron na
pitero iyan ki Mosa a "Kadnan ko, pakatarega ngka siran!"
29 Ogaid na somimbag si Mosa a "Ba ini miniawid a akal ka sabap raken? O ba bo
mbegan o Allah so Roh iyan ko langon o manga pagtaw niyan ago mbalowin iyan siran
langon a manga pepekaalamat!'
30 Na komiyasoy si Mosa ko kampo a ped iyan so manga pelokelokesen sa Israil.
Inowitan o Allah so Kampo sa manga Pogowa
31 Samaoto na piyakasamber o Allah so ndo a aya miyakabayog ko manga pogowa a
poon sa ragat. Na piyamakatana iyan siran ko mbalabala ko kampo a manga salongan a
ipelalakaw ron a kaolad iyan a poon ko oman i kilid iyan ago isa ka mitros a kakapal iran
ko liyawaw o lopa.
32 Na mililiyo so manga taw a miyamanimo sa manga pogowa sii ko miyababasa alongan
sangkoto a gawii ago miyababasa gawii taman ko miyababasa alongon ko tomiyalondog a
gawii. Da a isa kiran bo a ba tominimo sa kiyakorangan so dowa nggibo ka gantang a
manga pogowa. Na piyangayar iran ai ko mbalabala ko soled o kampo sa kiyambolada
iran on.
33 Ogaid na sii pen ko kateteteba iran ko karni ka da iran pen malamed na mimborngat
kiran den so gani o Allah na siniksa iyan siran sa maregen a paniyakit.
34 Sabap roo na bitowan iran angkoto a darpa sa Kibrot Hatabah ka kagiya inilebeng iran
roo so manga taw a miyadali koman sa ped a pangenengken.
35 Ipoon sa Kibrot Hatabah na somiyong so manga taw sa Hasirot na tomiyareg siran roo.
MANGA BILANGAN 12
Dingki i Mariyam ago si Aron si Mosa
Si Mariyam ago si Aron na inipamanemotemod iran si Mosa sabap ko karoma niyan a
taw sa Kos (ka miyangaroma sekaniyan sa iKosen a babay.)
2 Pitero iran a "Ba si bo si Mosa i pepakaokitan o Allah ko katero iyan? Ba ta niyan
mambo di pekaokiti ko katero iyan?" Na miyaneg ai o Allah.
3(Si Mosa na tanto a pepangalimbabaan a mama a di so apiya antawaa a taw ko dalem a
doniya.)
4 Na sarta den a pitero o Allah ki Mosa ago si Aron ago si Mariyam a "Song kano a telo
kataw roo ko Barombarong a dii Telabokan!" Somiyong siran roo,
5 Na miyanog so Allah sii ko mapopolaos a gabon na tominindeg ko gimowa o
Barombarong, na tiyalowan iyan si Aron ago si Mariyam na miyobay siran on.
6 Na pitero kiran o Allah a "Pamakineg kano piyapiya! Igira aden a matatago rekano a
nabi na pepayagen aken on a ginawa ko a nggolalan ko manga pangingilain, na di ako ron
dii makimbitiyarai a nggolalan ko manga taginepen.
7 Ogaid na kena a ba ini datar a ipekidia ko ki Mosa a oripen aken; inisana aken
rekaniyan so langon o manga pagtaw aken.
8 Di aken sekaniyan dii imbitiyarai a magaadapa kami a dii makanggolalan ko marayag a
katero a kena a ba maregen saboten; na pekeilay niyan so bontal o Allah. Sabap sii na
ino niyo di keleken a kapemagantaa niyo ki Mosa?"
9 Mimborngat kiran so rarangit o Allah na inawaan iyan siran.
10 Kagiya mibayaw so gabon a poon ko Barombarong na sarta den a miyabowa si
Mariyam, na miyakapoti sekaniyan a datar o giyaw. Kagiya somangor rekaniyan si Aron
na miyailay niyan a aden a bowa niyan,
11 Na inigoraok iyan ki Mosa a "Aidaw, Kadnan ko! Kapedipedi ka bo na di kami ngka
ndanega sabap sangkai a dosa a kalalalongan a kiyasogoka mi ron!
12 Di ngka sekaniyan ngganati a datar o miyatay a da mabes ko kinilotaden on o ina iyan
a miyaredak den so sabagi ko kobal iyan!"
13 Na gomiyoraok si Mosa ko Allah a "Hey Tohan ko, kapedipedi ka bo na bolongi ngka
sekaniyan; pengangampedian ako reka!"
14 Na inisembag o Allah ki Mosa a "O kiyadodai sekaniyan o ama iyan sa paras na ba
sekaniyan di keyai ko soled o pito gawii? Pakaliyowa ngka sekaniyan ko kampo ko soled
o pito gawii na mapopos oto na mapekasoled sekaniyan den ko kampo."
15 Kagiya ka maoto na miyapakatareg si Mariyam ko liyo o kampo ko soled o pito gawii,
na da den pagalin sa kampo so manga taw taman sa da on makasoled peroman si
Mariyam.
16 Oriyan iyan na gomiyanat siran sa Hasirot na sii siran mikempo ko mitataog a kaden
sa Paran.
MANGA BILANGAN 13
So Sapolo ago Dowa a manga Manoriman
2 “Sogo ka sa manga mama a makapanoriman ko inged a Kanaan, a so lopa a imbegay
aken ko manga Israil. Pamilii ngka sa sakataw a olowan so oman i isa ko sapolo ago
dowa ka mbatabataa."
3 Na iniggolalan i Mosa so inisogo on o Allah. Miyamili sekaniyan sa sapolo ago dowa a
manga olowan o manga Israil na piyakalalakaw niyan siran a poon ko kampo iran ko
mitataog a kaden sa Paran.
4 Giyai i manga ngaran iran:
Si Siyamowa a wata i Sakor a poon ko mbatabataa a Robin,
5 Si Siyapat a wata i Hori a poon ko mbatabataa a Simiyon,
6 Si Kaleb a wata i Yaponih a poon ko mbatabataa a Yodah,
7 Si Igal a wata i Yosop a poon ko mbatabataa a Isakar,
8 Si Hosiya a wata i Non a poon ko mbatabataa a Ipraim,
9 Si Palti a wata i Rapo a poon ko mbatabataa a Baniyamin,
10 Si Gadiyal a wata i Sodi a poon ko mbatabataa a Sibolon,
11 Si Gadi a wata i Sosi a poon ko mbatabataa a Manasih (a wata i Yosop),
12 Si Amiyal a wata i Gimali a poon ko mbatabataa a Dan,
13 Si Sitor a wata i Mikail a poon ko mbatabataa a Asir,
14 Si Nakbi a wata i Bopsi a poon ko mbatabataa a Naptali,
15 Ago si Giyowil a wata i Maki a poon ko mbatabataa a Gad.
16 Giyanan so manga ngaran o manga mama a siyogo i Mosa a makapariksa ko inged.
(Bitowan i Mosa si Hosiya a wata i Non sa Yosowa.)
17 Isako sogoon siran i Mosa sa kapanorimani ran ko inged a Kanaan na pitero iyan kiran
a "Lalakaw kano sa tampar sa pagotaraan a sii kano pagokit ko disirto sa pagabagatan a
Kanaan na takedeg kano ko kapalawan.
18 Ilaya niyo o antonaa i mapeparas o lopa, na pariksaa niyo o ba manga babager so
kibabaling on o di na manga lolobay, ago o ba siran madakel o di na maito,
19 Ago antonaa i kapakambebetad o manga inged a babalingan iran o ba mapiya o di na
marata, ago o ba da a kota iyan o di na kikakokotaan,
20 Ago antonaa so lopa on, ba masibokar o di na di, na ba aden a manga kalasan on o di
na da. Na panamari niyo a kapakaawid iyo ko ped ko onga sapad a pepamangeto
sangkoto a lopa." (Samaoto na mosim a kaperebasa ko paganay a ipagonga o manga
obas.)
21 Mandiyadi na lomiyalakaw so manga mama sa tampar sa pagotaraan na
piyanorimanan iran so lopa ipoon ko mitataog a kaden sa Sin na taman den sa Rihob a
marani sa Libo Hamat.
22 Sii ko kapegokit iran sa Nigib na miyakaoma siran sa Hibron a ron kibabaling so
manga mbawataan i Ahiman, Siyasay ago si Talmay a manga kiyababadan ko Anak.
(Miyabangon a Hibron sa pito pen ragon a da kabangon a Sowan roo sa Misir.)
23 Kagiya makaoma siran ko Balintad a Iskol na roo siran somiyapak ko obas sa aden a
sapingi on a tanto a mapened a kailangan a matibal o dowa ka taw, na miyawid siran pen
sa manga granada ago manga higos.
24 Bitowan angkoto a darpa sa balintad a Iskol sabap ko sapingi a manga obas a siyapak
roo o manga Israil.
So Totol o manga Manoriman
25 Oriyan o pat polo gawii a kiyapanoriman iran na mimbabaling so manga mama
26 Sa Kadis ko mitataog a kaden sa Paran na piyanotol iran ki Mosa ago si Aron ago so
langon o isa ka maginged a Israil so miyasima iran, na piyakiilay iran kiran so manga
onga sapad a miyakowa iran ko lopa.
27 Pitero iran ki Mosa a "Somiyong kami ko lopa a piyakisongowan ka rekami, na
mataan den a pekepakayan ai ago oodaren, na katii so manga onga sapad on.
28 Ogaid na manga babager so manga taw a kibabaling on, na manga ala ago kikokotaan
so manga siti iran. Liyo ron pen na miyailay ami roo so manga kiyababadan ki Anak a
manga iganti!
29 So manga Amalikiyo na kibabaling ko pagabagatan ko inged, so manga Hitiyo, manga
Hibosiyo ago so manga Amoriyo na aya kibabaling ko manga kapalawan, na so manga
Kanaaniyo na sii mababaling ko kilid a ragat ago sii ko kilid a Lawasaig a Yordan."
30 Ogaid na piyakarenek i Kaleb so manga taw a dii penon ki Mosa a tig iyan a "Somong
tano roo den imanto na tanganen tano so lopa, ka mataan a ketaban tano!"
31 Ogaid na so ped a manga mama a miyonot ki Kaleb na pitero iran a "Di tano kegobat
angkoto a manga taw! Manga babager siran a di sektano!"
32 Na piyakalangkap iran ko manga Israil so marata a totol makapantag ko inged a tig
iran a "So lopa a piyanorimanan ami na pelameden iyan so manga taw a kibabaling on.
So langon a taw a miyailay ami roo na tanto a manga ala.
33 Miyailay ami roo so manga Nipilim a manga kiyababadan ki Anak a miyakapoon ko
manga iganti. Datar kami o matag baden manga tarapan o pagabain ami kiran a ginawa
mi, na datar anan mambo a kapekeilaya iran rekami."
MANGA BILANGAN 14
Miyongkir so manga Taw
Mandiyadi na gomiyoraok sa matanog so langon o manga taw, na somigad siran sebenar
ko miyababasa gawii.
2 Piyanarotaroan iran si Mosa ago si Aron na pitero kiran o langon o isa ka maginged a
Israil a "O ba bo kami miyamatay roo sa Misir, o di na sii sangkai a mitataog a kaden!
3 Ino kami pen pagowita o Allah sangkoto a inged? Pematay kami baden ko katidawa, na
penga bibiyag so manga karoma ago manga wata ami! Ba di tomo a komasoy tano sa
Misir?"
4 Na pitero o oman i isa ko ped iyan a "Tomoro tano sa nakoda na komasoy tano sa
Misir!"
5 Mandiyadi na gomipe si Mosa ago si Aron ko lopa sii ko danga o isa ka maginged a
Israil a malilimod roo.
6 Na si Yosowa a wata i Non ago si Kaleb a wata i Yaponih a ped siran ko
miyakapanoriman ko lopa na kinisi iran so manga nditaren iran ko kiyarata a ginawa iran,
7 Na pitero iran ko langon o manga Israil a malilimod roo a "So lopa a siyongowan ami
ago piyanorimanan ami na tanto a mapiya a lopa!
8 O masoat rektano so Allah na pagowiten tano niyan sangkoto a lopa a pekepakayan ago
oodaren na imbegay niyan rektano.
9 Di niyo sopaka so Allah, na di niyo keleken so manga taw ko inged ka malebod a
katebana tano kiran. Da den a pekalinding kiran, ogaid na sisii rektano so Allah! Di niyo
siran keleken!"
10 Na inipagita o langon o isa ka maginged a kaperobaka iran a ator ki Yosowa ago si
Kaleb, ogaid na sarta den a mipeyag so bantogan o Allah ko liyawaw o Barombarong a
dii Telabokan sii ko langon o manga Israil.
11 Na pitero o Allah ki Mosa a "Ay katey pen a kipekegowaden raken angkai a manga
taw? Ay katey pen a di iran raken kaperatiyayaa apiya pen kiyanggolaolaan ko siran sa
madakel a piyakamemesa a manga nanao?
12 Na, siksaan ko siran a paniyakit ago itolak pen na mbelowin ko seka a nasiyon a lebi a
mala ago mabager a di siran!"
Inipangangarapan i Mosa so manga Taw
Na pitero i Mosa ko Allah a "Piyakaliyo ngka angkai a manga taw a poon sa Misir a
nggolalan ko kala a ka i gaos. Na amay ka maneg o manga Imisiren o antonaa i inikidia
ngka ko manga pagtaw ngka
14 Na penotolen iran ai ko manga kibabaling sangkai a inged. Na miyaneg o manga taw
sangkai a inged a seka, ya Allah, na mipageepeda o manga pagtaw ngka ago
miyakipagilaya ka kiran, ya Allah, ago isasayap kiran so gabon ka. Katawan iran a
pepangonaan ka kiran ko mapopolaos a gabon igira a daondaw ago mapopolaos a apoy
igira a gagawii.
15 Na o pamonoa ngka langon angkai a manga taw na so manga nasiyon a miyamakaneg
makapantag ko bantogan ka na mapetero iran a
16'Sabap sa di kegaga o Allah a kapekasoleda niyan ko manga pagtaw niyan ko inged a
inisepa iyan a imbegay niyan kiran na piyolang iyan siran ko mitataog a kaden.'
17 “Kapedipedi ka bo, Kadnan ko, na pakiilain ka imanto so kala a ka i kapaar na
tomanen ka so initopa ngka ko kiyateroa ngka sa
18'Saken, a so Allah, na kena a ba malebod kararangiti a tanto ako a masalinggagaw a
peperila sa kadostaan ago kapakasopak, ogaid na di aken pelepasen domaneg so
miyamakasela, ka ipetena aken so dosa o manga ama ko manga wata iran ago manga apo
taman ko ikatelo ago ikapat ka apid iran.'
19 Na pepangangampedian ako reka, ya Allah, na rilai ngka so dosa angkai a manga taw
sabap ko kala a ka i gagaw a datar o kiyarilai ngka kiran ipoon ko kiyaganat iran sa Misir
taman imanto!"
20 Na somimbag so Allah a "Rinilaan ko siran a so den so piyangni ngka.
21 Ogaid na mataan den ko kaooyagoyag aken ago so kipepeno o bantogan aken ko
dalem a doniya
22 Ka da den a isa bo sangkai a manga taw a ba pekasoled sangkoto a inged. Miyailay
iran so bantogan aken ago so piyakamemesa a manga nanao a pinggolaola ko sa Misir ago
sii ko mitataog a kaden ogaid na madakel den a kiyatepengi ran raken ko da iran raken
kaparatiyayaa.
23 Di iran den keilay so lopa a inisepa aken a imbegay aken ko manga apo iran. Da den a
isa kiran bo a miyagowad raken a ba on pekasoled.
24 Ogaid na masasalebo so pamikiran o oripen aken a si Kaleb, na tarotop a
kapepangongonotani niyan raken. Sabap roo na pagowiten ko sekaniyan ko lopa a
siyongowan iyan na mapekewali o manga kebabadan on so inged
25 A so manga balintad on i babalingan imanto o manga Amalakiyo ago manga
Kanaaniyo. Mapita na pepato kano ago ganat kano komasoy ko mitataog a kaden sa
tampar ko Mariga a Ragat."
Diyaneg o Allah so manga Israil ko Kiyapanarotaro iran
27 “Ay katey pen a kasesebari aken sangkai a manga rarata a taw a pepanarotaroan ako
iran? Miyaneg aken so inipanemotemod angkai a manga Israil.
28 Na teroa niyo kiran a 'Mataan den ko kaooyagoyag aken, ka so den so miyaneg aken a
miyatero iyo i ikidia ko rekano.
29 Pematay kano na pemangibegak so manga bangkay niyo sii sangkai a mitataog a
kaden. Sabap sa piyanarotaroan ako niyo na da den a sakataw rekano bo a miyakapagidad
sa dowa polo ragon ago lawan pen
30 A ba pekasoled ko inged a inisepa aken a pekibalingan aken rekano a liyo ron si Kaleb
a wata i Yaponih ago si Yosowa a wata i Non.
31 Na so manga wata iyo a miyatero iyo a penga bibiyag na aya ko ron pekasoleden a
ikepiya a ginawa iran so inged a inikagowad iyo.
32 Ogaid na sekano na pemangibegak so manga bangkay niyo sangkai a mitataog a
kaden.
33 So manga wata iyo na pegandawandaw siran sangkai a mitataog a kaden ko soled o pat
polo ragon a pepanga rarasay sabap ko di niyo kaperatiyaya taman sa mibegak so
moripori ko manga bangkay niyo ko mitataog a kaden.
34 Datar o kiyatey o kiyapanoriman iyo ko inged a pat polo gawii na pat polo ragon
mambo a kakerasay niyo sabap ko manga dosa niyo, a saragon a imbadal ko oman i
salongan on. Na ketintiman niyo so kariridoa ko rekano!'
35 Saken, a so Allah, i mitero sii! Mataan a penggolaolaan ko ini sangkai langon a
manga rarata a taw a miyataayon sa kiyasopaka iran raken. Kelengan siran matay sii
sangkai a mitataog a kaden!"
36-37 Na so manga mama a miyasogo i Mosa a miyanoriman ko inged a mimbalingan
ago piyakapanarotaro iran so manga taw ko Allah a nggolalan ko kiyapakalangkapa iran
ko marata a totol makapantag ko inged na siniksa siran o Allah a paniyakit, na miyamatay
siran.
38 Sii ko manga mama a miyanoriman ko inged na si bo si Yosowa a wata i Non ago si
Kaleb a wata i Yaponih i da on matay.
Tipengan o manga Israil a Kasoledi iran ko Inged
39 Kagiya panotolen i Mosa ko langon o manga Israil so pitero o Allah na tanto siran a
miyakamboko.
40 Na teked a kapipita ko talondog a gawii na mimbowat siran komabalaga na
tomiyakedeg siran ko poro o palaw a tig iran a "Katii kami a makatitiyagar somong ko
darpa a initopa rektano o Allah, ka kagiya miyakandosa kami."
Ogaid na pitero kiran i Mosa a "Ino niyo imanto sogoka so inisogo o Allah? Di niyo
kibolos so pamikiran iyo!
42 Di kano roo song. Kena a ba niyo mipageepeda so Allah na tebanen kano o manga
ridoay niyo.
43 Makipetidawa rekano so manga Amalikiyo ago so manga Kanaaniyo na pematay kano
a pedang. Di rekano magonot so Tohan ka kagiya tiyalikodan iyo sekaniyan."
44 Ogaid na sabap ko kategas iran i olo na tomiyaros siran lomalakaw a pegantap siran ko
kapalawan apiya pen da den awa si Mosa o di na so Kaban sa Kapasadan o Allah ko
kampo.
45 Na tiyondagayan siran o manga Amalikiyo ago so manga Kanaaniyo a kibabaling
sangkoto a kapalawan na miyakitidawa ko manga Israil na tiyaban iran ago inipananapek
iran siran taman den sa Hormah.
MANGA BILANGAN 15
Manga Kokoman mipantag ko dii Kakorban
2 “Teroa ngka ko manga Israil a 'Oriyan o kapakasoled iyo ko inged a imbegay aken
rekano a mbalingan iyo
3 Na amay ka sepaat kano ko Allah sa korban a pekaokiten sa apoy apiya anda ko
petotongen a ipesepaat, o di na dii korbanen pantag bo ko samaya, o di na iklas a sapaat, o
di na ipesepaat sii ko kapepista niyo a mamot rekaniyan na aya mipekorban iyo na mama
a sapi, bilibili o di na kambing a poon ko manga talon iyo.
4-5 Saden sa pekorban sa nati a bilibili o di na kambing a isepaat a totongen ko Allah na
kerakesan iyan sa isepaat a pangenengken a isa ka kilo a mapiya a arina a sasaogan sa isa
ka litro a lana a olibi ago so isepaat a panginginomen a isa ka litro a arak.
6 O aya isepaat na mama a bilibili na kerakesan ai sa dowa ka kilo a mapiya a arina a
sasaogan sa isa ago tenga ka litro a lana a olibi,
7 Ago isa ago tenga ka litro a arak a isepaat a panginginomen. Giyai na mamot ko Allah.
8 “ 'Opama ka mama a sapi na aya niyo pekorbanen a isepaat a totongen, o di na
pekorbanen pantag bo ko samaya, o di na pekorbanen pantag bo ko kanggiginawai
9 Na aya kirakes on na telo ka kilo a mapiya a arina a sasaogan sa dowa ka litro a lana a
olibi
10 Ago dowa ka litro a arak a isepaat a panginginomen. Giyai na isepaat a totongen a
mamot ko Allah.
11 “ 'Giyanan i kirakes iyo ko oman i pekorbanen iyo a mama a sapi, o di na mama a
bilibili, o di na nati a bilibili ago nati a kambing.
12 O kalalawani so satiman a pekorbanen iyo na nggolaolaa niyo ai ko oman i isa on.
13 “ 'Oman i tenger a taw na ketoman iyan angkai a manga insarat igira a pepalad
sekaniyan sa isepaat iyan a totongen a mamot ko Allah.
14 Taman ko kapepamagapidapidi rekano na igira aden a rait o di na apiya antawaa ped a
mababaling rekano a pepalad sa sapaat a petotongen a mamot ko Allah na disomala a
sowaan iyan so di niyo dii nggolaolaan.
15 Ndatar so taritib a mipenggolalan iyo ago so rait a mababaling rekano. Giyai i da a
ikepos iyan a kokoman sii ko langon o kebabadan rekano. Sekano ago so manga rait na
ndatar sii ko hadapan o Allah
16 Na ndatar so manga sogoan ago manga kokoman a pekitoman rekano.' "
Pitero pen o Allah ki Mosa a
18 “Teroa ngka ko manga Israil a 'Oriyan o kapakasoled iyo ko inged a pagowitan ko
rekano
19 Na amay ka ken kano ko pereperan sangkoto a lopa na sapaaten iyo so sabagi on a
pamemegayan ko Allah.
20 Igira a pepangembaal kano sa paan na sibain iyo so paganay a paan a kiyambaalan ko
paganay a sabagi ko miyagaling a pereperan iyo na sapaaten iyo a pamemegayan ko Allah
a poon ko pegegikan.
21 Taman ko kapepamagapidapidi rekano na kibegay niyo angkai a pamemegayan ko
Allah a poon ko paganay a miyagaling a pereperan iyo.' "
Dii Kakorban sabap ko da Tibabaa a manga Dosa
22 “ 'Opama ka da niyo tibabaa a da niyo katomana ko apiya antonaa sogoan a inibegay o
Allah ki Mosa,
23 Na opama ka sii ko pemakatalingoma a manga gawii na di ketoman o isa ka maginged
so langon taman a inisogo rekano o Allah a miyakanggolalan ki Mosa,
24 Na o di petibabaa so kapenggolaolaa sii ka di katawan o isa ka maginged na
makapekorban so langon o isa ka maginged sa mangoda a mama a sapi a isepaat a
totongen a mamot ko Allah na kirakes on so paliyogat a isepaat a pangenengken ago
isepaat a panginginomen, ago satiman a mandangan a mapekorban sabap ko dosa.
25 Na ipenggolalan o imam so manga okitokit a kakepapasa ko dosa o langon o isa ka
maginged a Israil na kerilaan siran ka kagiya da iran tibabaa so kiyapakandosa iran ago
sabap sa inibegay iran so isepaat iran ko Allah a pekaokiten ko apoy ago so pekorbanen
sabap ko dosa.
26 Na kerilaan so langon o isa ka maginged a Israil taman ko manga rait a kibabaling
kiran, ka miyarambit siran langon ko da matibaba a kiyaribat.
27 “ 'Ogaid na o sakataw bo i miyakandosa sa da niyan tibabaa na pekawit sekaniyan sa
babay a kambing a saragon a idad iyan a pekorbanen sabap ko dosa.
28 Na sii ko hadapan o Allah na ipenggolalan o imam so manga okitokit a kakepapasa ko
dosa o taw a miyaribat ko kiyapakandosa niyan a da niyan tibabaa, na perilaan angkoto a
taw.
29 Satiman bo a kokoman a ipenggolalan ko miyakandosa sa da niyan tibabaa apiya anda
ko tenger a taw sa Israil o di na rait a mababaling rekano.
30 “ 'Ogaid na apiya antawaa i pitibaba iyan a kiyadosa niyan, a ndatar so tenger a taw
ago so rait, na miyapagitowito iyan so Allah, na kebelag sekaniyan ko isa ka maginged a
Israil.
31 Sabap sa pisodi iyan so katero o Allah ago siyogok iyan so sogoan iyan na mataan den
a kebelag sekaniyan kiran, na itena on so kadostaan iyan.' "
So Mama a Somiyogok ko Kokoman ko Gawii a Idedeke
32 Miyakaisa a gawii a kasisii o manga Israil ko mitataog a kaden na miyakailay siran sa
mama a pepangintagon ko Gawii a Idedeke.
33 Inowit iran sekaniyan ki Mosa ago si Aron ago sii ko langon o manga Israil
34 Ogaid na tiyangan iran sekaniyan baden ka da iran katokawi piyapiya o antonaa i
ikidia iran on.
35 Na giyoto a pitero o Allah ki Mosa a "Disomala a mbonoon angkoto a taw.
Kerobakan sekaniyan a ator o langon o manga taw roo ko liyo o kampo."
36 Na inowit sekaniyan o langon o isa ka maginged roo ko liyo o kampo na riyobakan
iran sekaniyan a ator taman sa miyatay a so den so inisogo o Allah ki Mosa.
So Taritib mipantag ko manga Garigay
38 “Teroa ngka ko manga Israil a 'Taman ko kapepamagapidapidi rekano na panagoi niyo
sa manga garigay so manga sisid o manga nditaren iyo, na aya ipengiket iyo ron na biro a
tanor sii ko oman i rogo niyan.
39 Aya gona angkai a manga garigay na an iyo pekeilay ago an iyo peketademi so langon
a sogoan o Allah kaan iyo ai peketoman ago di kano raken pekatalikod ko kapengonoti
niyo ko manga baya a ginawa niyo ago manga mata.
40 Giyangkai a manga garigay na pekitadem iyo ko kapetomana niyo ko langon o manga
sogoan aken kaan kano mabaloy a masosoti ko Tohan iyo.
41 Saken so Allah a Tohan iyo a miyakaliyo rekano sa inged a Misir kaan ako mabaloy a
Tohan iyo. Saken so Allah.' "
MANGA BILANGAN 16
Somiyopak si Korah, si Datan ago si Abiram
Si Korah a wata i Isar a moriyataw i Kohat a wata i Libi na mikediyat siran ago so telo
kataw a mama a poon ko mbatabataa a Robin, a si Datan ago si Abiram a manga wata i
Iliyab, ago si On a wata i Pilit.
2 Na inondoy iran so dowa gatos ago lima polo kataw a ped a manga Israil sa kasopaka
iran ki Mosa. Giyangkai a manga mama na makikilala a manga olowan a kipagaadatan o
isa ka maginged a Israil.
3 Mitimo siran na somiyong siran ki Mosa ago si Aron na pitero iran kiran a "Tanto kano
a minitaralo! So oman i isa rekami ko isa ka maginged na soti, na mipageepeda ami so
Allah. Ino niyo poporoon a ginawa niyo sangkai a manga pagtaw o Allah?"
4 Kagiya maneg ai i Mosa na gomipe sekaniyan ko lopa.
5 Na pitero iyan ki Korah ago so langon o manga ped iyan a "Amay ka mapita na pekiilay
o Allah o antawaa i rek iyan ago antawaa i soti, ka pekadarpaan iyan ko hadapan iyan
angkoto a taw a miyapili iyan.
6 Hey Korah, ago so langon a ped ka na giyai i nggolaolaa niyo: Kowa kano sa manga
petotongan sa doka
7 Na mapita na panotong kano ron sa doka ko hadapan o Allah, na so mama a kepili o
Allah na aya den soti. Sekano man a manga Libitiyo i tanto a mitataralo!"
8 Pitero pen i Mosa ki Korah a "Na pamakineg kano, hey manga Libitiyo!
9 Ba kano da kaonseri ko kinisibain rekano o Tohan o Israil ko langon o ped a manga taw
sa Israil ago piyakarani kano niyan sa ginawa niyan kaan kano makanggalebek ko
Barombarong o Allah ago makatindeg kano ko hadapan o isa ka maginged a penalagad
kiran?
10 Inibegay niyan rekano angkai a tindos a galebek ago so langon o ped ka a manga
Libitiyo, na imanto na pananamaran iyo pen a makamal iyo mambo so kaiimami!
11 Sii ko kapepanarotaroi niyo ki Aron na so den so Allah i pesopaken iyo ago so langon
o manga ped ka."
12 Na piyakisongowan i Mosa si Datan ago si Abiram a manga wata i Iliyab, ogaid na tig
iran a "Di kami ron song!
13 Ba ka da kaonseri ko kiyapakaliyowa ngka rekami ko pekepakayan ago oodaren a lopa
sa Misir kaan kami ngka mapamono sangkai a mitataog a kaden? Na imanto na kabaya a
ka pen a kapendatoi ngka rekami!
14 Liyo ron pen na da kami ngka wita ko pekepakayan ago oodaren a lopa aya pen o ba
kami ngka begi sa manga pangomaan ago asinda a obas a mapekewali ami, na imanto na
petepengan kami ngka somaliba. Di kami ron song!"
15 Na tanto a kiyararangitan si Mosa na pitero iyan ko Allah a "Di ngka terimaa so apiya
antonaa a pamemegayan a isepaat iran reka! Da den a ba ko kiran miyaaniyaya apiya
satiman bo a kimar aya pen o ba aden a isa kiran bo a kiyanggolaolaan ko sa ribat."
16 Na pitero i Mosa ki Korah a "Mapita na seka ago so langon a pepangonot reka na song
kano sii ko hadapan o Allah na song on mambo si Aron.
17 Kewit o oman i isa rekano sii ko hadapan o Allah so petotongan iyan sa doka a aden a
doka on, dowa gatos ai ago lima polo langon a petotongan sa doka, na kewit on mambo i
Aron so petotongan iyan sa doka."
18 Sabap san na kinowa o oman i isa kiran so petotongan iyan sa doka na tiyagoan iran sa
manga waga ago doka na tominindeg siran ko gimowa o Barombarong a dii Telabokan a
ped iran si Mosa ago si Aron.
19 Na kagiya matimo i Korah so langon o manga ped iyan na siyakeb iran si Mosa ago si
Aron sii ko gimowa o Barombarong na mipeyag so bantogan o Allah ko langon o isa ka
maginged,
21 “Awata niyo angkai a malilimod ka polangen ko siran sa sagogona!"
22 Ogaid na gomipe si Mosa ago si Aron ko lopa na inigoraok iran a "Ya Allah a Tohan o
langon o manga niyawa o manosiya, na ba ngka kerarangiti so langon o isa ka maginged
sabap ko kiyadosa o sasakataw bo a mama?"
24 “Teroa ngka ko manga taw a awata iran so manga barombarong i siki Korah, Datan
ago si Abiram."
25 Na minggagaan somong si Mosa ki Datan ago si Abiram a oonotan sekaniyan o manga
pelokelokesen sa Israil.
26 Pitero iyan ko manga taw a "Awata niyo so manga barombarong angkai a manga rarata
a taw! Di niyo sekoa so apiya antonaa a rek iran ka o ba kano baden mirakes ko
kapolanga kiran sabap ko manga dosa iran."
27 Sabap roo na inawat o manga taw so manga barombarong i siki Korah, Datan ago si
Abiram.
Samaoto na lomiliyo si Datan ago si Abiram a kititindeg ko manga gimowa o manga
barombarong iran a ped iran so manga karoma iran ago manga wata.
28 Na pitero i Mosa ko manga taw a "Giyai i kaketokawi niyo a siyogo ako o Allah sa
kanggolaolaa ko sangkai langon a pinggolaola ko ago kena a ba aken akal galebek.
29 O aya ipematay angkai a manga taw na kalilid a kapatay ka aya keokitan iran na so bo
so kalalayaman a pekeolaola o manosiya na da ako sogoa o Allah.
30 Ogaid na o sabelek a penggolaolaan o Allah ka so lopa na ngganga ago lameden iyan
siran a rakes o langon taman a rek iran na o manga oolog siran ko kobor iran a kikaooyag
na ketokawan iyo a giyangkai a manga mama na inikagowad iran so Allah."
31 Sii den ko kiyaposa niyan sii tero na miyaopak so lopa a katitindegan iran
32 Ka mingganga ini ago liyamed iyan siran taman ko manga pamiliya iran ago so langon
o manga pagtaw i Korah a rakes o langon taman iran.
33 Miyanga oolog siran ko kobor iran a kikaooyag pen a rakes o langon a rek iran. Na
mindemet so lopa na minitambon kiran, na miyapapas siran den ko isa ka maginged.
34 Na so langon o ped a manga Israil a ndodoo na miyamalagoy ko kiyanega iran ko
kapekisek iran a ipepelalalis o manga taw a "Mamalagoy tano! O ba tano baden mambo
malamed o lopa!"
35 Na sarta den a somiyokeyaw so apoy a poon ko Allah na riyapog iyan so dowa gatos
ago lima polo kataw a manga mama a miyamanapaat sa doka.
So manga Petotongan sa Doka
37 “Teroa ngka ki Iliyasar a wata i Aron a 'Pangowaa ngka so manga petotongan sa doka
a poon ko miyalamba o apoy na go ngka kayara so manga waga on sii ko malo on
maawat, ka so manga petotongan sa doka na palaya miyasoti
38 Sabap ko kiyapangowita on ko hadapan o Allah. Kagiya ka maoto na kowaa ngka
ngkai a manga piyanotongan sa doka o manga mama a miyapamono sabap ko
kiyapakandosa iran, na sesela ngka ini a ipelapis ko aparan, kaan ai mabaloy a nanao a
ipelalang ko manga Israil.' "
39 Kagiya ka maoto si Iliyasar a so imam na piyanimo iyan so manga galang a petotongan
sa doka a inawidan angkoto a manga mama a miyanga tototong na piyakisesel iyan ai a
ipelapis ko aparan
40 A so den so inisogo rekaniyan o Allah a nggolalan ki Mosa. Giyai i ipelalang ko
manga Israil sa da den a ped a taw a pekatotong sa doka ko hadapan o Allah a
makaliyoliyo ko moriyataw i Aron, ka o aden a somogok on na kebinasa sekaniyan a
datar i Korah ago so manga pagtaw niyan.
41 Ogaid na sii ko talondog a gawii na so langon o isa ka maginged a Israil na
piyanarotaroan iran si Mosa ago si Aron a tig iran a "Piyamono iyo so manga pagtaw o
Allah!"
42 Ogaid na kagiya nggoronggorongan o manga taw si Mosa ago si Aron na siyangoran
iran so Barombarong a dii Telabokan na miyailay iran a minisapeng on so gabon ago
mipeyag on so bantogan o Allah.
43 Na somiyong si Mosa ago si Aron ko danga o Barombarong
45 “Awata niyo angkai a malilimod ka polangen ko siran sa sagogona!" Ogaid na gomipe
si Mosa ago si Aron ko lopa,
46 Na pitero i Mosa ki Aron a "Kowaa ngka so petotongan ka sa doka na betadi ngka sa
waga a poon ko aparan na tagoi ngka ini sa doka, na nggagaani ngka mowit ko malilimod
a manga taw na ron ka on sapaaten ko Allah kaan siran karilai, ka mimborngat den so
gani o Allah na kiyapoonan den so morala."
47 Na ininggolalan i Aron so pitero on i Mosa, na miyalalagoy ko look o malilimod a
manga taw. Samaoto na so paniyakit na kiyapoonan iyan den mamono so manga taw
ogaid na minisapaat nggagaan i Aron so doka kaan mapapas so dosa iran.
48 Tominindeg sekaniyan ko pageletan o miyamatay ago so kikaooyag na tomiyareg so
kasiksaan.
49 Ogaid na sapolo ago pat nggibo ago pito gatos a manga Israil a miyamatay sabap ko
morala a da on maped milang so miyamatay sabap ko kiyapakasopak i Korah.
50 Oriyan iyan na kagiya tomareg den so morala na komiyasoy si Aron ki Mosa sii ko
gimowa o Barombarong.
MANGA BILANGAN 17
So Teken i Aron
2 “Pakimbitiyarai ka ko manga Israil na kowa ka kiran sa sapolo ago dowa a manga teken
a nggagaisa ko oman i olowan o oman i isa ka mbatabataa a manga Israil, na soraten ka so
ngaran o oman i olowan sii ko teken iyan.
3 Sii ko teken o mbatabataa a Libi na soraten ka on so ngaran i Aron, ka sesatiman a
teken para ko oman i mbatabataa.
4 Wita ngka ini langon ko Barombarong na betaden ka sii ko onaan o Kaban sa
Kapasadan a ron aken seka petelaboka.
5 Na so teken o mama a kepili aken na pelonawan a ombos. Sii sangkai a okit na
pekageneken ko angkai a lalayon rekano dii kapanarotaroi o manga Israil."
6 Inisampay i Mosa ko manga Israil angkai a manga insarat, na so oman i olowan iran na
migay rekaniyan sa teken, a sesatiman ko oman i isa ka mbatabataa, na sapolo ago dowa a
teken langon, ago maaped on so teken i Aron.
7 Na inibetad i Mosa so manga teken sii ko onaan o Kaban sa Kapasadan sii ko
Barombarong.
8 Sii ko talondog a gawii na somiyoled si Mosa ko Barombarong na miyailay niyan a so
teken i Aron a poon ko mbatabataa a Libi na liyonawan ago miyagombos, na
miyagobarobar taros a miyonga sa manga almondo!
9 Mandiyadi na kinowa i Mosa so langon o manga teken a matatago ko hadapan o Allah
na iniliyo niyan ai ago piyakiilay niyan ko langon o manga Israil, na kinowa o oman i
olowan so teken iyan.
10 Na pitero o Allah ki Mosa a "Kasowin ka metad ko onaan o Kaban sa Kapasadan so
teken i Aron kaan roo den matatago a mabaloy a lalangan ko manga taongkir, ka pematay
siran o di iran geneki so di iran raken dii kapanarotaroi."
11 Na ininggolalan i Mosa so inisogo on o Allah.
12 Na inigoraok o manga Israil ki Mosa a "O giyanan na pematay kami den! Palaya kami
kebinasa!
13 Apiya so kapekaobay o apiya antawaa ko Barombarong o Allah na ipetay niyan! Ba
kami langon pematay?"
MANGA BILANGAN 18
So manga Galebek o manga Imam
Pitero o Allah ki Aron a "Seka ago so manga wata a ka ago so manga Libitiyo na aya
makapembalogo ko manga kasalaan a kesogok sii ko Soti a Darpa, ogaid na sekano ago
so manga wata a ka i aya bo makapembalogo ko kasalaan a kesogok mipantag ko
kaiimami.
2 “Pakaonota ngka so manga tonganay ngka ko mbatabataa a Libi sii ko Barombarong a
pembetadan ko Kaban sa Kapasadan an siran i pepekaogop rekano ago so manga wata a
ka sii ko kapepanalagad iyo ron.
3 Ogaid na igira a di siran dii nggalebek ko Barombarong sii ko kapepamandoi niyo kiran
na di siran den pekaobay ko manga kasangkapan ko Soti a Darpa aya pen o ba sii ko
aparan, ka o ba baden mamatay kano langon.
4 Keogopan ka iran a aya kesangan iran na so kapegipata ko Barombarong a dii
Telabokan ago so langon a manga galebek on, ogaid na da a pekaogop rekano a salakaw a
taw a liyo ko mbawataan o Libi.
5 Seka bo ago so manga wata a ka i pekasangan ko kapekibira ko Soti a Darpa ago so
aparan kaan di pemborngat peman so rarangit aken ko manga Israil.
6 Saken den i minili ko manga tonganay ngka a manga Libitiyo a poon ko manga Israil a
aya reka den pamemegayan a isesenggay ko Allah kaan siran makanggalebek sii ko
Barombarong a dii Telabokan.
7 Ogaid na seka bo ago so manga wata a ka i makapenggolalan ko kaiimami sii ko langon
a galebek a mipantag ko aparan ago sii ko soled o Lebi a Soti a Darpa. Pamemegayan
aken rekano so kaiimami, na apiya antawaa a ped a taw i mobay ko soti a manga nganin
na mbonoon."
So Bagian o manga Imam ko manga Sapaat
8 Na pitero o Allah ki Aron a "Piyakikibir aken reka so manga soasoat a ipesepaat raken o
manga Israil; langon angkai a manga soti a pamemegayan raken o manga Israil na
inisenggay aken a bagian iyo ago so manga wata a ka ago sii pen ko manga kebabadan
reka sa taman sa pakataman.
9 Rek ka so ped ko manga soti a ipesepaat a di totongen ko apoy. Giyangkai a sabaad ko
langon a soti a ipesepaat iran raken apiya anda ko ipesepaat a pangenengken, o di na dii
korbanen sabap ko dosa, o di na dii korbanen sabap ko kiyataksil na bagian ka ini ago so
manga wata a ka.
10 Kana niyo ai ko soti a darpa; so bo so manga mama i pekakan on; soti ai para rekano.
11 “Rek ka pen so langon a pamemegayan a pepeladen raken o manga Israil ko
kapekibayaon on ko hadapan aken. Inibegay aken ai rekano ago so manga wata a ka a
manga mama ago manga babay a aya niyo lalayon bagian. Pekakan sii so apiya antawaa i
masosoti sii ko pamiliya ngka.
12 “Inibegay aken reka pen so lebi a mapiya ko paganay a inionga a maperagon a
ipesepaat raken o manga Israil, a so lana a olibi, arak ago so manga pereperan.
13 So langon o paganay a pekeragon ko lopa a pegowiten iran ko Allah na rek ka. Na
pekakan on so oman i isa a masosoti ko pamiliya ngka.
14 “So langon taman sii sa Israil a isesenggay ko Allah na rek ka pen.
15 “Oman i mama a popaw sa lawas ko manga Israil ago so oman i paganay a inimbawata
a mama o manga ayam a isepaat iran ko Allah na rek ka. Ogaid na keaon ka so oman i
popaw sa lawas a taw ago so oman i paganay a inimbawata a mama o karam a ayam.
16 Keaon ka siran amay ka makasaolan a idad iran a aya ipegaon on na lima timan a
pelata a pirak a piyakaokit ko timbangan ko Barombarong.
17 Ogaid na di ngka keaon so paganay a inimbawata o manga sapi, manga bilibili, o di na
manga kambing. Palaya ini soti a isesenggay a rek o Allah. Penombaliin ai na
pamesipesiken ka so rogo iran ko aparan na panotonga ngka so manga sibo iran a
ipesoasoat a mamot ko Allah.
18 Na rek ka so sapo angkai a manga ayam a datar o kagepe ago so kawanan a bobon o
manga ayam a inibayaw raken.
19 “Langon angkai a soti a pamemegayan a ipesepaat o manga Israil ko Allah na
inisenggay aken a rek ka ago so manga wata a ka a manga mama ago manga babay a aya
niyo den lalayon bagian. Giyai na di den kebaroba ago da a ikepos iyan a kapasadan o
Allah mipantag reka ago so manga kebabadan reka."
20 Na pitero pen o Allah ki Aron a "Da a ba ngka mapekawali ko lopa o manga Israil aya
pen o ba aden a bagian ka kiran. Saken i bagian ka ago kawali ngka sii kiran.
So Bagian o manga Libitiyo
21 “Makapantag ko mbatabataa a Libi a manga tonganay ngka na inisenggay aken a rek
iran so langon a manga diyakat o manga Israil maana a so ikasapolo bagi ko langon a rek
iran a aya iran den kawali a imbadal ko galebek iran a so kapekibira ko Barombarong a
dii Telabokan.
22 Ipoon imanto na di den pekaobay so ped a manga Israil ko Barombarong, ka o mobay
siran on na kedosa siran ago pematay.
23 So bo so manga Libitiyo na aya makapenggalebek ko Barombarong, na mipembalogo
iran so apiya antonaa a kasalaan a kesogok on. Giyai na da a kaposan iyan a taritib taman
ko kapamagapidapidi rekano. Da a mapekewali o manga Libitiyo sii ko manga Israil
24 Ka kagiya inibegay aken kiran a kawali iran so ikasapolo bagi ko rek o manga Israil a
ipesepaat iran a pamemegayan ko Allah. Giyanan i kiyateroa ko ron sa da a ba iran
mapekewali ko manga Israil."
So Diyakat a Kibegay o manga Libitiyo
26 “Teroa ngka ko manga Libitiyo a 'Amay ka matarima iyo ko manga Israil so ikasapolo
bagi a diyakat a inibegay aken rekano a kawali niyo na kepalad iyo raken so ikasapolo
bagi sangkoto a diyakat a aya niyo raken pamemegayan.
27 Giyangkai a pamemegayan iyo na imbilang a datar o pereperan a poon ko pegegikan o
di na ig a obas a poon ko petemekan on.
28 Sangkai a okit na pekapalad kano pen ko Allah sa pamemegayan a poon ko langon a
ikasapolo bagi a diyakat o manga Israil a peketarima iyo. Giyangkai a pamemegayan iyo
ko Allah na kibegay niyo ki Aron a so imam.
29 Kepalad iyo ko Allah a bagian iyan so lebi a mapiya ago lebi a soti ko langon taman a
minindiyakat rekano.
30 Na igira a pepeladen iyo ko Allah so lebi a mapiya on na imbilang ai rekano a sii den
pepekapoon ko pegegikan o di na so petemekan sa arak.
31 Na sekano ago so manga pamiliya niyo na kekan iyo so kelamba on ko apiya anda, ka
sokay niyo ai ko di niyo dii kanggalebek ko Barombarong a dii Telabokan.
32 Kena a ba kano kesala ko kakena niyo sii asar a miyapalad iyo ko Allah so lebi a
mapiya on. Ogaid na iktiyari niyo o ba niyo kidian ko soti a manga pamemegayan o
manga Israil a datar o ipekidia niyo ko kalilid a manga nganin kaan kano di pematay.
MANGA BILANGAN 19
So Ig a Ipelompiyo
2 “Began iyo ko manga Israil angkai a taritib a ipapaliyogat kiran o Allah: Teroa niyo
kiran a wit siran rekano sa mariga a babay a sapi a kangodaan pen a da a daway niyan ago
da den kasangani sa kokoong.
3 Began niyo ki Iliyasar a imam na kewit iyan ai ko liyo o kampo a ron kesombali sii ko
hadapan iyan.
4 Oriyan iyan na kisombo i Iliyasar so tindoro iyan ko rogo na mipemesipesik iyan ai sa
makapito a ipagantap iyan ko hadapan o Barombarong a dii Telabokan.
5 Na kapembantayan iyan a katotonga ko intiro o sapi a rakes o kobal iyan, sapo, rogo
ago manga tinai niyan.
6 Na pekakowa so imam sa satebi a kayo a sidro, sapak a hisop ago mariga a tiniker na
ipagitog iyan ai sii ko apoy a petotongan ko sapi.
7 Maipos oto na kepipian iyan so manga nditaren iyan ago makapepaigo sa ig. Oriyan
iyan na pekasoled sekaniyan ko kampo, ogaid na madadalem sekaniyan den a hadas
taman ko perimon.
8 So mama a tomiyotong ko sapi na kepipian iyan mambo so nditaren iyan ago
makapepaigo na madadalem sekaniyan den a hadas taman sa perimon.
9 “Saden sa masosoti a mama na ketimo iyan so manga ombi o sapi na kibetad iyan sii ko
soti a darpa ko liyo o kampo. Ketago ini roo a keosar o isa ka maginged a Israil, ka iseog
iran ai ko ig a pegosaren ko okitokit a ipelompiyo ko sala.
10 So mama a miyanimo ko ombi o sapi na kepipian iyan mambo so nditaren iyan na
madadalem sekaniyan den a hadas taman sa perimon. Giyai na da a ikepos iyan a sogoan
para ko manga Israil ago so manga salakaw a taw a mababaling kiran.
So Kapakaseko sa Miyatay
11 “Apiya antawaa i makaseko sa bangkay o taw na madadalem den a hadas ko soled o
pito gawii.
12 Disomala a kelompiyo niyan a ginawa niyan a nggolalan sangkai a ig a ipelompiyo sii
ko ikatelo ago ikapito gawii. Ogaid na o di niyan pelompiyowa a ginawa niyan sii ko
ikatelo ago ikapito gawii na di sekaniyan kesoti.
13 Saden sa makaseko sa bangkay o taw a di niyan pelompiyon a ginawa niyan na
kiyaresikan iyan so soti a darpa o Allah, na kebelag sekaniyan ko isa ka maginged a Israil.
Sabap sa da rekaniyan mipamesipesik so ig a ipelompiyo na ketatap rekaniyan so
kadadalem iyan a hadas.
14 “Giyai i kokoman a tomanen amay ka aden a taw a matay ko walay: Apiya antawaa i
sisii ko walay kagiya matay so taw ago apiya antawaa i somoled on na madadalem den a
hadas ko soled o pito gawii,
15 Na oman i di kalelekeban a pananagoay ko walay na keresikan.
16 Apiya antawaa i sisii ko pangomaan a makaseko sa taw a miyapatay a pedang o di na
baden miyatay, o di na makaseko sa tolan o taw, o di na kobor na madadalem sekaniyan
den a hadas ko soled o pito gawii.
17 “Aya ikidia ko taw a madadalem a hadas na ikowa ko ombi o mariga a sapi a tiyotong
a ipelompiyo ko sala na ketago ini ko omoy ago keododan sa mapiya a ig.
18 Oriyan iyan na so taw a masosoti na pekakowa sa sapak a hisop na isombo niyan ko ig
na mipemesipesik iyan ko walay ago so langon o manga kasangkapan on ago sii ko apiya
antawaa i miyakasoled on. Na mipemesipesik iyan pen ko miyakaseko ko tolan o
manosiya o di na kobor, o di na sii ko miyakaseko ko taw a miyabono o di na baden
miyatay.
19 Kapemesipesikan on o masosoti a taw so madadalem a hadas sii ko ikatelo ago ikapito
gawii. Na sii ko ikapito gawii na kepipian iyan so manga nditaren iyan ago makapepaigo
sa ig, na sii ko kaperimon iyan miyasoti sekaniyan den.
20 “Ogaid na so taw a madadalem a hadas a di niyan pelompiyon a ginawa niyan na
kebelag ko isa ka maginged a Israil ka kagiya kiyaresikan iyan so soti a darpa o Allah. Da
rekaniyan mipamesipesik so ig a ipelompiyo na kena a ba sekaniyan den masosoti.
21 Giyai na di den kebaroba a sogoan kiran.
"So mama a miyamesipesik ko ig a ipelompiyo na kepipian iyan mambo so nditaren
iyan. Apiya antawaa i makaseko sangkai a ig a ipelompiyo na madadalem den a hadas
taman ko perimon.
22 Apiya antonaa i maseko o taw a madadalem a hadas na kebaloy mambo a kena a ba
soti, na apiya antawaa pen i makaseko sii na madadalem den a hadas taman ko kaperimon
iyan.
MANGA BILANGAN 20
So Ig a poon ko Lakongan
Sii ko paganay a olanolan na miyakaoma so langon o isa ka maginged a Israil ko mitataog
a kaden sa Sin na mikempo siran sa Kadis. Miyatay roo si Mariyam na go minilebeng.
2 Da a ba ig a keinom o manga Israil sangkoto a darpa na pinggoronggorongan iran si
Mosa ago si Aron.
3 Na pimbongetan iran si Mosa a tig iran a "Tomo pen a minirakes kami mamatay ko
manga pagari ami sii ko danga o Barombarong o Allah!
4 Ino kami ngka pagowita sangkai a mitataog a kaden a ron kami mamatay a rakes o
manga pangangayamen ami?
5 Ino kami ngka pen pekaliyowa sa Misir ago sii kami ngka inowit sangkai a
piyakalekelek a darpa? Da a ba sii pereperan, o di na higos, ago da pen asinda on a obas
o di na granada. Apiya so ig a keinom ami na da den!"
6 Na giyanatan i Mosa ago si Aron so malilimod a manga taw na somiyong siran ko
gimowa o Barombarong a dii Telabokan na ron siran gomipe ko lopa, na mipeyag kiran
so bantogan o Allah.
8 “Kowaa ngka so teken ka, na seka ago si Aron na timoa niyo so langon o isa ka
maginged. Na pakimbitiyarai ka sangkoto a lakongan sii ko kamamasai ron o manga taw,
ka pakapembowalanen iyan so ig on. Sii sangkai a okit na kebegan ka sa ig so langon o
manga taw a poon ko lakongan kaan siran on mamakainom ago so manga
pangangayamen iran."
9 Na tiyoman i Mosa so inisogo on o Allah. Kinowa niyan so teken a poon ko hadapan o
Allah,
10 Na tinimo iran ago si Aron so manga taw sii ko danga o lakongan, na inilalis iyan
kiran a "Pamakineg kano a manga taongkir! Ba disomala pen a kapagowiti ami rekano sa
ig a pekapoon sangkai a lakongan?"
11 Giyoto a inibayaw i Mosa so teken iyan na inibentol iyan ko lakongan sa miyakadowa,
na tomiyoga on so mala a ig, na miyamanginom on so manga taw ago so pangangayamen
iran.
12 Ogaid na pitero o Allah ki Mosa ago si Aron a "Da ako niyo paratiyayaa piyapiya ka
da niyo pakikilalaan ko manga Israil so kabarakat aken. Kagiya ka maoto na kena a ba
sekano i pekawit sangkai a manga taw roo ko inged a imbegay aken kiran.
13 Miyanggolaola ini sii ko manga ig sa Miribah a ron piyanarotaroi o manga Israil so
Allah ago roo niyan kiran piyakiilay so kasosoti niyan.
Da Pakaokita a Idomiya so manga Israil
14 Sii ko katatago i Mosa sa Kadis na somiyogo sekaniyan sa manga taw ko dato sa
Idomiya a tig iran on a:
"Giyai i kabasa o manga tonganay ngka a manga Israil: Katawan ka den so langon a
kamaregenan a kiyaokitan ami,
15 A so kiyapakasong o manga apoapoan ami roo sa Misir ago so kiyapakabaling iran roo
sa miyatey den a manga ragon. So manga Imisiren na piyanatro kami ran so manga apo
ami
16 Ogaid na kagiya gomoraok kami ko Allah sa tabang na inampon iyan so pangni ami na
somiyogo sekaniyan sa malaikat na piyakaliyo kami niyan sa Misir.
"Imanto na sisii kami sa Kadis a so maito a inged ko temanaan o masasakop ka.
17 Kapedipedi ka bo na pakaokita kami ngka ko inged ka. Di ami terapasen so manga
pangomaan iyo o di na so manga asinda a obas iyo aya pen o ba kami inom sa ig ko
manga paridi iyo. Sii kami melalakaw ko mala a lalan na di kami silay sa kawanan o di
na sa diwang taman sa makaliyo kami ko masasakop ka."
18 Ogaid na somimbag so dato sa Idomiya a "Di kano pekaokit ko inged ami! O tepengi
niyo na sondolan ami sekano ago makipetidawa kami rekano.
19 Na pitero on o manga Israil a "Kedegen ami so mala a lalan, na o makainom kami o di
na so manga ayam ami ko ig ka na mbayadan ami. Da den a ped a sowaan ami a rowar ko
kapagokit ami roo a melalag."
20 Ogaid na pitero o dato sa Idomiya a "Di kano sii den pekaokit!" Na giyoto a tinimo
iyan so madakel ago manga babager a sondaro niyan na lominiyo siran sa kanggobata iran
ko manga Israil.
21 Na kagiya da iyog a Idomiya a ba on makaokit so manga Israil ko inged iran na
sominilay siran ko ped a pagokitan.
So Kiyapatay i Aron
22 Poon sa Kadis na lomiyalakaw so langon o isa ka maginged a Israil na miyaoma iran
so Palaw a Hor
23 A marani ko temanaan a Idomiya. Roo na pitero o Allah ki Mosa ago si Aron a
24 “Kitapi sii si Aron ko manga apo iyan. Di sekaniyan pekasoled ko inged a inibegay
aken ko manga Israil ka kagiya siyogok iyo so iniinsarat aken rekano roo ko ig sa
Miribah.
25 Pakaonota ngka tomakedeg si Aron ago si Iliyasar a wata iyan ko Palaw a Hor.
26 Pakindai ngka ki Aron roo so nditaren iyan ko kaiimami na go ngka pakisoloten ki
Iliyasar, ka petay roo si Aron a kitapi ko manga apo iyan."
27 Na pinggolaola i Mosa so inisogo on o Allah. Tomiyakedeg siran ko Palaw a Hor sii
ko kapegilaya on o langon o isa ka maginged.
28 Piyakindaan i Mosa ki Aron so nditaren iyan ko kaiimami ron na piyakisolot iyan ki
Iliyasar a wata iyan. Na miyatay si Aron roo ko poro o palaw, na oriyan oto na
tomiyondagay si Mosa ago si Iliyasar ko palaw.
29 Kagiya katokawan o manga taw a miyatay den si Aron na so langon o isa ka maginged
a Israil na pindiyagaan iran sekaniyan ko soled o telo polo gawii.
MANGA BILANGAN 21
Tiyaban so manga Ikanaanen
So dato sa Arad a Ikanaanen a mababaling sa pagabagatan a Kanaan na kagiya maneg
iyan a pepekaoma so manga Israil sii ko lalan a ipesong sa Atarim na giyobat iyan siran
na biniyag iyan so ped kiran.
2 Na misepa so manga Israil ko Allah a "O pakitabanen ka rekami angkai a manga taw na
na mbinasaan ami sa tarotop so manga siti iran."
3 Inampon o Allah so pangni o manga Israil na piyakitaban iyan kiran so manga
Ikanaanen, na piyaminasa iran sa tarotop so manga Ikanaanen a rakes o manga inged iran.
Sabap san na bitowan angkoto a darpa a Hormah.
So Tombaga a Nipay
4 Oriyan iyan na gomiyanat so manga Israil a poon sa Palaw a Hor na kideg iran so lalan
a ipesong ko Mariga a Ragat kaan iran maalibet so masasakop a Idomiya. Ogaid na tanto
a inoleg so manga taw sii ko kapelalakaw iran
5 Na piyanarotaroan iran so Tohan ago si Mosa a tig iran a "Ino kami ngka pekaliyowa sa
Misir kaan kami mamatay sangkai a disirto? Da a ba on paan! Da a ba on ig! Na
miyasemo kami den sangkai a da a oked iyan a pangenengken!"
6 Sabap roo na inowitan siran o Allah sa manga bibisa a nipay, na piyanoka iran so
manga taw, na madakel a manga Israil a miyamatay.
7 Na miyamanong so manga taw ki Mosa a tig iran a "Miyamakandosa kami ko
kiyapanarotaroi ami ko Allah ago seka. Pangniya ngka ko Allah a kowaan iyan rekami
angkai a manga nipay." Mandiyadi na inipangangarapan i Mosa so manga taw
8 Na pitero rekaniyan o Allah a "Mbaal ka sa nipay na tagoa ngka ko poro o polaos. Na
apiya antawaa i miyatoka a nipay na o mailay niyan ai na keoyag."
9 Na mimbaal si Mosa sa nipay a tombaga na tiyago iyan ko poro o polaos. Na apiya
antawaa i miyatoka a nipay a minilay ron na da matay.
So Kiyalalakaw o manga Israil sa Mowab
10 Tomiyaros den lomalakaw so manga Israil na mikempo siran sa Obot.
11 Gomiyanat siran sa Obot na mikempo siran sa Iya Abarim sii ko mitataog a kaden sa
tampar sa sebangan a Mowab.
12 Poon roo na lomiyalakaw siran na mikempo ko Balintad a Sirid.
13 Gomiyanat siran roo na tomiyaros ko sabala a Lawasaig a Arnon na mikempo siran sii
ko mitataog a kaden a midadair ko masasakop o manga Amoriyo. Giya Arnon na aya
temanaan a Mowab sii ko pageletan o manga Mowabiyo ago so manga Amoriyo.
14 Giyanan i sabap a aya miyatero sii ko 'Ribro a Totolan ko manga Kiyapakitidawa o
Allah' na
"..so inged a Wahib ago so manga baogan on sii sa Sopah,
so manga balintad o Lawasaig a Arnon,
15 Ago so manga silid o manga baogan
a ipetondagay taman ko inged a Ar
a matatago ko temanaan a Mowab."
16 Poon roo na tomiyaros den lomalakaw so manga Israil roo sa Bir a ndodon so paridi a
ron miyatero o Allah ki Mosa a "Timoa ngka so manga taw ka mbegan ko siran sa ig."
17 Samaoto na inipagidaida o manga Israil angkai a idaida:
"Mbowalan ka den, hey paridi!
Magidaida tano sa makapantag on,
18 Makapantag ko paridi a kiyalot o manga pendatoon,
ago so manga olowan o manga taw,
a inikalot iran on so manga tongkas iran ago manga teken."
Na poon ko mitataog a kaden na tomiyaros so manga Israil sa Matanah,
19 Na poon sa Matanah na taman sa Nahaliyal, na poon sa Nahaliyal na taman sa Bamot,
20 Na poon sa Bamot na somiyong siran ko balintad sii sa Mowab a marani ko poro o
Palaw a Pisgah a katotolongan iyan so disirto.
So Kiyatabana ki Sihon ago si Og
21 Samaoto na piyakasong o manga Israil so manga siyogo ki Sihon a dato o manga
Amoriyo a tig iran a
22 “Pakaokita kami ngka ko inged ka. Kedegen ami so mala a lalan taman sa makaliyo
kami ko masasakop ka. Di kami den tipas ko manga pangomaan iyo ago so manga asinda
niyo a obas aya pen o ba kami inom ko manga paridi iyo."
22 Ogaid na somiyangka si Sihon o ba makaokit so manga Israil ko masasakop iyan. Na
tinimo iyan baden so langon a sondaro niyan na lominiyo siran ka nggobaten iran so
manga Israil roo ko mitataog a kaden, na minitidawa iran so manga Israil roo sa Yahas.
24 Ogaid na piyamono siran o manga Israil ko katidawa na inagaw iran so inged iran
ipoon sa lawasaig a Arnon na sii bo taman sa Yabok a aya den temanaan o manga
Amoniyo, ka aaladen sa mabager so temanaan iran.
25 Inagaw o manga Israil so langon o manga siti o manga Amoriyo a rakes a Hisbon ago
so langon o melilibeta on a pagingedingedan na biyalingan iran pen.
26 Giya Hisbon na aya siti i Sihon a dato o manga Amoriyo. Gowani na miyakitidawa
sekaniyan den ko andang a dato sa Mowab na miyaagaw niyan on so intiro a lopa iyan
taman den sa Arnon.
27 Giyanan i sabap a aya dii ipagaidaida o manga dii mbabayok na:
"Song kano sii sa Hisbon a siti i Sihon!
Mabangon ai peroman ago kambagowan!
28 Miyakapoon so apoy sa Hisbon
a somiyokeyaw a poon ko siti a Sihon.
Riyapog iyan a Ar sii sa Mowab
ago liyamed iyan so manga poporo a darpa sa Arnon.
29 Dowandowaan kano, hey manga Mowabiyo!
Miyabinasa kano den a pepamanimba ko katohanan a Kimos!
So miyakapalagoy a manga wata iyan a manga mama ago manga babay
na piyakibiyag iyan ki Sihon a dato o manga Amoriyo.
30 Bininasa mi siran den sa tarotop
ipoon sa Hisbon na taman den sa Dibon.
Liyaslas ami siran den taman sa Nopah
ago roo sa Midiba."
31 Komiyaden so manga Israil ko inged o manga Amoriyo.
32 Na oriyan o kiyasogo i Mosa sa manga manoriman sa kapariksaa iran sa siti a Hasir na
miyaagaw ai o manga Israil a rakes o melilibeta on a manga inged na piyamogaw iran on
so manga Amoriyo a kibabaling roo.
33 Oriyan iyan na komiyori siran na miyantap siran sa Basan, ogaid na lominiyo ron si Og
a dato sa Basan ago so langon o manga sondaro niyan na miyakitidawa siran ko manga
Israil roo sa Idri.
34 Na pitero o Allah ki Mosa a "Di ngka sekaniyan keleken, ka piyalad aken reka den si
Og a rakes o langon o manga pagtaw niyan ago so inged iyan. Na nggolaolaa ngka
rekaniyan so inikidia ngka ki Sihon a dato o manga Amoriyo a mindato roo sa Hisbon."
35 Kagiya ka maoto na piyolang siran o manga Israil taman ko manga wata iyan a manga
mama ago so langon o pagtaw niyan, na da den a ba kiran miyakapagoyag. Na giyoto a
tiyangan iran so lopa iyan.
MANGA BILANGAN 22
Piyakisogoan o dato sa Mowab si Balaam
Na tomiyaros lomalakaw peman so manga Israil taman ko kapantaran sa Mowab na sii
siran mikempo sa sebangan a Lawasaig a Yordan a mipapantag a Yariko.
2 So dato sa Mowab, a si Balak a wata i Sipor, na katawan iyan so langon o inikidia o
manga Israil ko manga Amoriyo,
3 Na miyanga sososa siran ago so langon o manga Mowabiyo na tanto iran a inikalek so
kadakel o manga Israil.
4 Na pitero o manga Mowabiyo ko manga olowan sa Midiyan a "Giyangkai a bariboribo a
manga taw na pelameden iran so langon o melilibeta rektano a datar o sapi a pepanateb
ko manga otan sii ko pangomaan!" Sabap san na si Balak a dato sa Mowab
5 Na somiyogo sekaniyan sa manga mama ki Balaam a wata i Biyor a roo mababaling sa
Pitor a so pimbawataan on a inged a marani ko Lawasaig a Yopratis. Na inisampay iran
ki Balaam angkai a katero i Balak: "Aden a miyakaoma sii a tanto a madakel a taw a
miyamakaliyo sa Misir; misasapeng siran ko liyawaw o kalopaan na komiyaden siran ko
dair aken.
6 Kapedipedi ka bo na song ka sii imanto na sintaan ka siran raken, ka tanto siran a
mabager a di saken, ka o ba ko siran mataban ago midendeg aken siran sangkai a inged.
Ka katawan aken a so apiya antawaa i ipengangarapan ka na kerakmatan, na so ipesinta a
ka na kesintaan."
7 Na gomiyanat so manga sanasanaan sa Mowab ago sa Midiyan a kiaawidan iran so
itendan iran ko kapesinta. Kagiya makaoma siran ki Balaam na piyanotol iran on so
miyatero i Balak. "Sii kano den pakatorog ko kagagawii," a tig i Balaam, "ka teroon ko
rekano bo so isembag raken o Allah." Na domike roo so manga sanasanaan sa Mowab.
9 Na miyakatalingoma so Tohan ki Balaam na iniise iyan on a "Antawaa ngkai a manga
mama a sisii reka?"
10 Tig i Balaam ko Tohan a "Manga siyogo siran i Balak a dato sa Mowab, ka piyakitero
iyan raken a
11'Aden a miyakaoma sii a tanto a madakel a taw a miyamakaliyo sa Misir na misasapeng
siran ko liyawaw o kalopaan. Kapedipedi ka bo na song ka sii imanto na sintaan ka siran
raken ka o ba ko siran mataban ago midendeg aken siran sangkai a inged.' "
12 “Na pitero o Tohan ki Balaam a "Di ngka siran pengonoti. Di ngka pesintaan angkoto
a manga taw a miyakapoon sa Misir ka rarakmatan ko siran."
13 Kagiya mapita na mimbowat si Balaam na pitero iyan ko manga siyogo i Balak a
"Baling kano ko inged iyo ka minda so Allah o ba ko sekano pangonoti."
14 Kagiya ka maoto na so manga sanasanaan sa Mowab na komiyasoy ki Balak na pitero
iran on a "Somiyangka si Balaam o ba rekami onot."
15 Mandiyadi na somiyogo peman si Balak sa ped a manga sanasanaan a madakel pen
ago lebi pen a seselaan a di so miyaona.
16 Somiyong siran ki Balaam na pitero iran on a "Giyai i kabasa i Balak a wata i Sipor:
Kapedipedi ka bo na di ngka pekibangenen a kapakasong ka raken.
17 Tendanan ko seka sa tanto a mapiya ago ipenggolalan aken so apiya antonaa i peteroon
ka raken. Song ka sii baden na sintaan ka raken angkai a manga taw!"
18 Ogaid na inisembag kiran i Balaam a "Apiya pen o began raken i Balak so torogan
iyan a mapepeno a pirak ago bolawan na da den a ba ko mapenggolaola a mala o di na
maito a misogok ko inisogo raken o Allah a Tohan ko.
19 Ogaid na tareg kano sii ko kagagawii a datar o siyowa o manga ped iyo kaan aken
katokawi o ba aden pen a peteroon raken o Allah."
20 Sangkoto a kagagawii na miyakatalingoma so Tohan ki Balaam na pitero iyan on a
"Sabap sa siyogo reka angkai a manga mama sa kapekaonota iran reka, na onot ka kiran
den, ogaid na so bo so peteroon ko reka i nggolaolaa ngka."
So Kimar i Balaam
21 Kagiya mapita na mimbowat komabalaga si Balaam na siniyaan iyan so kimar iyan na
miyonot ko manga sanasanaan sa Mowab.
22 Ogaid na tanto a kiyararangitan o Tohan ko kiyaonot iyan kiran, na so malaikat o
Allah na tominindeg ko lalan sa kasoranga niyan on. Na sii ko kakokoda i Balaam ko
kimar iyan a oonotan o dowa kataw a talasogoay niyan
23 Na miyailay o kimar so malaikat o Allah a tomitindeg ko lalan a kakapetan iyan so
mabibindas a pedang. Na sominilay so kimar sii ko pangomaan ogaid na liyambitan i
Balaam ka pekakasowin iyan ko lalan.
24 Mandiyadi na tominindeg so malaikat ko darpa a masimpit on so lalan a kapageeletan
o dowa a asinda a obas a mbabala ko lalan so pangeleban a ator.
25 Kagiya mailay o kimar so malaikat na riyompir iyan so pangeleban na miyalopit so ai
i Balaam, na liyambitan iyan peroman so kimar.
26 Mandiyadi na miniseg peroman so malaikat sa onaan na tominindeg ko tanto a
masimpit ko lalan a di on den pekasilay sa kawanan o di na sa diwang.
27 Na kagiya mailay o kimar so malaikat na lomiko, na masesakad sekaniyan baden i
Balaam. Na mimborngat so gani i Balaam na inipamentol iyan on so teken iyan.
28 Na giyoto a piyakatero o Allah so kimar na iniise iyan ki Balaam a "Antonaa i
miyasela aken reka a liyambitan ako ngka sa miyakatelo?"
29 “Pilalongan ako ngka!" a inipesong i Balaam. "O aden a pedang aken na mbonoon ko
seka den imanto!"
30 Na tig o kimar ki Balaam a "Ba di saken so kimar ka a lalayon ka dii kodaan taman
imanto? Ba ko reka ini minikidia gowani?"
"Kena," a inisembag iyan.
31 Na bikar o Allah so mata i Balaam na miyailay niyan so malaikat o Allah a tomitindeg
ko lalan a kakapetan iyan so mabibindas a pedang. Na somiyodiyod on si Balaam na
gomipe ko lopa.
32 “Ino ngka pelambiti so kimar ka sa miyakatelo den ai?" a iniise on o malaikat.
"Miyakaoma ako sii ka pesorangen aken seka ka kagiya bibid raken so di ngka dii
nggolaolaan.
33 Pekeilay ako o kimar na sinilayan ako niyan sa miyakatelo. O da ako niyan silayi na
mataan a miyapatay aken seka den imanto ago miyapakapagoyag aken den so kimar."
34 Na pitero i Balaam ko malaikat o Allah a "Miyakandosa ako. Da aken katokawi a
tomitindeg ka bes ko lalan a pegerenen ako ngka. Na o di ngka ikesoat so kasong aken
roo na mbaling ako baden sa walay."
35 Ogaid na pitero o malaikat ki Balaam a "Onot ka den ko manga mama ogaid na aya bo
a mapetero o ka na so pakipetero aken reka." Mandiyadi na tomiyaros monot si Balaam
ko manga siyogo i Balak.
Inalaw i Balak si Balaam
36 Kagiya maneg i Balak a pekaoma si Balaam na lominiyo sekaniyan ka pagalaon iyan
roo ko siti sa Mowab a matatago ko kilid a Lawasaig a Arnon sii ko temanaan o
masasakop iyan.
37 Na pitero i Balak ki Balaam a "Ino ka raken da song ko paganay a kiyapakisogoi aken
reka? Ba aken di kegaga a katendani reka sa tanto a mala?"
38 “Na, katii ako imanto a miyakaoma reka," a inisembag i Balaam, "ogaid na da a kapaar
aken sa kateroa ko apiya antonaa, ka so bo so pakipetero raken o Tohan."
39 Na miyonot si Balaam ki Balak na somiyong siran sa Kiriyat Hosot.
40 Miyangorban roo si Balak sa manga sapi ago manga bilibili, na inibegay niyan ki
Balaam so sabagi ko sapo, ago sii ko manga sanasanaan a moonot rekaniyan.
41 Sii ko kiyapita iyan na piyakaonot i Balak tomekedeg si Balaam sii sa Bamot Baal a
ron miyailay i Balaam so ped ko manga Israil.
MANGA BILANGAN 23
So Paganay a Miyaalamat i Balaam
Pitero i Balaam ki Balak a "Mbaalen ako ngka sii sa pito timan a aparan na witi ako ngka
sii pen sa pito timan a mama a sapi ago pito timan a mama a bilibili."
2 Na pinggolaola i Balak so pitero on i Balaam, na somiyapaat siran on ago si Balaam sa
nggagaisa a sapi ago bilibili ko oman i aparan.
3 Oriyan iyan na pitero i Balaam ki Balak a "Sii ka den ko kilid o inisapaat ka a
petotongen, na song ako roo pasin ka o ba ako roo talaboka o Allah. Na panotolen ko
reka bo so apiya antonaa i peyagen iyan raken." Mandiyadi na tomiyakedeg si Balaam ko
poro o bobongan,
4 Na tiyalabok sekaniyan roo o Tohan. Pitero rekaniyan i Balaam a "Mitiyagar ako sa
pito timan a aparan na miyanapaat ako ron sa nggagaisa a sapi ago bilibili ko oman i
aparan."
5 Na piyayag o Allah ki Balaam so lalag iyan na tig iyan a "Kasoy ka ki Balak na teroa
ngka so pakipetero aken reka."
6 Mandiyadi na komiyasoy si Balaam ki Balak na miyaoma niyan a tomitindeg pen ko
obay o manga petotongen a inisapaat iyan a ped iyan so langon a sanasanaan sa Mowab.
7 Na piyayag i Balaam angkai a lalag:
"Poon sa kapalawan sa sebangan roo sa Siriya
na ron ako piyakisogoi i Balak a dato sa Mowab a tig iyan a
'Song ka sii na sintaan ka raken so manga mbawataan o Yakob!
Song ka sii na tewapen ka so manga Israil!'
8 Ogaid na andamanaya i kipesintaan ko ko siran oto a da sintaan o Tohan?
Andamanaya i kipetewapen ko ko siran oto a da tewapen o Allah?
9 Poon ko manga poporo a pampang na peketolongan ko siran,
poon ko poro o manga bobongan na pekebantayan ko siran.
Isa siran ka bangsa a komakaden a somisibay
a di kibilang a isa ko ped a manga nasiyon.
10 Antawaa i pekaitong ko manga mbawataan o Yakob a lagid sa kadakel o bayanek,
o di na pekabilang ko apiya ikapat bagi bo ko manga Israil?
Pengnin ko a matay ako a datar sa kapematay o manga oontol;
mapos so kaoyagoyag aken a datar o keposan kiran!"
11 Na pitero i Balak ki Balaam a "Antonaa ngkai a inikidia ngka raken? Piyakisongowan
ko seka kaan ka misinta so manga ridoay aken, ogaid na ba ngka siran baden
riyakmatan!"
12 Na tig i Balaam a "Aya bo a mapetero aken na so pakipetero raken o Allah."
So Ikadowa a Miyaalamat i Balaam
13 Mandiyadi na pitero i Balak ki Balaam a "Onot ka raken ko salakaw a darpa a ron ka
siran keilay; sabagi bo kiran a keilay ngka roo a kena a ba langon iran, na ron ka siran
raken sintaan!"
14 Na piyakaonot i Balak si Balaam ko kapantaran sa Sopim sii ko poro o Palaw a
Pisgah, na roo peman mimbaal sa pito timan a aparan ago somiyapaat on sa nggagaisa a
mama a sapi ago mama a bilibili ko oman i aparan.
15 Na tig i Balaam ki Balak a "Sii ka den pasin ko obay o petotongen a inisapaat ka, ka
telaboken ko roo so Allah."
16 Tiyalabok o Allah si Balaam na piyayag iyan ki Balaam so lalag iyan na tig iyan a
"Kasoy ka ki Balak na teroa ngka so pakipetero aken reka."
17 Kagiya komasoy sekaniyan on na miyaoma niyan si Balak a tomitindeg pen ko obay o
petotongen a inisapaat iyan a ped iyan so manga sanasanaan sa Mowab. Na iniise i Balak
a "Antonaa i pitero o Allah?"
18 Na giyai i lalag a piyayag i Balaam:
"Pamakineg ka, hey Balak a wata i Sipor;
tagoa ngka sa ginawa so peteroon ko!
19 So Tohan na kena a ba taw a makapemokeg,
aya pen o ba manosiya a pekealin so pamikiran iyan.
Ba dii tero sa di niyan bo ipenggolalan?
Ba petopa na di niyan bo itoman?
20 Aya inisogo raken na perarakmat ako;
na romiyakmat so Tohan na di aken den ai kealin.
21 Da a ba niyan miyainengka a kadostaan sii ko manga mbawataan o Yakob
aya pen o ba aden a miyailay niyan a marata sii ko manga Israil.
Ka mipageepeda iran so Allah a Tohan iran;
na ipepemesag iran a sekaniyan i Dato iran.
22 Piyakaliyo niyan siran sa Misir;
datar siran sa kabager o maila a toro.
23 Da den a kapangatao a ba pekabinasa ko manga mbawataan o Yakob;
da den a rimaran a ba pekadorat ko manga Israil.
Aya mapetero imanto mipantag ko manga Israil a so mbawataan o Yakob na
'Mataan a piyakamemesa so inikidia kiran o Tohan!'
24 Giyangkai a manga taw na datar o mawaraw a arimaw;
mimbowat siran a datar o arimaw a di den ndeke
taman sa malamed iyan so miyasikem iyan
ago mainom iyan so rogo o miyapatay niyan."
25 Na pitero i Balak ki Balaam a "O di ngka siran ipesinta na di ngka baden perakmati!"
26 “Ba ko reka da teroa," a inisembag i Balaam, "a disomala a penggolaolaan ko so apiya
antonaa i peteroon raken o Allah?"
So Ikatelo a Miyaalamat i Balaam
27 Pitero i Balak ki Balaam a "Onot ka raken ka witen ko seka ko salakaw a darpa.
Masiken a ikesoat o Tohan a misinta a ka siran raken roo."
28 Na inowit i Balak si Balaam ko poro o Palaw a Piyor a katotolongan on so mitataog a
kaden.
29 Pitero peman i Balaam ki Balak a "Mbaalen ako ngka sii sa pito timan a aparan na
tiyagaren ako ngka sa pito timan a manga mama a sapi ago pito mambo a mama a
bilibili."
30 Na pinggolaola i Balak so pitero on i Balaam na somiyapaat sekaniyan sa sesatiman a
sapi ago bilibili ko oman i aparan.
MANGA BILANGAN 24
Kagiya kasabotan i Balaam a ikasosoat o Allah so kaperakmati ko manga Israil na da
sekaniyan osar sa kaperimar a datar o siyowa iyan gowani, ka somiyangor sekaniyan
baden ko mitataog a kaden
2 A ron iyan tiyolongi so manga Israil a kekampo siran a sisibaya so oman i mbatabataa.
Samaoto na minitemo rekaniyan so Roh o Tohan
3 Na piyayag iyan angkai a lalag:
"Giyai i miyaalamat i Balaam a wata i Biyor,
a so alamat o mama a marayag i kapangilailay;
4 So alamat o taw a pepekaneg ko manga katero o Tohan,
ago pepekailay sa pangingilain a poon ko Lebi a Mabager a Tohan
sii ko kapesodiyod iyan a mabebekar a manga mata niyan.
5 Sayana a mapiya i paras so manga barombarong iyo, hey mbawataan o Yakob;
a so kibabalingan iyo, hey manga Israil!
6 Giyanan na lagid o manga balintad a tanto a maolad
ago lagid o manga sapadan ko kilid o lawasaig;
a lagid mambo o manga korma a miyapamola o Allah,
ago manga kayo a sidro ko obay o manga ig.
7 Magondas so ig a poon ko manga sakdo iran;
pepekaigan piyapiya so manga oniin iran.
Pembaloy so dato iran a mala i gees a di si Agag,
na kebantogan so ndatoan iran.
8 Piyakaliyo siran o Tohan sa Misir;
datar siran sa kabager o maila a toro.
Pelalameden iran so manga nasiyon a manga ridoay iran
a peroropeten iran so manga tolan iran,
ago pesesaan iran so manga gasa iran.
9 Lomeleko siran a lagid o arimaw;
lagid o mawaraw a arimaw na antawaa i pekaraw kiran mokaw?
Kerakmatan so apiya antawaa i perakmat rekano,
na kesintaan so apiya antawaa i pesinta rekano!"
10 Na tanto a kiyararangitan i Balak si Balaam, na mangingimel sekaniyan a inipesong
iyan a "Piyakisogoan aken seka kaan ka misinta so manga ridoay aken! Ogaid na ba ngka
baden riyakmati sa miyakatelo den.
11 Awa ka sii den imanto! Baling ka den! Miyatero aken a tendanan ko seka sa tanto a
mapiya ogaid na da peroa o Allah a kaketendani reka."
12 Na simbag sekaniyan i Balaam a "Ba aken da teroa ko manga mama a siyogo o ka
raken a
13'Apiya pen o began raken i Balak so torogan iyan a mapepeno a pirak ago bolawan na
da den a mipenggolalan aken a baya a ginawa ko a mapiya o di na marata a misogok ko
inisogo o Allah'? Aya ko bo mapetero na so pakipetero raken o Allah!
14 Na mbeling ako imanto ko manga tonganay aken, ogaid na pekaiktiyaren ko seka daan
o antonaa i ikidia angkai a manga taw ko manga pagtaw ngka sii ko pemakatalingoma a
manga gawii."
So Kaposan a miyaalamat i Balaam
15 Na piyayag iyan angkai a lalag:
"Giyai i miyaalamat i Balaam a wata i Biyor,
a so alamat o mama a marayag i kapangilailay,
16 A pepekaneg ko manga katero o Tohan,
a aden a katao niyan a poon ko Lebi a Maporo,
a pepekailay sa pangingilain a poon ko Lebi a Mabager
sii ko kapesodiyod iyan a mabebekar a manga mata niyan.
17 Pekeilay aken so da pen manggolaola.
Pekeinengka aken sekaniyan ogaid na kena a ba marani.
Aden a dato a sebang a lagid o bitoon a pekapoon ko mbawataan o Yakob;
na nggemaw so tongkas iyan sa kadato sii sa Israil.
Sesaan iyan so beneng o manga Mowabiyo
ago so manga lagas a olo o manga mbawataan o Sit.
18 Tebanen iyan a Idomiya,
na tenganen iyan angkai a inged a Sair a ridoay niyan,
na pepekala so kabager o Israil.
19 Ndaagen siran o manga mbawataan o Yakob
na polangen iran so miyamakapagoyag sii ko manga siti."
20 Mandiyadi na miyailay i Balaam so manga taw sa Amalik na piyayag iyan angkai a
lalag:
"Giya Amalik na aya onaan o manga nasiyon,
ogaid na aya kaposan iyan na so kambinasaa on sa taman sa pakataman."
21 Mandiyadi na miyailay niyan so manga Kiniyo, na piyayag iyan angkai a lalag:
"Mabeken so babalingan iyo
a lagid o salag a matatago ko kilid a pampang.
22 Apiya pen oto na kelaslas so manga Kiniyo
amay ka pamiyagen kano o Asiriya."
23 Na pitero pen i Balaam a
"Aidaw! Antawaa i makapegoyag amay ka nggolaolaan ai o Tohan?
24 Pekaoma so manga awang a poon ko kilid a ragat sa Sipros
na ndaagen iran a Asiriya ago giya Ibir,
ogaid na kebinasaan siran mambo sa tarotop."
25 Oriyan iyan na gomiyanat si Balaam na miyaling, na miyaling mambo si Balak.
MANGA BILANGAN 25
So manga Israil roo sa Piyor
Sii ko katatareg pen o manga Israil sa Sitim na so ped ko manga mama na mirerembang
ko manga babay sa Mowab.
2 Na giyangkai a manga babay na biyoyo iran siran ko dii kakorbani ko manga katohanan
iran. Na komiyan so manga Israil ko sapo o manga korban ago miyamanimba ko manga
katohanan iran sa Mowab.
3 Na mimborngat so rarangit o Allah ko manga Israil sabap ko kiyapangeped iran ko
kapesimbaa ko katohanan a Baal roo sa Piyor.
4 Na pitero iyan ki Mosa a "Dakepa ngka so langon a olowan o manga taw a aya matao
sangkai a masosowa na pakipamonoon ka siran ko hadapan o Barombarong a ron
pekeilay o manga taw kaan mada so somosokeyaw a rarangit o Allah ko manga Israil."
5 Na pitero i Mosa ko manga pangongokom sa Israil a "Oman i isa rekano na pamonoa
niyo so oman i mama ko mbatabataa niyo a miyamangeped ko kapesimbaa ko Baal sa
Piyor."
6 Samaoto na aden a miyakaoma a mama a Israil a magowit ko pamiliya niyan sa babay a
taw sa Midiyan sii ko kapekeilaya on i Mosa ago so langon o isa ka maginged a Israil sii
den ko kapenggoraok iran ko gimowa o Barombarong a dii Telabokan.
7 Kagiya mailay ai i Pinihas a wata i Iliyasar ago apo i Aron na inawaan iyan so matitimo
a taw na kominowa sa bangkaw,
8 Na tiyondog iyan so mama ago so babay sii ko barombarong. Na inisoker iyan kiran a
dowa so bangkaw na lomiyambas ai ko mama ago sii ko tiyan o babay. Sabap sii na
minitareg so paniyakit a ipepamatay o manga Israil,
9 Ogaid na aya kadakel iran a miyamatay ko kasiksaan na dowa polo ago pat nggibo.
10 Na giyoto a pitero o Allah ki Mosa a
11 “Si Piniyas a wata i Iliyasar ago apo i Aron a imam na biyolongan iyan so rarangit
aken ko manga Israil, ka datar aken na piyanagontamanan iyan so bantogan aken sii kiran.
Na giyanan i sabap a da aken polanga so manga Israil sii ko kapepenaod aken.
12 Kagiya ka maoto na teroa ngka rekaniyan a pagembaalan aken on so kapasadan aken
sa kapetegompiya.
13 Sabap sangkai a kapasadan na sekaniyan ago so kebabadan on na dayon sa dayon so
kaiimami kiran ka kagiya piyanagontamanan iyan so bantogan o Tohan iyan na mimbaal
sekaniyan sa kakepapasa ko dosa o manga Israil."
14 Aya ngaran o mama a Israil a miyapatay a rakes o babay a taw sa Midiyan na si Simri
a wata i Salo a olowan o isa ka pamiliya ko mbatabataa a Simiyon.
15 Aya ngaran o babay a taw sa Midiyan a miyapatay na si Kosbi a wata i Sor a olowan
sekaniyan o isa ka bangsa roo sa Midiyan.
17 “Bilangen iyo a ridoay niyo so manga taw sa Midiyan na paminasaa niyo siran
18 Sabap sa pisemok kano iran ko kiyaagaka iran rekano ko kapesimbaa ko katohanan
iran sa Piyor, ago sabap ki Kosbi a wata a babay o isa a olowan sa Midiyan a miyapatay
ko gawii a kiyasiksaa rekano sabap ko pinggolaola niyo roo sa Piyor.
MANGA BILANGAN 26
So Ikadowa a Kiyabilanga ko manga Taw
Oriyan o kasiksaan na pitero o Allah ki Mosa ago si Iliyasar a wata i Aron a imam a
2 “Bilanga niyo so langon o isa ka maginged a Israil na listaan iyo so langon a mama ko
oman i pamiliya a miyakapagidad sa dowa polo ragon ago lawan pen a kepakay a
sondaro."
3-4 Samaoto na kekampo siran ko kapantaran sa Mowab sa sebangan a Lawasaig a
Yordan a pantag a Yariko. Na inisampay kiran i Mosa ago si Aron so pitero kiran o Allah
mipantag ko kambilanga ko manga Israil a miyadowa polo a idad iyan kiran ago lawan
pen a so den so inisogo o Allah ki Mosa ko kiyapakaliyo iran sa Misir. Na giyai so
kadakel iran a miyabilang:
5-7 Sii ko mbatabataa a Robin, a so kaka a wata o Yakob na:
pat polo ago telo nggibo ago pito gatos ago telo polo a manga mama a poon ko manga
mbawataan i siki Hanok, Palo, Hisron ago si Karmi.
8 Si Palo na ama i Iliyab,
9 Na si Iliyab na aya ama i siki Nimowil, Datan ago si Abiram. (Giyoto den si Datan ago
si Abiram a manga sanasanaan o isa ka maginged a miyato ki Mosa ago si Aron ago
miyangeped ko pepamangonot ki Korah isako somopak siran ko Allah.
10 Ogaid na mingganga so lopa na liyamed iyan siran a rakes i Korah, na dowa gatos ago
lima polo a pepamangonot on a miyamatay mambo sangkoto a gawii ko kiyalengana
kiran o apoy. Na miyabaloy siran a lalangan ko manga taw.
11 Apiya pen ai na da binasaa so manga mbawataan i Korah.)
12-14 Sii ko mbatabataa a Simiyon na:
dowa polo ago dowa nggibo ago dowa gatos a poon ko manga mbawataan i siki Nimowil,
Yamin, Yakin, Sirah ago si Siyaol.
15-18 Sii ko mbatabataa a Gad na:
pat polo nggibo ago lima gatos a poon ko manga mbawataan i siki Sipon, Hagi, Siyoni,
Osni, Iri, Arod ago si Arili.
19-22 Sii ko mbatabataa a Yodah na:
pito polo ago nem nggibo ago lima gatos a poon ko manga mbawataan i siki Siyalah,
Piris, Sirah, Hisron ago si Hamol. (So dowa kataw a manga wata i Yodah, a si Ir ago si
Onan, na miyamatay roo sa inged a Kanaan.)
23-25 Sii ko mbatabataa a Isakar na:
nempolo ago pat nggibo ago telo gatos a poon ko manga mbawataan i siki Tola, Powah,
Yasiyob ago si Simron.
26-27 Sii ko mbatabataa a Sibolon na:
nem polo nggibo ago lima gatos a poon ko manga mbawataan i siki Sirid, Ilon, ago si
Yakliil.
28 Aden a dowa ka mbatabataa a kiyababadan ko dowa a wata i Yosop a si Manasih ago
si Ipraim.
29-34 Sii ko mbatabataa a Manasih na:
lima polo ago dowa gatos nggibo ago pito gatos a poon ko manga mbawataan i Makir ago
so mbawataan i Giliyad a wata i Makir, ago poon ko manga mbawataan i siki Isir, Hilik,
Asriyal, Sikim, Siyamida ago si Hipir a so nem kataw a manga wata i Giliyad. So wata i
Hipir a si Silopihad na da a wata iyan a manga mama ka so bo so manga babay a aya
ngaran iran na siki Maklah, Nowah, Hoglah, Milkah ago si Tirsah.
35-37 Sii ko mbatabataa a Ipraim na:
telo polo ago dowa nggibo ago lima gatos a poon ko manga mbatawaan i siki Siyotilah,
Bikir, Tahan ago si Iron a wata i Siyotilah.
38-41 Sii ko mbatabataa a Baniyamin na:
pat polo ago lima nggibo ago nem gatos a poon ko manga mbawataan i siki Bila, Asbil,
Siyopam ago si Hopam, ago so manga mbawataan i Ard ago si Naaman a so dowa kataw
a wata i Bila.
42-43 Sii ko mbatabataa a Dan na:
nem polo ago pat nggibo ago pat gatos a poon ko mbawataan i Siyoham.
44-47 Sii ko mbatabataa a Asir na:
lima polo ago telo nggibo ago pat gatos a poon ko manga mbawataan i siki Imnah, Isbia
ago si Biriyas, ago so manga mbawataan i Hibir ago si Malkiyal a so manga wata i
Biriyas. Si Asir na aden a wata iyan a babay a aya ngaran iyan na si Sirah.
48-50 Sii ko mbatabataa a Naptali na:
pat polo ago lima nggibo ago pat gatos a poon ko manga mbawataan i siki Yaksiil, Goni,
Yasir ago si Silim.
51 Aya kadakel langon o manga Israil na nem gatos ago isa nggibo ago pito gatos ago telo
polo.
53 “So lopa a mapekewali angkai a manga taw na mapembagibagi kiran a mipepasod ko
kadakel iran.
54-56 Mbagibagia ngka a nggolalan ko kaperipa na begi ngka so mala a mbatabataa sa
mala a kawali, ago so maito on na begi ngka sa maito a kawali."
57 Miyabilang mambo so mbatabataa a Libi a aya maaped on na so manga mbawataan i
Girson, si Kohat ago si Mirari
58 A rakes o manga mbawataan i siki Libni, Hibron, Makli, Mosi ago si Korah.
Si Kohat na aya ama i Amram
59 Na aya ngaran o karoma i Amram na si Yokabid a moriyataw i Libi a inimbawata roo
sa Misir. Telo kataw a manga wata i Amram ago si Yokabid a si Aron, si Mosa ago so
babay iran a si Mariyam.
60 Si Aron na aya ama i siki Nadab, Abiho, Iliyasar ago si Itamar,
61 Ogaid na miyamatay si Nadab ago si Abiho isako somapaat siran ko Allah sa di sak a
apoy.
62 So langon a mama a miyabilang ko mbatabataa a Libi a miyakapagidad sa saolan ago
lawan pen na dowa polo ago telo nggibo. Da siran milista ko ped a manga Israil ka
kagiya da siran begi sa lopa a mapekewali ran sii sa Israil.
63 Giyai i miyabilang i Mosa ago si Iliyasar a so imam sii ko kakekampo o manga Israil
ko kapantaran sa Mowab sa sebangan a Yordan a pantag a Yariko.
64 Sii kiran na da a isa bo a mama a ba miyalamba ko miyabilang gowani i Mosa ago si
Aron roo sa Disirto sa Sinay.
65 Ka miyatero o Allah mipantag kiran a "Mataan a pematay siran sii ko mitataog a
kaden." Na da a isa kiran bo a ba miyalamba a rowar ki Kaleb a wata i Yaponih ago si
Yosowa a wata i Non.
MANGA BILANGAN 27
So manga Wata a Babay i Silopihad
Siki Maklah, Nowah, Hoglah, Milkah ago si Tirsah na manga wata a manga babay i
Silopihad a wata i Hipir, a wata i Giliyad, a wata i Makir, a wata i Manasih a aya wata i
Yosop.
2 Na somiyong angkai a manga babay ko Barombarong a dii Telabokan na roo siran
miyangadap ki Mosa ago si Iliyasar a imam ago so manga pelokelokesen ko langon o isa
ka maginged a Israil na pitero iran a
3 “Miyatay so ama ami sii ko mitataog a kaden. Kena a ba sekaniyan maaped ko
miyamangonot ki Korah a miyamanopak ko Allah ka miyatay sekaniyan sabap ko rek
iyan a dosa, na da a minibegak iyan a manga wata iyan a mama.
4 Ino keda so ngaran o ama ami sii ko manga tonganay niyan sabap bo sa da a wata iyan a
mama? Begi kami ngka sa lopa ko mapekewali o manga tonganay o ama ami."
5 Sabap roo na inipenon i Mosa ko Allah so awid a akal iran, na pitero on o Allah a
7 “Ontol so piyangni o manga wata i Silopihad a manga babay. Begi ngka siran sa lopa a
mapekewali ran a datar o manga tonganay o ama iran. Kitogalin ka kiran so kawali o ama
iran.
8 Na teroa ngka ko manga Israil a 'O matay so mama a da a wata iyan a mama na
kitogalin so kawali niyan ko wata iyan a babay.
9 Na o da a wata iyan a babay na kitogalin so kawali niyan ko manga pagari niyan.
10 O da a manga pagari niyan na kitogalin so kawali niyan ko manga pagari o ama iyan.
11 Na o so ama iyan na da a manga pagari niyan na kitogalin so kawali niyan ko lebi a
madaseg a tonganay niyan a aya on pekatangan. Giyai i kokoman a ipapaliyogat a
katomana on o manga Israil a so den so inisogo o Allah ki Mosa.' "
Si Yosowa na aya Pekasambi ki Mosa
12 Na pitero o Allah ki Mosa a "Takedeg ka sangkai a palaw sii ko manga palaw sa
Abarim na langkawa ngka roo so lopa a inibegay aken ko manga Israil.
13 Oriyan o kailaya ngka on na petay ka a datar o pagari ngka a si Aron,
14 Ka roo ko mitataog a kaden sa Sin isako kapanarotaroan ako o manga Israil roo ko
manga ig sa Miribah na ndatar kano a siyogok iyo so iniinsarat aken rekano, na da niyo
pakikilalaan ko manga Israil so kabarakat aken." (Giyai so manga ig sa Miribah sii sa
Kadis roo ko mitataog a kaden sa Sin.)
15 Na pitero i Mosa ko Allah a
16 “Ya Allah a Tohan o manga niyawa o langon a manosiya na toro ka sa mama a
makapegolowan sangkai a isa ka maginged
17 A makapengonaan ago makapemando kiran sii ko di iran dii kapakitidawa kaan di
kebaloy so manga pagtaw ngka a datar o manga bilibili a da a ba on tomatagikor."
18 Na pitero o Allah ki Mosa a "Kowaa ngka si Yosowa a wata i Non, a so mama a
sesenepen a Roh na dapeneten ka rekaniyan a lima ngka.
19 Pakatindega ngka sekaniyan ko hadapan i Iliyasar a imam ago sii ko langon o isa ka
maginged na sii ko kamamasai ran on na idini ngka sekaniyan a aya reka pekasambi.
20 Begi ngka sekaniyan ko kadato o ka kaan sekaniyan maparatiyaya o langon o isa ka
maginged a Israil.
21 Disomala a sii sekaniyan pepegise ki Iliyasar a so imam a aya pekatokaw ko kabaya o
Allah sii ko hadapan iyan a nggolalan ko Orim. Giyanan i kapeketokawi i Yosowa ago so
langon o manga Israil o antonaa i patot a penggolaolaan iran."
22 Na pinggolaola i Mosa so inisogo on o Allah; kinowa niyan si Yosowa ago
piyakatindeg iyan ko hadapan i Iliyasar ago sii ko langon o isa ka maginged.
23 Na inidapenet on i Mosa a lima niyan na inidinan iyan sekaniyan sa kaoolowani ron a
so den so inisogo o Allah ki Mosa.
MANGA BILANGAN 28
So dii Kakorban Oman Gawii
2 “Began ka angkai a sogoan ko manga Israil: Sii ko matetendo on a oras na piyapiyai
niyo raken somapaat so manga pangenengken a petotongen, ka mamot raken.
3 Teroa niyo kiran a: Giyai i gawii gawii a di niyo dii korbanen a pekisapaat iyo a
petotongen sii ko Allah: dowa timan a bilibili a sesaragon a idad iyan a da a daway niyan.
4 So isa on na mapekorban iyo ko kapipita na so isa on na sii ko perimon
5 Na kerakesan so oman i isa on sa isepaat a pangenengken a isa ka kilo a mapiya a arina
a sasaogan sa isa ka litro a lana a olibi.
6 Giyangkai a gawii gawii a di niyo dii korbanen sa ipesepaat a petotongen a mamot ko
Allah na inisogo iyan roo ko Palaw a Sinay.
7 Aya isepaat a panginginomen a kirakes ko oman i bilibili na isa ka litro a arak a keodod
sii ko soti a darpa a aya den isepaat a panginginomen ko Allah.
8 So ikadowa a bilibili na mapekorban ko perimon a perakesan sa datar o ipesepaat a
pangenengken ago so panginginomen sa kapipita. Giyai i dii korbanen a ipesepaat a
petotongen a mamot ko Allah.
So dii Kakorban ko Gawii a Idedeke
9 Sii ko Gawii a Idedeke na makapekorban kano sa dowa timan a mama a bilibili a
sesaragon a idad iyan ago da a daway niyan a kerakesan sa isepaat a pangenengken a
dowa ka kilo a mapiya a arina a sasaogan sa lana a olibi ago so isepaat a panginginomen.
10 Giyai i mapekorban iyo a isepaat a totongen ko oman Gawii a Idedeke a ipegoman ko
gawii gawii a dii korbanen a ipesepaat a petotongen ago so iperakes on a panginginomen.
So dii Kakorban ko Saribolan
11 Sii ko paganay a gawii ko oman olan na makapekorban kano ko Allah sa manga
isepaat a totongen a dowa timan a kangodaan a mama a sapi, satiman a mama a bilibili
ago pito timan a nati a bilibili a sesaragon a idad iyan a langon da a daway niyan.
12 Kerakesan ai sa ipesepaat a pangenengken a mapiya a arina a sasaogan sa lana a olibi:
telo ka kilo ko oman i mama a sapi, dowa ka kilo ko mama a bilibili
13 Ago isa ka kilo ko oman i nati a bilibili. Giyai i pekorbanen a isepaat a totongen a
mamot ko Allah.
14 Kerakesan ai pen sa ipesepaat a panginginomen a dowa ka litro a arak a kirakes ko
oman i mama a sapi, isa ka litro ago tenga a kirakes ko mama a bilibili, ago isa ka litro a
kirakes ko oman i nati a bilibili. Giyai i mapekorban a isepaat a totongen sii ko paganay a
gawii ko olanolan ko tenday a ragon.
15 Makapekorban kano pen ko Allah sa satiman a mandangan sabap ko dosa sangkai a
gawii a ipegoman ko gawii gawii a dii korbanen a ipesepaat a petotongen ago so iperakes
on a panginginomen.
So Dii Kakorban ko Pista a Paska
16 Sii ko ikasapolo ago pat gawii ko paganay a olanolan na mapeselasela on so Pista a
paska o Allah.
17 So ikasapolo ago lima gawii sangkai a olanolan na aya poonan o pista a pito gawii a
katey niyan, na aya bo a paan a peken on na so da a tapay ron.
18 Sii ko paganay a gawii sangkai a pista na talabok kano sa soti a kalilimod, na da a ba
niyo ron mapenggalebek.
19 Makapekorban kano ko Allah sa manga isepaat a totongen a dowa timan a kangodaan
a mama a sapi, satiman a mama a bilibili ago pito timan a nati a bilibili a sesaragon a idad
iyan a langon da a daway niyan.
20 Kerakesan ai sa isepaat a pangenengken a mapiya a arina a sasaogan sa lana a olibi;
telo ka kilo a kirakes ko oman i mama a sapi, dowa ka kilo a kirakes ko mama a bilibili,
21 Ago isa ka kilo a kirakes ko oman i nati a bilibili.
22 Makapekorban kano pen sa satiman a mandangan sabap ko dosa a aya den
kinggolalanen ko kakepapasa ko manga dosa niyo.
23 Pekisapaat iyo ini langon a ipegoman ko dii korbanen a ipesepaat a petotongen oman
kapipita.
24 Sii sangkai a okit ko soled o pito gawii na pekisapaat iyo so pangenengken a
petotongen a mamot ko Allah. Pekisapaat ai a ipegoman ko dii korbanen a ipesepaat a
petotongen sa gawii gawii a iperakes on so ipesepaat a panginginomen.
25 Na sii ko ikapito gawii na talabok kano sa soti a kalilimod na da a ba niyo
mapenggalebek.
So dii Kakorban ko Pista ko Kaperagon
26 Sii ko paganay a gawii ko Pista ko Kaperagon amay ka isepaat iyo ko Allah so
paganay a miyaragon a pereperan na talabok kano sa soti a kalilimod, na da a ba niyo
mapenggalebek.
27 Makapekorban kano sa manga isepaat a totongen a dowa timan a kangodaan a mama a
sapi, satiman a mama a bilibili, ago pito timan a nati a bilibili a sesaragon a idad iyan.
28 Kerakesan ai sa ipesepaat a pangenengken a mapiya a arina a sasaogan sa lana a olibi;
telo ka kilo ko oman i mama a sapi, dowa ka kilo ko mama a bilibili,
29 Ago isa ka kilo ko oman i nati a bilibili.
30 Makapekorban kano pen sa satiman a mandangan a isepaat sabap ko dosa a aya den
kinggolalanen ko kakepapasa ko manga dosa niyo.
31 Pananggilai niyo o ba aden a daway angkai a manga ayam. Pekisapaat ai langon a
ipegoman ko dii korbanen a ipesepaat a petotongen oman gawii a perakesan sa sapaat a
pangenengken ago panginginomen.
MANGA BILANGAN 29
So dii Kakorban ko Pista ko Kapekaoniya ko manga Bogiyong
Sii ko paganay a gawii ko ikapito a olanolan na talabok kano sa soti a kalilimod, na da a
ba niyo mapenggalebek. Giyai i gawii a kapemakaoniya niyo ko manga bogiyong.
2 Makapekorban kano ko Allah sa manga isepaat a totongen a mamot rekaniyan; satiman
a kangodaan a mama a sapi, satiman a mama a bilibili, ago pito timan a nati a mama a
bilibili a langon ai da a daway niyan.
3 Kerakesan ai sa manga ipesepaat a pangenengken a mapiya a arina a sasaogan sa lana a
olibi; telo ka kilo a kirakes ko mama a sapi, dowa ka kilo a kirakes ko mama a bilibili,
5 Pekasapaat kano pen sa satiman a mandangan sabap ko dosa a aya den kinggolalanen ko
kakepapasa ko manga dosa niyo.
6 Langon ai ipegoman ko kaseolan ago so gawii gawii a dii korbanen a ipesepaat a
petotongen a iperakes on so ipapaliyogat a manga sapaat a pangenengken ago
panginginomen. Giyai i manga ipesapaat ko Allah a petotongen a mamot rekaniyan.
So dii Kakorban ko Gawii a Kapepasa ko Dosa
7 Sii ko ikasapolo gawii sangkai a olanolan na talabok kano sa soti a kalilimod, na
powasa kano ago di kano penggalebek.
8 Makapekorban kano ko Allah sa manga isepaat a totongen a mamot rekaniyan a satiman
a kangodaan a mama a sapi, satiman a mama a bilibili, ago pito timan a nati a mama a
bilibili a sesaragon a idad iyan a langon ai da a daway niyan.
telo ka kilo a kirakes ko mama a sapi, dowa ka kilo a kirakes ko mama a bilibili,
11 Pekasapaat kano pen sa satiman a mandangan sabap ko dosa a liyo ko mandangan a
pekorbanen a aya den kinggolalanen ko kapepasa ko manga dosa
6 Ago liyo ko dii korbanen a ipesepaat a petotongen sa gawii gawii a perakesan sa sapaat
a pangenengken ago panginginomen.
So dii Kakorban ko Pista ko manga Lawig
12'Sii ko ikasapolo ago lima gawii ko ikapito a olanolan na talabok kano sa soti a
kalilimod, na da a ba niyo mapenggalebek. Na makapeselasela kano sa pista ko Tohan sii
ko soled o pito gawii.
13 Sii sangkoto a manga gawii na makapekorban kano ko Allah sa manga isepaat a
totongen a mamot rekaniyan a sapolo ago telo a kangodaan a mama a sapi, dowa timan a
mama a bilibili, ago sapolo ago pat a nati a mama a bilibili a sesaragon a idad iyan a
langon da a daway niyan.
telo ka kilo a kirakes ko oman i mama a sapi, dowa ka kilo a kirakes ko oman i mama a
bilibili,
16 Makapekorban kano pen sa satiman a mandangan sabap ko dosa a liyo ko dii korbanen
a ipesepaat a petotongen sa gawii gawii a perakesan sa ipesepaat a pangenengken ago
panginginomen.
17'Sii ko ikadowa gawii na makapekorban kano sa sapolo ago dowa a kangodaan a mama
a sapi, dowa timan a mama a bilibili, ago sapolo ago pat a nati a mama a bilibili a
sesaragon a idad iyan a langon da a daway niyan.
18 So oman i isa sangkai a manga ayam na perakesan sa ipapaliyogat on a sapaat a
19 Makapekorban kano pen sa satiman a mandangan sabap ko dosa. Langon ai ipegoman
ko dii korbanen a ipesepaat a petotongen sa gawii gawii a perakesan sa ipesepaat a
20'Sii ko ikatelo gawii na makapekorban kano sa sapolo ago isa a kangodaan a mama a
sapi, dowa timan a mama a bilibili, ago sapolo ago pat a nati a mama a bilibili a
23'Sii ko ikapat gawii na makapekorban kano sa sapolo timan a kangodaan a mama a
26'Sii ko ikalima gawii na makapekorban kano sa siyaw timan a kangodaan a mama a
sesaragon a idad iyan a langon ai da a daway niyan.
29'Sii ko ikanem gawii na makapekorban kano sa walo timan a kangodaan a mama a sapi,
dowa timan a mama a bilibili, ago sapolo ago pat a nati a mama a bilibili a sesaragon a
idad iyan a langon ai da a daway niyan.
32'Sii ko ikapito gawii na makapekorban kano sa pito timan a kangodaan a mama a sapi,
dowa timan a mama a bilibili, ago sapolo ago pat a nati a mama a bilibili a sesaragon a
idad iyan a langon ai na da a daway niyan.
35'Sii ko ikawalo gawii na timotimo kano sa soti a kalilimod, na da a ba niyo
mapenggalebek.
36 Makapekorban kano ko Allah sa manga isepaat a totongen a mamot rekaniyan a
satiman a kangodaan a mama a sapi, satiman a mama a bilibili, ago pito timan a nati a
mama a bilibili a sesaragon a idad iyan a langon ai da a daway niyan.
39'Langon ai na kisapaat iyo ko Allah sii ko miyanga tetendo a manga pista niyo, a so
manga di niyo dii korbanen a ipesepaat a petotongen, manga ipesepaat a pangenengken
ago panginginomen ago so di niyo dii korbanen pantag bo ko kanggiginawai. Ipegoman
ai ko ipesepaat iyo pantag bo ko samaya ago so manga iklas a ipesepaat iyo.' "
40 Na inisampay i Mosa ko manga Israil so langon taman a inisogo on o Allah.
MANGA BILANGAN 30
Manga Kokoman mipantag ko Samaya
Na pitero i Mosa ko manga olowan o manga mbatabataa sa Israil a "Giyai i inisogo o
Allah:
2 Igira a misemaya so mama ko Allah o di na misepa sa miniiket rekaniyan na di niyan
den kebaroba so manga katero iyan ka kitoman iyan baden so pitero iyan.
3'Igira a so raga a mababaling pen ko walay o ama iyan na misemaya ko Allah o di na
misepa sa miniiket on
4 Na o maneg o ama iyan so mipantag ko inisepa iyan a miniiket on ago man den a di
niyan katawan na kitoman o raga so langon a minisemaya ago minisepa iyan.
5 Ogaid na o isepar rekaniyan o ama iyan ko kiyanega niyan on na kena a ba paliyogat so
kitomanen o raga ko samaya o di na sapa iyan. Na pokasen ai rekaniyan ka kagiya
inisapar on o ama iyan.
6'O aden a babay a misemaya ko Allah o di na miyakanggagaan sepa so modol iyan na go
miyapangaroma,
7 Na o katokawi o karoma niyan so mipantag sii ago man iyan den a di katawan na
kitoman o babay so minisemaya iyan o di na minisepa.
8 Ogaid na o isepar rekaniyan o karoma niyan ko kiyatokawi niyan on na piyakadaan iyan
sa bali so minisemaya o babay o di na minisepa nggagaan o modol iyan na pokasen
rekaniyan o Allah.
9'Ogaid na oman i samaya o di na sapa o balo a babay o di na bitowanen na paliyogat a
kitomanen iyan on.
10'O so babay a mababaling ko karoma niyan na misemaya ko Allah o di na misepa
11 Na go miyaneg o karoma niyan so mipantag sii ago man iyan den a di katawan ago da
niyan sapari na kitoman o babay so minisemaya iyan o di na minisepa.
12 Ogaid na o pakadai sa bali o karoma niyan amay ka maneg iyan ai na kena a ba
paliyogat a kitomanen iyan ko apiya antonaa i samaya o di na sapa a miyatero iyan, ka
pokasen rekaniyan o Allah.
13 So karoma niyan na kapemataanan iyan o di na mapekada iyan sa kipantag so apiya
antonaa a minisemaya o babay o di na minisepa iyan a ikerasay o ginawa niyan.
14 Ogaid na o da den a pitero on o karoma niyan mipantag sii ko gawii gawii den na
nggolalan sii na kiyapemataanan iyan so langon a minisemaya o di na minisepa o babay a
miniiket on. Pimataanan iyan ai sabap sa da den a pitero iyan on ko gawii a kiyanega
niyan sii.
15 Ogaid na o piyakadaan iyan sa bali ko oriyan o gawii a kiyanega niyan on na sekaniyan
i makapembalogo ko sala o karoma niyan amay ka di niyan mitoman so sapa iyan.' "
16 Giyai i manga kokoman a inibegay o Allah ki Mosa mipantag ko mama ago so karoma
niyan, ago mipantag ko ama ago so kangodaan a wata iyan a babay a mababaling pen ko
walay o ama iyan.
MANGA BILANGAN 31
So Kiyasaopi ko manga Taw sa Midiyan
2 “Saopi ngka so manga taw sa Midiyan sabap ko pinggolaola iran ko manga Israil.
Maipos anan na petay ka den a kitapi ko manga apo o ka."
3 Mandiyadi na pitero i Mosa ko manga taw a "Tiyagar kano ko katidawa kaan iyo
magobat so manga taw sa Midiyan ago misaop iyo kiran so Allah.
4 Sesanggibo kataw ko oman i mbatabataa sa Israil a sogoon ko katidawa."
5 Sabap roo na sapolo ago dowa nggibo a manga mama a miyapili a sesanggibo ko oman
i mbatabataa sa Israil, na kiyagomaanan siran sa katidawa.
6 Na siyogo siran i Mosa sa kapakipetidawa iran a ped iran si Pinihas a wata i Iliyasar a
so imam a aya komikibir ko manga kasangkapan ko soti a darpa ago so manga bogiyong a
pepakaonin a tagotao ko kanggobat.
7 Na so den so inisogo o Allah ki Mosa na miyakitidawa siran ko manga taw sa Midiyan
na piyamono iran so langon o manga mama
8 Taman ko lima kataw a manga dato sa Midiyan a siki Ibi, Rikim, Sor, Hor ago si Riba.
Biyono iran pen si Balaam a wata i Biyor.
9 Na piyamiyag o manga Israil so manga babay sa Midiyan ago so manga wata iran, na
inawidan iran pen so manga sapi iran ago manga talon iran a manga bilibili ago manga
kambing, na piteban iran so langon a tamok iran,
10 Na piyanotong iran so langon o manga siti ago manga kampo a pagiingedan o manga
taw sa Midiyan.
11 Na initelon iran so langon o miyateban iran ago miyapamiyag a ndatar so manga taw
ago so manga ayam
12 Na piyangowit iran ai langon ki Mosa ago sii ki Iliyasar a imam ago sii ko isa ka
maginged a Israil roo ko kampo iran ko kapantaran sa Mowab sa sebangan a Lawasaig a
Yordan a pantag a Yariko.
13 Na lominiyo si Mosa ago si Iliyasar ago so langon a olowan ko isa ka maginged ka
pagalaon iran so manga sondaro ko liyo o kampo.
14 Ogaid na tanto a kiyararangitan i Mosa so manga komandir o manga sondaro a
miyakakasoy a poon ko katidawa.
15 “Ino niyo pakapegoyaga so langon o manga babay!" a iniise iyan kiran.
16 “Tanodi niyo a siran i miyamangonot ko mosawir i Balaam na inagak iran so manga
Israil ko kiyapakatalikod iran ko Allah roo sa Palaw a Piyor a aya kiyasabapan ko
paniyakit a inisiksa ko manga pagtaw o Allah.
17 Imanto na pamonoa niyo so langon o manga wata a mama ago so langon o manga
babay a miyakirembang sa mama,
18 Ogaid na so langon a kangodaan a babay a raga pen na pakapagoyaga niyo a rek iyo."
19 Na pitero pen i Mosa ko manga sondaro a "Apiya antawaa rekano i miyakapatay sa
taw o di na miyakaseko sa miyatay na pekatareg ko liyo o kampo sa makapito gawii. Na
sii ko ikatelo ago ikapito gawii na kesoti niyo a ginawa niyo a rakes o manga babay a
miyapamiyag iyo.
20 Na kepipian iyo so langon o manga nditaren iyo ago keonaban iyo langon so manga
nganin a inembaalan a kobal, bombol a kambing o di na kayo."
21 Oriyan iyan na pitero i Iliyasar a imam ko manga sondaro a miyakitidawa a "'Giyai i
ipapaliyogat o kokoman a inibegay o Allah ki Mosa: so bolawan, pirak, galang, potaw,
kitang ago timbega
23 Ago apiya antonaa pen a di ketotong na mapekaokit ko apoy kaan masoti. Ogaid na
kelompiyowan ai mambo ko ig a ipelompiyo. Na apiya antonaa i ketotong a apoy na
keonaban sangkai a ig a ipelompiyo.
24 Sii ko ikapito gawii na kepipian iyo so manga nditaren iyo na kesoti kano den. Oriyan
oto na pekasoled kano ko kampo."
So Kambagibagia ko Miyateban ko Katidawa
26 “Seka, ago si Iliyasar a imam, ago so manga olowan o manga pamiliya ko isa ka
maginged na listaan iyo so langon a miyateban iyo ko katidawa a rakes on so langon o
miyapamiyag iyo a manga taw ago manga pangangayamen.
27 Bagia ngka ini sa dowa, na began ka so sabagi on ko manga sondaro a miyakitidawa,
na so sabagi on na began ka ko ped a taw ko isa ka maginged.
28 Poon ko bagian o manga sondaro na kowa ka on sa bagian o Allah a satiman ko oman
i lima gatos a manga taw, manga sapi, manga kimar ago manga bilibili
29 Na began ka ini ki Iliyasar a imam a aya tindos a pamemegayan ko Allah.
30 Na poon ko bagian a rek o ped a manga Israil na kowa ka on sa satiman ko oman i
lima polo a manga taw, manga sapi, manga kimar, manga bilibili, manga kambing ago so
ped a manga pangangayamen, na began ka ini ko manga Libitiyo a aya komikibir ko
Barombarong o Allah."
31 Mandiyadi na ininggolalan i Mosa ago si Iliyasar so inisogo o Allah ki Mosa.
32-35 Giyai i listaan ko miyalamba ko miyateban o manga sondaro: nem gatos ago pito
polo ago lima nggibo a manga bilibili, pito polo ago dowa nggibo a manga sapi, nem polo
ago isa nggibo a manga kimar ago telo polo ago dowa nggibo a manga babay a da den
marembang a mama.
36-40 So sabagi on a miyakowa o manga sondaro na telo gatos ago telo polo ago pito
nggibo ago lima gatos a manga bilibili a aya miyambagian on o Allah na nem gatos ago
pito polo ago lima; telo polo ago nem nggibo a manga sapi a aya miyambagian on o Allah
na pito polo ago dowa; telo polo nggibo ago lima gatos a manga kimar a aya
miyambagian o Allah na nem polo ago isa; ago sapolo ago nem nggibo a manga taw a aya
miyambagian o Allah na telo polo ago dowa.
41 Na so miyambagian on o Allah a aya tindos a pamemegayan rekaniyan na inibegay i
Mosa ki Iliyasar a imam a so den so inisogo on o Allah.
42-46 So sabagi ko miyateban a rek o manga Israil na datar sa kadakel o rek o manga
sondaro: telo gatos ago telo polo ago pito nggibo ago lima gatos a manga bilibili; telo
polo ago nem nggibo a manga sapi; telo polo nggibo ago lima gatos a manga kimar, ago
sapolo ago nem nggibo a manga taw.
47 Na poon sangkai a rek o manga Israil na kinowa i Mosa so isa ko oman i lima polo a
manga taw ago manga pangangayamen, a so den so inisogo on o Allah, na inibegay niyan
ko manga Libitiyo a aya komikibir ko Barombarong o Allah.
48 Samaoto na so manga komandir o manga sondaro a so manga olowan o sesanggibo
ago mbabagatos na somiyong siran ki Mosa
49 A tig iran a "Sir, miyabilang ami so manga sondaro a mapapadalem ko kapaar ami na
da den a miyalebat rekami.
50 Sabap san na inowit ami sii so manga imbolawananan a manga rinti, manga tikes,
manga sising, manga aritis ago manga salay a miyanga teteban o oman i isa rekami, ka
peladen ami ko Allah. Giyai i pamemegayan ami ko Allah sabap ko kiyalindinga niyan
rekami."
51 Na tiyarima i Mosa ago si Iliyasar so langon o manga imbolawananan,
52 Na aya timbang o langon a bolawan a piyalad o manga komandir a pamemegayan ko
Allah na magatos ago siyaw polo ka kilo a kapened iyan
53 A di on maaped so manga nganin a inipanibay o oman i sondaro a rek iyan.
54 Na kagiya matarima i Mosa ago si Iliyasar so manga bolawan a poon ko manga
komandir na inowit iran ko Barombarong a dii Telabokan na inibetad iran ko hadapan o
Allah a aya pekitadem o manga Israil.
MANGA BILANGAN 32
So manga Mbatabataa sa Sebangan a Yordan
So manga mbatabataa a Robin ago Gad na tanto siran a madakel i pangangayamen, na
miyailay iran a so manga kalopaan sa Yasir ago giya Giliyad na tanto a mapiya ko manga
pangangayamen iran.
2 Kagiya ka maoto na somiyong siran ki Mosa ago si Iliyasar a imam, ago sii ko manga
olowan o isa ka maginged na pitero iran kiran a
3-4 “Giyangkai a lopa a piyakiagaw o Allah ko manga Israil, a so manga inged a Atarot,
Dibon, Yasir, Nimrah, Hisbon, Iliyalih, Sibam, Nibo ago giya Biyon, na mapiya ko
manga pangangayamen, na aden a manga pangangayamen ami a manga oripen ka.
5 O kelimoon kami ngka," a tig iran, "na pakitanganen ka rekami angkai a lopa na di
kami ngka pekaripaga ko Lawasaig a Yordan."
6 Na pitero i Mosa ko manga mbatabataa a Gad ago Robin a "Ba aya kabaya iyo na
kioontod kano sii baden na aya pekaripagen iyo na so manga pagari niyo sa
kapakipetidawa iran roo?
7 Ino niyo perenga so kateterangi ko manga Israil sa kaperipag iran sa Yordan ko kasong
iran ko lopa a inibegay kiran o Allah?
8 Giyai den i pinggolaola o manga lokes iyo roo sa Kadis Barniya isako pakasongen aken
siran sa kapariksaa iran ko lopa.
9 Na kagiya makasong siran ko Balintad a Iskol ago miyapariksa iran so inged na
piyareng iran so kateterangi ko manga Israil sa kasoled iran ko lopa a inibegay kiran o
Allah.
10 Na tanto a kiyararangitan so Allah sangkoto a gawii na inisepa iyan a
11'Da den a isa bo ko manga taw a miyakapagidad sa dowa polo ragon ago lawan pen ko
kiyapakaawa iran sa Misir a ba niyan mailay so lopa a inisepa aken a imbegay aken ko
Ibrahim, Iskak ago si Yakob, ka da ako iran paratiyayaa sa iklas ko poso iran
12 A rowar ki Kaleb a wata i Yaponih a taw sa Kinas ago si Yosowa a wata i Non, ka
piyaratiyaya iran so Allah sa iklas ko poso iran.'
13 Na sabap ko kapekerarangiti o Allah ko manga Israil na piyakateataap iyan siran ko
mitataog a kaden ko miyakapat polo ragon taman sa miyalengan mamatay so langon
angkoto a apid a miyamakandosa rekaniyan.
14 Imanto na sekano peman i sembi ko manga lokes iyo, a bowad o manga baradosa, a
pepekalonsan kano ko somosokeyaw a rarangit o Allah ko manga Israil!
15 O talikodi niyo imanto so kapetomana niyo ron na pagawaan iyan peman so manga
pagtaw niyan ko mitataog a kaden, na sekano i kesabapan ko kakebinasai kiran langon!"
16 Na inipenon iran ki Mosa a tig iran a "Peroa ngka a kapangembaal ami sii sa manga
kodal para ko manga pangangayamen ami, ago manga siti para ko manga karoma mi ago
manga wata.
17 Amay ka magiyoto na tiyagaren ami a ginawa mi sa kapakipetidawa, na pengonaan
kami ko ped a manga mbatabataa taman ko kapakakaden iran ko darpa iran. Na
petelimbagak sii so manga pamiliya mi na pekabaling siran ko kikakokotaan a manga siti
kaan siran malinding ko kibabaling sangkai a inged.
18 Di kami den mbeling taman sa matangan o langon o ped a manga Israil so lopa a
mapekewali ran.
19 Di kami den tengan sa apiya antonaa a lopa roo sa sabala a Yordan a maaped kiran ka
miyakowa ami so kawali ami sangkai a sabala sa sebangan a Yordan."
20 Mandiyadi na pitero kiran i Mosa a "O mataan a ipenggolalan iyo angkai a pitero iyo
na tiyagar kano sa kapakipetidawa iyo sii ko hadapan o Allah.
21 Na pekaripag so langon o manga sondaro niyo sa Yordan a pagoolowanan o Allah
taman sa mabogaw niyan so manga ridoay niyan
22 Ago mapeges so inged sii ko hadapan iyan. Mapasad ai na pekakasoy kano sii, ka
mininggolalan iyo den so atastanggongan iyo ko Allah ago sii ko ped a manga Israil. Na
giyangkai a lopa na rek iyo den sii ko hadapan o Allah.
23 Ogaid na o di niyo ai nggolaolaa na miyadosa kano den ko Allah na ketangked iyo a
kitana rekano so dosa niyo.
24 Na, mbabaal kano den sa manga siti para ko manga pamiliya niyo ago manga kodal o
manga pangangayamen iyo, ogaid na tomanen iyo so initopa niyo!"
25 Na somimbag so mbatabataa a Robin ago Gad a "Sir, manga oripen kami ngka, na
tomanen ami saden sa ipesogo o ka."
26 So manga karoma mi ago manga wata a rakes o manga talon ami a manga bilibili ago
manga sapi na kibagak sii sangkai a manga siti sa Giliyad.
27 Ogaid na meripag kami langon a kikagogomaanan na makipetidawa kami ko hadapan
o Allah a so den so miyatero o ka."
28 Mandiyadi na ininsaratan i Mosa si Iliyasar, si Yosowa ago so manga olowan ko
pamiliya ko manga mbatabataa sa Israil.
29 Pitero iyan kiran a "O so manga mama ko mbatabataa a Gad ago Robin na magonot
rekano romipag sa Yordan a kikagogomaanan siran sa kapakipetidawa ko hadapan o
Allah na amay ka maagaw niyo so lopa na began iyo kiran so inged a Giliyad a aya iran
rek.
30 Ogaid na o di siran rekano monot romipag sa Yordan a kikagogomaanan na kebegan
siran sa lopa roo sa inged a Kanaan a datar iyo."
31 Na pitero peman o manga mbatabataa a Gad ago Robin a "Manga oripen kami ngka,
na so den so inisogo o Allah i penggolaolaan ami!
32 Meripag kami sa Yordan roo sa Kanaan a kikagogomaanan sii ko hadapan o Allah,
ogaid na aya pekewalin ami a lopa na sii sangkai a sabala a Yordan."
33 Mandiyadi na inisenggay i Mosa a rek o manga mbatabataa a Gad ago Robin ago so
sabagi ko mbatabataa a Manasih a wata i Yosop so masasakop i Sihon a dato o manga
Amoritiyo ago so masasakop i Og a dato sa Basan, a so den so langon angkai a lopa a
rakes o manga siti ron ago so melilibeta on a manga pagingedingedan.
34 So mbatabataa a Gad na biyangon iran peroman so kikakokotaan a manga siti a Dibon,
Atarot, Arowir,
35 Atrot Siyopan, Yasir, Yogbihah,
36 Bit Nimrah ago Bit Haran, na mimbaal siran pen sa manga kodal o manga talon iran.
37 So mbatabataa a Robin na biyangon iran peroman so manga siti a Hisbon, Iliyalih,
Kiriyataim,
38 Nibo, Baal Miyon (kiyasambian ai sa ngaran) ago giya Sibmah. Na piyanambian iran
sa ngaran so manga siti a miyabangon iran peroman.
39 So manga mbawataan i Makir a wata i Manasih na giyobat iran a Giliyad na inagaw
iran ago biyogaw iran on so manga Amoriyo a kibabaling roo.
40 Sabap san na inibegay i Mosa a Giliyad ko mbawataan i Makir a so kiyababadan ki
Manasih na komiyaden siran on.
41 Si Yair a moriyataw mambo i Manasih na miyakaagaw ko manga iito a inged on na
bitowan iyan ai sa 'Manga iito a inged i Yair.'
42 Na si Nobah na miyaagaw niyan a Kinat ago so pagingedingedan on na inisangay
niyan sa ngaran iyan a Nobah.
MANGA BILANGAN 33
So manga Darpa a Kiyapanagadan o manga Israil
Madakel a darpa a piyanga kekampowan o manga Israil ko oriyan o kiyapakaawa iran sa
Misir a sesagorompong so oman i mbatabataa iran a pagoolowanan i Mosa ago si Aron.
2 Sabap ko sogoan o Allah na inipanorat i Mosa so manga ngaran angkoto a manga darpa,
na giyai i totolan ko kiyapanagadi iran on ko kiyalalakaw iran:
3 Miselingganat so manga Israil sa Ramisis sa inged a Misir sii ko ikasapolo ago lima
gawii ko paganay a olanolan a so den so gawii a miyakatalondog ko Pista a paska.
Gomiyanat siran on sa da den a kalek iran sii ko kambabantayi kiran o manga Imisiren.
4 Samaoto na ipelelebeng o manga Imisiren so langon o popaw sa lawas a manga wata
iran a manga mama a piyamono o Allah. Nggolalan sii na piyakiilay niyan a mala
sekaniyan i kapaar a di so manga katohanan iran.
5 Oriyan o kiyaganat o manga Israil sa Ramisis na mikempo siran sa Sokot.
6 Gomiyanat siran sa Sokot na mikempo siran sa Itam ko kilid o mitataog a kaden.
7 Gomiyanat siran sa Itam na mipeto siran sa Pi Hahirot sa tampar sa sebangan a Baal
Sipon na mikempo siran sa marani sa Migdol.
8 Gomiyanat siran sa Pi Hahirot na miyokit siran ko Mariga a Ragat ko kiyaopak iyan na
somiyoled siran ko mitataog a kaden. Tomiyaros siran on lomalakaw sa miyakatelo gawii
ko mitataog a kaden a Itam na mikempo sa Marah.
9 Gomiyanat siran sa Marah na somiyong sa Ilim a aden a sapolo ago dowa a bowalan on
ago pito polo a kayo ron a korma, na mikempo siran roo.
10 Gomiyanat siran sa Ilim na mikempo ko kilid o Mariga a Ragat.
11 Gomiyanat siran ko Mariga a Ragat na mikempo siran ko mitataog a kaden sa Sin.
12 Gomiyanat siran sa mitataog a kaden sa Sin na mikempo siran sa Dopkah.
13 Gomiyanat siran sa Dopkah na mikempo siran sa Alos.
14 Gomiyanat siran sa Alos na mikempo siran sa Ripidim a ron da a ig on a keinom o
manga taw.
15 Gomiyanat siran sa Ripidim na mikempo siran ko Disirto sa Sinay.
16-36 Sii ko kapelalakaw iran ipoon sa Disirto sa Sinay na taman sa Kadis ko mitataog a
kaden sa Sin na mikempo siran ko pemakatalondog sii a manga darpa: Kibrot Hataabah,
Hasirot, Ritmah, Rimon Piris, Libnah, Risah, Kihilatah, Palaw a Sipir, Haradah,
Makhilot, Tahat, Tirah, Mitkah, Hasmonah, Mosirot, Bini Yaakan, Hor Hagidgad,
Yotbatah, Abronah, Isiyon Gibir ago Kadis sii ko mitataog a kaden sa Sin.
37 Gomiyanat siran sa Kadis na mikempo siran sa Palaw a Hor sii ko temanaan a
Idomiya.
38 Na sabap ko sogoan o Allah na tomiyakedeg si Aron a so imam ko Palaw a Hor na roo
miyatay ko paganay a gawii ko ikalima olan ko ikapat polo ragon oriyan o kiyapakaawa o
manga Israil sa Misir.
39 Miyakamagatos ago dowa polo ago telo ragon a idad i Aron isako matay sa Palaw a
Hor.
40 Samaoto na so Ikanaanen a dato a si Arad a mababaling ko pagabagatan a Kanaan na
miyaneg iyan a pegantap so manga Israil ko inged iyan.
41-47 Ipoon sa Palaw a Hor taman ko kapantaran sa Mowab na mikempo so manga Israil
sii ko pemakatalondog a manga darpa: Salmonah, Ponon, Obot, Ay Abarim ko temanaan
a Mowab, Dibon Gad, Almon Diblataim, sii ko kapalawan a Abarim a marani ko Palaw a
Nibo,
48 Ago sii ko kapantaran sa Mowab ko kilid a Lawasaig a Yordan a pantag a Yariko.
49 Roo ko kilid a Yordan na mikempo siran ipoon sa Bit Yasimot taman sa Abil Sitim sii
ko kapantaran sa Mowab.
Manga Insarat i Mosa ko manga Israil sa di iran pen Kaperipag sa Yordan
50 Sii ko kapantaran sa Mowab ko kilid a Yordan a pantag a Yariko na pitero o Allah ki
Mosa a
51 “Pakimbitiyarai ka ko manga Israil na teroa ngka kiran a 'Amay ka romipag kano sa
Yordan sa kasong iyo sa Kanaan
52 Na pamogawa niyo so langon a taw a kibabaling roo. Paminasaa niyo langon so
piyangokiran ago piyamanowang a manga barahala iran, na nggegebaa niyo so langon o
manga aparan iran.
53 Agawa niyo angkoto a lopa na go niyo balingi ka inibegay aken rekano a matangan
iyo.
54 Mbagibagia niyo so lopa ko manga mbawataan a nggolalan ko kaperipa. So mala a
mbawataan na mala a kawali a kibegay ron, na so maito a mbawataan na maito a kawali a
kibegay ron. Apiya antonaa i lopa a keripa o oman i isa kiran na aya iran den rek. Giyai i
kapembagibagia ko lopa a mapekewali o manga mbatabataa.
55 Ogaid na o di niyo pamogawa so kibabaling ko inged na so siran oto a pelambaan iyo
na kebaloy a datar o manga banowit ko manga mata niyo ago manga sorok sii sa kilid iyo,
na pepekasamok siran rekano ko inged a babalingan iyo.
56 Na so miyapamikir aken a ikidia ko kiran na aya ko rekano ikidia.' "
MANGA BILANGAN 34
So manga Temanaan o Inged
2 “Teroa ngka ko manga Israil a 'Amay ka makasoled kano sa Kanaan a so inged a
imbegay aken rekano a kawali niyo, na giyai so manga temanaan iyan.
3 Sii sa tampar sa pagabagatan na mirarakes ko inged iyo so ped ko mitataog a kaden sa
Sin a midadair ko temanaan a Idomiya. So temanaan iyo sa pagabagatan na ipoon ko
kaposan o Maatay a ragat sa pagabagatan na manaros sa tampar sa sedepan.
4 Na kori ini sa tampar sa pagabagatan sa taman sa Okita a Akrabim, na pekaketas sa Sin
ago manaros taman sa Kadis Barniya. Ipoon roo na penaros sa Hasar Adar ago taman sa
Asmon.
5 Ipoon sa Asmon na kori so temanaan a kedeg ko baogan sa Misir na kepos roo ko Mala
a Ragat.
6 “ 'So temanaan iyo sa sedepan na so kilid o Mala a Ragat.
7 “ 'So temanaan iyo sa pagotaraan na ipoon ko Mala a Ragat na malalagoy taman ko
Palaw a Hor.
8 Ipoon roo na malalagoy ini taman sa Libo Hamat ago manaros roo sa Sidad
9 Ago Sipon, na kepos roo sa Hasar Inan. Giyai i temanaan iyo sii sa pagotaraan.
10 “ 'So temanaan iyo sa sebangan na ipoon sa Hasar Inan na malalagoy sa tampar sa
pagabagatan taman sa Sipam
11 Na manaros roo sa Riblah sa sebangan a Sain. Ipoon roo na malalagoy sa pagabagatan
taman ko manga bobongan sii sa sebangan a Ranao a Galili
12 Na manaros den a pekedeg ko Lawasaig a Yordan taman den ko Maatay a Ragat.
" 'Giyai i manga temanaan o lopa iyo.
13 Mandiyadi na pitero i Mosa ko manga Israil a "Giyai so lopa a mapembagibagi rekano
a nggolalan ko kaperipa. Inisogo o Allah a imbegay ini ko sapolo ago tenga ka
mbatabataa
14 Ka so manga mbatabataa a Robin ago Gad ago so sabagi ko mbatabataa a Manasih na
miyatarima iran den so kawali iran
15 Sii sa sebangan a Yordan a pantag a Yariko."
So manga Olowan a Pembagibagi ko Lopa
17 “Si Iliyasar a so imam ago si Yosowa a wata i Non na aya pembagibagi rekano ko
manga lopa a mapekawali niyo.
18 Kitoro so isa a olowan ko oman i mbatabataa a makaogop kiran ko kapembagibagia
on.
19-28 Giyai i manga ngaran iran:
Si Kaleb a wata i Yaponih a poon ko mbatabataa a Yodah,
si Simowil a wata i Amihod a poon ko mbatabataa a Simiyon,
si Ilidad a wata i Kislon a poon ko mbatabataa a Baniyamin,
si Boki a wata i Yogli a poon ko mbatabataa a Dan,
si Haniyal a wata i Ipod a poon ko mbatabataa a Manasih a wata i Yosop,
si Kimowil a wata i Siptan a poon ko mbatabataa a Ipraim,
si Ilisapan a wata i Parnak a poon ko mbatabataa a Sibolon,
si
Paltiyal a wata i Asan a poon ko mbatabataa a Isakar,
si Ahihod a wata i Siyalomi a poon ko mbatabataa a Asir,
ago si Pidahil a wata i Amihod a poon ko mbatabataa a Naptali.
29 Giyai i manga mama a initoro o Allah a pembagibagi ko lopa a mapekewali o manga
Israil sii sa inged a Kanaan.
MANGA BILANGAN 35
So manga Siti a Inisenggay a Rek o manga Imam
Sii ko katatago pen o manga Israil ko kilid a Yordan a pantag a Yariko na pitero o Allah
ki Mosa a
2 “Teroa ngka ini ko manga Israil: Poon ko lopa a mapembagian iyo na kebegan iyo so
manga Libitiyo sa manga siti a kebalingan iran. Kebegan iyo siran pen sa
pepemagonayonayan ko melilibeta ko oman i siti.
3 Rek iran angkai a manga siti a kebalingan iran, na so pepemagonayonayan ko oman i
isa on na para ko manga tamok ago so manga ayam iran.
4 Aya kaolad ai na lima gatos ka mitros ipoon ko pangeleban o siti ko oman i kilid iyan.
5 Makaliliyo sii na takes kano ron pen sa sanggibo ka mitros sii sa tampar sa sebangan
ago sii pen sa pagabagatan, sii sa sedepan, ago sii sa pagotaraan an matago sa look so siti.
Na rek iran angkai a lopa a aya pananateba ko manga siti.
6 “So nem a siti a imbegay niyo ko manga Libitiyo na aya kapepegapasan o taw a
miyakapatay sa taw a da niyan tibabaa. Liyo ron pen na kebegan iyo siran sa pat polo ago
dowa a ped a manga siti.
7 So langolangon angkai a manga siti a kibegay niyo kiran na pat polo ago walo a rakes o
manga pepemagonayonayan on.
8 Aya kadakel o manga siti a imbegay niyo kiran a poon ko lopa a mapekewali o manga
Israil na mipepasod ko kala o mapembagian o oman i mbatabataa. So mala on i bagian na
pekabegay sa mala, na so maito i bagian na pekabegay sa maito."
So manga Siti a Pekeapasan
10 “Teroa ngka ko manga Israil a 'Amay ka makaripag kano den sa Yordan sa kasoled iyo
sa Kanaan
11 Na pekasenggay kano sa manga siti a kapegapasan o taw a miyakapatay sa da niyan
tibabaa.
12 Roo makapegapas so miyakapatay kaan di kesaopi o seop rekaniyan sa da on pen
kakokoma o manga taw sii ko kalilimod.
13 Giyangkai a nem a manga siti a kisenggay niyo na pembaloy a kapepegapasan iyo,
14 A so telo ron na sii sangkai a sabala a Yordan na so telo ron na roo sa inged a Kanaan.
15 Kapegapasan ai o manga Israil ago so manga rait ago manga mananangga a kibabaling
rekano. Apiya antawaa i miyakapatay sa da niyan tibabaa na makapegapas roo.
16-18 “ 'Ogaid na amay ka aden a miyakapatay sa ped ko kiyabentola niyan on a potaw o
di na kayo, o di na sii ko kiyarobaki niyan on a ator na miyakapamono sekaniyan na
paliyogat a mbonoon.
19 So madaseg a tonganay o miyapatay niyan na aya pekabono ko miyamono. Amay ka
matoon iyan na kebono iyan sekaniyan.
20 Na amay ka aden a taw a ipekegowad iyan so ped iyan na go initolod iyan, o di na
pitibaba iyan a kiyalebada niyan on na go baden miyatay,
21 O di na o siyontok iyan sii ko kariridoa niyan on a aya niyan inipatay na paliyogat a
mbonoon angkoto a taw ka miyakapamono sekaniyan. Na so seop on na aya on pekabono
amay ka matoon iyan.
22 “ 'Ogaid na opama ka da tibabaa o taw a kiyapakapatay niyan ko ped a taw a kena a ba
niyan ridoay sii ko kinitoloden iyan on o di na sii ko kiyalebada niyan on sa apiya
antonaa,
23 O di na sii ko kiyaologa niyan ko ator a minisogat ko taw a da niyan mailay ago da
niyan tibabaa a kiyapakasakiti niyan on ago kena a ba niyan ridoay ogaid na inipatay
niyan ai,
24 Na o manggolaola ini na kekokom o kalilimod angkai a miyakapatay ago so seop on.
Na o makabenar so miyakapatay
25 Na kelinding sekaniyan o kalilimod sii ko somasaop, ka kikasoy iran ko siti a
piyagapasan iyan, na pekatareg sekaniyan roo taman sa kapatay o kapapantagan oto a
maporo a imam.
26 “ 'Ogaid na o lomiyo so miyakapatay ko siti a piyagapasan iyan
27 Na go sekaniyan matoon o somasaop ko liyo o siti na kepakay a mabono o somasaop,
na di kesala sa kapamono.
28 Pekatareg so miyakapatay ko siti a piyagapasan iyan sa taman sa kapatay o maporo a
imam. Ogaid na amay ka matay so imam na kepakay a makakasoy sekaniyan ko rek iyan
a lopa.
29 Giyangkai a manga kokoman na ipapaliyogat rekano taman ko kapepamagapidapidi
rekano apiya anda kano mababaling.
30 “ 'Apiya antawaa i miyakapamono na kebono mambo asar a kiyaseksian o kalalawanan
so sakataw bo a taw. Di kepakay a ba bonoa so taw sii ko kapeseksii ron o sakataw bo a
taw.
31 “ 'Di kano terima sa tendan a ipelekat ko kaoyagoyag o taw a kiyabenaran a
miyamano, ka disomala a mbonoon.
32 Na di kano mambo terima sa ipelekat ko taw a miyagapas ko siti a pepegapasan kaan
makakasoy ago makabaling ko lopa iyan sa da pen kapatay o maporo a imam.
33 “ 'Di niyo peresiki so inged a babalingan iyo ka so kapamono na ipekeresik o lopa. Di
den kepapas so kasalaan o inged a aden a kiyapamono on a makaliyoliyo ko kapatay o
miyamono.
34 Di niyo peresiki so inged a ron kano pekabaling a aya ko kakadenan, ka saken so Allah
a komakaken sii ko manga Israil.
MANGA BILANGAN 36
So manga Kokoman mipantag ko Lopa a Mapekewali o manga Babay
So manga olowan ko mbawataan i Giliyad, a wata i Makir ago apo i Manasih a wata i
Yosop na somiyong ki Mosa ago so ped ko manga olowan sa Israil
2 Na pitero iran on a "Inisogo reka o Allah a kambagibagia ko lopa sii ko manga Israil a
nggolalan ko kaperipa, na iniinsarat iyan reka a imbegay ngka so kawali o pagari ami a si
Silopihad ko manga wata iyan a manga babay.
3 Ogaid na opama ka mapangaroma siran o mama a maaped ko salakaw a mbatabataa na
so bagian iran ko lopa na kelebat ko kawali o manga apo ami ka kioman ko kawali o
mbatabataa o miyakapangaroma kiran. Na sabap san na kekorangan so bagian a
mapekewali ami.
4 Na amay ka mipangasoy so manga lopa ko manga asal a kikawali ron sii ko Ragon a
Kapakaasal na so kawali o manga wata i Silopihad na kitapi ko kawali o mbatabataa a
kepedan kiran, na kelebat ai ko kawali o manga apo ami."
5 Mandiyadi na inibegay i Mosa ko manga Israil angkai a sogoan a poon ko Allah: "Benar
so pitero o manga mama ko mbatabataa a Manasih.
6 Na giyai i inisogo o Allah mipantag ko manga wata i Silopihad a manga babay:
Makipengaroma siran ko apiya antawaa a kabaya iran asar a maaped ko mbatabataa o
manga tonganay o ama iran.
7 Da a lopa a kawali o manga Israil a ba mipetetepasa ko ped a manga mbatabataa, ka so
kawali o oman i mbatabataa na ketatap a katatangana iran on.
8 Oman i babay a makapekawali sa lopa ko apiya anda ko mbatabataa a Israil na disomala
a makipengaroma ko mama a maaped ko mbatabataa o ama iyan kaan so oman i Israil na
matangan iyan so kawali o manga apo iyan.
9 Da a lopa a ba mipetetepasa ko manga mbatabataa, ka oman i isa ka mbatabataa sa Israil
na ketangan iran so lopa a mapekewali ran."
10 Na tiyoman o manga wata i Silopihad a manga babay so inisogo o Allah ki Mosa.
11 Siki Maklah, Tirsah, Hoglah, Milkah ago si Nowah na miyakipangaroma siran langon
ko manga tonganay o ama iran
12 A maaped ko manga mbawataan ko mbatabataa a Manasih a wata o Yosop, na so lopa
iran na da mada ko kawali o mbatabataa o ama iran.
13 Giyai i manga sogoan ago manga kokoman a inibegay o Allah ko manga Israil a
nggolalan ki Mosa roo ko kapantaran sa Mowab ko kilid a Lawasaig a Yordan a pantag a
Yariko.
DOTIRONOMIYO
DOTIRONOMIYO 1
So Sogoan sa Kangganati sa Sinay
Aya madadalem sangkai a sorat na so kabasa o Nabi Mosa a miyatero iyan ko
kalangolangon a manga Israil roo ko disirto ko masesebangan a Lawasaig a Yordan. Sa
masa oto na kekampo siran ko Balintad a Yordan a marani sa siti a Sop sii sa pageletan a
Paran ago giya Topil, Laban, Hasirot ago Disahab. (2 Sapolo bo ago isa a gawii a
ipelalakaw ron ipoon sa Palaw a Sinay taman sa Kadis Barniya a sii pagokiti sa
kapalawan sa Idomiya.)
3 Giyangkai a masa na miyakapat polo den ragon ko kiyaipos o kiyapakaawa o manga
Israil sa Misir, na sii ko paganay a gawii ko ikasapolo a olanolan na piyakalangkap kiran
o Mosa so langon a inisogo on o Allah a peteroon iyan.
4 Miyanggolaola ini ko oriyan o kiyatabana o Mosa ki Sihon a dato o manga Amoriyo a
mindato sa Hisbon, ago so kiyatabana niyan ki Og a dato sa Basan a mindato sa Astarot
ago giya Idri.
5 Na sii sangkai a katatago iran ko masesebangan a Yordan roo sa inged a Mowab na
pipoonan o Mosa so di niyan dii kapamagosaya sangkai a kitab a tig iyan a:
6 “Isako sisii tano sa Palaw a Sinay na pitero rektano o Allah a Tohan tano a
‘Miyabolobolo den a katatareg iyo sangkai a palaw.
7 Timotimo kano na go kano den lalakaw ko kapalawan a inged o manga Amoriyo; song
kano ko langon a midadair on a manga inged roo ko Balintad a Yordan ago sii pen ko
manga kapalawan, so manga kapantaran ago so manga kalopaan sa pagotaraan ago sii pen
ko kilid a ragat a Miditiraniyo, na taros kano ko pagiingedan o manga Kanaaniyo ago roo
sa Libanon a taman den ko mala a Lawasaig a Yopratis.
8 Ilaya niyo, ka imbegay aken rekano angkai a lopa a pesongowan iyo. Ikano roo na go
niyo tangana angkoto a lopa a minisepa o Allah a imbegay niyan ko manga apoapoan iyo
a so Ibrahim, Iskak, ago Yakob ago so kebabadan kiran.’ ”
Tomiyoro so Mosa sa manga Pangongokom
9 Pitero pen o Mosa ko manga taw a “Sii ko katatago tano pen sa Palaw a Sinay na pitero
aken rekano a ‘Di aken kegaga so kapegawidi aken rekano a ba saken bo.
10 Piyakandakel kano den o Allah a Tohan iyo taman sa lagid kano imanto sa kadakel o
manga bitoon sa langit.
11 Na pengnin ko ko Allah a Tohan o manga apo iyo a pagomanomanan kano niyan sa
nggibonggibo takep ko kadakel iyo imanto na go kano niyan rakmati a giyoto so minitopa
niyan rekano!
12 Ogaid na andamanaya i kakeawidi aken ko manga awid a akal iyo, so manga
mindadamar iyo ago so manga rido iyo amay ka saken bo?
13 Pamili kano sa manga oongangen ago somasabot ago pageedatan a manga mama ko
oman i mbatabataa rekano ka siran i pekasanganen aken rekano.’
14 “Na inisembag iyo raken a ‘Mapiya so pitero o ka a penggolaolaan ami.’
15 “Mandiyadi na kinowa ko so manga oongangen ago pageedatan a manga mama a
miyapili iyo ko manga mbatabataa rekano na piyakipagolowanan aken kiran so oman i
sanggibo, so oman i magatos, so oman i lima polo ago so oman i sapolo, na tomiyoro ako
pen sa ped a manga sanasanaan a aya den maporo ko oman i mbatabataa.
16 Sa masa oto na ininsaratan aken angkoto a manga pengokom rekano a tig aken a
‘Pamakinega niyo so di pegayonayonan o manga pagari niyo na kokoma niyo sa matito a
apiya anda ko rido o manga pagari niyo o di na rido o isa a pagari niyo ago so
mananangga.
17 Di kano peramiramig ko kapepangokom iyo; pakapelagida niyo so kakokoma niyo ko
mababa ago so maporo. O ba niyo kaleken so apiya antawaa, ka so kokoman a ikokom
iyo na rek o Allah. So apiya antonaa a rido a tanto rekano a maregen na wita niyo raken
ka saken i kokom on.’
18 Na sii sangkoto a masa na iniinsarat aken rekano so langon taman a patot a
penggolaolaan iyo.
Siyogo so manga Penoriman
19 “Oriyan iyan na tiyoman tano so inisogo rektano o Allah a Tohan tano ka giyanatan
tano so Palaw a Sinay na miyantap tano ko kapalawan a inged o manga Amoriyo, na kitas
tano angkoto a maolad ago piyakalekelek a disirto a miyailay niyo. Kagiya misampay
tano sa Kadis Barniya
20 Na pitero aken rekano a ‘Miyakaoma tano den ko kapalawan a babalingan o manga
Amoriyo a imbegay rektano o Allah a Tohan tano.
21 Ilaya niyo, ka inibegay niyan rekano so lopa a pesongowan iyo. Na, ikano roo den na
go niyo tangana ka giyanan i inisogo rekano o Allah a Tohan o manga apo iyo. Di kano
pekelek o di na petelaw!’
22 “Ogaid na langon kano somimbag raken a pitero iyo a ‘Pakaonaan tano ko inged so
manga penoriman on kaan amay ka mamakakasoy na mapanotol iran rektano so
makapantag ko keokitan tano ago so manga inged a penga ooma tano.’
23 “Mapiya raken angkoto a pamikiran, na miyamili ako sa sesakataw ko oman i
mbatabataa a sapolo ago dowa.
24 Gomiyanat siran ago tomiyakedeg ko inged a kapalawan, na iniraot siran ko Balintad a
Iskol na piyagenebeneb iran mariksa.
25 Sii ko kiyakasoy iran rektano na iniawid tano iran ko onga sapad ko inged, na pitero
iran a ‘Tanto a mapiya angkoto a lopa a imbegay rektano o Allah a Tohan tano!’
Somiyopak ko Allah so manga Israil
26 “Ogaid na da kano materang sa kasong iyo ron, na siyopak iyo baden so sogoan o
Tohan iyo.
27 Na miyanarotaro kano sii ko manga barombarong iyo a di niyo dii teroon a
‘Ipekegowad tano o Allah! Giyanan i sabap a iniliyo tano niyan sa Misir kaan tano
niyan mapalad ko manga Amoriyo a pemamono rektano.
28 Andamanaya i kapekasong tano roo? Piyakalekan tano o manga pagari tano a tig iran
a “So manga taw roo na lebi rektano a manga babager ago manga poporo! Manga ala so
manga siti a kikokotaan sa maporo, na liyo ron pen na miyailay ami roo so manga iganti a
manga moriyataw o Anak!” ’
29 “Ogaid na pitero aken rekano a ‘Di kano tanto a pekewan; di niyo siran keleken.
30 So Allah a Tohan iyo a mangongonaan rekano i makipetidawa sabap rekano a datar o
inikidia niyan rekano sa Misir sii ko kiyamasai niyo ron
31 Ago sii pen ko disirto. Miyailay niyo roo o andamanaya i kiyaawidi rekano o Allah a
Tohan iyo a lagid o ama a aawidan iyan so wata iyan sii ko langon o kiyandalakawan iyo
taman sa minisampay kano sangkai a darpa.
32 Apiya pen oto na da niyo ron pen ai sarigi so Allah a Tohan iyo
33 A miyangonaan rekano ko kapelalakaw niyo a pepangiloba sa darpa a kapekempowan
iyo. Inipanoro iyan rekano so manga lalan a ipagokit iyo a dii makanggolalan ko gabon
igira a kadadaondaw a dii mbaloy a apoy ko kagagawii.
Diyaneg o Allah so manga Israil
34 “Kagiya maneg o Allah so kiyapanarotaro iyo na kiyararangitan sekaniyan, na inisepa
iyan a
35‘Da den a isa bo sangkai a kapapantagan imanto a manga rarata a taw a ba pekailay ko
mapiya a lopa a inisepa aken a imbegay aken ko manga apo iyo
36 Liyo ron si Kaleb a wata i Yaponi. Keilay niyan, na imbegay aken on ago sii ko
manga wata iyan so lopa a kiyapanadaan iyan ka kagiya miyangongonotan sekaniyan ko
Allah sa iklas ko poso iyan.’
37 “Na kiyararangitan ako mambo o Allah sabap rekano a tig iyan raken a ‘Apiya seka
pen na di on pekasoled.
38 Ogaid na so salinggogopa a ka a si Yosowa a wata i Non i pekasoled roo. Na
pakabagera ngka so niyat iyan, ka sekaniyan i makapegolowan ko manga Israil ko
kaketangana iran sangkoto a lopa.’
39 Na so manga wata iyo a miyatero iyo a penga bibiyag a di iran pen mapakapesenggaya
so mapiya ago so marata na siran i pekasoled ko inged. Siran i mbegan aken on na siran i
makapekewali ron.
40 Na so sekano ron peman na peto kano na antap kano lomalakaw ko disirto sii ko lalan
a ipesong ko Mariga a Ragat.’
41 “Mandiyadi na aya inisembag iyo na ‘Miyakandosa kami ko Allah! Tekedeg kami a
makipetidawa ka giyoto so inisogo rekami o Allah a Tohan tano.’ Na initakip o oman i
isa rekano so gomaan iyan sa katidawa a aya kapipikira niyo ron na malebod so kasondoli
niyo ko manga inged sii ko kapalawan.
42 “Ogaid na pitero raken o Allah a ‘Teroa ngka kiran a di siran tekedeg a ba
makipetidawa ka di ako kiran magonot, na tebanen siran o manga ridoay iran.’
43 Pitero aken rekano ai, ogaid na da ako niyo pakinega ka siyopak iyo baden so sogoan o
Allah, na sabap ko kategas iyo i olo na tomiyakedeg kano ko kapalawan.
44 Na mililiyo so manga Amoriyo a kibabaling sangkoto a manga palaw na giyobat kano
iran, na lagid o makapal a batiyokan a piyangeted kano iran ago diniyaman roo ko inged a
Idomiya taman den sa Hormah.
45 Na komiyasoy kano ago gomiyoraok sii ko kamamasaan o Allah, ogaid na da niyan
tagoa sa ginawa so kiyagoraok iyo aya pen o ba kano niyan siyagipa.
46 Na samaoto na tomiyareg kano roo sa Kadis, na miyatey a alongan a katatago iyo roo.
DOTIRONOMIYO 2
So Kiyapakapagenebeneb ko Disirto
“So kiyaipos oto na mipeto tano na miyantap lomalakaw ko ipemeteden a pekedegen
tano so lalan a ipesong ko Mariga a Ragat ka giyoto i iniinsarat raken o Allah. Na
miyatey a alongan a di tano dii kapakapagenebeneb ko kapalawan sa Idomiya.
2 “Na pitero raken o Allah a
3‘Miyabolobolo den a kiyapakapagenebeneb iyo sangkoto a kapalawan. Imanto na
antap kano sa pagotaraan.
4 Na teroa ngka ini ko manga taw a: "Magaan kano den makaokit ko inged o manga
tonganay niyo a kiyababadan ko Isaw a kibabaling sa Idomiya. Ikelek kano iran ogaid na
pagiingat kano
5 Na di niyo siran kekati ko katidawa, ka di aken sekano mbegan ko lopa iran a apiya so
bo so kedapoan iyo ron, ka inibegay aken den a Idomiya ko kiyababadan ko Isaw a kawali
iran.
6 Keparo rekano so kabayadi niyo kiran a pirak ko pangenengken a kekan iyo ago so ig a
keinom iyo.’
7 “Ka tatanodi niyo a kiyarakmatan kano o Allah a Tohan iyo ko langon a miyanggolaola
niyo. Siniyap kano niyan ko kiyalalakaw niyo sangkai a maolad a mitataog a kaden. Sii
ko soled angkai a miyakapat polo ragon na maaped rekano so Allah a Tohan iyo, na da a
ba rekano miyakorang a apiya antona onon." '
8 “Na kagiya malepas tano so inged o manga tonganay tano a kiyababadan ko Isaw a
kibabaling sa Idomiya na tiyailisan tano so lalan a ipoon sa Ilat a ipesong sa Isiyon Gibir
ka miyantap tano mokit ko lalan sa disirto sa Mowab.
9 Na pitero raken o Allah a ‘Di niyo pesemoka so manga Mowabiyo a kiyababadan ko
Lot aya pen o ba niyo siran kakati ko katidawa, ka inibegay aken kiran so siti a Ar a aya
iran kawali, na di aken sekano mbegan ko apiya anda ko lopa iran a ba niyo makewali.’ ”
10(Giya Ar na babalingan gowani o madakel a manga babager a iganti a bebetowan sa
Imim. Lagid siran sa kapangapoporo o manga Anakim a isa pen a bangsa a manga iganti.
11 Lagid o manga Anakim a ibibiling siran mambo a manga Ripaim, ogaid na bitowan
siran o manga Mowabiyo sa manga Imim.
12 Lagid oto mambo so manga Horiyo a kibabaling gowani sa Idomiya, ka so manga
kiyababadan ko Isaw na piyamogaw iran siran ago bininasa iran, na miyakasambi siran
maginged ko darpa iran a datar o pinggolaola o manga Israil roo ko lopa a inibegay kiran
o Allah a mapekewali ran.)
13 Pitero pen o Mosa a “Inisogo rektano o Allah a ‘Ganat kano na ripag kano sa Lawasaig
a Sirid.’ Na rominipag tano ko Lawasaig a Sirid.
14 Miyakatelo polo ago walo ragon a miyakasagad ipoon ko kiyaawa tano sa Kadis
Barniya taman ko kiyaripag tano sa Lawasaig a Sirid! Ka sii ko kiyaawa tano sa Kadis
Barniya na inisepa o Allah a disomala a makapegenebeneb tano ko disirto taman sa
mamatay so langon o kapapantagan oto a manga mama a makapesendaro a sisii ko kampo
tano.
15 Na so den so lima o Allah i rominido kiran taman sa bininasa niyan siran a da den a ba
niyan kiran miyalamba sii ko kampo.
16 “Kagiya mamatay so langon angkanan a manga sondaro a sisii rektano
17 Na pitero raken o Allah a
18‘Imanto a gawii na pekatarapas kano ko temanaan a Mowab roo sa siti a Ar.
19 Giyoto i kapekaoma niyo ko marani ko inged o manga Amoniyo a kiyababadan ko
Lot. Di niyo siran pesemoka aya pen o ba niyo kakati ko katidawa, ka inibegay aken so
lopa iran a aya iran kawali na di aken sekano mbegan ko apiya anda on a ba niyo
makewali.”
20(Giyangkoto a lopa na inibilang mambo a inged o manga Ripaim a kibabaling roo
gowani, ogaid na bitowan siran o manga Amoniyo sa Samsomim.
21 Ndadakel siran ago manga babager a taw a manga poporo a datar o manga Anakim.
Ogaid na bininasa siran o Allah kaan matangan o manga Amoniyo so lopa iran, na
miyakasambi siran roo maginged.
22 Lagid oto mambo so pinggolaola o Allah pantag ko manga moriyataw o Isaw a
kibabaling sa Idomiya. Ka bininasa niyan so manga Horiyo kaan matangan o
kiyababadan ko Isaw so lopa iran, na miyakasambi siran roo maginged taman den imanto.
23 Lagid oto mambo so miyanggolaola ko manga Abim a kibabaling sii ko manga inged a
iraraot sa inged a Gasa. Ka so manga Kaptorim a miyakapoon sa polo a Krita na
bininasa iran so manga Abim na miyakasambi siran maginged ko lopa iran.)
24 Pitero pen o Mosa a “Oriyan o kiyaokiti tano sa Mowab na pitero rektano o Allah a
‘Lalakaw kano na go kano ripag ko Lawasaig a Arnon. Ilaya niyo, ka miyapalad aken
rekano den si Sihon a so Amoriyo a dato sa Hisbon ago so inged iyan. Gobata niyo na
pooni niyo magaw so lopa iyan.
25 Ipoon sangkai a gawii na tegoan aken sa mala a kalek rekano so langon a nasiyon ko
dalem a doniya. Igira a pekeneg iran so manga totol mipantag rekano na penanabaden
siran sa kalek.’
Tiyaban o manga Israil si Sihon a Dato sa Hisbon
26 “Sii ko katatago tano ko Disirto sa Kidimot na somiyogo ako sa manga taw a
makasong ki Sihon a dato sa Hisbon a maawid sa katero a marinaw a peteroon iyan a
27‘Pakaokita kami ngka ko inged ka. Kedegen ami so mala a lalan na di kami penilasilay
sa kawanan diwang.
28 Mbayadan ami a pirak so pangenengken a kekan ami ago ig a keinom ami asar bo a
pakaokiten kami ngka a pelalag ko inged ka
29 A lagid o inikidia rekami o manga kiyababadan ko Isaw a kibabaling sa Idomiya ago
so manga Mowabiyo a kibabaling sa Ar. Pakaokita kami ngka bo taman sa makaripag
kami ko Lawasaig a Yordan a misampay kami ko lopa a imbegay rekami o Allah a Tohan
ami.’
30 Ogaid na minda si Sihon a dato sa Hisbon sa ba tano ron makaokit, ka so Allah a
Tohan iyo na piyakategas iyan a olo niyan ago piyakatopo niyan so poso iyan kaan
rektano mapalad o Allah so inged iyan a aya niyan den pinggolaola.
31 “Na pitero raken o Allah a ‘Ilaya ngka, ka pepeladen ko rekano si Sihon ago so inged
iyan. Na, pooni niyo den magaw so lopa iyan kaan iyo makewali!’
32 Samaoto na somiyampang rektano si Sihon ago so langon a sondaro niyan sa
kapakipetidawa iran sii sa Yahas.
33 Na so Allah a Tohan tano na piyalad iyan siran rektano, na miyapatay tano siran a
rakes o manga wata iyan ago so langon a sondaro niyan.
34 Sii sangkoto a masa na miyaagaw tano so langon a siti niyan, na miyabinasa tano siran
sa tarotop, a so manga mama, so manga babay ago so manga wata sii ko oman i siti, na da
den a ba tano kiran piyakapagoyag.
35 Ogaid na kinowa tano so manga pangangayamen ago so miyanga tetaban ko manga siti
a miyaagaw tano.
36 Ipoon sa Arowir sii ko kilid o Balintad a Arnon ago so siti a sii matatago ko balintad
na taman den sa Giliyad na da den a isa bo a kokotaan a siti a ba rektano mabager ka
palaya den rektano piyalad o Allah a Tohan tano.
37 Ogaid na da niyo ba bo obaya so lopa o manga Amoniyo roo ko kilid o Lawasaig a
Yabok aya pen so manga siti roo ko manga kapalawan a inisapar o Allah a Tohan tano a
kasongowi tano ron.
DOTIRONOMIYO 3
Tiyaban o manga Israil si Og a Dato sa Basan
“Aya tomiyalondog roo na miniseg tano sa tampar sa pagotaraan sii ko lalan a isong sa
Basan; na si Og a dato sa Basan ago so langon a sondaro niyan na somiyampang rektano
sii sa Idri sa kapakipetidawa iran.
2 Na pitero raken o Allah a ‘Di niyo sekaniyan ikelek ka piyalad aken ko lima niyo a
rakes o langon a manga pagtaw niyan ago so lopa iyan. Nggolaolaa niyo ron so inikidia
niyo ki Sihon a dato o manga Amoriyo a mindato sa Hisbon.’
3 “Mandiyadi na piyalad rektano o Allah a Tohan tano si Og a dato sa Basan a rakes den
o langon a pagtaw niyan, na miyapatay tano siran sa da den a ba kiran miyakapagoyag.
4 Sangkoto bo a masa na miyaagaw tano langon so manga siti niyan. Da den a isa bo ko
nem polo a siti a ba tano da makowa, a so dalem a inged a Argob a ndadatoan i Og sii sa
Basan.
5 Langon angkai a manga siti na kikakokotaan sa maporo a kitatanggalan sa potaw so
manga pintoan iyan; na aden pen a tanto a madakel a manga roroni a inged a da kakotai.
6 Bininasa tano siran sa tarotop a datar o inikidia tano ki Sihon a dato sa Hisbon; ka
bininasa tano so oman i siti a rakes on so manga mama, manga babay ago so manga wata.
7 Ogaid na so langon a pangangayamen ago so miyanga tetaban tano ko manga siti iran
na kinowa tano.
8 “Sii sangkoto a masa na miyaagaw tano so langon a lopa angkoto a dowa kataw a dato a
manga Amoriyo sii sa sebangan a Lawasaig a Yordan a ipoon sa Lawasaig a Arnon na
taman den sa Palaw a Hirmon.
9(Giya Hirmon na bebetowan sa Siriyon o manga taga Sidon, na aya ipembeto ron o
manga Amoriyo na Sinir.)
10 Miyaagaw tano so langon a manga siti ko kapantaran ago giya pen a dalem a Giliyad
ago Basan taman sa Salkah ago Idri a so manga siti sii ko ndatoan i Og sa Basan.”
11(Sa masa oto na si bo si Og a dato sa Basan i miyalamba ko manga iganti a bebetowan
sa manga Ripaim. So kantir iyan na inembaalan a potaw a manga pat ka mitros a katas
iyan ago dowa ka mitros a kaolad iyan. Sisii pen ai sa Rabah a siti o manga Amoniyo.)
So manga Mbatabataa a Miyaginged sa Sebangan a Yordan
12 “Isako makowa tano angkai a lopa na inisenggay aken a rek o manga mbatabataa a
Robin ago si Gad so lopa sii sa pagotaraan a siti a Arowir a marani ko Lawasaig a Arnon
ago so pen so sabaad ko kapalawan a Giliyad a rakes o manga siti on.
13 So miyalamba sa Giliyad ago so langon a inged a Basan a kiyandatoan i Og na
inisenggay aken a rek o sabaad ko mbatabataa a Manasih.” (So langon o kaingedan a
Argob sii sa Basan na bebetowan den gowani sa inged o manga Ripaim.)
14 Si Yair a moriyataw i Manasih na aya miyakakowa ko langon a inged a Argob sii sa
Basan taman den ko temanaan o manga Gisoriyo ago manga Maakatiyo, na
piyakipagingaran iyan ko manga inged on so ingaran iyan, na bebetowan ai pen imanto sa
‘Manga roroni a inged i Yair.’
15 Inisenggay aken a Giliyad a rek o mbawataan i Makir a ped ko mbatabataa a Manasih.
16 Ogaid na so manga mbatabataa a Robin ago Gad na inisenggay aken kiran so kalopaan
a ipoon sa Giliyad taman den ko Lawasaig a Arnon sii sa pagabagatan a aya temanaan
iyan na so look o lawasaig, na iraraot roo den ko Lawasaig a Yabok a aya temanaan o
manga Amoniyo.
17 Aya masesedepan a temanaan o lopa iran na so Lawasaig a Yordan a ipoon ko Ranaw
a Galili sii sa pagotaraan na taman ko Maatay a Ragat sii sa pagabagatan, na so rindib o
Palaw a Pisgah na aya masesebangan a temanaan iyan.
18 “Sa masa oto na ininsaratan aken sekano a tig aken a ‘So Allah a Tohan iyo na
inibegay niyan rekano angkai a lopa ko masesebangan a Yordan a mapekewali niyo.
Ogaid na so langon a manga mama rekano a makapesondaro na paliyogat a penggomaan
ago meripag sa Yordan a pengonaan ko manga pagari niyo a so manga ped a mbatabataa a
manga Israil.
19 Ogaid na so manga karoma niyo, so manga wata iyo ago so madakel a pangangayamen
iyo – katawan aken a madakel kano i pangangayamen – na makapetelimbagak sii ko
manga siti a inibegay aken rekano.
20 Paliyogat a pagogopan iyo so manga pagari niyo taman sa matangan iran mambo so
lopa a imbegay kiran o Allah a Tohan iyo roo ko sabala a Lawasaig a Yordan ago taman
sa pekalintaden siran roo o Allah a datar o pinggolaola niyan rekano sii. Amay ka magiyoto na pekakasoy so oman i isa rekano sii ko lopa a inibegay aken rekano.’
21 “Sangkoto a masa na ininsaratan aken si Yosowa a tig aken a ‘Kiyamasaan ka den so
langon a pinggolaola o Allah a Tohan ka sangkai a dowa kataw a dato a si Sihon ago si
Og. Na lagid oto mambo so ikidia o Allah ko langon a ndatoan roo ko sabala a Yordan a
pesongowan ka.
22 Di ngka siran keleken, ka so den so Allah a Tohan ka i makipetidawa kiran sabap
rekano.’
Inisapar ko Mosa so Kapakaripag iyan sa Yordan
23 “Sa masa oto na miyangangampedian ako ko Allah a tig aken a
24‘Ya Allah a Lebi a Mamaapaar, inepoonan ka den makiilay ko oripen ka so kala a ka
ago so manga babager a galebek ka. Ka antonaa tohan roo sa kasorgaan o di na sii sa
doniya i makapenggolaola ko manga ala i kabatowa a galebek a di ngka dii nggolaolaan?
25 Kapedipedi ka bo na pakaripaga ko ngka ko Lawasaig a Yordan kaan aken mailay
angkoto a mapiya a inged roo ko sabala on, a so manga pipiya a kapalawan ago giya
Libanon!’
26 “Ogaid na sabap rekano na kiyararangitan ako o Allah na da ako niyan pakinega.
Pitero iyan raken a ‘Giyanan bo! Di ngka raken den pegaloya so makapantag san.
27 Takedeg ka ko poro o Palaw a Pisgah na go ka pelangkalangkaw sa sedepan, sa
pagotaraan, sa pagabagatan ago sa sebangan. Langkaon ka a mata ngka sangkoto a
kalopaan, ka di ka pekaripag sa Yordan.
28 Ogaid na sogoa ngka si Yosowa na pakabagera ngka so niyat iyan, ka sekaniyan i
makapegolowan sangkai a manga taw ko kaperipag iran na pekitangan iyan kiran so lopa
a keilay ngka.’
29 “Mandiyadi na tomiyareg tano ko balintad a marani sa Bit Piyor.”
DOTIRONOMIYO 4
Inisogo o Mosa so Kaparatiyaya
Pitero pen o Mosa a “Hey manga Israil, pakinega niyo imanto so manga taritib ago manga
kokoman a ipemangendao aken rekano. Tomana niyo ai kaan kano pekeoyagoyag ago an
kano makasoled ago makakewali ko lopa a imbegay rekano o Allah a Tohan o manga apo
iyo.
2 Di niyo pagomani aya pen o ba niyo lebati angkai a manga sogoan o Allah a Tohan iyo
a ipembegay aken rekano sa ba niyo den tomana!
3 Miyailay niyo so pinggolaola o Allah a Tohan iyo roo ko Palaw a Piyor. Bininasa niyan
sii rekano so oman i isa a sominimba ko katohanan a Baal,
4 Ogaid na so langon iyo a mapaparatiyaya ko Allah a Tohan iyo na oyagoyag den
taman imanto.
5 “Ilaya niyo, ka inipamangendao aken rekano so manga taritib ago manga kokoman, ka
giyoto i iniinsarat raken o Allah a Tohan ko kaan iyo ai minggolalan sii ko inged a
pesongowan iyo a mapekewali niyo.
6 Kagiya ka maoto na piyapiyai niyo ai tomoman ka giyanan i kapekiilain iyo ko
ongangen iyo ago sabot sii ko ped a manga nasiyon. Ka amay ka maneg iran so
makapantag ko langon angkai a taritib na peteroon iran a ‘Matamataan a giyangkai a
kababantogan a nasiyon na maongangen ago somasabot a manga taw!’
7 Ka antonaa pen i ped a mala a nasiyon a aden a tohan iyan a marani kiran a ba datar sa
karani rektano o Allah a Tohan tano igira a pepangangarapan tano ron?
8 Na antonaa pen i ped a mala a nasiyon a aden a manga taritib iyan ago manga kokoman
a ba datar sa kaontol o langon o kitab a ipembegay aken rekano imanto?
9 “Ogaid na pakapananggilaa niyo piyapiya a ginawa niyo o ba niyo kalipati so manga
pinggolaola o Allah a kiyamasaan iyo den aya pen o ba niyo mapakada ko poso iyo ko
tenday a omor iyo. Ka panotola niyo baden ko manga wata iyo ago manga apo
10 A ba di labaw so makapantag ko gawii a katitindeg iyo ko kamamasaan o Allah a
Tohan iyo roo ko Palaw a Sinay isako teroon raken o Allah a ‘Limoda ngka so manga taw
ko hadapan aken ka pakineg aken kiran so manga katero aken kaan iran masowa so
kipekeleken raken taman ko kaooyagoyag iran pen ago an iran mipangendao ko manga
wata iran.’
11 Na miyobay kano ko palaw ago tominindeg ko kababaan iyan, na pekerab ai sa apoy a
pepamamanik roo sa langit a kakokoloban so palaw sa manga iitem a gabon ago makapal
a maliboteng.
12 Na miyakimbitiyarai rekano so Allah a poon ko look o apoy. Miyaneg iyo so sowara
niyan a dii tero, ogaid na da a ba niyo miyailay a ropaan iyan, ka sowara bo a miyaneg
iyo.
13 Piyayag iyan rekano so
kapasadan iyan a so sapolo a sogoan a inisogo iyan a tomanen iyo, na inisorat iyan ai sii
ko dowa timan a mapapapan a ator.
14 Samaoto na inisogo raken o Allah a ipemangendao aken rekano so manga taritib ago
manga kokoman a paliyogat a ipenggolalan iyo roo ko inged a soledan iyo a mapekewali
niyo.
Inisapar so Kasimba sa Barahala
15 “Sii ko gawii a miyakimbitiyarai rekano so Allah a poon ko apoy roo sa Palaw a Sinay
na da den a ba niyo miyailay a ropaan iyan. Kagiya ka maoto na pakapananggilaa niyo
piyapiya a ginawa niyo
16 O ba kano madosa ko kapagembaal iyo sa barahala a pesimbaan iyo a isasayan ko
apiya antonaa ropaan a apiya anda ko ropaan a mama o di na babay,
17 O di na ropaan o apiya antonaa a binatang sii sa kalopaan, o di na papanok a dii
melayolayog sa kawang,
18 O di na oled a pepamanola ko lopa o di na seda sii ko ig sa didalem a lopa.
19 Na igira a pelangag kano sa langit a pekeilay niyo so alongan, so olan ago so manga
bitoon, a so langon a pemanindaw sa langit, na di kano pakigawi sa kasodiyodi niyo ron
ago kasimbaa, ka giyanan so manga nganin a inisenggay o Allah a Tohan iyo a ipapantag
ko langon a manga taw ko dalem a doniya.
20 Ogaid na sekano i manga taw a kinowa o Allah a poon sangkoto a perapogan a potaw
a giya Misir kaan kano niyan mabaloy a kawali niyan a giyanan i kapakambebetad iyo
imanto.
21 “Ogaid na kiyararangitan ako o Allah sabap rekano, na inisepa iyan a di ako den
pekaripag sa Lawasaig a Yordan a ba ako makasoled ko mapiya a inged a imbegay rekano
o Allah a mapekewali niyo.
22 Ka sii ako petay sangkai a inged; di ako pekaripag sa Yordan, ogaid na sekano i
pekaripag on sa kapekewaliya niyo sangkoto a mapiya a lopa.
23 Na iktiyari niyo o ba niyo kalipati so kapasadan o Allah a Tohan iyo a inembaalan iyan
mipantag rekano; di niyo ai sogoka ko kipagembaalen iyo ko ginawa niyo sa barahala a
iroropa ko apiya antonaa a nganin, ka inisapar ai o Allah a Tohan iyo,
24 Ka so Allah a Tohan iyo na pepekalengan a apoy a tanaod sekaniyan a Tohan.
25 “Apiya sii ko pekatalingoma a masa amay ka mbabawata kano ago pamagapoan a
malokes kano den roo sangkoto a lopa na di kano pendosa ko kapangembaal iyo sa
barahala a iroropa ko apiya antonaa a nganin, ka marata oto a galebek ko kapekeilaya on
o Allah a Tohan iyo, na pakapekerangiten iyo sekaniyan.
26 Pakipemataanan aken ko kasorgaan ago so doniya sangkai a gawii a o nggolaolaa niyo
ai na magaan so magaan a kakeda iyo roo ko inged a pesongowan iyo sa ripag a Yordan
sa kapekewaliya niyo ron. Di bo ketey a kapeginetaw niyo ron, ka kebinasa kano sa
tarotop.
27 Isegomparak kano o Allah sii ko ped a manga taw, na maito rekano bo a makapegoyag
sii ko manga nasiyon a ron kano dendegen o Allah.
28 Roo kano pekasimba ko manga katohanan a pasad a manosiya, a so manga barahala a
kayo ago ator a di pekailay o di na pekaneg o di na pekakan aya pen o ba makabaw.
29 Ogaid na o mbabanoga niyo roo so Allah a Tohan iyo na ketoon iyo sekaniyan o
panagontamani niyo sa iklas ko poso iyo ago iklas ko niyawa niyo.
30 Amay ka karegenan kano a minitalingoma rekano den angkai a langon a manga nganin
sii ko penga oori a gawii na kesoy kano ko Allah a Tohan iyo na peratiyayaan iyo.
31 Ka masalinggagaw so Allah a Tohan iyo; di kano niyan itolak o di na mbinasaan aya
pen o ba niyan barobaa so kapasadan iyan ko manga apo iyo a pimataanan iyan sa sapa.
Isaisa bo a Tohan
32 “Pangingiseen iyo imanto so makapantag ko miyanga iipos a gawii a da pen so masa
niyo, a so manga gawii ipoon ko kiyaadena o Tohan ko manosiya sii sa doniya. Iseen iyo
sii ko pirowarowangan o doniya o ba aden den a mala i kabarakat a miyanggolaola a ba
datar ai aya pen o ba aden a miyaneg a ba datar ai.
33 Ba aden a ped a manga taw a miyakaneg ko sowara o Tohan a dii tero a poon ko look
o apoy a lagid o miyaneg iyo a ba siran on mambo miyakapagoyag?
34 Ba aden a ped a tohan a tomipeng komowa ko isa a nasiyon a poon ko ped a nasiyon
kaan iyan siran mapagtaw a lagid o kiyakowaa rekano o Allah a Tohan iyo a poon sa
Misir? Ka iniliyo kano niyan roo a nggolalan ko mala i kapaar a lima niyan ago mabager
a barokan iyan a miyangaden sa manga tiyoba, manga nanao, manga piyakamemesa,
katidawa ago so manga tanto a piyakalekelek a kiyamasaan iyo den.
35 “Piyakiilay ai rekano o Allah kaan iyo makenal a sekaniyan bo i Tohan a da den a
rimbang iyan.
36 Poon sa kasorgaan na piyakineg iyan rekano so sowara niyan kaan kano niyan
kainsarati; na sii sa doniya na piyakiilay niyan rekano so piyakalekelek a apoy niyan na
miyaneg iyo so manga katero iyan a pepekapoon ko look o apoy.
37 Sabap ko kapekebabayai niyan ko manga apo iyo na piyamili kano niyan a
kiyababadan kiran. Na iniliyo kano niyan sa Misir sii ko kamamasai niyan rekano a
nggolalan ko mala a kabatowa niyan.
38 Sii ko kapegantap iyo kiran na piyamogaw niyan so manga nasiyon a lebi rekano pen a
manga ala ago manga babager, na inowit kano niyan ko inged iran kaan iyan rekano
mibegay a kawali niyo, a so lopa a rek iyo den imanto a gawii.
39 “Sabota niyo ago padalema niyo imanto ko manga poso iyo a so Allah na aya Tohan
roo sa kasorgaan ago sii sa doniya; da den a rimbang iyan!
40 Tomana niyo so manga taritib iyan ago manga kokoman a ipembegay aken rekano
imanto a gawii kaan kano makategompiya ago so manga wata iyo ago an mapakalendo a
omor iyo sii ko lopa a imbegay rekano o Allah a Tohan iyo a kebaloy a rek iyo sa taman
sa pakataman.”
So manga Siti a Pekeapasan ko Masesebangan a Yordan
41 Sa masa oto na sominggay so Mosa sa telo a siti ko masesebangan a Yordan
42 A keapasan o apiya antawaa i miyakapatay sa ped a taw a kena a ba niyan riridoa
gowani aya pen o ba niyan tibabaa so kiyabonoa on. O makapagapas sekaniyan ko apiya
anda sangkai a manga siti na kesabet iyan so niyawa niyan.
43 So manga siti na giya Bisir sii ko maporo a kapantaran ko disirto a ipapantag ai ko
manga taw ko mbatabataa a Robin, ago giya Ramot sii sa Giliyad a ipapantag ko
mbatabataa a Gad, ago giya Golan sii sa Basan a ipapantag ko mbatabataa a Manasih.
So Pamekasan o Kitab
44 Giyai i kitab a inibegay o Mosa ko manga Israil.
45 Giyai so manga insarat, manga taritib ago so manga kokoman a inibegay kiran o Mosa
isako makaliyo siran sa Misir
46 Sii ko kakekampo iran ko balintad sa sebangan a Lawasaig a Yordan a marani sa siti a
Bit Piyor. Giyai so lopa a rek gowani i Sihon a dato o manga Amoriyo a mindato sa
Hisbon. Tiyaban sekaniyan o Mosa ago so manga Israil ko oriyan o kiyapakaliyo iran sa
Misir.
47 Inagaw iran so lopa iyan ago so lopa i Og a dato sa Basan a so dowa kataw a dato o
manga Amoriyo ko masesebangan a Yordan.
48 Giyangkai a lopa na ipoon sa siti a Arowir ko kilid a Lawasaig a Arnon taman ko
Palaw a Siriyon sii sa pagotaraan (giyanan na Palaw a Hirmon)
49 A rakes on pen so langon o kapantaran ko masesebangan a Yordan taman den ko
Maatay a Ragat sii sa pagabagatan, ago taman ko rindib o Palaw a Pisgah.
DOTIRONOMIYO 5
So Sapolo a Sogoan
Piyakisogoan o Mosa so kalangolangon a manga Israil sa kapelimolimod iran na pitero
iyan kiran a “Hey manga Israil, pamakinega niyo so manga taritib ago manga kokoman a
ipembegay aken rekano sangkai a gawii. Paganada niyo ai na inengkaa niyo sa o ba niyo
di tomana.
2 Isako tomatareg tano sa Palaw a Sinay na mimbaal so Allah a Tohan tano sa
kapasadan mipantag rektano.
3 Kena a ba so manga apo tano i papantagan iyan on ka sektano langon a oyagoyag a sisii
den imanto.
4 Poon ko look o apoy sii ko palaw na miyakimbitiyarai rekano so Allah a makapageedapa kano.
5 Sa masa oto na sii ako makatitindeg ko pageletan iyo ago so Allah sa kapekalangkapa
ko rekano ko manga katero iyan, ka inikalek iyo so apoy na da kano takedeg ko palaw.
Na giyai i pitero o Allah:
6 “ ‘Saken so Allah a Tohan iyo a aya rekano miyakaliyo sa inged a Misir a ron kano
miyapangongoripen.
7 “ ‘Di ngka simbaa so apiya antonaa tohan a rowar raken.
8 “ ‘Di ngka pagembaalen a ginawa ngka sa barahala a iperopa ko apiya antonaa kaaden a
sii matatago ko kawang, o di na sii ko kalopaan, o di na sii ko ig ko didalem a lopa.
9 Di ngka siran sodiyodi aya pen o ba ngka simbaa, ka saken a so Allah a Tohan ka na
tanaod a Tohan. Ipetena aken ko manga wata so manga dosa o manga ama iran taman ko
ikatelo ago ikapat ka apid o siran oto a pekegowad raken.
10 Ogaid na ipekelimo aken so siran oto a pekebabaya raken a pepamanoman ko manga
sogoan aken apiya taman ko makasanggibo a kapepamagapidapidi kiran.
11 “ ‘Di ngka pegosara sa marata so Ingaran o Allah a Tohan ka, ka di pelepasen o Allah
so kasalaan o apiya antawaa a mirata ko Ingaran iyan.
12 “ ‘Selaselaa ngka so Gawii a Idedeke na senggain ka a soti, ka giyoto so inisogo reka o
Allah a Tohan ka.
13 Nem gawii a kipenggolalanen ka ko langon a galebek ka,
14 Ogaid na so ikapito gawii na Gawii a Idedeke a rek o Allah. Sii sangkoto a gawii na di
ngka on penggolalanen so apiya antonaa galebek ka, apiya seka o di na so wata a ka a
mama o di na babay, aya pen o ba so oripen ka a mama o di na babay, o di na so sapi i ka,
so kimar ka, o di na so apiya anda ko manga pangangayamen ka, aya pen o ba so mananangga a mababaling ko inged ka, kaan mambo makadeke so oripen ka a mama o di na
babay a datar ka.
15 Tatanodi niyo a miyapangongoripen kano mambo roo sa Misir na iniliyo kano roo o
Allah a Tohan iyo a nggolalan ko mala i kapaar a lima niyan ago mabager a barokan iyan.
Giyoto i sabap a inisogo reka o Allah a Tohan ka so kaselaselaa ko Gawii a Idedeke.
16 “ ‘Pagadati ngka so ama a ka ago so ina a ka a aya reka inisogo o Allah a Tohan ka
kaan mapakalendo a omor ka ago makategompiya ka sii ko inged a imbegay reka o Allah
a Tohan ka.
17 “ ‘Di ka pemono.
18 “ ‘Di ka pesebo.
19 “ ‘Di ka pemanekew.
20 “ ‘Di ngka peseksiin so di benar mipantag ko siringan ka.
21 “ ‘Di ngka pesingayoa so karoma o siringan ka; di ngka penapsowi so walay niyan o di
na so lopa iyan, o di na so oripen iyan a mama o di na babay, o di na so sapi iyan, so
kimar iyan, o di na so apiya antonaa a rek o siringan ka.’
22 “Giyanan so manga sogoan a inibegay rekano o Allah isako matitimo kano langon roo
ko palaw. Tanto a matanog so sowara niyan a miyakapoon ko apoy, so gabon ago so
makapal a maliboteng, na da den a ba niyan sii inipagoman. Na inisorat iyan ai sii ko
dowa timan a mapapapan a ator na inibegay niyan raken.
So Kalek o manga Taw
23 “Isako maneg iyo so sowara a pepekapoon ko maliboteng sii ko kapekadeg o palaw sa
apoy na miyobay raken so langon a olowan ko oman i mbatabataa rekano ago so manga
pelokelokesen
24 Na pitero iyo a ‘Piyakiilay rektano o Allah a Tohan tano so bantogan iyan ago so kala
iyan, na miyaneg ami so sowara niyan a miyakapoon ko apoy. Miyailay ami sangkai a
gawii a pekeoyagoyag den so manosiya apiya pen o miyakimbitiyarai ron so Tohan!
25 Ogaid na ino kami pemageget imanto? Ka o maneg ami peroman so sowara o Allah a
Tohan tano na pematay kami den, na pelameden kami angkai a mala a apoy.
26 Ka antawaa den i matag manosiya a miyakaneg ko sowara o oyagoyag a Tohan a dii
tero a poon ko apoy a ba miyakapagoyag a datar ami?
27 Kasoy ka, Mosa, na seka den i pamakineg ko kabasa o Allah a Tohan tano, na seka
den mambo i tero rekami ko langon a peteroon iyan reka, na pemakinegen ami ago
ipenggolalan.’
28 “Miyaneg o Allah angkai a manga katero iyo na pitero iyan a ‘Miyaneg aken so pitero
reka angkanan a manga taw na mapiya den so langon a pitero iran.
29 O ba bo malalayon ko poso iran so datar anan a niyat sa kipekeleken iran raken ago so
kapetomana ko manga sogoan aken kaan iran mitegompiya ago so manga wata iran sa
taman sa pakataman!
30 Ika roo den na teroa ngka kiran a mbabaling siran den ko manga barombarong iran.
31 Ogaid na sii ka raken den, Mosa, ka imbegay aken reka so langon a sogoan, taritib ago
manga kokoman a mipemangendao ngka kiran kaan iran ai matoman sii ko inged a
imbegay aken kiran a mapekewali ran.’
32 “Kagiya ka maoto, hey manga Israil, na inengkaa niyo sa o ba niyo di tomana so
inisogo rekano o Allah a Tohan iyo. O ba kano silay sa diwang kawanan.
33 Kedega niyo so langon a manga lalan a inisogo rekano o Allah a Tohan iyo kaan
mapakalendo so omor iyo ago makategompiya kano roo ko inged a ketangan iyo.
DOTIRONOMIYO 6
So Mala a Sogoan
“Giyai i manga sogoan, manga taritib ago manga kokoman a iniinsarat raken o Allah a
Tohan iyo a ipemangendao aken rekano kaan iyo minggolalan roo ko inged a
pesongowan iyo a mapekewali niyo.
2 Paliyogat rekano ago so kebabadan rekano a sii ko tenday a omor iyo na ikalek iyo so
Allah a Tohan iyo ago tomana niyo so langon a taritib ago manga kokoman a ipembegay
aken rekano kaan mapakalendo a omor iyo.
3 Kagiya ka maoto, manga Israil, na pamakinega niyo ai na go niyo piyapiyai tomoman
kaan iyo mitegompiya ago ikababad sa tanto a madakel sii ko lopa a pekepakayan ago
oodaren, ka giyoto i initopa rekano o Allah a Tohan o manga apo iyo.
4 “Pamakinega niyo, hey manga Israil, a isaisa so Allah; so bo so Allah i Tohan tano!
5 Na kabebayai niyo so Allah a Tohan iyo sa iklas ko poso iyo, iklas ko niyawa niyo ago
iklas ko bager iyo.
6 Giyangkai a manga sogoan a ipembegay aken rekano imanto na padalema niyo sii ko
manga poso iyo.
7 Pamangendaon iyo ko manga wata iyo na pepagaloyaloya niyo igira a sisii kano sa
walay, igira a pelalakaw kano ko lalan, ago igira a miiga kano ago mimbowat.
8 Iketen iyo ini sii ko manga lima niyo a aya ipetedentadem, na babeden iyo sii ko beneng
iyo.
9 Soraten iyo sii ko mbala a kilid o pintoan o manga walay niyo ago sii ko manga gimowa
iyo.
Tiyapaosan so manga Israil mipantag ko di Kaparatiyaya
10 “Di ketey na pagowiten kano o Allah a Tohan iyo roo ko inged a inisepa iyan a
imbegay niyan ko manga apoapoan iyo a so Ibrahim, Iskak ago so Yakob. Giyoto so lopa
a aden a manga ala ago manga pipiya on a siti a da niyo bangona,
11 Ago manga walay a kikapepeno a pitibarangan a manga pipiya a ipamemetad a da niyo
ron tagoa, ago manga paridi a da niyo kalota, ago manga waged a obas ago kayo a olibi a
da niyo pamolaa. Na amay ka makakan kano ron ago manga oosog
12 Na pananggilai niyo o ba niyo kalipati so Allah a Tohan iyo a aya rekano miyakaliyo
sa Misir a ron kano miyapangongoripen.
13 “Kaleken iyo so Allah a Tohan iyo; sekaniyan bo i pangongonotani niyo, na sii kano
bo dii sepa ko Ingaran iyan.
14 Di kano simba sa salakaw a manga tohan, a so manga tohan o manga taw ko melilibeta
rekano;
15 Ka so Allah a Tohan iyo a maaped rekano na tanaod a Tohan, na pemborngat rekano
so gani niyan na penasen kano niyan ko liyawaw o lopa.
16 Di niyo tepengi so Allah a Tohan iyo a lagid o pinggolaola niyo roo sa Masah.
17 Piyapiyai niyo tomoman so manga sogoan iyan ago so manga insarat ago manga taritib
a inibegay niyan rekano.
18 Nggolaolaa niyo so ontol ago so mapiya sii ko kapekeilaya on o Allah kaan kano
makategompiya a makasoled ago makatangan ko mapiya a lopa a inisepa o Allah a
imbegay niyan ko manga apoapoan iyo
19 A pembogaon iyo so langon o manga ridoay niyo sii ko kapegantap iyo kiran ka giyoto
den i initopa o Allah.
20 “Sii ko pekatalingoma a manga gawii na ipagise rekano o manga wata iyo a ‘Ino
rektano sogoon o Allah a Tohan tano so katomana sangkai langon a manga insarat, manga
taritib ago manga kokoman?’
21 Na teroa niyo kiran a ‘Miyapangongoripen kami o Radiya Piraon roo sa Misir, ogaid
na iniliyo kami o Allah sa Misir a nggolalan ko mala i kapaar a lima niyan.
22 Kiyamasaan ami so piyakamemesa a manga nanao a piyakiilay niyan, ago so manga
ala i kabarakat ago piyakalekelek a pinggolaola niyan ko inged a Misir ago sii ko Piraon
ago so langon a manga pagtaw niyan.
23 Na iniliyo kami niyan roo na inowit kami niyan sii kaan iyan rekami mibegay angkai a
lopa a inisepa iyan ko manga apoapoan tano.
24 Na inisogo rektano o Allah so katomana sangkai langon a manga kitab ago so kikaleken ko Allah a Tohan tano kaan tano lalayon tetagompiya ago an iyan kapagongowi so
kaoyagoyag tano a lagid o pesowaan iyan imanto.
25 Na o piyapiyai tano tomoman angkai langon a manga sogoan a inibegay rektano o
Allah a Tohan tano na imbilang iyan ai a kaontol tano.’
DOTIRONOMIYO 7
So Kasoti o manga Pagtaw o Allah
“Amay ka pekasoleden kano o Allah a Tohan iyo ko lopa a pesongowan iyo a
mapekewali niyo na pemogaon iyan roo so madakel a nasiyon sii ko kapegantap iyo kiran,
a so manga Hitiyo, manga Girgasiyo, manga Amoriyo, manga Kanaaniyo, manga Pirsiyo,
manga Hibiyo ago so manga Hibosiyo, a so pito a nasiyon a lebi rekano a mala ago
mabager.
2 Na amay ka peladen siran rekano o Allah a Tohan iyo a miyataban iyo siran den na
disomala a binasaa niyo siran sa tarotop. Di kano kiran pakipepesadanowai aya pen o ba
niyo siran kapediin.
3 Di kano kiran pakipekemonga. Di niyo pakipengaromaan so manga wata a iyo a babay
ko manga wata iran a mama, na di niyo pakapengaromaa so manga wata iyo a mama ko
manga wata iran a babay,
4 Ka pekatalikoden iran raken so manga wata iyo a manga mama sa kasimbaa iran ko
salakaw a manga tohan. O kegiyoto na pemborngat rekano so gani o Allah na magaan so
magaan a kambinasaa niyan rekano.
5 Giyai i penggolaolaa niyo kiran: Nggegebaa niyo so manga aparan iran, peroropeta niyo
so babarakaten kon a manga ator iran, pamataa niyo so manga polaos a toos ko katohanan
iran a Asirah na panotonga niyo ko apoy so manga barahala iran.
6 Ka soti kano a manga taw a isesenggay a rek o Allah a Tohan iyo. Pinili kano niyan ko
langon a taw ko dalem a doniya a mabaloy a mala on i arga a manga pagtaw niyan.
7 “So kiyababayai ago kiyapilia rekano o Allah na kena a ba sabap sa lebi kano a madakel
a di so ped a bangsa, ka lebi kano a maito ko langon a bangsa.
8 Ka aya sabap iyan na pekebabayaan kano o Allah ago ipetoman iyan so inisepa iyan ko
manga apoapoan iyo. Giyanan i sabap a siyabet kano niyan a nggolalan ko mala i kapaar
a lima niyan na piyokas kano niyan ko kapepangongoripena rekano o Piraon a dato sa
Misir.
9 Kagiya ka maoto na kilalaa niyo a so Allah a Tohan iyo na aya Tohan, a so
kasasarigan a Tohan a itotoman iyan so kapasadan iyan ago ipekelimo iyan so siran oto a
pekebabaya rekaniyan ago pepamanoman ko manga sogoan iyan apiya taman ko
makasanggibo a kapepamagapidapidi kiran.
10 Ogaid na so pepanga gogowad rekaniyan na mbadalan iyan siran sa kabinasaan sa di
niyan den isendod.
11 Kagiya ka maoto na piyapiyai niyo tomoman so manga sogoan, manga taritib ago
manga kokoman a ipembegay aken rekano sangkai a gawii.
So Balas o Kapakatotoman
12 O tagoa niyo sa ginawa angkai a manga kokoman na go niyo piyapiyai so kapetomana
niyo ron na itoman mambo o Allah a Tohan iyo so kapasadan iyan rekano na tetapen iyan
pen so kipelimoon iyan rekano a giyoto so inisepa iyan ko manga apoapoan iyo.
13 Kebabayaan kano niyan ago perakmatan, na pakapendakelen kano niyan. Perakmatan
iyan mambo so ipembabawata iyo ago so pekeaden o lopa iyo a so manga pereperan iyo,
so bago a arak iyo ago so lana a olibi; na perakmatan iyan pen so manga nati o manga
talon iyo a manga sapi, bilibili ago kambing sii ko inged a inisepa iyan a imbegay niyan
ko manga apoapoan iyo.
14 Kerakmatan kano a lawan pen ko apiya antawaa ped a manga taw. Da den a isa bo ko
manga mama rekano o di na babay a ba kebalek a lagid mambo o manga pangangayamen
iyo.
15 Ipelidas rekano o Allah so oman i gedamen. Di niyan rekano itena so apiya anda ko
piyakalekelek a manga paniyakit a kiyatokawan iyo roo sa Misir, ka pakipetelogedam
iyan baden ko langon a pepanga gogowad rekano.
16 “Disomala a polanga niyo langon so manga taw a peladen rekano o Allah a Tohan iyo.
Di niyo siran kepediin aya pen o ba niyo simbaa so manga katohanan iran, ka kilitag
rekano ai.
17 “Baanda niyo mapetero sa ginawa niyo a ‘Lebi rektano a mabager angkai a manga
nasiyon! Andamanaya i kakeagawa tano ko lopa iran?’
18 Ogaid na di niyo siran keleken! Tanodi niyo piyapiya so inikidia o Allah a Tohan iyo
ko Piroan ago so dalem a inged a Misir.
19 Tanodi niyo so piyakalekelek a manga kasiksaan a kiyamasaan iyo, ago so mala i
kabarakat ago piyakamemesa a manga galebek, ago so mala i kapaar a lima ago mabager
a barokan a ininggolalan o Allah a Tohan iyo ko kiniliyon iyan rekano roo. Datar oto
mambo a ikidia niyan ko langon a taw a ipekelek iyo.
20 Liyo ron pen na pagowitan siran o Allah a Tohan iyo sa manga taboowan taman sa
apiya so miyamakapagoyag kiran a miyamakatepok rekano na kebinasaan.
21 “Kagiya ka maoto na di niyo keleken angkoto a manga taw, ka so Allah a Tohan iyo a
maaped rekano na mala i gees ago piyakalekelek a Tohan.
22 Maito maito a kambogawa o Allah a Tohan iyo sangkoto a manga nasiyon sii ko
kapegantap iyo kiran. Di niyo kegaga a ba niyo siran mapolang sa makaisaisa, ka o
magiyoto na pendakel a tanto so manga iila a binatang a makalilibet rekano.
23 Ogaid na so Allah a Tohan iyo na peladen iyan siran rekano; tanto niyan siran a
pelibogen ko mala a kalek taman sa mabinasa siran.
24 Peladen iyan so manga dato iran ko kapaar iyo, na pepasen iyo so manga ngaran iran
ko dalem o doniya. Da den a isa kiran bo a ba makapemayandeg ko hadapan iyo;
mbinasaan iyo siran langon.
25 So manga barahala o manga katohanan iran na totonga niyo ko apoy; di niyo
pesingayoa aya pen o ba niyo pananamoka so matatago on a manga pirak ago bolawan, ka
kilitag rekano ai ka kagiya piyakagowagowad ko Allah a Tohan iyo.
26 Di niyo pegawidi ko walay niyo so apiya antonaa a piyakagowagowad a nganin ka
kisenggay kano a kebinasa a datar iyan. Kagowaden iyo baden ago kasisingain iyo, ka
isesenggay ini a kebinasa.
DOTIRONOMIYO 8
So Mapiya a Lopa a Mapekewali
“Piyapiyai niyo tomoman so langon a sogoan a ipembegay aken rekano imanto kaan kano
pekeoyagoyag ago mababad, na pekasoled kano ago pekatangan ko lopa a inisepa o Allah
a imbegay niyan ko manga apoapoan iyo.
2 Tatademi niyo o andamanaya i kiyaagaka rekano o Allah a Tohan iyo ko soled angkai a
miyakapat polo ragon a inilalakaw niyo sii ko disirto. Piyakapangalimbabaan kano niyan
sa katepengi niyan rekano kaan iyan mapariksa o antonaa i madadalem ko poso iyo o
tomana niyo so manga sogoan iyan ago so di.
3 Piyakamamaregenan kano niyan na pipero iyan a kapekeor iyo, na bigan kano niyan sa
roti a makan iyo a so pangenengken a di niyo katawan aya pen o ba so manga apo iyo.
Pinggolaola niyan ai kaan iyan rekano mipangendao a kena bo a ba paan i ipekeoyagoyag
o manosiya ka so pen so oman i katero a pepekapoon ko ngari o Allah.
4 Sii sangkai a miyakapat polo ragon na da den makisi so manga nditaren iyo aya pen o
ba milelebag so manga ai niyo.
5 Kagiya ka maoto na sabota niyo a lagid o ama a peparintaan iyan so wata iyan na
peparintaan kano mambo o Allah a Tohan iyo.
6 “Sabap roo na tomana niyo so manga sogoan o Allah a Tohan iyo; kedega niyo so
manga lalan iyan na kaleken iyo sekaniyan.
7 Ka pagowiten kano o Allah a Tohan iyo ko masibokar a lopa, a so lopa a madakel a
lawasaig on ago manga ranaranaw, ago manga bowalan a pegembowat sii ko manga
balintad ago manga bobongan;
8 A so lopa a aden a trigo ago bantad on, ago manga obas, manga higos, manga granada,
lana a olibi ago gola a teneb.
9 Giyai so lopa a di kano ron kegotem aya pen o ba kano korangi sa apiya antona onon, a
so lopa a masesembor a potaw so manga ator on ago kapeminaan sa tombaga so manga
bobongan on.
10 Na amay ka makakan kano ago manga oosog na panalamati niyo so Allah a Tohan
iyo sabap ko mapiya a lopa a inibegay niyan rekano.
Di niyo Pekalipati so Allah
11 “Inengkaa niyo sa o ba niyo pakalipati so Allah a Tohan iyo ko di niyo katomana ko
manga sogoan, manga kokoman ago manga taritib iyan a ipembegay aken rekano imanto.
12 Amay ka makakan kano ago manga oosog a miyakambaal kano den sa manga pipiya a
walay a babalingan iyo
13 Na amay ka ndakel den so manga talon iyo a sapi, bilibili ago manga kambing a
miyanga tatakep den so manga bolawan iyo, manga pirak ago so langon taman iyo
14 Na pananggilai niyo o ba miporo a ginawa niyo a pakalipatan iyo baden so Allah a
Tohan iyo a miyakaliyo rekano sa inged a Misir a ron kano miyapangongoripen.
15 Sekaniyan i miyagak rekano kometas sangkoto a maolad ago piyakalekelek a disirto a
babalingan o manga bibisa a nipay ago manga orang. Darpa oto a kamara a da a ig on,
ogaid na piyakambowalan iyan on so ig a mainom iyo a poon ko lakongan.
16 Sekaniyan i migay rekano sa roti a makan iyo roo ko disirto, a so pangenengken a di
den katawan o manga apo iyo. Piyakamamaregenan kano niyan sa katepengi niyan
rekano kaan kano niyan mapakategompiya sii ko oriyan oto.
17 Pananggilai niyo o ba migedi sa ginawa niyo a ‘So gees tano ago mala a kapaar na aya
tano inikowa sangkai a kakawasaan.’
18 Ka tatademi niyo a so Allah a Tohan iyo i pembegay rekano sa gees a mikowa niyo sa
kakawasaan, ka giyoto i kipetomanen iyan ko kapasadan a inisepa iyan ko manga
apoapoan iyo.
19 “O kalipati niyo so Allah a Tohan iyo ka mananangoran kano ko salakaw a manga
tohan sa kapenalagadi niyo ron ago kasimbaa na pemataanan ko rekano imanto a kebinasa
kano.
20 Na lagid o manga nasiyon a miyabinasa o Allah sii ko kapesorong iyo na lagid oto
mambo a kakebinasa niyo sabap ko da niyo kaparatiyayaa ko Allah a Tohan iyo.
DOTIRONOMIYO 9
Kena a ba Sabap ko Kaontol o manga Israil
“Pamakineg kano, hey manga Israil! Imanto na magaan kano den romipag ko Lawasaig a
Yordan sa kasoled iyo ago katengana niyo ko lopa o manga nasiyon a manga ala ago
manga babager a di sekano. Maolad so manga siti iran a kikakokotaan sa maporo.
2 Manga babager ago manga poporo so manga taw ron a manga moriyataw o manga
Anakim a manga iganti. Katawan iyo so makapantag kiran, na miyaneg iyo den so kabasa
a ‘Antawaa i makapemayandeg ko hadapan manga Anakim?’
3 Ogaid na tangkeda niyo sa ginawa niyo imanto a so Allah a Tohan iyo i pengonaan
rekano romipag a lagid o pepekalengan a apoy. Mbinasaan iyan siran; pegesen iyan siran
ko sii ko kapegantap iyo kiran kaan magaan so magaan a kapagagawa niyo ko lopa iran
ago so kapolanga niyo kiran a giyoto so initopa rekano o Allah.
4 “Maipos so kambogawa kiran o Allah a Tohan iyo sii ko kapegantap iyo kiran na o ba
niyo teroa sa ginawa niyo a ‘Inowit tano sii o Allah sangkai a inged a mapekewali tano
sabap ko kaontol tano.’ Kena, ka so kamarataan angkai a manga nasiyon na aya
kesabapan ko kapembogawa kiran o Allah sii ko kapegantap iyo kiran.
5 Kena a ba so kaontol iyo o di na so katito o poso iyo i kesabapan ko kaketangana niyo
ko lopa iran. Ka aya sabap iyan na so kamarataan iran ago sabap sa an mitoman o Allah a
Tohan iyo so inisepa iyan ko manga apoapoan iyo a so Ibrahim, Iskak ago Yakob.
6 Kagiya ka maoto na sabota niyo a kena a ba so kaontol iyo i sabap a imbegay rekano o
Allah a Tohan iyo angkai a mapiya a lopa a mapekewali niyo, ka manga tetegas kano man
i olo a manga taw.
So Bolawan a Nati a Sapi
7 “Tademi niyo ago di niyo pelipati so kiyapakaperangita niyo ko Allah a Tohan iyo sii
ko disirto. Ipoon ko gawii a kiyaawa iyo sa Misir taman sa iniraot kano sangkai a darpa
na pesopak kano ko Allah.
8 Apiya roo pen sa Palaw a Sinay na kiyakatan iyo so Allah sa tanto kano niyan a
kiyararangitan sa kapolanga niyan rekano.
9 Isako tomakedeg ako ko palaw sa katerimaa ko ko dowa a mapapapan a ator a
misosorat on so kapasadan a pimbaalan o Allah mipantag rekano na ndodoo ako den ko
palaw sa miyakapat polo ka kadadaondaw ago kagagawii, na da ako den kan aya pen o ba
miyakainom.
10 Na inibegay raken o Allah so dowa a mapapapan a ator a so den so tindoro o Tohan i
somiyorat on. Aya misosorat on na so langon a sogoan a piyakalangkap rekano o Allah
roo ko palaw a miyakapoon ko look o apoy sii ko gawii a kiyalimod iyo.
11 “Kagiya mapopos so pat polo ka kadadaondaw ago kagagawii na inibegay raken o
Allah so dowa timan a ator a ron misosorat so kapasadan.
12 Na pitero raken o Allah a ‘Tondagay ka nggagaan, ka so manga taw ngka a iniliyo
ngka sa Misir na piyakakerata iran a ginawa iran. Magaan bo a kiyapakasilay iran poon
ko lalan a inisogo aken kiran ka inimbaal iran a ginawa iran sa tiyowang a barahala.’
13 “Pitero raken pen o Allah a ‘Miyailay aken angkanan a manga taw na mataan a manga
tetegas siran i olo!
14 Na di ako ngka sepeyi ka polangen ko siran a pepasen aken so katatademi kiran ko
dalem o doniya. Na mbalowin ko so kebabadan reka a bangsa a lebi a madakel ago mala
i gees a di siran.’
15 “Mandiyadi na mipeto ako a tomiyondagay ko palaw a pekadeg pen sa apoy a
kaaawidan aken so dowa a mapapapan a ator a kasosoratan ko kapasadan.
16 Kagiya mangilailay ako na miyailay aken a miyakandosa kano ko Allah a Tohan iyo,
ka inimbaal iyo a ginawa niyo sa tiyowang a barahala a inisayan sa nati a sapi.
Miyakasilay kano nggagaan poon ko lalan a inisogo rekano o Allah.
17 Mandiyadi na inidebak aken ko lopa so dowa timan a ator a kakapetan ko na piroropet
aken den ko kamamasai niyo ron.
18 Na gomipe ako peroman ko kamamasaan o Allah sa miyakapat polo ka kadadaondaw
ago kagagawii. Da ako den kan aya pen o ba miyakainom sabap ko langon a manga dosa
a miyasogok iyo ko kiyanggolaola niyo sa marata ko kapekeilaya on o Allah a aya niyan
inikararangit.
19 Inikalek aken so piyakalekelek a gani o Allah ka kagiya kiyasokodan den so rarangit
iyan a ipolang iyan rekano. Ogaid na inampon ako bo o Allah sangkoto a masa.
20 Mala mambo a kararangit o Allah ki Aron sa kambinasaa niyan on, ogaid na inipangangarapan aken pen si Aron sa masa oto.
21 Na kinowa ko angkoto a inikadosa niyo a nati a sapi a pimbaalan iyo na inilebad aken
ko apoy. Oriyan iyan na piroropet aken taman sa miyagombiyombi a datar o bayanek, na
inilebad aken ai ko lawasaig a petoga sa beba a pepekapoon ko palaw.
22 “Piyakaperangit iyo pen so Allah roo sa Tabirah, roo sa Masah ago sa Kibrot Hataaba.
23 Na kagiya sogoon kano o Allah sa ngganat kano sa Kadis Barniya na pitero iyan a
‘Ikano roo den na go niyo tangana so lopa a inibegay aken rekano.’ Ogaid na siyopak iyo
baden so inisogo rekano o Allah a Tohan iyo. Da niyo sekaniyan sarigi aya pen o ba niyo
piyakineg so pitero iyan.
24 Lalayon kano somosopak ko Allah ipoon den ko gawii a kiyatokawi aken rekano.
25 “Na gomegepe ako ko kamamasaan o Allah ko soled angkoto a miyakapat polo ka
kadadaondaw ago kagagawii sabap ko kiyateroa o Allah sa polangen kano niyan.
26 Miyangangarapan ako ko Allah a tig aken a ‘Ya Allah a Lebi a Mamaapaar a Tohan, di
ngka mbinasaa so manga pagtaw ngka a aya ngka kawali a siyabet ka ago iniliyo ngka sa
Misir a nggolalan ko kabatowa a ka ago mala i kapaar a lima ngka.
27 Tademi ngka so manga oripen ka a so Ibrahim, Iskak ago Yakob. Di ngka pegilayani
so kategas i olo angkai a manga taw o di na so kamarataan iran ago so dosa iran.
28 Ka o ba baden matero o manga Imisiren sii ko inged a ron kami ngka iniliyo a ‘Da
magaga o Allah a kapagowita niyan kiran ko inged a initopa niyan kiran, na inowit iyan
siran ko disirto sa kapemonoa niyan kiran ka ipekegowad iyan siran.’
29 Ogaid na manga pagtaw ngka siran a aya ngka kawali a iniliyo ngka sa Misir a
nggolalan ko mala a kapaar ka ago so mabager a barokan ka.”
DOTIRONOMIYO 10
So Bago a manga Mapapapan a Ator
“Samaoto na pitero raken o Allah a ‘Panapil ka sa dowa timan a mapapapan a ator a
datar o miyaona, na mbaal ka sa Kaban a kayo a ketagoan on. Takedeg ka raken sangkai
a palaw
2 Ka isorat aken sangkoto a manga ator so manga katero a inisorat aken ko miyaona a
manga ator a riyopet ka. Mapasad oto na tagoa ngka sii ko Kaban.’
3 “Mandiyadi na mimbaal ako sa Kaban a kayo a akasiya na miyamanapil ako sa dowa
timan a mapapapan a ator a datar o miyaona, na tomiyakedeg ako ko palaw a kaaawidan
aken so dowa timan a ator.
4 Inisorat on o Allah so inisorat iyan ko miyaona, a so sapolo a sogoan a inibegay niyan
rekano sii ko palaw isako makimbitiyarai sekaniyan rekano a poon ko look o apoy sii ko
gawii a kiyalimod iyo. Inibegay raken o Allah so manga ator
5 Na mipeto ako a tomiyondagay ko palaw. Na inisoled aken so dowa timan a ator ko
Kaban a pimbaalan aken ka giyoto so inisogo raken o Allah, na ndodon den ai imanto.”
(6 Lomiyalakaw so manga Israil a poon ko manga paridi o manga Yaakaniyo ka
somiyong siran sa Mosirah. Roo miyatay si Aron na roo mambo minilebeng, na si
Iliyasar a wata iyan na aya on miyakasambi a imam.
7 Ipoon roo na somiyong siran sa Godgodah, na tomiyaros peman taman sa Yotbatah a
lopa a madakel a lawasaig on.
8 Sii sangkoto a masa na initoro o Allah so mbatabataa a Libi a aya pegawid ko Kaban sa
Kapasadan o Allah ago petelagad rekaniyan ago pepekarakmat ko manga taw sii ko
Ingaran iyan. Na giyanan i manga sangan iran taman den imanto.
9 Sabap sii na da a bagian o mbatabataa a Libi ko lopa a miyakewali o manga pagari ran.
So kapenalagadi iran ko Allah na aya iran kawali ka giyoto so initopa kiran o Allah a
Tohan iyo.)
10 “Tomiyareg ako ko palaw sa miyakapat polo ka kadadaondaw ago kagagawii a datar o
siyowa aken ko miyaona a masa. Na inampon ako pen o Allah sangkoto a masa ka
miniyog sa di kano niyan mbinasaan.
11 Na pitero iyan raken a ‘Ika roo den; pagolowani ngka so manga taw ko kapelalakaw
iran kaan siran makasoled ago makatangan ko lopa a inisepa aken a imbegay aken ko
manga apo iran.’
So Ipapaliyogat o Allah
12 “Imanto, hey manga Israil, na aya bo a ipapaliyogat rekano o Allah na kaleken iyo so
Allah a Tohan iyo; kedega niyo so langon a lalan iyan; kabebayai niyo sekaniyan ago
pangongonotani niyo so Allah a Tohan iyo sa iklas ko poso iyo ago iklas ko niyawa niyo,
13 Na tomana niyo so manga sogoan ago manga taritib iyan a ipembegay aken rekano
sangkai a gawii a aya niyo kamapiyaan.
14 Ilaya niyo, ka rek o Allah a Tohan iyo so langit a apiya so pipeporoan ko manga langit,
ago so pen so doniya a rakes o langon taman a matatago on.
15 Apiya pen oto na inikasoat o Allah so kapekebabayai niyan ko manga apoapoan iyo,
na sekano a kiyababadan kiran i piyamili iyan a di so apiya antonaa ped a bangsa a
mabaloy a manga pagtaw niyan, na giyoto i kapakambebetad iyo imanto a gawii.
16 Kagiya ka maoto na pakadaa niyo so kamarataan ko manga poso iyo na di niyo
pepakategasa a manga olo niyo.
17 Ka so Allah a Tohan iyo na aya Tohan o langon a tohan ago Kadnan o langon a
kadnan. Kababantogan sekaniyan a Tohan a mala i gees ago piyakalekelek, a di den
pegampilampil aya pen o ba tarima sa tendan.
18 Ipepaninindegan iyan so kabenar o manga ilo ago manga balo, na pekebabayaan iyan
so manga mananangga a kibabaling sii rekano a pembegan iyan siran sa pangenengken
ago manga nditaren.
19 Kagiya ka maoto na kabebayai niyo so manga mananangga, ka manga mananangga
kano mambo gowani roo sa Misir.
20 Kaleken iyo so Allah a Tohan iyo na sekaniyan bo i pangongonotani niyo. Kapeti niyo
sekaniyan sebenar na so bo so Ingaran iyan i sepaan iyo.
21 Sekaniyan i pepodiya niyo, a so Tohan iyo a aya minggolaola sabap rekano sangkoto a
manga ala ago piyakalekelek a piyakamemesa a kiyamasaan iyo.
22 Isako somong so manga apo iyo roo sa Misir na pito polo siran kataw langon, na
imanto na miyapakandakel kano den o Allah a Tohan iyo a lagid sa kadakel o manga
bitoon sa langit.
DOTIRONOMIYO 11
So Kala o Allah
“Kagiya ka maoto na kabebayai niyo so Allah a Tohan iyo na lalayon iyo nggolalanen so
ipapaliyogat iyan, so manga taritib iyan, so manga kokoman iyan ago so manga sogoan
iyan.
2 Tademi niyo sangkai a gawii so kiyaparintaa rekano o Allah a Tohan iyo ago so
kiyailaya niyo ko bantogan iyan ago so manga manga pinggolaola niyan a nggolalan ko
mala i kapaar a lima niyan ago mabager a barokan iyan. Kena a ba so manga wata iyo i
miyakaokit ago miyakailay sii, ka sekano den.
3 Miyailay niyo so manga nanao a piyakiilay niyan roo sa Misir ago so pinggolaola niyan
ko Piraon a dato sa Misir ago sii ko dalem a inged iyan.
4 Miyailay niyo so inikidia niyan ko manga sondaro a Imisiren a rakes o manga koda ago
manga karo iran sa katidawa, ka piyakikoloban iyan siran ko ig ko Mariga a Ragat sii ko
kapeselobaa iran rekano a aya kiran kiyabinasaa o Allah taman den imanto.
5 Miyailay niyo pen so pinggolaola niyan sabap rekano roo ko disirto taman ko
kinisampay niyo sangkai a darpa.
6 Katawan iyo so inikidia niyan ki Datan ago si Abiram a manga wata i Iliyab a aya
moriyataw o Robin, ka sii ko kamamasai ron o langon o manga Israil na mingganga so
lopa na liyamed iyan siran a rakes o manga pamiliya iran, so manga barombarong iran
ago so langon o manga baraniyawa a rek iran.
7 So den so manga mata niyo i miyakailay sangkai langon a manga ala a galebek a
pinggolaola o Allah.
So manga Kamapiyaan o Lopa a Initopa a Allah
8 “Kagiya ka maoto na tomana niyo langon angkai a manga sogoan a ipembegay aken
rekano imanto kaan kano katagoi sa bager sa kapakasoled iyo ago kapagegawa ko lopa a
pesongowan iyo sa ripag a Yordan a mapekewali niyo
9 Ago an malendo a omor iyo sii ko inged a inisepa o Allah a imbegay niyan ko manga
apoapoan iyo ago sii rekano a kiyababadan kiran, a so lopa a pakepakayan ago oodaren.
10 Ka so lopa a pesongowan iyo a mapekewali niyo na kena a ba datar o lopa roo sa inged
a Misir a kiyapoonan iyo a ron iyo piyamamola so manga oniin iyo ago minggalebek kano
sebenar sa kapekaigi niyo ron a lagid o sapadan a manga leletaan.
11 Ka so lopa a pesongowan iyo sa kapekewaliya niyo ron na lopa a aden a manga bobongan on ago manga balintad a pepakaigan o oran a poon sa langit.
12 Lopa oto a pegalimaan o Allah a Tohan iyo a lalayon iyan sisiyapen ipoon sa poonan o
ragon taman ko kapopos iyan.
13 “Kagiya ka maoto na o nggolalanen iyo piyapiya so manga sogoan a ipembegay aken
rekano imanto, na o kabebayai niyo so Allah a Tohan iyo ago pangongonotani niyo sa
iklas ko poso iyo ago iklas ko niyawa niyo
14 Na pekioranan iyan so lopa iyo igira a mosim iyan a ndatar so pangolaon ago so
pangoran kaan iyo ron makowa so pereperan iyo, so bago a arak ago lana a olibi.
15 Pekitoan iyan sa manga otan so pepanateban o manga ayam iyo, na pekakan kano ago
penga oosog.
16 “Pananggilai niyo o ba maagak so manga poso iyo tomalikod ko Allah sa kapenalagadi
niyo ago kasimbaa ko salakaw a manga tohan.
17 Ka o nggolaolaa niyo ai na pemborngat rekano so gani o Allah na pelekeben iyan so
langit kaan di pekaoran, na di pemangetoan so kalopaan sa pereperan na magaan den a
kapekeda iyo ko mapiya a lopa a imbegay rekano o Allah.
18 Kagiya ka maoto na padalema niyo angkai a manga katero aken sii ko pamikiran iyo
ago poso, na iketen iyo ko manga lima niyo a aya rekano ipenanadem, ago babeden iyo ko
manga beneng iyo.
19 Pamangendaon iyo pen ko manga wata iyo na pepagaloyaloya niyo igira a sisii kano sa
walay, igira a pelalakaw kano ko lalan, igira a miiga kano ago igira a mimbowat kano.
20 Soraten iyo ai ko mbala a kilid o manga pintoan o walay niyo ago sii ko manga
gimowa iyo.
21 Amay ka magiyoto na matey a kapepaginetaw niyo ago so manga wata iyo roo ko lopa
a inisepa o Allah a imbegay niyan ko manga apoapoan iyo a lagid sa katey o katatago pen
o langit ko kaporoan o doniya.
22 O piyapiyai niyo tomoman angkai langon a manga sogoan a ipembegay aken rekano a
ipenggolalan iyo, aya maana niyan na o pekebebayai niyo so Allah a Tohan iyo a
pekedegen iyo so langon a lalan iyan ago pekepetan iyo sekaniyan sebenar,
23 Na mbogaon o Allah so langon angkai a nasiyon ko sii ko kapegantap iyo kiran, na
ketangan iyo so lopa o manga nasiyon a lebi rekano a manga ala ago manga babager.
24 So oman i darpa a pendapoan o manga ai niyo na kebaloy a rek iyo ipoon ko disirto sii
sa pagabagatan na taman sa Libanon sii sa pagotaraan, ago ipoon ko Lawasaig a Yopratis
sa sebangan na taman den ko Ragat a Miditiraniyo sii sa sedepan.
25 Da den a taw a ba makapemayandeg ko hadapan iyo, ka tegoan o Allah a Tohan iyo
sa tanto a kalek rekano so manga taw ko langon a inged a kapenadaan iyo a giyoto i
initopa niyan rekano.
26 “Pamakinega niyo ka peladen ko rekano sangkai a gawii so kakepilia niyo ko rakmat o
di na so paninta.
27 Kerakmatan kano o tomana niyo so manga sogoan o Allah a Tohan iyo a ipembegay
aken rekano imanto,
28 Ogaid na kesintaan kano o di niyo tomana so manga sogoan o Allah a Tohan iyo ka ba
kano baden pekasilay a poon ko lalan a ipesogo aken rekano imanto sa kapenanangorani
niyo ko salakaw a manga tohan a di niyo katawan.
29 Amay ka witen kano o Allah a Tohan iyo ko inged a pesongowan iyo a mapekewali
niyo na pakalangkapa niyo so manga rakmat a sii pekapoon ko poro o Palaw a Girisim,
ago so manga paninta a sii pekapoon ko poro o Palaw a Ibal. (30 Giyangkai a dowa a
palaw na sii ko masesedepan o Lawasaig a Yordan sii ko inged o manga Kanaaniyo a
kibabaling ko Balintad a Yordan. Matatago siran sa tampar sa sedepan a kena a ba
mawatan ko manga ala a kayo sa Morih a marani sa Gilgal.)
31 Magaan kano den romipag ko Lawasaig a Yordan sa kakowaa niyo ko lopa a imbegay
rekano o Allah a Tohan iyo. Na amay ka matangan iyo a makabaling kano roo
32 Na piyapiyai niyo tomoman so langon a taritib ago manga kokoman a ipembegay aken
rekano imanto.
DOTIRONOMIYO 12
So Isaisa a Darpa a Pesimbaan
“Giyai so manga taritib ago manga kokoman a disomala a kapetomana niyo ron taman
den ko kapepaginetaw niyo sii ko lopa a imbegay rekano o Allah a Tohan o manga apo
iyo a mapekewali niyo.
2 Amay ka matangan iyo so lopa o manga taw a kibabaling roo na binasaa niyo sa tarotop
so langon a darpa a ron iran pesimbaa so manga katohanan iran sii ko poro o manga
palaw, sii ko manga bobongan ago sii ko atag o oman i marabong a kayo.
3 Nggegebaa niyo so manga aparan iran, peroropeta niyo so babarakaten kon a manga
ator iran, panotonga niyo so manga toos ko katohanan iran a Asirah na pamataa niyo so
ped a manga barahala o manga katohanan iran kaan mapapas so manga ngaran iran
sangkoto a manga darpa.
4 Di niyo penanayani so okitokit iran sii ko kapesimbaa niyo ko Allah a Tohan iyo.
5 Ka sii ko kaingedan o langon o manga mbatabataa rekano na piliin on o Allah a Tohan
iyo so isaisa a darpa a ron iyan tegoa so Ingaran iyan a aya niyan kebalingan, na roo kano
pekasong sa kasimbaa niyo rekaniyan.
6 Roo niyo kewit so manga sapaat iyo a penotongen, so manga pekorbanen iyo, so manga
diyakat iyo, so manga ipeselasela iyo, so manga soasoat a inisemaya iyo, so iklas a
manga pamemegayan iyo ago so manga paganay a inimbawata o manga talon iyo a sapi,
bilibili ago manga kambing.
7 Na roo ko kamamasaan o Allah a Tohan iyo na pekakan kano ago so manga pamiliya
niyo a ipekebabaya iyo so langon taman a miyanggalebek iyo sabap ko kiyarakmati
rekano o Allah a Tohan iyo.
8 “Sa masa oto na di niyo perawata so manga olaola tano sii imanto, ka aya dii
nggolaolaan o oman i isa rekano na so ontol ko kapipikira niyan on,
9 Ka da kano pen misampay ko inged a imbegay rekano o Allah a Tohan iyo a ron kano
pekakaden a lomilintad.
10 Ogaid na magaan kano den romipag ko Lawasaig a Yordan sa kambalingi niyo ko
inged a pakipekewali rekano o Allah a Tohan iyo, na pelindingen kano niyan ko langon a
ridoay niyo ko melilibeta rekano kaan kano makapaginetaw a lomilintad.
11 Sa masa oto na piliin o Allah a Tohan iyo so isaisa a darpa a pesimbaan rekaniyan, na
giyanan i kewitan iyo ko langon taman a inisogo aken rekano, a so manga sapaat iyo a
penotongen, so manga pekorbanen iyo, so manga diyakat iyo, so manga ipeselasela iyo
ago so langon a tindos a soasoat a inisemaya iyo ko Allah.
12 Na kabebaya kano roo baden ko kamamasaan o Allah a Tohan iyo a sekano ago so
manga wata iyo a manga mama ago manga babay, so manga oripen iyo a manga mama
ago manga babay ago so mambo so manga Libitiyo a sii babaling ko manga inged iyo, ka
tatademi niyo a da a ba iran bagian ko lopa a aya iran kawali a datar iyo.
13 Pananggilai niyo o ba niyo panompangen so manga sapaat iyo a petotongen ko apiya
anda i kabaya iyo.
14 Ka roo niyo bo panompangen sii ko isaisa a darpa a piliin o Allah sii ko pagiingedan o
isa ko mbatabataa rekano, na roo niyo nggolalanen so langon a inisogo aken rekano.
15 “Aya liyo ron na pekasombali kano ko manga pangangayamen iyo ko apiya anda ko
manga inged iyo, na pekakan kano ko sapo o langon ai a inibegay rekano o Allah a Tohan
iyo a rakmat iyan sa taman sa kebayaan iyo ron koman. Ndatar so siran oto a mibibilang
a kena a ba soti ago so masosoti a pekakan on a lagid bo o kapekena niyo ko sapo a
saladeng.
16 Aya bo a inisapar rekano na so kakena niyo ko rogo; ododa niyo ai baden ko lopa a
lagid o ig.
17 “Ogaid na so apiya antonaa i ipesepaat iyo ko Allah na di niyo kekan sii ko manga
inged iyo a aya maana niyan na so ikasapolo bagi ko pereperan iyo, bago a arak iyo ago
lana a olibi, o di na so paganay a inimbawata o manga talon iyo a manga sapi, manga
bilibili ago manga kambing, o di na so manga soasoat a inisemaya iyo a imbegay niyo, o
di na so iklas a pamemegayan iyo o di na so manga ped a di niyo di iselasela.
18 Ka disomala a kakena niyo ron sii ko kamamasaan o Allah a Tohan iyo ko isaisa a
darpa a piliin iyan, a sekano a rakes o manga wata iyo a manga mama ago manga babay,
so manga oripen iyo a manga mama ago manga babay ago so manga Libitiyo a sii
babaling ko inged iyo. Na kabebaya kano baden ko kamamasaan o Allah a Tohan iyo
sabap ko langon a miyanggalebek iyo.
19 Inengkaa niyo o ba niyo ndarainonen so manga Libitiyo taman ko kapakakakaden iyo
ko inged iyo.
20 “Amay ka pakaoladen o Allah a Tohan iyo so pagiingedan iyo a aya kaketoman o
initopa niyan rekano na o kebaya kano ron koman sa sapo na kekan iyo ko apiya anda i
kakebayai niyo ron.
21 Na o tanto rekano a mawatan so darpa a pinili o Allah a Tohan iyo a pesimbaan
rekaniyan na kesombali iyo so apiya antonaa sapi, bilibili o di na kambing a inibegay
rekano o Allah na kekan iyo sa taman sa kabaya iyo sii ko inged iyo a giyoto den i
miyatero aken rekano.
22 Ndatar so mibibilang a kena a ba soti ago so masosoti a pekakan on a lagid bo o
kapekena niyo ko sapo a saladeng.
23 Ogaid na pananggilai niyo o ba niyo kana so rogo, ka so rogo na aya kaoyagoyag, na
inisapar rekano so kakena niyo ko kaoyagoyag a rakes o sapo.
24 Di niyo den kena so rogo; ododa niyo baden ko lopa a lagid o ig
25 Sabap sa an kano makategompiya ago so manga wata iyo sii ko di niyo di kinggo-
lalanen ko ontol ko kapekeilaya on o Allah.
26 Ogaid na so manga soti a ipesepaat iyo ago so manga soasoat a inisemaya iyo a
imbegay niyo ko Allah na awidi niyo ko darpa a piliin iyan.
27 So manga sapaat iyo a petotongen na totonga niyo so sapo a rakes o rogo iyan sii ko
aparan o Allah a Tohan iyo. Ogaid na so rogo o ped a manga ipesepaat iyo a dii korbanen
na sii den keodod ko kilid o aparan o Allah a Tohan iyo, ogaid na kekan iyo so sapo iyan.
28 Piyapiyai niyo tomoman angkai langon a manga sogoan a ipembegay aken rekano
kaan kano makategompiya ago so manga wata iyo sa taman sa pakataman sabap ko di
niyo dii kinggolalanen ko mapiya ago maontol ko kapekeilaya on o Allah a Tohan iyo.
Inisapar so Kapesimba sa Salakaw a manga Tohan
29 “Mbinasaan o Allah a Tohan iyo so manga nasiyon a pesongowan iyo sa kapagegawa
niyo ko lopa iran. Ogaid na amay ka matangan iyo ago kebalingan
30 Sii ko oriyan o kiyabinasaa kiran o Allah na inengkaa niyo o ba kano kalitagi a
nggolalan ko kapenanayani niyo ko manga taw ron. Di niyo pegiseen mipantag ko
manga katohanan iran a ‘Andamanaya i kapesimbaa angkai manga nasiyon ko manga
tohan iran? Sowaan tano oto!’
31 Di niyo perawata so okitokit iran sii ko kapesimbaa niyo ko Allah a Tohan iyo! Ka sii
ko kapesimbaa iran ko manga katohanan iran na di iran dii nggolaolaan so oman i
piyakasisingay a ipekegowad o Allah. Apiya so manga wata iran a manga mama ago
manga babay na piyanotong iran ko apoy a inisoasoat ko manga katohanan iran.
32 “Piyapiyai niyo tomoman so langon a sogoan a ipembegay aken rekano; di niyo den
pegomani o di na ba pelebati.
DOTIRONOMIYO 13
“Opama ka aden a makagemaw sii rekano a pepekaalamat o di na makapemaana sa
taginepen a pepangalamaten iyan so kapekatalingoma o nanao o di na piyakamemesa.
2 Na apiya pen o miyakatalingoma angkoto a nanao o di na piyakamemesa na o teroa
niyan rekano a ‘Itano roo; mananangoran tano ko salakaw a manga tohan a di niyo
katawan na simbaan tano,’
3 Na di niyo pekinega angkoto a pepekaalamat o di na makapemaana sa taginepen, ka
giyanan i kapetepengi rekano o Allah a Tohan iyo kaan iyan mapariksa o pekebabayai
niyo sekaniyan sa iklas ko poso iyo ago iklas ko niyawa niyo.
4 So bo so Allah a Tohan iyo i pananangorani niyo ago kaleken; tomana niyo so manga
sogoan iyan na paratiyayaa niyo sekaniyan; simbaa niyo ago kapeti niyo sebenar.
5 Giyangkoto a pepekaalamat o di na makapemaana sa taginepen na disomala a
kambonoa on ka kagiya inidolon iyan rekano so kapakatalikod iyo ko Allah a Tohan iyo a
aya rekano miyakaliyo ko inged a Misir ago somiyabet ko kiyapangongoripena rekano
roo. Marata angkoto a mama a tipengan iyan a kapekasilaya niyan rekano poon ko lalan a
inisogo o Allah a Tohan iyo a kedegen iyo. Bonoa niyo kaan mapapas rekano angkanan a
kamarataan!
6 “Apiya so pagari ngka, o di na so wata a ka a mama o di na babay, o di na so karoma
ngka a pekebabayaan ka o di na so tanto ngka a dii ngginawai na o pamagayoki ka niyan
sa masolen a tig iyan a ‘Ita roo; somimba ta sa salakaw a manga tohan a da ngka den
masimba aya pen o ba so manga apo tano,’ (7 A so manga tohan o manga taw ko
melilibeta rekano a apiya anda ko marani o di na mawatan sii ko pirowarowangan o
doniya),
8 Na di ka on pagiyog aya pen o ba ngka pakinega sekaniyan. Di ngka kepediin o di na
pegongowi aya pen o ba ngka pelindinga,
9 Ka disomala a kambonoa niyo ron! So lima ngka i keona a pekapatay ron na go bo so
lima o langon a taw.
10 Robaka niyo sekaniyan a ator taman sa matay ka kagiya tipengan ka niyan tomalikod
ko Allah a Tohan iyo a miyakaliyo rekano ko inged a Misir a ron kano
miyapangongoripen.
11 Na keneg ai o langon o manga Israil na penga alek siran, na da den a isa rekano bo a
ba penggolaola peroman sa datar anan a marata.
12 “Amay ka kabalingan iyo so manga siti a imbegay rekano o Allah a Tohan iyo na o
maneg iyo a sii ko isa on
13 Na aden a manga rarata on a manga taw a ped ko nasiyon iyo a inagak iran so
kibabaling ko siti iran sa kapakasilay iran a tig iran a ‘Itano roo; somimba tano sa salakaw
a manga tohan a da niyo masimba,’
14 Na ondamaa niyo ago pariksaa niyo piyapiya kaan iyo maamad o ba ini benar. Na o
benar ago kiyapemataanan a miyanggolaola den sii rekano angkai a piyakasisingay
15 Na bonoa niyo so langon a magiinged sangkoto a siti; binasaa niyo sa tarotop so
langon taman a matatago on a rakes o manga pangangayamen.
16 Panimoa niyo san ko look o lamalama so langon a mapeteban ko siti na lengana niyo
tomotong so siti ago so langon taman a miyateban on a aya petotongen a ipesoasoat iyo
ko Allah a Tohan iyo. Na taman sa pakataman a kabibinasa niyan a di den kebangon
peroman.
17 Di niyo kowaa a rek iyo so apiya antonaa nganin san a inisenggay a mbinasaan kaan ai
mapakalenggaw o Allah so pesokeyaw a rarangit iyan. Ikepedi kano niyan ago ikelimo,
na pakapendakelen kano niyan a aya kaketoman o inisepa iyan ko manga apo iyo
18 Asar ka peparatiyayaan iyo so Allah a Tohan iyo a petomanen iyo so langon a sogoan
iyan a ipembegay aken rekano imanto a di niyo di inggolalan so ontol sii ko kapekeilaya
niyan on.
DOTIRONOMIYO 14
So Olaola a Inisapar sii ko Kapakamboboko
“Manga pagtaw kano o Allah a Tohan iyo. Sabap roo na di niyo penirasa a manga lawas
iyo aya pen o ba niyo opawi so panempang a olo niyo a toos ko kamboboko iyo ko
miyatay a datar o dii nggolaolaan o di niyo royod a manga taw.
2 Ka soti kano a manga taw a isesenggay a rek o Allah a Tohan iyo; ka sii ko langon a
manga nasiyon sa doniya na pinili kano niyan a mabaloy a mala on i arga a manga pagtaw
niyan.
So Soti ago so di Soti a Meranaranap
3 “Di niyo kena so apiya antona onon a piyakagowagowad.
4 Giyai so manga ayam a kekan iyo: so sapi, so bilibili, so kambing,
5 So pimbarambarangan a manga saladeng ago so manga iila a bilibili ago kambing.
6 Kekan iyo so apiya antonaa ayam a maoopak so kanoko niyan ago pepenepasepa sii ko
kapeken iyan.
7 Ogaid na so ayam a pepenepasepa a kena a ba maoopak so kanoko niyan na di kano ron
pekakan, a lagid o onta, so taksing ago so arnab. Karam ai rekano ka apiya pen o
pepenepasepa siran igira a pekan na kena a ba maoopak so kanoko iran.
8 Karam rekano mambo so baboy ka apiya pen maoopak so kanoko niyan na kena a ba
pepenepasepa sii ko kapeken iyan. Langon angkai a manga ayam na kena a ba soti
rekano; di kano den ken ko sapo iran aya pen o ba niyo sekoa so lawas iran a miyatay.
9 “Kekan iyo so apiya antonaa a kaaden sii ko manga ig asar ka aden a manga payang
iyan ago nap.
10 Ogaid na apiya antonaa a da a payang iyan ago nap na di niyo kekan; karam ai rekano.
11 “Kekan iyo so apiya antonaa a soti a papanok.
12-18 Ogaid na giyai so manga papanok a di kano ron pekakan: so garoda, so darayo, so
sikep, so banog, so manaol, so bayata, so romaragit, so kakowak, so agila, so bengit, so
kang, so laasan, so tabonan, so pilikano, so barawa, so talik, so talaong, so kabeg ago so
paniki.
19 “So langon a pelayog a paoledoled na karam rekano; di niyo ai kena.
20 Ogaid na so apiya antonaa a pepapak a soti na kepakay a ken iyo.
21 “Di niyo kena so apiya antonaa a matag den miyatay. Kepakay a ibegay niyo ko
mananangga a mababaling ko inged iyo a makan iyan, o di na mapepasa niyo ko rait.
Ogaid na sekano na soti a manga pagtaw o Allah a Tohan iyo. Di niyo tindaan so nati a
kambing sii ko gatas o ina iyan.
So Kokoman makapantag ko Ikasapolo Bagi
22 “Paliyogat rekano a isibay niyo so ikasapolo bagi ko langon a di niyo dii maperagon
ko lopa iyo oman ragon.
23 Na wita niyo ai ko darpa a piliin o Allah a Tohan iyo a pesimbaan rekaniyan, na roo
niyo kana sii ko kamamasaan iyan so ikasapolo bagi ko pereperan iyo, so bago a arak iyo
ago so lana a olibi, a lagid mambo o paganay a inimbawata o manga talon iyo a manga
sapi, bilibili ago kambing. Nggolaolaa niyo ai kaan iyo masowa so kipekeleken iyo
lalayon ko Allah a Tohan iyo.
24 O giyangkoto a darpa a piliin iyan a pesimbaan rekaniyan na tanto rekano a mawatan a
matey a ipelalakaw niyo ron a di niyo ron kegaga pegawid so ikasapolo bagi ko inirakmat
rekano o Allah a Tohan iyo na giyai i nggolaolaa niyo:
25 Pesaa niyo ai na awidi niyo so pirak sangkoto a darpa a piliin o Allah a Tohan iyo
26 Na pamasaan iyo ai sa apiya antonaa a kebayaan iyo a sapo a sapi, bilibili o di na
kambing, o di na arak o di na ped a mabisa a panginginomen. Na kan kano ago so
pamiliya niyo sii ko kamamasaan o Allah a Tohan iyo, na pakapiyaa niyo a ginawa niyo.
27 “Di niyo pendarainonen so manga Libitiyo a kibabaling ko manga inged iyo, ka da a
ba iran bagian ko lopa a aya iran kawali a datar iyo.
28 Sii ko kaposan o oman telo ragon na awidi niyo so langon o ikasapolo bagi ko
miyaragon iyo sangkoto a kiyaperagon na taliyonga niyo sii ko manga inged iyo.
29 Kekan ai o manga Libitiyo a da kasaadi sa lopa a kawali iran, a lagid mambo o manga
mananangga, manga ilo ago manga balo a kibabaling ko manga inged iyo. Ka roo siran
pekasong ago pemakakan sa taman sa kabaya iran kaan kano karakmati o Allah a Tohan
iyo ko langon a di niyo dii nggolaolaan.
DOTIRONOMIYO 15
So Ragon a Kiperilaan ko manga Otang
“Sii ko kaposan o oman pito ragon na paliyogat a iperila iyo so langon a otang.
2 Giyai i okit a kinggolalanen sii: so oman i miyagotang ko ped iyan a taw sa Israil na
rilaan iyan so otang; di niyan den tegela a kambayadi ron, ka giyanan i masa a tindo o
Allah a kiperilaan ko manga otang.
3 Kepakay a panekaten ka so otang o mananangga, ogaid na paliyogat a kiperilaan ka ko
otang o lagid ka a taw sa Israil.
4 “Kerakmatan kano sa mala sii ko inged a imbegay rekano o Allah a Tohan iyo a
ketangan iyo a kawali niyo na da den a ba rekano ron kekorangan
5 Asar ka pepanamaran iyo maratiyaya so Allah a Tohan iyo a petomanen iyo piyapiya so
langon angkai a sogoan a ipembegay aken rekano imanto.
6 Na amay ka perakmatan kano o Allah a aya kaketoman o initopa niyan na
pemagotangan iyo so madakel a nasiyon ogaid di kano den pengotang; na pendatoan iyo
so madakel a nasiyon ogaid na di kano iran kapendatoan.
7 “O aden a pagari ngka a miskin ko apiya anda ko manga siti niyo sii ko lopa a imbegay
rekano o Allah a Tohan iyo na di ngka peligeti aya pen o ba ka sangka sa katebangi ngka
ko pagari ngka a miskin.
8 Bekara ngka on baden a lima ngka na pagotangi ngka sa apiya antonaa a kailangan iyan.
9 Di ngka pemikira angkai a marata a ‘Marani den so ikapito ragon a iperila on so manga
otang!’ a aya kesabapan sa di ngka ikelimo so miskin a pagari ngka a da den a ba ngka on
kibegay. O nggolaolaa ngka ini na masiken a pepanonen ka niyan ko Allah na kesala ka a
miyakandosa.
10 Begi ngka sekaniyan baden sa iklas ko poso o ka sa da den a kasendit on, ka sabap roo
na perakmatan ka o Allah a Tohan ka ko langon a galebek ka ago so langon a pepoonan
ka nggolaola.
11 Kelalayon a kasisii o manga miskin sii ko manga inged iyo. Kagiya ka maoto na isogo
aken rekano a bekara niyo a lima niyo iyo ko kikakokorangan ago kamamaregenan a
pagari niyo sii ko inged iyo.
So Kabokai ko manga Oripen
12 “Opama ka so ped ka a taw sa Israil a mama o di na babay na pepasaan iyan reka a
ginawa niyan a mabaloy a oripen ka na makapenalagad sekaniyan reka ko soled o nem
ragon, ogaid na sii ko ikapito ragon na paliyogat a kapakamaradikaa ngka on.
13 Na amay ka mbokaan ka na di ngka pekalalakawa a da a ba niyan ikeoyag.
14 Pakapelotoa ngka sekaniyan piyapiya sa pamemegayan a poon ko manga bilibili ngka
ago kambing, ago so pereperan ka ago arak a aya reka inirakmat o Allah a Tohan ka.
15 Ka tademi niyo a oripen kano gowani roo sa inged a Misir na biyokaan kano o Allah a
Tohan iyo. Giyanan i sabap a kinisogoon aken sii rekano imanto.
16 “Ogaid na o teroa reka o oripen ka a ‘Di aken kabaya o ba aken seka awai,’ sabap sa
pekebabayaan ka niyan ago so pamiliya ngka ago masosoat sekaniyan ko
kapakambebetad iyan sii reka
17 Na kowa ka sa baletek na wita ngka sekaniyan ko paitaw o walay ngka na ron ka
pesowi so tangila niyan; na giyoto a kebaloy sekaniyan a oripen ka sa taman sa kaooyagoyag iyan. Datar ai mambo a ikidia ngka ko oripen ka a babay.
18 Di ngka pemikira i ba kamaregenan ka so kabokai ngka ko oripen ka, ka
piyanalagadan ka niyan ko soled o miyakanem ragon a aya bo a miyanggasto ngka na
tenga ko patot a isokay ko gomagalebek. Na perakmatan ka o Allah a Tohan ka ko
langon a di ngka dii nggolaolaan.
So Paganay a Inimbawata o manga Pangangayamen
19 “Senggain iyo a rek o Allah a Tohan iyo so oman i mama a paganay a ipembawata o
manga sapi iyo, manga bilibili niyo ago manga kambing. Di niyo pakapenggalebeka so
kaka a wata o manga sapi iyo, na di niyo pagopawi sa bombol so kaka a wata o manga
bilibili niyo.
20 Ka oman ragon na sekano ago so manga pamiliya niyo na kana niyo siran ko kamamasaan o Allah a Tohan iyo sii ko darpa a piliin iyan.
21 Ogaid na o aden a daway angkai a ayam, ka lepo, o di na bota o di na aden a ped a
pangensi niyan na di niyo pekorbana ko Allah a Tohan iyo.
22 Kekan iyo ai sa walay niyo sii ko manga inged iyo. So taw a mibibilang a kena a ba
soti ago so masosoti na palaya siran on pekakan a datar o kapekena niyo ko saladeng.
23 Ogaid na di niyo kena so rogo iyan; ododa niyo baden ko lopa a datar o ig.
DOTIRONOMIYO 16
So Kaselaselaa ko Paska
“Sii ko olanolan a Abib na selaselaa niyo so Paska a aya niyo ipembantog ko Allah a
Tohan iyo, ka sii ko olanolan a Abib na iniliyo kano niyan a poon sa Misir sii ko
kagagawii.
2 So ayam a mapekorban iyo ko Paska na apiya anda ko sapi, bilibili o di na kambing, na
korbana niyo ko Allah a Tohan iyo sii bo ko darpa a piliin iyan a pesimbaan rekaniyan.
3 Sii ko kapekena niyo ron na di niyo ron perakesen koman so paan a aden a tapay ron.
Ka sii ko soled o pito gawii na kana niyo so paan a da a tapay ron a datar isako magaan so
magaan a kiyaawa iyo sa inged a Misir. Kan kano sangkai a paan a aya toos ko kaperomasay kaan sii ko tenday a omor iyo na peketademan iyo so gawii a kiyaawa iyo sa
inged a Misir a ron kano miyarasay.
4 Sii ko soled o pito gawii na paliyogat rekano a da a tapay a ba matoon ko apiya anda ko
pagiingedan iyo. Na so sapo o pekorbanen iyo ko kaperimon ko paganay a gawii na di
niyo pekapitai.
5 “Di niyo sombalia so ayam a ipeselasela ko Paska sii ko apiya anda ko manga inged a
imbegay rekano o Allah a Tohan iyo
6 Ka sii bo ko darpa a piliin o Allah a Tohan iyo a pesimbaan rekaniyan. Roo niyo
sombalia so ayam ko kapesedep o alongan sii ko dii katemegi ko gawii a kiyaawa iyo sa
Misir.
7 Pagiyawa niyo ai ago kana niyo sii ko darpa a piliin o Allah, na amay ka mapita na
mbabaling kano den ko manga barombarong iyo.
8 Sii ko soled o nem gawii a pekatalondog sii na kan kano sa paan a da a tapay ron, na sii
ko ikapito gawii na timotimo kano sa kapeselaselaa niyo ko Allah a Tohan iyo; na di kano
den penggalebek sangkoto a gawii.
Pista ko Kaperagon
9 “Bilang kano sa pito ka padian ipoon ko gawii a kiyapooni niyo meragon ko pereperan
iyo.
10 Amay ka mapopos ai na selaselaa niyo so Pista ko Kaperagon a aya niyo ipembantog
ko Allah a Tohan iyo. Awid kano ron sa iklas a pamemegayan a mapepatot ko kala o
inirakmat iyan rekano.
11 Na kabebaya kano baden ko kamamasaan o Allah a Tohan iyo roo ko darpa a piliin
iyan a pesimbaan rekaniyan. Kabebaya kano a rakes o manga wata iyo, so manga oripen
iyo, so manga Libitiyo a sii babaling ko inged iyo, ago so mananagga, so ilo ago so balo a
maaped rekano.
12 Tatanodi niyo a manga oripen kano gowani roo sa Misir na piyapiyai niyo tomoman
angkai a manga sogoan.
So Pista ko manga Lawig
13 “Amay ka maipos so kapepangegik sa pereperan a miyaragon iyo ago so katendasa ko
manga obas na selaselaa niyo so Pista ko manga Lawig sii ko soled o pito gawii.
14 Kabebaya kano sii ko di niyo dii kapista a rakes o manga wata iyo, so manga oripen
iyo, so manga Libitiyo, so mananangga, so ilo ago so balo a sii babaling ko inged iyo.
15 Sii ko soled o pito gawii na selaselaa niyo so pista a aya niyo ipembantog ko Allah a
Tohan iyo roo ko darpa a piliin iyan, ka perakmatan iyan so langon a pekeragon iyo ago
so langon a di niyo dii nggolaolaan kaan matarotop so kapekebabaya iyo.
16 Makatelo ko saragon na paliyogat ko langon a manga mama rekano a kapesong iran ko
darpa a piliin o Allah a Tohan iyo sa kapengadapa iran on, aya maana niyan na so kapistai
ko Kakan sa Paan a da a Tapay ron, so kapistai ko Kaperagon ago so kapistai ko manga
Lawig. Da den a mama a ba makapengadap ko Allah a ba da a awid iyan
17 Ka so oman i isa kiran na pekaawid den sa pamemegayan a mapepatot ko rakmat a
inibegay ron o Allah a Tohan iyan.
So manga Pangongokom
18 “"Toro kano pen sa manga pangongokom ago manga olowan a poon ko oman i
mbatabataa rekano sii ko oman i inged a imbegay rekano o Allah a Tohan iyo, na
disomala a maontol so kakokoma iran ko manga taw.
19 Di niyo mbibida so kokoman aya pen o ba kano peramiramig; di kano terima sa
tendan, ka so tendan na pekadalong ko mata o maongangen na pekabibid mambo ko
kapepangokom o maontol.
20 Panagontamani niyo piyapiya so maontol a kokoman kaan kano pekeoyag ago
mapekewali niyo so lopa a imbegay rekano o Allah a Tohan iyo.
21 “Di kano pemola sa kayo a toos ko katohanan a Asirah ko obay o aparan a
pagembaalan iyo a pesimbaan ko Allah a Tohan iyo
22 Aya pen o ba niyo pakatindega so apiya antonaa a babarakaten kon a polaos a ator, ka
ipekegowad ai o Allah a Tohan iyo.
DOTIRONOMIYO 17
“Di kano pekorban ko Allah a Tohan iyo sa sapi o di na bilibili a aden a daway niyan o di
na apiya antonaa pangensi niyan ka giyanan i piyakasisingay rekaniyan.
2 “Opama ka maneg iyo a sii ko isa ko manga siti a imbegay rekano o Allah a Tohan iyo
na aden a mama on o di na babay a miyakanggolaola sa marata ko kapekeilaya on o Allah
ka somiyopak ko kapasadan iyan
3 A miyananangoran ko salakaw a tohan, o di na sominimba ko alongan, so olan o di na
so manga bitoon a aya niyan kiyasogoka ko sogoan o Allah,
4 Na amay ka mapanotol ai rekano na ondamaa niyo piyapiya. O maamad a benar a
miyanggolaola den angkoto a piyakasisingay sii sa Israil
5 Na kowaa niyo angkoto a taw a miyakanggolaola sangkai a marata na wita niyo ko
gimowa o siti na robaka niyo a ator taman sa matay.
6 Ogaid na aya bo a kakebonoa on na o aden a dowa o di na telo kataw a miseksi
makapantag sii. Di kepakay a mbonoon o ba sasakataw bo a saksi on.
7 So manga saksi i magona romobak on sa ator na go bo so langon o manga taw.
Giyanan i kapekadaa niyo sangkai a kamarataan sii rekano.
So manga Taritib ko dii Kokoman
8 “O aden a rido sii ko isa a siti niyo a maregen kokomen o pangongokom roo a mipantag
ko kapamono, di pegayonan o di na kambobono na song kano ko darpa a piliin o Allah a
Tohan iyo
9 Na pakitokawi niyo so rido ko manga imam a manga Libitiyo ago so pangongokom a
ndodoo sangkoto a masa na pakikokomen iyo kiran.
10 Peyagen iran rekano so inikokom iran roo sangkoto a darpa a piliin o Allah, na
tomana niyo den so langon taman a peteroon iran rekano.
11 Nggolalanen iyo so inikokom iran a mipepasod ko kokoman a kitab a ipengendao iran
rekano. Di kano den silay a poon ko peteroon iran rekano apiya anda sa kawanan ago
diwang.
12 Saden sa iporo iyan a ginawa niyan ko di niyan kapekinega ko pangongokom o di na
so imam a makadadarpa roo ko kamamasaan o Allah a Tohan iyo na mbonoon angkoto a
taw. Giyanan i kapekadaa niyo sangkai a kamarataan sii sa Israil!
13 Na pemakineg so langon o manga taw makapantag sii na penga aalek, na da den a ba
pekaderes nggolaola peroman sa datar oto.
Manga Sogo makapantag ko Dato
14 “Magaan kano den makasoled ko inged a imbegay rekano o Allah a Tohan iyo a
ketangan iyo ago kebalingan. Amay ka magiyoto na mapetero iyo sa ginawa niyo a
‘Tomoro tano sa dato a makapendato rektano a lagid o ped a manga nasiyon a makalilibet
rektano!’
15 Na tangkeda niyo a aya mitoro iyo a makapendato rekano na so miyapili o Allah a
Tohan iyo; paliyogat a isa sekaniyan ko manga pagari niyo a taw sa Israil. Di kano den
pakipendato ko mananangga a kena o ba niyo rogo.
16 So dato iyo na di den pekakowa sa madakel a koda a ikesoat iyan aya pen o ba niyan
pakakasoya so manga pagtaw niyan roo sa Misir sa kapemasa iran on sa manga koda, ka
miyatero den o Allah a ‘Di kano den pekakasoy sa Misir!’
17 Di sekaniyan den makapengaroma sa madakel a babay ka mapekasilay iran so poso
iyan, aya pen o ba sekaniyan panamok sa mala a pirak ago bolawan.
18 “Amay ka makandato sekaniyan na kisorat iyan sii ko ribro so rek iyan a kopiya angkai
a manga sogoan a sii matatago ko kitab a matatangan o manga imam a so manga Libitiyo.
19 Ron den ai rekaniyan kaan iyan pekebatiya oman gawii taman ko kaooyagoyag iyan
kaan iyan makenal so kikaleken ko Allah a Tohan iyan ago matoman iyan piyapiya so
langon a sogoan sangkai a kitab.
20 O nggolaolaa niyan ai na di niyan mapemikir a makalelebi sekaniyan ko manga pagari
niyan a manga Israil na di niyan sogoken so kitab ko apiya antonaa a okit. Amay ka
magiyoto na matey a kapakapendato iyan ago so manga moriyataw niyan sii sa Israil.
DOTIRONOMIYO 18
So manga Sapaat a rek o manga Imam ago so Ped ko Mbatabataa a Libi
“So manga imam a so manga Libitiyo a rakes o langon a ped ko mbatabataa a Libi na di
kesaadan ko lopa a mapekewali ran a datar o ped a manga Israil. Aya ikeoyag iran na so
di iran dii mambagian ko petotongen a manga ipesepaat ko Allah ago so manga
pamemegayan a di on di isoasoat.
2 Da den a ba iran mapekewali sii ko manga pagari ran ka so Allah i kawali iran a aya
niyan initopa.
3 “Igira a dii korban so manga taw sa apiya anda ko sapi, bilibili ago kambing na aya
kibegay ko manga imam a bagian iran on na so waga, so dowa a tangagan ago so soled a
tiyan.
4 Began iyo kiran pen so paganay a bagian ko pereperan iyo, so bago a arak iyo, so lana a
olibi niyo ago so bombol a keopaw ko manga bilibili niyo.
5 Ka sii ko langon a mbatabataa rekano na pinili o Allah a Tohan iyo so mbatabataa a
Libi a makapenalagad sii ko Ingaran o Allah sa taman sa pakataman.
6 “Saden sa Libitiyo a mababaling ko apiya anda a siti sa Israil na o aden a iklas a kabaya
iyan na pekasong sekaniyan ko darpa a piliin o Allah a pesimbaan rekaniyan
7 Na roo den makapenalagad sii ko Ingaran o Allah a Tohan iyan a datar o ped iyan a
manga Libitiyo a ndodoo mambo a dii manalagad ko Allah.
8 Makapembagian sekaniyan ko pangenengken a datar den o bagian o ped a manga
Libitiyo apiya pen o aden a pantiyari niyan a initenan on o manga lokes iyan.
So Piyakasisingay a Olaola
9 “Amay ka ndodoo kano den ko inged a imbegay rekano o Allah a Tohan iyo na
pananggilai niyo o ba niyo perawata so piyakasisingay a manga olaola angkoto a manga
nasiyon.
10 Di niyo den sepaaten so manga wata iyo a mama o di na babay a petotongen sii ko
aparan, aya pen o ba niyo sowaa so galebek o pananaabir, o di na pangangatao, o di na
paririmar, o di na pamamantak,
11 O di na pangangambong, o di na pendarpaan, o di na so ana inikadowa niyan o di na
so pemangangay ko miyamatay.
12 Apiya antawaa i di sii dii nggalebek na ipekegowad o Allah, na sabap sangkai a
piyakasisingay a manga olaola na mbogaon o Allah a Tohan iyo angkoto a manga nasiyon
sii ko kapegantap iyo kiran.
13 Disomala a da a ba rekano kidaway ko kamamasaan o Allah a Tohan iyo.”
So Initopa a Nabi
14 Pitero pen o Mosa a “Sii ko inged a magaan iyo den ketangan na pepakinegen o manga
magiinged on so manga pangangatao ago manga paririmar ogaid na sekano peman na da
peroa o Allah a Tohan iyo o ba niyo ai nggolaolaa.
15 Ka so Allah a Tohan iyo na nggemawan kano niyan sa nabi a lagid aken a poon ko
rogo iyo a manga Israil, na sekaniyan den i mapemakineg iyo.
16 Ka giyanan i piyangni niyo ko Allah a Tohan iyo roo sa Palaw a Sinay sii ko gawii a
kiyalimod iyo isako teroon iyo a ‘Pengnin ami a di ami den maneg so sowara o Allah a
Tohan ami aya pen o ba ami mailay peroman angkai a piyakalekelek a apoy ka o ba kami
baden mamatay!’
17 “Na pitero raken o Allah a ‘Mapiya so piyangni iran.
18 Nggemawan aken siran sa nabi a poon ko rogo iran bo a lagid ka, Mosa, na pakipetero
aken rekaniyan so manga katero aken, na peteroon iyan kiran so langon taman a isogo
aken on.
19 Na apiya antawaa i di pemakineg ko manga katero aken a pemakalangkapen angkoto a
nabi sii ko Ingaran aken na saken den i ndaneg on.
20 Ogaid na so nabi a pekaderes tero sii ko Ingaran aken sa da aken on pakiteroon, o di na
so taw a petero sii ko ingaran o salakaw a tohan na mbonoon sekaniyan.'
21 “Masiken a ipagise iyo sa ginawa niyo a ‘Andamanaya i kaketokawi tano o ba so
pitero o nabi na poon ko Allah, o di na kena?’
22 O dii tero so nabi sii kon ko Ingaran o Allah a di mitoman so pitero iyan na kena a ba
nan katero o Allah; mitero angkoto a nabi sa sekaniyan bo i kilalag on; na di niyo
keleken.
DOTIRONOMIYO 19
So manga Siti a Kapegapasan
“So Allah a Tohan iyo na mbinasaan iyan so manga nasiyon a kibabaling ko lopa a
imbegay niyan rekano a ketangan iyo ago mapekewali. Na amay ka maagaw niyo a
makabaling kano ko manga siti iran ago manga walay na bagia niyo so lopa sa telo baad.
Na senggay kano sa telo a manga siti a so isa a siti sii ko lembak o oman i sabaad ko
inged. Mbaalen iyo so oman i siti sa lalan a isong on kaan roo makapegapas so
miyakapatay sa taw.
4 “Na giyai i taritib makapantag roo: so miyakapatay sa taw a da niyan tibabaa so
kiyabonoa on ago kena a ba niyan miyarido gowani na makapegapas roo kaan malinding.
5 Ibarat o aden a dowa kataw a somiyong sa kalasan ka pemata sa kayo, na sii ko
kipetidaon on o isa kiran ko patok iyan na miyaso so olo o patok na minisogat ko ped iyan
a aya niyan inipatay. Na makapegapas angkoto a mama ko isa sangkoto a telo a siti kaan
malinding.
6 Ka o ba baden salobaa o kebaya on somaop a tanto a pekerarangitan, na o tanto a
mawatan so siti a pepagapasan iyan na peraoten sekaniyan o seop na mbonoon iyan apiya
pen o kena a ba patot a kambonoa on, ka so miyapatay niyan na kena a ba niyan miyarido
gowani.
7 Giyanan i sabap a isogo aken rekano a senggay kano sa telo a siti a kapegapasan.
8 “Amay ka pakaoladen o Allah a Tohan iyo so inged iyo a aya niyan inisepa ko manga
apoapoan iyo ago ibegay niyan rekano so langon o lopa a initopa niyan kiran
9 Na senggay kano sa telo pen a manga siti on a kapegapasan. (Imbegay niyan rekano
angkai a lopa o piyapiyai niyo tomoman so langon a manga sogoan a ipembegay aken
rekano imanto a pekebabayaan iyo so Allah a Tohan iyo ago pekedegen iyo so manga
lalan iyan.)
10 Senggain iyo angkai a manga siti kaan da a rogo o da a sala iyan a ba maodod sii ko
inged a imbegay rekano o Allah a Tohan iyo a mapekewali niyo kaan di kano kesala ko
kiyapamono.
11 “Ogaid na ibarat na aden a taw a ipekegowad iyan so siringan iyan na inayanan iyan
ago biyono iyan na taros a miyagapas sekaniyan ko isa sangkai a manga siti a
kapegapasan.
12 O magiyoto na so manga olowan ko siti a babalingan o miyakabono na pekikowa iran
sekaniyan na peladen iran ko somasaop on kaan iyan mabono.
13 Di niyo sekaniyan kepediin. Pakadaa niyo sa Israil so kasalaan a kapembonoa ko da a
sala iyan kaan kano makategompiya.
So Andang a Temanaan
14 “Di niyo perangkireben so temanaan o lopa a aya kawali o siringan ka a inibetad roo o
miyanga oona a mimbagibagi ko inged a imbegay rekano o Allah a Tohan iyo a
mapekewali niyo.
Manga Kokoman makapantag ko Kaseksi
15 “Di kepakay o ba kabenari so taw sa apiya antonaa sala o di na kadostaan ko
kiyasenditi ron o sakataw bo a saksi. Disomala a kapemataani ron o dowa o di na telo a
saksi.
16 O aden a bokeg a saksi a pepenendisendit sa miyakasela so ped a taw
17 Na mapakapengadap siran a dowa ko kamamasaan o Allah sii ko hadapan o manga
imam ago manga pepangokom sa masa oto.
18 Na kapegondamaan piyapiya o manga pangongokom so makapantag roo na o maamad
a miyamamokeg so saksi a piseksian iyan sa di benar so ped niyan a taw sa Israil
19 Na nggolaolaa niyo rekaniyan so pikediyat iyan a indaneg ko pagari niyan a
pisebapan iyan. Giyanan i okit a kapekadaa niyo sangkanan a kamarataan sii rekano.
20 Ketokawan ai o ped a manga taw na penga aalek, na da den a isa rekano bo a ba
nggolaola peroman sa datar anan a marata.
21 Di kano pengapedi! Kibayad so niyawa ko niyawa, kibayad so mata ko mata, kibayad
so ngipen ko ngipen, kibayad so lima ko lima na kibayad so ai ko ai.
DOTIRONOMIYO 20
Manga Kokoman makapantag ko Kapakitidawa
“Igira a di kano dii makitidawa ko manga ridoay niyo ago pekeilay niyo so manga koda,
so manga karo ago so manga sondaro a lebi a madakel a di sekano na di niyo siran
keleken, ka maaped rekano so Allah a Tohan iyo a aya rekano miyakaliyo sa inged a
Misir!
2 Sii ko di niyo pen kapakitidawa na pekaobay rekano so imam ka makipembitiyarai ko
manga sondaro.
3 Mapetero iyan a ‘Pamakineg kano, hey manga Israil! Imanto na kesagobang iyo so
manga ridoay niyo. Di kano petelaw o di na kelek; di kano petebada aya pen o ba niyo
siran kawanen.
4 Ka so Allah a Tohan iyo i magonot rekano a makipetidawa ko manga ridoay niyo, na
imbegay niyan rekano so kapakataban!’
5 “So mambo so manga olowan o manga sondaro na makipembitiyarai siran ko manga
mama a peteroon iran a ‘Ba aden rekano a gopen mimbalay sa walay a da niyan pen
semanga? Pekabaling sekaniyan ka o ba baden matay ko katidawa na salakaw den a
makasemang on.
6 Ba aden rekano a gopen miyamola sa asinda a obas a da niyan pen kanggonai so onga
niyan? Pekabaling sekaniyan ka o ba baden matay ko katidawa na salakaw den a
makapenggona on.
7 Ba aden rekano a minipamalai ko babay a da niyan pen mapangaroma? Pekabaling
sekaniyan ka o ba baden matay ko katidawa na salakaw den a makapangaroma on.’
8 Na mapetero pen o manga olowan o manga sondaro a ‘Ba aden rekano a pekelek o di na
tetalaw? Pekabaling sekaniyan ka o ba baden telaw mambo so manga pagari niyan a
datar iyan.’
9 Amay ka makaipos tero so manga olowan o manga sondaro na pekatoro siran sa manga
maporo ko oman i salompok on.
10 “Amay ka nggobat kano ko isa a siti na pakalangkapa niyo daan ko manga taw ron so
kapakaparo iran somangkop.
11 O terimaa iran so kasengkop iran a pelekaan iran rekano so gimowa o siti na so langon
a magiinged on na ketegel nggalebek a penalagad rekano.
12 Ogaid na o di siran sengkop a ba rekano baden makipetidawa na likopi niyo so siti.
13 Na amay ka piyakiagaw rekano den o Allah a Tohan iyo na pamonoa niyo so langon a
manga mama on.
14 Ogaid na mapemiyag iyo so manga babay ago so manga wata, na mapeteban iyo so
manga pangangayamen a rakes o langon taman a matatago ko siti. Na kanggonaan iyo so
mapeteban iyo ko manga ridoay niyo ka inibegay rekano o Allah a Tohan iyo.
15 Giyanan i nggolaolaa niyo ko langon a manga siti a mawatan rekano a kena o ba sii ko
lopa a kebalingan iyo.
16 “Ogaid na makapantag ko manga siti sii ko lopa o manga nasiyon a imbegay rekano o
Allah a mapekewali niyo na da den a pengginawa a ba niyo ron pakapegoyaga.
17 Polanga niyo siran langon – a so manga Hitiyo, manga Amoriyo, manga Kanaaniyo,
manga Pirisiyo, manga Hibiyo ago so manga Hibosiyo ka giyoto i inisogo rekano o Allah
a Tohan iyo.
18 Nggolaolaa niyo ai kaan kano iran di keagak sa kapagiringi niyo ko langon a
piyakasisingay a olaola iran ko kapesimbaa ko manga katohanan iran, ka ikedosa niyo ai
ko Allah a Tohan iyo.
19 “Amay ka matey a kalilikopi niyo ko siti a pepanamaran iyo magaw na di niyo
mbinasaa so manga kayo a pepamangonga. Kekan iyo so manga onga niyan ogaid na di
niyo pemataa. Ka ba so manga kayo na maaped ko manga ridoay niyo a patot a kanggobata niyo ron?
20 Ogaid na kepakay a pamataan iyo
so manga kayo a katawan iyo a di kapenggonaan sa pangenengken. Keosar iyo ai ko
kapagembaali niyo ko manga tambak a ipelikop ko siti a pesorang rekano taman sa
maagaw niyo.
DOTIRONOMIYO 21
So Kiyapamono a Miyaibno
“O aden a miyabono a miyatoon ko pangomaan sii ko inged a imbegay rekano o Allah a
Tohan iyo a di katawan o antawaa i miyono on
2 Na pekasong roo so manga pelokelokesen rekano ago manga pangongokom na ketakes
iran so kawatan o bangkay ko manga rarani ron a siti.
3 So manga pelokelokesen ko siti a lebi a marani ron na pekakowa siran sa mangoda a
sapi a babay a da den maosar sa kanggalebek o di na kasangani sa kokoong.
4 Ketonda iran ai tomondagay ko balintad a da den mandado o di na kapamolai a aden a
petoga on a lawasaig, na roo iran lepoa so lig o sapi.
5 Pekasong roo den mambo so manga imam a Libitiyo ka siran i piyamili o Allah a Tohan
iyo a aya on makapenalagad ago makapengangarapan sa manga rakmat ko manga taw sii
ko Ingaran o Allah, na siran i pekakokom ko oman i rido ago kambobono.
6 Na so langon a pelokelokesen ko siti a aya bo marani ko bangkay na kapengonaban iran
a manga lima iran ko liyawaw o sapi a miyalepo so lig iyan roo ko balintad
7 Na mapetero iran a ‘Kena a ba so manga lima mi a miyakatoga sangkai a rogo aya pen o
ba miyailay o manga mata mi so kiyanggolaolaa on.
8 Rilai ngka, ya Allah, so manga pagtaw ngka a Israil a iniliyo ngka sa Misir na di ngka
rekami selaan so kiyabonoa ko da a sala iyan.'
9 Giyanan i kapekadaa niyo sii rekano ko kasalaan ko kiyabonoa ko da a sala iyan a
nggolalan ko kanggolaolaa niyo ko paliyogat rekano o Allah.
So Kapangaromaa ko Miyabiyag a Babay
10 “Amay ka mapalad rekano o Allah a Tohan iyo so manga ridoay niyo sii ko di niyo
kiran dii kapakitidawa a aden a miyanga bibiyag iyo ron
11 Na o mailay ngka kiran so mataid a babay a kebayaan ka mangaroma
12 Na kewit ka sekaniyan ko walay ngka. Pakiyopawi ngka on a olo niyan ago
pakikanokowi ngka on a manga kemer iyan
13 Na kesambian iyan so ndiditaren iyan isako mabiyag. Amay ka makakaden sekaniyan
ko walay ngka ko soled o saolan a di niyan dii mboko so ama iyan ago so ina iyan na
mapengaroma ngka.
14 Na di bo matey o di ngka sekaniyan ikesoat na begi ngka sa bayabaya, ogaid na di
ngka pepesaa o di na iseyan sa oripen ka kagiya miyapakaito o ka.
So Hak o Paganay a Inimbawata
15 “Ibarat na aden a mama a dowa i karoma a pekebabayaan iyan so isa on ogaid na di
niyan pekebabayaan so ikadowa na palaya siran on mimbawata sa mama ogaid na so kaka
kiran na wata o karoma niyan a kena a ba niyan pekebabayai.
16 Na amay ka mbagibagiin iyan kiran so manga tamok iyan na di niyan kibegay ko
paganay a inimbawata o pekebabayaan iyan so bagian ko tamok a aya hak o tito a kaka a
wata iyan a inimbawata o kena a ba niyan pekebabayai.
17 Ka disomala a kilalaa niyan so tito a kaka a wata iyan a inimbawata o kena a ba niyan
pekebabayai ko kimbegan iyan on ko dowa takep a bagian ko langon taman iyan, ka
giyangkoto a wata na aya paganay a nanao ko bager o ama iyan, na rek iyan so kabenar ko
kakakakai ron.
So Somosopak a Wata a Mama
18 “O aden a wata a mama a mategas i olo ago somosopak a di niyan peratiyayaan so
manga lokes iyan ago di niyan siran pekinegen apiya pen o pendanegen iran
19 Na kekapetan o manga lokes iyan na kewit iran ko manga pelokelokesen sii ko dii
kokoman o siti a babalingan iyan.
20 Na mapetero iran ko manga pelokelokesen a ‘Giyangkai a wata ami na mategas i olo
ago somosopak a wata. Di kami niyan peratiyayaan; marata sekaniyan i olaola ago dii
mamereg.’
21 Na kerobak sekaniyan den a ator o langon a manga mama ko siti taman sa matay.
Giyanan i kapekadaa niyo ko kamarataan sii rekano, na ketokawan ai o langon a taw sa
Israil na penga aalek.
So Pitibarangan a manga Sogoan
22 “O aden a miyakasela sa patot a kibono on a biyono sekaniyan ago binitin so bangkay
niyan ko kayo
23 Na di niyo ron pekapitai a mabibitin. Lebengen iyo den sii bo sangkoto a gawii, ka so
taw a mabibitin ko kayo na kasisintaan o Tohan. Lebengen iyo kaan di kakarami so inged
a imbegay rekano o Allah a Tohan iyo a mapekewali niyo.
DOTIRONOMIYO 22
“O mailay ngka so sapi o di na bilibili o pagari ngka a pekededadadag na di ka pegomanta
sa di ngka katawan; ba ngka den wita ko kirek on.
2 Ogaid na o mawatan so babalingan o pagari ngka o di na di ngka katawan o antawaa i
kirek on na wita ngka ko walay ngka na sisiyapa ngka taman sa makaoma so kirek on a di
on dii mbabanog, na began ka on.
3 Lagid oto mambo a sowaa ngka o matoon ka so kimar o pagari ngka, o di na so gerab
iyan o di na apiya antonaa a rek iyan a miyada. Di ngka ini pendarainonen.
4 “O mailay ngka so kimar o di na sapi o pagari ngka a miyaoteng ko lalan na di ngka ini
pendarainonen; ogopi ngka sekaniyan baden sa kapakatindega on.
5 “So babay na di den makapenditar sa nditaren a mama, na so mama na di makapenditar
sa nditaren a babay, ka so apiya antawaa i di sii dii nggolaola na piyakasisingay ko Allah
a Tohan iyo.
6 “O makatoon ka sa salag a papanok ko kilid a lalan apiya anda sii ko kayo o di na sa
lopa a aden a papanok on a lomelenes ko manga wata iyan o di na pelendem ko manga
orak na di ngka perakesen komowa so ina a papanok a ped o manga wata iyan.
7 Kepakay a kowaan ka so manga roroni a papanok, ogaid na bokai ngka so ina iran kaan
ka makategompiya ago malendo so omor ka.
8 “Amay ka makambalay ka sa walay na mbaali ngka sa alad ko melilibeta ko pantar a
atep iyan kaan di kesala so pamiliya ngka o aden a maolog on a matay.
9 “Di ngka pemolai sa dowa barang a oniin so asinda ngka a obas. O nggolaolaa ngka ini
na kekaraman so onga a obas ago so pen so keragon ka ko ped a pamomolan.
10 “Di ngka timoa somangan sa kokoong so sapi ago so kimar sa kapendado ngka.
11 “Di ka penditar sa nditaren sa ba piyakandair mamanai so alpaka ago so sotra.
12 “Tagoi ngka sa manga garigay so pat a rogo o sagayadan o kimon a ndiditaren ka.
Manga Kokoman makapantag ko Da Kabatali
13 “O mangaroma so mama sa babay na maipos so kiyarembanga niyan on na kedaan
sekaniyan on sa bebaya
14 Na o panotiyaa niyan a sebapan iyan so babay a tig iyan a ‘Piyangaroma ko angkai a
babay ogaid na kagiya marembang aken na kiyatokawan aken a kena den o ba sekaniyan
da kabatali,’
15 Na o magiyoto na so manga lokes o babay na kekowa iran so manga karina sa da den
makeroma so wata iran, na pakiilain iran ko manga pelokelokesen sii ko dii kokoman.
16 Na mapetero o ama o babay ko manga pelokelokesen a ‘Piyakipangaroma ko so wata
aken sangkai a mama, ogaid na imanto na da a kabaya iyan on.
17 Pisebapan iyan sekaniyan a pitero iyan a kiyatokawan iyan a kena den o ba da kabatali.
Ogaid na katii so manga karina sa da den makeroma so wata aken.’ Na giyoto a keyaten
o manga lokes iyan so dinis ko kamamasaan o manga pelokelokesen ko siti.
18 Na kekowa iran so mama na kelepedan iran
19 Ago kemoltaan iran sa magatos a pelata a pirak a kibegay ko ama o babay, ka kagiya
giya mama oto na piyakaito iyan so raga a taw sa Israil. Na kitaros o mama a
kakakaromai niyan on; di niyan den mipembelag ko tenday a omor iyan.
20 “Ogaid na o benar so inisendit on o mama ago da a karina sa da den makeroma so
babay a ba mapekiilay
21 Na kewit so babay ko paitaw o walay o ama iyan na roo sekaniyan den kerobak a ator
o manga mama ko siti taman sa kapatay niyan. Ka miyakanggolaola sekaniyan sa
piyakayaya sii sa Israil ko kiyapakikeroma niyan sa da niyan pen kapangaroma sii ko
kababaling iyan pen ko walay o ama iyan. Giyanan i kapekadaa niyo ko kamarataan sii
rekano.
22 “O katokawi a aden a mama a romimbang sa babay a ana karoma niyan na palaya den
mbonoon so mama ago so babay. Giyanan i kapekadaa niyo ko kamarataan sii sa Israil.
23 “O aden a mama a makatoon sa babay a da kabatali sii ko siti a matataalik a
kapengaromaa on o ped a mama na ba niyan den pikeroma
24 Na kewit iyo siran a dowa ko liyo o siti na robaki niyo a ator taman sa mamatay;
kerobak so babay ka apiya o ndodoo ko siti na da den kisek a pekitabang, na kerobak so
mama ka biyatalan iyan so babay a kewingen ko ped a mama. Giyanan i kapekadaa niyo
ko kamarataan sii rekano.
25 “Ogaid na o makatoon so mama sa babay ko mawatan ko siti a matataalik a
kapengaromaa on na go niyan liyobed na so bo so mama a lomiyobed on i mbonoon.
26 Di niyo petekora so babay ka da a ba niyan miyandosa a patot a imbono on. So
kokoman makapantag sii na lagid bo o kokoman makapantag ko taw a somiyondol ago
miyakapatay ko siringan iyan,
27 Ka miyatoon o mama so kewingen a babay ko mawatan ko siti, na apiya pen
kominisek na da a ba on makapenabang.
28 “O makatoon so mama sa raga a da makeroma a kena o ba kewinga na go niyan
liyobed na o katokawi den
29 Na pekabayad so mama sa lima polo a pelata a pirak ko ama o babay sabap sa
piyakakeya iyan so babay. Na disomala a mapengaroma niyan so babay a di niyan den
mipembelag ko tenday a omor iyan.
30 “Di kepakay o ba pakikeromai so mama ko karoma o ama iyan ka giyanan i
kakediyampaa niyan ko ama iyan.
DOTIRONOMIYO 23
So manga Taw a di Pekaped ko dii Kapelimolimod
“Da a mama a miyasasa so orak iyan o di na piyotolan sa sangoran a ba pekaped ko dii
kapelimolimod o manga pagtaw o Allah.
2 “So taw a inimbawata sa di kawing na di pekaped ko dii kapelimolimod o manga
pagtaw o Allah taman ko ikasapolo apid ko kebabadan on.
3 “Da a Amoniyo o di na Mowabiyo a apiya sii pen ko ikasapolo a apid o kebabadan on a
ba pekasoled ko dii kapelimolimod o manga pagtaw o Allah.
4 Aya sabap iyan na minda siran o ba siran rekano makabegay sa pangenengken ago ig
isako pelalakaw kano ko kiyapakaawa iyo sa Misir, na tindanan iran si Balaam a wata i
Biyor a taga Pitor sii sa Misopotamiya sa kapesintai niyan rekano.
5 Inonta bo na da pakinega o Allah a Tohan iyo si Balaam, ka kilid iyan so paninta na
biyaloy niyan baden a rakmat, ka pekebabayaan kano o Allah a Tohan iyo.
6 Di kano pakipengginawai ko manga Mowabiyo ago so manga Amoniyo aya pen o ba
kano nggolaola sa apiya antonaa a ipetegompiya iran sa taman sa pakataman.
7 “Di niyo kegowaden so manga taw sa Idomiya ka manga pagari niyo siran; na di niyo
kegowaden so manga Imisiren ka miyakabaling kano a manga mananangga sii ko inged
iran.
8 Ipoon ko ikatelo a apid o kebabadan kiran na pekaped siran ko dii kapelimolimod o
manga pagtaw o Allah.
So Kakeresiki ko Kampo
9 “Igira a kekampo kano sii ko di niyo dii kapakitidawa ko manga ridoay niyo na lidasi
niyo so apiya antonaa a pekakaram rekano.
10 O aden a mama sii rekano a miyadalem a hadas ka tiyogaan a biga sii ko katotoroga on
na pekaliyo sekaniyan ko kampo na pekatareg roo pasin.
11 Ogaid na amay ka kegabi na makapendiyonob sekaniyan, na sii ko kiyasedep o
alongan na pekasoled sekaniyan ko kampo.
12 “Senggay kano sa darpa ko liyo o kampo a diyamban iyo.
13 Rakesi niyo so manga kasangkapan iyo sa kali, na igira a pepekaodo kano na kalot
kano na go niyo petemboni so maresik.
14 Ka so Allah a Tohan iyo na dii magenebeneb ko kampo niyo sa kapelindinga niyan
rekano ago so kapelada niyan ko manga ridoay niyo sii rekano. Na paliyogat a
malolompiyo so kampo niyo kaan da a maresik sii rekano a ba niyan mailay a kitalikod
iyan rekano.
Pitibarangan a manga Kokoman
15 “O aden a oripen a miyakapalagoy a miyagapas reka na di ngka tegela komasoy ko
kadnan iyan.
16 Pakakadena ngka sekaniyan sii rekano ko apiya anda i kepili iyan sii ko manga inged
iyo a kebayaan iyan komaden. Di ngka sekaniyan pekabobologi.
17 “Da a babay o di na mama a taw sa Israil a ba makapesondal roo ko pesimbaan ko
barahala.
18 Di niyo pagowita ko Timplo o Allah a Tohan iyo so iniyapin ko sondal a babay o di na
mama a aya itoman ko inisemaya iyo, ka piyakagowagowad siran ko Allah a Tohan iyo.
19 “Di ngka pekaisega so pirak, kaoyagan o di na apiya antona onon a keotang o ped ka a
Israil.
20 Kepakay a pekaisegen ka so otang o mananangga, ogaid na di ngka pekaisega so otang
o ped ka a Israil kaan kano karakmati o Allah a Tohan iyo ko langon taman a di niyo dii
nggalebeken sii ko inged a pesongowan iyo sa katengana niyo ron.
21 “O pesemaya ka ko Allah a Tohan ka na di ngka pendarainonen a kitomanen ka on, ka
mataan den a sekaten ai o Allah a Tohan ka, na o di ngka tomanen na kesala ka a
miyakandosa.
22 So di ngka kapesemaya na kena a ba dosa,
23 Ogaid na apiya antonaa i inisemaya a ka ko Allah a Tohan ka a iklas a kiyateroa ngka
on na paliyogat a kipenggolalanen ka on.
24 “O somoled ka ko asinda a obas o siringan ka na pekakan ka on sa taman sa kabaya a
ka, ogaid na di ngka on ketagoan so balengkat ka.
25 O somoled ka ko pepamangeto a pereperan o siringan ka na pekaropo ka on, ogaid na
di ngka keosaran sa garab.
DOTIRONOMIYO 24
So Kambelag ago so Kapangaroma peroman
“Opama ka makapangaroma so mama sa babay a miniarong sa di niyan kebebayaan
sabap sa aden a kiyatokawan iyan a piyakayaya makapantag ko babay na o somorat so
mama sa kapasadan a kambelag a ibegay niyan ko babay ago pakaawaan iyan ko walay
niyan
2 Na amay ka makaawa ko walay niyan na o pangaromaa peman o salakaw a mama
3 Na o kagowaden pen so babay o miyaori a miyakapangaroma on a somorat mambo sa
kapasadan a kambelag a ibegay niyan on ago pakaawaan iyan ko walay niyan, o di na o
matay angkai a miyaori a karoma niyan
4 Na di kepakay o ba mapangaroma peroman so babay o miyaona a karoma niyan ko
oriyan o kiyabatali ron, ka piyakasisingay ini ko Allah. Di niyo tagoi sa dosa so inged a
imbegay rekano o Allah a Tohan iyo a mapekewali niyo.
Pitibarangan a manga Kokoman
5 “O gopen miyakapangaroma so mama na di mapekaonot ko manga sondaro a dii
makitidawa aya pen o ba kasangani ko ped a galebek. Ka kebegan sekaniyan sa bayabaya
ko soled o saragon kaan makatareg sa walay ago mapakapiya niyan a ginawa o babay a
piyangaroma niyan.
6 “Igira a pepangotang ka sa ped a taw na di ngka kowaa so galingan iyan a ator a kisanda
ko otang iyan, ka lagid bo o ba aya ngka on kinowa a sanda na so ipekeoyag o pamiliya
niyan.
7 “O aden a miyangidnap ko lagid iyan a Israil kaan iyan maoripen o di na mapesa na
mbonoon so miyangidnap. Giyanan i kapekadaa niyo sangkanan a kamarataan sii rekano.
8 “Makapantag ko paniyakit a bowa na piyapiyai niyo tomoman so ipaginsarat rekano o
manga imam a manga Libitiyo. Nggolalanen iyo piyapiya so inisogo aken kiran.
9 Tademi niyo so pinggolaola o Allah a Tohan iyo ki Mariyam sii ko kapelalakaw niyo a
poon sa Misir.
10 “Amay ka aden a pegotangen ka ko siringan ka na di ngka soledi so walay niyan sa
kakowaa ngka ko isenda iyan on.
11 Sii ka den sa liyo na nayawa ngka baden a kiliyon iyan ko isenda iyan reka.
12 O miskin sekaniyan na di ngka tengana ko walay ngka so nditaren a inisanda iyan ko
mababasa gawii.
13 Kasowin ka den ko di pen kasedep o alongan kaan iyan mipakatorog. Penalamatan ka
niyan na imbilang ai o Allah a Tohan ka a aya ngka kaontol.
14 “Di ngka pelimbongi so pesokayan ka a gomagalebek a miskin ago kadodowaanan
apiya anda ko lagid ka a Israil o di na mananangga a sii babaling ko isa ko manga siti
niyo.
15 Began ka on so sokay niyan sa oman gawii ko di pen kasedep o alongan, ka miskin
sekaniyan na sasanaan iyan ai. Ka o di ngka ini nggolaolaa na pepanonen ka niyan ko
Allah na kesala ka a miyakandosa.
16 “Di kebono so ama sabap ko sala o wata iyan aya pen o ba bonoa so wata sabap ko
sala o ama iyan. Aya bo a kibono ko taw na so rek iyan a kasalaan.
17 “Di niyo perampasi sa kabenar so mananangga o di na so ilo aya pen o ba niyo
kowaa so nditaren o balo a sanda.
18 Tatademi niyo a miyapangongoripen kano roo sa Misir na so Allah a Tohan iyo na
piyakamaradika kano niyan roo. Giyanan i sabap a inisogo aken rekano a nggolaolaa niyo
ai.
19 “Igira a petimoon iyo so manga pereperan a miyaragon iyo ko dii mbabasokan na o
aden a miyalepas iyo a sabekes a pereperan a minibegak iyo roo ko lopa iyo na di niyo
anan kesowi o ba niyo kowaa, ka begaken iyo ron den a kekowa o manga mananangga,
manga ilo ago so manga balo kaan kano karakmati o Allah a Tohan iyo ko langon a
manga galebek iyo.
20 “Igira a perebasen iyo so manga olibi niyo na di niyo pekesowi romopo so miyanga
lalamba ko manga sapak o kayo; begaken iyo so pekelamba on kaan makowa o manga
rait, manga ilo ago so manga balo.
21 Igira a perebasen iyo so manga obas iyo ko asinda na di niyo ai pengosipi; so
pekibegak ko manga obas na kekowa o manga mananangga, manga ilo ago so manga
balo.
22 Tatademi niyo a miyapangongoripen kano roo sa Misir. Giyanan i sabap a inisogo
aken rekano a nggolaolaa niyo ai.
DOTIRONOMIYO 25
“O aden a rido o dowa kataw na wita niyo ko dii kokoman kaan makokom o
pangongokom, na pekabenaren iyan so da a sala iyan ago selaan iyan so miyakasela.
2 O domadait ko miyakasela a kapelepedi ron na mapekagepe sekaniyan o pangongokom
ko hadapan iyan na pekilepedan iyan den sa taman sa kadakel o kibayad ko minisela iyan.
3 Ogaid na aya bo a kadakel a kileped on na sii bo taman ko pat polo. O pakilepedi sa
kalawanan ai na mapekaito sekaniyan ko kapegilaya ngka on.
4 “Di niyo pongesa so sapi igira a pegegiken iyan so ilaw.
So Atastanggongan o Pagari o Miyatay
5 “O matitimo sa darpa so dowa a magari a mama na matay so isa on a da a wata iyan a
mama na so babay a inikabalo niyan na di makipengaroma ko mama a kena a ba ped ko
pamiliya. So pagari o miyatay na aya makapengaroma ko babay a aya niyan kitomanen
ko atastanggongan o kaiipagi niyan on.
6 Na so paganay a ipembawata iran a mama na aya pekaawid ko ngaran o magari a
miyatay kaan di kepapas so ngaran iyan sii sa Israil.
7 Ogaid na o di pagiyog so mama sa kapengaromaa niyan ko inikabalo o pagari niyan na
pekasong so babay ko manga pelokelokesen sii ko gimowa o siti na mapetero iyan a ‘So
pagari o karoma ko na da iyog o ba niyan mabangon so ngaran o pagari niyan sii sa Israil.
Di niyan itoman so atastanggongan o ipag aken.’
8 Na pekitawag o manga pelokelokesen ko siti so mama a mipembitiyarai ran. O itegel
iyan tero a ‘Di aken kabaya o ba aken pangaromaa so babay,’
9 Na so bitowanen o pagari niyan na magobay rekaniyan ko hadapan o manga
pelokelokesen na kekowa niyan on so isa ko tinilas iyan na kedodaan iyan sa paras so
ipag iyan a peteroon iyan a ‘Giyai i penggolaolaan ko mama a minda sa kambangona
niyan ko walay o pagari niyan.’
10 Na so kebabadan sangkoto a mama sii sa Israil na pagingaranan sa ‘Pamiliya o
Kinowaan sa Tinilas.’
Ped a manga Kokoman
11 “O aden a dowa kataw a mama a dii mbono a miyobay kiran so karoma o isa on ka
tebangan iyan so karoma niyan na go niyan kapeti so orak o peperaneg ko karoma niyan
12 Na potola niyo ron so lima niyan. Di niyo sekaniyan kepediin.
13-14 “Di kano pegosar sa timbangan o di na panakes a di ontol.
15 Aya niyo bo osara so ontol ago tarotop a manga timbangan ago panakes kaan matey a
kapeginetaw niyo roo ko lopa a imbegay rekano o Allah a Tohan iyo.
16 Ka so apiya antawaa a dii melilimbong ko kapegosara niyan ko di ontol a timbangan
ago panakes na piyakagowagowad ko Allah a Tohan iyo.
So Sogoan sa Kambonoa ko manga Amalik
17 “Tademi niyo so pinggolaola rekano o manga Amalik sii ko kapelalakaw niyo isako
makaliyo kano sa Misir.
18 Sii ko tanto rekano a kiyadokawi na siyondolan kano iran ko kapelalakaw niyo na
piyamono iran so di pemakarag lomakad a maooriyan. Da a kalek iran ko Tohan!
19 Sabap roo na amay ka began kano o Allah a Tohan iyo sa kalilintad ko langon a ridoay
niyo ko melilibeta rekano sii ko inged a imbegay niyan rekano a ketangan iyo ago
mapekewali na polanga niyo so manga Amalik kaan da den a ipenanadem kiran ko dalem
a doniya. Di niyo den ai pelipati!
DOTIRONOMIYO 26
Manga Ipesoasoat a Miyanga raragon
“Amay ka matangan iyo so lopa a imbegay rekano o Allah a Tohan iyo a mapekewali
niyo ago makabaling kano ron
2 Na disomala a kowaan o oman i isa rekano so ped ko langon a paganay a miyaragon ko
lopa a imbegay reka o Allah a Tohan iyo, na awidi ngka ini a tatagoon ko reban roo ko
darpa a pinili o Allah a Tohan ka a pesimbaan rekaniyan.
3 Song ka ko imam a aya petelagad sa masa oto na teroa ngka on a ‘Penalamatan ko so
Allah a Tohan ko sangkai a gawii ka miyakatalingoma ko ko lopa a inisepa o Allah a
imbegay niyan ko manga apoapoan tano.’
4 “Na kowaan o imam so reban sii sa lima ngka na imbetad iyan ko danga o aparan o
Allah a Tohan ka.
5 Samaoto na teroa ngka ko kamamasaan o Allah a Tohan ka a ‘So apoapoan aken a so
Yakob na dii magenebeneb a taga Aramiya, na somiyong sekaniyan sa Misir a ped o
pamiliya niyan a kena a ba siran madakel. Komiyaden siran roo na miyabaloy a mala a
nasiyon a mabager ago mala i gees.
6 Ogaid na pimarataan tano o manga Imisiren ago riyasay iran a tigel tano iran
makanggalebek sa maregen.
7 Gomiyoraok tano a miyamangni sa tabang ko Allah a Tohan o manga apo tano na
miyaneg tano niyan a miyailay
niyan so kapepakabobologi ago kaperasaya rektano ago so kapakamboboko.
8 Na iniliyo tano o Allah sa Misir a nggolalan ko mala i kapaar a lima niyan ago so mabager a barokan iyan a minggalebek sa manga ala a piyakalekelek ago piyakamemesa a
nanao.
9 Inowit tano niyan sangkai a darpa na inibegay niyan rektano angkai a pekepakayan ago
oodaren a lopa.
10 Imanto, ya Allah, na inawidan aken angkai a paganay a miyaragon ko lopa a inibegay
ngka raken.’ Na betaden ka so reban ko hadapan o Allah a Tohan ka na simbaa ngka
sekaniyan.
11 Samaoto na kabebaya ka baden sii ko langon a kamapiyaan a inibegay reka o Allah a
Tohan ka ago sii ko pamiliya ngka, na perakesen ka sii so manga Libitiyo ago so manga
mananangga a sii rekano babaling.
12 “Oman ikatelo ragon na giyoto so ragon a kimbegan ka ko ikasapolo bagi ko langon a
miyaragon ka sii ko manga Libitiyo, so manga mananangga, so manga ilo ago so manga
balo a kibabaling ko manga siti niyo kaan siran on makakan ago manga oosog.
13 Amay ka manggolaola ngka ini na teroa ngka ko Allah a Tohan ka a ‘Da den a ba aken
liyamba ko soti a ikasapolo bagi sii ko walay aken, ka inibegay aken den ko manga
Libitiyo ago sii ko manga mananangga, manga ilo ago so manga balo a giyoto so inisogo
o ka. Da aken den sogoka so manga sogoan ka aya pen o ba aken kiyalipati.
14 Da ako kan sangkai a soti a bagian sii ko kapakamboboko aken aya pen o ba aden a
siko aken on sii ko kadadalem aken a hadas, na da den a inisapaat aken on ko miyamatay.
Ka piyaratiyaya aken seka, ya Allah a Tohan ko, na ininggolalan aken so langon taman a
inisogo o ka raken.
15 Tolong ka san sa kasorgaan a so soti a kakadenan ka na rakmati ngka so manga pagtaw ngka a Israil a lagid mambo angkai a pekepakayan ago oodaren a lopa a inibegay
ngka rekami a giyoto so inisepa a ka ko manga apo ami.
So manga Taw a Rek o Allah
16 “Sii sangkai a gawii na inisogo rekano o Allah a Tohan iyo so kinggolalanen iyo
sangkai a manga taritib ago manga kokoman. Kagiya ka maoto na tomana niyo ai
piyapiya sa iklas ko poso iyo ago iklas ko niyawa niyo.
17 Pimataanan iyo sangkai a gawii a so Allah i Tohan iyo. Initopa niyo a kedegen iyo so
manga lalan iyan ago tomanen iyo so manga taritib, manga sogoan ago so manga
kokoman iyan ago peratiyayaan iyo sekaniyan.
18 Na pimataanan mambo o Allah sangkai a gawii a sekano i mala on i arga a manga
pagtaw niyan ka giyoto so initopa niyan rekano, na disomala a katomana niyo ko langon a
sogoan iyan.
19 Na ipengkat kano niyan sa maporo a di so apiya antonaa a ped a nasiyon a inaden iyan,
na mbegan kano sa podi, bantogan ago menang. Kebaloy kano a soti a manga pagtaw o
Allah a Tohan iyo a giyoto so initopa niyan.”
DOTIRONOMIYO 27
So Aparan ko Palaw a Ibal
Si Mosa a ped iyan so manga pelokelokesen sa Israil na pitero iyan ko manga taw a
“Tomana niyo langon angkai a manga sogoan a inibegay aken rekano imanto.
2 Amay ka makaripag kano ko Lawasaig a Yordan a makasoled kano ko inged a imbegay
rekano o Allah a Tohan iyo na batiyong kano ron sa manga ala a ator na lapisi niyo sa
sominto.
3 Na soraten iyo ron so langon a manga katero angkai a kitab amay ka makaripag kano
ago makasoled ko pekepakayan ago oodaren a lopa a initopa o Allah a Tohan o manga
apo iyo a imbegay niyan rekano.
4 Amay ka inisampay kano ko sabala a Yordan na batiyonga niyo angkoto a manga ator
roo ko Palaw a Ibal a so den so inisogo aken rekano imanto, na lapisi niyo sa sominto.
5 Roo kano mbaal sa aparan a ator a pesepaatan sii ko Allah a Tohan iyo. Di niyo
pagosari so manga ator sa kasangkapan a potaw
6 Ka so aparan o Allah a Tohan iyo na disomala a aya on pagembaalan na so manga ator a
da panapili. Na sapaat kano ron sa petotongen a manga sapaat ko Allah a Tohan iyo.
7 Korban kano ron pen sa manga ayam pantag bo ko kanggiginawai, na kana niyo ai sa
kapekebabaya sii ko hadapan o Allah a Tohan iyo.
8 Na sii sangkoto a manga ator a lalapisan sa sominto na soraten iyo sa marinayag so
langon a manga katero angkai a kitab.”
9 Mandiyadi na so Mosa ago so manga imam a manga Libitiyo na pitero iran ko langon a
manga Israil a “Rerenek kano, hey manga Israil, na pamakineg kano! Imanto a gawii na
miyabaloy kano a manga pagtaw o Allah a Tohan iyo.
10 Kagiya ka maoto na paratiyayaa niyo so Allah a Tohan iyo na tomana niyo so manga
sogoan ago manga taritib a ipembegay aken rekano imanto.”
Manga Paninta a Pekalangkapen sii ko Palaw a Ibal
11 Sii den sangkoto a gawii na ininsaratan o Mosa so manga taw a tig iyan a
12 “Amay ka makaripag kano sa Yordan na giyangkai a manga mbatabataa na pekatindeg
ko Palaw a Girisim sa kapekalangkapa iran ko manga rakmat o Allah: so mbatabataa a
Simiyon, Libi, Yodah, Isakar, Yosop ago Baniyamin.
13 Na roo ko Palaw a Ibal na aya pekatindeg on sa kapekalangapa iran ko manga paninta
na: so mbatabataa a Robin, Gad, Asir, Sibolon, Dan ago Naptali.
14 Na so manga Libitiyo na mapetero iran sa matanog sii ko langon a Israil a:
15 “'Kemorkaan so taw a magembaal sa barahala a peteongen o di na towangen a
pekatindegen iyan sa masolen. Giyangkai a barahala a galebek o mapasang i kapenday na
piyakagowagowad ko Allah.’
“Na mapetero o langon a taw a ‘Amin!’
16 “‘Kemorkaan so taw a pekaitoon iyan so ama iyan o di na so ina iyan.’
“Na mapetero o langon a taw a ‘Amin!’
17 “‘Kemorkaan so taw a perangkireban iyan so temanaan o lopa o siringan iyan.’
Na mapetero o langon a taw a ‘Amin!’
18 “‘Kemorkaan so taw a pendadagen iyan so bota ko kapelalakaw niyan.’
19 “‘Kemorkaan so taw a perampasan iyan sa kabenar so mananangga, so ilo o di na so
balo.’
20 “Kemorkaan so mama a makipekeromai ko karoma o ama iyan ka giyoto i
kakediyampaa niyan ko ama iyan.’
21 “‘Kemorkaan so taw a makipekeromai ko apiya antonaa a binatang.’
22 “‘Kemorkaan so mama a makipekeromai ko babay niyan a pagari niyan sa ama o di na
babay niyan sa ina bo.’
23 “‘Kemorkaan so mama a makipekeromai ko panogangan iyan a babay.’
24 “‘Kemorkaan so taw a mbonoon iyan so ped a taw sa masolen.’
25 “‘Kemorkaan so taw a peterima sa tendan sa kambonoa niyan ko da a sala iyan.’
26 “‘Kemorkaan so taw a di makaaayon sa manga katero angkai a kitab sa kapetomana
niyan on.’
DOTIRONOMIYO 28
So Iperakmat ko Kaparatiyaya
“O paratiyayaa niyo so Allah a Tohan iyo ago piyapiyai niyo tomoman so langon a
sogoan iyan a ipembegay aken rekano sangkai a gawii na ipengkat kano niyan sa lebi
a maporo ko langon a nasiyon sa doniya.
2 Na so langon angkai a rakmat na kitemo ago ketatap rekano o paratiyayaa niyo so Allah
a Tohan iyo:
3 “Kerakmatan kano sii ko siti, na kerakmatan kano sii ko dii mbabasokan.
4 “Kerakmatan so pekebabadan rekano, so ipagonga o manga pamomolan ko lopa iyo ago
so di imbabawata o manga pangangayamen iyo a manga sapi, bilibili ago kambing.
5 “Kerakmatan so pereperan a pepanga raragon iyo ago so manga pangenengken a di on
dii mbaalan.
6 “Kerakmatan kano apiya anda kano pesong a melagid ko kapelalakaw niyo ago
kapembaling.
7 “Pekitaban rekano o Allah so manga ridoay niyo a makipetidawa rekano. Pegisaisa
siran ko kapesondoli ran rekano ogaid na pemalagoy siran a makapembelabelag sa pito
bagi.
8 “Penoon o Allah a pereperan so manga taliyong iyo, na perakmatan kano niyan ko
langon a di niyo dii nggalebeken roo ko inged a imbegay niyan rekano.
9 “O petomana niyo so manga sogoan o Allah a Tohan iyo ago pekedegen iyo so manga
lalan iyan na mbelowin kano niyan a soti a manga pagtaw niyan a giyoto so inisepa iyan
rekano.
10 Samaoto na keilay o langon a taw sa doniya a piyamili kano o Allah a rek iyan na
ikelek kano iran.
11 Na kitaralo a kapekapiyaa rekano o Allah sii ko inged a inisepa iyan ko manga apo iyo
a imbegay niyan rekano, ka mbegan kano niyan sa madakel a wata, madakel a
pangangayamen ago madakel a pereperan.
12 “Pelekaan o Allah so langit, a so katataliyongan ko manga kamapiyaan iyan, ka
pekioranan iyan so manga lopa iyo sii ko mosim iyan, na perakmatan iyan so langon a di
niyo dii nggalebeken. Makapemagotang kano ko madakel a ped a nasiyon, ogaid na di
kano kiran pekaotang.
13 O tagoa niyo sa ginawa so manga sogoan o Allah a Tohan iyo a ipembegay
aken rekano sangkai a gawii ago piyapiyaan iyo ai tomoman na mbelowin kano niyan a
keona a kena a ba keori, na kelalayon kano den mipoporo a kena a ba mibababa.
14 O ba kano silay sa kawanan diwang poon ko apiya antonaa sogoan a ipembegay aken
rekano imanto sa kasengora niyo ko salakaw a manga tohan sa kasimbaa niyo ron.
So manga Paninta ko di Kaperatiyaya
15 “Ogaid na o di niyo peratiyayaa so Allah a Tohan iyo ago di niyo piyapiyaan tomoman
so langon a sogoan ago manga taritib a ipembegay aken rekano imanto na so langon
angkai a paninta na kitana ago ketatap rekano:
16 “Kemorkaan kano sii ko siti ago sii ko dii mbabasokan.
17 “Kemorkaan so pepanga raragon iyo ago so manga pangenengken a di on dii mbaalan.
18 “Kemorkaan so pekebabadan rekano, so ipagonga o manga pamomolan ko lopa iyo
ago so di imbaba wata o manga sapi, manga bilibili ago manga kambing iyo.
19 “Kemorkaan kano apiya anda kano pesong a melagid ko kapelalakaw niyo ago
kapembaling.
20 “Tomparakan kano o Allah sa kamoralaan, kalilibog ago awid a akal ko langon a di
niyo dii nggalebeken taman sa tekaw den ago matarotop a kakebinasa niyo sabap ko
marata a pinggolaola niyo ko kiyatalikodi niyo ko Allah.
21 Pekagedamen kano o Allah sa manga paniyakit taman sa maiped kano niyan roo ko
inged a pesongowan iyo a ketangan iyo.
22 Siksaan kano o Allah sa kaperayor, panenggaw ago manga lebag, na itelingoma niyan
ko manga pereperan iyo so mayaw a ndo, taon, manga merat ago olabong, na ketatap
rekano angkai a manga kamoralaan taman sa mamatay kano.
23 Di den pekaoran so langit ko kaporoan iyo ka pembaloy a lagid o tombaga, na
pekategas so lopa ko kababaan iyo ka pembaloy a lagid o potaw.
24 Apiya o oran a imbegay o Allah ko lopa iyo na baden bayanek ago lopapek a
pekatanaan iyan rekano a poon sa langit taman sa mabinasa kano den.
25 “Pekitaban kano o Allah ko manga ridoay niyo. Pegisaisa kano ko kapesondoli niyo
kiran ogaid na pemalagoy kano a makapembelabelag sa pito bagi, na penga aalek so
langon a taw sa doniya amay ka mailay iran so miyasowa iyo.
26 So manga bangkay niyo na pegdasen o manga papanok ago manga iila a binatang na
da den a ba kiran mbogaw.
27 Siksaan kano o Allah sa manga lebag a datar o inisiksa iyan ko manga Imisiren, a
rakes o manga panido, manga ibol ago bogis a di den kepiya.
28 Siksaan kano niyan pen sa beteng, na piseken kano niyan ago pelibogen.
29 Pengapap kano ko kaooto a alongan a datar o bota a di pekailay ko pesongowan iyan.
Di kano den pekapiya i bobolos ko apiya antona onon a penggolaolaan iyo. Lalayon kano
sonsingen ago pemanekewan sa da den a ba rekano tebang.
30 “Mipenoksam ka ko babay ogaid na salakaw a mama a makapekeroma on. Pembalay
ka sa walay ogaid na di ngka den kebalingan. Pemola ka sa asinda a obas ogaid na di
ngka den kapenggonaan so onga niyan.
31 Kesombali so sapi i ka ko kapegilaya ngka on ogaid na di ka on pekakan. So kimar ka
na pagagaon reka na di reka den kikasoy. So bilibili ngka na imbegay ko manga ridoay
niyo a da den a ba reka tebang.
32 Ipemegay so manga wata iyo a manga mama ago manga babay ko manga rait. Oman
gawii na baden pendokawi so manga mata niyo sa kapepagalatawi niyo kiran na da a ba
niyo kiran kitabang.
33 So nasiyon a di niyo katawan na aya pengangan ko manga pereperan ko lopa iyo a
tanto niyo a pindokawan, na pekaregenan kano baden ago perasain ko tenday a
kaooyagoyag iyo.
34 Pekabeteng rekano so dii manggolaola a penga iilay niyo.
35 Pekagedamen o Allah so manga leb iyo ago manga ai sa malipedes a manga lebag a di
den kepiya a melangkap ko lawas iyo ipoon ko palad a ai niyo taman den sa poro o olo
niyo.
36 “Iteog kano o Allah a lagid mambo o dato iyo ko nasiyon a di niyo katawan aya pen o
ba so manga apo iyo, na roo kano pekasimba sa salakaw a manga tohan a so manga
barahala a kayo ago ator.
37 So kesowasowa iyo na ipememesa o langon a nasiyon a ron kano dendegen o Allah, na
pegongatongaten kano iran ago kowaan a kasablawan.
38 “Mala a kisaod iyo ogaid na maito bo a keragon iyo, ka pelenganen ai koman o manga
tarapan.
39 Pemamola kano sa manga asinda a obas na pagalimaan iyo ogaid na di niyo kerebas so
onga niyan aya pen o ba niyo mainom so arak a kembaalan on, ka pengangen o manga
oled so manga waged.
40 Melangkap ko dalem a inged iyo so manga kayo a olibi ogaid na di niyo den
kapenggonaan so lana niyan, ka baden penga rororo so manga onga niyan.
41 Pembabawata kano sa manga mama ago manga babay ogaid na penga ada siran rekano
ka penga bibiyag siran.
42 So langon a manga kayo niyo ago so manga pereperan ko dii mbabasokan na
mbinasaan o manga oled.
43 “So manga mananangga a kibabaling sii rekano na tanto siran a kiporo sii rekano,
ogaid na tanto kano a kibaba.
44 Pemagotang siran rekano ogaid na di kano kiran makapemagotang. Siran i pembaloy a
olo na sekano i pembaloy a ikog!
45 “O di niyo peratiyayaa so Allah a Tohan iyo sa katomana niyo ko manga sogoan iyan
ago manga taritib a inibegay niyan rekano na kitomparak rekano angkai langon a manga
kamoralaan, na keteden kano iran taman sa mabinasa kano.
46 Na mapenggolaola ini rekano a aya piyakamemesa a toos a ipegiktiyar iyo ago so
manga moriyataw niyo sa taman sa pakataman.
47 Apiya pen madakel a kamapiyaan a inibegay rekano o Allah a Tohan iyo na da niyo
panalagadi sa
kapekebabaya ago kapipiya a ginawa.
48 Sabap roo na kapenalagadan iyo so manga ridoay niyo a pekasondolen rekano o
Allah. Na keor kano ago kewaw, ketalandiyang ago kekorangan sa langon taman, na
senganan o Allah sa kokoong a potaw so manga lig iyo taman sa mabinasa kano niyan.
49 “Pekigobat kano o Allah ko nasiyon a mawatan rekano a poon ko kaposan a doniya a
seyab rekano a datar o garoda, a so nasiyon a so basa iran na di niyo kesabot,
50 A so masarangit a nasiyon a di iran pegadatan so manga lokes aya pen o ba iran
kapediin so manga wata.
51 Ken iran so manga pangangayamen iyo ago manga pamomolan ko lopa iyo taman sa
mamatay kano a ongos. Da den a ba iran rekano pelambaa a pereperan, bago a arak o di
na lana aya pen o ba nati o manga talon iyo a sapi, bilibili ago kambing taman sa
mabinasa kano iran.
52 Pelikopan iran so oman i siti niyo taman sa manga ooteng so manga poporo a kota a
iaalad on a sasarigan iyo. Pelikopan iran so oman i siti ko dalem a inged a inibegay
rekano o Allah.
53 “Sabap ko kareregeni rekano ko masa a kalilikopi rekano o manga ridoay niyo na ken
iyo apiya so sapo o manga wata iyo a manga mama ago manga babay a inibegay rekano o
Allah a Tohan iyo.
54-55 Apiya so mama a lebi rekano a baraadaten a tanto a taw na ken iyan so sapo o ped
ko manga wata iyan, ka da den a kelamba on a pangenengken sabap ko kareregeni ron sii
ko kalilikopi o manga ridoay niyo ko langon a siti niyo; na apiya so pagari niyan o di na
so pekebabayaan iyan a karoma niyan o di na so ped ko manga wata iyan na di niyan
ikepedi, ka da den a isa kiran bo a ba niyan begi ko apiya antonaa sapo o manga wata iyan
a peken iyan.
56 So mambo so babay sii rekano a bilang a taw ago barabangensaan a apiya so kisekoon
iyan ko palad a ai niyan ko bote na di niyan den penggolaolaan na peligetan iyan so
karoma niyan a pekebabayaan iyan ago so tito a wata iyan a mama o di na babay,
57 Ka ken iyan sa masolen so wata a gopen iyan inimbawata ago so inayanan iyan na di
niyan siran on mbegan ka da den a ped a ba niyan kekan sii ko kareregeni ron ko
kalilikopi o manga ridoay niyo ko manga siti.
58 “O di niyo piyapiyai tomoman langon angkai a sogoan a minisorat sangkai a kitab ago
di niyo ikelek angkai a kababantogan ago piyakalekelek a Ingaran o Allah a Tohan iyo
59 Na siksaan kano o Allah ago so kebabadan rekano sa piyakalekelek a manga
kamoralaan, a so maregen a manga kamoralaan a misasarta on so peninggas a manga
paniyakit a pegtey a tanto.
60 Itemo iyan rekano so langon a gedamen a inikalek iyo roo sa Misir, na kepet ai rekano
den.
61 Na itena iyan rekano pen so oman i pisosonan a paniyakit ago kamoralaan a da maaloy
sangkai a ribro a kitab taman sa mabinasa kano.
62 Na apiya pen lagid kano sa kadakel o manga bitoon sa langit na maito rekano bo a
kelamba sabap ko da niyo kaparatiyayaa ko Allah a Tohan iyo.
63 Lagid o inikabebaya gowani o Allah so kapepakapiyaa niyan ago kapepakandakela
niyan rekano na ikebabaya iyan mambo so kambinasaa niyan ago kapagilanga niyan
rekano, na kebadot kano ko lopa a pesongowan iyo sa katengana niyo ron.
64 “Isegomparak kano o Allah roo ko langon a nasiyon ko pirowarowangan o doniya; na
roo kano pekasimba ko salakaw a manga tohan, a so manga barahala a kayo ago ator a di
niyo katawan aya pen so manga apo iyo.
65 Roo sangkoto a manga nasiyon na da a kekadenan iyo ron a malilinding ago
lomilintad, na mbegan kano roo o Allah sa manga awid a akal, so kada a inam ago so
manga rata a ginawa.
66 Da a ketanaan o kapepaginetaw niyo; gagawii daondaw na penga aalek kano a di niyo
den ketangked so kaooyagoyag iyo.
67 Kepeno a kalek so manga poso iyo sabap ko dii manggolaola a pekeilay niyo. Igira a
miyapita na peteroon iyo a ‘O ba bo miyagagawii den!’ na igira a miyagagawii na
peteroon iyo a ‘O ba bo miyapita den!’
68 Pekakasowin kano o Allah roo sa Misir a mageeda kano ko manga kapal apiya pen
miyatero aken rekano a di kano roo den pekasong peroman; na roo niyo mapepasa so
manga ginawa niyo ko manga ridoay niyo a maoripen kano iran, ogaid na da den a ba
rekano pemasa.”
DOTIRONOMIYO 29
So Kapasadan a Inembaalan o Allah mipantag sa Israil sii sa Inged a Mowab
Giyai i manga rokon o kapasadan a inisogo o Allah ko Mosa a pagembaalan iyan
mipantag ko manga mbawataan o Israil sii sa inged a Mowab. Ipegoman ai ko kapasadan
a pimbaalan o Allah mipantag kiran roo ko Palaw a Sinay.
2 Tinimo o Mosa so langon o manga Israil na pitero iyan kiran a “Sekano den i
miyakailay ko langon a pinggolaola o Allah ko Piraon roo sa Misir ago sii ko langon a
sanasanaan iyan ago sii ko dalem a inged iyan.
3 Kiyamasaan iyo so piyakalekelek a manga tiyoba, manga nanao ago manga ala i
kabarakat a pinggolaola niyan.
4 Ogaid na taman den imanto na da kano den begi o Allah sa pamikiran a kisabot iyo o di
na manga mata a kiilay niyo o di na manga tangila a kineg iyo.
5‘Sii ko soled o pat polo ragon,’ a tig o Allah, ‘na inagak aken sekano sii ko disirto na da
den manga kikisi so manga nditaren iyo aya pen o ba miyanga bibinasa so manga tinilas
iyo.
6 Roo na da kano makakan sa paan aya pen o ba miyakainom sa arak o di na ped a mabisa
a panginginomen. Ogaid na bigan aken sekano sa ipekeoyag iyo kaan iyo katokawi a
saken so Allah a Tohan iyo.’
7 “Na isako makaoma kano sangkai a darpa na si Sihon a dato sa Hisbon ago si Og a dato
sa Basan na somiyampang rektano a makipetidawa, ogaid na tiyaban tano siran.
8 Inagaw tano so lopa iran na inibegay tano a mapekewali o manga mbatabataa a Robin,
Gad ago so sabaad ko mbatabataa a Manasih.
9 Kagiya ka maoto na tomana niyo piyapiya so manga rokon angkai a kapasadan kaan
kano makapiya i bobolos ko langon a di niyo dii nggolaolaan.
10 “Tomitindeg kano langon imanto ko kamamasaan o Allah a Tohan iyo, a so manga
olowan ko manga mbatabataa rekano, so manga pelokelokesen ago so manga sanasanaan
ago so langon a ped o manga Israil a manga mama
11 A rakes o manga wata iyo ago manga karoma niyo, ago so pen so manga mananangga
a kibabaling ko kampo niyo a aya dii nggogoray ko manga itagon iyo ago dii manageb sa
ig.
12 Sisii kano imanto kaan kano makasoled ko kapasadan o Allah a Tohan iyo a
pegembaalan iyan mipantag rekano sangkai a gawii a tiyangked iyan ko kiyasepa.
13 Ka tengkeden iyan sangkai a gawii a manga pagtaw kano niyan ago sekaniyan den i
Tohan iyo a giyoto so miyatero iyan rekano ago inisepa iyan ko manga apoapoan iyo a so
Ibrahim, Iskak ago so Yakob.
14-15 Kena a ba sekano bo a kititindeg sii imanto ko kamamasaan o Allah a Tohan tano i
papantagan iyan sangkai a kapasadan a inisepa iyan ka so mambo so kebabadan rektano a
kena a ba sisii imanto.
16 “Ketademan iyo so kiyapaginetaw tano roo sa Misir ago so kiyapakaokit tano ko
kalopaan o ped a manga nasiyon a inipanagad tano.
17 Miyailay niyo so piyakagowagowad a manga barhala iran a kayo, ator, pirak ago
bolawan.
18 Na pananggilai niyo o ba aden a mama o di na babay o di na pamiliya o di na mbatabataa sii rekano a ba makatalikod so poso iyan ko Allah a Tohan tano sa kasimbaa niyan
ko manga katohanan angkai a manga nasiyon; ka giyanan na lagid o bekaw sii rekano a
magto ago pekaonga sa mapait a towa.
19 Pananggilai niyo o ba aden a isa rekano a amay ka maneg iyan so manga katero angkai
a inisepa o Allah na ba niyan den pegakoli a ginawa niyan a peteroon iyan a ‘Tegompiya
ako apiya pen ipepaginetaw aken so baya a ginawa ko!’ Ka pekabinasa ini rekano langon
a manga pipiya ago manga rarata.
20 Di den perilaan o Allah angkoto a taw. Sokeyaw rekaniyan baden so rarangit ago so
kapanaod o Allah na kitana on so langon a paninta a minisorat sangkai a ribro, na
pepasen o Allah so ngaran angkoto a taw sii ko dalem a doniya.
21 Tendoon sekaniyan o Allah ko langon a mbatabataa sa Israil a kemorkaan o langon a
manga paninta o kapasadan a misosorat sangkai a ribro a Kitab.
22 “So pekatalingoma a manga apid a ndatar so kebabadan rekano ago so manga
mananangga a poon ko manga wawatan a darpa na keilay iran so manga kamoralaan ago
so manga paniyakit a inisiksa o Allah ko inged iyo.
23 Keilay iran a so langon a kalopaan on na miyatotong den a lalangkapen a sandawa ago
timos a da den a ba on mapemola ago da a ba on pegto a apiya so manga otan. Kelagid
oto o manga siti a Sodom ago Gomorah a rakes on a Admah ago Sibowim a piyaminasa o
Allah sii ko tanto a kapekerarangiti ron.
24 Na ipagise o langon o manga nasiyon a ‘Ino aya penggolaolaa o Allah sangkai a
inged? Antonaa i kiyasabapan sangkai a pesokeyaw a mala a rarangit iyan?’
25 “Na aya isembag kiran na ‘Sabap sa tiyalikodan angkoto a manga taw so kapasadan o
Allah a Tohan o manga apo iran a inembaalan iyan mipantag kiran isako miliyo niyan
siran sa Misir.
26 Somiyangor siran ko salakaw a manga tohan na miyanalagad siran on ago sominimba,
a so manga tohan a di iran katawan ago inisapar o Allah a kasimbaa iran on.
27 Sabap roo na mimborngat so gani o Allah sangkai a inged na piyakatana iyan on so
langon a paninta a minisorat sangkai a ribro.
28 Na sii ko minitaralo a kapekerarangiti ko Allah ago so di niyan dii kanggani na biyadot
iyan siran ko inged iran na initaog iyan siran ko ped a inged a ndodoo siran imanto.’
29 “Aden a manga pageemaan o Allah a Tohan tano a da niyan payaga, ogaid na piyayag
iyan rektano so manga sogoan sangkai a kitab kaan tano matoman ago so manga
moriyataw tano sa taman sa pakataman.”
DOTIRONOMIYO 30
Pangni sa Kakesoy ko Allah
“Inosay aken rekano den imanto angkai a manga rakmat ago manga paninta, na amay ka
minitana ini den langon sii rekano na ketanodan iyo angkai a pitero aken sii ko kandodoo
niyo ko manga inged a ron kano initaog o Allah a Tohan iyo.
2 Sa masa oto na o kasoy kano ago so manga wata iyo ko Allah a Tohan iyo sa iklas ko
poso iyo ago iklas ko niyawa niyo ago tomanen iyo so langon a sogoan iyan a ipembegay
aken rekano imanto
3 Na ipengalinggagaw kano o Allah a Tohan iyo na timoon kano niyan a poon ko langon
o manga inged a ron kano niyan minisagomparak, na mbelowin kano niyan peroman a
tetagompiya.
4 Apiya pen o minitaog kano den ko pinakamawatan a darpa ko doniya na timoon kano o
Allah a Tohan iyo na ikesoy kano niyan a poon roo,
5 Ka pagowiten kano niyan ko lopa a kiyabalingan gowani o manga apo iyo na ketangan
iyo peroman. Na pakapetegompiyaan ago pakapendakelen kano niyan a di so manga apo
iyo.
6 Sotin o Allah a Tohan iyo so manga poso iyo ago so poso o manga kebabadan rekano
kaan iyo sekaniyan kabebayai sa iklas ko poso iyo ago iklas ko niyawa niyo kaan kano
pekeoyagoyag.
7 Na itena o Allah a Tohan iyo angkai langon a manga paninta ko manga ridoay niyo a
pekegowad ago pepanatro rekano, na peratiyayaan iyo peroman so Allah a Tohan iyo na
tomanen iyo so langon o manga sogoan iyan a ipembegay aken rekano imanto.
9 Mbelowin kano o Allah a Tohan iyo a tanto a mapiya i bobolos sii ko langon a di niyo
dii nggolaolaan. Mbegan kano niyan sa madakel a wata ago manga pangangayamen ago
mala a pepanga raragon iyo; ka ikebabaya peroman o Allah so kapepakategompiyaa niyan
rekano a lagid mambo o kiyababayaan iyan mapakapetegompiya so manga apo iyo
10 Asar ka peparatiyayaan iyo so Allah a Tohan iyo ago petomanen iyo so manga sogoan
iyan ago manga taritib a minisorat sangkai a ribro a Kitab na o kasoy kano ko Allah a
Tohan iyo sa iklas ko poso iyo ago iklas ko niyawa niyo.
So Kapilia ko Kaoyagoyag o di na Kapatay
11 “Giyangkai a ipesogo aken rekano imanto na kena a ba tanto rekano a maregen o di na
mawatan.
12 Kena a ba ndodoo sa kasorgaan a disomala a ipagise iyo a ‘Antawaa i penik sa
kasorgaan a makawit on sii rektano kaan tano maneg ago matoman?’
13 Kena ini mambo a ba roo ko sabala a ragat a disomala a ipagise iyo a ‘Antawaa i
meripag sa ragat a makawit on sii rektano kaan tano maneg ago matoman?’
14 Ka tanto rekano a marani angkai a manga sogoan a sisii bo ko manga ngari iyo ago sii
ko pamikiran iyo kaan iyo matoman.
15 “Ilaya niyo man, ka piyalad aken rekano sangkai a gawii so kakepilia niyo ko
kamapiyaan ago kaoyagoyag, o di na so kamarataan ago kapapatay.
16 O nggolalanen iyo so ipesogo aken rekano imanto, a so kapekebabayai ko Allah a
Tohan iyo, so kapekedega ko manga lalan iyan ago so kapetomana ko manga sogoan,
manga taritib ago manga kokoman iyan, na keoyagoyag kano ago tanto a pendakel, na
perakmatan kano o Allah a Tohan iyo sii ko lopa a pesongowan iyo a ketangan iyo.
17 Ogaid na o tomalikod so manga poso iyo ago di kano peratiyaya ka ba kano den maagak sa kapesimba ko salakaw a manga tohan ago so kapenalagadi ron
18 Na peyagen ko rekano sangkai a gawii a mataan den a kebinasa kano. Di ketey a
kapeginetaw niyo roo ko lopa ko sabala a Yordan a pesongowan iyo a mapekewali niyo.
19 Na pakapeseksiin ko so kasorgaan ago so doniya sa piyalad aken rekano den sangkai a
gawii so kapilia ko kaoyagoyag o di na so kapapatay, so rakmat o di na so paninta. Na,
pilia niyo so kaoyagoyag kaan kano pekeoyagoyag ago so manga wata iyo!
20 Kabebayai niyo so Allah a Tohan iyo ago paratiyayaa niyo, na kapeti niyo sebenar, ka
sekaniyan i kaoyagoyag iyo, na pekalendon iyan so kapeginetaw niyo sii ko lopa a
inisepa iyan a imbegay niyan ko manga apoapoan iyo a so Ibrahim, Iskak ago so Yakob."
DOTIRONOMIYO 31
Si Yosowa i Pekasambi ko Mosa
Tomiyaros den tero so Mosa ko manga Israil
2 A tig iyan a “Miyakamagatos ago dowa polo ragon a idad aken imanto na di ako rekano
den makapegolowan. Liyo ron pen na pitero raken o Allah a ‘Di ka pekaripag sa lawasaig
a Yordan.’
3 So den so Allah a Tohan iyo i pengonaan rekano ron romipag, na mbinasaan iyan
angkoto a manga nasiyon sii ko kapegantap iyo kiran na pagagaon iyo so lopa iran. Si
mambo si Yosowa na pengonaan rekano romipag a giyoto so pitero o Allah.
4 Na aya penggolaolaan o Allah sangkoto a manga nasiyon na datar o inikidia niyan ki
Sihon ago si Og a so manga dato o manga Amoriyo, isako binasaan iyan siran a rakes o
lopa iran.
5 Peladen siran rekano o Allah na nggolaolaa niyo kiran so langon a inisogo aken rekano.
6 Pakababager kano ago pakawawaraw! Di kano kelek aya pen o ba niyo siran kewanen,
ka so den so Allah a Tohan iyo i moonot rekano. Di kano niyan mbelagen aya pen o ba
niyan talikodi.”
7 Tiyawag o Mosa si Yosowa na pitero iyan on sii ko kamamasaan o langon o manga
Israil a “Pakababager ka ago pakawawaraw, ka seka i makapegolowan sangkai a manga
taw ko kasoled iran ko lopa a inisepa o Allah ko manga apo iran a imbegay niyan kiran,
na seka i pembagibagi kiran on sa kapekewaliya iran on.
8 So den so Allah i pepangonaan rekano, na keped sekaniyan rekano. Di ka niyan den
mbelagen aya pen o ba niyan talikodi. Di ka kelek aya pen o ba ka kadai sa akal.”
So Kabatiyaa ko Kitab
9 Inisorat o Mosa angkai a Kitab na piyalad iyan ko manga imam a manga Libitiyo a aya
pegawid ko Kaban sa Kapasadan o Allah ago sii ko langon a pelokelokesen sa Israil.
10 Na inisogo kiran o Mosa a “Sii ko kakepopos o oman pito ragon sii ko ragon a
kiperilaan ko manga otang sii ko masa a dii kaselaselaa ko Pista ko manga Lawig
11 Na batiyaa niyo angkai a Kitab ko kapekenega on o langon o manga Israil igira a di
siran dii timotimo ko kamamasaan o Allah a Tohan iyo roo ko darpa a piliin iyan a
pesimbaan on.
12 Timoa niyo langon so manga taw a manga mama, manga babay, manga wata ago so
manga mananangga a kibabaling sii ko manga inged iyo kaan iran ai mapakineg ago
masowa so kikaleken ko Allah a Tohan tano ago so katomana piyapiya ko langon a
sogoan sangkai a Kitab.
13 Nggolaolaa niyo ai kaan so manga wata iyo a di iran katawan angkai a Kitab na maneg
iran ago masowa iran so kipekeleken ko Allah a Tohan iyo taman ko kapepaginetaw niyo
sii ko lopa a keripag iyo a Yordan sa katengana niyo ron.”
So Moripori a manga Insarat o Allah ko Mosa
14 Pitero o Allah ko Mosa a “Magaan den makatalingoma so gawii a kapetay ngka.
Tawaga ngka si Yosowa na pangadap kano a dowa sii ko Barombarong a dii Telabokan
kaan aken sekaniyan kainsarati.” Na somiyong so Mosa ago si Yosowa ko Barombarong
na piyakaadap iran on a ginawa iran
15 Na mipeyag kiran so Allah sii ko mapopolaos a gabon a tomitindeg ko poro o gimowa
o Barombarong.
16 Na pitero o Allah ko Mosa a “Magaan ka den matay a kitapi ko manga apo o ka.
Maipos oto na magongkir angkanan a manga taw na pepoonan iran somimba so manga
katohanan o manga rait roo ko inged a pesongowan iran. Telikodan ako iran ago sogoken
iran so kapasadan a pimbaalan aken mipantag kiran.
17 Sa masa oto na pemborngat kiran so gani aken na telikodan aken siran; pegnaan ko
kiran a paras aken na kebinasa siran. Madakel a piyakalekelek a kamoralaan a itomparak
kiran, na ipagise iran sangkoto a masa a ‘Ba kena angkai a manga morala a
minitomparak rektano na sabap den sa kena a ba maaped rektano so Allah?’
18 Na mataan den a pegnaan ko kiran a paras aken sangkoto a masa sabap ko langon a
kamarataan a pinggolaola iran ko kiyapananangorana iran ko salakaw a manga tohan.
19 “Imanto na soraten ka angkai a bayok na go ngka pangendaon ko manga Israil; na
pakimbayoken ka kiran kaan ai mabaloy a peseksi sa kibenar kiran.
20 Pagowiten ko siran ko pekepakayan ago oodaren a lopa a inisepa aken a imbegay aken
ko manga apoapoan iran. Pengangan siran roo ago penga oosog ago penga oolitan, na
amay ka magiyoto na sengor siran ko salakaw a manga tohan ago simbaan iran, na
pesodiin ako iran ago sogoken iran so kapasadan aken.
21 Na amay ka mitomparak kiran so madakel a piyakalekelek a kamoralaan na giyangkai
a bayok na makapeseksi sa kibenar kiran, ka di ini kelipatan o manga wata iran. Ka apiya
imanto ko da ko kiran pen kawita ko inged a inisepa aken a imbegay aken kiran na
katawan aken o antonaa i maniniyat iran.”
22 Na sangkoto den a gawii na inisorat o Mosa angkai a bayok, na inipangendao niyan ko
manga Israil.
23 Samaoto na siyogo o Allah si Yosowa a wata i Non a tig iyan a “Pakababager ka ago
pakawawaraw, ka seka i pekawit ko manga Israil roo ko lopa a minisepa aken kiran, na
keped ako ngka.”
24 Inisorat o Mosa sii ko ribro so langon o manga katero angkai a Kitab a da den a ba
niyan on lipas.
25 Kagiya mapasad iyan ai na ininsaratan iyan so manga Libitiyo a aya pegawid ko Kaban
sa Kapasadan o Allah a tig iyan a
26 “Kowaa niyo angkai a ribro a Kitab na go niyo abain ko Kaban sa Kapasadan o Allah a
Tohan iyo kaan roo matago a aya peseksi sa kibenar ko manga pagtaw niyan.
27 Ka katawan aken so kasosopak iran ago so kategas i olo. Apiya imanto a oyagoyag
ako pen a ped ako iran na somiyopak siran ko Allah, na ay kakitaralo o kasosopak iran
amay ka matay ako!
28 Na pakapengadapa niyo raken so langon a manga olowan ago manga sanasanaan ko
manga mbatabataa rekano kaan aken matero angkai a manga lalag sii ko kapemakinega
iran on ago an aken mapakapeseksi so langit ago so lopa sa kibenar kiran.
29 Ka katawan aken a amay ka maipos so kapetay aken na pekekarata angkai a manga
taw, na keawaan iran so lalan a inisogo aken a kedegen iran; na sii ko pekatalingoma a
manga gawii na tomparakan siran sa kamoralaan, ka pakaperangiten iran so Allah ko
kapenggolaolaa iran sa marata ko kapekeilaya niyan on.”
So Bayok o Mosa
30 Na tiyontol o Mosa so manga katero angkai a bayok ipoon sa poonan na taman sa
kaposan sii ko kapepamakinega on o langon a malilimod a manga Israil:
DOTIRONOMIYO 32
“Lekai ngka a tangila ngka, hey langit, ka petero ako;
Pamakinega ngka, hey lopa, so manga katero o modol aken.
2 Keolog so manga ndao aken a datar o oran;
magetek so manga basa ko a lagid o namog,
ago lagid o tagitim sii ko pelolonaw a manga pamomolan,
ago lagid o tarintik sii ko paotanotan.
3 Pekalangkapen aken so Ingaran o Allah;
podiya niyo so kala o Tohan tano!
4 Sekaniyan i Lakongan; madidiyangka so manga galebek iyan,
na maontol so langon a okitokit iyan.
Tomotoman sekaniyan a Tohan a di den penggolaola sa ribat,
a maontol sekaniyan ago matito.
5 Ogaid na piyakakerata iyo a manga ginawa niyo;
kena den a ba kano mapapatot a kibilang a manga pagtaw niyan;
sekano a madodosa ago mabibibid a nasiyon!
6 Ba giyai i imbadal iyo ko Allah,
hey sekano a lalong a manga taw a da a manga akal iyan?
Ba kena a ba sekaniyan i ama iyo a miyaloy rekano a rek iyan,
a miyaden rekano ago miyakambeken?
7 “Tanodi niyo so miyanga oona a manga gawii,
pamimikirana niyo so miyanga iipos a manga masa.
Isei niyo so manga ama iyo makapantag sii, ka mapetero iran rekano;
Isei niyo so manga pelokelokesen ka mapegosay iran rekano.
8 Isako mbagibagiin o Lebi a Maporo ko manga nasiyon so lopa a mapekewali ran,
isako pakambelabelagen iyan so manga manosiya
na piyanendo iyan so manga temanaan o kakadenan iran
a mipepasod ko kadakel o manga ilangiten a kaaden.
9 Ogaid na so bagian o Allah na so manga pagtaw niyan;
so manga mbawataan o Yakob na aya niyan kawali.
10 “Miyatoon iyan siran roo ko disirto,
sii ko ilang a mitataog a kaden a pesemberan o ndo.
Lininding iyan siran ago tiyagikor;
siniyap iyan siran a datar o taw a mata niyan
11 A lagid o agila a pepangendao ko manga wata iyan ko kalayog
a pekeyaten iyan so manga papak iyan sa kapegalalanga niyan kiran,
a sii niyan siran pepekadaa ko manga apak iyan.
12 So bo so Allah i minggonanao ko manga pagtaw niyan;
da den a katohanan o manga rait a ba kiran miyaped.
13 “Piyakaketas iyan siran ko manga poporo a darpa ko doniya,
na piyakakan iyan siran ko pepamangeto ko manga pangomaan.
Piyageper iyan siran ko gola teneb a poon ko lakongan
ago so lana a poon ko batolakit a ator
14 a rakes o gatas ago mimbetik a gatas
a poon ko manga talon iran a sapi ago kambing
ago so manga kalemboan ko sapo o manga bilibili ago kambing.
Bigan iyan siran sa piyamagaraw a manga mandangan a poon sa Basan
ago so lebi a mapiya a trigo,
na ininom iyo so lebi a mapiya a bago a arak.
15 “Ogaid na kiyaolitan so manga Israil, na somiyopak siran;
mikeolit siran ago miyakalimegas a miyanga oosog sa pangenengken.
Tiyalikodan iran so Tohan a miyaden kiran,
na pisodi iran so Lakongan a somiyabet kiran.
16 Piyakapanaod iran so Allah ko kiyasimba iran sa manga katohanan o manga rait,
na piyakakerangit iran sekaniyan a nggolalan ko piyakasisingay a manga pinggolaola iran.
17 Pisoasoat iran so manga saitan a kena a ba so Tohan,
a so manga katohanan a da iran masimba gowani,
a so manga katohanan a gopen iran kiyatokawi
a da kaleken o manga apo iran.
18 Inindarainon iran so Lakongan a miyaloy kiran a manga wata iyan;
kiyalipatan iran so Tohan a migay kiran sa kaoyagoyag.
19 “Miyailay ai o Allah na tiyalikodan iyan siran
ka piyakakerangit sekaniyan o manga wata iyan a manga mama ago manga babay.
20 Na pitero iyan a ‘Pegnaan ko kiran a paras aken,
na ilain aken o antonaa i ketamanan kiran,
ka kagiya mabibibid siran a manga taw,
a so manga wata a kena a ba kasasanaan.
21 Piyakapanaod ako iran ko kiyasimba iran sa kena a ba Tohan;
piyakakerangit ako iran a nggolalan ko manga barahala iran.
Sabap roo na pakapenaoden aken siran a nggolalan ko manga taw a da aken mabaloy a
rek aken,
na pakaperangiten ko siran a nggolalan ko nasiyon a da a sabot iyan.
22 Miyakabiyag sa apoy so rarangit aken,
penotong ai taman ko pitidaleman ko darpa o miyamatay;
pelameden iyan so doniya ago so langon taman a matatago on,
na penotongen iyan so manga onayan o manga palaw.
23 Indakontor aken kiran so manga tiyoba,
pelenganen aken kiran mamana so manga gasa aken.
24 Kerakowag siran a ongos
na peserakalmaot siran sabap ko panenggaw ago piyakalekelek a manga paniyakit.
Pekisadayan aken siran ko manga iila a binatang,
na pakipenoka aken siran ko manga ala i bisa a nipay.
25 Pematay a pedang so kikatatagoon ko manga lalan,
na kalek a ipematay o siran oto a ndodoo ko soled o walay
a melagid so manga ngongoda a mama ago babay
ago so pen so manga wata ago so manga lokes.
26 Miyapamikir aken a isegomparak aken siran roo ko manga wawatan a darpa
taman sa mapapas so katatademi kiran o manga manosiya.
27 Ogaid na inikawan aken o ba baden di kasaboti o manga ridoay iran so kiyasabapan ko
miyanggolaola
na o ba siran baden makatekabor a mapetero iran a
“So kapaar tano i miyakadaag!
Kena a ba so Allah i minggolaola sii langon!”’
28 “Giya Israil na di pekimosawir a nasiyon ago di pekasabot.
29 O ba siran bo maongangen a kesabotan iran so kiyatabana kiran!
O ba iran bo ketago sa ginawa so keposan kiran!
30 Ino pekataban so sasakataw ko sanggibo kiran,
na ino mapekapalagoy o dowa kataw so sapolo kiran nggibo
o da siran kaawai o Lakongan iran;
o da siran sangkopen o Allah?
31 Ka katawan o manga ridoay tano a so lakongan iran
na kena a ba datar sa kapaar o Lakongan tano.
32 Lagid siran o waged a obas a aya poonan iyan
na so waged a miyapamola sii ko dii mbabasokan sa Sodom ago giya Gomorah.
So manga obas iran na mapait a towa
33 Na so arak a pepekapoon on
na tanto a pakatowa a lagid sa bisa o manga nipay.
34'Ba aken ai langon di tatanodi?' a tig o Allah,
ka matatago ini sii ko taliyong aken.
35 Rek aken so kasaop, na ndenegen aken so siran oto a mapapatot on.
Di ketey na kidolas so ai iran;
marani den so gawii a kakemoralai kiran
na magaan so magaan a kapepekatalingoma ini.
36 “Ka iseop o Allah so manga pagtaw niyan
na ikepedi iyan so manga oripen iyan
amay ka mailay niyan a miyada so bager iran
a da a ba miyalamba a maooripen o di na kena a ba oripen.
37 Ogaid na ipagise kiran daan o Allah a ‘Anda den so manga tohan iyo,
a so lakongan a inapasan iyo,
38 a so manga tohan a komiyan ko kalemboan ko manga ayam a pikorban iyo ron
ago minimon sa arak a inisapaat iyo ron?
Makagemaw siran baden a makaogop rekano
a ba siran den mabaloy a makalinding rekano!
39 “‘Kilalaa niyo imanto a saken den i benar a Tohan a da a rimbang aken.
Saken i pepekapatay ago saken i pepangoyag;
pepekapali ako ago pepamolong;
da a ba pekaagaw a poon ko kapaar aken.
40 Imbayaw aken a lima ko tampar sa langit na isepa aken a
"Mataan ko kaoyagoyag aken sa taman sa pakataman
41 A amay ka garangen aken so pekindat a pedang aken
a pagosaren aken ko kapendadaneg
na seopan ko so manga ridoay aken;
mbadalan ko so pepanga gogowad raken.
42 Pekainomen aken sa rogo so manga gasa aken,
na pekalamed so pedang aken sa sapo
a rakes o rogo o siran oto a piyamono ago so miyanga bibiyag,
ago so manga olo o manga olowan o ridoay."’
43 “Kabebaya kano, hey manga nasiyon, a rakes o manga pagtaw o Allah,
ka iseop iyan so kiyapamonoa ko manga oripen iyan;
seopan iyan so manga soranga iyan,
na iperila iyan so dosa o manga pagtaw niyan
ago sotin iyan so lopa iran.”
44 Na so Mosa ago si Yosowa a wata i Non na tiyontol iran so langon a katero angkai a
bayok ko kapepamakinega on o manga Israil.
So Moripori a manga Insarat o Mosa
45 Kagiya mapasad tero o Mosa so langon angkai a manga ndao o Allah ko langon o
manga Israil
46 Na pitero iyan kiran a “Pamolaa niyo ko manga poso iyo so langon angkai a sogoan a
inibegay aken rekano sangkai a gawii. Na sogoon ka ko manga wata iyo a piyapiyai ran
tomoman so langon a katero angkai a Kitab.
47 Kena ini a ba da a bali niyan rekano a manga insarat, ka aya niyo kaoyagoyag; na
sabap ko kapetomana niyo ron na pekalendo so omor iyo roo ko lopa a ketangan iyo sa
ripag a Yordan.”
So Kapetay o Mosa ko Palaw a Nibo
48 Sii den sangkoto a gawii na pitero o Allah ko Mosa a
49 “Takedeg ka ko kapalawan a Abarim taman ko Palaw a Nibo a sii matatago sa Mowab
a pantag o siti a Yariko, na langkawa ngka so lopa a Kanaan a imbegay aken ko manga
Israil a mapekewali ran.
50 Na roo ka petay sangkoto a palaw a tekedegen ka, na kitapi ka ko manga apo o ka a
datar o pagari ngka a so Aron a miyatay roo sa Palaw a Hor a minitapi mambo ko manga
apo iyan,
51 Ka kagiya sekano a dowa na da ako niyo paratiyayaa sii ko kamamasaan o manga
Israil sii ko ig sa Miribah a marani sa Kadis sii ko disirto a Sin, ka da niyo roo pagadati so
kasosoti aken ko kamamasaan o manga Israil.
52 Sabap roo na kelangkaw ngka baden so lopa sa mawatan, ogaid na di ka pekasoled
sangkoto a inged a imbegay aken ko manga Israil.”
DOTIRONOMIYO 33
Inipangangarapan o Mosa so manga Mbatabataa a Israil
Sa da pen kapatay o Mosa a aya miyapili o Allah na piyayag iyan ko manga Israil so
manga rakmat a imbegay kiran o Allah.
2 Aya pitero iyan na:
“Somiyong sii so Allah a poon sa Palaw a Sinay;
somibang sekaniyan a lagid o alongan sii sa Idomiya;
poon sa Palaw a Paran na somininar sekaniyan ko manga taw niyan.
Miyakaoma sekaniyan a oonotan o bariboribo a manga malaikat
a aden a pesokeyaw a apoy a sisii sa kawanan iyan.
3 Matamataan a pekebabayaan o Allah so manga pagtaw niyan;
lilindingen iyan so langon a manga kaom iyan.
Pepamanodiyod siran ko hadapan o manga ai niyan
a peterima sa manga insarat iyan
4 A so Kitab a inibegay rektano o Mosa
a aya kawali o manga mbawataan o Yakob.
5 So Allah na aya dato o manga Israil
isako malilimod so manga olowan o manga taw ago so manga mbatabataa a Israil.”
6 Na aya pitero o Mosa makapantag ko mbatabataa a Robin na
“Pengnin ko a makapegoyag so Robin a di petay
aya pen o ba makaito so manga moriyataw niyan.”
7 Makapantag ko mbatabataa a Yodah na aya pitero o Mosa a
“Pakinega ngka, ya Allah, so pangni o Yodah;
tapiin ka siran ko ped a manga mbatabataa.
Pakabagera ngka siran sa kipetindegen iran ko kabenar iran
na tabangi ngka siran makataban ko manga ridoay iran!”
8 Makapantag ko mbatabataa a Libi na pitero o Mosa a
“So Tomim ago so Orim a pegosaren sa kaketokawi ko kabaya a ka, ya Allah,
na inibegay ngka ko mapaparatiyaya a manga oripen ka a manga Libitiyo.
Tipengan ka siran roo sa Masah,
na pimbongetan ka siran roo ko ig sa Miribah.
9 Da iran tagoa sa ginawa so manga lokes iran,
ago da iran pagongowi so manga pagari ran
aya pen o ba iran piyangarga so tito a manga wata iran,
ka ininggolalan iran baden so manga sogoan ka,
na da iran sogoka so kapasadan ka.
10 Ipengendao iran so manga kokoman ka ko manga mbawataan o Yakob
ago so kitab ka ko manga Israil;
Sepaat siran sa doka ko kamamasaan ka,
ago so petotongen a manga soasoat sii ko aparan ka.
11 Rakmati ngka, ya Allah, so langon taman iran,
na tarimaa ngka so manga galebek iran.
Sasaa ngka so siran oto a romirido ago pepanga gogowad kiran
kaan siran di den makapembangon.”
12 Makapantag ko mbatabataa a Baniyamin na pitero o Mosa a
“So pekebabayaan o Allah na pekakaden a da a pekakaid on sii ko obay niyan.
Pelindingen siran o Allah ko mababasa alongan,
na sii sekaniyan mababaling ko pageletan o manga waga iran.”
13 Makapantag ko mbatabataa a Yosop na pitero o Mosa a
“Pengnin ko a karakmatan o Allah so lopa iran
sa mala i kipantag a oran ago namog a poon ko langit
ago so manga ig a matatago ko didalem o lopa
14 Ago so lebi a manga pipiya a onga a pepakatoon o alongan
ago so manga pipiya a pekeaden iyan on ko oman saolan,
15 A karakmatan pen so lopa iran sa tindos a manga pereperan
sii ko miyatey den a manga kapalawan
ago so mala i arga a pepanga raragon sii ko dayon sa dayon a manga bobongan
16 Ago so lebi a manga pipiya a pamemegayan o lopa
ago so langon taman a matatago on,
ago so limo o Allah a mitero a poon ko look o pekedeg a kayo.
Pengnin ko a makatana angkai a manga rakmat ko olo o Yosop,
sii ko beneng o mama a aya olowan ko manga pagari niyan.
17 Mabager sekaniyan a lagid o mangoda a mama a sapi,
na so manga panga niyan na lagid o panga o maila a todo
a aya niyan kisidong ko manga nasiyon taman ko pirowarowangan o doniya;
na so manga panga niyan na so bariboribo a manga taw sa Ipraim
ago so nggibonggibo a manga taw sa Manasih.”
18 Makapantag ko mbatabataa a Sibolon ago si Isakar na pitero o Mosa a
“Kabebaya ka baden, hey Sibolon, sii ko di ngka dii kapelayalayag,
ago seka mambo, Isakar, san ko manga barombarong ka!
19 Penawagen iran so manga taw sa kasong iran ko palaw
a ron siran sepaat sa patot a manga soasoat,
ka kowaan iran so madakel a tamok a poon ko peragatan,
ago so manga kakawasaan a igagadong sii ko disirto.”
20 Makapantag ko mbatabataa a Gad na aya pitero o Mosa na
“Podin so Allah a pepekaolad ko lopa a masesakop o Gad!
Magaayan so Gad a lagid o arimaw
sa kapekanga niyan ko barokan o di na olo o kesikem iyan.
21 Inipili iran a ginawa iran sa lebi a mapiya a lopa,
ka inisenggay kiran so bagian a olowan,
Igira a pekelimod so manga olowan o manga taw
na ininggolalan iran so maontol a kabaya o Allah
ago tiyoman iran so manga kokoman iyan mipantag ko Israil.”
22 Makapantag ko mbatabataa a Dan na aya pitero o Mosa na
“So Dan na mangoda a arimaw;
peseday sekaniyan a poon sa Basan.”
23 Makapantag ko mbatabataa a Naptali na pitero o Mosa a
“Tanto kano a pekesoat o limo o Allah
ago mapepeno pen a manga rakmat iyan.
Ketangan iyo so lopa sa tampar sa sedepan ago sa pagabagatan.”
24 Makapantag ko mbatabataa a Asir na aya pitero o Mosa na
“Lebi a rarakmatan so Asir a di so ped a manga mbatabataa;
pengnin ko a ikabebaya sekaniyan o manga pagari niyan,
ago isindot iyan so ai niyan ko lana.
25 So manga tanggal o manga pintoan ka na kembaalan a potaw ago tombaga,
na mabager ka den ko tenday a omor ka.”
26 “Da den a ba datar o Tohan ka, hey manga Israil
a peketas sa langit sa katebangi niyan rekano,
a meeda ko manga gabon sii ko bantogan iyan!
27 So da a poonan iyan ago da a kaposan iyan a Tohan
na aya niyo pekeapasan,
na sasalapidaon kano o da a kaposan iyan a manga barokan iyan.
Piyamogaw niyan so manga ridoay niyo sii ko kapegantap iyo kiran
a pitero iyan a ‘Binasaa niyo siran!’
28 Peginetaw so manga Israil sa da a ba kiran pekabinasa a mawatan ko kamarataan;
pekakaden so manga mbawataan o Yakob
ko lopa a mapepeno a pereperan ago bago a arak
a ron pegetek so namog a poon sa langit.
29 Tanto ka a mapipiya i ginawa, hey Israil!
Antawaa i datar iyo, hey manga taw a siyabet o Allah?
Sekaniyan i kelong iyo ago salinggogopa
ago kababantogan a pedang iyo.
Pekakipes so manga ridoay niyo ko hadapan ka,
na ndapodapoan iyo so manga likod iran.”
DOTIRONOMIYO 34
So Kiyapatay o Mosa
Ipoon ko kapantaran sa Mowab na tomiyakedeg so Mosa ko Palaw a Nibo taman ko poroporo o Palaw a Pisgah ko masesebangan a Yariko, na piyakiilay rekaniyan o Allah so
langon o lopa ipoon sa Giliyad na taman den sa Dan
2 Ago so dalem a lopa o Naptali, so lopa o Ipraim ago Manasih ago so langon o lopa o
Yodah taman den ko Ragat a Miditiraniyo roo sa sedepan
3 Ago giya Nigib a lopa sa pagabagatan a Yodah, ago so kapantaran a Yariko a so siti o
manga kayo a korma na taman den sa Sowar.
4 Na pitero rekaniyan o Allah a “Giyai so lopa a inisepa aken ko Ibrahim, Iskak ago so
Yakob a imbegay aken ko manga moriyataw iran. Piyakiilay aken reka den, ogaid na di
ka on pekasong.”
5 Na miyatay so Mosa a so oripen o Allah sa inged a Mowab a giyoto den so miyatero o
Allah.
6 Inilebeng sekaniyan o Allah roo ko balintad sii sa inged a Mowab ko mipepantag o siti
a Bit. Ogaid na apiya taman imanto na da den a ba matao o anda matatago so lebeng
iyan.
7 Miyakamagatos ago dowa polo ragon a idad o Mosa isako matay, na da makalobay so
kailay o manga mata niyan aya pen o ba kiyadai sa bager so lawas iyan.
8 So manga Israil na pindiyagaan iran so Mosa ko miyakatelo polo gawii sii ko
kapantaran sa Mowab taman sa miyapopos den so manga gawii a dii kandidiyagaw ago
kamboko.
9 Si Yosowa a wata i Non na mapepeno a ongangen a poon ko Roh o Allah ka kagiya
kiyadapenetan sekaniyan o Mosa isako mitoro iyan a pekasambi on.
Kagiya ka maoto na pepekinegen sekaniyan o manga Israil a petomanen iran so manga
sogoan a inibegay kiran o Allah a nggolalan ko Mosa.
10 Ipoon roo na da den a nabi a miyakagemaw sii sa Israil a ba datar o Mosa a
minimbitiyarai o Allah a makapageedapa siran.
11 Da a ped a nabi a ba miyakanggolaola sa manga nanao ago mala i kabarakat a galebek
a datar o inisogo on o Allah a penggolaolaan iyan sa Misir sii ko Piraon ago so langon a
manga sanasanaan iyan ago sii ko dalem a inged iyan.
12 Da a ba datar o Mosa a mala i kapaar ko langon a mala ago piyakalekelek a
pinggolaola niyan sii ko kamamasai ron o langon a manga Israil.
YOSOWA
YOSOWA 1
So Sogoan o Allah ki Yosowa
Sii ko oriyan o kiyapatay o Mosa a so oripen o Allah na miyakimbitiyarai so Allah ko
salinggogopa o Mosa a si Yosowa a wata i Non
2 A tig iyan a “Miyatay so Mosa a oripen
aken. Na paninimo kano imanto a seka ago so langon angkai a Israil na ripag kano ko
Lawasaig a Yordan sa kasoled iyo ko lopa a imbegay aken kiran.
3 Minitopa ko ko Mosa a so oman i darpa a kedapoan iyo na imbegay aken rekano
4 Ipoon ko disirto sa pagabagatan taman sa Libanon sii sa pagotaraan, na ipoon sa mala a
Lawasaig a Yopratis sii sa sebangan na taman den ko Ragat a Miditiraniyo sii sa sedepan
a rakes on so dalem a inged o manga Hitiyo.
5 Da den a ba makapemayandeg ko hadapan ka, Yosowa, sii ko tenday o kaooyagooyag
ka. Datar o kaaped aken ko Mosa na keped ako reka mambo. Di aken seka den mbelagen
aya pen o ba ko seka talikodi.
6 “Pakababager ka ago kekawaraw, ka seka i makapegolowan sangkai a manga taw sa
kapekewaliya iran ko lopa a inisepa aken ko manga apoapoan iran a imbegay aken kiran.
7 Pakababager ka ago tanto a kekawaraw! Nggolalanen ka piyapiya so langon o kitab a
inibegay reka o Mosa a oripen aken. O ba ka on silay sii sa kawanan o di na sa diwang
kaan ka makapiya i bobolos apiya anda ka song.
8 Di ngka pendarainonen so kapepangadii ngka sangkai a ribro a kitab; pepamimikirana
ngka ini sa gagawii daondaw kaan ka minggolalan piyapiya so langon taman a misosorat
on. Amay ka magiyoto na petegompiya so kapepaginetaw ngka na pepakapiya ka i
bobolos.
9 Ba ko reka da sogoon a ‘Pakababager ka ago kekawaraw’? Di ka kelek aya pen o ba ka
kadai sa akal, ka so Allah a Tohan ka na keped reka apiya anda ka song.”
Ininsaratan i Yosowa so manga Israil
10 Mandiyadi na ininsaratan i Yosowa so manga olowan o manga taw a tig iyan a
11 “Pagenebeneba niyo so kampo na teroa niyo ko manga taw a ‘Tiyagar kano sa manga
pelotoon iyo, ka amay ka makatelo gawii na pemakaripag kano ko Lawasaig a Yordan sa
kasoledi niyo ago katengana ko lopa a imbegay rekano o Allah a Tohan iyo a mapekewali
niyo.’ ”
12 Ogaid na so peman so mbatabataa Robin, so mbatabataa Gad ago so sabaad ko
mbatabataa Manasih na pitero kiran i Yosowa a
13 “Tatanodi niyo so pitero rekano o Mosa a oripen o Allah a ‘Inibegay rekano o Allah a
Tohan iyo angkai a lopa sii sa sebangan a Yordan a aya niyo kebalingan.
14 So manga karoma niyo ago manga wata ago so manga pangangayamen iyo na
makapetelimbegak sii sangkai a lopa a inibegay rekano o Mosa. Ogaid na so langon a
manga sondaro niyo na disomala a ripag siran a kikagogomaanan ko maoonaan o manga
pagari niyo kaan iran siran katabangi
15 Taman sa matangan iran mambo so lopa a imbegay kiran o Allah a Tohan iyo ago
mapakabaling siran roo a lomilintad a datar o inikidia niyan rekano. Oriyan oto na
pekakasoy kano den a makapeginged sangkai a lopa ko masesebangan a Yordan a
inibegay rekano o Mosa a oripen o Allah.”
16 Na somimbag siran ki Yosowa a tig iran a “Ipenggolalan ami so langon taman a
inisogo o ka rekami, na song kami ko apiya anda kami ngka pekasongowa.
17 Peratiyayaan ami seka a datar o kiyaparatiyayaa mi ko Mosa. Na pengnin ami na
maped reka so Allah a datar o kiyaped iyan ko Mosa.
18 Apiya antawaa i somopak ko peteroon ka a di niyan inggolalan so langon taman a
isogo o ka na mbonoon. Na, pakababager ka baden ago kekawaraw!
YOSOWA 2
Piyakipanoriman i Yosowa a Yariko
Samaoto na somiyogo si Yosowa sa dowa kataw a mama a poon ko kampo iran sii sa
Akasiya sa kapakapanoriman iran sa masolen a tig iyan a “Lalakaw kano na go niyo
pangilaya so lopa ko sabala a lawasaig a Yordan a ba di labaw ron so siti a Yariko.” Na
lomiyalakaw siran den na miyakaoma ko walay o isa a sondal a aya ngaran iyan na si
Rahab na miyolos siran roo.
2 Na miyatero ko dato sa Yariko a “Hey dato, aden a manga mama a poon ko manga
Israil a miyakaoma sii imanto a kagagawii sa kaperiksaa iran sangkai a inged tano!”
3 Na piyakiwit o dato angkai a katero ki Rahab a “Peliliyon ka so manga mama a
miyakaoma reka a miyolos ko walay ngka, ka aya inisong iran sii na periksaan iran so
dalem a inged.”
4 Ogaid na initapok o babay so dowa kataw a mama, na inisembag iyan a “Benar a aden a
miyakaoma raken a manga mama, ogaid na di aken katawan o anda siran poon.
5 Kagiya merimon ko oras a kapelekebi ko pintoan o siti na lominiyo siran na di aken
katawan o anda siran miyantap. Na, talokoni niyo nggagaan ka baanda niyo peraota!”
6(Ogaid na inipanik siran den i Rahab roo ko atep o walay ka piyagna iyan sii ko didalem
a ragami a kiyayar iyan roo.)
7 Mandiyadi na gomiyanat so manga siyogo o dato sa kapengilobaa iran ko manga
manonoriman sii ko lalan a ipesong ko kilid o lawasaig a Yordan; na so den so kiyaipos
iran na likeban so pintoan o siti.
8 Sii ko da pen kapakatorog o manga manonoriman ko kagagawii na miyanik kiran si
Rahab ko atep ka makipembitiyarai kiran.
9 “Katawan aken a inibegay rekano o Allah angkai a lopa,” a tig iyan, “na riyaot kami o
mala a kalek rekano, na so langon a kibabaling ko inged na pepananabaden sabap rekano.
10 Miyaneg ami o andamanaya i kiyapakamarai o Allah ko Mariga a Ragat isako
makaliyo kano sa Misir. Miyaneg ami pen so inikidia niyo ki Sihon ago si Og a so dowa
a manga dato o manga Amoriyo roo sa sebangan a Yordan a bininasa niyo sa tarotop.
11 Na so den so kiyanega mi sii na miyateno sa kalek so manga poso ami na kiyadaan
kami langon sa kawaraw sabap rekano, ka so Allah a Tohan iyo na aya Tohan sii sa
kasorgaan ago sii sa doniya.
12 Kapedipedi kano bo na sepaan iyo raken imanto sii ko Ingaran o Allah a sabap sa
inikalimo aken sekano na ikelimo iyo mambo so pamiliya ko. Begi ako niyo sa kasarigan
13 Sa pakapagoyagen iyo so ama ago so ina aken, so manga pagari aken a manga mama
ago manga babay, ago so langon a manga pamiliya iran! Pakalidasa kami niyo ko
kapatay!”
14 Na pitero on o manga mama a “So niyawa mi na ipelinding ami ko niyawa niyo! O di
ngka peyaga angkai a di ami dii nggolaolaan sii na pepiyapiyaan ami sekano ago
ipeginontolan amay ka ibegay rekami o Allah angkai a lopa.”
15 Mandiyadi na piyamakateyoton iyan siran ko tali sii ko dirowasa, ka so walay i Rahab
na maoonay ko keleb a mililibet ko siti.
16 “Agaw kano ko kapalawan,” a tig iyan kiran, “ka o ba kano baden matoon o manga
siyogo o dato a di rekano dii mbanog. Pagna kano roo sa mamakatelo gawii taman sa
makakasoy siran, na go kano bo taros ko lalakaw niyo.”
17 Na pitero on o manga mama a “Aya bo a kakitomanen ami sangkai a sapa a piyakisepa
ka rekami
18 Amay ka soled kami sangkai a inged na o miiket ka angkai a mariga a tali a mabitin
sangkai a dirowasa a tiyayotonan ka rekami. Pakasosoleden ka mambo ko walay ngka so
ama ago so ina a ka, so manga pagari ngka ago so langon o pamiliya o ama a ka.
19 O aden a lominiyo ko walay ngka a sisii sekaniyan ko lalan na sekaniyan i kilalag ko
kapetay niyan a kena ini a ba rekami kisala. Na so peman so apiya antawaa i
makasosoled ko walay a ped ka na sekami i matao ko kapetay niyan o aden a pekabono
on.
20 Ogaid na o panotola ngka ko apiya antawaa so di ami dii nggolaolaan na kepokas kami
ko piyakisepa a ka rekami.”
21 “So pitero iyo i mipenggolalan,” a tig o babay, na piyakalalakaw niyan siran den.
Kagiya maipos siran na iniiket iyan so mariga a tali ko dirowasa.
22 Somiyong so manga mama ko kapalawan na mitepok siran roo. So manga siyogo o
dato na pimbabanog iran siran ko soled o miyakatelo gawii ko dalem angkoto a darpa
ogaid na da iran matoon, na komiyasoy siran sa Yariko.
23 Oriyan iyan na tomiyondagay so dowa kataw a manonoriman ko kapalawan na
rominipag siran ko lawasaig ka komiyasoy ki Yosowa. Piyanotol iran on so langon taman
a miyanggolaola iran
24 Na pitero iran on pen a “Mataan den a piyalad rektano o Allah so dalem angkoto a
inged, ka so langon a kibabaling on na tanto a pepanga alek sabap rektano.”
YOSOWA 3
So Kiyaripag sa Yordan
Teked a kapipita na mimbowat si Yosowa ago so langon o manga Israil na gomiyanat
siran sa Akasiya sa kasong iran ko kilid o Lawasaig a Yordan, na mikempo siran roo ko
da iran pen karipag.
2 Kagiya mapopos so telo gawii na miyagenebeneb so manga olowan ko kampo
3 Na ininsaratan iran so manga taw a tig iran a “Anda den i kailaya niyo ko Kaban sa
Kapasadan o Allah a Tohan iyo a aawidan o manga imam a manga Libitiyo na ganat kano
poon ko katatagoan rekano na go niyo tondoga.
4 Giyanan i kaketokawi niyo o anda kano pagokit ka kagiya da kano sii pen makasong.
Ogaid na di kano pegobay ko Kaban; aawata niyo baden sa manga isa ka kilomitro.”
5 Na pitero i Yosowa ko manga taw a “Sotiya niyo a manga ginawa niyo, ka mapita na
penggolaola so Allah sa manga piyakamemesa sii rekano.”
6 Kagiya mapita na pitero i Yosowa ko manga imam a “Awidi niyo so Kaban sa
Kapasadan na go kano den lalakaw ko maoonaan o manga taw.” Na inawidan iran na
lomiyalakaw siran a pepangonaan ko manga taw.
7 Na pitero o Allah ki Yosowa a “Sangkai a gawii na pagepoonan aken a kipengkaten
aken reka ko kapekeilaya reka o langon o manga Israil kaan iran katokawi a ped ako
reka a datar o kiyaped aken ko Mosa.
8 Teroa ngka ko manga imam a pegawid ko Kaban sa Kapasadan a ‘Amay ka makaoma
kano ko kilid o lawasaig a Yordan na lakad kano den ko ig na tareg kano a marani bo ko
kilid iyan.’
9 Na pitero i Yosowa ko manga Israil a “Song kano sii na go niyo pamakinega so
peteroon o Allah a Tohan iyo.
10 Ketangked iyo a mbogaon iyan so manga Kanaaniyo, manga Hitiyo, manga Hibiyo,
manga Pirisiyo, manga Girgasiyo, manga Amoriyo ago so manga Hibosiyo sii ko
kapegantap iyo kiran na ketokawan iyo a maaped rekano so Oyagoyag a Tohan
11 Amay ka mailay niyo so Kaban sa Kapasadan o Kadnan o dalem a doniya a
pepangonaan rekano somong sii sa Yordan!
12 Na pamili kano imanto sa sapolo ago dowa kataw a mama a sesakataw ko oman i
mbatabataa manga Israil.
13 So den so kandapo o manga imam a pegawid ko Kaban o Allah a so Kadnan o dalem
a doniya sii ko lawasaig a Yordan na tereg tomoga so ig a pepakapoon sa raya, na
pepondo ini ko isa a darpa."
14 Mandiyadi na kagiya gomanat so manga taw poon ko kampo sa kaperipag iran sa
Yordan na pepangonaan kiran so manga imam a pegawid ko Kaban sa Kapasadan.
15 Ragonan oto a kaperagon na dii mbagiyaw a Yordan. Ogaid na so den so kiniseko o
manga ai o manga imam ko ig sii ko kilid o lawasaig
16 Na tomiyareg tomoga so ig na mipondo sa mawatan sa raya sii sa Adam a so siti a
marani sa Saritan. Na so ig a pegondas sa lilod ko Maatay a Ragat na tarotop a kiyada
iyan, na rominipag so manga taw ko lawasaig ko pantag o siti a Yariko.
17 So manga imam a pegawid ko Kaban sa Kapasadan o Allah na tomiyareg lomalakaw
ko look a Yordan na tomitindeg siran roo sii ko mamara a lopa taman sa miyamanagad
kiran so langon o manga Israil, na palaya siran den miyakaripag sa Yordan sii ko mamara
a lopa.
YOSOWA 4
So manga Ator a Ipenanadem
Sii ko kiyapakaripag o langon o manga taw sa Yordan na pitero o Allah ki Yosowa a
2 “Pamili ka sa sapolo ago dowa kataw a manga mama a sesakataw ko oman i mbatabataa
3 Na teroa ngka kiran a ‘Kowa kano sa sapolo ago dowa a manga ator sii ko titindegan o
manga imam ko look a Yordan na pangawidi niyo na go niyo pametaden ko darpa a
pekempowan iyo sangkai a kagagawii.’
4 Mandiyadi na tiyawag i Yosowa so sapolo ago dowa a mama a piyamili iyan a
sesakataw ko oman i mbatabataa
5 Na pitero iyan kiran a “Song kano ko look a Yordan ko katatagoan ko Kaban sa
Kapasadan o Allah a Tohan iyo. So oman i isa rekano na kowa on sa ator a satiman bo a
posain iyan a aya kadakel iyan na lagid sa kadakel o manga mbatabataa manga Israil.
6 Kebaloy ai a ipenanadem sii rekano ko pinggolaola o Allah, na sii ko pekatalingoma a
manga gawii amay ka ipagise rekano o manga wata iyo a ‘Antonaa i maana angkai a
manga ator?’
7 Na teroa niyo kiran a tomiyareg tomoga so lawasaig a Yordan isako iripag on so Kaban
sa Kapasadan o Allah. Na giyangkai a manga ator na ipepananadem ko manga Israil sa
taman sa pakataman.' "
8 Na ininggolalan o manga Israil so inisogo kiran i Yosowa. Kominowa siran sa sapolo
ago dowa a ator ko look a Yordan a sesatiman ko oman i mbatabataa manga Israil, na
inawidan iran ko darpa a pekempowan iran na inipametad iran roo.
9 Mitad mambo si Yosowa sa sapolo ago dowa a ator sii ko look a Yordan sii den ko
katitindegan o manga imam a pegawid ko Kaban sa Kapasadan, na ndodon den taman
imanto.
10 Da den pagalin so manga imam ko look a Yordan taman sa mininggolalan den so
langon taman a manga insarat o Allah a inibegay o Mosa ki Yosowa a peteroon iyan ko
manga taw. Na minggagaan romipag so manga taw ko lawasaig
11 Na kagiya makaripag siran langon na so manga imam a pegawid ko Kaban o Allah na
tomiyaros roo ko sabala o lawasaig a mbabantayan siran o manga taw.
12 So kagogomaanan a manga mama a ped ko mbatabataa Robin ago Gad ago so sabaad
ko mbatabataa Manasih na rominipag siran a pepangonaan ko ped a manga Israil ka
giyoto so iniinsarat kiran o Mosa.
13 Manga pat polo nggibo siran a makatitiyagar makitidawa a rominipag sii ko
kamamasai ron o Allah, na miyakaoma siran ko kapantaran a marani sa Yariko.
14 Sangkoto a gawii na inipangkat o Allah si Yosowa ko kapekeilaya on o langon o
manga Israil, na piyagadatan iran sekaniyan ko tenday a omor iyan a datar o kiyapagadati
ran ko Mosa.
15 Na pitero o Allah ki Yosowa a
16 “Teroa ngka ko manga imam a pegawid ko Kaban sa Kapasadan o Allah a gakap siran
ko Yordan.”
17 Pinggolaola ini i Yosowa
18 Na so den so kiyapakagakap on o manga imam a so den so kiyapakadapo iran ko
pangeba na miyakaasal so ig sa Yordan na miyakaondas a di niyan dii mbagiyawan so
manga pangeba on a datar gowani.
19 Rominipag so manga taw sa Yordan sii ko ikasapolo gawii ko paganay a olanolan, na
mikempo siran sa Gilgal ko masesebangan a Yariko.
20 Roo inampir i Yosowa sa Gilgal angkoto a sapolo ago dowa a ator a miyakowa a poon
sa Yordan.
21 Na pitero iyan ko manga Israil a “Sii ko pekatalingoma a manga gawii amay ka ipagise
rekano o manga wata iyo o antonaa i maana angkai a manga ator
22 Na teroa niyo kiran a rominipag so manga Israil sa Yordan a lomiyalag ko mamara a
lopa.
23 Ka so Allah a Tohan iyo na piyakamaraan iyan so lawasaig a Yordan ko hadapan iyo
taman ko kiyaripag iyo ron a datar o inikidia niyan ko Mariga a Ragat a piyakamaraan
iyan ko hadapan tano taman ko kiyaripag tano ron.
24 Pinggolaola niyan ai kaan katokawi o langon a taw ko doniya a mabager so lima o
Allah ago an iyo lalayon pekeleken so Allah a Tohan iyo.”
YOSOWA 5
So langon a dato o manga Amoriyo ko masesedepan a Yordan ago so langon a dato o
manga Kanaaniyo sii ko kilid a ragat na isako maneg iran o andamanaya i kiyapakamarai
o Allah ko lawasaig a Yordan ko hadapan o manga Israil taman ko kiyaripag iran on na
miyanga teteno so manga poso iran sa kalek na kiyadaan siran den sa kawaraw sabap ko
manga Israil.
So Kiyapanoria ko manga Mama sii sa Gilgal
2 Sa masa oto na pitero o Allah ki Yosowa a “Mbaal ka sa manga gelat a batolakit na go
ngka panoria peroman so manga Israil.”
3 Mandiyadi na mimbaal si Yosowa sa manga gelat a batolakit na piyanori iyan so manga
Israil sii sa GibiyatHaaralot.
4-5 Aya kiyapanoria niyan kiran na sabap sa isako makaawa so manga Israil sa Misir na
palaya miyatori so manga mama a kepakay a makasondaro ogaid na miyamatay siran
langon sii ko kiyapagenebeneb iran ko disirto. Na da pen matori so langon a manga
mama a sii inimbawata ko disirto ko oriyan o kiyapakaawa iran sa Misir.
6 Ka miyakapat polo ragon a dii kapagenebeneb o manga Israil ko disirto taman sa palaya
den miyamatay so langon a manga mama a kepakay a makasondaro isako mawa siran sa
Misir ka kagiya da iran paratiyayaa so Allah. Na inisepa kiran o Allah a di iran den keilay
so lopa a inisepa iyan ko manga apo iran a imbegay niyan rektano, a so lopa a
pekepakayan ago oodaren.
7 Na so manga wata a manga mama angkai a manga taw na aya miyapanori i Yosowa, ka
da siran pen ai mapanori sii ko disirto a giyoto so manga taw a piyamakala o Allah a
minisambi ko manga lokes iran.
8 Kagiya matori so langon a manga mama na tomiyareg siran ko kampo taman sa
miyamakapiya.
9 Pitero o Allah ki Yosowa a “Imanto a gawii na piyokas aken rekano so kaaayai rekano
a minisabap ko kiyapangongoripena rekano roo sa Misir.” Sabap roo na bitowan
angkoto a darpa sa Gilgal taman den imanto.
10 Sii ko kakekampo o manga Israil sa Gilgal sii ko kapantaran a marani sa Yariko na
piselasela iran so Pista a Paska sii ko kaperimon ko ikasapolo ago pat gawii ko olanolan.
11 Kagiya mapita ko kiyaipos o Paska na sii den sangkoto a gawii na komiyan siran ko
miyaragon sangkoto a inged, a so iniyaw a kamais ago paan a da a tapay ron.
12 Ipoon sangkoto a gawii a kiyakan iran ko miyaragon sangkoto a inged na minitareg so
roti na da den ai makan peroman o manga Israil, ka pekan siran ko pepanga raragon ko
inged a Kanaan.
Si Yosowa ago so Mama a Mabibibit sa Pedang
13 Sa masa oto a marani si Yosowa sa Yariko na miyangilailay sekaniyan na miyailay
niyan a mama a tomitindeg ko kasasangoran iyan a bibindasen iyan so pedang iyan.
Somiyong on si Yosowa na inisean iyan a tig iyan a “Tampil ka rekami o di na sii ko
manga ridoay ami?”
14 “Da a ba ko tatampilan,” a tig iyan, “ka sisii ako den a komandir o manga sondaro o
Allah!”
So kiyanega niyan sii na gomipe si Yosowa ko lopa sa kasimbaa niyan on a taros a tig
iyan a “Oripen ako ngka, sir. Antonaa i peteroon ka raken, Kadnan ko?”
15 Somimbag so komandir o manga sondaro o Allah a tig iyan a “Ndai ngka on so manga
tinilas ka ka soti so darpa a katitindegan ka.” Na pinggolaola ini i Yosowa.
YOSOWA 6
So Kiyatabana sa Yariko
Pakabebegeran a kalelekebi ko gimowa o siti a Yariko sabap ko kalek o manga taw ron
ko manga Israil. Da den a ba pekaliyo ago da den a ba pekasoled.
2 Na pitero o Allah ki Yosowa a “Ilaya ngka, ka piyalad aken den a Yariko ko lima ngka
a rakes on so dato on ago so manga wawaraw a sondaro niyan.
3 Seka ago so langon o manga sondaro ngka na lalakaw kano a pegalibeten iyo so siti sa
makaisa ko oman gawii sii ko soled o nem gawii.
4 Sogo ka sa pito kataw a manga imam a melalakaw a mangongonaan ko Kaban sa
Kapasadan a maawid so oman i isa kiran sa bogiyong. Sii ko ikapito gawii na alibeta
niyo so siti sa makapito a misasarta on so kapepakaoniya o manga imam ko manga
bogiyong.
5 Na anda den i kanega niyo ko matanog ago malayat a kiyapakaoniya iran ko manga
bogiyong na sartaan on o langon o manga taw so matanog a kapelalalis, na keoteng den so
keleb a mililibet ko siti! Na giyoto a pamantek den somoled so langon o manga sondaro.”
6 Na tiyawag i Yosowa so manga imam na pitero iyan kiran a “Awidi niyo so Kaban sa
Kapasadan na pakaawida niyo so pito rekano sa pito a bogiyong a melalakaw siran ko
maoonaan o Kaban o Allah."
7 Na giyoto a siyogo iyan so manga taw a tig iyan a “Ganat kano den! Alibeta niyo so siti
a so kagogomaanan a manga mama a pepangonaan ko Kaban o Allah.”
8 Kagiya makimbitiyarai si Yosowa ko manga taw na so pito kataw a imam a maawid sa
pito a bogiyong na gomiyanat lomalakaw ko kamamasai ron o Allah a pepakaonin iran so
manga bogiyong a tomotondog kiran so manga imam a pegawid ko Kaban sa Kapasadan
o Allah.
9 So kagogomaanan a manga mama na pepangonaan ko manga imam, na aden mambo a
manga gordiya a tomotondog ko Kaban, na misasarta on so kapepakaoniya ko manga
bogiyong.
10 Ogaid na miyapando den i Yosowa so manga taw a tig iyan a “O ba kano pelalalis o di
na ba niyo pakatanoga so manga lagam iyo aya pen o ba aden a peteroon iyo a sataga bo
taman sa di aken rekano isogo a pelalalis kano, na go kano bo pelalalis!”
11 Na piyakialibet iyan so Kaban o Allah ko siti sa miyakaisa. Oriyan iyan na komiyasoy
siran ko kampo na domike siran roo ko kiyagagawii niyan.
12 Teked a kapipita na mimbowat si Yosowa na inawidan o manga imam so Kaban o
Allah.
13 So pito kataw a imam a kiaawid ko pito a bogiyong na lomiyalakaw a maoonaan o
Kaban o Allah a pepakaonin iran so manga bogiyong. Pepangonaan kiran langon so
kagogomaanan a manga mama a tomotondog siran mambo ko Kaban o Allah a misasarta
on so kapepakaoniya o manga imam ko manga bogiyong.
14 Sii sangkoto a ikadowa gawii na inalibet iran peman so siti sa miyakaisa, na
komiyasoy siran bo ko kampo. Pinggolaola iran ai ko soled o nem gawii.
15 Sii ko ikapito gawii na mimbowat siran ko teked a kapipita na inalibet iran so siti a
lagid bo o pesowaan iran, ogaid na sangkoto a gawii na miyakapito a kiyapakaalibet iran
on.
16 So ikapito a kiyanggolaola iran on sii den ko kiyapakatanoga o manga imam ko oni o
manga bogiyong na inisogo i Yosowa ko manga taw a “Pelalalis kano! Piyalad rekano o
Allah so siti!
17 So siti ago so langon taman a matatago on na disomala a mbinasaan sa tarotop a aya
ipesoasoat ko Allah. Aya bo a pakalidasa niyo ron na so sondal a si Rahab ago so langon
a manga ped iyan sii ko walay niyan, ka kagiya initapok iyan so manga manonoriman a
siyogo tano.
18 Ogaid na pananggilai niyo o ba niyo kowaa so apiya antonaa ko manga nganin san a
inisenggay a mbinasaan, ka o ba niyo baden kapakatanai a ginawa niyo ago so kampo o
manga Israil sa paninta ago kamoralaan.
19 So langon a pirak, bolawan ago so manga ipamemetad a tombaga ago potaw na palaya
inisenggay a rek o Allah, na ketago ini ko baitalmal o Allah.”
20 Na giyoto a piyakaoni o manga imam so manga bogiyong, na so den so kiyanega sii o
manga taw na milalalis siran sa tanto a matanog na miyaoteng so keleb a mililibet ko siti.
Na sarta den a miyamantek somoled ko siti so oman i mama na inagaw iran den.
21 Piyamono iran a pedang so langon a baraniyawa ko siti a melagid den so manga mama
ago so manga babay a manga ngongoda ago miyanga lolokes a rakes on so manga sapi,
manga bilibili, manga kambing ago manga kimar.
22 Na pitero i Yosowa ko dowa kataw a mama a miyanoriman ko inged a “Song kano ko
walay o sondal na wita niyo sa liyo ago so langon o pamiliya niyan a so den so inisepa iyo
ron.”
23 Na somiyoled siran on na iniliyo iran si Rahab, so ama ago so ina iyan, so manga
pagari niyan ago so langon o pamiliya niyan na inowit iran siran ko darpa ko liyo o
kampo o manga Israil.
24 Oriyan iyan na tiyotong iran so dalem a siti ago so langon taman a matatago on, ogaid
na so pirak, so bolawan ago so manga ipamemetad a tombaga ago potaw na tiyago iran ko
baitalmal ko Walay o Allah.
25 Ogaid na piyakapagoyag i Yosowa si Rahab a so sondal a rakes o langon o pamiliya o
ama iyan sabap sa initapok iyan so manga siyogo i Yosowa a miyanoriman sa siti a
Yariko, na pepeginged sekaniyan den a ped o manga Israil taman imanto.
26 Samaoto na piyakalangkap i Yosowa angkai a paninta:
“Kemorkaan o Allah so apiya antawaa i tepengan iyan mangon peroman angkai a siti a
Yariko.
Aya imbayad iyan ko kambangona niyan ko onayan o siti
na so kaoyagoyag o kaka a wata iyan a mama,
na aya imbayad iyan ko kapakatindega niyan ko manga pinto on
na so kaoyagoyag o ari a wata iyan a mama.”
27 Na sisii so Allah ki Yosowa, na lomiyangkap so bantogan iyan sii ko dalem a inged.
YOSOWA 7
Tiyaban o manga Taw sa Ay so manga Israil
Ogaid na siyogok o manga Israil so sogoan o Allah mipantag ko manga nganin a
inisenggay a mbinasaan, ka aden a mama a bebetowan sa Akan a kominowa on; sabap
roo na mimborngat so gani o Allah ko manga Israil. (Si Akan na wata i Karmi a so
wata i Sabdi a wata peman i Sirah a ped ko mbatabataa Yodah).
2 Somiyogo si Yosowa sa manga mama a makasong sa Ay a poon sa Yariko. Giya Ay na
marani sa Bit Abin sii sa sebangan a Bitil. Na pitero kiran i Yosowa a “Lalakaw kano na
go niyo pariksaa so inged.” Na lomiyalakaw so manga mama na piyariksa iran a Ay.
3 Sii ko kiyakasoy iran ki Yosowa na pitero iran on a “Kena a ba langon o manga taw i ba
ngka pakasonga sa Ay. Aya bo a pakagobata ngka on na dowa o di na telo nggibo a
manga mama; di ngka pakapendokawa roo so langon o manga sondaro, ka maito bo a taw
ron.”
4 Kagiya ka maoto na baden manga telo nggibo a manga Israil a somiyong roo, ogaid na
miyapakatailis siran o manga mama sa Ay,
5 Na piyanaloba iran siran ipoon ko gimowa o siti taman den ko manga kowari, na
miyamakapatay siran sa manga telo polo ago nem kataw a manga Israil sii ko
kapepalagoy iran. Sabap sii na kiyadaan den sa kawaraw so manga Israil na miyanga alek
siran.
6 Samaoto na si Yosowa ago so manga pelokelokesen ko manga Israil na piyangisi iran so
manga nditaren iran ko kararata a ginawa iran. Piyamirikan iran sa bayanek so manga olo
iran ago gomipe siran ko lopa ko hadapan o Kaban o Allah, na gomegenek siran roo
taman ko kiyaperimon iyan.
7 Gomiyoraok si Yosowa a tig iyan a “Ya Allah a Kadnan ami, ino ngka pekaripaga sa
Yordan angkai a manga taw sa kapelada ngka rekami ko kambinasaa rekami o manga
Amoriyo? Tomo baden so kateterangi rekami komakaden roo sa sabala a Yordan!
8 Hey Kadnan, antonaa i mapetero aken imanto a kiyapalagoyan o manga Israil so manga
ridoay iran?
9 So manga Kanaaniyo ago so langon a ped a kibabaling ko inged na keneg iran so
makapantag sii, na pelikopan kami ran ago polangen. Na antonaa den i penggolaolaan ka
sa kapelindinga ngka ko kala o bantogan ka?”
10 Na pitero o Allah ki Yosowa a “Tindeg ka! Ino ka san gegepe?
11 Miyakandosa so Israil! Siyogok iran so kapasadan a inisogo aken a tomanen iran.
Kominowa siran ko manga nganin a inisenggay a mbinasaan. Piyanekew iran ai ago
miyamokeg siran mipantag sii, na inisaog iran ko manga ipamemetad iran.
12 Giyanan i sabap a di makapemayandeg so manga Israil ko hadapan o manga ridoay
iran. Miyakatailis siran sabap sa inisenggay imanto so manga Israil a mbinasaan! Na di
ako rekano den keped taman sa di niyo binasaan so inisenggay a mbinasaan a sisii rekano.
13 “Ika roo den! Sotiya ngka so manga taw! Teroa ngka kiran a ‘Sotiya niyo a manga
ginawa niyo a ipetiyagar rekano ko kapipita, ka pitero o Allah a Tohan o Israil a “Hey
manga Israil, matatago rekano so inisenggay a mbinasaan. Di kano makapemayandeg ko
hadapan o manga ridoay niyo taman sa ilebad iyo ai.” ’
14 “Teroa ngka kiran a ‘Amay ka mapita na pekadaseg so oman i mbatabataa rekano a
makapesosokli. So mbatabataa a kowaan o Allah na pekaiseg sa onaan so oman i isa on
ka mbawataan. Na so mbawataan a kowaan o Allah na pekaiseg sa onaan so oman i isa
on ka pamiliya, na so pamiliya a kowaan o Allah na pekaiseg sa onaan so oman i mama
on.
15 Na so mama a kowaan a ketoonan ko nganin san a inisenggay a mbinasaan na
totongen ko apoy a rakes o langon a rek iyan, ka siyogok iyan so Kapasadan o Allah ago
miyakanggolaola sa tanto a marata sii sa Israil.”
16 Teked a kapipita na piyakadaseg i Yosowa so oman i mbatatabaa a manga Israil na
miyakowa so mbatabataa Yodah.
17 Na piyakaiseg iyan sa onaan so oman i mbawataan ko mbatabataa Yodah, na
miyakowa so mbawataan i Sirah. Piyakaiseg iyan sa onaan so oman i pamiliya a ped ko
mbawataan i Sirah, na so pamiliya i Sabdi i miyakowa on.
18 Na piyakaiseg iyan sa onaan so oman i mama ko pamiliya i Sabdi na miyakowa si
Akan a wata i Karmi a wata i Sabdi a wata i Sirah a ped ko mbatabataa Yodah.
19 Na pitero i Yosowa ki Akan a “Wata aken, panotola ngka so tito a benar sii ko
kamamasaan o Allah a Tohan o Israil na teobat ka on. Teroa ngka raken o antonaa i
pinggolaola ngka; di ngka raken pegmaa.”
20 “Mataan den,” a tig i Akan ki Yosowa, “a miyakandosa ko ko Allah a Tohan o Israil,
na giyai i pinggolaola ko:
21 Sii ko manga tamok a miyateban tano na miyailay aken so mapiya i paras a kimon a
pasad sa Babilon, ago dowa gatos a pelata a pirak ago isa ka barita a tito a bolawan a
tenga sa kilo a timbang iyan. Tanto aken a kiyabebayaan na kinowa ko. Samanaya na
milelebeng ai ko soled o barombarong aken a matatampar sa didalem so pirak.”
22 Mandiyadi na somiyogo si Yosowa sa manga mama na miyalalagoy siran ko
barombarong, na miyatoon iran angkai a manga nganin a milelebeng roo a rakes den o
pirak a matatampar sa didalem.
23 Iniliyo iran ai ko barombarong na inowit iran ki Yosowa ago sii ko langon o manga
Israil, na inipametad iran ko lopa sii ko kamamasaan o Allah.
24 Mandiyadi na si Yosowa ago so langon o manga Israil na kinowa iran si Akan a wata i
Sirah ago so pirak, so kimon, so barita a bolawan, so manga wata iyan a manga mama ago
manga babay, so manga sapi iyan, manga kimar iyan, manga bilibili ago kambing iyan, so
barombarong iyan ago so langolangon a patemotamokan iyan na inowit iran ai langon sii
ko Balintad a Akor.
25 Na pitero i Yosowa ki Akan a “Ino ngka rekami pagowita angkai a kasiksaan?
Siksaan ka den o Allah sangkai a gawii!”
Na so langon o manga Israil na riyobak iran si Akan a manga ator a rakes o langon a
ped iyan. Oriyan iyan na tiyotong iran a apoy so manga bangkay iran.
26 Na diyakontoran iran sekaniyan sa madakel a manga ator a ndodon den taman imanto.
Giyanan i sabap a bitowan angkoto a darpa sa Balintad a Kasiksaan ipoon roo den.
Oriyan iyan na miyada ko Allah so pesokeyaw a rarangit iyan.
YOSOWA 8
Bininasa o manga Israil so Siti a Ay
Oriyan iyan na pitero o Allah ki Yosowa a “Di ka pekelek aya pen o ba ka kadai sa inam.
Pakaonota ngka so langon o manga sondaro na song kano sa Ay ka piyalad aken rekano
so dato sa Ay, so manga pagtaw niyan, so siti niyan ago so lopa iyan.
2 Nggolaolaa niyo sa Ay ago so dato on so datar o inikidia niyo sa Yariko ago so dato on
aya liyo ron na kekowa niyo a rek iyo den so mapeteban iyo ron ago so manga
pangangayamen. Na sogo ka sa manga sondaro a makapegayan sii ko talikodan o siti.”
3 Kagiya ka maoto na mitiyagar lomalakaw si Yosowa ago so langon o manga sondaro sa
kanggobata iran sa Ay. Miyamili sekaniyan sa telo polo nggibo a manga wawaraw a
sondaro na piyakalalakaw niyan siran ko kiyagagawii niyan
4 A aya niyan kiran inisogo na “Pakinega niyo piyapiya! Tepok kano ko talikodan o siti.
O ba kano ron tanto a pakawatan, na pagiiktiyar kano langon sa kanggobat iyo!
5 Saken ago so langon a ped aken na ndaseg ko siti. Na amay ka meliliyo so manga
mama on sa kapakipetidawa iran rekami a datar o miyaona a siyowa iran na pelagoyan
ami siran.
6 Selobaan kami ran taman sa maagak ami siran langon ko liyo o siti a pipikiren iran a
‘Pepalagoyan tano peman o manga Israil a datar o pinggolaola iran gowani.’
7 Samaoto na ganat kano ko katetapokan iyo na agawa niyo so siti, ka so Allah a Tohan
iyo na peladen iyan ko kapaar iyo.
8 Amay ka maagaw niyo so siti na totonga niyo ka giyoto so inisogo o Allah. Iktiyar
kano; giyai i manga insarat aken rekano!”
9 Na taros a piyakalalakaw siran i Yosowa, na somiyong siran ko darpa a petepokan iran
na nomiyayaw siran roo ko masesedepan a Ay sii ko pageletan a Bitil ago giya Ay. Ogaid
na mitelimbagak si Yosowa a maaped ko manga taw sii ko kiyagagawii niyan.
10 Teked a kapipita na tinimo iyan so manga sondaro na sekaniyan ago so manga olowan
sa Israil na lomiyalakaw a pepangonaan ko manga sondaro ko kapesong iran sa Ay.
11 Domiyaseg siran ko siti na miyakaoma ko mapapanempang iyan. Mikempo siran sa
tampar sa pagotaraan a Ay a aden a alog a miilet kiran ago so siti.
12 Na somiyogo si Yosowa sa manga lima nggibo a manga mama ka piyakatepok iyan
siran ko masesedepan o siti sii ko pageletan a Bitil ago giya Ay.
13 Kagiya matanor den so langon o manga sondaro, a so siran oto a kikatatago ko kampo
sa pagotaraan o siti ago so manga magaayan sii sa sedepan o siti, na domike si Yosowa sii
ko alog sangkoto a kagagawii.
14 So kiyailaya o dato sa Ay ko manga Israil na sekaniyan ago so langon o manga mama
ko siti na minggagaan lomiyo ko teked a kapipita sa kapakipetidawa iran ko manga Israil
sii ko darpa a katotolongan on so kapantaran a Yordan, ogaid na di niyan katawan a aden
a magaayan ko siti sii ko talikodan iyan.
15 Na omamanti na di pekaato si Yosowa ago so langon o manga Israil, na miyamalagoy
siran sa tampar sa disirto.
16 Tiyawag so langon o manga mama sa Ay sa kaselobaa iran kiran, na sii ko
kapeselobaa iran ki Yosowa na miyaagak siran baden ko liyo o siti.
17 Da den a sakataw bo a mama a ba mitelimbagak sa Ay o di na sii sa Bitil a ba da
saloba ko manga Israil, na inawaan iran so siti a kalelekaan ko kapeselobaa iran ko
manga Israil.
18 Samaoto na pitero o Allah ki Yosowa a “Antapen ka so bangkaw a kakapetan ka sa
tampar sa Ay, ka peladen ko so siti ko kapaar ka.” Mandiyadi na iniyantap i Yosowa so
bangkaw niyan sa tampar sa Ay
19 Na so den so kiyanggolaolaa niyan sii na minggagaan gomanat so manga magaayan ko
katetapokan iran na miyamiyakadayon siran somoled ko siti na inagaw iran. Na sarta den
a tiyotong iran.
20 Kagiya domingil sa talikodan so manga mama sa Ay na miyailay iran so bel ko siti a
pekigorong sa maporo, na da den a ba iran kapegapasan ko apiya anda, ka so manga
Israil a pepamalagoy a pegantap ko disirto na mipeto siran sa kapagatowi ran kiran.
21 Ka so den so kiyailaya i Yosowa ago so manga ped iyan a manga Israil sa miyaagaw o
manga magaayan so siti, ago so bel a pekigorong roo na mipeto siran na piyamono iran so
manga mama a lominiyo sa Ay.
22 So mambo so ped a manga Israil a miyagayan ko siti na lominiyo siran on a nggobat
kiran, na kiyaseletan so manga mama sa Ay a kambabalaan o manga Israil. Piyamono
siran o manga Israil a da den a ba iran piyakapagoyag aya pen o ba iran piyakapalagoy
23 A liyo ron so dato sa Ay, ka biniyag iran a oyagoyag na inowit iran ki Yosowa.
24 Kagiya mapasad mamomo a pedang o manga Israil so langon a manga mama a
kibabaling sa Ay a sisii ko liyo o siti taman sa miyapolang siran den na komiyasoy sa Ay
so langon o manga Israil na piyamono iran langon so manga taw a matatago on.
25 Sapolo ago dowa nggibo a kibabaling sa Ay a miyamatay sangkoto a gawii a melagid
den so manga mama ago manga babay.
26 Ka da den babaan i Yosowa so mabebeter a lima niyan a komakapet ko bangkaw niyan
taman sa da mapolang so langon a kibabaling sa Ay.
28 Ogaid na kinowa o manga Israil a rek iran den so manga pangangayamen ago so
miyateban iran ko siti ka aya iniinsarat o Allah ki Yosowa.
28 Tiyotong i Yosowa a Ay na biyaloy niyan a tatap a tabotod a miyanga bibinasa a
miyailang den taman imanto.
29 Binitin iyan ko kayo so dato sa Ay na da niyan roo den tekora taman ko kiyagabi
niyan. Sii den ko kiyasedep o alongan na inisogo i Yosowa a itana iran on so bangkay
niyan ago ilebad iran sii ko gimowa o siti. Na diyakontoran iran sa madakel a manga ator
a ndodon den taman imanto.
Biyatiya so Kitab Roo ko Palaw a Ibal
30 Oriyan iyan na roo ko Palaw a Ibal na mimbaal si Yosowa sa aparan a pesepaatan ko
manga soasoat ko Allah a Tohan o Israil.
31 Pimbaalan iyan ai a mipepasod ko manga insarat a inibegay o Mosa a oripen o Allah
sii ko manga Israil a minisorat ko Ribro a Kitab o Mosa – “a so aparan a da panapili so
manga ator on a da den osari sa kasangkapan.” Na somiyapaat siran on sa manga korban
a petotongen ago manga korban pantag bo ko kanggiginawai.
32 Na sii ko kamamasaan o manga Israil na kiyopiya i Yosowa so Kitab o Mosa a inisorat
iyan sii sangkoto a manga ator.
33 So langon o manga taw a melagid so manga mananangga ago so tenger a manga Israil
a rakes o manga pelokelokesen kiran, so manga olowan ago so manga pangongokom na
palaya kititindeg ko mbala a kilid o Kaban sa Kapasadan o Allah a somasangor siran ko
manga imam a manga Libitiyo a kiaawid ko Kaban. So sabagi ko manga taw na
kititindeg ko kababaan o Palaw a Girisim, na so sabagi kiran na sii ko kababaan o Palaw a
Ibal, ka giyoto so manga insarat a inibegay gowani o Mosa a oripen o Allah makapantag
ko kakerakmati ko manga Israil.
34 Mandiyadi na biyatiya kiran i Yosowa so langon a manga katero ko Kitab, a rakes o
manga rakmat ago so manga paninta a so den so minisorat ko Ribro a Kitab.
35 So oman i sogoan a inibegay o Mosa na biyatiya i Yosowa roo ko langon a
miyamakadarpa a manga Israil a rakes on so manga babay, so manga wata ago so manga
mananangga a pepeginged a maaped kiran.
YOSOWA 9
Piyanaliba so Israil o manga Taw sa Gibiyon
Samaoto na so langon a dato sii sa sedepan a Yordan na miyaneg iran so makapantag
sangkai a langon a miyanggolaola. Giyai so manga dato o manga Hitiyo, manga Amoriyo,
manga Kanaaniyo, manga Pirisiyo, manga Hibiyo ago manga Hibosiyo a kibabaling ko
manga kapalawan ago sii ko dalem o kapantaran ko kilid o Ragat a Miditiraniyo a taman
den sa Libanon sii sa pagotaraan.
2 Na mitimotimo siran a pemagabanga sa kapakipetidawa iran ki Yosowa ago so manga
Israil.
3 Ogaid na kagiya katokawan o manga taw sa Gibiyon so pinggolaola i Yosowa sa Yariko
ago sii sa Ay
4 Na miyapamikir iran a penaliba siran a somong ki Yosowa a omamanti na manga
siyogo siran. Na riyoranan iran so manga kimar iran sa manga roronot a sako ago manga
kobal a petegoan sa arak a miyanga kikisi ago kitatapakan.
5 Somiyolot siran sa miyanga bibinasa ago piyanapakan a manga tinilas ago miyanga
kikisi a manga nditaren, na so paan a mapeloto iran na palaya den kominimbel ago
inolabong.
6 Na somiyong siran ki Yosowa sii ko kampo sa Gilgal na pitero iran on ago sii ko manga
mama a Israil a “Miyakapoon kami sa mawatan a darpa. Na kabaya ami a
makipepasadanowai kami rekano imanto.”
7 Ogaid na pitero o manga Israil sangkai a manga Hibiyo a “Masiken a marani bo rekami
so babalingan iyo. O benar oto na di ami sekano den ipepasadanowai."
8 “Manga oripen kami ngka,” a tig iran ki Yosowa.
Na iniise kiran i Yosowa a “Antawaa kano ago anda kano poon?”
9 Inisembag iran a “Somiyong kami sii a poon ko mawatan a inged ka kagiya miyaneg
ami so makapantag ko bantogan o Allah a Tohan ka ago so langon a pinggolaola niyan
roo sa Misir
10 Ago so langon a pinggolaola niyan ko dowa kataw a dato o manga Amoriyo roo sa
sebangan a Yordan, a si Sihon a dato sa Hisbon ago si Og a dato sa Basan a mindato roo
sa Astarot.
11 So manga pelokelokesen ami ago so langon a kibabaling ko pagiingedan ami na pitero
iran rekami a ‘Awid kano sa manga pangenengken a mapeloto iyo ko kapelalakaw niyo
na songowi niyo so manga Israil na teroa niyo kiran a “Manga oripen kami niyo; na
pakipesadanowai kano rekami." '
12 “Giyangkai a paan a loto ami na mayaw pen isako alongan a kiyaganati ami ko
manga walay ami sa kasong rekano, ogaid na ilaya niyo man ka kominimbel imanto ago
inolabong!
13 Na giyangkai a manga kobal a petegoan sa arak na palaya bago isako tagoan ami,
ogaid na ilaya niyo man ka miyanga sisisi den, na go so manga nditaren ami ago manga
tinilas na miyanga roronot sabap ko tanto a mawatan a lalakaw ami!”
14 Na piyariksa o manga mama a Israil so manga pangenengken iran ogaid na da siran
pakimosawir ko Allah.
15 Na inipasadanowai siran i Yosowa sa kalilintad, na pimataanan a sapa o manga
olowan o Israil a di iran siran pemonoon.
16 Miyakatelo gawii ko kiyaipos o kiyapesadanowaiya iran ago so manga taw sa Gibiyon
na kiyatokawan o manga Israil a manga siringan siran a mababaling sa marani.
17 Sabap roo na lomiyalakaw so manga Israil, na sii ko ikatelo gawii na minisampay siran
ko manga siti a kibabalingan angkai a manga taw a giya Gibiyon, Kipira, Birot ago
Kiriyat Yarim.
18 Ogaid na da siran gobata o manga Israil ka kagiya miyakasepa siran kiran sii ko
Ingaran o Allah a Tohan o Israil.
Na so langon o manga Israil na piyanarotaroan iran so manga olowan
19 Ogaid na somimbag so manga olowan a tig iran a “Miyakasepa kami kiran den sii ko
Ingaran o Allah a Tohan o Israil. Di tano siran kapekasakitan imanto.
20 Ogaid na giyai i ikidia tano kiran: Pakapagoyagen tano siran kaan di rektano kitana so
rarangit o Allah sabap ko kiyabarobaa tano ko minisepa tano kiran.
21 Pakapagoyaga niyo siran, ogaid na mbelowin tano siran a dii nggogoray sa itagon ago
dii manageb sa ig a pegosaren tano langon a isa ka maginged.”
Giyanan i kinitomanen o manga olowan ko initopa iran,
22 Ogaid na piyakisogoan i Yosowa so manga taw sa Gibiyon na iniise iyan kiran a “Ino
kami niyo selibaa ko kiyateroa niyo sa ‘Miyakapoon kami sa mawatan a darpa,’ a marani
rekami bo bes so babalingan iyo?
23 Kasisintaan kano imanto! Di kano den kebokaan ko kapepanalagad iyo a so dii
kanggogoray sa itagon ago dii kapanageb sa ig a pegosaren ko Walay o Tohan aken.”
24 Simbag iran si Yosowa a tig iran a “Miyapanotol rekami den a inisogo o Allah a
Tohan iyo ko Mosa a imbegay niyan rekano so dalem angkai a lopa ago polangen iyan so
langon a kibabaling on sii ko kapegantap iyo kiran. Kagiya ka maoto na tanto ami a
inikalek so kakeda o manga niyawa ami. Giyoto i sabap a kiyanggolaolaa mi sii.
25 Sii kami den imanto ko kapaar ka; nggolaolaa ngka rekami so apiya antonaa i mapiya
reka ago ontol.”
26 Na piyakalidas siran i Yosowa ko manga Israil na da iran siran pamonoa.
27 Ogaid na sangkoto a gawii na biyaloy niyan so manga taw sa Gibiyon a dii nggogoray
sa itagon ago dii manageb sa ig a pegosaren o manga Israil ago sii ko aparan o Allah roo
ko darpa a pinili iyan a pesimbaan on. Na giyanan i kapakambebetad iran taman den
imanto.
YOSOWA 10
Tomiyareg so Alongan
Samaoto na si Adoni Sidik a dato sa Yarosalim na kiyatokawan iyan a miyaagaw i
Yosowa so siti a Ay ago bininasa niyan sa tarotop a biyono iyan so dato on a datar o
inikidia niyan sa Yariko ago so dato on. Kiyatokawan iyan pen a so manga taw sa
Gibiyon na miyakipesadanowai sa kalilintad ko manga Israil ago pepeginged siran a
maaped kiran.
2 Tanto ai a inikawan i AdoniSidik ago so manga pagtaw niyan, ka giya Gibiyon na mala
i kipantag a siti a datar o isa ko manga siti a babalingan o dato, na mala pen a di giya Ay,
na manga wawaraw so manga sondaro on.
3 Sabap roo na si AdoniSidik a dato sa Yarosalim na somiyogo sa manga mama sii ki
Hoham a dato sa Hibron, sii ki Piram a dato sa Yarmot, sii ki Yapiya a dato sa Lakis ago
sii ki Dibir a dato sa Iglon, na piyakitero iyan kiran a
4 “Song kano raken na go ako niyo ogopi sa kanggobata ko sa Gibiyon ka
miyakipesadanowai siran sa kalilintad ki Yosowa ago so manga
Israil.”
5 Mandiyadi na giyangkai a lima kataw a dato o manga Amoriyo a so dato sa Yarosalim,
sa Hibron, sa Yarmot, sa Lakis ago sa Iglon na piyakatimotimo iran so manga sondaro
iran na lomiyalakaw siran, na linikopan iran a Gibiyon sa kasondoli ran on.
6 Somiyogo so manga taw sa Gibiyon sa manga mama ki Yosowa roo ko kampo sa Gilgal
sa kapeteroa iran on a “Di ngka pendarainonen so manga oripen ka! Song ka rekami sii
nggagaan na tabangi kami ngka; sabeta kami ngka, ka so langon a manga dato o manga
Amoriyo a kibabaling ko kapalawan na piyakaisaisa iran so manga sondaro iran sa
kapakipetidawa iran rekami!"
7 Na gomiyanat si Yosowa sa Gilgal a oonotan o langon o manga sondaro niyan a rakes
on so langon a lebi kiran a mapasang i kapakitidawa.
8 Na pitero o Allah ki Yosowa a “Di ngka siran keleken, ka piyalad aken siran den ko
kapaar ka. Da den a isa kiran bo a ba makapemayandeg ko hadapan ka.”
9 Na miyababasa gawii a kiyalalakaw i Yosowa ago so manga sondaro niyan a ipoon sa
Gilgal taman den sa Gibiyon, na tikawan iyan gomobat so manga Amoriyo.
10 Piyakalekan siran o Allah ko kiyailaya iran ko manga Israil na tanto a minitaralo a
kiyapamonoa kiran o manga Israil roo sa Gibiyon, na piyanaloba iran siran sii ko lalan a
ipesong sa Bit Horon a pepamonoon iran siran taman den sa Asikah ago sa Makidah.
11 Na sii ko kapepalagowi ran ko manga Israil sii ko lalan a ipoon sa Bit Horon taman sa
Asikah na piyangologan siran o Allah sa giyaw a lagid o manga ala a ator a poon sa
langit, na lebi kiran pen a madakel a miyapatay o giyaw a di so miyapamono a pedang o
manga Israil.
12 Sii sangkoto a gawii a kiyapalada o Allah ko manga Amoriyo sii ko manga Israil na
miyangangarapan si Yosowa ko Allah a tig iyan ko kamamasai ron o manga Israil a:
“Hey alongan, tareg ka san ko kaporoan o Gibiyon;
hey olan, tareg ka san ko liyawaw o Balintad a Ayalon!”
13 Na tomiyareg so alongan a da den pagalin so olan taman sa da mataban o manga Israil
so manga ridoay iran. Ba ini da misorat sii ko Ribro a Yasar? Tomiyareg so alongan ko
kaooto niyan na somindod ko kapesedep iyan ko miyababasa alongan.
14 Da den a datar oto a gawii a ba niyan miyaonaan o di na miyaoriyan a kiyaampona o
Allah ko lagid oto a pangni o manosiya. Mataan den a miyakitidawa so Allah sabap ko
manga Israil!
15 Oriyan iyan na komiyasoy si Yosowa ago so langon a manga Israil sii ko kampo sa
Gilgal.
Piyamono i Yosowa so Lima kataw a Dato o manga Amoriyo
16 Sii ko dii katidawa na miyakapalagoy so lima a dato na mitepok siran ko liyang roo sa
Makidah.
17 Piyanotol ki Yosowa a “Miyatoon so lima a manga dato a sii tetapok ko liyang roo sa
Makidah.”
18 Na tig iyan a “Lilidi niyo sa manga ala a ator so ngari o liyang na pakinggordiyai niyo
sa manga mama.
19 Ogaid na di niyo nggeneki kometed so manga ridoay niyo; sondoli niyo siran sa
talikodan. O ba niyo siran pakapegapasa ko manga siti iran ka so Allah a Tohan iyo na
piyalad iyan siran rekano.”
20 Kagiya mapasad siran mamono i Yosowa ago so manga Israil a liyo ron so maito bo a
miyamakapalagoy a miyamakasoled ko kikakokotaan a manga siti iran
21 Na komiyasoy so langon o manga Israil ki Yosowa sii sa kampo sa Makidah a da a
kiyakaidan kiran.
22 Na pitero i Yosowa a “Lekai niyo so gimowa o liyang na wita niyo raken angkoto a
lima a dato.”
23 Na likaan iran so liyang na iniliyo iran on angkoto a manga dato a so dato sa
Yarosalim, so dato sa Hibron, so dato sa Yarmot, so dato sa Lakis ago so dato sa
Iglon.
24 Sii ko kiyawita iran kiran ki Yosowa na tinimo iyan so langon a manga mama sa Israil
na pitero iyan ko manga komandir o manga sondaro a miyamangonot rekaniyan a “Song
kano sii na dapoi niyo so manga lig angkai a manga dato.” Na domiyaseg siran na
piyandapoan iran so manga lig iran.
25 Na tig i Yosowa a “Di kano pekelek; di kano kedai sa inam! Pakababager kano ago
pakawawaraw, ka giyai i ikidia o Allah ko langon a ipetidawa iyo a manga ridoay.”
26 Na giyoto a biyono i Yosowa so manga dato na binitin iyan siran ko lima a kayo a da
den tekora so manga lawas iran taman ko kiyagabi niyan.
27 Sii ko kapesedep o alongan na somiyogo si Yosowa na initana iran so manga lawas
iran ko manga kayo na inilebad iran roo ko liyang a kiyatapokan iran gowani. Tiyagoan
iran sa manga ala a ator so gimowa o liyang na ndodon den ai taman imanto.
Miyataban i Yosowa so manga siti sa Pagabagatan
28 Sii den sangkoto a gawii na inagaw i Yosowa so siti a Makidah. Bininasa niyan sa
tarotop na biyono iyan a pedang so langon a manga taw ron a rakes o dato iran; da den a
ba niyan kiran piyakapagoyag. Na pinggolaola niyan ko dato sa Makidah so inikidia
niyan ko dato sa Yariko.
29 Oriyan oto na tomiyaros den si Yosowa ago so manga Israil a poon sa Makidah na
somiyong siran sa Libnah na giyobat iran.
30 Piyalad ai mambo o Allah ko manga Israil, na piyamono iran a pedang so langon a taw
ron a da den a ba iran on piyakapagoyag. Na pinggolaola i Yosowa ko dato iran so
inikidia niyan ko dato sa Yariko.
31 So kiyaipos oto na miyawa si Yosowa ago so manga Israil sa Libnah na miyantap sa
Lakis. Linikopan iran so siti na giyobat iran,
32 Na piyalad o Allah a Lakis ko manga Israil na inagaw iran ko ikadowa gawii a di iran
kii katidawa. Piyamono iran a pedang so langon a taw ron a datar o inikidia iran sa
Libnah.
33 Sii ko dii katidawa na miyakaoma roo si Horam a dato sa Gisir ka tebangan iyan
lominding a Lakis. Ogaid na tiyaban sekaniyan i Yosowa ago so manga sondaro niyan na
da den a ba niyan kiran piyakapagoyag.
34 Poon sa Lakis na tomiyaros si Yosowa ago so manga Israil sa Iglon. Linikopan iran
ago giyobat
35 Na inagaw iran sangkoto den a gawii. Bininasa iran sa tarotop na piyamono iran a
pedang so langon a taw ron a datar o inikidia iran sa Lakis.
36 Tomiyaros pen si Yosowa ago so manga Israil a poon sa Iglon na somiyong siran sa
Hibron na giyobat iran.
37 Inagaw iran na piyamono iran a pedang so langon o manga taw ron a rakes o dato iran
ago so pen so manga taw sii ko melilibeta on a manga inged. Bininasa iran sa tarotop a
da den a ba iran on piyakapagoyag a datar o pinggolaola iran sa Iglon.
38 Oriyan iyan na mipeto si Yosowa ago so manga Israil na giyobat iran a Dibir.
39 Inagaw iran so siti a rakes o dato on ago so langon a melilibeta on a manga inged. Na
piyamono iran a pedang so langon o manga taw ron. Tarotop a kiyabinasaa iran on a da
den a ba iran piyakapagoyag. Pinggolaola iran sa Dibir ago so dato on so inikidia iran sa
Hibron ago giya Libnah ago so dato on.
40 Giyanan i kiyatabana i Yosowa ko manga taw ko dalem a inged. Tiyaban iyan so
manga dato sii ko manga siti ko kapalawan, sii sa Nigib sa pagabagatan, sii ko kapantaran
sa sedepan ago sii ko kipakaiiris ko manga bobongan. Miyatarotop a kiyabinasaa niyan
ko langon a baraniyawa on a da den a ba niyan kiran piyakapagoyag ka giyoto den so
inisogo o Allah a Tohan o Israil.
41 Miyataban siran i Yosowa ipoon sa Kadis Barniya na taman den sa Gasa, ago sii ko
dalem a inged a Gosen taman sa Gibiyon.
42 Langon angkai a manga dato ago so lopa iran na miyataban i Yosowa sii ko soled o
miyakaisaisa bo a kiyapakitidawa iyan
ka so Allah a so Tohan o Israil na aya dii makitidawa sabap ko manga Israil.
43 So kiyaipos ai na komiyasoy si Yosowa ago so langon o manga Israil roo sa kampo
iran sa Gilgal.
YOSOWA 11
Tiyaban i Yosowa so manga Dato sa Pagotaraan
Kagiya maneg i Yabin a dato sa Hasor so makapantag sangkai a miyanggolaola na
piyakisogoan iyan si Yobab a dato sa Madan, ago so manga dato sa Simron ago sa Aksap
2 A lagid mambo o manga dato sa pagotaraan roo ko kapalawan ago sii ko Balintad a
Yordan sa pagabagatan o Ranaw a Galili, ago sii ko kapantaran sa sedepan a marani sa
Dor.
3 Piyakisogoan iyan pen so manga Ikanaanen a kibabaling sa sebangan ago sa sedepan
ago so manga Amoriyo, manga Hitiyo, manga Pirisiyo ago so manga Hibosiyo sii ko
kapalawan a manga inged, ago so manga Hibiyo sii sa rindib o Palaw a Hirmon sii ko
inged a Mispah.
4 Na mililiyo siran a rakes o langon o manga sondaro iran ago tanto a madakel a karo iran
sa katidawa ago manga koda, a so bariboribo a manga taw a datar sa kadakel o peted sa
kilid a ragat.
5 Mitelabok so langon angkai a manga dato na piyakaisaisa iran so bager iran na
mikempo siran langon sii ko Manga Bowalan sa Mirom sa kapakipetidawa iran ko manga
Israil.
6 Samaoto na pitero o Allah ki Yosowa a “Di ngka siran keleken, ka amay ka mapita sa
datar ai a oras na peladen ko siran rekano langon a miyamatay. Pelelepoa ngka so manga
koda iran na totonga ngka so manga karo iran.”
7 Mandiyadi na lomiyalakaw si Yosowa a oonotan o langon a sondaro niyan na tekaw den
a kiyagobata iran kiran sii ko Manga Bowalan sa Mirom.
8 Na piyakataban o Allah so manga Israil ko manga ridoay iran. Giyobat iran siran na
piyanaloba iran taman ko ‘Kalaan sa Sidon’ ago Misripot Maim sii sa pagotaraan ago
taman den ko Balintad a Mispah sii sa sebangan;
na piyamono iran siran taman sa da den a ba kiran miyalamba.
9 Na pinggolaola i Yosowa so iniinsarat on o Allah, ka pilelepo iyan so manga koda iran
ago piyanotong iyan so manga karo iran.
10 Oriyan iyan na mipeto si Yosowa na inagaw niyan a Hasor na biyono iyan a pedang so
dato on, ka giya Hasor na makandadato gowani sangkai a langon a ndatoan.
11 Bininasa o manga Israil so langon a taw ron; piyamono iran siran a pedang a da den a
ba iran liyamba a ba pengginawa. Na tiyotong i Yosowa so siti.
12 Inagaw i Yosowa so langon angkai a manga siti na piyamono iyan a pedang so langon
o manga dato on. Tarotop a kiyabinasaa niyan kiran a giyoto den i inisogo on o Mosa a
oripen o Allah.
13 Ogaid na da den a tiyotong o manga Israil ko manga siti a sii miyabangon ko manga
bobongan a liyo ron a Hasor a tiyotong i Yosowa.
14 Kinowa o manga Israil so langon a miyateban iran ago so manga pangangayamen sii
sangkoto a manga siti, ogaid na so langon o manga taw ron na piyamono iran a pedang.
Piyaminasa iran siran sa tarotop a da den a ba iran piyakapagoyag.
15 So den so inisogo o Allah ko Mosa a oripen iyan na inisogo mambo o Mosa ki
Yosowa, na ininggolalan den i Yosowa. Da den a ba on lipas i Yosowa ko langon a
inisogo o Allah ko Mosa.
So Lopa a Miyaagaw i Yosowa
16 Miyaagaw i Yosowa so dalem angkoto a lopa, a so manga kapalawan, so Nigib sa
pagabagatan, so dalem a inged a Gosen, so kapantaran roo sa sedepan, so Balintad a
Yordan ago so manga palaw a rakes o manga rindib iyan sii sa Israil.
1718 Giyangkai a lopa na ipoon sa Palaw a Halak a marani sa inged a Idomiya na taman
den sa Baal Gad sii ko Balintad a Libanon a matatago sa pagabagatan a Palaw a Hirmon.
Miyatey den a kiyapakitidawa i Yosowa ko langon o manga dato sangkai a manga inged,
ogaid na miyadakep iyan siran langon ago piyamono iyan.
19 Da den a isa bo ko manga siti sangkai a pagiingedan a ba miyakipesadanowai sa
kalilintad ko manga Israil liyo ron a Gibiyon a babalingan o manga Hibiyo. So langon a
ped a manga siti na palaya den miyataban o manga Israil sii ko dii katidawa.
20 Ka piyakategas o Allah so manga poso iran sa kapakipetidawa iran ko manga Israil
kaan matarotop a kambinasaa kiran sa da den a ba kiran kapedi, ka giyoto i inisogo o
Allah ko Mosa.
21 Sii sangkoto a masa na somiyong si Yosowa ko kapalawan na bininasa niyan so
manga Anakim a kibabaling roo sa Hibron, sa Dibir, sa Anab ago sii ko langon o manga
kapalawan sa Yodah ago giya Israil. Miyatarotop a kiyabinasaa kiran i Yosowa a rakes o
manga siti iran.
22 Da den a isa ko manga Anakim a ba miyalamba sii ko pagiingedan o manga Israil liyo
ron so maito a miyakapagoyag roo sa Gasa, sa Gat ago sa Asdod.
23 Miyaagaw i Yosowa so dalem angkoto a inged a giyoto so iniinsarat o Allah ko Mosa.
Na pimbagibagi iyan ai ko manga mbatabataa a manga Israil a aya iran kawali. Oriyan
oto na aden a kalilintad ko inged ka minitapelek on so dii katidawa.
YOSOWA 12
So manga Dato a Miyataban o Mosa sa Sebangan a Yordan
Sii sa sebangan a Lawasaig a Yordan na miyataban roo den gowani o manga Israil so
dowa a dato ago miyatangan iran so manga inged iran ipoon sa Lawasaig a Arnon taman
ko Palaw a Hirmon a rakes on so langon o Balintad a Yordan ko masesebangan o
lawasaig.
2 So paganay ron na si Sihon a dato o manga Amoriyo a miyakabaling sa Hisbon. So
lopa a pindatoan iyan na ipoon sa Arowir sii ko temanaan o Balintad a Arnon ago ipoon
sa lembak o balintad taman ko Lawasaig a Yabok a aya temanaan o manga Amoniyo.
Sabaad ai ko inged a Giliyad.
3 Maaped on so Balintad a Yordan ko masesebangan o lawasaig ipoon ko Ranaw a Galili
taman sa Bit Hisimot sa sebangan o Maatay a Ragat ago taman den ko rindib o Palaw a
Pisgah sa pagotaraan.
4 Tiyaban iran pen si Og a dato sa Basan a isa ko moripori a kiyababadan ko manga
Ripayo a miyakabaling sa Astarot ago sa Idri.
5 Aya maaped ko lopa a pindatoan iyan na so Palaw a Hirmon, Salikah ago so dalem a
Basan a iniraot ko temanaan o manga taw sa Gisor ago Maakah a lagid mambo o sabagi
sa Giliyad a iniraot ko temanaan o Sihon a dato sa Hisbon.
6 Giyangkai a dowa kataw a dato i miyataban o Mosa a so oripen o Allah ago so manga
Israil, na inibegay o Mosa so lopa iran ko manga mbatabataa Robin, Gad ago so sabagi ko
mbatabataa Manasih a aya iran kawali.
So manga Dato a Tiyaban i Yosowa sa Sedepan a Yordan
7 Tiyaban i Yosowa ago so manga Israil so langon a manga dato sii ko lopa sa sedepan a
Yordan ipoon sa Baal Gad sii ko Balintad a Libanon a iniraot ko Palaw a Halak sii sa
pagabagatan a marani sa Idomiya. Pimbagibagi i Yosowa angkai a lopa sii ko manga
mbatabataa manga Israil kaan iran makewali.
8 Mirarakes sangkai a lopa so manga kapalawan, so manga bobongan roo sa sedepan, so
Balintad a Yordan, so kikasisilid o manga palaw, so disirto ago so Nigib sii sa
pagabagatan. Babalingan ai o manga Hitiyo, manga Amoriyo, manga Kanaaniyo, manga
Pirisiyo, manga Hibiyo ago manga Hibosiyo.
9 Giyai so manga dato a miyataban o manga Israil:
So dato sa Yariko; so dato sa Ay (a marani sa Bitil);
10 So dato sa Yarosalim; so dato sa Hibron;
11 So dato sa Yarmot; so dato sa Lakis;
12 So dato sa Iglon; so dato sa Gisir;
13 So dato s Dibir; so dato sa Gidir;
14 So dato sa Horman; so dato sa Arad;
15 So dato sa Libnah; so dato sa Adolam;
16 So dato sa Makidah; so dato sa Bitil;
17 So dato sa Tapowah; so dato sa Hipir;
18 So dato sa Apik; so dato sa Lasaron;
19 So dato sa Madon; so dato sa Hasor;
20 So dato sa Simron Miron; so dato sa Aksap;
21 So dato sa Taanak; so dato sa Magido;
22 So dato sa Kidis; so dato sa Hokniyam (sii sa Karmil);
23 So dato sa Dor (sii sa Napot Dor); so dato sa Goyim (sii sa Gilgal);
24 Ago so dato sa Tirsah. Telo polo ago isa kataw langon a manga dato.
YOSOWA 13
So Da Pen Maagaw a Lopa
Kagiya malokes si Yosowa a minitolod den a idad iyan na pitero on o Allah a “Miyalokes
ka den, na aden a tanto a maolad a lopa a da pen maagaw.
2 Giyai so lopa a miyalamba: so langon o kikapagiingedan o manga Pilistiyo ago manga
Gisoriyo,
3 A lopa ini a mibibilang a rek o manga Ikanaanen. Giyangkai a lopa na ipoon sa baogan
a Sihor sii sa sebangan a Misir na iniraot ko temanaan a Ikron sii sa pagotaraan a
mirarakes on so lima a siti o manga Pilistin a giya Gasa, Asdod, Askilon ago Ikron. Da
pen mambo maagaw so lopa o manga Abimiyo
4 Roo sa pagabagatan. Na aden pen a da maagaw a so langon o lopa o manga Kanaaniyo
ago giya Miyarah (a rek o manga taw sa Sidon) a taman den sa Apik sii ko temanaan o
manga Amoriyo
5 A lagid mambo o lopa o manga Gibaliyo ago so dalem o inged a Libanon a matatampar
sa sebangan ipoon sa Baal Gad sii sa pagabagatan o Palaw a Hirmon na taman den sa
Libo Hamat.
6 Mirarakes on pen so langon a lopa o manga taw sa Sidon a kibaba
ling ko kapalawan sii ko pageletan a Libanon ago giya Misripot Maim.
"Mbogaon ko so langon angkai a manga taw sii ko kapegantap kiran o manga Israil.
Na inengkaa ngka o ba ngka di mibegay angkai a lopa sii ko manga Israil a makewali ran
a aya ko rekano den inisogo.
7 Mbagibagia ngka ini kiran sii ko siyaw ka mbatabataa kiran ago sii ko sabaad ko
mbatabataa Manasih."
So Kiyambagibagia ko Lopa sa Sebangan a Yordan
8 So sabaad ko mbatabataa Manasih ago so manga mbatabataa Robin ago Gad na
miyakowa iran den so lopa a inisenggay kiran o Mosa a oripen o Allah sii ko
masesebangan a Yordan.
9 Giyangkai a lopa na ipoon sa Arowir sii ko kilild o Balintad a Arnon ago ipoon ko siti
sii ko lembak o balintad a mirarakes on so dalem a kapantaran sa Midiba taman den sa
Dibon.
10 Iniraot ai ko temanaan o manga Amoniyo, na maaped on so dalem a pagiingedan a
kiyandatoan i Sihon a dato o manga Amoriyo a miyakandato sa Hisbon.
11 Mirarakes on pen a Giliyad a so inged a babalingan o manga taw sa Gisor ago Maakah
ago so pen so langon o Palaw a Hirmon ago so dalem a Basan taman den sa Salikah
12 A giyoto so langon o ndatoan i Og a miyakandato roo sa Astarot ago sa Idri. Isa
sekaniyan ko aya bo miyalamba a manga moriyataw o manga Ripaim (a so manga iganti).
Miyataban siran den o Mosa na miyaagaw niyan so lopa iran.
13 Ogaid na da bogawa o manga Israil so manga taw sa Gisor ago giya Maakah na
pepeginged siran den a maaped ko manga Israil taman imanto.
14 So mbatabataa Libi na da kasaadi o Mosa sa lopa, ka aya iran kawali na so bagian iran
ko manga ipesoasoat a petotongen ko aparan o Allah a Tohan o Israil ka giyoto i initopa
niyan kiran.
So Lopa a Inisenggay ko Mbatabataa Robin
15 Giyai so lopa a inisenggay o Mosa ko manga pamiliya a ped ko mbatabataa Robin:
16 So lopa iran na ipoon sa Arowir ko kilid o Balintad a Arnon ago ipoon ko siti ko
lembak o balintad a iniraot ko kapantaran a malelepas sa Midiba.
17 Mirarakes on a Hisbon a lagid mambo o langon a manga siti sii ko kapantaran, a giya
Dibon, Bamotbaal, Bitbaalmiyon,
18 Yahasah, Kidimot, Mipaat,
19 Kiriyataim, Sibmah, Siritsahar sii ko poro o bobongan ko balintad,
20 Bitpiyor, so kipakaiiris ko Palaw a Pisgah, ago giya Bithisimot.
21 Maaped on pen so kalangolangon a siti ko kapantaran ago so dalem a ndatoan i Sihon
a dato o manga Amoriyo a miyakandato sa Hisbon. Miyataban sekaniyan den o Mosa a
lagid mambo o manga dato a kibabaling sangkoto a inged a miyamakapagabanga a ped i
Sihon, a so manga dato sa Midiyan, Ibi, Rikim, Sor, Hor ago giya Riba.
22 Si Balaam a wata i Biyor a so pangangatao na isa sekaniyan ko miyapatay o manga
Israil ko dii katidawa.
23 So lawasaig a Yordan na aya masesedepan a temanaan o lopa o mbatabataa Robin.
Giyangkai a manga siti a rakes o pepamagonayonayan ko oman i siti na aya kawali o
manga pamiliya a ped ko mbatabataa Robin.
So Lopa a Inisenggay ko Mbatabataa Gad
24 Giyai so lopa a inisenggay o Mosa ko manga pamiliya a ped ko mbatabataa Gad:
25 Mirarakes ko lopa iran a Hasir ago so langon a manga siti sa Giliyad, ago so sabaad ko
lopa o manga Amoniyo a iniraot sa Arowir sii sa sebangan a Rabah.
26 So lopa iran na ipoon sa Hisbon
taman den sa Ramatmispah ago Bitonim, ago ipoon sa Mahanaim taman sa temanaan a
Dibir.
27 Sii ko Balintad a Yordan na mirarakes on a Bitharam, Bitnimrah, Sokot, Sapon, a
giyoto so miyalamba ko ndatoan i Sihon a dato sa Hisbon. So masesedepan a temanaan o
lopa iran na so Lawasaig a Yordan taman den sa Ranaw a Galili sii sa pagotaraan.
28 Giyangkai a manga siti a rakes o pepamagonayonayan ko oman i siti na aya kawali o
manga pamiliya a ped ko mbatabataa Gad.
So Lopa a Inisenggay ko Sabaad ko Mbatabataa Manasih
29 Giyai so lopa a inisenggay o Mosa ko manga pamiliya a ped ko sabaad ko mbatabataa
Manasih:
30 So lopa iran na ipoon sa Mahanaim a maaped on so langon o inged a Basan, so dalem
a ndatoan i Og a dato sa Basan ago so langon a manga siti sa Yair a matatago sa Basan, a
nem polo a manga siti.
31 Mirarakes on so sabagi sa Giliyad ago so pen so siti a Astarot ago giya Idri sii ko
ndatoan o Og sa Basan. Langon den ai na inibegay ko sabaad ko manga mbawataan i
Makir a wata i Manasih.
32 Giyai so kiyambagibagia o Mosa ko lopa sii ko sabala a Yordan sa sebangan a Yariko
isako sisii sekaniyan sa kapantaran sa Mowab.
33 Ogaid na da begi o Mosa sa lopa so mbatabataa Libi, ka aya kawali iran na so Allah a
Tohan o Israil ka giyoto i initopa niyan kiran.
YOSOWA 14
So Kiyambagibagia ko Lopa ko Masesedepan a Yordan
Giyai so totolan ko kiyambagibagia ko lopa sa inged a Kanaan sii ko manga Israil.
Pimbagibagi ini i Iliyasar a so imam, si Yosowa a wata i Non ago so manga olowan o
manga pamiliya a ped ko manga mbatabataa iran.
2 So manga kawali angkai a siyaw ago tenga ka mbatabataa na miyapakaseseng
gaya kiran a miyakanggolalan ko ripa a giyoto so inisogo o Allah ko Mosa.
34 So ped a manga mbatabataa kiran a so dowa ago tenga na kiyabegan den o Mosa sa
kawali iran roo ko masesebangan a Yordan. (So kiyababadan ko Yosop na miyabaloy a
dowa ka mbatabataa a so Manasih ago so Ipraim.) Ogaid na so manga moriyataw i Libi
na da kasaadi sa mapekewali ran ko inged a rowar ko manga siti a kebalingan iran a rakes
on so manga pangomaan a kapenataban o manga pangangayamen iran.
5 So den so inisogo o Allah ko Mosa na giyoto i kiyambagibagia o manga Israil ko lopa.
So Siti a Hibron na Inibegay ki Kaleb
6 Miyakaisa a gawii na aden a manga taw a poon ko mbatabataa Yodah a somiyong ki
Yosowa roo sa Gilgal. So isa kiran a si Kaleb a wata i Yaponih a so Kiniyo na pitero iyan
ki Yosowa a "Katawan ka so pitero o Allah ko Mosa a oripen o Allah roo sa Kadis
Barniya makapantag raken ago seka.
7 Pat polo ragon a idad aken sii ko kiyasogoa raken o Mosa ipoon sa Kadis Barniya sa
kaperiksaa ko ko inged. Na kagiya komasoy ako na piyanotol aken on so miyapamikir
aken a tito a osayan.
8 Ogaid na so manga pagari aken a miyonot raken na piyakalekan iran so manga taw na
piyakadaan iran sa inam. Inonta bo na miyaratiyaya ko ko Allah a Tohan ko sa iklas ko
poso aken.
9 Na inisepa raken o Mosa sangkoto a gawii a 'Mataan den a so lopa a kiyapanadaan ka
na mapekewali ngka ago so manga wata a ka sa taman sa pakataman sabap sa
piyaratiyaya ngka so Allah a Tohan ko sa iklas ko poso o ka.'
10 “Imanto na miyaipos den so pat polo ago lima ragon a kapegoyaga raken o Allah ipoon
ko kiyateroa sii o Allah ko Mosa sii ko dii kapagenebeneb o manga Israil ko disirto. Na,
ilaya ko ngka, ka miyakawalo polo ago lima ragon a idad aken
11 Na mabager ako pen imanto a lagid gowani ko kiyasogoa raken o
Mosa. Kegaga ko pen so kapakipetidawa ago so apiya antonaa a ped a penggalebeken.
12 Kagiya ka maoto na began ka raken imanto angkai a kapalawan a lopa a initopa raken
o Allah sa gawii oto. Piyanotol ami reka sa masa oto so makapantag ko manga iganti a
bebetowan sa Anakim a kibabaling roo sii ko manga ala ago kikokotaan a manga siti.
Ogaid na o keped raken so Allah na mbogaon ko siran sangkoto a inged a giyoto so
miyatero o Allah."
13 Na inipamangni i Yosowa sa rakmat si Kaleb a wata i Yaponih na inibegay niyan so
siti a Hibron a aya niyan kawali.
14 Giya Hibron na rek den o manga moriyataw i Kaleb a wata i Yaponih a so Kiniyo
taman imanto sabap sa miyaratiyaya sekaniyan ko Allah a Tohan o Israil sa iklas ko poso
iyan.
15 Gowani na bebetowan a Hibron sa Kiriyat Arba a aya maana niyan na Siti o Arba. (Si
Arba na aya lebi a kababantogan a mama ko manga Anakim.)
Na aden a kalilintad ko inged ka minitapelek on so dii katidawa.
YOSOWA 15
So Lopa a Miyambagian o Mbatabataa Yodah
So lopa a miyambagian o manga pamiliya a ped ko mbatabataa Yodah na iniraot ko
temanaan a Idomiya a aya pitemanan ko pagabagatan sii ko disirto a Sin.
2 Aya temanaan angkai a lopa sa pagabagatan na inipoon ko pagabagatan a kiyaposan ko
Maatay a Ragat
3 A miyakataros ko pagabagatan o Ipegokit sa Akrabim taman ko disirto sa Sin na
miyakadayon sii sa pagabagatan a Kadis Barniya taman den sa Hisron. Ipoon roo na
miyakadayon ai sa tampar sa pagotaraan taman sa Adar a ron den miyakakori a
miyakaantap sa Karkaa.
4 Ipoon roo na miyakataros ai taman sa Asmon ago roo pen ko Baogan sa Misir, na
miyakakedeg ko kilid o Baogan taman den ko
Ragat a Miditiraniyo. Giyanan i temanaan o inged a Yodah roo sa pagabagatan.
5 So temanaan iyan sa sebangan na so kilid o Maatay a Ragat taman den ko pekeantonan
on ko Lawasaig a Yordan.
So temanaan iyan sii sa pagotaraan na inipoon ko kiyaposan sa Yordan
6 Na miyakadayon sa pagotaraan taman sa Bit Hoglah, na miyakataros sii ko pagotaraan a
Bit Arabah a iniraot den ko Ator a Bohan (Si Bohan na wata a mama i Robin).
7 Ipoon roo na miyakatarapas ai ko Balintad a Akor taman sa Dibir a ron den miyakasilay
sa tampar sa pagotaraan ago miyakadayon sa Gilgal a mipepantag o Petekedegan sa
Adommim sii sa pagabagatan o balintad. Na miyakataros ai ko manga bowalan sa
Insimis na iniraot den sa Inrogil.
8 Ipoon roo na miyakatarapas ai ko Balintad a Hinom sii ko pagabagatan o bobongan a
ron so siti a Yarosalim a babalingan o manga Hibosiyo, na miyakataros ko poro o palaw
sii ko masesedepan o Balintad a Hinom sii ko pagotaraan a kiyaposan ko Balintad a
Ripaim.
9 Ipoon roo na miyakadayon so temanaan a iniraot ko manga bowalan sa Niptowah na
miyakataros roo ko manga siti a marani sa Palaw a Ipron, na roo miyakakori sa tampar sa
Baalah (a aya den Kiriyat Yarim).
10 Sii sa sedepan a Baalah na ron ai miyabangkiring a miyakaantap ko kapalawan sa
Idomiya na miyakataros ko pagotaraan o kababaan o Palaw a Yarim (a aya den Kisalon)
na miyakatondagay taman sa Bit Simis ago miyakataros den sa Timnah.
11 Iniraot so temanaan ko silid o bobongan sa pagotaraan a Ikron a roo miyakakori sa
tampar sa Sikron ago miyakasagad ko Palaw a Baalah na miyapos den sa Ragat a
Miditiraniyo.
12 Na so temanaan angkai a lopa sa sedepan na so kilid a Ragat a Miditiraniyo.
Giyai i manga temanaan ko mbabalibeta ko lopa o manga taw ko mbatabataa Yodah.
Miyaagaw i Kaleb a Hibron ago giya Dibir
13 Sabap ko inisogo o Allah ki Yosowa na inibegay niyan ki Kaleb a wata i Yaponih so
sabagi ko lopa o mbatabataa Yodah. Aya inibegay ron na giya Hibron a so siti a rek o
Arba a ama o Anak.
14 Na piyamogaw ron i Kaleb so telo a manga mbawataan o Anak, a so Sisay, so Ahiman
ago so Talmay.
15 Ipoon roo na somiyong sekaniyan sa Dibir sa kapakipetidawa iyan ko manga taw ron.
(Giyangakai a siti na bebetowan gowani sa Kiriyat Sipir.)
16 Na pitero i Kaleb a "Saden sa makagobat ago makaagaw sa Kiriyat Sipir na
pakipengaroma ko ron so wata aken a babay a si Aksah."
17 Na si Otniyal a wata i Kinis a pagari i Kaleb na aya miyakaagaw ko siti, na
piyakipangaroma on i Kaleb so wata iyan a si Aksah.
18 Kagiya makatepi siran na inisango i Aksah ki Otniyal a kapakapangni niyan ki ama
iyan sa lopa. Na somiyong si Aksah ki Kaleb na sii kiyatepad iyan ko kimar iyan na iniise
on i Kaleb a "Antonaa i pagangin ka raken?"
19 Inisembag iyan a "Begi ako ngka sa pamemegayan. Kiyabegan ako ngka den sa lopa
roo sa Nigib a kamara a darpa, na began ka raken pen so aden a manga pakaig on." Na
bigan sekaniyan pen i Kaleb sa lopa a aden a manga bowalan on ko kaporoan ago sa
kababaan.
So manga Siti a Miyakewali o Yodah
20 Giyai so miyakewali o manga pamiliya a ped ko mbatabataa Yodah:
21 So manga siti iran sii sa pagabagatan ko lopa iran a marani ko temanaan a Idomiya na
giya Kabsil, Idir, Yagor,
22 Kinah, Dimonah, Adadah,
25 Kidis, Hasor, Itnan,
24 Sip, Tilim, Biyalot,
25 Hasorhadatah, Kiriyothisron (a aya den Hasor),
26 Amam, Sima, Moladah,
27 Hasargadah, Hismon, Bitpilit,
28 Hasarsowal, Birsiba, Bisiyotiyas,
29 Baalah, Iim, Isim,
30 Iltolad, Kisil, Hormah,
31 Siklag, Madmanah, Sansanah,
32 Libaot, Silhim, Ain ago giya Rimon: dowa polo langon ago siyaw a manga siti a
mirarakes on so pepamagonayonayan ko oman i siti.
33 So manga siti iran sii ko kapantaran na giya Istaol, Sorah, Asnah,
34 Sanowah, Inganim, Tapowah, Inam,
35 Yarmot, Adolam, Sokoh, Asikah,
36 Saaraim, Aditaim, Gidirah ago giya Gidirotaim: sapolo ago pat a manga siti a
37 Aden pen a manga siti iran roo a giya Sinan, Hadasah, Migdalgad,
38 Diliyan, Mispah, Joktiil,
39 Lakis, Boskat, Iglon,
40 Kabon, Lamam, Kitlis,
41 Gidirot, Bitdagon, Naamah ago giya Makidah: sapolo ago nem a manga siti a
42 Aden pen a manga siti iran a giya Libnah, Itir, Asan,
43 Iptah, Asnah, Nisib,
44 Kailah, Aksib ago giya Marisah: siyaw a manga siti a mirarakes on so
pepamagonayonayan ko oman i siti.
45 Aden pen a rek iran a siti a Ikron ago so melilibeta on a manga inged
46 Ago so langon a siti a rakes o pepamagonayonayan on a marani sa Asdod ipoon sa
Ikron taman den sa Ragat a Miditiraniyo.
47 Rek iran pen so manga siti a Asdod ago Gasa a rakes o melilibeta on a manga inged
ago pepamagonayonayan on taman den sa Baogan sa Misir ago so kilid o Ragat a
Miditiraniyo.
48 Sii ko kapalawan na rek iran so manga siti a Siyamir, Yatir, Sokoh,
49 Danah, Kiriyatsanah (a aya den Dibir),
50 Anab, Istimowa, Anim,
51 Gosin, Holon ago giya Giloh: sapolo ago isa a siti a mirarakes on so
52 Aden pen a giya Arab, Domah, Isiyan,
53 Yanim, Bittapowah, Apikah,
54 Homtah, Hibron ago giya Siyor: siyaw a manga siti a mirarakes on so
55 Aden pen a giya Maon, Karmil, Sip, Yotah,
56 Yasriil, Yokdiyam, Sanowah,
57 Kain, Gibiyah ago giya Timnah: sapolo a manga siti a mirarakes on so
58 Aden pen a giya Halhol, Bitsor, Gidor,
59 Maarat, Bitanot ago giya Iltikon: nem a manga siti a mirarakes on so
60 Aden pen a Kiriyatbaal (a aya den Kiriyatyarim) ago giya Rabah: dowa a siti a
mirarakes on so pepamagonayonayan on.
61 Aya matatago ko disirto na giya Bitarabah, Midin, Sikakah,
62 Nibsan, Matimos a Siti ago giya Ingidi: nem a manga siti a mirarakes on so
63 Ogaid na so manga taw sa Yodah na di iran den kebogaw so manga Hibosiyo a
kibabaling sa Yarosalim, na pepeginged den so manga Hibosiyo a maaped ko manga
manga taw sa Yodah taman imanto.
YOSOWA 16
So Lopa a Miyambagian o Ipraim ago so Manasih
So temanaan o lopa a miyambagian o manga moriyataw o Yosop na inipoon sa Lawasaig
a Yordan a marani sa Yariko sii sa sebangan o manga bowalan sa Yariko na
miyakatarapas ko disirto taman den sa Bitil roo ko kapalawan.
2 Ipoon sa Bitil na miyakataros ai sa Los a iniraot sa Atarot a aya babalingan o manga
Arkitiyo
3 Na miyakadayon ai sa tampar sa sedepan taman ko inged o manga Yaplitiyo a taman
den sa Bithoron sa Baba. Ipoon roo na miyakataros ai sa Gisir na miyapos den roo ko
Ragat a Miditiraniyo.
4 So manga moriyataw o Yosop a so manga mbatabataa Ipraim ago Manasih sa sedepan
na miyatangan iran angkai a kawali iran.
So Lopa a Miyambagian o Ipraim
5 Giyai so lopa o manga pamiliya a ped ko mbatabataa Ipraim:
So temanaan iyan sa sebangan na inipoon sa Atarotadar na miyakadayon taman sa
Bithoron sa Poro.
6 Ipoon roo na miyakataros ai taman ko Ragat a Miditiraniyo. So siti a Mikmitah na roo
matatago sa pagotaraan o temanaan, na sii ko masesebangan a Mikmitah na miyakakori
so temanaan sa tampar sa Taanatsiloh na miyakasagad on sii sa sebangan ago miyakataros
den taman sa Yanohah.
7 Ipoon sa Yanohah na miyakadayon ai sa tampar sa pagabagatan taman sa Atarot ago
giya Naarah na iniraot sa Yariko na miyapos den ko Lawasaig a Yordan.
8 Ipoon sa Tapowah na miyakaantap so temanaan sa sedepan a miyakadayon taman ko
Baogan sa Kanah na miyapos den roo ko Ragat a Miditiraniyo.
Giyai so kawali o manga pamiliya a ped ko mbatabataa Ipraim
9 A mirarakes on pen so ped a manga siti ago so pepamagonayonayan on a inibegay kiran
sii ko lopa a miyakewali o mbatabataa Manasih.
10 Ogaid na da iran bogawa so manga Kanaaniyo a kibabaling sa Gisir. Sabap roo na so
manga Kanaaniyo na pepeginged den a maaped ko manga taw sa Ipraim taman imanto,
ogaid na miyapangongoripen siran o manga taw sa Ipraim.
YOSOWA 17
So Lopa a Miyambagian o Manasih sa Sedepan
Aden pen a lopa sa sedepan a Yordan a miyambagian o sabaad ko mbatabataa Manasih a
aya kaka a wata o Yosop. Giya Giliyad ago Basan roo sa sebangan a Yordan na
minibegay den ko manga mbawataan o Makir a aya kaka a wata o Manasih ago ama o
Giliiyad sabap sa mala sekaniyan a sondaro.
2 So ped a manga pamiliya a ped ko mbatabataa Manasih a miyakambagian ko lopa sa
sedepan a Yordan na so manga pamiliya o Abiyasir, Hilik, Asriyal, Sikim, Hipir ago
Simida. Manga moriyataw siran a manga mama o Manasih a wata o Yosop.
3 Ogaid na si Silopihad a wata i Hipir a wata i Giliyad a wata i Makir a aya wata o
Manasih na da a ba niyan manga wata a manga mama ka manga babay bo. Aya ngaran
iran na si Maklah, si Nowah, si Hoglah, si Milkah ago si Tirsah.
4 Na somiyong siran ki Iliyasar a imam ago sii ki Yosowa a wata i Non ago sii ko manga
olowan na pitero iran a "Inisogo o Allah ko Mosa a kambegi rekami sa lopa a makewali
ami a lagid mambo o kinibegan on ko manga mama a ped ko mbatabataa mi."
Kagiya ka maoto na bigan siran i Yosowa sa lopa a makewali ran a lagid mambo o
miyakewali o manga pagari o ama iran a manga mama, ka giyoto so sogoan o Allah.
5 Minisabap sii na miyakambagian so Manasih sa sapolo bagi ko lopa a inipagoman ko
manga inged a Giliyad ago Basan sii sa sabala a Yordan
6 Ka kagiya so manga moriyataw o Manasih a manga babay na miyakakewali sa lopa a
lagid mambo o manga moriyataw niyan a manga mama. (So inged a Giliyad na rek den o
ped a manga moriyataw o Manasih.)
7 So temanaan o lopa o mbatabataa Manasih na inipoon sa Asir a iniraot den sa Mikmitah
sii sa sebangan a Sikim. Ipoon roo na miyakadayon ai sa tampar sa pagabagatan taman
ko darpa o manga taw a kibabaling sa Intapowah.
8(So kalopaan ko melilibeta sa Tapowah na rek den o Manasih, ogaid na so siti a
Tapowah a matatago ko temanaan o lopa o Manasih na rek o mbatabataa Ipraim.)
9 Ipoon roo na miyakadayon so temanaan sa tampar sa pagabagatan taman sa Baogan a
Kanah. So ped ko manga siti sa pagabagatan o baogan na rek o mbatabataa Ipraim apiya
pen o sii siran ko soled o lopa o Manasih. Na miyakataros so temanaan o Manasih a
makakekedeg ko kilid o baogan sa pagotaraan na miyapos den ko Ragat a Miditiraniyo.
10 So lopa sa pagabagatan o baogan na rek o Ipraim, na so matatago ko pagotaraan iyan
na rek o Manasih, na so kilid o Ragat a Miditiraniyo na aya niyan temanaan roo sa
sedepan. So lopa o Asir na sii sa pagotaraan o Manasih, na so rek o Isakar na roo ko
masesebangan iyan.
11 Sii ko soled o lopa o Isakar ago Asir na aden a nem a manga siti on a inibegay ko
Manasih a mirarakes on so manga taw ron ago so pepamagonayonayan ko oman i siti:
giya Bitsiyan, Ibliyam, Dor, Indor, Taanak ago giya Migido.
12 Ogaid na so manga moriyataw o Manasih na di iran den kebogaw so manga Ikanaanen
a kibabaling sangkoto a manga siti ka totomegel siran den sa kapakababaling iran roo.
Apiya pen oto na sii ko kiyapakabager o manga Israil na tigel iran makanggalebek so
manga Ikanaanen, ogaid na da iran siran malengan mogaw.
Miyamangni so Mbawataan o Yosop sa Omanan so Lopa iran
14 So manga mbawataan o Yosop na pitero iran ki Yosowa a "Ino kami ngka baden
mbegi sa satiman a bagian ko lopa a makewali ami? Madakel kami a tanto sabap sa
kiyarakmatan kami den o Allah."
15 “O madakel kano," a inisembag i Yosowa, "a maito rekano bo so kapalawan a inged sa
Ipraim na takedeg kano ko manga kalasan na nggeba kano ron sa darpa a kebalingan iyo
roo ko lopa o manga Pirisiyo ago manga Ripaim."
16 Na pitero iran a "So kapalawan na di rekami petoon, na so langon a Ikanaanen a
kibabaling ko kapantaran na aden a manga karo iran a potaw sa katidawa a melagid so
kibabaling sa Bitsiyan ago so melilibeta on a manga darpa a lagid mambo o siran oto a
kibabaling ko Balintad a Yasriil."
17 Mandiyadi na pitero i Yosowa ko manga mbatabataa Ipraim ago Manasih a manga
moriyataw o Yosop a "Mataan a madakel kano ago tanto a mala i gees. Kena a ba isa bo
a darpa a mapembagian iyo.
18 Kekowa niyo pen so manga kapalawan a inged a ipangalasanen. Mapenggeba iyo ini
na kekowa niyo den taman ko pinakamawatan a manga temanaan iyan. Na makapantag
ko manga Ikanaanen na kebogaw niyo siran apiya pen aden a manga karo iran a potaw
ago mabager siran a manga taw."
YOSOWA 18
So Kiyambagibagia ko Miyalamba a Lopa
Sii ko kiyatabana iran ko inged na so langon o isa ka maginged a manga Israil na
mitimotimo roo sa Siloh na piyakatindeg iran so Barombarong a dii Telabokan.
2 Ogaid na aden pen a pito a mbatabataa manga Israil a da pen kasaadi ko lopa a
makewali ran.
3 Na pitero i Yosowa ko manga Israil a "Ay katey a kisendoden iyo ko katengana niyo ko
lopa a inibegay rekano o Allah a Tohan o manga apo iyo?
4 Pamili kano sa tetelo kataw a poon ko oman i mbatabataa. Pakipegenebeneb aken kiran
so dalem a kaingedan na isorat iran so manga temanaan o lopa a kebayaan kewali o oman
i mbatabataa; na kesoy siran raken bo.
5 Mapembaabaad iran so lopa sa pito bagi. So mbatabataa Yodah na di den keaog ko
lopa iran sa pagabagatan a lagid mambo o manga kiyababadan ko Yosop roo sa
pagotaraan.
6 Amay ka maipos iyo den somorat so manga temanaan o oman i bagian ko pito bagi ko
lopa na kewit iyo raken sii na peripaan aken sii ko kamamasai ron o Allah a Tohan tano
kaan matendo o antonaa i bagian on a makewali o oman i isa a mbatabataa.
7 Ogaid na so manga Libitiyo na di kesaadan sa lopa a lagid iyo ka so kapegimam iran
ko Allah i kawali iran. So manga mbatabataa Gad ago Robin ago so sabaad ko Manasih
na miyakowa iran den so kawali iran roo sa sebangan a Yordan a inibegay kiran o Mosa a
oripen o Allah."
8 Na sii ko kapengganat o manga mama ko lalakaw iran na ininsaratan siran i Yosowa a
tig iyan a "Ikano roo na pagenebeneba niyo so lopa na soraten iyo so manga temanaan
iyan. Maipos oto na kasoy kano raken ka peripaan aken sii ko kamamasai ron o Allah sii
sa Siloh sa katendoa ko bagian ko lopa a kekowa o oman i mbatabataa."
9 Na lomiyalakaw so manga mama na piyagenebeneb iran so inged na inisorat iran ko
ribro so manga temanaan o oman i bagian ko pito bagi on a rakes on so manga siti sii ko
oman i bagian. Na komiyasoy siran ki Yosowa roo ko kampo sa Siloh.
10 Roo sa Siloh na rinipa ini i Yosowa sii ko kamamasaan o Allah sa katendoa niyan ko
bagian ko lopa a pakipembagian iyan ko oman i mbatabataa manga Israil.
So Lopa a Inibegay ko Baniyamin
11 So paganay a bagian ko lopa a miyaripa na inibegay ko manga pamiliya a ped ko
mbatabataa Baniyamin. Giyai na sii ko pageletan o lopa o Yodah ago so lopa o manga
moriyataw o Yosop.
12 So temanaan o lopa iran sa pagotaraan na ipoon sa Lawasaig a Yordan na
miyakatakedeg ko silid sa pagotaraan a Yariko ago miyakataros sa tampar sa sedepan a
miyakatarapas ko manga kapalawan na iniraot den sa disirto sa Bitabin.
13 Ipoon roo na miyakadayon ai sa tampar sa pagabagatan a miyakaantap sa Los (a aya
den Bitil) na miyakataros taman sa Atarotadar sii ko bobongan a matatago sa pagabagatan
a BitHoron sa Baba.
14 Roo miyakakori so temanaan a miyakadayon sa tampar sa pagabagatan ipoon ko
masesedepan a kilid angkai a bobongan ago miyakataros taman den sa Kiriyatbaal (a aya
den Kiriyatyarim) a so isa a siti a rek o mbatabataa Yodah. Giyanan i temanaan o lopa
iran roo sa sedepan.
15 So temanaan iyan sa pagabagatan na ipoon ko kilid a Kiriyatyarim na miyakadayon sa
tampar sa sedepan taman ko Manga Bowalan sa Niptowah.
16 Miyakataros ai taman ko kababaan o palaw a makatotolong ko Balintad a Hinom sii ko
pagotaraan a kiyaposan ko Balintad a Ripaim. Ipoon roo na miyakadayon sa tampar sa
pagabagatan a miyakatarapas ko Balintad a Hinom sii ko pagabagatan o kilid o
babalingan o manga Hibosiyo, na miyakataros den taman sa Inrogil.
17 Sii den miyakakori so temanaan sa tampar sa pagotaraan a miyakadayon sa Insimis na
miyakataros taman den sa Gililot a mipepantag o Petekedegan sa Adomim. Ipoon roo na
miyakatondagay ini ko Ator a Bohan (si Bohan na wata i Robin)
18 Na miyakadayon ko pagotaraan o mabebakenal a makatotolong ko Balintad a Yordan.
Na miyakatondagay oto sii ko Balintad
19 Na miyakataros sii ko pagotaraan a kilid a BitHoglah na miyapos den ko pagotaraan a
kiyaposan ko Maatay a Ragat sii ko pekeantonan on o Lawasaig a Yordan. Giyanan i
pagabagatan a temanaan o lopa iran.
20 Na aya temanaan iyan sa sebangan na so Lawasaig a Yordan.
Giyai i manga temanaan o lopa a miyakewali o manga pamiliya a ped ko mbatabataa
Baniyamin.
So manga Siti a Rek o Baniyamin
21 So manga siti a rek o manga pamiliya a ped ko mbatabataa Baniyamin na giya Yariko,
Bithoglah, Imikkisis
22 Bitarabah, Simaraim, Bitil,
23 Abim, Parah, Oprah,
24 Kiparamoni, Opni ago giya Giba a sapolo ago dowa a manga siti a mirarakes on so
25 Aden pen a manga siti iran a Gibiyon, Ramah, Birot,
26 Mispih, Kipirah, Mosah,
27 Rikim, Irpiil, Taralah,
28 Sila, Hailip, Hibos (a aya den Yarosalim), Gibiyah ago giya Kiriyatyarim a sapolo ago
pat a manga siti a mirarakes on so pepamagonayonayan ko oman i siti.
Giyai so lopa a miyakewali o manga pamiliya a ped ko mbatabataa Baniyamin.
YOSOWA 19
So Lopa a Inibegay ko Simiyon
So ikadowa a bagian ko lopa na inibegay ko manga pamiliya a ped ko mbatabataa
Simiyon. Giyangkai a kawali iran na sii makasosoled ko lopa a aya kawali o mbatabataa
Yodah.
2 So manga siti a mirarakes on na giya Birsiba, Siba, Moladah,
3 Hasarsiyowal, Balah, Isim,
4 Iltolad, Bitol, Hormah,
5 Siklag, Bitmarkabot, Hasarsosah,
6 Bitlibaot ago giya Siyarohin: sapolo ago telo a manga siti a mirarakes on so
7 Aden pen a manga siti iran a Ain, Rimon, Itir ago giya Asiyan: pat a manga siti a rakes
o pepamagonayonayan ko oman i siti.
8 Mirarakes on pen so langon a inged ko melilibeta sangkai a manga siti taman sa
Baalatibir (a aya den Ramah) sii sa pagabagatan.
Giyai so lopa a inibegay ko manga pamiliya a ped ko mbatabataa Simiyon a makewali
ran.
9 Makasosoled ai ko lopa o mbatabataa Yodah ka kagiya so lopa a inibegay ko Yodah na
lebi kiran a maolad.
So Lopa a Inibegay ko Sibolon
10 So ikatelo a bagian ko lopa na inibegay ko manga pamiliya a ped ko mbatabataa
Sibolon.
So lopa iran na iniraot sa Sarid.
11 Ipoon roo na miyakadayon oto sa tampar sa sedepan a miyakasagad sa Mariyal taman
den sa Dabisit ago so baogan ko masesebangan a Yokniyam.
12 Na ipoon ko sabala a Sarid na miyakadayon so temanaan sa tampar sa sebangan taman
ko temanaan a Kislottabor a miyakataros oto taman sa Dabirat na miyakatakedeg taman
den sa Yapiya.
13 Ipoon roo na miyakataros ai sa tampar sa sebangan taman sa Gathipir ago Itkasin a roo
den miyakakori a miyakaantap sa Niyah sii ko kiyapakataros iyan sa Rimon.
14 Sii sa pagotaraan na miyakakori so temanaan a miyakaantap sa Hanaton a iniraot den
sa Balintad a Iptahil.
15 Mirarakes sangkai a lopa so manga siti a Katah, Nahalal, Simron, Idalah ago giya
Bitlihim: sapolo ago dowa a manga siti a rakes o pepamagonayonayan ko oman i siti.
16 Giyai so kawali o manga pamiliya a ped ko mbatabataa Sibolon.
So Lopa a Inibegay ko Isakar
17 So ikapat a bagian ko lopa na inibegay ko manga pamiliya a ped ko mbatabataa Isakar.
18 Mirarakes ko lopa iran so manga siti a Yasriil, Kisolot, Siyonim,
19 Haparaim, Siyon, Anaharat,
20 Rabit, Kisiyon, Ibis,
21 Rimit, Inganim, Inhadah ago giya Bitpasis.
22 So temanaan iyan na iniraot sa Tabor, Siyahasomah ago Bitsimis, na miyapos den roo
ko Lawasaig a Yordan: sapolo ini ago nem a manga siti a mirarakes on so
23 Giyai so lopa a miyakewali o manga pamiliya a ped ko mbatabataa Isakar.
So Lopa a Inibegay sa Asir
24 So ikalima a bagian ko lopa na inibegay ko manga pamiliya a ped ko mbatabataa Asir.
25 Mirarakes sangkai a lopa so manga siti a Hilkat, Hali, Bitin, Aksiyap,
26 Alamilik, Amad ago giya Misiyal. So temanaan iyan sa sedepan na ipoon sa Karmil a
miyakadayon sa Sihorlibnat
27 Na sii den miyakakori a miyakaantap sa sebangan a iniraot sa Bitdagon, na
miyakataros ai a miyakasagad sa Sibolon ago so Balintad a Iptahil sii ko kiyapakataros
iyan sa tampar sa pagotaraan taman den sa Bitimik ago Niyal. Miyakataros ai sa tampar
sa pagotaraan taman so manga siti a Kabol,
28 Ibron, Rihob, Hamon ago giya Kanah na iniraot den sa Mala a Sidon.
29 Sii den miyakakori so temanaan sa tampar sa Ramah a iniraot ko kokotaan a siti a Tiro
a sii den miyakakori sa Hosah na miyapos den ko Ragat a Miditiraniyo. Mirarakes
sangkai a lopa so manga siti a Mahalab, Aksib,
30 Omah, Apik ago giya Rihob: dowa polo ago dowa a manga siti a rakes on so
31 Giyai so lopa a miyakewali o manga pamiliya ko mbatabataa Asir.
So Lopa a Inibegay ko Naptali
32 So ikanem a bagian ko lopa na inibegay ko manga pamiliya a ped ko mbatabataa
Naptali.
33 So temanaan iyan na ipoon sa Hilip, ipoon ko kayo a Kalipapa roo sa Saananim na
miyakadayon ai taman sa Adaminikib ago Yabmil a iniraot sa Lakom na miyapos den ko
Lawasaig a Yordan.
34 Roo den miyakakori so temanaan sa tampar sa sedepan a miyakadayon taman sa
Asnottabor ago miyakataros ai sa Hokok a iniraot den sa lopa o Sibolon sii sa pagotaraan
ago so lopa o Asir sii sa sedepan ago so Lawasaig a Yordan sa sebangan.
35 So kikokotaan a manga siti a mirarakes sangkai a lopa na giya Sidim, Sir, Hamat,
Rakat, Kinirit,
36 Adamah, Ramah, Hasor,
37 Kidis, Idri, Inhasor,
38 Hiron, Migdalil, Horim, Bitanat ago Bitsimis: sapolo ago siyaw a manga siti a
39 Giyai so lopa a miyakewali o manga pamiliya a ped ko mbatabataa Naptali.
So Lopa a Inibegay ko Dan
40 So ikapito a bagian ko lopa na inibegay ko manga pamiliya a ped ko mbatabataa Dan.
41 So manga siti a mirarakes ko kawali iran na giya Sorah, Istaol, Irsimis,
42 Siyaalabim, Aihalon, Itlah,
43 Ilon, Timnah, Ikron,
44 Iltikih, Gibiton, Baalat,
45 Yahod, Binibirak, Gatrimon,
46 Miharkon, ago giya Rakon ago so kalopaan a makalilibet sa Yopa.
47 Ogaid na sabap sa maito kiran so lopa a miyambagian o mbatabataa Dan na somiyong
siran sa Lais na giyobat iran. Inagaw iran na piyamono iran a pedang so manga taw ron.
Kinowa iran so siti na biyalingan iran, na bitowan iran sa Dan a aya iran apoapoan.
48 Giyai so lopa a miyakewali o manga pamiliya a ped ko mbatabataa Dan a mirarakes on
angkai a manga siti ago so pepamagonayonayan ko oman i siti.
So Lopa a Inibegay ki Yosowa
49 Sii ko kiyaipos o dii kambagibagia ko lopa a miyakewali o manga taw sa Israil na
bigan iran si Yosowa a wata i Non sa lopa a mapekewali niyan a maaped kiran.
50 Miyatero den o Allah a imbegay rekaniyan so apiya antonaa a siti a piyangni niyan, na
giyanan so siti a Timnatsirah sii ko kapalawan sa Ipraim. Na biyangon iyan ai peroman
na miyaling roo.
51 Giyai so manga bagian ko lopa a miyakewali o manga pamiliya a ped ko manga
mbatabataa manga Israil. Miyambaabaad ai kiran i Iliyasar a imam, si Yosowa a wata i
Non ago so manga olowan o manga pamiliya iran a miyakanggolalan sa ripa roo sa Siloh
ko kamamasai ron o Allah sii ko kasasangoran o gimowa o Barombarong a dii Telabokan.
Na miyapasad iran den so kiyambagibagia ko lopa.
YOSOWA 20
So manga Siti a Pekeapasan
Sa masa oto na pitero o Allah ki Yosowa a
2 “Teroa ngka ko manga Israil a 'Pamili kano sa manga siti a pekeapasan a miyatero aken
rekano den a nggolalan ko Mosa.'
3 Saden sa miyakapatay sa taw a miyadigrasiya ago da niyan tibabaa na makapegapas roo
kaan malinding ko taw a iseop iyan so miyatay.
4 Amay ka miyakapagapas sekaniyan ko isa sangkoto a manga siti na pekatindeg
sekaniyan sii ko gimowa o siti na mapenotol iyan ko manga pelokelokesen ko siti so
miyasowasowa. Na pekasoleden iran sekaniyan ko siti ago kebegan iran sa darpa a
kebalingan iyan sii kiran.
5 O selobaa sekaniyan o seop on na so manga taw ko siti na di iran on kepalad so
miyakapatay sabap sa da tibabaa a kiyapataya niyan ko siringan iyan a kena a ba niyan
riridoa gowani.
6 Pekatareg sekaniyan sangkoto a siti taman sa makokom o manga pangongokom on ago
taman ko kapatay o maporo a imam a kapapantagan sa masa oto. Maipos ai na pekakasoy
den so miyakapatay ko babalingan iyan sii ko siti a piyalagoyan iyan."
7 So manga siti a inisenggay iran ko masesedepan a Yordan na giya Kidis sii sa Galili ko
kapalawan sa Naptali, giya Sikim sii ko kapalawan sa Ipraim ago giya Kiriyatarba (a aya
den Hibron) sii ko kapalawan sa Yodah.
8 Sii ko sabala a Yordan sa sebangan a Yariko na inisenggay iran on a Bisir sii ko
kapantaran a disirto sii ko lopa o mbatabataa Robin, giya Ramot sa Giliyad sii ko lopa o
mbatabataa Gad ago giya Golan sa Basan sii ko lopa o mbatabataa Manasih.
9 Giyai so manga siti a inisenggay a pekeapasan o langon o manga taw sa Israil a lagid
mambo o manga mananangga a pepeginged sii kiran. Na saden sa miyakapatay sa taw a
da tibabaa na pekapagapas roo ko isa sangkai a manga siti kaan makalidas ko kambonoa
on o seop on taman sa di sekaniyan pen makokom o manga pangongokom.
YOSOWA 21
So manga Siti a Inibegay ko manga Libitiyo
Sa masa oto na so manga olowan o manga pamiliya a ped ko mbatabataa Libi na
somiyong ki Iliyasar a imam, sii ki Yosowa a wata i Non ago sii ko manga olowan o
manga pamiliya a ped ko langon a mbatabataa manga Israil.
2 Na roo sa Siloh sa inged a Kanaan na pitero iran kiran a "Inisogo o Allah a nggolalan ko
Mosa a began kami sa manga siti a kebalingan ami a rakes on so manga pangomaan a
kapenateban o manga pangangayamen ami."
3 Kagiya ka maoto na sabap ko sogoan o Allah na bigan o manga Israil so manga Libitiyo
sa manga siti ago manga pepanateban a sii matatago ko lopa a miyakewali ran.
4 So manga Libitiyo a aya paganay a piyamegan sa manga siti na so mbawataan o Kohat a
wata o Libi. So manga mbawataan o Kohat a aya kiyababadan ko Aron a imam na bigan
sa sapolo ago telo a manga siti a matatago ko lopa o manga mbatabataa Yodah, Simiyon
ago Baniyamin.
5 So ped a manga mbawataan o Kohat na bigan sa sapolo a manga siti a matatago ko lopa
o manga mbatabataa Ipraim ago Dan ago so sabaad ko mbatabataa Manasih.
6 So manga mbawataan o Girson na bigan sa sapolo ago telo a manga siti a matatago ko
lopa o manga mbatabataa Isakar, Asir, Naptali ago so sabaad ko mbatabataa Manasih roo
sa Basan.
7 So manga mbawataan o Mirari na bigan sa sapolo ago dowa a manga siti a matatago ko
lopa o manga mbatabataa Robin, Gad ago Sibolon.
8 Giyangkai a manga siti a rakes o manga pepanateban ko mbalabala on na inibegay o
manga Israil ko manga Libitiyo a miyakanggolalan sa ripa, ka giyoto so sogoan o Allah a
nggolalan ko Mosa.
So manga Mbawataan o Kohat a manga Moriyataw o Aron
9 Giyai so manga siti a matatago ko lopa o manga mbatabataa Yodah ago Simiyon a
inibegay
10 Ko manga moriyataw o Aron a ped siran ko manga mbawataan o Kohat a isa ko
manga wata o Libi, ka siran i paganay a miyaripa.
11 Inibegay kiran so siti a Arba (so Arba na ama o Anak) a bebetowan imanto sa Hibron
sii ko kapalawan sa Yodah a rakes on so manga pepanateban ko mbalabala on.
12 Ogaid na so manga pangomaan ko liyo o siti ago so pepamagonayonayan on na
inibegay den ki Kaleb a wata i Yaponih a aya niyan kawali.
13 Liyo pen sa Hibron (giyanan na isa ko manga siti a pekeapasan o miyakapatay sa taw)
na aden pen a manga siti a inibegay ko manga moriyataw o Aron a imam: giya Libnah,
14 Yatir, Istimowa,
15 Holon, Dibir,
16 Ain, Yotah ago Bitsimis a mirarakes on so manga pepanateban on: siyaw a manga siti
a matatago ko lopa o manga mbatabataa Yodah ago Simiyon.
17 Bigan siran pen sa pat a manga siti a maaped ko lopa o Baniyamin a giya Gibiyon,
Giba,
18 Anatot ago Almon a rakes o manga pepanateban on.
19 Sapolo ini ago telo langon a manga siti a rakes o manga pepanateban on a inibegay ko
manga moriyataw o Aron a imam.
So ped a manga Mbawataan o Kohat
So ped a manga Libitiyo a ped ko mbawataan o Kohat na bigan sa manga siti a matatago
ko lopa o mbatabataa Ipraim.
21 Bigan siran sa pat a manga siti a giya Sikim a rakes o pepanateban on sii ko kapalawan
sa Ipraim (giyanan na isa ko manga siti a pekeapasan o miyakapatay sa taw), ago giya
Gisir,
22 Kibsaim ago Bithoron a mirarakes on so manga pepanateban on.
23 Bigan siran pen sa pat a manga siti a maaped ko lopa o Dan a giya Iltikih, Gibiton,
24 Aihalon ago Gatromin a rakes o manga pepanateban on.
25 Bigan siran pen sa dowa a manga siti a matatago ko lopa o sabaad ko mbatabataa
Manasih roo sa sedepan a giya Tanak ago salakaw a Gatrimon a rakes o manga
pepanateban on.
26 Sapolo langon a manga siti a mirarakes on so manga pepanateban on a inibegay ko ped
a manga mbawataan o Kohat.
So manga Mbawataan o Girson
27 So manga Libitiyo a ped ko mbawataan o Girson na bigan siran sa dowa a manga siti a
matatago ko lopa o sabaad ko mbatabataa Manasih roo sa sebangan a giya Golan sii sa
Basan (giyanan na isa ko manga siti a pekeapasan o miyakapatay) ago Biistirah a rakes o
manga pepanateban on.
28 Bigan siran sa pat a manga siti a matatago ko lopa o mbatabataa Isakar a giya Kison,
Dabirat,
29 Yarmot ago Inganim a rakes on so manga pepanateban on.
30 Bigan siran sa pat a manga siti a matatago ko lopa o mbatabataa Asir a giya Misiyal,
Abdon,
31 Hilkat ago Rihob a rakes o manga pepanateban on.
32 Na bigan siran pen sa telo a manga siti a matatago ko lopa o mbatabataa Naptali a giya
Kidis sii sa Galili (giyanan so isa ko manga siti a pekeapasan) ago giya Hamotdor ago
Kartan.
33 Sapolo ago telo langon a manga siti a rakes o manga pepanateban on a inibegay ko
manga mbawataan o Girson.
So manga Mbawataan o Mirari
34 So ped a manga Libitiyo a ped siran ko mbawataan o Mirari na bigan sa pat a manga
siti a poon ko lopa o mbatabataa Sibolon a giya Yoknaim, Kartah,
35 Dimnah ago Nahalal a rakes on so manga pepanateban on.
36 Bigan siran sa pat a manga siti a matatago ko lopa o mbatabataa Robin a giya Bisir,
Yahas,
37 Kidimot ago Mipaat a rakes o manga pepanateban on.
38 Na bigan siran pen sa pat a manga siti a matatago ko lopa o mbatabataa Gad a giya
Ramot sa Giliyad (giyanan so isa ko manga siti a pekeapasan), giya Mahanaim,
39 Hisbon, ago Yasir a rakes on so manga pepanateban on.
40 Sapolo ago dowa langon a manga siti a inibegay ko manga mbawataan o Mirari a so
ped pen ko manga Libitiyo.
41 Pat polo ago walo langon a manga siti a matatago ko lopa a matatangan o manga Israil
a inibegay ko manga Libitiyo a mirarakes on so manga pepanateban on.
42 Oman i isa sangkai a manga siti na aden a makalilibet on a manga pepanateban.
Miyatangan o manga Israil so Lopa
43 Inibegay o Allah ko manga Israil so langon a lopa a minitopa niyan a imbegay niyan
ko manga apoapoan iran, na miyatangan iran ai ago piyagingedan.
44 Na bigan siran o Allah sa kalilintad sii ko mbalabala kiran ka giyoto so minitopa niyan
ko manga apo iran. Da den a sakataw bo ko manga ridoay iran a ba miyakapamayandeg
ko hadapan iran ka piyalad kiran o Allah so langon a ridoay iran.
45 Da den a isa bo ko langon a manga pipiya a minitopa o Allah ko manga Israil a ba
miyailang. Langon den ai minitoman.
YOSOWA 22
Piyakabaling i Yosowa so manga Mbatabataa a Pepeginged sa Sebangan a Yordan
Sa masa oto na tinimo i Yosowa so manga taw ko mbatabataa Robin, Gad ago so sabaad
ko mbatabataa Manasih,
2 Na pitero iyan kiran a "Mininggolalan iyo so langon a inisogo rekano o Mosa a oripen o
Allah na miyatoman iyo pen so oman i inisogo aken rekano.
3 Da niyo den awai so manga pagari niyo ko ped a manga mbatabataa sangkai a miyatey
den a manga gawii taman den imanto. Pipiyapiyaan iyo tomoman so manga sogoan o
Allah a Tohan iyo.
4 Imanto na kiyabegan den o Allah a Tohan iyo sa kalilintad so manga pagari niyo a aya
niyan den minitopa. Sabap roo na baling kano den na kasoy kano ko lopa a miyakewali
niyo a inibegay rekano o Mosa a oripen o Allah roo ko sabala a Lawasaig a Yordan.
5 Ogaid na tanto kano a pagitktiyar sa kapetomana niyo ko manga sogoan ago so kitab a
inibegay rekano o Mosa, a giyoto so kapekebebayai ko Allah a Tohan iyo, so kapekedega
ko langon a manga lalan iyan, so kapeparatiyayaa ko manga sogoan iyan, so kakapeti
rekaniyan sebenar ago so kapepangongonotani ron sa iklas ko poso iyo ago niyawa."
68 Sii ko kiyapakabalinga kiran i Yosowa na inipamangni niyan siran sa rakmat, na pitero
iyan kiran a "Kasoy kano a rakes o mala a patemotamokan iyo a so madakel a manga
pangangayamen, pirak, bolawan, tombaga, potaw ago madakel a manga nditaren.
Mbagibagia niyo ko manga pagari niyo angkai a miyateban iyo ko manga ridoay niyo."
Na miselingganat siran maling.
Inibegay gowani o Mosa ko sabaad ko mbatabataa Manasih so inged a Basan roo sa
sebangan a Yordan. Ogaid na so isa a sabaad kiran na kiyabegan iyan den sa lopa sii sa
sedepan a Yordan a maaped ko manga pagari ran ko ped a manga mbatabataa.
9 Na miyaling so manga mbatabataa Robin, Gad ago so sabaad ko Manasih. Inawaan iran
so ped a manga Israil roo sa Siloh sa inged a Kanaan ka komiyasoy siran ko rek iran a
lopa roo sa Giliyad a miyakowa iran sabap ko inisogo o Allah a nggolalan ko Mosa.
So Aparan sa Kilid a Yordan
10 Ogaid na sii ko kiyapakaoma iran ko kilid a Yordan sa sedepan sa kasisii ran pen sa
inged a Kanaan na miyangon so manga mbatabataa Robin, Gad ago so sabaad ko Manasih
sa mala a aparan a piyakamemesa a pegilain sii ko darpa a bebetowan sa Gililot.
11 Na miyatero ko ped a manga Israil a "Ilaya niyo! So manga mbatabataa Robin, Gad
ago so sabaad ko Manasih na miyangon sa aparan roo sa Gililot sii ko inged tano a
Kanaan sa sedepan a Yordan!"
12 So kiyanega iran sii na mitimotimo so langon a manga Israil roo sa Siloh ka song siran
sa sebangan a Yordan sa kapakipetidawa iran ko manga pagari ran.
13 Ogaid na siyogo iran daan si Pinihas a wata i Iliyasar a imam ko manga mbatabataa
Robin, Gad ago so sabaad ko Manasih roo sa inged a Giliyad.
14 Inonotan si Pinihas o sapolo a manga sanasanaan a sesakataw a poon ko oman i
mbatabataa manga Israil a so oman i isa kiran na olowan o isa a pamiliya a ped ko manga
mbawataan o Israil.
15 Sii ko kiyapakaoma iran ko inged a Giliyad na pitero iran ko manga mbatabataa
Robin, Gad ago so sabaad ko Manasih a
16 “Iniise o kalangolangon a manga pagtaw o Allah o antonaa ngkai a kiyaongkira niyo
ko Tohan o Israil. Tiyalikodan iyo imanto so kapepangongonotani niyo ko Allah.
Somiyopak kano ko Allah ko kinimbaalen iyo sa aparan ko manga ginawa niyo.
17 Ba da pen kadiyangkai rektano so kiyapakandosa tano roo sa Piyor? Taman sangkai a
gawii na da tano ron masoti apiya pen inisiksa oto o langon o manga pagtaw o Allah.
18 Na petelikodan iyo bes imanto so Allah? O sopaka niyo so Allah imanto a gawii na
kerarangitan iyan so langon o isa ka maginged a Israil mapita.
19 O miyakaram so lopa a miyakowa niyo a di patot ko kapesimbai ron na ripag kano ko
sabala a Yordan sii ko lopa o Allah a ndodon so Barombarong a Pesimbaan on na
mbagian kano ko lopa a ped rekami. Ogaid na di niyo sopaka so Allah o di na sekami a
nggolalan ko kipembaalen iyo sa aparan ko manga ginawa niyo a liyo ko aparan o Allah a
Tohan tano.
20 Tademi niyo a initana so rarangit o Allah ko langon o isa ka maginged a Israil isako
makandosa si Akan a wata i Sirah ko kiyakowaa niyan ko manga nganin a inisenggay ko
kambinasaa on. Kena bo a ba sekaniyan i miyatay sabap ko dosa niyan!"
21 Na somimbag so manga mbatabataa Robin, Gad ago sa sabaad ko Manasih a tig iran
ko manga olowan o manga mbawataan o Israil a
22 “So Allah i Lebi a Mamaapaar a Tohan! So Allah a Lebi a Mamaapaar a Tohan na
katawan iyan o ino ami ai penggolaolaa, na ketokawan mambo o langon a manga Israil.
O somiyopak kami ko Allah o di na miyakandosa kami ron na di kami niyo pelepasa
sangkai a gawii ko kambonoa rekami!
23 O tiyalikodan ami so Allah ko kinimbaalen ami ko ginawa mi sa aparan a ketotongan
sa manga soasoat ago manga pamemegayan a pereperan, o di na manga korban pantag bo
ko kanggiginawai na pengnin ami a so den so Allah i somiksa rekami!
24 Kena oto a ba aya mi ron kiyambaali, ka aya sabap iyan na ipekelek ami a sii ko
pekatalingoma a manga gawii na masiken a peteroon o manga wata iyo ko manga
wata ami a 'Antonaa i labot iyo ko Allah a Tohan o Israil?
25 Ka biyaloy o Allah a Yordan a temanaan a mipapagelet rekami ago sekano a manga
mbatabataa Robin ago Gad. Da a bagian iyo ko Allah!' Na masiken a pekataregen o
manga wata iyo so manga wata ami ko kapesimbaa iran ko Allah.
26 Giyoto i sabap a miyapamikir ami a mbaal kami sa aparan a kena a ba ketotongan sa
manga soasoat ago manga korban
27 Ka sabap sa an mabaloy a ipenanadem ko manga mbawataan ami ago sii ko manga
mbawataan iyo sa pesimba kami mambo ko Allah sii ko darpa a pesimbaan on a
nggolalan ko kipesepaaten ami ron ko manga korban a petotongen ago ago manga korban
pantag bo ko kanggiginawai. Amay ka magiyoto na di mapetero o manga wata iyo ko
manga wata ami sii ko pekatalingoma a manga gawii a 'Da a ba niyo labot ko Allah!'
28 “Aya mapipikir ami na opama ka matero iran ai rekami o di na sii ko manga
mbawataan ami ko pekatalingoma a masa na mapetero ami a 'Ilaya niyo so kiyasayanan
ko aparan o Allah a miyabangon o manga apo ami. Kena oto a ba ketotongan sa manga
soasoat o di na manga korban, ka ipenanadem ai rekami ago sii rekano.
29 Makawatan rekami so kasopaka mi ko Allah ago so katelikodi ami ron ko
kapagembaal ami sa aparan a ketotongan sa manga soasoat ago manga pamemegayan a
pereperan ago manga korban a liyo ko aparan o Allah a Tohan tano a ndodon ko
kasasangoran o Barombarong a Pesimbaan on."
30 Kagiya maneg i Pinihas a imam ago so manga sanasanaan ko isa ka maginged ago so
manga olowan o manga mbawataan iran so pitero o manga mbatabataa Robin, Gad ago so
sabaad ko Manasih na miyasoat siran.
31 Na pitero kiran i Pinihas a wata i Iliyasar a imam a "Imanto na katawan ami a sisii
rektano so Allah. Da kano bes makandosa ko Allah sangkai a betad, na piyakalidas iyo so
manga taw sa Israil ko kapendadaneg o Allah."
32 Mandiyadi na si Pinihas a wata i Iliyasar a imam ago so manga sanasanaan na inawaan
iran so manga mbatabataa Robin ago Gad roo sa inged a Giliyad na komiyasoy siran sa
inged a Kanaan, na piyanotol iran ko manga Israil so makapantag ko miyanggolaola.
33 Na inikasoat ai o manga Israil na piyodi iran so Tohan; na da iran den aloya so
mipantag ko kapakipetidawa iran ko manga mbatabataa Robin ago Gad sa kambinasaa
iran ko inged a babalingan iran.
34 Na so manga mbatabataa Robin ago Gad na bitowan iran so aparan sa 'Saksi,' ka pitero
iran a "Giyanan na saksi rektano langon sa so Allah na aya den Tohan."
YOSOWA 23
Miyodas si Yosowa ko manga Olowan
Kagiya makasagad so miyatey a alongan a kiyabegan den o Allah so manga Israil sa
kalilintad ko langon o manga ridoay iran sii ko mbalabala na miyalokes si Yosowa a tanto
den a minitolod so idad iyan.
2 Na tinimo iyan so langon o manga Israil, a so manga pelokelokesen, manga olowan,
manga pangongokom ago manga sanasanaan iran na pitero iyan kiran a "Miyalokes ako
den imanto.
3 Miyailay niyo so langon taman a pinggolaola o Allah a kamapiyaan iyo sii sangkai a
langon a manga nasiyon, ka so den so Allah a Tohan iyo i miyakitidawa sabap rekano.
4 Na miyambagibagi aken den ko manga mbatabataa rekano so langon o lopa o manga
nasiyon a mapekewali niyo ipoon ko Lawasaig a Yordan sii sa sebangan na taman den ko
Ragat a Miditiraniyo roo sa sedepan a so lopa o manga nasiyon a miyataban aken den a
mirarakes on so lopa o ped a manga nasiyon a da pen mataban.
5 So den so Allah a Tohan iyo i mbogaw kiran. Ipenendeg iyan siran sii ko kapegantap
iyo kiran na tenganen iyo so lopa iran ka giyoto so minitopa rekano o Allah.
6 “Kagiya ka maoto na pakababager kano sa kapeparatiyayaa niyo ago kapetomana ko
langon a minisorat ko Ribro a Kitab o Mosa. Di kano den silay sa kawanan o di na sa
diwang.
7 Di kano pakipegepeda sangkai a manga nasiyon a miyalamba sii sangkai a inged iyo.
Di niyo mbetowa so ingaran o manga katohanan iran aya pen o ba niyo sepaan. Di niyo
siran simbaa aya pen o ba niyo sodiyodi.
8 Ka kapeti niyo baden sebenar so Allah a Tohan iyo a datar o di niyo dii nggolaolaan
taman imanto.
9 “Piyamogaw o Allah so manga ala ago manga babager a nasiyon sii ko kapegantap iyo
kiran, na taman imanto na da den a sakataw bo a ba miyakapamayandeg ko hadapan iyo.
10 So isa rekano na pekadendeg sa sanggibo ko manga ridoay niyo ka kagiya so Allah a
Tohan iyo i dii makitidawa sabap rekano a aya niyan rekano den minitopa.
11 Sabap roo na iktiyari niyo piyapiya a ginawa niyo sa kapekebabayai niyo ko Allah a
Tohan iyo.
12 Ka o tomalikod kano ron ago makipetepi kano sangkai a manga nasiyon a miyalamba
sii rekano ago makikemonga kano kiran
13 Na sabota niyo a matamataan den a so Allah a Tohan iyo na di niyan den mbogaon
angkai a manga nasiyon sii ko kapegantap iyo kiran. Ka kebaloy siran baden a kisampirot
ago kilitag rekano, ago manga lilit sii ko likod iyo ago manga sorok sii ko manga mata
niyo, na pekitaros den ai taman sa kakeda iyo sangkai a mapiya a lopa a inibegay rekano o
Allah a Tohan iyo.
14 “Di ketey na petay ako a aya keokitan o langon o manosiya. Oman i isa rekano na
katawan iyan sii ko poso iyan ago ginawa niyan a da den a isa bo ko langon a manga
pipiya a minitopa rekano o Allah a Tohan iyo a ba miyailang. Oman i isa on na
minitoman den!
15 Ogaid na datar den o kiyapakatalingoma rekano o langon a manga pipiya a minitopa
rekano o Allah a Tohan iyo na lagid oto mambo a kitomaparaken iyan rekano ko langon a
kamoralaan a piyakaiktiyaran iyan rekano taman sa mabinasa kano niyan sangkai a
mapiya a lopa a inibegay niyan rekano.
16 O sopaka niyo so kapasadan o Allah a Tohan iyo a inisogo iyan a katomana niyo
ron ka pengongonotan kano ko salakaw a manga tohan ago sodiyod kano ron na
pemborngat rekano so gani o Allah na magaan so magaan a kakeda iyo ko mapiya a lopa
a inibegay niyan rekano."
YOSOWA 24
So Kiyapemataani ko Kapasadan roo sa Sikim
Oriyan iyan na linimod i Yosowa so langon a mbatabataa manga Israil roo sa Sikim.
Piyakisogoan iyan so manga pelokelokesen, manga olowan, manga pangongokom ago so
manga sanasanaan iran, na miyangadap siran ko kamamasaan o Tohan.
2 Na pitero i Yosowa ko langon o manga taw a "Giyai i kabasa o Allah a so Tohan o
manga Israil: Sii ko miyanga oona a gawii na so manga apoapoan iyo a rakes i Tirah a
ama o Ibrahim ago Nahor na mababaling siran ko onaan o Lawasaig a Yopratis, na
sominimba siran ko salakaw a manga tohan.
3 Ogaid na kinowa ko so apo iyo a Ibrahim a poon ko inged ko sabala a lawasaig na
piyakapagenebeneb aken sekaniyan ko dalem a inged a Kanaan na bigan aken sa madakel
a manga mbawataan. Inibegay aken on si Iskak,
4 Na sii ki Iskak na inibegay aken si Yakob ago si Isaw. Inisenggay aken ki Isaw so
kapalawan a inged a Idomiya a mapekewali niyan, ogaid na si Yakob ago so manga wata
iyan na somiyong sa Misir.
5 “Oriyan iyan na siyogo aken roo so Mosa ago so Aron, na siniksa aken so manga
Imisiren a nggolalan ko pinggolaola ko sii kiran. Kagiya maipos oto na iniliyo aken
sekano roo.
6 Kagiya iliyo aken so manga apo iyo roo sa Misir na siyaloba siran o manga Imisiren a
kikakaro ago kikokoda. Kagiya iniraot so manga apo iyo ko Mariga a Ragat
7 Na gomiyoraok siran sa tabang ko Allah na piyageletan aken siran sa maliboteng ago so
manga Imisiren. Inikolob aken kiran so ragat na piyangeled aken siran on. So den so
manga mata niyo i miyakailay ko pinggolaola ko roo sa Misir.
"Miyatey kano a mababaling ko disirto.
8 Oriyan iyan na inowit aken sekano ko inged o manga Amoriyo a kibabaling sii sa
sebangan a Yordan. Miyakitidawa siran rekano ogaid na piyalad aken siran ko lima niyo.
Bininasa ko siran sii ko kapegantap iyo kiran, na miyatangan niyo so lopa iran.
9 Oriyan iyan na si Balak a wata i Sipor, a so dato sa Mowab, na mitiyagar sa
kapakipetidawa iyan sa Israil. Piyakisogoan iyan si Balam a wata i Biyor na piyangni
niyan on a isinta kano niyan.
10 Ogaid na da ko pakinega si Balam, na riyakmatan kano niyan baden, na piyakalidas
aken sekano ko kapaar i Balak.
11 “Rominipag kano sa Yordan na inisampay kano sa Yariko. Miyakitidawa rekano so
manga taw sa Yariko a lagid mambo o manga Amoriyo, manga Pirisiyo, manga
Kanaaniyo, manga Hitiyo, manga Girgasiyo, manga Hibiyo ago so manga Hibosiyo, ogaid
na piyalad aken siran rekano.
12 Somiyogo ako sa manga taboowan a keona rekano a inipanendeg iran so dowa kataw a
dato o manga Amoriyo sii ko kapegantap iyo kiran. Kena ini a ba miyakanggolalan ko
manga pedang iyo ago manga pana.
13 Bigan aken sekano sa lopa a da niyo ndokawi ago so manga siti a da niyo bangona a
babalingan iyo imanto. Pepangangan kano ko onga o manga waged a obas ago manga
kayo a olibi a da niyo pamolaa.
14 “Kagiya ka maoto," a tig i Yosowa, "na kaleken iyo so Allah na pangongonotani niyo
sa iklas ko ginawa niyo ko kapeparatiyayaa niyo ron. Lebaden iyo so manga katohanan o
manga apo iyo a sinimba iran roo ko sabala a Lawasaig a Yopratis ago roo sa Misir na so
bo so Allah i pangongonotani niyo.
15 Ogaid na o di kano kebaya mangongonotan ko Allah na pilia niyo imanto o antawaa i
pengongonotanan iyo apiya anda ko manga tohan a sinimba o manga apo iyo roo ko
sabala o lawasaig o di na so manga tohan o manga Amoriyo a sisii ko lopa a babalingan
iyo. Ogaid na so saken on peman ago so pamiliya ko na pengongonotanan ami so Allah."
16 Na somimbag so manga taw a tig iran a "Makawatan rekami so katelikodi ami ko
Allah sa kapengongonotani ami ko salakaw a manga tohan!
17 Ka so Allah a Tohan tano i miyakaliyo rektano ago so manga apo tano ko inged a
Misir a ron tano miyapangongoripen, na kiyamasaan tano angkoto a manga ala a nanao a
pinggolaola niyan roo. Lininding tano niyan ko langon o kiyapanadaan tano sii ko manga
nasiyon a inipanagad tano.
18 Sii ko kapesorongi tano sangkai a inged na inipanendeg o Allah so manga Amoriyo
ago so ped a manga nasiyon a kibabaling on. Kagiya ka maoto na pengongonotanan ami
mambo so Allah ka sekaniyan i Tohan tano."
19 Na pitero i Yosowa ko manga taw a "Masiken a di niyo kegaga so kapengongonotani
ko Allah ka soti sekaniyan a Tohan; tanaod sekaniyan a Tohan a di niyan iperila so manga
dosa niyo ago so kasosopak iyo.
20 O talikodi niyo sekaniyan ko kapengongonotani niyo ko manga tohan o manga rait na
sengoran kano niyan ago siksaan. Mbinasaan kano niyan apiya pen o piyakapiya kano
niyan gowani."
21 Na pitero o manga taw ki Yosowa a "Kena, ka pengongonotanan ami so Allah!"
22 Tig i Yosowa ko manga taw a "Sekano den i makapeseksi sa ginawa niyo a tiyomo iyo
so kapengongonotani ko Allah."
"Oway, sekami den i manga saksi on," a tig iran.
23 “Kagiya ka maoto," a tig i Yosowa, "na lebaden iyo imanto angkoto a manga
katohanan o manga rait a matatago rekano na go niyo pakapananangorani so manga poso
iyo ko Allah a Tohan o Israil."
24 Na tig o manga taw ki Yosowa a "So Allah a Tohan tano i peratiyayaan ami ago
pengongonotanan."
25 Mandiyadi na mimbaal si Yosowa sa kapasadan mipantag ko manga taw sii den
sangkoto a gawii roo sa Sikim, na bigan iyan siran sa manga kokoman ago manga sogoan
a ipenggolalan iran.
26 Na inisorat i Yosowa angkai a manga katero sii ko ribro a Kitab o Tohan. Oriyan iyan
na kominowa sekaniyan sa mala a ator na inibetad iyan ko atag o kayo a Kalipapa a
marani ko Soti a Darpa a pesimbaan ko Allah.
27 “Ilaya niyo," a tig iyan ko langon o manga taw, "ka giyangkai a ator na aya rektano
peseksi, ka miyaneg iyan so langon o manga katero a pitero rektano o Allah. Kebaloy ai a
peseksi sa kakebenari rekano o barobaa niyo so miyatero o Tohan iyo."
28 Na piyakabaling i Yosowa so manga taw na komiyasoy so oman i isa kiran ko darpa a
miyakewali niyan.
Inilebeng si Yosowa
29 Kagiya maipos ai langon na si Yosowa a wata i Non a so oripen o Allah na miyatay a
miyakapagidad sa magatos ago sapolo ragon.
30 Inilebeng iran sekaniyan sii ko lopa a miyakewali niyan roo sa Timnat Sirah sii ko
kapalawan a inged sa Ipraim sii sa pagotaraan o Palaw a Gaas.
31 Sii ko kaooyagoyag pen i Yosowa na pepangongonotanan o manga Israil so Allah, na
sii ko oriyan o kiyapatay niyan na initaros iran ai ko kapepaginetaw pen o manga
pelokelokesen a miyakailay ko langon taman a pinggolaola o Allah sabap ko manga Israil.
32 So manga tolan o Yosop a initelon o manga Israil a poon sa Misir na inilebeng iran sa
Sikim ko sabagi ko lopa a miyapamasa o Yakob a magatos a pelata a pirak sii ko Hamor a
ama i Sikim. Giyangkai a lopa na miyakewali den o manga mbawataan o Yosop.
33 Miyatay mambo si Iliyasar a so wata i Aron, na inilebeng iran sekaniyan ko kapalawan
a inged sa Ipraim sii sa inged a Gibiyah a inisenggay a rek o wata iyan a si Pinihas.
MANGA PANGONGOKOM
MANGA PANGONGOKOM 1
Miyakitidawa so manga Israil ko Da Pen Mabogaw a manga Ikanaanen
Sii ko oriyan o kiyapatay i Yosowa na inisean o manga Israil so Allah a "Antawaa rekami
i paganay a melalakaw a makipetidawa ko manga Ikanaanen?"
2 Inisembag o Allah a "So mbatabataa Yodah, ka piyalad aken kiran den so lopa."
3 Na pitero o manga taw sa Yodah ko manga pagari ran a mbatabataa Simiyon a "Onoti
kami niyo ko lopa a miyambagian ami sa kanggobata tano ko manga Ikanaanen. Oriyan
iyan na magonot kami rekano bo ko lopa iyo." Na miyonot kiran so manga taw sa
Simiyon.
4 Kagiya gomobat so Yodah na piyalad kiran o Allah so manga Ikanaanen ago so manga
Pirisiyo, na piyamono iran so sapolo nggibo a manga taw roo sa Bisik.
5 Miyatoon iran so dato Adonibisik roo sa Bisik na miyakitidawa siran on na tiyaban iran
so manga Ikanaanen ago manga Pirisiyo.
6 Miyalagoy si Adonibisik ogaid na riyaot iran sekaniyan na diyakep iran, na piyamotolan
iran sa manga ama a lima ago ama a ai.
7 Na pitero i Adonibisik a "Aden gowani a pito polo a manga dato a kiyapotolan aken sa
manga ama a lima ago ai a pepamorot sa pangenengken a pepanga oodod ko didalem a
lamisaan aken. Biyadalan ako imanto o Allah ko pinggolaola ko kiran." Na inowit iran
sekaniyan roo sa Yarosalim na roo den miyatay.
So Mbatabataa Yodah na Tiyaban iran a Yarosalim ago giya Hibron
8 Giyobat pen o manga taw sa Yodah so siti a Yarosalim na miyaagaw iran. Piyamono
iran a pedang so manga taw ron na tiyotong iran so siti.
9 So kiyaipos ai na tomiyaros siran makitidawa ko manga Ikanaanen a kibabaling ko
kapalawan ago roo sa Nigib ago sii ko kapantaran.
10 Siyondolan iran pen so manga Ikanaanen a kibabaling sa Hibron (a bebetowan gowani
sa KiriyatArba) na roo iran tiyaban so manga mbawataan o Sisiyay, si Ahiman ago si
Talmay.
Tiyaban i Otniyal so siti a Dibir
11 Ipoon roo na tomiyaros siran ko siti a Dibir (a bebetowan gowani sa KiriyatSipir).
12 Na pitero i Kaleb a "Pakipengaroma ko so wata aken a babay a si Aksah ko mama a
nggobat ago makaagaw ko siti a KiriyatSipir."
13 Na si Otniyal a wata i Kinas a so ari i Kaleb i miyakakowa on, na piyakipangaroma on
i Kaleb so wata iyan a si Aksah.
14 Sii ko gawii a kiyapakatepi iran den na inisango i Aksah ki Otniyal a kapakapangni
niyan ki ama iyan sa lopa. Na sii ko kiyatepad i Aksah ko kimar iyan na iniise on i Kaleb
a "Antonaa i pagangin ka raken?"
15 Inisembag iyan on a "Begi ako ngka sa pamemegayan. So lopa a inibegay ngka raken
roo sa Nigib na mamara a darpa. Kapedipedi ka bo na begi ako ngka pen sa aden a
pakaig on." Na inibegay ron i Kaleb so manga bowalan roo sa kaporoan ago sa kabebaan.
So Kiyapakataban o Mbatabataa Yodah ago Baniyamin
16 So manga Kiniyo a mbawataan o panogangan o Mosa na miyamangonot ko manga taw
sa Yodah ko kiyaawa iran sa Yariko a so siti a bebetowan sa 'Manga kayo a Rogan.' Na
roo siran komiyaden a maaped ko manga taw a kibabaling sa disirto sa Yodah sii sa Nigib
a marani ko siti a Arad.
17 Samaoto na miyonot so manga taw sa Yodah ko manga pagari ran a manga taw sa
Simiyon ka giyobat iran so manga Ikanaanen a kibabaling sa Sipat, na gibagiba iran so
siti. Sabap roo na bitowan ai sa Hormah.
18 Liyo ron pen na miyaagaw iran so manga siti a Gasa, Askilon ago Ikron a rakes o
19 Tiyabangan o Allah so manga taw sa Yodah na miyatangan iran so manga inged ko
kapalawan, ogaid na da iran mabogaw so manga taw a kibabaling ko kapantaran ka
kagiya aden a manga karo iran sa katidawa a potaw.
20 Giya Hibron na inibegay ki Kaleb ka giyoto so initopa o Mosa, na piyamogaw ron i
Kaleb so manga mbawataan o telo kataw a manga wata o Anak.
21 Ogaid na so manga taw sa Baniyamin na da iran mabogaw so manga Hibosiyo a
kibabaling sa Yarosalim, na taman imanto na pepeginged so manga Hibosiyo a maaped
ko manga taw sa Baniyamin roo sa Yarosalim.
Miyaagaw o Mbawataan o Yosop a Siti a Bitil
22 So manga mbawataan o Yosop na somiyong siran sa Bitil sa kanggobata iran on na
tiyabangan siran o Allah.
23 Somiyogo siran sa manga makapenoriman sa Bitil (a bebetowan gowani sa Lods).
24 Miyakailay so manga panonoriman sa mama a lominiyo ko siti na pitero iran on a
"Toroon ka rekami o andamanaya i kapekasoled ami ko siti ka pepiyapiyaan ami seka."
25 Mandiyadi na pinggonanao niyan kiran so kisoled iran ko siti, na piyamono iran a
pedang so langon a taw ron a liyo ron angkai a mama ago so langon o pamiliya niyan.
26 Oriyan iyan na somiyong angkai a mama ko pagiingedan o manga Hitiyo a roo den
miyangon sa siti a bitowan iyan sa Lods a aya niyan ngaran taman imanto.
So manga Taw a Da Mabogaw o manga Israil
27 So mbatabataa Manasih na da iran bogawa so manga magiinged sa Bit Siyan, Taanak,
Dor, Ibliyam ago sa Migido a rakes o manga pepamagonayonayan sangkai a manga siti ka
totomegel den so manga Ikanaanen sa kapakababaling iran sangkoto a lopa.
28 Sii ko kiyapakabager o manga Israil na tigel iran so manga Ikanaanen a dii
makanggalebek ogaid na da iran siran langon bogawa.
29 So pen so mbatabataa Ipraim na da iran bogawa so manga Ikanaanen a kibabaling sa
Gisir. Sabap roo na pepeginged roo den so manga Ikanaanen a maaped kiran.
30 So pen so mbatabataa Sibolon na da iran bogawa so manga magiinged sa Kitron ago
sa Nahalol na pepeginged roo den so manga Ikanaanen a maaped kiran. Ogaid na tigel
siran o manga Israil a dii makanggalebek.
31 So pen so mbatabataa a Asir na da iran bogawa so manga magiinged sa Ako, Sidon,
Aklab, Aksib, Hilbah, Apik ago sa Rihob.
32 Sabap roo na pepeginged den so manga taw sa Asir a maaped ko manga Ikanaanen ka
da iran siran bogawa.
33 So mambo so mbatabataa Naptali na da iran bogawa so manga magiinged sa Bit Simis
ago sa Bit Anat, na pepeginged den so manga taw sa Naptali a maaped ko manga
Ikanaanen a kibabaling sangkoto a lopa, ogaid na miyategel so manga taw sa Bit Simis
ago sa Bit Anat a dii makanggalebek.
34 So manga Amoriyo na tigel iran makatareg so mbatabataa Dan ko manga kapalawan.
Da iran peroa o ba siran makatondagay ko kapantaran.
35 Totomegel den so manga Amoriyo sa kapakababaling iran ko Palaw a Hiris, sa
Aidiyalon ago sa Siyaalbim. Ogaid na kagiya makala so kapaar o manga mbawataan o
Yosop na tigel iran so manga Amoriyo a dii makanggalebek.
36 So temanaan o manga Amoriyo na ipoon ko okita sa Akrabim a iniraot den sa Sila a
makalelepas on pen.
MANGA PANGONGOKOM 2
So Malaikat o Allah sii sa Bokim
So Malaikat o Allah na somiyong sa Bokim a poon sa Gilgal. Na pitero iyan ko manga
Israil a "Iniliyo aken sekano roo sa Misir na inowit aken sekano ko lopa a inisepa aken a
imbegay aken ko manga apo iyo. Tig aken a 'Di aken den mbarobaan so kapasadan a
inembaalan aken mipantag rekano.
2 Di kano pakipepasadanowai ko manga taw a kibabaling sangkai a lopa, ka ba niyo den
gebaa niyo so manga aparan iran.' Ogaid na da ako niyo paratiyayaa. Ino niyo ai
penggolaolaa?
3 Sabap roo na peteroon ko rekano imanto a di aken siran den mbogaon sii ko kapegantap
iyo kiran. Kebaloy siran a manga sorok sii ko kilid iyo, na pekalitag rekano so manga
katohanan iran."
4 Sii ko kiyateroa sii o Malaikat o Allah ko isa ka maginged a Israil na miyakagoraok
siran sa matanog.
5 Na bitowan iran angkoto a darpa sa Bokim (aya maana niyan na 'so dii
mamanggoraok'), na roo siran somiyapaat ko Allah sa manga korban.
So Kiyapatay i Yosowa
6 Na piyakalalakaw i Yosowa so manga Israil na somiyong so oman i isa kiran ko lopa a
mapekewali niyan kaan iyan matangan.
7 Sii ko kaooyagoyag pen i Yosowa na pepangongonotanan o manga Israil so Allah, na sii
ko oriyan o kiyapatay niyan na itataros iran ai sii ko kapepaginetaw pen o manga
pelokelokesen a miyakailay ko langon taman a pinggolaola o Allah sabap ko manga Israil.
8 Na si Yosowa a wata i Non a so oripen o Allah na miyatay a miyakamagatos ago sapolo
den ragon a idad iyan.
9 Inilebeng iran ko lopa a bagian iyan roo sa Timnat Hiris sii ko kapalawan a inged sa
Ipraim sii sa pagotaraan a Palaw a Gaas.
So da Kaparatiyayaa o manga Israil ko Tohan
10 Miyamatay mambo so langon a taw a miyaginetaw ko masa i Yosowa na miyamakala
so miyakasalono a manga taw a di iran kilalaan so Allah aya pen o ba iran katawi so
manga pinggolaola niyan a kamapiyaan o Israil.
11 Na minggolaola so manga Israil sa marata sii ko kapekeilaya on o Allah na
miyangongonotan siran ko katohanan a Baal.
12 Tiyalikodan iran so Allah a Tohan o manga apo iran a miyakaliyo kiran sa Misir na
miyananangoran siran ago miyamanimba ko salakaw a manga tohan o manga taw a
makalilibet kiran, na piyakakerangit iran so Allah.
13 Tiyalikodan iran sekaniyan na piyangongonotanan iran so Baal ago so manga Astorit.
14 Na mimborngat so gani o Allah ko manga Israil na piyalad iyan siran ko kapaar o di
kiran dii nggogobat a di iran siran dii tebanan. Piyakipaar iyan siran ko manga ridoay
iran ko melilibeta kiran na di siran kiran den pekaato.
15 Oman siran melalakaw a makipetidawa na peridoon siran o Allah ka giyoto i inisepa
iyan kiran, na tanto siran a kiyaregenan.
Piyanabangan o Allah so manga Pagtaw niyan
16 Apiya pen oto na inibegay kiran o Allah so manga pangongokom a pepekasabet kiran
ko kapaar o manga ridoay iran a di kiran dii teban.
17 Ogaid na di pekinegen o manga Israil so manga pangongokom iran ka
miyananangoran siran ko salakaw a manga tohan na sominimba siran on. Magaan so
magaan a kiyaawai ran ko lalan a kideg o manga apo iran a miyamanoman ko manga
sogoan o Allah,
18 Igira a bigan siran o Allah sa pangongokom na petebangan o Allah so pangongokom
na pesebeten iyan so manga taw ko kapaar o manga ridoay iran taman ko kaooyagoyag
pen o pangongokom. Ka ipekepedi siran o Allah sii ko kapeperego iran sabap ko siran
oto a di kiran dii mangarasi kiran ago peperarasay.
19 Ogaid na anda den i kapatay o pangongokom na kesoy bo peman so manga taw ko asal
a okitokit iran a lebi pen a marata a di so manga apo iran a di siran dii mangongonotan
ago pepamanimba ko salakaw a manga tohan. Di iran inggenek so marata a di iran dii
nggolaolaan ago so kategas i olo a manga okitokit iran.
20 Sabap roo na tanto a kiyararangitan o Allah so manga Israil na pitero iyan a "Siyogok
angkai a manga taw so kapasadan a inisogo aken ko manga apoapoan iran a kapetomana
on. Sabap sa da ako iran paratiyayaa
21 Na di aken den mbogaon ko kapegantap iran so apiya anda ko manga nasiyon a da pen
mabogaw i Yosowa isako matay.
22 Pagosaren aken angkai a manga nasiyon a kitepeng aken ko manga Israil kaan mailay
o ba iran pepiyapiyai komedeg so manga lalan aken a datar o pinggolaola o manga
apoapoan iran."
23 Giyoto i sabap a liyamba roo o Allah angkoto a manga nasiyon. Kena a ba
miyakaisaisa a kiyabogawa niyan kiran aya pen o ba niyan siran langon piyalad ko kapaar
i Yosowa.
MANGA PANGONGOKOM 3
So manga Nasiyon a Miyalamba sii ko Inged
Kagiya ka maoto na aden a manga nasiyon a liyamba o Allah sii ko inged kaan iyan
katepengi so manga Israil a da den makaokit ko apiya anda ko manga katidawa roo sa
Kanaan.
2 Pitibaba iyan ai ka giya bo a kipengendaon iyan ko kapakipetidawa sii ko manga Israil a
ba di labaw ko siran oto a da den a katawi ran on gowani.
3 Aya miyalamba a manga nasiyon na so manga taw a ndadatoan o lima a dato a Pilistiyo,
so langon a manga Ikanaanen, so manga taw sa Sidon ago so manga Hibiyo a kibabaling
ko kapalawan sa Libanon ipoon sa Palaw a Baalhirmon taman sa Libohamat.
4 Miyalamba siran roo a kitepeng ko manga Israil kaan mailay o ba iran tomana so manga
sogoan o Allah a inibegay niyan ko manga apo iran a miyakanggolalan ko Mosa.
5 Kagiya ka maoto na pepeginged so manga Israil a maaped ko manga Ikanaanen, manga
Hitiyo, manga Amoriyo, manga Pirisiyo, manga Hibiyo ago so manga Hibosiyo.
6 Miyakindedarodopai siran sangkai a manga taw na piyangongonotanan iran so manga
tohan iran.
Si Otniyal
7 Minggolaola so manga Israil sa kamarataan sii ko kapekeilaya on o Allah. Piyakalipat
iran so Allah a Tohan iran na sinimba iran so manga katohanan a Baal ago Asirah.
8 Sabap roo na mimborngat so gani o Allah ko manga Israil na piyakipeges iyan siran ko
dato sa Misopotamiya a si Kosiyan-Risiyataim. Na mipapaar iyan so manga Israil ko
miyakawalo ragon.
9 Ogaid na kagiya gomoraok so manga Israil ko Allah sa tabang na bigan iyan siran sa
mama a pekapanabang kiran a si Otniyal a wata i Kinas a so ari i Kaleb, na siyabet iyan
siran.
10 Minitemo rekaniyan so Roh o Allah na miyabaloy sekaniyan a pepangokom ko manga
Israil. Lomiyalakaw si Otniyal sa kapakipetidawa na piyalad on o Allah si KosiyanRisiyataim a dato sa Misopotamiya na tiyaban sekaniyan i Otniyal.
11 Mandiyadi na lomilintad so inged ko soled o miyakapat polo ragon taman ko kiyapatay
i Otniyal a wata i Kinas.
Si Ihod
12 Minggolaola peman sa marata so manga Israil ko kapekeilaya on o Allah, na
piyakabager o Allah si Iglon a dato sa Mowab kaan iyan mipaar so Israil.
13 Miyakipagabanga si Iglon ko manga Amoniyo ago so manga Amalik na giyobat iran a
Israil na miyaagaw iran so siti a Yariko.
14 Na mipapaar i Iglon a dato sa Mowab so manga Israil ko miyakasapolo ago walo
ragon.
15 Gomiyoraok peman so manga Israil ko Allah sa tabang na bigan iyan siran sa
pekasabet kiran a si Ihod a padiwangan a mama a wata i Gira a ped ko mbatabataa
Baniyamin. Siyogo sekaniyan o manga Israil a aya pegawid ko pirak a imbowis iran sii ki
Iglon a dato sa Mowab.
16 Na mimbaal si Ihod sa gonong a dowa i garangan a tenga sa mitros a katas iyan na
initakip iyan ai ko kawanan a kilid iyan ko didalem o nditaren iyan.
17 Oriyan iyan na inawidan iyan so pirak a imbowis ki Iglon; na tanto a kaolit a mama si
Iglon.
18 Kagiya mibegay ron i Ihod so pirak na piyakabaling iyan so manga mama a kiaawid
on.
19 Miyonot sekaniyan kiran taman ko kowari sa Gilgal, ogaid na komiyasoy bo ko dato
Iglon na pitero iyan on a "Aden a pagenes a peteroon ko reka, dato."
Na pitero o dato ko manga orobarang iyan a renek siran, na lominiyo siran langon ko
rowang.
20 Miyobay si Ihod ki Iglon sii ko kaoontod iyan a da a ped iyan ko marenggay a milik
iyan ko kaporoan o torogan na pitero iyan on a "Aden a peteroon ko reka a poon ko
Tohan." Tominindeg so dato
21 Na biyokot i Ihod a diwang a lima so gonong a mitatakip ko kawanan a kilid iyan na
inibaseg iyan ko tiyan o dato.
22 Miyaalep on so gonong a rakes o soongan iyan na lomiyambas ai ko likod o dato. Da
ini badota i Ihod ko tiyan iyan na miyakandemet on so sibo.
23 Na lominiyo si Ihod ko rowang na likeban iyan so manga pintoan ago piyananggalan
iyan
24 Na miyawa roo.
Kagiya maipos sekaniyan na komiyasoy bo so manga orobarang i Iglon na miyailay
iran a tatanggalan so manga pintoan o rowang. Aya katao iran on na sii sa soled so dato a
pesong sa ig
25 Na nomiyayaw siran. Ogaid na kagiya matey a da niyan kalekai so manga pintoan na
kiyasasalakawan siran na kominowa siran sa gonsi na likaan iran, na makakekelit bes so
dato iran ko tabla a miyatay den!
26 Sii ko kiyanayaw iran na miyalagoy si Ihod. Somiyagad sekaniyan ko manga kowari
na miyagapas sa Sairat.
27 Sii ko kiyapakaoma niyan ko kapalawan sa Ipraim na miyamogiyong sekaniyan a
initawag iyan ko manga Israil ko kapetidawa, na piyakaonot iyan siran tomondagay ko
manga bobongan.
28 “Tondoga ko niyo," a tig iyan kiran, "ka piyalad o Allah so manga ridoay niyo a manga
Mowabiyo ko kapaar iyo." Na tiyondog iran sekaniyan a pesong ko kapantaran na inagaw
iran so darpa a peripagan o manga Mowabiyo ko lawasaig a Yordan, na da iran perowa o
ba aden a makaripag on a sakataw bo.
29 Na manga sapolo nggibo a manga Mowabiyo a miyapatay iran sangkoto a gawii a
langon oto manga wawaraw ago manga babager a manga sondaro. Da den a isa kiran bo
a ba miyakapalagoy.
30 Tiyaban o manga Israil a Mowab sangkoto a gawii na lominintad so inged ko soled o
miyakawalo polo ragon.
Siyamgar
31 Aya miyakatalondog a somiyabet ko manga Israil na si Siyamgar a wata i Anat.
Miyakapatay sekaniyan sa nem gatos a manga Pilistiyo a aya minipatay niyan kiran na so
ipenggaroti ko sapi.
MANGA PANGONGOKOM 4
Si Diborah ago si Barak
Sii ko oriyan o kiyapatay i Ihod na minggolaola peman so manga Israil sa marata ko
kapekeilaya on o Allah.
2 Na piyalad siran o Allah ko kapaar i Yabin a isa a dato a taga Kanaan a ndadato sii sa
siti a Hasor. So komandir o manga sondaro niyan na si Sisira a mababaling sa Harosit
Hagoyim.
3 Si Yabin na siyaw gatos a manga potaw a karo niyan sa katidawa na masarangit a
kapepangarasii niyan ko manga Israil ko soled o dowa polo ragon. Sabap roo na
gomiyoraok so manga Israil ko Allah sa tabang.
4 Aya pepangokom ko manga Israil sangkoto a masa na so babay a nabi a si Diborah a
karoma i Lapidot.
5 Di sekaniyan dii mangokom sii ko atag o kayo a korma a bebetowan sa Kayo a Diborah
sii sa pageletan a Ramah ago giya Bitil sii ko kapalawan sa Ipraim, na pepamanong roo so
manga Israil a pepekikokom siran on.
6 Miyakaisa a gawii na piyakisogoan iyan si Barak a wata i Abinowam a taga siti a Kidis
sa Naptali na pitero iyan on a "Giyai i inisogo reka o Allah a Tohan o Israil: 'Lalakaw ka
na timo ka sa sapolo nggibo a manga mama a ped ko manga mbatabataa Naptali ago
Sibolon na pakaonota ngka siran roo sa Palaw a Tabor.
7 Pagagaken ko si Sisira a komandir o manga sondaro i Yabin a rakes o manga karo niyan
ago manga sondaro sa kapakipetidawa iran reka roo ko Lawasaig a Kison, na peladen ko
siran sii ko kapaar ka. ' "
8 Na pitero on i Barak a "O pagonot ka raken na song ako roo, ogaid na o di ka raken
pagonot na di ako roo song."
9 Somimbag si Diborah a "Oway, magonot ako reka, ogaid na sabap sangkanan a
miyapamikir ka na di ka kebantogan sangkai a lalakaw ngka, ka peladen o Allah si Sisira
ko isa a babay." Mandiyadi na miyonot si Diborah ki Barak sa kasong iran sa Kidis
10 Na roo tinimo i Barak so manga mbatabataa Sibolon ago Naptali, na sapolo nggibo a
manga mama a miyamangonot rekaniyan, na miyonot mambo si Diborah.
11 Sa da pen ai kanggolaola na si Hibir a Kiniyo na biyangon iyan so barombarong iyan a
marani sa Kidis ko obay o kayo a Kalipapa roo sa Saanaim ka miyogalin sekaniyan sa
babalingan a mawatan ko ped a manga Kiniyo a aya kiyababadan ko Hobab a bati o
Mosa.
12 Kagiya katokawan i Sisira a tomiyakedeg si Barak ko Palaw a Tabor
13 Na tinimo iyan so siyaw gatos a manga potaw a karo niyan ago so langon o manga
sondaro niyan na lomiyalakaw siran a poon sa Harosithagoyim roo den ko Lawasaig a
Kison.
14 Na pitero i Diborah ki Barak a "Senser ka den! Giyai den i gawii a kapelada o Allah ki
Sisira ko kapaar ka, ka pepangonaan reka so Allah." Mandiyadi na tomiyondagay si
Barak ko Palaw a Tabor a oonotan o sapolo nggibo a manga sondaro niyan.
15 Sii ko kiyagobat i Barak na piyakalekan o Allah si Sisira ago so langon o manga
pangongolin ko manga karo niyan ago manga sondaro. Tomipad si Sisira ko karo niyan
na domiyarabay sa kapelagoy niyan.
16 Ogaid na inipananantal i Barak so manga karo ago manga sondaro i Sisira taman roo
sa Harosit Hagoyim. Na miyanga bobono so langon o manga sondaro i Sisira. Da den a
sakataw kiran bo a ba miyakapagoyag.
17 Si peman si Sisira na pepelalagoy a pepegapas ko barombarong i Hail a karoma i Hibir
a Kiniyo sabap sa dii ngginawai si Yabin a dato sa Hasor ago so pamiliya i Hibir.
18 Lominiyo si Hail a magalaw ki Sisira na pitero iyan on a "Bolos ka, kadnan ko; bolos
ka sii den; di ka pekelek." Na somiyoled si Sisira ko barombarong na siyapengan i Hail
sa tanggob.
19 “Pekewaw ako," a tig i Sisira. "Kapedipedi ka bo na pakainoma ko ngka sa ig." Na
lomika si Hail ko petegoan sa gatas na piyakainom iyan sekaniyan na tiyanggoban iyan
bo.
20 Tig pen i Sisira a "Tindeg ka san ko gimowa o barombarong na o aden a pekaoma a
ipagise iyan reka a 'Ba aden a taw san?' na teroa ngka on a da. "
21 Ogaid na kagiya kanekan sa torog si Sisira ka minikopay den na kominowa si Hail sa
lapek a barombarong ago bakbak na minanay mobay ki Sisira na piyopok iyan so lapek ko
kilid a olo niyan a piyakalambas iyan ko lopa, na miyatay sekaniyan.
22 Na sarta a miyakaoma si Barak a dii mbanog ki Sisira, na lominiyo si Hail ka inalaw
niyan. "Soled ka," a tig iyan on, "ka pekiilay aken reka so mama a pepangilobaan ka."
Na somiyoled sekaniyan na miyailay niyan si Sisira a makakekelit ko lopa a miyatay a
lomiyambas so lapek ko olo niyan.
23 Sii sangkoto a gawii na piyakitaban o Tohan ko manga Israil si Yabin a so Ikanaanen a
dato.
24 Na ipoon roo na pelonsanan den o manga Israil makitidawa so dato Yabin taman sa
miyabinasa iran den.
MANGA PANGONGOKOM 5
So Bayok i Diborah
Sii sangkoto a gawii na si Diborah ago si Barak a wata i Abinowam na inimbayok iran
angkai a bayok:
2 Igira a pegolowan so manga pendatoon sa Israil
na pekebabaya kiran tomondog so manga taw;
podin so Allah!
3 Pamakineg kano, hey manga dato!
Lekai niyo a manga tangila niyo, hey manga pegawidan!
Pegidaidaan ko ago pemboniboniyan so Allah a Tohan o Israil.
4 Ya Allah, isako awaan ka so kapalawan sa Sair,
sii ko kiyalalakaw ngka poon ko inged a Idom
na tiyabad so doniya ago miyoran so manga gabon sa langit.
5 Milinog so manga palaw ko kapepekaoma o Allah
apiya so Palaw a Sinay sii ko kamamasaan o Allah a Tohan o Israil.
6 Sii ko masa i Siyamgar a wata i Anat,
ago sii ko manga gawii i Hail
na da den kaokiti so manga ala a lalan,
ka sii pepekaokit so dii melayalayag ko manga iito a lalan.
7 Kiyadaan sa taw so pepamagonayonayan sii sa Israil;
kiyadaan den sa taw taman ko kiyapakagemaw aken a si Diborah,
a miyakagemaw a ina sii sa Israil.
8 Isako mili so manga Israil sa bago a manga katohanan
na kiyapoonan den so dii katidawa sii ko pepegingedingedan.
Ogaid na da den a kelong o di na bangkaw a ba miyailay
sii ko pat polo nggibo a manga Israil!
9 Maampil so poso aken ko manga olowan sa Israil
ago sii ko siran oto a miyababaya kiran tomondog.
Podin so Allah!
10 Sekano a kikokoda ko manga popoti a kimar
a kioontod ko manga ampido niyo,
ago sekano a dii ndilalag ko manga lalan na pamakinega niyo!
11 Pamakinega niyo so lagam o dii mbibitiyarai
a dii timotimo ko manga darpa a pesegeban.
Pepanotolen iran so manga oontol a kiyapakadaag o Allah
ago so manga kiyapakadaag o manga sondaro niyan sii sa Israil.
Samaoto na so manga pagtaw o Allah
na tomiyondagay ko manga gimowa o siti.
12 Pagnaw ka, hey Diborah, pagnaw ka!
Pagnaw ka na pagidaida ka sa bayok!
Mbowat ka, hey Barak!
Tondaa ngka so manga biyag ka, hey wata o Abinowam!
13 Samaoto na so miyalamba a manga mama
na miyamanong ko manga olowan;
so manga pagtaw o Allah na miyamanong raken
a rakes o manga babager.
14 So ped kiran na miyakapoon sa Ipraim
a so bekaw iran na sisii sa Amalik.
Somiyong reka pen so Baniyamin
a ped o manga pagtaw ngka.
Poon sa Makir na miyamanong so manga komandir,
na miyakapoon sa Sibolon so kiaawid sa tongkas a olowan.
15 So manga pendatoon sa Isakar na miyonot ki Diborah,
oway, miyonot on si Isakar ago si Barak, na tiyondog iran sekaniyan
a di siran dii nggagaan roo ko balintad.
Ogaid na sii ko mbatabataa Robin
na mala so kiyapakandowadowa iran.
16 Ino kano petelimbegak ko obay o manga tangkal
sa kapemakinega niyo ko manga tomameng a petelo ko manga bilibili?
Oway, sii ko mbatabataa Robin
na mala so kiyapakandowadowa iran.
17 Siran oto a komakaden sa Giliyad na mitelimbegak roo sa sebangan a Yordan.
So mbatabataa Dan na ino siran tereg ko manga kapal?
Mitelimbegak so mbatabataa a Asir sii ko kilid a ragat,
a komakaden den ko manga kikasosogod.
18 Ogaid na so manga taw sa Sibolon ago Naptali
na iniserakan iran a manga niyawa iran roo ko dii tidawaan.
19 Miyakatalingoma so manga dato na mitidawa siran.
Miyakitidawa so manga dato sa Kanaan
sii sa Taanak ko obay o manga bowalan sa Migido
ogaid na da a ba iran miyateban a pirak.
20 Poon sa langit na miyakitidawa so manga bitoon;
sii ko kapeketas iran ko langit na miyakitidawa siran ki Sisira.
21 So dii mbagiyaw a lawasaig a Kison na piyayopas iyan siran
a so tanto a mabandes a lawasaig a Kison.
Hey ginawa ko, senser ka sii ko bager ka!
22 Samaoto na domiyagedeb so manga kalamaging o pepelolompat a manga koda,
a so kapepelolompat o manga babager a koda.
23 “Kamorkaan so manga taw sa Miros," a tig o Malaikat o Allah.
"Kamorkaan siran sa tanto a masakit
ka da siran makatalingoma sa kapagogopi ran ko Allah
sa kapagogopi ran ko Allah ko di niyan dii kapakitidawa ko manga babager a sondaro."
24 Lebi a rarakmatan ko manga babay si Yail
a so karoma i Hibir a Kiniyo
lebi sekaniyan a rarakmatan ko manga babay a kibabaling ko manga barombarong.
25 Miyangni si Sisira sa ig,
na bigan i Yail sa gatas.
Inowitan iyan sa mbabatik a gatas a matatago ko ladiya a patot ko tanto a taw.
26 Komiyawa si Yail a diwang sa lapek a barombarong,
na komiyawa a kawanan sa bakbak o panday,
na piyopok iyan a bakbak si Sisira, na siyasa iyan so olo niyan;
biyowar ago biyaseg iyan so otek iyan.
27 Miyaoteng sekaniyan a minipayodas;
miyakakelit sekaniyan a miyatay ko obay o ai i Yail.
28 Lomiyangkaw ko dirowasa so ina i Sisira;
sii ko malilikod o diyalosi na inigoraok iyan a
"Ino matey a kapekaoma o karo niyan?
Ino tano di keneg so dagedeb o manga karo niyan?"
29 Somimbag rekaniyan so manga oongangen a raga niyan,
na omanoman iyan mambo dii teroon sa ginawa niyan a
30 “Di iran dii mbagibagiin so miyanga teteban iran
a so sakataw a babay o di na dowa para ko oman i sondaro
a so manga pipiya i paras a nditaren a kowaan i Sisira,
ago mbarambarang i warna a manga bobordaan a dinis a imbegay niyan raken."
31 Pangnin ta a manga dedadas sa lagid oto
so langon o manga ridoay ngka, ya Allah!
Ogaid na malagid o alongan so pepanga bebaya reka
igira a pesebang sii ko bager iyan!
Na lominintad so inged ko soled o pat polo ragon.
MANGA PANGONGOKOM 6
Si Gidiyon
Oriyan iyan na minggolaola peroman sa marata so manga Israil sii ko kapekeilaya on o
Allah, na sii ko soled o pito ragon na papaladen siran o Allah ko kapaar o manga taw sa
Midiyan.
2 Sabap ko kapesonsinga kiran o manga Midiyan na mitiyagar so manga Israil sa manga
kapegapasan sii ko manga liyang ago manga gireb roo ko manga palaw.
3 Igira a miyakapamola so manga Israil sa pereperan na so manga Midiyan, so manga
Amalik ago so manga kibabaling sa sebangan na penggobaten iran siran.
4 Di siran dii kempo ko kalopaan na pembinasaan iran so langon a peragonen apiya
taman sa Gasa. Da a ba iran pelambaan a ikeoyag o manga Israil ka pekowaan iran so
manga bilibili, manga kambing, manga sapi ago so manga kimar.
5 Pepekaoma siran a itetalon iran so manga pangangayamen ago manga barombarong iran
a lagid siran sa kakapal o manga tarapan. Di siran den kebilang ago so manga onta iran,
na pembinasaan iran so inged sii ko katatareg iran on.
6 Na gomiyoraok so manga Israil a pekitabang ko Allah sabap sa tanto siran a
pepakamiskinen o manga Midiyan.
7 Sii ko kiyagoraok iran ko Allah sabap ko manga Midiyan
8 Na somiyogo so Allah sa nabi ko manga Israil a pitero iyan kiran a "Giyai i kabasa o
Allah a Tohan o Israil: Iniliyo aken sekano roo sa Misir a ron kano miyapangongoripen.
9 Piyokas aken sekano ko kapaar o manga Imisiren ago poon ko bager o langon a
pepangarasi rekano sangkai a inged. Piyamogaw aken siran sii ko kapegantap iyo kiran
na inibegay aken rekano so lopa iran.
10 Pitero aken rekano a 'Saken so Allah a Tohan iyo; di kano simba ko manga katohanan
o manga Amoriyo a so inged iran i babalingan iyo imanto.' Ogaid na da ako niyo
pakinega."
11 Sa masa oto na miyakatalingoma so Malaikat o Allah sa Oprah na miyontod ko atag o
kayo a kalipapa a rek i Yowas a ped ko mbawataan o Abiyasar. So wata i Yowas a si
Gidiyon na pegegik sa trigo sii ko petemekan sa arak kaan iyan mitepok so pereperan ko
manga Midiyan.
12 Miyakiilay rekaniyan so Malaikat o Allah a tig iyan a "Hey mabager a mawaraw a
mama, sisii reka so Allah!"
13 “A, Kadnan ko," a inisembag i Gidiyon, "o sisii rekami so Allah na ino rekami ini
langon mapenggolaola? Anda den so langon a piyakamemesa a pinggolaola niyan a
miyapanotol rekami o manga apo ami? Ba iran da teroa a 'Inowit tano sii o Allah a poon
sa Misir'? Ogaid na samanaya na inawaan kami den o Allah na piyalad kami niyan ko
kapaar o manga Midiyan!"
14 Na inilay sekaniyan o Allah a tig iyan a "Ika roo sii ko bager ka na sabeta ngka so
Israil poon ko kapaar o manga Midiyan. Sogoon ko seka!"
15 “A, Kadnan ko," a tig i Gidiyon, "Andamanaya i kakesabeta ko ko Israil? So manga
tonganay aken na aya lebi a malobay ko mbatabataa Manasih, na saken i lebi a mababa ko
pamiliya ko."
16 Somimbag so Allah a "Keped ako reka na penasaan ka so manga Midiyan a lagid bo o
sasakataw siran."
17 Tig i Gidiyon a "O kelimoon ako ngka na begi ako ngka sa poriba sa so Allah i di
raken dii makimbitiyarai.
18 Kapedipedi ka bo na di ka sii pegawa taman sa makakasoy ako reka a maawid ko
selasela a isepaat aken reka."
Na tig iyan a "Penayaw ako sii taman ko kapakakasoy ngka."
19 Somiyoled si Gidiyon ko walay niyan na tomininda sa mangoda a kambing ago
mimbaal sa paan a da a tapay ron a manga isa ka gantang a arina. Inisoled iyan so sapo
ko balengkat ago so sawaw niyan sii ko koden na inowit iyan ko malaikat roo ko atag o
kayo a kalipapa na inenat iyan on.
20 Pitero on o malaikat o Tohan a "Betaden ka so sapo ago so paan sangkai a ator na go
ngka on ododa so sawaw." Na pinggolaola ini i Gidiyon.
21 Na iniseko o malaikat o Allah so poro o teken a kakapetan iyan ko sapo ago so paan.
Somiyokeyaw so apoy a poon ko ator na liyamed iyan so sapo ago so paan, na miyada so
malaikat.
22 Kagiya katokawan i Gidiyon a giyoto so malaikat o Allah na pitero iyan a "Ya Allah a
Kadnan ko, miyailay aken so malaikat o Allah a makapageedapa kami!"
23 “Sii reka so kalilintad," a tig o Allah. "Di ka pekelek. Kena o ba ka petay."
24 Na miyangon roo si Gidiyon sa aparan para ko Allah, na bitowan iyan ai sa "So Allah
na aya den Kalilintad." Na ndodoo den ai taman imanto roo sa Oprah sii ko inged o
mbawataan o Abiyasar.
25 Sii sangkoto a kagagawii na pitero o Allah ki Gidiyon a "Kowaa ngka so ikadowa a
mama a sapi ko talon o ama a ka a so miyakapito ron ragon a idad iyan. Gebaa ngka so
aparan a biyangon o ama a ka para ko katohanan a Baal na pataa ngka so polaos a toos ko
katohanan a Asirah a makatitindeg ko obay niyan.
26 Bangon ka sa aparan para ko Allah a Toha

Maranao Bible - RCBI

Transcription

Similar documents

itis magazine - ITIS "ETTORE MAJORANA" di Cassino (FR)

Giugno 2013 - La Scuola Polo Liceale GUARINO VERONESE

Seimei desu ga nani ka?

Lo Shoujonk Team e lo Shoujonk Magazine cerca staff

Francia Alvernia-Tolosa-Carcassonne-Camargue

Hotel 2000 Rivazzurra di Rimini

Scarica | - Art a Part of Cult(ure)

Manuale di istruzioni

View/Open - DSpace Home